2007/11/25

حملة دعاية مودرن

-
استغلالا للنجاح الباهر الذي حققه مسلسل حماده عزو .. قرر الحزب الوطني الديمقراطي استخدام تيمات المسلسل في اعداد الدعاية الانتخابية لمرشح الحزب عن الانتخابات الرئاسية القادمة .. و قد استطاع بلوج مصرنا الحصول على نسخ من الاعلانات التي سيتم طبعها و تعليقها في الشوارع مع بداية الانتخابات
-



-
-

____________________________________________
-
-

تعليق على إعلان
إنت مين فيهم
-

طبعا كلنا شفنا إعلان القطر .. و الشاب اللى قاعد ع القهوة .. و ضيغة الاعلان التي بتستفزك انك تقوم من مكانك و تجري على المحطه وتتشعبط في القطر يمكن تلحقلك فرصة عمل بدل ما انت قاعد ... و من باب التجربة .. اتصلت بالرقم و لقيت رسالة الكترونيه ثاتبة مش بتتغير ولا حد بيعبرك أصلا ... المهم .. فكرت في الموضوع من باب نظرية المؤامرة .. ووصلت للحل .. الحكومه حبت تحل مشكلة البطالة لأنها احد برامج الرئيس الهامة .. و كان ده الحل الوحيد لحل مشكلة البطالة في بلد فيها كام مليون شاب بيعانوا من البطالة
-
-

2007/11/22

سرعة قفز

-
الحزب الوطني .. حزب مسكين .. مهضوم حقه دائما .. لا يجد من يقــّدر انجازاته رغم انها انجازات عصرية تحدث بسرعة البرق ... دون حتى ان يلاحظها المواطن العادي ... فبعد ان نظر الحزب الوطني الى المسقبل نظره اولى ... اتبعها بالثانية .. والتي لم يجزها الشرع في العصور الأولى ... لكن الهيئة العليا في الازهر اجازتها للحزب الوطني لأنه مرفوع عنه القلم .. فقد بدء الحزب التجهيز للمرحله الثالثة بعد النظرتين الاولى والتانيه .. ألا و هي القفزه الثالثة .. و التالته تابته طبعا .. لذا فانه من المتوقع ان تتم انجازات قومية وهمية استراتيجيه سريعه للحزب الوطني في هذه المرحله الثالثه .. ربما يتم تعيين جمال بيه مبارك رئيسا لمصر .. ربما يتم الغاء الدعم على السلع الاستراتيجيه .. ربما يتم تعيين عم عواد بائع سندوتشات الكبده وزيرا للقوى العامله فهو بارع في ايجاد فرص العمل لابناء منطقته .. ربما يتم تسريح السيد حبيب العادلي وزير الداخليه .. ربماهات كثيرة قد تحدث .. لن نشعر بها .. هذا هو الشيء الاكيد .. لان قفزة الحزب الوطني كبيرة و سريعه .. فهي احد ميزاته الرئيسيه التي لم يفلح معها العلاج بكل انواعه .. ف سرعة قفز الحزب الوطني صارت سمة مميزه .. تتحدث عنها كافة الاحزاب الاخرى داخل مصر و خارجها و لسان حالها يقول .. العبرة ف الصلابه يا وطني .. لكنه كحزب حاكم .. ظل كابسا على انفاسهم طوال تلك الفتره .. يتفنن في ابداء فلفله و شطته لكل الاحزاب و التجمعات الاخرى المعارضه داخل البلاد
-
تحديث : أخيرا .. لكل معارضي الحزب الوطني .. بالعند فيكم .. قررت شركة فياجرا ان تكون الراعي الرسمي للحزب الوطني في حملته القادمه لترشيح رئيس للجمهورية و في المؤتمر القادم للحزب كذلك .. لتكون خير عون له أمام كيد اعدائه .. و لمساعدته في التغلب على مشكله سرعة القفز التي ستمكنه من اثبات انجازاته امام الشعب .. بدلا من الانجازات التي تتم بسرعه الفيمتوثانيه دون ان نلاحظها او نشعر بها ... و شكرا
-

2007/11/15

ليلة مصرية .. لم تكن حمراء

-
على غير العادة .. اصيب مشجعوا الاحمر الاهلاوي بإحباط شديد .. و السبب هو هزيمه غير متوقعه .. حسب توقعاتهم .. لمباراة النهائي الافريقي امام النجم الساحلي التووونسي .. والمشكله .. ان ليلة المباراة كانت للكثيرين مصدر وحي و إلهام لنوع الاحتفال و الطريقه التي سيتبارى فيها المشجعون الاهلاوية لحرق دم الزملكاوية و زغزغه مشاعرهم و احاسيسهم .. ونسي الجميع او تناسوا ربما ان سيادة رئيس الجمهورية و القائد الاعلى للقوات المسلحه السيد مهيب الركن / محمد حسني مبارك .. كان على رأس المشجعين للفريق في هذه المباراه .. بعد تشريف سيادته لآخر مرة في مباراة القرن بين الاهلي و برشلونه التي انتهت 4 / 0 لصالح برشلونه الاسباني .. و يومها كان الرئيس مبتسما على غير عادته .. بشوشا .. بما أعطى ايحاءا بأن سيادته زملكاويا .. والعياذ بالله .. وتناثرت بعض الاحاديث وقتها ان وجود سيادته كان نذير شؤم .. والعياذ بالله .. و نسى الجميع هذه الافكار الشيطانيه حتى جاءت مباراة النهائي الافريقي لتعيد هذه الاحزان من جديد
-
النهائي الافريقي .. وجود آخر للرئيس ... وهزيمه جديده نادره للأهلي .. و لكن الرئيس هذه المره كان متوترا .. مثله مثل جماهير الاهلي .. بل و كاد ان يصاب بأزمه قلبيه و هو يسلم الكأس للاعبي النجم الساحلي .. و كأن لسان حاله يقول لهم ... حر و نار ف جتتكم ... لكنها مرت على سلام .. و نزل الرئيس من المنصه سالما غانما ... لكن .. ماذا لو كان الرئيس مات قهرا بعد مباراة الأهلي .. ربما لكونه أهلاوي .. و ربما لكونه سيسلم الكأس بيديه إلى ا لاخوة الاشقاء التوانسه كما يقول معلقونا دائما في كل القنوات .. بطريقه مستفزه و متكرره .. كأنهم ينفون عنهم هذه الصفه .. وقتها ربما كانت الدنيا انقلبت رأسا على عقب .. وكانت مباحث أمن الدولة قد استنفرت قواتها لإلقاء القبض على كل الاهلاوية في مختلف بقاع مصر .. بتهمة التسبب في مقتل رئيس الجمهورية .. و ربما تمت إضافة بعض التهم مثل التخطيط لقلب نظام الحكم .. او محاولة السيطرة على البلاد بالقوة .. و النتيجه .. ربما اعدام ابوتريكه على انه جيفارا مصر في وسط ميدان عام .. و ربما وقتها يصبح جوزيه زعيما للمعارضه .. و يتم نشر صور عماد النحاس و عماد متعب و فلافيلو في التلفزيونات على ورق كوتشينه .. و تدشن جوائز مالية قيمة لمن يجدهم او يدلي بمعلومات عنهم .. و ربما تكتمل الصورة بالقبض على كل من يرتدي الملابس الحمراء او يحمل الاعلام الاهلاوية الغاشمة .. و تعود مصر إلى سابق عهدها .. دولة بيضاء .. بخطين حمر
-
-
-



