2006/09/08

عايز تتجوز ؟

الحقيقه الموضوع ده جه في دماغي بما اني خلاص كلها كام شهر و اخلص .. و شايف كل صحابي ملهوفين على الجواز .. الترمومتر العاطفي اصبح في حالة انفجار تام .. لذا التدوينه دي تهم اللي ناوي يتجوز بس .. وطبعا بما اني بعيد عن القصه دي تماما ومعلن اضرابي عن الزواج من فتره .. فقررت احاول افيد الناس الغلبانه اللي داخله على الجواز .. و احاول من وجهة نظر ذكوريه احدد مواصفات عروسه المستقبل اللي ممكن تعمر وتعيش بدون صدا و لا أكلان .. و ياريت واحده من زملائي البلوجراويات العازبات .. علشان الحياديه .. تحاول تكتب نفس الموضوع ده من وجهة نظر أنثويه .. و معاها تفويض تام بذلك .. سواءا كانت سوسه او نوران او ابيتاف او اوسه .. المهم اعرف برضه وجهة نظر البنت في الاختيار ايه ... المهم .. معايير الاختيار اللي حطها هتكون بطريقه سهله و عفويه .. علشان اي حد يقدر يعملها .. المطلوب من كل عريس مقبل على الزواج .. انه يعمل شويه زيارات مكوكيه كده من بتوع السياسه دول .. وتكون كالتالي .. أولا يقعد مع واحد من صحابه يكون لسه مخطوب او قاري فاتحه .. و بعدين يقعد مع اخوه الكبير مثلا او صاحبه برضه بس يكون عريس جديد .. يعني اخره سنه مثلا .. و بعدين يعمل نفس القعده مع ابوه و امه .. و اخيرا قعده حلوه شاعريه مع جده و جدته ان وجدا ... و طبعا يجيب ورقة و قلم فرنساوي ازرق .. ويبدأ يسجل نتايج الجوله دي
ـ مرحله الخطوبه : اعتقد ان دي مرحله الرومانسيه والافلام ... يعني .. كل واحد في المرحله دي عايز بنت زي بتوع الافلام .. مغسوله ببرسيل الوان .. و لابسه اللي على الحبل كل يوم .. ومتتخيرش في جمالها عن منى زكي .. و شقيه زي ياسمين عبدالعزيز .. و دلوعه زي نانسي عجرم .. و هكذا .. ده غير جرعه الرومانسيه اللي لازم تكون اساس المرحله دي .. يعني واحده حالمه للغايه.. بتحب الاغاني الرومانسيه .. بتحب تسمع السّـت جنات .. وليها في الشعر والآهات .. تقعدوا سوا ترسموا احلام المستقبل المشرق بدون اي كآبات او عقبات .. الحياه لونها بمبي يا حوده .. اذا الخلاصه .. محتاج الرومانسيه الشديده زائد الطله السينيمائيه اللي عشت كام و عشرين سنه تتفرج على الافلام بانتظار تحقيق حلم الوقوف الى جوارها
ـ مرحله الجواز المبكر : اعتقد ان دي مرحله تصادم الارواح و كشف المستور .. لأول مره هتكون مضطر تعيش مع انسانه في بيت واحد ومسؤول عنها مسؤوليه كامله .. يعني كام مره سقعت لأخواتك .. او كبرت على طلبات والدتك .. المره دي الموضوع مختلف .. مطلوب منك رعايه كامله لمراتك .. تداديها و تلاعبها و تلبيلها كل طلباتها .. محتاجه راجل دماغه كبيره لأنه هيسمع طلبات عجيبه و حوارات ملهاش اي معنى .. و مطلوب منه في كل ده انه يسمع و يضحك و يعلق احيانا .. في المرحله دي بتبدأ تحديد حياتك الماديه .. يعني محتاج واحده تتقبل عثراتك في المرحله دي .. مستعده تضحي بالمستوى اللي كانت عايشه فيه علشان خاطر عيونك اللي ارهقها الشغل و الشفت بتاع بليل .. لازم يكون في تقارب علمي و ثقافي بينكم .. اضافه لأنها تكون معاها شهاده تساعدها تشتغل لو لزم الامر .. لازم برضه تكون مسايسه و ذكيه علشان تقدر تتغلب على مقالب و نغزات حماتها الفاضله .. إذا الخلاصه .. محتاج واحده تتحمل .. متقاربين اجتماعيا وعلميا .. طيبه جدا .. و تحبك لنفسك مش لفلوسك وتتحمل طباعك الغريبه اللي هتكتشفها بعد الجواز .. بتتكرع .. بتاكل بصوت عالي .. بتنام بالملابس الداخليه .. بتتفرج على ماتشات الكوره و ف ايدك لب و ترمس وهاتك يا تف .. بتشرب شيشه في البيت و هكذا .. و اكيد مازلت محتاج واحده من بتوع الافلام بس ابشرك ان مرحله الرومانسيه هتقل خالص في الفتره دي لأن من وجهة نظري المتواضعه العلاقه الزوجيه بتفسد كثير من معاني الرومانسيه دي بعد ما كل واحد طلع اللي عنده و انكشف امام الآخر
ـ مرحله الاب و الام : يعني هتكونوا خلفتوا وعندكو كام عيل منهم واحد ولا اتنين على وش جواز .. دي المرحله اللي ممكن تشوفها في بيتك مع اهلك .. اعتقد محتاج ساعتها واحده تكون قدرت تحافظ على نفسها و رشاقتها بعيد عن الصبه المصريه الدائرية اياها اللي الستات بتاخدها بعد عشر سنين جواز .. ولازم ساعتها تكون واحده مدبره .. و ام بجد .. قدرت طول الفتره دي تربي ولادها بطريقه مناسبه .. يعني مالآخر محتاج واحده فاضيه و عندها حس الامومه عالي جدا .. بحيث انها تربي ولادها صح .. بدون نصايح ماما .. و توجيهات خالتو و عمتو اللي تودي في داهيه .. اذن الخلاصه .. محتاج واحده واخده بالها من نفسها والاهم بتقدر تاخد بالها من ولادها و تعرف تتعامل معاهم بذكاء .. مش بالضرب و الشتيمه او حتى الاهمال
ـ مرحله جدو و تيته : يعني مرحله ولادك اللي اتجوزا و فضلت في الآخر بوزك في بوز مراتك .. ساعتها محتاج واحده من صنف مرحله الخطوبه .. يعني سينمائيه قدرت تحافظ على نفسها .. و في نفس الوقت رومانسيه جدا جدا .. يعني تقدر ترجع تحسسك بنفسك و بشبابك المفقود .. تديلك قيمتك في الحياه .. اللي معاشك و جواز ولادك اكيد اخدوه منك بقسوه .. هتحس ساعتها انك ملكش لازمه في الدنيا .. و هتكون رومانسيتها و مشاعرها النبيله هي اخر امل ليك بأنك تحس بالامان و الموده و الرغبه في الحياه

