2006/09/30

تدوينه رمضانيه .. دسمه

تدوينه دسمه .. يعني مسبكه
بصراحه .. بقيت احب في رمضان اكتب تدوينه كبيره .. كل كام يوم .. وهتبقى على شكل مشاهد برضه زي اللي فاتت .. منها اوفر عدد مرات وجودي على النت .. ومنها أكب كل اللي جوايا مره واحده .. هتلاقوا افكار متضاربه و متلخبطه .. فياريت تستحملوني شويه هههههه
-
-
المشهد الأول : صاحب الدار
كان بيننا ميعاد .. كان من المفترض ألا أتأخر .. فهو صاحب الدار .. و أنا اسكن عنده بمقابل زهيد .. لن أجده لدى اي سيد آخر .. كالعاده وصلت متأخرا .. في هيئه مزريه .. لكنه كان كريما كالعاده .. و تقبلني بابتسامه جميله
كانت لديه عده مطالب .. وكان عليّ تأديتها .. لم تكن صعبه .. و لم تكن دون مقابل .. لكنني كالعاده تكاسلت .. لم اكن افكر الا في طريقه للهروب منه .. و التنصل من المسؤوليه التي القاها على عاتقي .. استمر دائما في كوني .. متجاهلا اي طلب او خدمه يطلبها مني
توقعت بعد ذلك .. أن يطردني .. فما انا بالساكن المثالي .. لا اسدد اجرة سكني .. لا البي طلباته .. لا آتي مبكرا إذا دعاني او طلبني .. العجيب انه يحبني في كل يوم اكثر من ذي قبل .. العجيب انه صار يخفض ايجاري .. بل و يقرضني متى احتجت .. يعطيني الكثير من المال ان انجزت من الاعمال اقلها و ابسطها .. ايها السيد .. انت تحيرني .. انا الآن فقط اشعر انني انتمي اليك .. احبك اكثر من ذي قبل .. لن اتأخر عليك مره اخرى .. سألبي كافه طلباتك
سبحانك اللهم .. دعوتنا للصلاه .. فكنا نفوتها .. اخبرتنا انك الرقيب العتيد .. فعصيناك في تبجح .. لكنك سبحانك و تعالى .. صبرت علينا .. و زدتنا من نعمك .. وخيراتك .. ربي .. ربنا .. إنني أحبك يا الله .. و أحب من احبك .. و احب كل عمل يقربني إليك
-
المشهد الثاني : الامتحــانـــات
الامتحانات قربت أوي .. الواحد بدأ يحس إحساس الزنقه بتاع كل سنه .. لكن المره دي الزنقه ملعبكه .. شويه احس اني فرحان لأن دي آخر سنه خلاص .. ولأني هتخرج إنشاءالله .. و شويه احس بإكتئاب .. ان خلاص الدراسه خلصت .. و احساس الصحاب و الكليه و السرمحه خلاص خلصوا .. و الاكتئاب الاكبر .. هوه احساس اللحظه .. اني داخل على ماديتين زي الزفت .. و مش مستعد .. و مش مركز بالدرجه الكافيه لاني احل كويس .. لكن املي في ربنا كبير .. اذا لو لم تكن بالمذاكره .. كانت بالدعاء .. مش الاعمال بالنيات برضه
-
المشهد الثالث : البكاء .. من شيم الرجال
لأول مره .. حصريا .. هعترف اني من الرجاله اللي ممكن تبكي .. زمان كان الواحد يتكسف يقول ان في سبب ابكاه .. أو خلاه حتى يدمع .. لكن دلوقتي .. والحمدلله .. حسيت براحه نفسيه .. لأني لسه عندي القدره على البكاء .. تفاعل جميل اوي .. بين قلبك و جسمك .. قلبك يحب .. يزعل .. يتأثر .. يبعث لجسمك اشاره رقيقه للغايه .. وجسمك بمنتهى الجنتــله .. يشاركه احساسيسه و يبكي له
مناسبه هذا الاعتراف .. هو دعاء ردده شيخ المسجد في صلاه القيام .. اللهم اني اعوذ بك من علم لاينفع .. وقلب لا يخشع .. و نفس لا تشبع .. و عين لا تدمع .. و دعوه لا يستجاب لها .. و في نهايه الكلام .. حسيت براحه غريبه .. يمكن لأني تناسيت فكره خشوع العين .. كنت بتخيل البكاء وقت سماع القرآن .. و خصوصا آيات العذاب .. سوره الحاقه تحديدا .. اللي حفظتها بس علشان جمال معانيها .. دقت الوصف فيها .. كنت بتخيل بكائي ساعتها نوع من انواع العقد النفسيه او المشاكل الدنيويه او الرياء .. لكن لما كنت بقرأها لوحدي و احس بنفس المشاعر دي .. تأكدت اني لسه بني آدم .. وبحس .. وأتأثر .. والحمدلله .... يا ترى ؟؟ آخر مره بكيت امتى
-
المشهد الرابع : بحري .. انا
وقت أكون والبحر .. لا أجد غيرها لأتذكره .. وقت ألمس مياهه الزرقاء .. لا تأبى تلك الرعشه البارده تسري في جسدي .. هي نفسها .. تلمس يدي .. و تحكيلي .. أما زلت يا بحر تحمل في طياتك أسرارها .. لا عجب أني أحدثك الآن .. و كأنها لا زالت هنا
أتذكر يوم وقفت هناك .. فوق الصخور .. أؤدي لها .. وحدها .. ما تشتهيه من الشعر .. غنيت لها .. ومن حولي النجوم .. و الأصداف .. والامواج .. على كل كلمه حب شهود .. ظلننا نغني .. كثيرا كثيرا .. وتسمع صوتي .. كأني أغني لها وحدها .. دون البشر .. أتذكر يوم تعبنا .. رقدنا .. و عينانا دارت تجاه القمر .. تقولي هنا سوف نبنينا بيتا .. يكون صغيرا .. هنا أنت تعمل .. وطفلنا يلهو في بهو الحديقه .. تثيرين شوقي .. لتلك الحياه .. ألا تتركين تفاصيل يوم .. حتى الدقيقه .. ترد ببسمه .. وتبدأ رسم .. طريق الحياه .. معا سوف نحيا .. فلا تتراجع .. ولا تخشى شيئا .. فدوما أنا كالرياح سأدفع .. خلال الصعاب .. وكل السدود .. فليس لنا في الحياه حدود
اتذكر يوم انتظرتك تأتي .. فما من مجيب .. خرجت لأبحث عنك يا عمري حتى المغيب .. و يوم .. و شهر .. تمر سنين .. أمُـنـّـي النفس بقرب الحبيب .. يومها .. تمنيتك زوجه لي .. يومها .. قلت انتي دنيتي .. وإلى الآن .. لازلت على عهدي .. يا منيتي
-
المشهد الخامس : ليه يا باشا
سيـّد باشا
كان من صغره اناني معفن
يضرب كل صحابه و يطير
عمره ما فكر يبقى حنين
ماهو في القسوه شديد وخطير
كان بيفكر دايما يكبر
ويصبح ضابط .. ليه ضبابير
يأمر .. يشخط .. يشتم .. يضرب
تحت ايديه مخبر و غفير
وكبر اسم الله عليه و اتعيّـن
اصل باباه .. جوز خالته وزير
ومسك النونو كمين في الصحرا
كلم بابا .. ابو قلب كبير
قاله يا بابا انا عايز أروّح
انا طول عمري بنام في حرير
الناس هنا كلها بتشخر
أوه لا لا .. من صوت ده شخير
قاله يا بابا .. مفيش هنا بانيو
يباخدو الدش في قلب الزير
انا مش قادر اصبر اكتر
انا هتجنن مالتفكير
قام السيد والده مفكر
قاله يا ابني خلاص تدبر
انا راح اكلم عمو سمير
ينقل شغلك سيدي كرير
ها .. و بعدين
قام بسلامته ساعة صبحيه
اصل يا عيني عنده كمين
شاف واحد واقف في الصف
شكله .. ياي .. راجل متمكن
قام حوليه .. و اداها .. لف
عجبه قوامه و شكله و شنبه
قال للصول .. هتهولي يتزف
جوه القسم عليه اتلمو
ولا ستات في ملايه لف
وقعوا يا عيني على سي السيد
من الرجاله .. دماغهم خف
قام الباشا معري الراجل
لو تعرف .. ايه عمله .. تتف
على ده الباشا
ابن الباشا
واللي جابوه
وهناك حطوه
ولا يوم سألوه
عن حق الناس اللي بياكلوه
عن ضرب القفا
ويقولك شفا
وسلاك كهربا في الجسم تلالي
وتعمل دفا
وحريم على باب القسم
تنادي و متشحتفه
على راجل جوه القسم خدوه
وكأنه اتـنـفى
وعجبي
-
المشهد السادس : افطار صائم
قرب قرب قرب
الرقاصه الفيلسوفه بتقول نعم لأفطار صائم
مش واحد بس .. يعني لأ .. لعزومه فطار
مش عشره .. يعني لأ .. لموائد الرحمن
مش ميه .. يعني لأ .. لشنط رمضان
و ميت نعم و أيوه و بالاحضان
لمشروع افطار ملايين العرب و المسلمين
من الست الفيلسوفه لكل مشاهدي التلفزيون .. و شاشه روتانا سينما
اللي مش هتقدر تغمض عنيك .. حتى في رمضان
و هتطل عليك الست دينا .. بفوازير آخر تمام
علشان تضمنلك .. صوما .. مش مقبولا .. و إفطارا .. يبدو شهيا
هنيالك يا فاعل الخير و الثواب

