2006/09/18

غلط × غلط

-
محبش اكون في صوره القروي الساذج .. اللي شايف كل حاجه غريبه .. و تصرفات الناس خارج حدود المنطق اللي ممكن اتحملها .. و بعيده عن اي خط احمر بمقدار طرق وكباري .. المشاهد في يوم واحد فقط .. بقت اكتر من انك تتحملها او تقدر تتكيف معاها .. احساس عام بالقرف بيجيلي .. ببقى نفسي اروح للناس دي .. و انزل فيهم ضرب لحد لما يبانلهم صاحب زي ما بيقولوا .. ماهوماش ناس مفيش احساس .. بدون ما اطول انا هحكي المشاهد و كل واحد يفكر هوه ليه تأقلم معاها و بقت بالنسبه ليه عاديه .. و حاجه المفروض منستغربش منها
-
ـ>> واحده قاعده في عربيه مع واحد .. ايديهم في ايدين بعض .. و وشهم في وش بعض .. و رجليهم على رجلين بعض .. اوعى تروح لبعيد .. دول زي الاخوات يا بني آدم .. المهم .. قاعدين في اي حته ظلمه او حتى ماشيين في وسط الشوارع ولا هاممهم .. و الاحلى من كده انك لما تيجي تبصلها .. تلاقيها بتضحك و مبسوووطه جدا و مش بعيد تشاورلك باي باي
ـ>> واحده ماشيه في مول او نادي مع البوي فريند بتاعها .. يولعوا .. بس اللي بيفقع مرارتي انك تلاقيها بتجر وراها عيل صغير المفروض انه اخوها اللي خارجه تفسحه .. وهيه واخداه تلبسه العمه .. بصراحه من افضل الاخلاق اللي بتربيه عليها بوصفها اخته الكبيره العاقله .. بتعمل منه راجل .. بقرون
ـ>> واحده ماشيه قدامي مع واحد شكله كده فرفور .. مأنججين و منتهى الرومانسيه .. و شايله على كتفها عيل صغير .. طبعا هتقول دول عرسان جداد و طالعين يهيصوا شويه .. استنى عليه .. اصلهم دخلوا سينما .. و قعدوا ورا خالص .. وهاتك يا كلام و .. كلام برضه .. بمنتهى البجاحه .. بعد ما تطلع من السينما هتقولي ايه رأيك في الفيلم .. هقولك مش وقته .. انا مش معاك اصلا .. هتقولي ليه .. هقولك اصل الست دي جارتنا في الشارع .. هتقولي فيها ايه .. هقولك اصل دي مرات الاستاذ شكري ولسه كنت واقف معاهم من كام يوم .. و ده ابنها احمد .. هتقولي روح سلم على الاستاذ شكري .. هقولك ما هو اللي كان بيتكلم معاها في السينما ورا ده .. مش الاستاذ شكري
ـ>> واحده ماشيه لابسه عبايه و عامله الطرحه بتاعتها بطريقه شيك اوي .. الجميل انها نازله تتمشى مع بنتها الكبيره .. حاجه تفرح والله ان لسه في بنات بتنزل مع اهلها بدون ما تكون متأففه و مضايقه .. بس نفسي افهم حاجه .. ليه الست تكون كده .. و بنتها ماشيه معاها لابسه بادي ستوماك و ميني جيب ... العيب في مين ؟؟ الست مش عارفه تربي .. ولا البنت اللي معرفتش تفسد امها
ـ>> واحده لابسه اسدال .. بصراحه انا بحب شكله .. عاجبني يا أخي و انت مالك .. حاسس انه عملي جدا .. و محترم جدا .. و بيليق على اي واحده .. هتقولي ايه المشكله .. هقولك .. انها قاعده مع واحد ورا شجره في الجامعه .. ناحيه السور الوراني كده .. و بيـ ... ذاكروا
ـ>> واحد ملتحي قاعد قدامي في كافيه .. بنتفرج على ماتشات كاس العالم .. بصراحه دقنه منوره وشه .. و الشيب اللي فيها مديله وقار فظيع .. تمنيت للحظه اني اكون زيه .. خلص الشوط الاولاني ... و جه اعلان كوكاكولا ... للفنانه اللولبيه نانسي بعجر .. عم الحج لقيته بيبص بطريقه غريبه جدا .. و بيقول .. تبارك الخلاق فيما خلق
-
يا ترى الكلام ضايقك .. و لا الموضوع عادي و مستغرب ان انا مستغرب منه

14 comments:

عبدالله مفتاح said...

