2006/09/05

COMMENTs

من الاسكندريه اكتب .. الموضوع طلع بسيط و مش منفى يعني هههه .. الجو هنا فعلا هايل .. و الناس كلها مبسوطه .. وانا شخصيا مبسوط باني هقضي كام يوم بعيد عن الزحمه و الروتين والملل قبل الامتحانات .. لكن عندي شوية ملاحظات غريبه شويه .. اولا صوت الكلكسات اللي مكنتش بسمعه بقه في اسكندريه زي باقي المدن خلاص .. ثانيا البنات معظمهم بقوا حرانين زياده عن اللزوم .. ثالثا البحر السنه دي كئيب .. مش عارف افهمكم الاحساس ده ازاي .. لكن البحر فعلا شكله مضايق او مكتئب هو كمان .. عموما .. انا فكرت في تدوينه غريبه زي الجو اللي انا فيه .. و قلت اكتب عن الكومنتات
فكرت قبل كده تكتب تعليق على تدوينه قرأتها ؟! .. يبقى اكيد برضه قريت تدوينات بدون ما تعلق عليها .. يا ترى فكرت الموضوع بيعتمد على ايه ؟؟ هل هو حالتك المزاجيه .. كسلان ولا فاضي ولا دماغك عاليه .. ولا الموضوع مرتبط بالشخص صحاب المدونه .. هل هو صديقك او منافسك او كونه فتاه ... ولا الموضوع مرتبط بالتدوينه نفسها من حيث جودة الفكره أو النقد او الرؤية المكتوبه بيها ... أكيد الموضوع مش معقد للدرجه دي .. لكنه في وسط عالم المدونات .. حاجه خطيره و مهمه جدا .. تستاهل انك تقف عندها شويه .. و تفكر انت ليه كتبت تعليق على موضوع معين .. و ليه مكتبتش على موضوع تاني
انا حاولت اعمل مسح للمدونات المشهوره الموجوده على الانترنت .. المصريه تحديدا .. و صنفت المدونات حسب عدد التعليقات المكتوبه فيها في أخر عشر تدوينات تحديدا .. و الحقيقه النتيجه كانت الى حد ما متوقعه .. لكن لسه برضه السؤال مطروح .. هل عدد التعليقات دليل على شعبيه المدونه .. ولا كفاءة افكارها .. ولا تميزها عن الباقيين .. ولا شخصيه صاحبها .. ولا علاقات المدون .. الحقيقه احتمالات كثيره جدا و صعب انك تربطها او تنسقها بطريقه ترضي تساؤلاتك و توصلك لنتيجه معينه .. عموما اسيبكم مع الارقام اللي وصلتلها
-
ملاحظات :ـ
ـ اولا زي ما قلت انا اعتمدت على حساب التعليقات في آخر عشر تدوينات لكل مدونه
ـ مدونه الاميره اوسه .. مفيهاش غير 8 تدوينات فقط .. لذا لزم التنويه .. و خمسه و خمسيه في عين العدو ههههه
ـ مدونه أبيتاف .. فيها تدوينات كتيره لا تزيد عن سطرين تلاته .. و احيانا صوره
-
-------------------------------------------------
النتائج حسب آخر عشره تدوينات في كل مدونه من العينه المختاره
-------------------------------------------------
------------
الفائز : سوسة المفروسه .. بجدارة و استحقاق .. و مبروك جائزة التعليق الزهبية .. مشبك غسيل
------------

10 comments:

بحب مصر said...