2006/09/25

مشاهد رمضانيه

إضغط الصوره للتكبير
-
مشاهد رمضـانيـــــــــــه
-
>>>>>>>>>>>>>>>>>
المشهد الأول : إلهي سيدي ربي
>>>>>>>>>>>>>>>>>
-
إلهي .. سيدي .. ربي .. أغـثـني
وخذ بيدي و من بـُـعدي .. أجرني
إلهي .. أنت ذو صفح .. جميل
و جـُـود واسع .. و عظيم مـّن
إلهي .. من سواك يزيل همّي
ومن أدعوه مضطرا يجبني
إلهي .. قد جنيت و أي عبد
ضعيف الخلق .. مثلي .. ليس يجني
إلهي .. ليس أجدر بالخطايا
و بالتقصير .. والزلات .. مني
إلهي .. لو أتيت بكل ذنب
فلا أولى بعفو منك عني .. إلهي
-
قصيده : إلهي سيدي ربي
إلقاء : مشاري راشد العفاسي
ألبوم : قصائد حنيني
للإستماع للقصيده إضغط هنا
-
>>>>>>>>>>>>>>>>>>
المشهد الثاني : الدراويش من تاني
>>>>>>>>>>>>>>>>>>
-
يبدو أن الدراويش رجعوا مصر تاني .. تحت مسمى الشباب الرمضـّـاني .. يعني الشباب اللي مجرد ما رمضان ييجي يبدؤا يدروشوا .. تلاقي الشباب كلهم قالك انا مش حالق دقني .. علشان احنا في رمضان .. و البنت تقولك انا مش هحط مكياج .. اصل انا في رمضان .. ده لو محجبه طبعا .. اما لو مش محجبه فتقولك انا هلبس حجاب .. والنعم والله .. هوه ده الشباب اللي يفرح بجد .. واللي مترح ما هتروح هتشوف منه .. الجميل بقه إيه .. ان الولد يقولك انا هسيب دقني علشان المفروض تربي دقنك .. ده فرض .. ف بما إني مش بحلقها في غير رمضان لازم يكون عندي دم و محلقهاش دلوقتي .. و بالمثل .. البنت تقولك اصل الميك آب .. فيه كلام .. و الحجاب عليه خلاف .. ف بلاش اعمل الوزر ده في رمضان .. يا حلاااااوه .. يعني كل واحد عارف ان ده غلط .. ف بدل ما ينوي انه يعدل الغلط ده .. لأ .. يقولك انا هعدله في رمضان بس .. يعني يا جماعه حتى ثواب النيه .. مش بياخدوه .. سبحان الله
محدش فيهم سمع إن .. أحب الأعمال إلى الله أدومها و إن قل .. و كل واحد بقه ماشي بمزاجه يفصل الدين على حسب ظروفه .. وعلشان مأكونش قاسي .. هتلاقي ناس فعلا بتكون عايزه تقرب من ربنا في الفتره دي .. وبالطريقه اللي قلت عليها .. بحسن نيه يعني .. يبقى نداء إلى الناس دي .. لما تنوي .. خلي نيتك مفتوحه .. بلاش تحددها بوقت أو ظروف .. قول انك هتسيب دقنك رضى لله .. طول السنه .. قولي انك هتخففي المكياج علطول .. قولي انك هتتحجبي طول السنه .. و الحساب بعد كده عند الله تعالى .. يعلم خائنه الأعين و ما تخفي الصدور
-
>>>>>>>>>>>>>>>>>>
المشهد الثالث : الدراويش التانيين
>>>>>>>>>>>>>>>>>>

-
استجابه ربانيه جميله في بدايه شهر رمضان الكريم لدعوات جماهير الزمالك المقهوره .. كانت نتيجتها فوز الزمالك على الاسماعيلي .. أول الدوري المصري .. اليوم في الاسماعيليه .. بنتيجه هدف للا شيء .. بصراحه .. احب اهدي الفوز ده لفريق الترسانه الكبير اوي اوي اوي .. و اقوله تحيا الشواكيش ولا عزاء للدراويش و الحناكيش
-
>>>>>>
تحديث هام
>>>>>>
ليه عتاب على زوار المدونه .. محدش فيكوا كلف خاطره يزور مدونه مش مهم و يقول رأيه في عجوه و عسليه .. يعني الواد و البت طالعين من بيوتهم في عز الولعه دي .. و في رمضان .. علشان يعملولكوا كوميكس .. و في الآخر يطلع ان محدش بيتفرج عليهم غير انا و عبدالله هههههه .. طب ادخلوا و قولو رأيكم .. لو وحشه قولو .. و لو حلوه قولو .. بس اعملوا جو كده بلاش النوم والكسل ده .. هنيالك يا فاعل الخير و الثواب .. وحدووووه

2006/09/23

رمضــان .. عندنا غير

رمضان كريم يا بني آدميييين .. بلاش طفاسه و اكل كتير .. صلو على قد ما تقدروا .. واختموا القرآن مرتين تلاته .. ربنا يتقبل منا جميعا



تدوينه رمضـــــــــــان



اولا : اعلانات
-
تنويه هام : يرجى من الساده الليلاويات قراءه بوست .. كلها ليلى و
هتعدي .. للأهميه
-
تنويه آخر هام : رمضان بدأ يا شباب .. غضوا البصر .. للأهميه

-
-
تنويه هام برضه : ترقبوا كارتون .. عجوه و عسليه .. حصريا
على مدونة مش مهم .. وحنوريك اللي عمرك ما شفته هههههه

-

-

________________________________
-
ثانيا : الكاريكاتيرات
-
اضغط الصوره للتكبير
-

-

-

-

-

-

-

-

-

2006/09/21

كلها ليلى .. و هتعدي

-
رمضان دايما فرصه لمحاسبه النفس .. و التجديد في العهد مع الله تعالى .. من هنا اقول .. ان الحياه يا ليلي لايمكن ان تكال بمكيالين .. مناسبه الكلام ده .. مش عارف .. هيه حاجه خطرت على بالي وحبيت اكتبها يمكن حد يفهمها .. و يفهمني .. اول لما صحيت و انا بقرأ الجرنان و بشرب شاي ايرل جراي .. اللي بيعدل الدماغ .. لقيت عنصر مهم جدا احنا ناسيينه
الساده الليلاويات الافاضل .. ماشيين يقولو الراجل كخه .. و الست مظلومه .. بما ان الموضوع فيه ظلم .. يبقى في مبدأ .. على اساسه وجدوا انهم يا عيني مظلومين .. نرجع للقانون .. اللي اسمه القرآن .. الشرع .. متهيألي هوه ده الدستور الأقوم و الاعدل على مستوى العالم .. يبقى نرجعله .. الاخوات الفاضلات .. عايزين الراجل يبقى نموذج اسلامي مشرف .. ميعاكسش في الشارع .. ميتعداش على حق الست في الاماكن العامه .. و بعد الجواز .. مطلوب انه يعاملها كويس و بالتي هي أحسن .. و المفروض انه ميخنقش عليها و ميقولهاش رايحه منين و جايه منين لأن في ثقه .. و المفروض انه لما يخلف يسيب بنته على حريتها و تتأخر بره زي ما هيه عايزه .. لأنها .. بنت .. و تعرف تحافظ على نفسها كويس .. كلام جميل .. وحقهم يقولو ما بدالهم
على الجهه المقابله الست ليلى .. مش عارف ليلى مين بصراحه .. مكلفتش نفسها انها تطرح نفس مبادئ الحريه دي على البنات .. مفكرتش تقول للبنت انها هيه كمان لازم تكون نموذج اسلامي .. يعني مفيش حاجه اسمها البس بودي و برمودا لأن دي حريه شخصيه و الراجل المفروض يلتزم .. مفيش حاجه اسمها اعمل ما بدالي لأن دي حريه شخصيه و الرجاله ملهومش دعوه .. مفيش حاجه اسمها ملبسش حجاب و الراجل يغض بصره .. مفيش حاجه اسمها انزل وقت مانا عايزه و ارجع وقت مانا عايزه لأني اعرف احافظ على نفسي .. مفيش حاجه اسمها اصاحب و اروح داي يوز مع الشله علشان انا بحب الفرفشه و انا محترمه و اهلي ربوني .. يعني .. لو الست عايزه الراجل يكون ماشي على الألف .. لازم هيه تمشي على الهمزه .. يعني .. مفيش حاجه اسمها الراجل يكون نموذج سوي .. و هيه تمشي على مزاجها .. يا إما المجتمع يكون صورة نموذجيه و سوي .. كل الناس فيه ماشيين حسب قانون واحد و دستور واحد .. يا إما كل واحد يعمل ما بداله .. و يمشي بالقانون اللي يريحه
انا مش بدافع عن السلوكيات الرجاليه الخاطئة .. لكن .. شويه عقل و منطق و مساواه .. ليه دايما شايفين الراجل غلطان و مقصر و رمرام و ذئب بشري و .... و محدش شايف البنات اليومين دول كاسيات عاريات .. ليه خطىء البنت حريه شخصيه .. بينما الراجل دايما في تصرفاته جلف .. عديم المسؤوليه و الاحساس .. العدل يا قوم .. مش طالب اكتر من كده
-
الخـلاصـــــــــــه
راجل محترم .. في مجتمع غير محترم .. نموذج لا يمكن يحصل .. و معادله غير قابله للتطبيق .. لأنها لما حصلت كان
هذا الرجل هو سيدنا محمد صلى الله عليه و سلم في وسط مكه بكفارها و منكراتها .. حتى الصحابه عاشوا في مجتمعات اسلاميه .. ومن جاء من بعدهم .. ده مش معناه انه مفيش رجاله ملتزمين .. لأ .. موجودين الحمدلله و ربنا يثبتهم كمان و كمان لأنهم بيحاولو على قد ما يقدروا يكونوا متلزمين .. و إن كنت اعيب على بعضهم الغلو في الالتزام و البعض الآخر يدعي الالتزام .. المهم ... اننا لما نعيش في عصر اصبحنا فيه اقرب الى مكه الجاهليه .. يعني جهر بالمعصيه .. يعني ديسكو تيك .. يعني مارينا و ما ادراك ما مارينا .. يعني محلات الخمور في كل مكان .. يعني رجال الامن بيحموا الفساد و الدعاره و المخدرات والسلاح .. يبقى معلش .. سيبوا الراجل في حاله .. و ابدؤوا بنفسكو .. لأن لو في امل الراجل يسمع من ليلى .. يبقى الامل اكبر ان ليلى الحرانه بتاعت البودي الاستوماك .. تسمع منكم اكتر
______________________________________
-
تحديث هام : زميله عزيزه .. و وزيره الصحه الفاضله في حركة كلابيز .. و المدونه الشقيه صاحبه الافكار المفرقعه جدا جدا .. قررت فجأه اعتزال التدوين .. أنا لا احب التدخل في قرارات الآخرين .. لكن ما دامت هي ذكرت أسبابها .. فمن حقي و حقكم ان تناقشوها في هذه الاسباب .. لذا فاني اطلب منكم ان تزوروا مدونتها و تقنعوها بالعدول عن هذه الفكره .. إنها زميلتنا شيريهان في مدونه أنا واللي حواليه

