2006/09/02

يا كعبو كعبو

الأوضاع في مصر فعلا غريبه .. بتفكرني تماما بلاعب كرة القدم المصري .. تلاقيه في عز انفعالات المباراه و ضيق الوقت و حرقة اعصاب المشاهدين .. قاعد يلعب الكره بكعبه أو بلفظ آخر .. بيرفص الكوره .. مع انه يا ولداه مش عارف يلعب بوجهه .. و تقول خدنا ايه من وشك علشان تدينا قفاك .. لكن كل لاعب متخيل انه حريف و لعيب مجابتوش ولاده .. و عمال يديها رفص طول الماتش .. رايح جاي .. و يطلع يقولك احنا عملنا اللي علينا بس ربنا ما أرادش اننا نكسب .. و نعم بالله يا أخي .. بس بلاش التقى اللي بينزل عليكو فجأه ده .. و اعمل اللي عليك قبل ما تقول ربنا مأرادش .. لأن الله لا يضيع عمل عامل منكم
-
كم ذا بمصر من المنكراااااات .. مع اعتذاري للشاعر .. لأن اللي الواحد بيشوفه في مصر بقه فعلا يشيب .. و في خضم كل تلك التغييرات اللي بتحصل خصوصا سياسيا و شبابيا .. بفتكر قول رسول الله : من رأى منكم منكرا فليغيره بيده .. فإن لم يستطع فبلسانه .. وإن لم يستطع فبقلبه وذلك اضغف الإيمان .. اعتقد ان الحديث واضح والترتيب فيه منطقي و مسبب .. اللي احنا بنعمله بقه ايه ؟؟ كله شغال بلسانه و قلبه .. و نسينا يده دي خالص .. هتقولي ادي الله و ادي حكمته .. و الايد قصيره .. والامثله اياها اللي خلت الناس كلها شغاله رفص علشان محدش عايز ولا عنده القوه انه يبص قدامه و كل مكتفي بالبكاء على الاطلال
-
كل واحد فينا شايف المنكرات اللي في مصر و المشاكل اللي موجوده .. وانقسمنا معها الى قسمين .. الاول و للأسف اخد اسهل الطرق .. التغيير بالقلب .. كل واحد قفل على همه جواه و نام عليه و صاحي نايم يدعي ربنا و يقول اللهم اهلك الظالمين بالظالمين .. و خلصنا على كده ... اما الفئه التانيه .. فماشيه بمبدأ التغيير باللسان .. يعني نطلع مظاهرات و نهتف و نزعق و نقول يا مسهل .. وبرغم عدم اعتراضي على مبدأ التظاهر لأنه حق مشروع للجميع .. لكن نفسي الناس تمشي بالترتيب .. يعني تغير باليد قبل ان تغير باللسان .. الموقف هنا بيفكرني بالضبط باللي قاعد في الشارع و شايف واحد ماشي وفاضله خطوه واحده ويقع في بلاعه .. فبدل ما يقوم يهز طوله و يحوشه .. قاعد في مكانه يقوله حاسب يا استاذ .. خد بالك
-
طب و يا ترى ؟؟ .. اشمعنى التغيير باللسان هوه اللي ماشي ؟؟ علشان عناصر التغيير كلها عايزه كده .. المتظاهرين .. الشعب و الحكومه .. اولا المتظاهرين .. لما بيقفوا يتظاهروا مبيكنش الواحد عمل كل اللي عليه .. الواحد فيهم و انا كنت منهم بالمناسبه .. بيقف يزعل اوي و يزعق .. مع انه قبل كده استغنى عن حقوقه بارادته .. اكيد مش كلهم كده لكن انا بتكلم عن حاجات بتحصل في مصر كلها و اكيد كل واحد فينا عملها مره قبل كده .. مين فينا مداش شاي لموظف او اكراميه او حلاوه .. لما بتدي رشوه لموظف علشان يمشيلك مصلحه .. ولما بتجيب كوسه لولادك علشان ينجحوا .. و غيره وغيره .. يعني يا جماعه لما الواحد يكون ناجح في حياته و يشتغل وينجح يبقى يقف يعترض و يزعل .. فساد النظام .. مش مسؤول عن فساد كل فئات الشعب .. ولما الواحد مننا يرتشي و يسرق علشان مش لاقي .. منجريش نقول الحكومه السبب .. لأن الحكومه بنت كلب و كلنا عارفين كده .. لكن برضه احنا بنغلط و بنضيع وبنكبر دماغنا و نبرر الغلط لنفسنا .. و نرجع نقول اصل البلد و اصل الحكومه .. نفسي افهم احنا بنضحك على مين
-
مظاهراتنا اللذيذه للأسف .. بقت شماعه الحكومه و الشعب كمان .. يعني الناس بقت كلها قاعده في البيت بعد اي حادثه او مشكله مستنيه الشباب بتوع كفايه لما يطلعوا يتظاهروا .. واهه يفكوا عن نفسهم شويه و يحسوا ان البلد لسه بخير .. همه دول الكلمتين اللي هتسمعهم على اي قهوه او من اي واحد في كشك سجاير او سواق تاكسي .. يعني بقت المظاهرات دي للأسف .. متنفس للناس الغلابه دول .. علشان ميحاولوش يعملوا حاجه .. و يحطوا ايدهم على خدهم .. يعني عمر ما حد فيهم هيحاول يغير المنكر بيده .. مفيش أمل .... أما حكومتنا العزيزه .. فبقت تعمل ما بدالها و تبرطع .. لأنها عارفه ان محدش هيحاول يغير بيده .. انما اخرنا اننا نحاول نغير بلساننا او قلبنا .. و هنطلع نقول بؤين على السريع في مظاهره و كل واحد يروح بيتهم .. بيقى بصراحه .. حق الحكومه تعيش و تعمل ما بدالها ... يا جماعه .. اللسان ده طريق العاجز .. واتمنى ميكونش ده هوه طريقنا الاول وإلا يبقى على البلد دي السلام