-

2007/09/13

رمضان كريم

-
رمضان كريم
-

رمضان مش شهرك لوحدك

رمضان في ناس كتير محتجالك فيه

دوّر عليهم مكان ما يكونوا .. خليك معاهم و ساعدهم

2007/09/07

العجل وقع .. سنـّـوا السكاكين

-
استيقظ مبكرا على غير عادته .. امسك بهاتفه و تحدث الى وزير دفاعه بلغه يشوبها القلق .. طلب لقاءا عاجلا .. و قد كان .. لم يستطع ان يتمالك اعصابه فقال بصوت متوتر ... لقد اقترب العيد .. و الاضحيه الجديده لم يتم اعدادها بعد .. الانتخابات على الابواب .. و بعد ان قدمت صدام في العيد الكبير لا بد من اضحيه سمينه لا تقل عنه ربربه .. فماذا سنفعل ؟؟ ... إلى هنا جاء رد وزير الدفاع للمره الاولى منذ حضوره للجلسه .. قال له .. سيدي .. الاضحيه جاهزه .. سمينه الى اقصى درجه .. تربت على العز و اكل الوز .. لكن المشكله الحقيقيه انها مريضه مرض الموت .. و الشائعات صارت تطاردها من حين لآخر .. و قد اكدت مصادرنا ان المرض شديد .. و الموت قريب .. فماذا نفعل .. تردد الرئيس قليلا .. ثم اشار باصبعه على خريطه العالم المثبته فوق جدار مكتبه و تساءل .. ألا توجد ضحيه اخرى في المنطقه .. ماذا عن دول الخليج ؟؟ .. رد الوزير بسرعه .. سيدي .. المنطقه الآن تحت سيطرتنا تماما .. فما حاجتنا لأضاحى من تلك المنطقه .. لقد اخترت لك اضحيه متميزه .. في منطقه عامره .. تطل على ناصيه و هواها بحريٌ اصيل .. إلى هنا وضح على الرئيس الاقتناع .. لكنه كان في حاجه الى حل سريع لمعضله مرض الضحيه .. وفجأه .. خطر على باله وسواس .. فقال لوزيره .. لماذا ننتظر الاضحيه حتى تموت .. لماذا لا نذهب و نحضرها الآن ... الوقت يداهمنا و يجب ان نغنم بها قبل ان يأتى عزرائيل و " يخلـَـص " معها .. اومأ الوزير ايماءه رضا و قال .. سيدي نحن على استعداد لاحضار الضحيه في 24 ساعه فقط .. سفننا متوقفه الان في البحر المتوسط و قناة السويس .. كما ان قواعدنا في الخليج .. تركيا .. ايطاليا على أهبه الاستعداد ... فهل تود ان نتم عمليتنا الليله .... لم يرد الرئيس .. لانه كان قد مضى في طريقه خارج الغرفه تاركا على مكتبه امرا رئاسيا باحضار الضحيه .. فورا
-
تغلغلت القوات داخل الاراضي المحتله بكل سهوله .. و ظلت تنتقل من المنطقه تلو الاخرى .. حتى وصلت للقصر الرئاسي .. و توجهت كتيبه مدرعات و مدفعيه الى غرفه نوم الرئيس .. ليجدوها فارغه .. تناقلت القيادات الاوامر عبر اللاسلكي .. و تم اصدار اوامر بضبط الضحيه بسرعه .. و قد كان .. تفتيش دقيق على اعلى مستوى .. لكل شبر في القصر الرئاسي .. لكن بدون نتيجه .. و في الوقت نفسه .. كان قيادات الجيش مجتمعين في المقر المؤقت للعمليات في ماكدونالدز المهندسين ... كانت الهمهمات دائره فيما يتعلق بالدخول السهل للقوات .. ما من مقاومه شعبيه باسله .. ما من آثار حتى لرجل المستحيل و لا حتى المغامرين الخمسه .. الامر الذي شكل لهم تساؤلا كبيرا و محيرا .. لكن كل هذه الالغاز وضحت بعد تلقى كبير القاده مكالمه هاتفيه من احد ضباطه الميدانيين .. يحادثه فيها من منطقه القاهره .. و يخبره ان الشعب كله متواجد في الاستاد الكبير لمشاهده مباراه القمه بين قطبي كره القدم هناك .. و ان الرئيس قد مات و تم دفنه على عجاله تحت شجره على مدخل الاستاد
-
__________________________

ملاحظة : الصوره من لعبه فيديو جيم أمريكيه حقيقيه .. و ليست مفبركه .. ويمكنكم مشاهده اللعبه و صور مأخوذه منها على الموقع التالي