للعيون .. حوار

-
حاولت كثيرا ان افهم لغة العشاق .. لكني فشلت .. لم يشغل يوما معتركي كوني اشتاق .. لم تشغل عيني .. مشيتها .. او حتى الضحكه تضحكها .. أو كون رحيق محيـّـاها يشعل من حولي الآفاق .. فأنا يا قلب منحت حياتي للأعماق .. لعيون ارغب ان اكتب عنها ميثاق .. ميثاق الحب .. وحلم القرب .. لـضيّ عيون براق
-
اعشق عيناكي سيدتي .. ان يوما كانت تتبعني .. في كل مكان ترمقني .. تدفعني دفعا لنجاحي .. وتكون على الصعب سلاحي .. ولأول مره .. احببت شعورا بقيودٍ .. وحصار حولي محشودٍ .. لعيونك انتي نظرات .. فوق الأحلام
-
أعشق عيناكي سيدتي .. إن يوما تبكي بدموع .. فالدمع في عينك سيدتي لا يعني ضعفا و خنوع .. للدمع في عينك سيدتي لحن مسموع .. آهات تشجي في القلب ندوبا و صدوع .. آثرت عليكي .. لا تبكي .. فبرغم دموع اعشقها .. عشقا بجنون .. من عينك تذرف كنجوم في بحر سكون .. لكن حياتي لكي أنت .. كي تبقى عمري .. بسمتك .. كالنور في ظلمه أعماقي .. كنز مكنون
-
اعشق عيناكي سيدتي .. ان يوما انت ضممتيها .. كالطفل ينام .. كملاك حانٍ لا يعرف أرق الايام .. فحياتك انت خطيها .. وانا من حولك ابنيها .. وأشـّـيد في القلب قلاعا .. و انير بحبي ما فيها .. تحميكي .. انتي و احلامي .. و تكوني بدر لياليها
-
ملاحظة : كتبتها في المستشفى الجامعي النهارده و احنا مستنيين الدكتور ييجي علشان يمتحنا .. الحمدلله .. الانتظار برضه حلو .. بيطلع كلام مالقلب .. و احلى حاجه ان الدكتور كان لذيذ جدا و متفاهم .. و مدققش معانا اوي برغم اننا مش مذاكرين كويس :) فشل بقه .. يالا .. كل سنه و انتو طيبين .. رمضان كريم

2006/09/19

الرسم .. أصدق أنباءا من الكتب

عن نقطه شرطه الزعفرانه .. أرسم
عن إهانات الشرطه المتكرره .. أرسم
عن مؤتمر الحزب الوطني .. أرسم
الخلاصه .. الرسم .. أصدق أنباءا من الكتب
كل سنة و إنتم طيبين
انا عندي امتحان يوم الخميس .. دعواتكم .. يارب ما تقعوا في ضيقه ابدا ههههه
____________________________________
-
إضغط الصوره للتكبير
____________________________________










2006/09/18

غلط × غلط

-
محبش اكون في صوره القروي الساذج .. اللي شايف كل حاجه غريبه .. و تصرفات الناس خارج حدود المنطق اللي ممكن اتحملها .. و بعيده عن اي خط احمر بمقدار طرق وكباري .. المشاهد في يوم واحد فقط .. بقت اكتر من انك تتحملها او تقدر تتكيف معاها .. احساس عام بالقرف بيجيلي .. ببقى نفسي اروح للناس دي .. و انزل فيهم ضرب لحد لما يبانلهم صاحب زي ما بيقولوا .. ماهوماش ناس مفيش احساس .. بدون ما اطول انا هحكي المشاهد و كل واحد يفكر هوه ليه تأقلم معاها و بقت بالنسبه ليه عاديه .. و حاجه المفروض منستغربش منها
-
ـ>> واحده قاعده في عربيه مع واحد .. ايديهم في ايدين بعض .. و وشهم في وش بعض .. و رجليهم على رجلين بعض .. اوعى تروح لبعيد .. دول زي الاخوات يا بني آدم .. المهم .. قاعدين في اي حته ظلمه او حتى ماشيين في وسط الشوارع ولا هاممهم .. و الاحلى من كده انك لما تيجي تبصلها .. تلاقيها بتضحك و مبسوووطه جدا و مش بعيد تشاورلك باي باي
ـ>> واحده ماشيه في مول او نادي مع البوي فريند بتاعها .. يولعوا .. بس اللي بيفقع مرارتي انك تلاقيها بتجر وراها عيل صغير المفروض انه اخوها اللي خارجه تفسحه .. وهيه واخداه تلبسه العمه .. بصراحه من افضل الاخلاق اللي بتربيه عليها بوصفها اخته الكبيره العاقله .. بتعمل منه راجل .. بقرون
ـ>> واحده ماشيه قدامي مع واحد شكله كده فرفور .. مأنججين و منتهى الرومانسيه .. و شايله على كتفها عيل صغير .. طبعا هتقول دول عرسان جداد و طالعين يهيصوا شويه .. استنى عليه .. اصلهم دخلوا سينما .. و قعدوا ورا خالص .. وهاتك يا كلام و .. كلام برضه .. بمنتهى البجاحه .. بعد ما تطلع من السينما هتقولي ايه رأيك في الفيلم .. هقولك مش وقته .. انا مش معاك اصلا .. هتقولي ليه .. هقولك اصل الست دي جارتنا في الشارع .. هتقولي فيها ايه .. هقولك اصل دي مرات الاستاذ شكري ولسه كنت واقف معاهم من كام يوم .. و ده ابنها احمد .. هتقولي روح سلم على الاستاذ شكري .. هقولك ما هو اللي كان بيتكلم معاها في السينما ورا ده .. مش الاستاذ شكري
ـ>> واحده ماشيه لابسه عبايه و عامله الطرحه بتاعتها بطريقه شيك اوي .. الجميل انها نازله تتمشى مع بنتها الكبيره .. حاجه تفرح والله ان لسه في بنات بتنزل مع اهلها بدون ما تكون متأففه و مضايقه .. بس نفسي افهم حاجه .. ليه الست تكون كده .. و بنتها ماشيه معاها لابسه بادي ستوماك و ميني جيب ... العيب في مين ؟؟ الست مش عارفه تربي .. ولا البنت اللي معرفتش تفسد امها
ـ>> واحده لابسه اسدال .. بصراحه انا بحب شكله .. عاجبني يا أخي و انت مالك .. حاسس انه عملي جدا .. و محترم جدا .. و بيليق على اي واحده .. هتقولي ايه المشكله .. هقولك .. انها قاعده مع واحد ورا شجره في الجامعه .. ناحيه السور الوراني كده .. و بيـ ... ذاكروا
ـ>> واحد ملتحي قاعد قدامي في كافيه .. بنتفرج على ماتشات كاس العالم .. بصراحه دقنه منوره وشه .. و الشيب اللي فيها مديله وقار فظيع .. تمنيت للحظه اني اكون زيه .. خلص الشوط الاولاني ... و جه اعلان كوكاكولا ... للفنانه اللولبيه نانسي بعجر .. عم الحج لقيته بيبص بطريقه غريبه جدا .. و بيقول .. تبارك الخلاق فيما خلق
-
يا ترى الكلام ضايقك .. و لا الموضوع عادي و مستغرب ان انا مستغرب منه