مالآخر .. كل مرحله محتاجه مواصفات خاصه .. لو عايز جوازه تعيش و تعمر بدون مشاكل .. و بدون ازمات .. يبقى محتاج واحده تقدر تتقلب ما بين كل المراحل دي .. تقدر تكون رومانسيه .. جميله .. ذكيه .. ام مثاليه .. طيبه و مسايسه .. متعلمه .. مثقفه .. إلخ .. عرفتوا ليه انا مضرب عن الجوااااز هههههه

7 comments:

أحمــــــــدبــــــــــلال said...

رأيى الشخصى عن الزواج
كتبت به مدونة

أنا رافض للزواج
حتى أشعار آخر
أن أه بموت فى البنات زى عنيا بس مش هاتجوز غير لما أبقى ماترفضش
مفيش عائلة ترفضنى
طول مأنا مش قادر أعيش نفسى يبقى ماتجوزش
مش معنى كده أنى أول ما أحوش حق الخطوبة
هوب أجرى أخطب و أتزنق تلت أربع سنين فى الطاحونة و السباق لغاية ماأقدر أتجوز و بعد الجواز
زى مايكون العئلات بترمى بناتها تلاقى نفسك عايش عيشة على قد الحال و أخر تعب ليه كل ده علشان كنت هاتموت على الجواز ياعم مش لاقى تاكل ماتتجوزش

Dr. Tantawy said...

** احمد بلال

تعددت الاسباب والموت واحد
يعني انا و انت مضربين سوا .. ده خبر كويس لأن كل اصحابي مسروعين على الجواز و جننوني معاهم ههههه
أهلا بيك في مدونتي يا جميل

** Nada

متشكر على كلامك .. انا مقلتش انه لازم شيشه و تف لب :)) انا بس بقول امثله لتصرفات .. كل واحد فينا عنده تصرفات شخصيه الناس مبتتقبلهاش .. يعني انا مثلا بعشق الكمبيوتر .. اجيب منين واحده تتحمل جوزها يفضل قاعد 12 ساعه على الكمبيوتر .. فاهمه قصدي
ربنا يوقعك في بن الحلال انشاء الله اللي يكلمك في السياسه ههههه

اهلا بيكي في المدونه و شرفتينا

Egiziana in US said...

Very interesting! I've always wanted to know how guys think about marriage and what they look for in a wife.
But guess what? Even if a girl has the long list of qualities that guys are looking for: loving, pretty, smart, religious, understanding, polite, kind, successful, caring, loves children, etc....., it doesn't mean that guys will be falling all over themselves trying to marry her. There are thousands of girls like that who are still unmarried. The unsolved mystery is: why?
I think both guys and girls always come up with these long "shopping lists" of qualities that they look for in a wife/ husband. But in the end, the decision when and who to marry is something completely different.
I'll try to write something about this in my blog :)

Anonymous said...

هههههههههه

انت جي تقول الكلام ده
وفيه حملة في المدونات اسمها
كلنا ليلي

هههههه

انت مش عايش في المدونات ولا ايه
؟;)

Dr. Tantawy said...

** egiziana

i really forget something important and i will write about it later , its chemistry of love .. i really dont know who did i miss it , thanks for ur note :))


** epitaph

انا مش عجباني الحمله بتاعتكم دي .. و كنت كاتب البوست ده قبلها .. بس عموما .. انا هرد على موضوع كلنا ليلى ده لأنه فعلا ملوش لازمه

أم أحمد said...

تخيل ان حملة كلنا ليلي دي هايله فعلاً ستات كتير مظلومة انا مش عارفة اكتب عن مين ولا مين لان ليلي في حياتي كتير هارتب افكاري واكتب
سلام يازنجولا

حــمــيدو said...

تعرف يا طنطاوي


انا دلوقتي عرفت ليه ربنا شرع لنا

الجواز من اربعه