2007/08/26

تـأملات مصـــْـرِّيــة

تأمـُلات مِـــصــرِّيـــة
---------------------------------------------
-
البقاء لله
لأنها كانت الاكثر تواجدا الى جواري خلال السنوات الماضيه .. لأنني رأيتها في مرضها و ضعفها .. لأنني قصرت تجاهها .. لأنني تجاهلت ألمها .. لأنني كنت أحبها .. فلا أجد الآن بدا سوى أن اطلب إليكم الدعاء لها ... جدتي العزيزه .. افتقدك
-
ثقافه العنب العنب
لم أكن اعلم عن الثقافه المصريه المعاصره .. سوى مقتطفات من أفلام اللمبي الشهيره .. أو بعض الأغنيات مثل العنب العنب .. و البلح البلح ... لكني اكتشفت فجأه ان مصر بها ثقافه من بتاعت بلاد بره ... و الدليل على ذلك .. القبض على مسؤول كبير بوزاره الثقافه ... اسمه ايمن عبدالمنعم .. بتهمه تلقى رشاوي بملايين من داخل وزاره الثقافه .. يعنى مصر فيها ثقافه .. و فيها وزاره .. و فيها ملايين .. و فيها رشاوي
-
الهجرة يا فرعون
اصرار الشباب المصري .. حتى هذه اللحظة .. على استخدام زوارق مطاطيه و قوارب متهالكه في الهروب من السواحل الشماليه إلى قبرص وايطاليا و اليونان .. رغم علمهم بخطوره التجربه بل و ضعف احتمالات النجاه فيها وليس مجرد الترحيل .. يؤكد على حالة اليأس الشديد التي يعانيها شباب مصر ... و يؤكد على اننا صرنا نعيش عهد .. البحر من أمامهم .. و فرعون من خلفهم
-
الغريزه يا فرعون
قال الله تعالى : فاستخف قومه فأطاعوه , إنهم كانوا قوما فاسقين (سورة الزخرف) ... معنى الآيه .. ان قوم فرعون لما تساهلوا معه و تركوه في ظلمه و طغيانه فازداد طغيانا و ظلما .. و كانوا مشاركين معه في جريمته .. ونحن اليوم نشارك في نفس المشهد .. فإذا كنا نعيش عصر خالي من الغرائز التي تعتبر ابسط حقوق البشر بل و أكثرها أهميه على الاطلاق .. فنحن لا نجد ماءا نقيا نشربه .. ولا خدمات صحيه مناسبه ترعانا .. ولا سبل الزواج ميسره في ظل الغلاء .. حتى الانترنت أبسط حقوق البشر من أمثالي صار حجرا علينا و أحدث سبل النصب العلني على المواطنين .. ومع كل هذا .. لم ينطق أحد .. حسبي الله و نعم الوكيل
-
ايه الهبل ده
كنت اشاهد فيلم (كان يوم حبك) من بطوله خالد سليم و داليا البحيري .. و شاهدت كمّ المشاهد الكوميديه التي يدعون انها رومانسيه .. حوارات ساذجه و عبارات متكرره بكثره .. لأكتشف بعدها بفتره .. أن ما كنت اكتبه على مدونتي الثانيه ما هو إلا صوره متكرره من الرومانسيه الساذجه التي رأيتها في الفيلم ... فعذرا لقراء مدونتي
-
ربنا يطول في عمرك يا باشا
لا اعتقد كما تعتقد الكثير من وسائل الاعلام ان الرئيس حسني مبارك على وشك الوفاه .. او انه قد توفيّ فعلا .. فأنا لا اؤيد هذه النظريه .. بل اكاد اجزم والله اعلم ان الرئيس مبارك مازال امامه على الاقل شهرين او اكثر قبل ان يتوفاه الله .. فنحن الان في شهر شعبان .. و هو شهر مفترج .. و من بعده رمضان .. شهر التقوى و الصلاح .. شهر مبارك على مر العصور .. فكيف بالله عليكم يعطيه الله هذه النعمه ويتوفاه في رمضان او شعبان ... ربنا اسمه العدل .. و عرفوه بالعقل
-
هيّ فوضى
لأول مره اعتقد ان إعلان ترويجي لفيلم .. قادر على جذب المشاهد لدخول فيلم من المره الأولى وبدون انتظار سماع آراء الناس .. هذا ما رأيته في اعلان فيلم ( هيّ فوضى ) ... فلماذا لا ينجح هذا الفيلم في جذب المشاهد ؟؟؟ فإذا كان الفيلم يحمل اسم يوسف شاهين .. صاحب الجوائز والمتناقضات و الهبل الفني المتألق .. وبطل الفيلم هو الفنان الجميل خالد صالح .. مش بس كده .. كمان في دور ضابط شرطه فاسد .. والأجمل انه صاحب جمله ( انا بابا ) الشهيره .. وحين أراد ان يستنجد بالقوه النسائيه .. لجأ الى اللحم الابيض المصري الاصيل .. منه شلبي .. ليكون بهذا فيلم متكامل يرضى كافه طموحاتك كمتفرج ... ولا إنت رأيك إيه
-
ألبيدا
منال .. مدونه شابه .. جميله .. أفكارها متجدده .. انقطعت فجأه عن التدوين .. و لأني لا أعلم لها أي وسيله اتصالات او اصدقاء يمكن الرجوع إليهم .. فلم أجد سوى المدونه و نشر إعلان .. كما حدث سابقا في شهر فبراير ... لذا على من يملك اي معلومات عن منال سرعه إخبارنا بها .. و لكم جزيل الشكر
-
مصر و الكويت
ستضحك كثيرا .. عندما تسمع الدبلوماسيين المصريين في الكويت يقولون بأن حق المواطنين المصريين الذين تعرضا للضرب على يد الشرطه الكويتيه سيتم استرداده .. و انهما سينالان كافه حقوقهما المدنيه و سيعودان إلى ارض الوطن في اسرع وقت ... ستضحك اكثر .. عندما تسمع السيد وزير الخارجيه ابوالغيط يقول بان مصر تهتم برعاياها وتفعل ما في استطاعتها لحل الازمه
اما ما سيضحكك اكثر و اكثر .. ان الساده الدبلوماسيين انفسهم لم يستطعيوا حمايه انفسهم حين تم ضرب الملحق التجاري المصري في الكويت نفسها منذ حوالي عده اسابيع .. و لم تحصل مصر وقتها سوى على كلمه ( شجب ) من المسؤوليين الكويتين بعدها بعده اسابيع من المحايله المصريه و النحنحات الدبلوماسيه الخارجيه
-
عنصريه البنك التجاري الدولي
العنصريه اللي قرأتها في رساله البنك التجاري المصري كانت مستفزه لدرجه اني كان لازم انشرها .. البنك المحترم .. اللى ليه شنه و رنه .. باعت رساله يطالب فيها بتحديث البيانات من الاعضاء .. و بقرآه الرساله تلاقي فيها طلب غريب جدا .. ياريت تقراه بنفسك ف الصوره .. و تاخد بالك من حته (ضابط) دي بغض النظر عن أي حاجه تانيه .. إقراها وقولي إيه رأيك ؟؟؟ دي عنصريه .. و لا دونيه .. و لا استخفاف بعقولنا
-
-
-
مصر بتحب اسرائيل
قالوا مصر بتصدر الغاز لاسرائيل .. ومصر قالت لأ ... قالوا مصر بتستورد القمح من اسرائيل .. و مصر قالت لأ .. قالوا مصر بتستورد الصحي و السيراميك من اسرائيل .. و مصر قالت لأ .. قالوا مصر بتروح اسرائيل تغسل رجلها و تيجي .. مصر قالت لأ .. كل حاجه لأ لأ لأ ... طيب و الحل ... لقيت المصري اليوم النهارده طالعه بخبر جامد أوي .. بصراحه مقدرتش اعلق عليه .. قال إيه : مسؤولي الصناعات المصريه لما بيسافروا اسرائيل زي ما همه متعودين .. بيضايقوهم ف الجمارك .... يعني مالآخر كده .. همه ( متعوده دايما ) يسافروا هناك .. و اللي بيسافروا مسؤولي التجاره والصناعه المصريين .. مش مسافريين يخللوا بنتجان ولا يتعالجوا من الروماتيزم .. يبقى الله يرحمك يا رجوله .. و الله يرحمك يا تاريخ
-