2006/09/17

بابا .. اوبح

-
بابا الفاتيكان .. بندكت .. بصراحه عامل واجب جامد اوي .. و عنده اسهال كلام من اللي قلبك يحبه يعني .. و اتمنى اني اشوفه قريب جدا .. علشان اقوله .. بابا اوبح .. بلا بابا فاتيكان بلا بتاع .. سيبها للي يقدر عليها .. والله لولا ان ليه اصدقاء كثير من المسيحيين و بحبهم جدا جدا .. و مش عارف اذا كان الاخ ده يهمهم في حاجه ولا لأ .. أنا كنت اديته واجبه بزياده اوي يعني .. لكن احب اطمنه ان علاقتنا ببعض اقوى من اي هبل يقوله .. و اننا هنفضل في رباط الى يوم الدين انشاء الله .. و هنفضل اقرب الطوائف إلى بعض .. حتى لو ظهر في كل فتره ناس من على شاكلته .. و شاكلة القس زكريا بطرس .. و تخريفات البحيري بتاعته
-
اقتبس من د. سليم العوا .. الرجل اللي بحترمه جدا .. كلامه لما قال اننا مش مستنيين من البابا ده اي اعتذار .. لأنه ملوش قيمه .. ده كلام اتقال في محاضره مكتوبه من قبل كده يعني هوه فاهم كويس بيقول ايه .. لكن المطلوب منه .. حسب رأي د. العوا .. انه يسحب كلامه ده نهائيا و يلغيه من نص المحاضره دي اصلا .. وقال كلام جميل جدا .. يخلينا منردش على امثال تفاهات البابا .. لأن الله تعالى قال : ولا تسبوا الذين يدعون من دون الله فيسبوا الله عدوا بغير علم ... صدق الله العظيم
-
و احب في المناسبه دي .. اقول للأخ بندكت ده .. زبده ما قالته الفنانه الشعبيه هدى .. الكلام ده ميعجبناش .. ده كلام ناس صغيرين .. شوفلي حد كبير اكلمه

2006/09/15

the Difficult choice

The Ring ..
-
its the Chemical ring of the Love formula .. Its the existence of the CHEMISTRY between You and her .
-
its the O of the word LOVE .. Its your wish to be with her forever .. in One ring .. forever and for always .
-
its the jewel you hold in your hand , while being on your knees .. saying .. Haay , i wanna someone sharing me all my dreams and plans .. Would you mind to be my life .. Would you mind being my wife

2006/09/14

كفـاية .. بصبصه


أيها الساده الرجال .. ايها الساده السيدات برضه .. برجاء .. كفايه بصبصه .. الواحد خلاص زهق .. مش عارف اخره الموضوع ده ايه ؟؟ في كل شارع و مول و سوق .. تلاقي الشباب .. ولاد و بنات .. واقفين متنحين .. و كل الرؤوس بتتحرك في تناغم رائع مش بيحصل في اي حاجه تانيه في مصر ولا حتى اجدع فرقه موسيقيه .. كله بيبص في نفس واحد على واحده ماشيه تتغندر و لابسه هدوم من غير هدوم .. متناسيين كلام العلامه الجهبذ سعد الصغير .. اللي برغم سنه طلع اكبر منهم لما قال : مش كل واحده لابسه كت تبقى مزه .. ياعيني عليك يا سعد
-
يا شباب .. انا نفسي افهم .. بتستفيدوا ايه من البصه دي .. اللي عايز يتفرج ما التليفزيون مليان .. روح استخبى و داري على خيبتك واتفرج براحتك .. إذا بليتم فاستتروا .. مش شغال زي السكانر قدام الناس .. فرجه بكل بجاحه .. المصيبه بقه .. انك بتدي فرصه للناس .. من فصيله الكروموسوم اكس اكس .. ذوي العيون المتفحصه .. انهم يقولو علينا حيوانات .. و اننا عبيد شهواتنا .. اننا ذئاب تسير على قدمين .. كل ده علشان سيادتك ماشي تبصبص لخلق الله في الشارع ... أما البنت الفاضله .. اللي ماشيه تبصبص هيه كمان للبنات في الشارع .. بدعوه غالبا انها منبهره بالستايل ده .. او انها مستغربه .. فهيه برضه بتشجع الاخت .. المزه .. اللي ماشيه من غير هدوم انها تفضل كده .. طالما حاسه انها حاجه .. غريبه .. و لافته انتباه الناس حتى البنات .. ليه لأ ... حقها تعمل ما بدالها
-
ملاحظة غريبه جدا بصراحه .. لما نزلت مع صحابي من فتره و اتمشينا في سيتي ستارز .. كان طبعا كل واحد بيبدي رأيه في الاخوات الفاضلات اللي بيتمشوا هناك .. ولما حاولت انتقل من مرحله اني مبصش لمرحله اني كمان معلقش على تعليقاتهم .. كان رد فعلهم كلهم اني اكيد تعبان .. او التعليق الاغرب بصراحه .. اني اكيد بحب واحده ووعدتها اني مبصش لحد .. او اني مرتبط من وراهم و مش عايز اقول ههههه .. بقه هوه ده السبب الوحيد اللي يخلي واحد ميبصش لواحده .. تخيلوا ؟؟؟ بصراحه مش عارف العيب في مين .. لكن عندي امل اني افضل انشاء الله على عهدي .. وان كل الناس تكون كده .. خلي الاخوات الفاضلات اللي من غير هدوم يتكسفوا على دمهم لما يلاقوا محدش معبرهم خالص .. وكل من عليها فاااااااااان

2006/09/12

خلي السلاح صاحي

عميلنا العزيز .. لقد وصل رصيدكم الى 10.000 زائر .. يعني 2000 خمسه و خمسيه في عين العدو .. مبروووووك
-
بصراحه .. إحساس جميل جدا .. إنك تحس بانتشار حاجه حاولت توصلها للناس .. دي اللي بسميها الضربه المزدوجه .. بطريقه ما .. حققت هدفين جمال جدا جدا .. أولا كان نفسي اكتب كتير .. و اطلع كل اللي جوايا في مكان ما .. ولأن الكتابه بالقلم والورقه ممله للغايه .. فكانت فكره المدونه احلى و ألذ كثيرا .. ولأن الهدف الأول ده اتحقق من فتره .. فسعادتي حاليا هي بسبب تحقيق نجاح تاني مكنتش متوقعه .. و هو انتشار مدونتي .. بطريقه تعتبر بالنسبه لي رائعه .. بغض النظر عن وجود مدونات تحمل أرقام مليونيه او بمئات الآلآف من الزوار .. فوجود رقم عشره آلاف زائر في مدونتي .. و في أقل من أربعه أشهر فقط .. يعتبر رقم خيالي بالنسبه لشخص مثلي .. و الغريب اني لما كنت برسم كاريكاتير في موقع طنطاوي مكنتش مهتم بعدد الزوار ولا الليله دي كلها .. لكن في المدونه في احساس مختلف بالحميميه .. بالرغبه في التواصل مع الناس و معرفه رد فعلهم .. ده اللي خلاني فعلا مبسوط .. حمدلله على هذا .. و أكاد اكون في حاله لخبطه غريبه شويه و مش عارف اكتب ايه بالضبط .. ففكرت في اني انقي احلى تدوينات .. من وجهة نظري أنا .. و احطلها وصلات .. علشان الناس اللي لسه داخله عندي لأول مره .. و أكيد معندهومش طولة بال يدوروا في كل الارشيف .. اعتبروه نوع من التعارف بطريقه مختلفه .. او نوع من احياء ذكرى حاجات كتبتها و بعتز بيها جدا ههههه .. شكرا لكل واحد دخل المدونه دي في يوم من الايام .. سواءا كرر زيارته .. او لم يكررها .. لأنه في اي حاله من الاحوال .. كان واحد من العشرآلاف اللي خلوني النهارده مبسوط
-
تدوينات قديمه .. أعتز بها جدا .. من بدايه كتابتي إلى نهايه شهر أغسطس:ـ
ـ طبعا ده غير التدوينات الموجوده في الصفحه الاولى واللي بعتز بيها كلها خصوصا .. اسطوره .. و .. مواقف