ياه يا زنجولا يا حبيبي والله الجمله دي
( واحده ماشيه لابسه عبايه و عامله الطرحه بتاعتها بطريقه شيك اوي .. الجميل انها نازله تتمشى مع بنتها الكبيره .. حاجه تفرح والله ان لسه في بنات بتنزل مع اهلها بدون ما تكون متأففه و مضايقه .. بس نفسي افهم حاجه .. ليه الست تكون كده .. و بنتها ماشيه معاها لابسه بادي ستوماك و ميني جيب ... العيب في مين ؟؟ الست مش عارفه تربي .. ولا البنت اللي معرفتش تفسد ) من زمان وهي في بالي وكل ما اجي اكتبها اخاف حد يزعل اديك كتبتها تسلم صوابعك

Nouran said...

موضوع عادي بس يضايق يعني بقى موجود وعادي بس هو مش عادي موضوع يغيظ

حــمــيدو said...

طنطاوي

حلوه حته القروي الساذج دي ... بتفكرني بكبير الراحميه علي طول

الصراحه مش عارف اقولك ايه

! ريح دماغك احسن

Dr. Tantawy said...

** عبدالله
يا عم قول اللي في نفسك ولا يهمك . طالما انت عارف انك صح متخفش من حد



** نوران
اهو هوه ده اللي بقول عليه يا نوران .. التناقض اللي احنا عايشينه .. بصراحه مفيش احلى من الكومنت بتاعك يعبر عن اللي انا عايزه :))) ههههه تحياتي



* احمد
انا مريحه والله بس احيانا الواحد دمه بيفور و مش بيلاقي حته يطلع فيها غله غير هنا هههه

Nohaz said...

انا بقيت اكره كل حاجة في مصر مجاتش علي دول
نفسي بس اسيب ام البلد دي
و عهد علي مارجعهاش تاني ولا حد منها يسمع عني تاني
بس اسيبها

labido said...

انت جبت من قعر الحلة .. علي راي المثل ..
واذا لم تستحي فافعل كما يفعلون ..
وكما في الحديث ..... والقابض علي دينه كالقابض علي الجمر .. او كما قال سيدنا وسيد الناس كلها
عبدو

Dr. Tantawy said...

** nohaz
يبقى الحال على ما هو عليه و على المتضرر اللجوء الى القضاء
هتفضلي مصريه ابا عن جدا :)) لا مفر



** labido
ياعم ولا قعر الحله ولا نيله .. كان ززمااااان .. دلوقتي بقه ماشاء اللله ناس كتير كده .. والواحد بقه مش عارف يقول ايه .. بس اللي بيصبرني حاجه واحده .. اول آيه في سورة العنكبوت
بسم الله الرحمن الرحيم
ألم .. احسب الناس ان يتركوا ان يقولوا امنا وهم لا يفتنون
صدق الله العظيم

ana ga3an said...

زانجولا باشا
انت محموق لية
بعد كدة لما تشوف اي حاجة تضايقك و تحرق دمك
افتكر ان مصطفي كامل مات من حرقة الدم مش من الوطنية

أم أحمد said...

لأ طبعاً فيه حاجات كتير لسة بتغيظ فيه بلاوي إلا من رحم ربي
كل سنة وانت طيب

أحمد المصري said...

طبعا حاجة تولع فعلا تصرفات الناس خرجت عن حدود المنطق ..بصراحة مش عارف أقول إيه ربنا يهديهم ويهدينا

Dr. Tantawy said...

** ana ga3an

ههههه ماشي يا عم هفتكر الموضوع ده
بالمناسبه احييك على اختيار صوره حنظله لأني اعشق ناجي العلي .. تحياتي



** sahar
وانتي طيبه :) انا قلت اللي افتكرته يعني .. بس اكيد البلاوي لسه كتير .. انتظري بوست ضباط الشرطه ههههه



** dawy
nice to have ur comments regulary , well .. i still believe that good poeple are there around us :) they will have the upper hand once again insh2alha


** أحمد المصري
ربنا يهدينا جميعا .. انا قلت لو في حد قرا البوست و بيعمل حاجه من الحاجات دي يتقي الله .. يعني ده اضعف الايمان
تحياتي ليك يا باشا

tota said...

زنجولا العزيز
مش عارفة فى الفترة الاخيرة انت بتشوف حاجات بعين مختلفة ليه كده انت لبست نظارة ولا حاجة ؟

يا زنجولة
احنا فى وقت الان اصبح فيه الغريب والعجيب والشاذ هو الواقع بينما
اصبح الطبيعى من النوادر
منذ ان غزت كلمة عادى وايه يعنى ده طبيعى حياتنا وكل منظورنا لكل حاجة اتغير

لا اجد تعليق غير وايه يعنى عادى
تحياتى

Dr. Tantawy said...

يا ستي سيبيها على الله
مش بقولك انا قروي ساذج ههههه

Anonymous said...

للاسف
بقي ده المنظر اللي حولينا
وانيل و اضل سبيلا
اللي انت شفته ده بسيط دلوقتي
بقي في اقبح من كدة للاسف

بالنسبة لي مش عادي
بس حاجة مقرفة و مقززة
و تدهور اخلاقي و ديني بشع