2007/08/19

تاج مريم

تاج مريم
لما مريم تبعت تاج .. يبقى لازم أرد
----------------------------------


أحب شخص لقلبك في الحياه
اتمنى يكون سيدنا محمد (ص) او هكذا احسبه عند الله يعني
-
انسان مستعد تضحى بحياتك عشانه
معتقدش انه في حد ممكن اضحى بحياتى عشانه ( بمعنى الموت يعني ) ... لكن اكيد في ناس كتير ممكن اضيع وقتى و فلوسي و مجهودي عشانهم .. حتى لو معرفهومش .. و أبسط مثال المرضى اللى بشوفهم عندنا في المستشفى
-
انسان كرهته لدرجة الجنون و تمنيت لو تمسك سكينة وتنقض وتغرزها فى قلبه تقتله وتقف تبص عليه لجثته وتشفي غليل قلبك
كتيير اوي .. مثلا في ناس من صحابي بوصل لمرحله احيانا احس انى عايز ادفسهم في الكرسى ومسمعش صوتهم .. و ممكن مثلا اهل عيان جايين معاه المستشفى تحس من زنـّـهم انك عايز تدخلهم بلاعه او سيفون و تشده عليهم
-
ما هو اسم اجمل كتاب كتبه بشر قراته ومحتفظ بيه حتي الان
بصراحه .. مبحبش القراءه نهائيا
-
اسم كتاب -كتبه بشر برضة- انت متعلق بيه وبتقرأه كل فترة
هوه انا هغنى كتير .. والله ما بحب القراااااايه
-
جهاز منزلى انت متعلق بيه او بتستخدمه كتير
الكمبيوتر طبعا .. بدون منازع
-
مكان تحس بالراحة النفسية عندما تراه
البحر ... بليل .. و أحس الميـه و هيه ساقعه على رجلي
-
مكان تحس فيه بالحنين الى شىء لا تدرى ماهو و ذكريات جارفة الى شي
السواقه بليل في وسط اراضى زراعيه .. و معرفش ليه :) .. بس بسرح فيها جامد اوى اوى
-
مكان تحس بالراحة عندما تدخله
المسجد .. و ياسلام لو فيه تكييف و الارضيه نظيفه .. بيبقى حاجه تانيه يعني
-
اجمل مدينة زرتها داخل مصر
مرسى مطروح
-
واجمل منظر طبيعي داخل مصر
واحه سيوه .. و الفيووووم
-
شخصية كارتونية بتحبها
تان تان
-
نوع هاتفك المحمول
سونى اريكسون W800
-
بالنسبة لسرعة بروسيسور الجهاز وحجم الهاردوحجم المواد الاسلامية والكلام دا
مش عارف ليه متجمعين على بعض :) بس جهازي لابتوب توشيبا .. الهارد 40 جيجا .. و المواد الاسلاميه .. كان عندي زمان حاجات كتير .. بس حاليا محتفظ بالقران الكريم بتاع مشاري راشد .. فقط
-
أهم هدف انت واضعه لحياتك الآن
ابقى ناجح جدا .. في مجال الدعايه والاعلان .. أو طب النسا والولاده ... أيهما اسهل و اقرب
-
مواصفات فتاة الأحلام بالنسبة لك
تدخل دماغي
-
شعورك لما بتسمع كلمة مصر
الاول كنت بحس برعشه و راحه نفسيه ... دلوقتى .. رعشه بس
-
شعورك لما بتسمع كلام عن اليهود
ببقى عايز اتف ... بس
-
شعورك لما بتشوف ظابط شرطة
وانا صغير كنت بخاف جدا .. وامشى بعيد عنهم .. دلوقتى بقيت بدور على اي حاجه او تلكيكه عشان اتكلم معاهم و اثبتلهم انهم مش فاهمين اي حاجه في اي حاجه
-
شعورك لما بتشوف الكناس العجوز فى الطريق
بيصعب عليه .. بس ببقى مبسوط اوى لما بلاقي واحد بيكنس الشارع و هوه بيضحك ومبسوط
-
افكارك تجاه شاب ماشى فى الطريق يلبس جلابية بيضاء قصيرةوعمامة وله لحية وبجيبه السواك وبيده المصحف
بدعي ربنا يدينى قوه ايمانه ..وبتمنى انه يكون شخص كويس من جواه .. عشان ميكونش مثال سيء للشاب المسلم
-
اسم مدونتك
مصرنا بلوج
-
لماذا اخترته.. وماهي نيتك من وراء اختياره
المدونه عملتها بعد ما كنت عملت موقع طنطاوي للكاريكاتير .. و كنت ناوي اسميها طنطاوي برضه .. لكن اول ما بدأتها كنت حابب اكتب باسم وشخصيه تانيه غير طنطاوي .. اللى هيه زنجولا .. و طبعا مكنش ينفع اسميها زنجولا .. فاخترت اسم مصرنا .. يمكن عشان حبيت اقول .. انها مهما حصل .. هتفضل مصرنا احنا
-
هل فكرت في إغلاق مدونتك؟ .. والسبب
كتييييييييير ... لكن اهمهم كانوا مرتين .. مره منهم كانت بسبب تغيب اصدقائي في مدونه مش مهم عن التدوين .. نهى و عبدالله مفتاح .. و يومها قررت مدونش تانى الا لما يرجعوا .. و رجعوا الحمدلله
و المره التانيه كانت احساس باليأس والاحباط من احداث اي تغيير .. و كنت خلاص قررت انى هقفل المدونه و انتهى الامر .. لكن بعدها علطول جالى ايميل من واحد صاحبي .. و كان الايميل ده مبعوت له فورووورد من ييجي 10 اشخاص ورا بعض لحد ما وصله وهوه بعتهولي ..و كان في تجميعه كاريكاتيرات ليه .. حسيت ساعتها ان في حد بيقدر و بيفهم انا عايز اقول ايه .. عشان كده كملت
-
صورتك في المدونة..رمزيتها
دكتور ماسك مشرط و لوجو المدونه .. مش محتاجه شرح يعني ههههههه
-
لماذا دخلت عالم التدوين من الاساس
لأني كنت عامل موقع للكاريكاتير بتاع طنطاوي .. و كنت حابب اتنقل من مرحله الموقع بتحديثه الممل إلى المدونه الاسهل والابسط
-
احلى جمله قيلت لك فى وصف مدونتك
بصراحه .. معنديش تعليقات كتير .. و معظم التعليقات كلام عام او مجاملات .. مفيش حاجه علقت معايا اوي من الكلام اللى اتقال .. بس الجمله الشائعه بين صحابي ... المدونه دي هتوديك في داهيه
-
التعليقات بالنسبه لك ..اهميتها
بصراحه .. هيه ترمومتر شعبيه المدون .. مش المدونه ... يعني في ناس مدوناتهم عبقريه و مع كده زوارهم و تعليقات الزوار عندهم قليله جدا .. و ناس تانيه مدوناتهم هايفه لكن مليانه زوار .. فالموضوع يعتمد على المدون اكتر منه المدونه
بالنسبه ليه اعداد التعليقات قليله جدا بالمقارنه بمدونات كتير .. عشان كده بطلت أعتمد على التعليقات كمقياس لنجاح الماده المكتوبه او المرسومه .. و بقيت اكتفى برضايا الشخصى عن المكتوب
-
مااحلى بوست كتبته ...ضع اللينك .. ثم اذكر لماذا
بصراحه . كل البوستات ولادي . مبحبش حد اكتر من التاني .. بس يمكن انا بقيت احب مدونتى التانيه tender rose اكتر من مدونه مصرنا .. مش عارف ليه .. يمكن عشان بتعبر عني انا شخصيا .. مش بتعبر عن حاله البلد او مشاكل الناس عامه
-
أحلى مدونة قريتها
سؤال صعب و غلس .. بس اجابته الدبلوماسيه سهله و بسيطه .. كل المدونات اللى في اللسته عندك ع اليمين دول بحبهم و بحب اقراهم
-
أفضل بوست قرأته؟ وضع لينكه
اكيد البوستات كتير اوي اوي يعني .. بس يمكن انا لسه من 5 دقايق قاري بوست و عجبني جدا .. ف هنقول ان ده احلى بوست قرأته النهارده ... انا هناك
-
حد قل ادبه في التعليق ؟ عملت ايه
حصلت .. وكانت مستفزه جدا .. واحد قعد فتره مستلمنى يبعت 50 تعليق على كل بوست و كلهم قله ادب .. و عمل موديريشن على الكومنتات لكن الحمدلله ربنا خده و رجعت فتحت التعليقات تاني
-
أسوأ مدونة ؟ اسوأ بوست
اسوء مدونه .. بصراحه اي مدونه بتستخدم الشتيمه باستفزاز بكرها .. و هيه كام مدونه و معروفين يعني
اما اسوء بوست ... اممممم .. مفيش حاجه معينه في بالي
-
تبعت التاج ده لمين
كل الناس اللى اسمها على اليمين في اللسته .. و مش محتاجين عزومه يعني