2006/09/11

مواقـف

ليلة زفاف
ها هي تجمع حاجياتها .. لا تعلم اين تضعها .. اين ستحفظها .. كم عاهدته ان تحفظها للأبد .. لكن الوقت حان لابعادها .. هي تلك الرسائل التي ملأها الشوق والحنين .. هي تلك الكلمات التي كانت تسمعها فتغرق في عالم الاثير .. هي كلمه احبك التي جعلتها يوما من الايام تشعر بكيانها .. هي التي جعلتها اسمى من كليوباترا .. و أرق من جولييت .. علـّـمتها كيف تعشق و تحب .. وتلك العلبه هناك .. لابد أنها تلك الأغاني التي كانت تحبها .. لابد انها تقاسيم فيروز .. و نسمات نجاه .. لابد انهما كانا يستمعان لها يوم ضمهما البحر وامواجه .. يوم استمعت اصدافه لنجواهما .. هي تعلم كم هي ضعيفه امامها .. لذا لا تقدر الا ان تنقلها بعيدا .. إلى حيث لن تراها مرة أخرى .. هي تعلم ان قلبها ما عاد يحتمل هذه النبضات الموجعه .. هي تعلم لوعة الحب وفراقه .. هي تعلم ان الحياه ستتوقف .. و القلب سيعلن العصيان .. تسمع الآن الطبول .. تسمع الموسيقى و الاحتفالات .. تدرك ان اليوم زفافها .. ترتدي حلتها البيضاء .. و تصبغ وجهها بالالوان المشرقه .. فاليوم .. يوم زفافها .. و اليوم .. تدفن في التراب .. رفات قلبها
-
-
المـسرح
حان الوقت لتترجل عن خشبه المسرح .. فانت لم تعتد ادوار البطوله .. اعلم انك بذلت جهدك .. حاولت تقمص كل الادوار .. لكن البطوله ليست لك .. فالاميره تحتاج لأمير .. وهي لن ترتضي محاولاتك المضنيه .. انت في النهايه شخص موهوب .. لكن اقصى ما ستناله هو دور ثانوي .. هي وحدها تملك توزيع الادوار .. هي وحدها تستطيع اصطحابك للمقدمه او القاءك في هاويه النسيان .. مهما حاولت التحايل .. مهما اثبت من صدق و اخلاص .. اعلم انك ترغبها بشده .. تود الوصول إليها .. لكن حبك وحده لا يكفي .. فخشبه المسرح لها قوانينها .. التي لن تقوى انت او غيرك على تغييرها .. لن تكفيك احلامك .. اوهامك .. طموحاتك .. مواهبك .. صدق مشاعرك .. فخشبه المسرح تحتاج لمزيد من التضحيات .. لن تقدر يوما عليها .. لكني اثق بك .. و اعلم ان ادوارا اخرى بانتظارك .. بعيدا عن تلك التجربه التي انهكتك .. انت شخص ناجح .. تستطيع اثبات ذاتك .. بعيدا عن تلك المغامره .. ارفع رأسك الآن .. و قدم التحيه الى من حياك . .انت تسمع تصفيقهم .. لم يكن العدد كما توقعت .. لكنهم على الاقل لم يحذوا حذو الآخرين .. و آثروا تحيتك .. ارفع رأسك الآن .. و اتجه صوب الكواليس .. قوّي ارادتك .. شجع نفسك على مغادره هذا المكان .. ولا تحلم يوما بالعوده إليه .. لأنك متى عدت .. لن تكون أنت .. و إن قبلتك هي بطلا بعد ذلك .. فاتركها .. فهي لم تقبل بك يوم كنت تستحق البطولة

2006/09/09

كلنا مصريين .. يا ليلى

ما أسهل تكوين كيان اسمه .. كلنا آدم .. كلنا أهلاويه .. كلنا مسلمون .. إلخ .. فلماذا نصر أن نكـّون تكتلات داخل الكيانات الناجحه .. لماذا نصر على ضرب المدونات في مقتل .. عبر خلق جو عدائي أنثوي .. يجعل كل مدوِنه من الإناث تـُـخرج ما بها من عقد و كلاكيع .. نمتلك جميعنا نوعا منها لكننا لا نستطيع اخراجها في كل وقت .. لأننا جميعا على ما اعتقد نحب وجودنا في هذا الكيان .. نحب مدوناتنا و اصدقاءنا الذين لم نرهم قط .. فلماذا الآن نكون سببا في انهيار علاقات رائعه و قويه .. و بكل ثقه أقول انها ايجابيه للغايه .. خلقها المدونون فيما بينهم .. فلماذا تبنون الآن تكتل كلنا ليلى .. بأسلوب أقرب ما يكون إلى عنصريه نسائيه صريحه .. لن تغير بقدر ما ستضر
لا انتظر تبريرا منطقيا واحدا لهذه الحركه .. حتى من باب الحريــات .. أو التعبير عن مشكله موجوده .. لأنكن تعلمن جيدا ان أي مشكله من اشكال النقد القائم على بناء تكتل ينتهي غالبا بصراعات و نزاعات ليس لها آخر .. تعني باختصار .. اليوم المدونون الذكور يردون على هذه الحركه بموضوعيه .. غدا سيسخرون من طول وجودها .. وبعد ذلك تنتهي بحرب مشتعله على المدونات ما بين .. كلنا ليلي .. وحركات اخرى قد تتكون مثل .. كلنا آدم .. كلنا عنتر .. كلنا عباس .. كلنا اتخنقنا
أرجو أن تراجعن هذه الحركه الغير بناءه .. فإذا كنتي تريدين لفت انتباه الرجل الى مشكله فصدقيني الرجل في النهايه انسان .. و آخر ما يمكن استخدامه للفت انتباه شخص ما .. هو تكوين تكتل ضده .. لأن ذلك يولد لديه شعورا بالكراهيه و التنافر مع الفكره لمجرد احساسه بالعدائيه و التجمع في مواجهته .. صدقيني .. بدلا من بناء جهات عدائيه تلفت الانظار عن المشاكل الاكبر الموجوده في مصر .. لماذا لا توجهن نشاطكن إلى اوجه ايجابيه .. لا مانع من ان يكون منها ما يبرز مشكلات الفتيات في مصر بدون استعداء الآخرين .. او محاوله خلق تكتل او كيان منفصل داخل مدوناتنا .. بدلا من ان نبني ونصلح من احوالنا .. واذكر يوم كتب علاء ومنال عن التحرش الجنسي .. لم يقف احد في وجه موضوعاتهم .. بالعكس .. اتفق الشباب قبل الفتيات على خطئ الرجال في هذه النقطه و اعطوكم بدائل رائعه لمواجعه هذه التحرشات .. أما الآن .. و بهذه الطريقه .. فلا اعتقد ان احدا قد يساندكن او حتى يستمع اليكن .. و المفروض .. ان هذه الحركه موجه لتجميع النساء ضد الرجال .. يعني المفروض ان يستمع الرجل .. وهو ما لن يحدث ابدا في ظل هذا الاسلوب .. و على العكس .. اتت الحركه بثمار سلبيه لكن .. حين قرأت أراء جميله و متفتحه ترى ان مشكله الفتاه هي نفسها قبل اي شيئ .. و أخيرا .. لي بعض العتاب على تحمس الساده المدونين من الاناث للكتابه في الموضوع لمجرد استفزاز اللوجو و اسم الحمله لطبيعتهن الانثويه التي لم تعد تعاني الاضطهاد الذكوري كما كان من قبل .. و قرأت كثير من المشاركات التي اعتقد ان كاتبتها لم تكتب الا للمشاركه .. و سجلت للأسف تدوينات تخلو من الواقعيه او المعنى
-
سيداتي الفاضلات .. لا للتكتلات القائمه على الدين .. الجنس .. العرق
-
ملاحظة : أرجو منكم قراءه تدوينه الزميله العزيزه سوسه المفروسه الخاصه بهذا الموضوع لأنها تؤكد في محتواها معظم المعاني التي قلتها .. مع اختلافي معها في تبنيها للحمله و مشاركتها فيها
ـ
تحديث :ـ
ـ كل الردود التي وصلتني تتحدث عن مشاكل المراه .. و كأني انكرتها .. لا يبدو انهم يقرؤن التدوينه قبل تسجيل التعليق .. يا بشر .. اعتراضي على الاسلوب .. و ليس مضمون الفكره نفسها .. لأني لو انكرت وجود مشاكل تواجه المرأه يبقى انكرت حقيقه واضحه وضوح الشمس .. لكن كما قلت .. لا يجوز ان يتجمع كل اصحاب مشكله سواءا كانو عمال او حرفيين او اصحاب ديانه ما .. تحت اسم او تكتل من اجل المطالبه بحقوقهم
ـ زياره لمدونه كلنا ليلى .. التجميعيه .. ستجد اضافه وصله خاصه بردود الافعال على الحركه .. بغض النظر عن اضافه الوصله و هدفها .. إلا ان قراءتي للتعليقات فيها اكدت لي ان ما توقعته صحيح .. و اننا بانتظار اختلاقات ليس لها اخر و صراعات مستمره على هذا الموضوع قد نسمع صداها قريبا في كل مكان