4 comments:

كلبوزة لكن سمباتيك said...

يعني اية العمل؟
ما انا قلت نقعد علي الحكومة نفطسها محدش رضي
فين ايام كلابيز من اجل التغيير؟!!!
معنا الي مجتمع مكلبز
لا رشوة و لا فساد بل رز بلبن للجميع
انا خلاص طلعت برة البلد و ميهمنيش
اقول و اجري و احدفهم بالطوب
ابقي تعالي

Egyptian Falcon الصقر المصري said...

والله عندك حق يازنجولا، فعلاً احنا كلنا لازم ناخد مواقف أكتر حسماً من كده. أنا مابقولش ان احنا نشيل سكاكين ومطاوي وننزل الشارع، بس كمان مانقبلش بالقرف ده ونقول "مجبر أخاك لابطل". أنا عجبني تصرف صديقة ليا قوي، كانت اتخطبت لواحد ضابط شرطة، وفيوم وهيا بتزوره في الكمين بتاعه، عزمها عالغدا، وبصت لقت أكل كتير قوي من كل مالذ وطاب جايلهم في الكمين. سألته: يااه مش كتير قوي كده حبيبي؟ مالكش حق تكلف نفسك كده، احنا لازم نوفر شوية عشان الجهاز والجواز والمصاريف. قالها: مصاريف إيه؟ هوه انا بادفع حاجة؟ ده كله ببلاش. طبعاً البنت ذهلت، قالتله: ببلاش؟ إزاي يعني؟ قالها: كده، ماهو احنا كلنا كده مش انا بس، قامت البنت بكل شهامة رمتله الدبلة وقالتله ان آسفة، بس انا مايشرفنيش اجوز واحدة عايش على قفا الناس فردة، وسابته وراحت اتخطبت لواحد تاني. أهو ده تصرف في منتهى الإيجابية.

أنا ساعات كتير باستغرب، الناس الفاسدة دي في كل مكان في مصر - وهما كتير قوي - فين أهاليهم؟ فين أباءهم وأمهاتهم وزوجاتهم واخواتهم وأبناءهموأصدقاءهم وباقيت الناس حواليهم؟ أنا لو دخلت فلوس بيتي، مراتي مش حاتسكت الا لما تعرف مصدرها إيه، ولو ماعرفتش، أكيد حاتسيبلي البيت هي والعيال وتروح على بيت أبوها. ماهو مش معقول ان كل الناس الفاسدة دي كل عائلاتها مستمرأة الحرام وماعندهاش مانع تعيش عليه.

تخيلوا معايا ان كل واحد عنده صاحبه ضابط شرطة بيعذب الناس ولا موظف حكومة مرتشي، ولاتاجر فاسد واخد قروض بيلعب بيها، قاله لأ، لأ مش عايز اعرفك تاني، أنا آسف ماقدرش اصاحب ناس ماعندهاش ضمير. ياااااه، ده ساعتها الناس دي حاتبقى معزولة جداً وممكن تموت من خنقتها.

قوم يامصري، مصر دايماً بتناديك
قوم لنصري، نصري دين واجب عليك

Dr. Tantawy said...

** كلبوزة
حمدالله عالسلامه يا ريسه
الكلبزة مستنياكي ترجعي و تقودي الجماهير انشاء الله
عندك حق طالما بعيد عنهم قولي ما بدالك :)) عايزين كلام جامد بقه من اللي قلبك يحبه
تحياتي إلى جميع الاهل والاصدقاء و طنط و عمو في السعوديه و خالو في الكويت و ابن جيراننا في العراق


** egyptian falcon

Dr. Tantawy said...

** egy falcon

عندك حق فعلا .. هوه ده اللي بنقوله .. لو كل واحد فينا حاول يصلح حواليه على الاقل هنصلح قاعدة الهرم في مصر .. و تولع راس الهرم باللي قاعدين عليها و مدلدلين .. يغوروا كلهم