2007/08/16

إمسك حرامى

الاسلام دين عشوائي .. دموي .. قاتل للابرياء .. و منتهك للانسانيه .. يعني ايه واحد تتقطع ايده عشان سرق .. ما البلد كلها بتسرق .. يعني على كده اكتر من نص البلد دي المفروض ايديها تتقطع و تمشي مكسحه في الشوارع تقول عشانا عليك يارب .... الاسلام دين بربري .. بأي حق يقطع ايد واحد غلبان عشان سرق لقمه عيش يتقوت بيها ... الاسلام دين همجي .. ليه يقطع ايد واحد سرق حاجه بسيطه من واحد مش محتاجها .. فعلا دين غريب

المشكله .. ان محدش فاهم حاجه .. تقعد في وسط اي قعده شباب تلاقي ماشاء الله افتاء على ودنه .. ماهو اذا كان المفتى ذات نفسه بيفتى على روحه .. و كأنه بيفت في آته محلوله .. عايز الشباب يعمل ايه .. براحته بقه .. اديله حريته و اطلق يداه على الدين و الشرع و الاحكام الالهيه .. لانه ببساطه .. بغبغان ..مردد .. عمره ما فكر يقرا .. عمره ما فكر يدور .. عمره ما فكر يفهم ..عايز يتكلم و يتنطط و خلاص .. الكلمتين دول عشان بس لو حد لسه عايش في عصر .. الاسلام البربري .. الدموي .. و الكلمتين اياهم دول .. يفوق .. و يفهم .. يمكن يعرف يحس و يكون بني آدم

حد السرقه في الاسلام .. هو قطع اليد .. أيوه .. اليد ..و تحديدا اليد اليمنى من مفصل الكوع .. طب و ليه .. ما اللي سرق سرق و يتسجن شويه وخلاص .. هقولك ان كتب الشرع مليانه تفسيرات اجتماعيه و انسانيه و اقتصاديه .. ميهمنيش منها غير خاجه واحده .. ان ربنا قال .. والسارق والسارقه فاقطعوا ايديهما .. علشان كده ده حد .. ينفذ .. و مفيش حد من حقه يتساهل فيه .. لا اللي اتسرق ولا حتى الحاكم .. لأنه امر الهي مباشر

طيب .. موضوع الراجل الغلبان اللي سرق عشان مش لاقي ياكل .. و اللي سرق سريقه صغيره .. و خلافه .. الاسلام اكيد مش دين عشوائي عشان ينفذ حكم قاسي بالسهوله دي .. كل حاجه ليها ضوابط و احكام .. يعني مبدئيا كده .. الدولة الاسلاميه دولة متكامله .. يعني مفيش حاجه اسمها نطبق حد السرقه و نتنازل عن تنفيذ الحد على حاكم بيسرق ومحدش بيكلمه .. و مفيش حاجه اسمها نطبق حد السرقه وننسى تطبيق تشريع الهي من بنيان الاسلام اسمه توزيع اموال الزكاه .. لو الدوله مشيت متكامله .. مش هيكون في مبرر او عذر لأي حد .. خد عندك .. لو الريس بتاع البلد شخصيه مستقيمه .. بيراعي ربنا .. معتقدش ان البلد هتكون سايبه .. تكيه .. مسروقه من فوق لتحت .. في نفس الوقت .. هيتم تطبيق الحد بسهوله لأن الناس عارفه ان اللي هيطبقه راجل بيراعي ربنا .. مش حرامي .... طب بلاش .. لو الريس بيوزع اموال الزكاه .. و احسب اموال الزكاه من فلوس كبارات بلدنا تطلع كام .. الفلوس دي لو اتجمعت و اتوزعت بحق ربنا .. عمر ما هيبقى في حد مش لاقي ياكل .. عشان يبرر سرقه .. و كل حاجه هتمشي زي ماكانت ماشيه زمان .. لكن تقول لمين .. لحاكم بيسرق .. ولا محكوم حرامي مش عايز يدفع زكاه ربنا في ماله

عشان الكلام ميكونش عشوائي و بدون أدله .. دي أحكام إقامة الحد في السارق .. ياريت تقراها كويس .. عشان تفهم دينك صح

أولا : شروط السارق
ـ التكليف : بالغ عاقل .. و دي معروفه .. و لو السارق صغير .. هيؤدب بدون قطع ايده
ـ الاختيار : يعني يكون سارق باختياريه الشخصى مش مكره عليه من حد .. و اعتقد دي برضه معروفه
ـ الشبهه : و دي مهمه .. مينفعش يكون في شبهه احقيه للسارق في المسروق .. يعني مثلا مينفعش تقطع ايد أب لأنه سرق فلوس ابنه .. ولا الابن اللي سرق اهله .. و حتى الاقارب من الدرجه الاولى .. لأن الحد هيؤدي الى قطع الرحم و ده اهم من الحد والسرقه في الاسلام .. بلاش .. الاعظم من كده انه ميقامش الحد على الخادم لو سرق سيده و هوه كان بيخدمه بنفسه .. تخيل .. شوفتوا الاسلام يا عالم يا ... ولا بلاش
ـ الحق : لا يقام الحد على من سرق من المدين المماطل في السداد .. لانه ده من حقوقه اللي بيطالب بيها .. و في الحاله دي يعزر كأن يسجن مثلا .. لكن لا يقام عليه الحد
ـ الحاجه : يعني اذا كانت البلد في ازمه مثلا و مفيش ميه .. زي دلوقتي .. و واحد هيموت من العطش و اضطر يسرق من جاره ميه .. لايقام عليه الحد .. لكنه يعزر برضه

ثانيا : شروط المال المسروق
ـ حلال : ان يكون مالا حلال .. يعني لا يقام الحد في اللي يسرق لحم خنزير او خمور .. لانها محرمه شرعا
ـ النصاب : يعني مش هنقطع ايد كل واحد سرق .. لازم السريقه دي تكون بلغت نصاب معين .. و اللي هوه مختلف عليه .. لكنهم قدروه في الشرع بالمال اللي يكفي المقتصد في يوم كامل .. و كان قديما تلاته دراهم .. يعني يكون المسروق تمنه يكفيك تعيش بيه يوم كامل .. لدرجه ان الحنفيه قالوا مش اقل من 10 دراهم كمان .. يعني المذاهب بتخفف مش بتشدد

المصدر / كتاب فقه السنه .. السيد سابق .. الجزء الثاني
المصدر / فتاوى موقع .. إسلام أونلاين .. 2007

2007/08/04

مشكله المياه في مصر


ملف صوتي
يوضح سبب مشكله المياه في مصر
المصدر / قناة ميلودي - التعليق الصوتي / شعبان ابو بـحـّه