2006/09/08

عايز تتجوز ؟

الحقيقه الموضوع ده جه في دماغي بما اني خلاص كلها كام شهر و اخلص .. و شايف كل صحابي ملهوفين على الجواز .. الترمومتر العاطفي اصبح في حالة انفجار تام .. لذا التدوينه دي تهم اللي ناوي يتجوز بس .. وطبعا بما اني بعيد عن القصه دي تماما ومعلن اضرابي عن الزواج من فتره .. فقررت احاول افيد الناس الغلبانه اللي داخله على الجواز .. و احاول من وجهة نظر ذكوريه احدد مواصفات عروسه المستقبل اللي ممكن تعمر وتعيش بدون صدا و لا أكلان .. و ياريت واحده من زملائي البلوجراويات العازبات .. علشان الحياديه .. تحاول تكتب نفس الموضوع ده من وجهة نظر أنثويه .. و معاها تفويض تام بذلك .. سواءا كانت سوسه او نوران او ابيتاف او اوسه .. المهم اعرف برضه وجهة نظر البنت في الاختيار ايه ... المهم .. معايير الاختيار اللي حطها هتكون بطريقه سهله و عفويه .. علشان اي حد يقدر يعملها .. المطلوب من كل عريس مقبل على الزواج .. انه يعمل شويه زيارات مكوكيه كده من بتوع السياسه دول .. وتكون كالتالي .. أولا يقعد مع واحد من صحابه يكون لسه مخطوب او قاري فاتحه .. و بعدين يقعد مع اخوه الكبير مثلا او صاحبه برضه بس يكون عريس جديد .. يعني اخره سنه مثلا .. و بعدين يعمل نفس القعده مع ابوه و امه .. و اخيرا قعده حلوه شاعريه مع جده و جدته ان وجدا ... و طبعا يجيب ورقة و قلم فرنساوي ازرق .. ويبدأ يسجل نتايج الجوله دي
ـ مرحله الخطوبه : اعتقد ان دي مرحله الرومانسيه والافلام ... يعني .. كل واحد في المرحله دي عايز بنت زي بتوع الافلام .. مغسوله ببرسيل الوان .. و لابسه اللي على الحبل كل يوم .. ومتتخيرش في جمالها عن منى زكي .. و شقيه زي ياسمين عبدالعزيز .. و دلوعه زي نانسي عجرم .. و هكذا .. ده غير جرعه الرومانسيه اللي لازم تكون اساس المرحله دي .. يعني واحده حالمه للغايه.. بتحب الاغاني الرومانسيه .. بتحب تسمع السّـت جنات .. وليها في الشعر والآهات .. تقعدوا سوا ترسموا احلام المستقبل المشرق بدون اي كآبات او عقبات .. الحياه لونها بمبي يا حوده .. اذا الخلاصه .. محتاج الرومانسيه الشديده زائد الطله السينيمائيه اللي عشت كام و عشرين سنه تتفرج على الافلام بانتظار تحقيق حلم الوقوف الى جوارها
ـ مرحله الجواز المبكر : اعتقد ان دي مرحله تصادم الارواح و كشف المستور .. لأول مره هتكون مضطر تعيش مع انسانه في بيت واحد ومسؤول عنها مسؤوليه كامله .. يعني كام مره سقعت لأخواتك .. او كبرت على طلبات والدتك .. المره دي الموضوع مختلف .. مطلوب منك رعايه كامله لمراتك .. تداديها و تلاعبها و تلبيلها كل طلباتها .. محتاجه راجل دماغه كبيره لأنه هيسمع طلبات عجيبه و حوارات ملهاش اي معنى .. و مطلوب منه في كل ده انه يسمع و يضحك و يعلق احيانا .. في المرحله دي بتبدأ تحديد حياتك الماديه .. يعني محتاج واحده تتقبل عثراتك في المرحله دي .. مستعده تضحي بالمستوى اللي كانت عايشه فيه علشان خاطر عيونك اللي ارهقها الشغل و الشفت بتاع بليل .. لازم يكون في تقارب علمي و ثقافي بينكم .. اضافه لأنها تكون معاها شهاده تساعدها تشتغل لو لزم الامر .. لازم برضه تكون مسايسه و ذكيه علشان تقدر تتغلب على مقالب و نغزات حماتها الفاضله .. إذا الخلاصه .. محتاج واحده تتحمل .. متقاربين اجتماعيا وعلميا .. طيبه جدا .. و تحبك لنفسك مش لفلوسك وتتحمل طباعك الغريبه اللي هتكتشفها بعد الجواز .. بتتكرع .. بتاكل بصوت عالي .. بتنام بالملابس الداخليه .. بتتفرج على ماتشات الكوره و ف ايدك لب و ترمس وهاتك يا تف .. بتشرب شيشه في البيت و هكذا .. و اكيد مازلت محتاج واحده من بتوع الافلام بس ابشرك ان مرحله الرومانسيه هتقل خالص في الفتره دي لأن من وجهة نظري المتواضعه العلاقه الزوجيه بتفسد كثير من معاني الرومانسيه دي بعد ما كل واحد طلع اللي عنده و انكشف امام الآخر
ـ مرحله الاب و الام : يعني هتكونوا خلفتوا وعندكو كام عيل منهم واحد ولا اتنين على وش جواز .. دي المرحله اللي ممكن تشوفها في بيتك مع اهلك .. اعتقد محتاج ساعتها واحده تكون قدرت تحافظ على نفسها و رشاقتها بعيد عن الصبه المصريه الدائرية اياها اللي الستات بتاخدها بعد عشر سنين جواز .. ولازم ساعتها تكون واحده مدبره .. و ام بجد .. قدرت طول الفتره دي تربي ولادها بطريقه مناسبه .. يعني مالآخر محتاج واحده فاضيه و عندها حس الامومه عالي جدا .. بحيث انها تربي ولادها صح .. بدون نصايح ماما .. و توجيهات خالتو و عمتو اللي تودي في داهيه .. اذن الخلاصه .. محتاج واحده واخده بالها من نفسها والاهم بتقدر تاخد بالها من ولادها و تعرف تتعامل معاهم بذكاء .. مش بالضرب و الشتيمه او حتى الاهمال
ـ مرحله جدو و تيته : يعني مرحله ولادك اللي اتجوزا و فضلت في الآخر بوزك في بوز مراتك .. ساعتها محتاج واحده من صنف مرحله الخطوبه .. يعني سينمائيه قدرت تحافظ على نفسها .. و في نفس الوقت رومانسيه جدا جدا .. يعني تقدر ترجع تحسسك بنفسك و بشبابك المفقود .. تديلك قيمتك في الحياه .. اللي معاشك و جواز ولادك اكيد اخدوه منك بقسوه .. هتحس ساعتها انك ملكش لازمه في الدنيا .. و هتكون رومانسيتها و مشاعرها النبيله هي اخر امل ليك بأنك تحس بالامان و الموده و الرغبه في الحياه

مالآخر .. كل مرحله محتاجه مواصفات خاصه .. لو عايز جوازه تعيش و تعمر بدون مشاكل .. و بدون ازمات .. يبقى محتاج واحده تقدر تتقلب ما بين كل المراحل دي .. تقدر تكون رومانسيه .. جميله .. ذكيه .. ام مثاليه .. طيبه و مسايسه .. متعلمه .. مثقفه .. إلخ .. عرفتوا ليه انا مضرب عن الجوااااز هههههه

2006/09/07

زهـقـــت

زهقت من الهيافه
ليه نبقى مجبرين كل اسبوع نقرأ في الدستور موضوع كتباه واحده اسمها اميره حسن .. الحريه مسؤوليه يا بشر .. و مش كل واحد هيمسك قلم يبقى صحفي والمفروض يسمحله يكتب في مجله او جرنان .. اديني عقلك .. واحده مش فاضيه تكتب غير في ان البنت حره تلبس ما بدالها انشاءالله تنزل سلبوته .. يعني مالآخر بتقول للدين و التقاليد و الحياء و الذوق طز .. و تيجي في عدد الاسبوع ده تكتب عن الاندروير .. و كأننا يا ولداه معدش في حياتنا حاجه تعمل مشاكل غير الاندروير .. للي لسه مقراش موضوع الاسبوع ده بتاع السنيوره اميره .. هقوله باختصار .. الموضوع ينادي بالمساواه بين اندروير الرجل و المرأه .. غطوني و صوتواااا
-
زهقت من الحوادث
كل يوم حادثه قطار جديده .. و اتوبيسات .. و عبارات غرقت و اخرى على وشك الغرق .. انا اعتقد انه احسن حل نغير اسم مصر من جمهوريه مصر العربيه .. إلى مشرحه مصر الدمويه .. الحمدلله الخير كتير و الجثث عندنا للركب
-
زهقت من الدين التايك آواي
زهقي المره دي موجه ايضا إلى حواء .. نفسي افهم المبدأ اللي يخلي واحده محجبه تيجي ليله الفرح .. و قدام مئات المدعوين .. و تحت نظر كاميرات الفيديو و التصوير الفوتغرافي .. و تقلع الحجاب .. اديني عقلك انته ؟؟ يعني هيه فضلت ساتره نفسها و محترمه انسانيتها و دينها .. و تيجي ليلة الفرح تقلع الحجات و تديها رقص تحت مسمى ليله العمر .. ياخي تولع دي ليله اللي تخلي البني آدم يرمي دينه و مبادئه تحت رجليه و يرقص على واحده و نص .... ده غير طبعا ثقافه المصيف .. والمره دي الزهق مشاركه بين الولد و البنت .. يعني البنت الستوته الاموره المحترمه .. تيجي في المصيف و تلبس شورت و بودي .. لكن اللي بيعجبني انها بتحافظ على الحجاب فبتلبس كاب تغطي بيه شعرها و الله خير ما عملت .. وتقولك معلش يا عم الحج .. اهه مصيف بقه .. بحبحها متعرضهاش .. اما شبابنا اللي زي الفل .. تلاقي الواحد منهم غاضض بصره و ماشي على الصراط المستقيم لحد ما يجي المصيف .. الحال يبقى غير الحال و البصبصه على ودنه .. و يقولك معلش .. اهه مصيف .. خليك روش
-
زهقت من محاوله فهم حواء
ليه البنت اللي تحب .. تكون فعلا ملاك رقيق .. مليئة انوثه و رقه .. و لما تكره او تقلب عليك .. تبقى ولا الحانوتي اللي محروم من الشغل بقاله سنه و بيقول بسم الله و توكلنا على الله .. تسن سنانها و تبقى اكثر شراسه من سجاني ابو غريب .. يا ترى الموضوع ده مرتبط بالجينات ولا إيه بالضبط
-
زهقت من الافلام السكه
أصلي اعتبرت نفسي بني آدم و من حقي ارفه عن نفسي و ادخل سينما .. مجموعه افلام ما انزل الله بها من سلطان .. تبعث على القيء و الغثيان بشده .. و احتمال هبوط حاد في الدوره الدمويه يفضي الى موت .. وش اجرام .. فيلم بارد و ساذج إلى اقصى درجه .. كتكوت .. فعلا الكتكوت ابن البيضه .. ظاظا .. محاوله ساذجه لايجاد موضوع يلفت الانتباه .. جعلتني مجرما .. احمد حلمي بيحاول يشيل فيلم من الالف الى الياء .. أخيرا .. بعد دخول الافلام دي .. للأسف وجدت ان فيلم ظاظا .. برغم سآله هاني رمزي و تقل دمه .. يكاد يكون افضل فيلم فيهم .. لكن عامة .. افلام ترفع الضغط و تشرخ القلب الحزين