لتحميل الملف على جهازك .. إضغط هنا
حجم الملف 1.7 ميجابايت

_________________________________


المصريه .. مش كده .. يا شوشو

ننوس عين ماما من جوه .. الفنان الكوتكوت .. جاد شويري .. عامل كليب جديد .. و كالعاده .. لازم حد يقولى انه عمل كليب عشان اتفرج عليه .. لأني بعتبره عجيبه من عجائب الدنيا .. و تحفه من التحف النادره .. ننوس عين ماما المره دي لما حب يعمل كليب جديد .. ملقاش غير المطلشه بتاعت اهله .. البنت المصريه .. فعمل اغنيه اسمها المصريه .. و جاب واحده رقاصه و قعد يطبلها ويقول .. المصريه .. المصريه .. بصراحه عنده حق .. اذا كانت وزاره السياحه بنفسها عملت اعلان .. نورت مصر .. و جابت شويه بنات بالبكيني .. و رقاصه شرقي ملبسه .. يبقى حق جاد بيه إنه يعمل ما بداله .. عموما .. المصريه مش كده .. و مصر مش كده .. و انت يا ننوس ماما متلعبش مع الكبار بعد كده .. و بالمناسبه .. أحب اوجه سؤال قصير للفنان الكبير ... هوه المفتاح بقه فين دلوقتى ؟؟؟

2007/07/29

كركر .. رجع تانى

تحديث


طبعا شعبان لسه مغناش حاجه للانترنت
بس توقعت لو حب يغني للى إحنا فيه ده هيقول إيه ههههه



- ------------










_____________________________________

-

مشربتش من نيلها

ليه .. هيه مية النيل خلصت

-بلدنا دي نشفت علينا
خلاص فيها مش عايشين
نعيش فيها ازاي ولمين
و احنا عطشانين

مشربناش من نيلها
طب و ازاي هنغنيلها
ازاي راح نبني فيها
طول مالناس بتهلب خيرها

دور حوليك تلقاك
مش لاقي لا ميـه ولا أكل
وبرغم النيل ويانا
بكره نموت ودى شيء بقه سهل

يمكن نسيوا ان احنا فيها
باعوها ولا سألوا عليها
بس يا مصر احنا اللي هنبقى
مهما العمر يفوت بعديها

غاليه الميه علينا
والنيل من حوالينا
و مادام مش لاقيين ميه
يبقى خلاص هنمد ايدينا

2007/07/20

كركر


كاريكاتير جديد


لأن مصر بقت مليانه جواسيس .. لدرجه انه معدش فيها بؤ ميـّـه للناس الغلابه
هنلاقيها من الشرطه ولا السينما ولا الدكاتره ولا الفيديوكليب
و يحيا مهرجان القراءه للجميع


اضغط الصوره للتكبير














2007/07/17

النجدة .. الغوث .. الحقووووني

لو وقعت في مشكلة .. اطلب النجدة
أيوه .. بوليس النجدة .. انت فاكرني بهزر مع حضرتك
مستغرب ليه ؟ كله بالقانون .. قانون الصهينه .. و الدستور المصري
المهم انه القانون .. و هتاخد حقك يعني هتاخد حقك -



-الموضوع بسيط .. كل ما تبقى في مشكله .. و تحس ان الموضوع مش مريح و انك بيضحك عليك .. متسكتش .. اطلب بوليس النجدة .. هيجولك و هيحاولوا يسترضوك بكل طريقه .. و ياسلام لو في شوية تحابيش على المحضر .. يعني بلاش مثلا تشتم الشخص اللي هتبلغ عنه او تغلط فيه .. و كفايه اوي تقول كلمتين في المحضر عن حقوق الانسان و عن الكرامه اللي بتضيع بعبث هؤلاء المتساهلين بالشعب .. و شوف الدنيا هتقلب ازاي .. و كل الناس هتحاول تراضيك ازاي .. جرب و شوف

طب ليه .. مش البوليس دول ولاد كلب و مطلعين عنينا في كل قسم .. لا .. فوق كده و اصحى .. الموضوع المره دي غير .. دا انت اللي جايبهم لحد عندك .. يعني مبدئيا انت دكر و مش خايف منهم .. بلاش .. خد عندك دي .. لما هتتكلم في حقوق انسان و القانون هيعرفوا انك واحد بتاع مشاكل و مقرف .. و احسن حل لأمثالك انهم يخلصوا منك سكيتي و بدون مشاكل .. هتلاقيهم فجأه بيحاولوا يغلطوا الطرف التاني مهما كان الجرم اللي انت عملته .. لأنك ف النهايه واحد بتاع كلام و همه مش ناقصين هم و قرف

-ليه بنقولك خد حقك .. ليه بنقولك الجئ للشرطه .. لأن ببساطه احنا بلد روتيني ممل .. يعني الضابط مستعد يطبق القانون بحذافيره .. و مهما يكون .. لأنه مكتوب في الكتب زي ما بنقول .. و لأن القانون ده احنا منعرفش عنه حاجه ف إحنا بنسكت و نطنش .. مع ان من حقنا اننا نضرب اللي بيخالفه بالجزمة القديمه و نطلع عينه و ناخد حقنا منه تالت و متلت .. لكن تقول لمين بقه .. كل واحد منا نايم و مبلط ف الخط ولا همه .. مع ان لو كل واحد في كل مكان ف مصر فكر ولو للحظة ان لو غلط هيلاقي اللي يطلبله النجدة .. و بأضعف الايمان هيثبت حاله بس .. ف صدقوني هيفكر ألف مره .. و يتردد .. و احتمال كبير انه لو كان متعود على الغلط .. متعود يسرق .. يرتشي .. يتبلطج .. فهيبقى كل ده ف الظلمه .. يعني على الاقل يا اخي .. اذا بليتم .. فاستتروا

-متتكلمش كتير و ورينا شطارتك ... اكيد كلو هيقول كده .. و عموما احنا جاهزين .. كل فتره هصورلكوا محضر شرطه ف مكان مختلف و بظروف مختلفه .. و هحاول اشرح الموقف كاملا بظروفه .. و ايه رأي القانون فيه .. و ايه الكلام اللي تقوله و يخليك في الامان .. لأن اكيد المواقف دي بتتكرر معانا كلنا لكن بننسى . . و احيانا بنطنش .. و المصيبه انه كتير مبنبقاش عارفين انني كده مظلومين او اصحاب حقوق

2007/07/13

الأمن القومي


تعرف ايه عن هيئة الامن القومى المصرية

برغم ان كلنا عارفين ان في هيئه امن قومى امريكيه ..على اعلى مستوى .. و برغم اننا كلنا سمعنا اسم كوندليزا رايس كمستشاره امن قومي امريكيه .. ألا ان كتير ميعرفوش ان مصر فيها هيئه امن قومي .. المفروض انها لا تقل اهميه عن نظيرتها الامريكيه .. و المفروض انها احد امال مصر في تصحيح شامل و حقيقي للاوضاع .. ده المفروض
بالبحث على الانترنت .. معتقدش انك هتلاقي معلومه واحده مفيده عن هيئه الامن القومى المصريه .. ربما سلسله مقالات امين هويدي رئيس المخابرات سابقا هي الماده الخصبه الوحيده .. لكنها طبعا و كالعاده مش هتكفيك ولا تروي فضولك للمعرفه .. عشان كده مضطرا هدور على الموضوع في جهات مختلفه .. زي مثلا اني أسال احد الاصدقاء المثقفين للغايه و اللي لخصلي الفكره ببساطه انها منظمه من المفترض تكون مستقله .. تتكون من هيئات قضائيه و داخليه و خارجيه و حربية .. الغرض منها المحافظة على امن الدوله اللي بتتواجد فيها سواءا من اي مشاكل داخليه او خارجيه ممكن تأثر على استقرارها .. ويحقلها اتخاد الاجراءات اللازمه في حالة وجود اي خطر أيا كان من يمثله سواءا كان دولة او جهة غير حكومية خارج البلاد .. او سواءا كان اي شخص داخل الدولة بدايه من الرئيس و حتى اصغر طفل فيها .. بحيادية و بدقه و تحري .. و بدون نفاق ولا محسوبية
-
معلومات كانت كافيه بالنسبه لشخص ( جاهل ) مثلي .. لكنها فتحت الباب لمزيد من البحث عن طريق الانترنت .. لحد ما وصلت لمعلومات متاحه عن هيئة الامن القومى الامريكيه .. بتشرح منظمه عملهم و الفكره اللي بيقوموا عليها .. و اللي بتتلخص ببساطه .. في نفس المعلومات اللي قالها صديقيى .. إضافه الى انها بتهتم بمتابعه كافه وسائل المعلومات بدايه من التلفزيون و الراديو و الجرائد و الانترنت .. وصولا للمكالمات التليفونيه الثابته و المحمولة .. و حتى البريد الالكتروني و محاضر الشرطه و الاشاعات المتداولة بين المواطنين .. بأسلوب يشابه اسلوب الجاسوس المدني المزروع بغرض تجميع معلومات اجتماعيه و اقتصاديه اكتر منها عسكريه .. الاهم من كده ان هيئه الامن القومى عندها بنك معلومات كبير .. و اجهزه كمبيوتر قادره على تحليل المعلومات المتوافره عن اشخاص عشان تقدر تحللها و تقدم تقارير عن الاشخاص المتوقع دخولهم دائره الضوء قريبا في مجال الامن القومى بانواعه .. يعني مش بس حاضر .. لأ كمان مستقبل
-
صلاحيه الامن القومى من المفترض انها تحت تأثير رئيس الهيئه فقط .. بدون اي تأثيرات خارجيه من اي مسؤول بما في ذلك رئيس الدوله .. و لها الحق في الوصول الى اي معلومات و من اي مصدر كان .. ببساطه و سهوله .. بس المهم .. ان ليها الحق في ايقاف اي شخص حتى لو كان مسؤول كبير ( رئيس دولة مثلا ) عن منصبه لو تجمعت لديها المعلومات التي تؤكد انه في طريقه للاخلال بالاستقرار والامن القومي
-
الامن القومي بيقوم على امن الدولة ككل .. يعني حمايتها من التهديدات الخارجيه .. و امن المواطن .. يعني تأمينه ماديا و اجتماعيا و اقتصاديا و صحيا و تعليميا .. و امن النظام .. يعني المساهمه في تنفيذ القانون و دعمه في اي مجال .. باختصار .. مسؤوله عن تنظيم حياة الوطن ككل .. عشان كده .. قد يكونوا همه الامل الاخير في انصلاح حالنا ... لو .. كانوا موجودين

2007/06/22

للزملكاويه .. فقط

-
هذه التدوينه هي تعبير عن خالص اعتزازي بكوني زملكاوي جدا .. و أبا عن جد كمان .. و فيها شويه تخاريف طنطاويه كده كنت كتبتها حبا في الزمالك و اللي جابو الزمالك .. و لا عزاء للأهلي و مشجعي الأهلي
-
-
زملكاوي
----------
من غير ما تكون .. بالكورة موهوم .. هتكون بالفطره زملكاوي
لو ابن يومين .. او فوق ستين .. هتقول و تنادي زملكاوي
وده حب كبير .. مش لحظة تطير .. بيخليك تحلم بالنادي
الاول في الكاس و الدوري .. في افريقيا و بإسم بلادي
هنعيش ونموت .. وبأعلي صوت .. الكل هيبقى زملكاوي

الاصل حقيقي في امجاده .. ميت سنه وعايشهم بولاده
بطولات وكؤوسها في دواليبه .. ابطال بتحققله تاريخه
وعلشان كده قلبي زملكاوي

لعيبه حريفه و بتعلـّم .. الكوره ازاي يوم تتكلم
عايشين يرفعوا اسم ناديهم .. في العالي و يحموه باديهم
وعلشان كده قلبي زملكاوي

يا زمالك اسمك في بلادي .. راية مرفوعه ومش عادي
مدرسة للفن وللكوره .. لعيبتك دايما في الصوره
وعشان كده قلبي زملكاوي

يا زمالك "بصري" و "شحاته" .. و "إمام" لعيبه فوق العاده
و" حليم " و "جمال" دوله ولادك .. و" وحيد" حامي شبكة بطولاتك
وعشان كده قلبي زملكاوي
-
-
-
لو كنت نسيت
--------------
لو كنت نسيت .. أفكرك يا أهلي
لو كنت حديد .. هسيحك يا أهلي
لو كنت نسيت !!
سيدك أنا .. ف الحرفنه .. أقدر أجيب جون ف ثواني
غيرنا مفيش .. فرقة تعيش .. فرقتنا راجعه من تاني
ولو كنت نسيت ...
حاول تجيب .. لعيب شديد .. يمكن يفيدك قدامي
فرقتنا نار .. ومفيش هزار .. شيلاه يا أهلي يا ياباني
ولو كنت نسيت ..
عفوا يا اهلي .. الكاس ندهلي .. روح يالا شوفلك كاس فاضي
زمنك نسيك .. والدور عليك .. مش راح اسيب حد قصادي
-
-
-
مش هقول عاللى حصل
-----------------------
مش هقول عللي حصل بيني و بينك .. يا حبيبي
يا زمالك .. احنا وراك .. فالعين شايلينك
انا قلبي معاك .. آه آه آه

عيني عالخطين .. يا سلام يا سلام .. على عالبال و العين .. غيرك في مين ؟
دوله اللي فضله يا هوى .. من ذكرى الاهلي من سنين
لما كسبناه .. يا سلام يا سلام .. وقوام دسناه .. بجوان تمام
جايين يقوللنا السته يا ناس .. ناسيين يا زمالك همه مين ؟؟
دانتا لو تفوق كدا .. راح يكون .. الكاس لنا
واللي جايّ بكره إيه ؟؟ .. ده كله ليك ..
دوري كاس .. كله نلاقيه
قلبي مال و اهو انكوى .. يا زمالك .. بالهوى
-
-
-
فرقتنا
------
فرقتنا .. جاية تكتب الأساطير
الكوره فيها .. ليها شكل خطير
وإذا خايف إوعى داحنا ليلنا طويل
اووووووه

يا زمالك .. إنت جوه قلبي كبير
بغلاوة الهرم و النيل
ورينا .. ويالا متّـع الجماهير
اووووووه

زمالكنا .. الماتش ده مش عادي
هيوريكوا أجمل كوره
هنجيب إجوان
بجمال و إمام
هنّـدس يا حليم الصوره

فالجون .. يالا شوت ف الجون
هنكون أقوى تيم ف الكون
يا زمالك كلـّه بيدعيلك
فوزك هنا مضموون
-
-
-
علي صوتك
------------
علي صوتك .. علي صوتك .. بالغنا ..
الكاس والدوري .. حقنا .. حقنا ..