2006/09/05

COMMENTs

من الاسكندريه اكتب .. الموضوع طلع بسيط و مش منفى يعني هههه .. الجو هنا فعلا هايل .. و الناس كلها مبسوطه .. وانا شخصيا مبسوط باني هقضي كام يوم بعيد عن الزحمه و الروتين والملل قبل الامتحانات .. لكن عندي شوية ملاحظات غريبه شويه .. اولا صوت الكلكسات اللي مكنتش بسمعه بقه في اسكندريه زي باقي المدن خلاص .. ثانيا البنات معظمهم بقوا حرانين زياده عن اللزوم .. ثالثا البحر السنه دي كئيب .. مش عارف افهمكم الاحساس ده ازاي .. لكن البحر فعلا شكله مضايق او مكتئب هو كمان .. عموما .. انا فكرت في تدوينه غريبه زي الجو اللي انا فيه .. و قلت اكتب عن الكومنتات
فكرت قبل كده تكتب تعليق على تدوينه قرأتها ؟! .. يبقى اكيد برضه قريت تدوينات بدون ما تعلق عليها .. يا ترى فكرت الموضوع بيعتمد على ايه ؟؟ هل هو حالتك المزاجيه .. كسلان ولا فاضي ولا دماغك عاليه .. ولا الموضوع مرتبط بالشخص صحاب المدونه .. هل هو صديقك او منافسك او كونه فتاه ... ولا الموضوع مرتبط بالتدوينه نفسها من حيث جودة الفكره أو النقد او الرؤية المكتوبه بيها ... أكيد الموضوع مش معقد للدرجه دي .. لكنه في وسط عالم المدونات .. حاجه خطيره و مهمه جدا .. تستاهل انك تقف عندها شويه .. و تفكر انت ليه كتبت تعليق على موضوع معين .. و ليه مكتبتش على موضوع تاني
انا حاولت اعمل مسح للمدونات المشهوره الموجوده على الانترنت .. المصريه تحديدا .. و صنفت المدونات حسب عدد التعليقات المكتوبه فيها في أخر عشر تدوينات تحديدا .. و الحقيقه النتيجه كانت الى حد ما متوقعه .. لكن لسه برضه السؤال مطروح .. هل عدد التعليقات دليل على شعبيه المدونه .. ولا كفاءة افكارها .. ولا تميزها عن الباقيين .. ولا شخصيه صاحبها .. ولا علاقات المدون .. الحقيقه احتمالات كثيره جدا و صعب انك تربطها او تنسقها بطريقه ترضي تساؤلاتك و توصلك لنتيجه معينه .. عموما اسيبكم مع الارقام اللي وصلتلها
-
ملاحظات :ـ
ـ اولا زي ما قلت انا اعتمدت على حساب التعليقات في آخر عشر تدوينات لكل مدونه
ـ مدونه الاميره اوسه .. مفيهاش غير 8 تدوينات فقط .. لذا لزم التنويه .. و خمسه و خمسيه في عين العدو ههههه
ـ مدونه أبيتاف .. فيها تدوينات كتيره لا تزيد عن سطرين تلاته .. و احيانا صوره
-
-------------------------------------------------
النتائج حسب آخر عشره تدوينات في كل مدونه من العينه المختاره
-------------------------------------------------
------------
الفائز : سوسة المفروسه .. بجدارة و استحقاق .. و مبروك جائزة التعليق الزهبية .. مشبك غسيل
------------

اجازه ههههه

انا كتبت بوستين للكام يوم الجايين .. حاجه كده زي الاحتياطي الاستراتيجي يعني .. همه متناقضين لكن الانسان منا ايه غير شوية تناقضات فوق بعضيها
اتمنى اني ارجع و اشوفكم على خير انشاء الله
هاخد اجازه لحد يوم الجمعه الجاي انشاءالله و اتوجهه الى البحر العزيز في الاسكندريه
الامتحانات على الابواب و الواحد محتاج شوية هوا نضيف و افق واسع يريح نظره فيه قبل زنقة الامتحانات و ضيق سطور الكتب
إلى اللقاء

i love death

غريبه مش كده ؟؟ عزرائيل شادد حيله اوي اليومين دول .. كلمه هتسمعها في كل مكان هتروحه .. ملاحظة قوية و نبيهه من ناس لسه واخده بالها ان لكل اجل كتاب .. و ان الموت عمره ما هيجيلك و انت متوقعه .. لازم تكون المفاجأة موجوده .. و إلا كان الموت روتين عادي .. زيه زي النوم .. تقدر تستعدله وقت لما تعوز .. وتلبس هدومك و تستحمى و تنام على اساس ان دي نومتك الاخيره .. لكن الموت هوه المفاجأة الاكبر و الاهم في حياتك .. هتفضل المفاجأة هي سره و قوته .. لكن الجديد .. إنك تحبه ؟؟ .. هتقولي واسعه شويه .. هقولك بالعكس .. دي أضيق مما تتخيل .. اقعد مع نفسك شويه .. و فكر في الدنيا و الآخره .. لا اعتقد اننا عايشين في الدنيا المثاليه اللي تخلينا متمسكين بترابها .. و مش قادرين نستغنى عنها .. هتقولي تشاءم .. هقولك واقعيه .. هتقولي هروب .. هقولك امل في الافضل .. فياريت متحاولش .. بما ان الموت حق .. ليه مندورش عليه .. ليه منحاولش نتغلب على احساس الانتظار الممل و الكئيب .. حاشا لله اني اكون بدعو للانتحار ولا حاجه .. بالعكس .. اللي عايز يموت ده .. يبقى عايز موته تقربه من ربنا .. يعني بلاها حزام ناسف و جزمه متفجره .. خليك متفتح اكتر .. اسألك و انت تجاوب ؟؟ يا ترى انجزت ايه في الدنيا طول فتره تشريفك فيها .. اكلت و شربت و نمت .. ذاكرت و دونت و صاحبت .. لعبت و جريت و فرحت .. برضه مجاوبتنيش .. انجزت ايه في الدنيا دي ؟؟ عمرك كام سنه .. ترجمتها بافعال قد ايه ؟؟ متعدش احسن لانك اكيد مش هتوصل لحسبه تساوي حاجه .. حسبتك دائما هتكون مخرمه .. و هتطلع مديون لشوشتك .. يعني طريقك مسدود مسدود مسدود .. !! طب و الحل ايه ؟؟ ارمي نفسي تحت عربيه ولا اولع في نفسي بجاز !! .. للأسف لو حبيت تعمل كده هتموت كافر .. لا دنيا نفعتك ولا أخره هترضى بيك .. ده غير انه حبيبنا الامير القطري اللي بيدوسنا بالعربيه سافر .. و الجاز غلي اوي عليك .. خسرانه خسرانه يا معلم .. طب والحل ؟؟ دور لوحدك .. المهم تخلي حسبتك كسبانه .. وصدقني ده مش تشاؤم .. بالعكس .. حاول ترتب حياتك شويه .. الموت اولويه .. بيحصل كل فتره حدث يفكرنا بيها لكن احنا بقينا باردين جدا .. مكبرين دماغنا عالآخر .. و النتيجه هزه وراها هزه .. لحد لما الموت يجيلك انت .. و تكون انت هزه لغيره .. و تستمر القصه

هعمل ايه ؟ اكيد مكتبتش البوست ده غير لما فكرت .. و فكرت كويس جدا كمان .. والحمدلله لقيت الحل اللي يناسبني .. هوه سر عن الناس كلها .. لكن مش خساره فيكم .. توصلت لاتفاق لذيذ يخليني انشاء الله اسافر بمجرد انتهائي من الدراسه و الموقف التجنيدي العقيم .. في حملات الصليب الاحمر الدولي .. عمل انساني .. طبي .. اجتماعي و اخلاقي جدا .. في اماكن ملتهبه جدا .. اعتقد ان ده الجو اللي ممكن يخلي الحسبه تتغير .. و الرصيد يتقل شويه .. وفي نفس الوقت .. يخليك بعيد عن مفاجأت القدر .. هتكون قريب منه .. متوقع حدوثه .. ده اذا محصلش قبليها يعني .. و قلتم عليه منحوس