ولا همنا .. مين ضدنا ..
الفوز لناااااا .. لو حتى الاهلي ضدنا .. الفوز لنااااا

على صوتك .. على صوتك .. بالغنا ..
ابطال افريقيا من هنا .. من هنا ..

احنا هنا .. وكلنا ..
بنقول سوا .. يا زمالك انت ف قلبنا .. ف قلبنا ..

على صوتك .. على صوتك .. بالغنا ..
يا زمالك .. يالا الفوز لنا .. من حقنا ..
-
-
سو يا سو
-----------
سو .. يا سو .. الأهلي هنغلبووووه
سو .. يا سو .. الأهلي هنطحنوووه

الأهلي كسبني سته .. وانا بكره أديله دسته
مش بس ف جونه هياخد .. بكره جونه يشمعوووه

سو .. يا سو .. الأهلي هنركبووووه
سو .. يا سو .. الأهلي هنمسحوووه

الأهلي في لعيبه .. غاليه وياريتها مفيده
نصها صيّع بتحشش .. و بكره الباقي هيركنووووه
-
-

ـ رسم الكاريكاتير للاعب الزمالك في بدايه البوست للفنان الجميل / هشام رحمه

2007/06/20

شباب نايكي .. و أطباء المصلحه

اتظاهر امبارح مجموعه من الاطباء على رأسهم قيادات النقابه في مصر مطالبين بحقوقهم في فلوس الحكومه من التكـيّـه اللي ملهاش صاحب .. ولأول مره يجتمع حمدي السيد مع عصام العريان متفقين على قضيه واحده .. برغم انتماء الاول للحكومه و التاني للأخوان .. و كانت اهم مطالب الاطراف المجتمعه هي بدء مرتبات الاطباء من 500 جنيه .. و توفير بدل اداره لمديري المستشفيات يبدء من 2500 و حتى 5000 جنيه ... يا بلاش

اعتقد اني بصفتي طبيب .. كان المفروض اكون فرحان بالكلام ده .. والتجمع ده .. لكن للأسف حسيت بحرقه دم و قرف ما لهم مثيل .. يعني الاخوه قيادات النقابه الممثله للاطباء .. و المفروض انهم اطباء لخدمه المرضى مش لخدمه نفسهم و بس .. خرجوا .. و اتجمعوا عشان لقوا الحكومه بتوزع فلوس على المدرسين .. قالوا ينوبنا من الحب جانب .. مع ان نفس الساده الافاضل دول .. و تلامذتهم اللي احنا اتعلمنا على ايديهم علمونا ان الامر الواقع في اساسيات كتير لا يمكن تغييره .. يعني مثلا .. عمري ما سمعت عن اساتذه النسا والولاده بيتظاهروا علشان مفيش عدد كفايه من الحضانات للاطفال اللي بيتولدوا ناقصين نمو .. و النتيجه .. موت حوالي طفلين الى تلاته اطفال يوميا في كل مستشفى جامعي على مستوى مصر .. و العدد اكتر من كده كمان .. بلاش .. مسمعتش عن اساتذة الباطنه بيعترضوا على عدم توفر ادويه السكر و الكبد برغم ان حياه مريضهم متوقفه عليها .. الافكس من كده .. مسمعتش عن دكاتره وقفت يوم تشتكي من نقص الامكانيات المهول في كل قسم داخل مستشفيات الحكومه بطريقه مستفزه .. بالعكس .. اكتفى الساده الاطباء بمصمصه الشفايف و الدعوه على اللي كان السبب و كأننا ولايا في مقام سيدنا الحسين

ايها الساده الاطباء المحترمون .. زي ما علمتونا اننا نحترم المريض .. و نخاف على مصلحته .. و نخليها دايما قبل اي حاجه تانيه .. ياريت برضه تعلمونا ازاي نحترم نفسنا .. و منهينش كرامتنا علشان خاطر قرش زياده .. اعتقد لو كل راعي اهتم بمصلحة رعيته .. البلد دي ممكن تتغير للأحسن ... وبرضه بقول .. ممكن .. مش أكيد


-

-----------------------------------------

-

-

من اكتر الحاجات اللي بتضحكني .. و يمكن بدرجه كبيره اوي .. منظر الشباب اللي ماشي بجنب مثلا لأن ماركه التي شيرت موجوده على جنب .. فبيحاول يظهرها .. او اللي مطلع جزء من البوكسر ( ملابسه الداخليه ) علشان يوريك انها ماركه باتا مثلا .. ويا سلام لو الكلام ده في واحده بنت .. هتلبس بودي شفاف او يادوبك مغطي فوق السره بكام شبر عشان توريك انها لابسه تحتيه ماركه مفتخره من ام خمسه و سبعين جنيه .. ليه كل ده .. عشان شبابنا المحترم بقه بيدور على الماركه قبل ما يدور على اللي لابسها .. طالما الشاب بقى اديداس او نايكي .. ف ده يغنيه عن انه يكون صاحب شهاده او اخلاق .. بمنتهى البساطه .. بقى لازم تصنف نفسك بين طبقات شباب الماركات عشان تعرف تكون وسطهم .. و تعيش رافع راسك .. و معري جزمتك .. و مطلع بوكسرك بره البنطلون .. ماهي الماركه اللي لابسها دي هتقوي قلبك .. و تخليك تتكلم بربنط .. حتى لو مش بتفهم اي حاجه في اي حاجه
-

-
وبالمناسبه دي .. في سؤال بيلح عليه .. يا ترى تحب تلبس قميص ماركه محترمه .. و لا تجيب مكانه 5 قمصان من ماركه نص كم ؟؟ قد كده تفرق معاك الماركه و التيكيت اللي بيضرب سعرها السما ؟؟ ... بصراحه .. حاولت اوازن كتير ما بين النقط دي و اكتشفت اني من النوع التاني .. يعني ممكن اجيب مثلا تي شيرت ماركه جامده لمجرد امتلاكه و خلاص .. بس في المقابل بكون حريص على اقتناء 5 تي شيرتات من انواع عاديه لمجرد التغيير .. اللي انا شايفه اهم من اقتناء حاجه ليها ماركه جامده او علامه تجاريه تقيله .. و يمكن قناعه بأن الهدوم دي مجرد غطا بنتحرك بيه وسط الناس .. بيسيب انطباعات كويسه احيانا .. لكن في النهايه .. انت اللي بتفرق حتى لو لابس هدوم مقطعه .. او من ماركه ( رصيف الستر يا ام احمد ) .. اظن كفايه كده كلام عن الماركات .. و اسيبكم تنزلوا تشتروا كام كوتشي اديداس على كام بدله فيرساتشي و كام نظاره ريبان و متنسوش ساعتين فوسيل في السكه .. و صلحه