2006/09/04

الاسطوره

تبدا اللعبه .. لا ادري لماذا لا تفكر .. دائما ما كنت كثير التفكير .. شديد الدقه .. لكنك الان تفقد قدراتك ببساطه .. تسلم مفاتيحك لها بكل سهوله .. ربما تستحق .. لكنها في النهايه انثي .. هي رقيقه وحنونه .. لكنها ذكيه بطريقه تفوق قدراتك و مواهبك .. اعرف انها لا تستسلم بسهوله .. لذا تساورك الشكوك .. هل هو الحب .. أم انها مكيده اخرى من مكائد حواء .. تظل تفكر كثيرا .. تدور في نفس الدائرة .. لا تخرج منها الا على طرقات عقلك المتتاليه .. يخبرك كم هي رائعه .. تلك الاشارات التي ارسلتها عيونك لا يمكن ان تنم عن كائن عادي .. انها ملاك .. تلك الهمسات التي تقولها لا يمكن ان تكون حديثا عاديا .. لا يميزها ذلك الرتم البشري الممل .. لها ترنيمه من تلك التي يخالطها دخان البخور و ضوء الشموع .. لها قدسيه عجيبه .. بعيده عن المياعه المستفزه .. لا استطيع الاستمرار اكثر من ذلك .. انها تتملكني بكل سهوله .. هل اخبرتك بالمزيد عنها .. لابد انك لم تكن تستمع لحديثها بتركيز كبير .. لا يمكن ان تسمع شخصا و عيونك محدقه في عينيه .. لا يمكن ان تسمعه و انت لا تكاد تعي من الدنيا سوى نظراته العميقه .. كيف لا .. ان الدنيا تدور في عينيها .. لها براءه الطفله .. سذاجتها احيانا .. اسئلتها التي تضحكك حتى البكاء .. ضحكتها الطفوليه .. اسنانها الصغيره .. لا يمكن ان تكون الا لطفله .. لكنها في الوقت نفسه .. فتاه يافعه .. حيويه .. نشيطه .. تحب الحياه .. الوانها تبوح بكل اسرار الانوثه.. واناقتها لا تقل روعه عن زهرة الاوركيد المتفتحه .. لكنها لازالت تملك من الحياه و الطمأنينه ما يجعلها أمـًـا حنونا .. و زوجا قريبه الى قلبك و عقلك .. تبدو لي برغم حيويتها الشديده .. في ثوبها الملون .. امرأة شابة و نضرة .. لا تحتاج كغيرها الى دروس في الحياة والأمومه .. وكأنها خلقت أما بطبيعتها
لا تكف عن الانتقاد .. ابداء آراءها المشتعله احيانا .. تأخذنا الحماسه إلى قمم الحديث و براكين النقاش الملتهبه .. لكننا لا نلبث ان نسكن إلى حيث زهور احلامنا .. و جزر طموحاتنا المشتركه .. تعشق البحر عشقي له .. نغني له سويا .. نعطيه من اسرارنا ما تعجز قلوبنا الولهة على حفظه .. لا يزال كل منا يجلس على جانب صخرته .. يوشوش الموج .. يشكيه .. يبكيه .. يشجيه .. ثم نعود كفا بكف .. لنحكي سويا ما سردناه منفصلين .. أهيم في ملكوتها .. هي تلك الحياه التي نتقاسم حلوها ومرها .. هي تلك التفاصيل الصغيره التي جعلت الموناليزا تنطق باسرارها .. هي تلك المشاعر التي منحت تاج محل اسطورته الرومانسيه .. هل تلك الضفائر التي تمنح الفتاه براءة النسيم و روح الأمل .. هي الاسطوره الخياليه التي لن ايأس يوما من الوصول لها

2006/09/02

يا كعبو كعبو

الأوضاع في مصر فعلا غريبه .. بتفكرني تماما بلاعب كرة القدم المصري .. تلاقيه في عز انفعالات المباراه و ضيق الوقت و حرقة اعصاب المشاهدين .. قاعد يلعب الكره بكعبه أو بلفظ آخر .. بيرفص الكوره .. مع انه يا ولداه مش عارف يلعب بوجهه .. و تقول خدنا ايه من وشك علشان تدينا قفاك .. لكن كل لاعب متخيل انه حريف و لعيب مجابتوش ولاده .. و عمال يديها رفص طول الماتش .. رايح جاي .. و يطلع يقولك احنا عملنا اللي علينا بس ربنا ما أرادش اننا نكسب .. و نعم بالله يا أخي .. بس بلاش التقى اللي بينزل عليكو فجأه ده .. و اعمل اللي عليك قبل ما تقول ربنا مأرادش .. لأن الله لا يضيع عمل عامل منكم
-
كم ذا بمصر من المنكراااااات .. مع اعتذاري للشاعر .. لأن اللي الواحد بيشوفه في مصر بقه فعلا يشيب .. و في خضم كل تلك التغييرات اللي بتحصل خصوصا سياسيا و شبابيا .. بفتكر قول رسول الله : من رأى منكم منكرا فليغيره بيده .. فإن لم يستطع فبلسانه .. وإن لم يستطع فبقلبه وذلك اضغف الإيمان .. اعتقد ان الحديث واضح والترتيب فيه منطقي و مسبب .. اللي احنا بنعمله بقه ايه ؟؟ كله شغال بلسانه و قلبه .. و نسينا يده دي خالص .. هتقولي ادي الله و ادي حكمته .. و الايد قصيره .. والامثله اياها اللي خلت الناس كلها شغاله رفص علشان محدش عايز ولا عنده القوه انه يبص قدامه و كل مكتفي بالبكاء على الاطلال
-
كل واحد فينا شايف المنكرات اللي في مصر و المشاكل اللي موجوده .. وانقسمنا معها الى قسمين .. الاول و للأسف اخد اسهل الطرق .. التغيير بالقلب .. كل واحد قفل على همه جواه و نام عليه و صاحي نايم يدعي ربنا و يقول اللهم اهلك الظالمين بالظالمين .. و خلصنا على كده ... اما الفئه التانيه .. فماشيه بمبدأ التغيير باللسان .. يعني نطلع مظاهرات و نهتف و نزعق و نقول يا مسهل .. وبرغم عدم اعتراضي على مبدأ التظاهر لأنه حق مشروع للجميع .. لكن نفسي الناس تمشي بالترتيب .. يعني تغير باليد قبل ان تغير باللسان .. الموقف هنا بيفكرني بالضبط باللي قاعد في الشارع و شايف واحد ماشي وفاضله خطوه واحده ويقع في بلاعه .. فبدل ما يقوم يهز طوله و يحوشه .. قاعد في مكانه يقوله حاسب يا استاذ .. خد بالك
-
طب و يا ترى ؟؟ .. اشمعنى التغيير باللسان هوه اللي ماشي ؟؟ علشان عناصر التغيير كلها عايزه كده .. المتظاهرين .. الشعب و الحكومه .. اولا المتظاهرين .. لما بيقفوا يتظاهروا مبيكنش الواحد عمل كل اللي عليه .. الواحد فيهم و انا كنت منهم بالمناسبه .. بيقف يزعل اوي و يزعق .. مع انه قبل كده استغنى عن حقوقه بارادته .. اكيد مش كلهم كده لكن انا بتكلم عن حاجات بتحصل في مصر كلها و اكيد كل واحد فينا عملها مره قبل كده .. مين فينا مداش شاي لموظف او اكراميه او حلاوه .. لما بتدي رشوه لموظف علشان يمشيلك مصلحه .. ولما بتجيب كوسه لولادك علشان ينجحوا .. و غيره وغيره .. يعني يا جماعه لما الواحد يكون ناجح في حياته و يشتغل وينجح يبقى يقف يعترض و يزعل .. فساد النظام .. مش مسؤول عن فساد كل فئات الشعب .. ولما الواحد مننا يرتشي و يسرق علشان مش لاقي .. منجريش نقول الحكومه السبب .. لأن الحكومه بنت كلب و كلنا عارفين كده .. لكن برضه احنا بنغلط و بنضيع وبنكبر دماغنا و نبرر الغلط لنفسنا .. و نرجع نقول اصل البلد و اصل الحكومه .. نفسي افهم احنا بنضحك على مين
-
مظاهراتنا اللذيذه للأسف .. بقت شماعه الحكومه و الشعب كمان .. يعني الناس بقت كلها قاعده في البيت بعد اي حادثه او مشكله مستنيه الشباب بتوع كفايه لما يطلعوا يتظاهروا .. واهه يفكوا عن نفسهم شويه و يحسوا ان البلد لسه بخير .. همه دول الكلمتين اللي هتسمعهم على اي قهوه او من اي واحد في كشك سجاير او سواق تاكسي .. يعني بقت المظاهرات دي للأسف .. متنفس للناس الغلابه دول .. علشان ميحاولوش يعملوا حاجه .. و يحطوا ايدهم على خدهم .. يعني عمر ما حد فيهم هيحاول يغير المنكر بيده .. مفيش أمل .... أما حكومتنا العزيزه .. فبقت تعمل ما بدالها و تبرطع .. لأنها عارفه ان محدش هيحاول يغير بيده .. انما اخرنا اننا نحاول نغير بلساننا او قلبنا .. و هنطلع نقول بؤين على السريع في مظاهره و كل واحد يروح بيتهم .. بيقى بصراحه .. حق الحكومه تعيش و تعمل ما بدالها ... يا جماعه .. اللسان ده طريق العاجز .. واتمنى ميكونش ده هوه طريقنا الاول وإلا يبقى على البلد دي السلام