اكيد عدد التعليقات فى المدونة حاجة تفرح بس مش مقياس لنجاح او فشل المدونة , لان الاقبال على الشئ فى مصر لا يعنى بالضرورة جودة هذا الشئ , وبرضه ماينفيش جودة الشئ

بالنسبة للمدونات السياسية و اللى هى طبعا معظم المدونات الموجودة :
انا شايف ان المدونة وسيلة و ليست غاية و لو بصتلها كده مش هيهمك عدد التعليقات , المهم تقول اللى جواك و توصل افكارك و مواقفك

لكن لو معتبر المدونة وسيلة للشهرة هيهمك قوى عدد التعليقات و هيكون ساعتها العدد مهم و هو دليل النجاح

بالنسبة لي مثلا , شايف انمدونتى نجحت لانى من خلالها اتعرفت على ناس كتير مهتمة باحوال البلد و شاركتهم احداث زى مظاهرات وندوات , فهى بالنسبة لى كانت وسيلة مش غاية

Aoossa said...

هههههههههههههههههههه
أنا طلعت التانيه أنا عاوزه مشبك غسيل وطبق كشرى من عند كلبوزه
على فكره رغم أن عدد التعليقات عندى كتير وشاكره للناس كلها طبعآ
لكن ده مش مقياس
أحيانآ بيكون خفة الظل لكن مش موضوع بنات لأن فيه بنات بيكتبوا أحسن منى ومعندهمش تعليقات
عندك أمثله كتير
عشتار
فارس قديم
الغريب
بعدك على بالى
فريده
حلم
زنجولا الحاقد
لست أدرى
بنت مصريه
وأخرين
وأحيانآ الناس مش بتحب المواضيع الطويله رغم جودة موضوعاتها
كذلك عدم الأقبال على المدونات اللى بتهتم بالشعر
الأمزجه بتتغير وكل يوم بيظهر جديد
بس مافيش علاقه طرديه بين عدد التعليقات و المحتوى
والدليل أنا شخصيآ
لا ليه فى الكتابه ولا البنتجان
بس أهو بقا غلاسه
العواف يا زنجولا كنت جيه أطمن عليك
كلبوزه بتسأل عليك

rasha said...

انا عن نفسي بفرح قوي لم الاقي عدد كبير من التعليقات بس احيانا ممكن تحكم في العدد ده وده اللي مش بحبه يعني ممكن تدخل تعلق لناس كتير قوي فبالتالي هيعلقولك ممكن تكتب في موضوع حيوي قوي او ممكن تدخل تعلق لنفسك مثلا يعني ممكن حاجات كتير بس احيانا بردك بحس اني هايفه لاني بفكرفي حاجه زي كده لان الدنيا مش تعليقات وبس وبعدين التعليقات بردك احد اهداف التدوين انك تعرف ردود افعال الناس علي كلامك وافكارك ده في حد ذاته شئ ايجابي بس للاسف احيانا الواحد بيكسل يعلق زي انت ما قلت
بس احييك علي فكره البوست ده..

Dr. Tantawy said...

** بحب مصر

حلوه حته المهم تقول اللي جواك و توصل افكارك دي :) بجد جايبه مالآخر
وتقييمك لنجاح مدونتك برضه مبدؤه كويس و عملي يعني .. تحياتي



** osaaa

هبعتلك المشبك الفضي انشاء الله متقلقيش :) مش خساره فيكي يعني .. انا بفكر انشاء الله لو ربنا اراد وخلصت نعمل جرنان زي اضحك للدنيا .. يبقى للمدونين فقط و متأكد انه هينجح .. اذا كان في ناس بتشتري الدستور علشان تقرا قلمين .. يبقى هتشتري جرنان زي ده لأن المدونين كلهم اقلام
وبعدين ايه حاقد دي :) لازم تفضحيني قدام الناس هههههه


** rasha

بصراحه اول مره ادخل على البلوج بتاعك و بصراحه لذيذ جدا
موضوع التعليقات .. انا قلت كلامك ده .. وحاولت اجمع الاسباب اللي بتتحكم فيه ومقدرتش .. كتير اوي و معقده اوي
بالنسبه لأنك شايفاها هيافه بالعكس .. انتي رديتي على نفسك .. الواحد يحب انه يقرا تعليق الناس و رد فعلهم من جهه و في نفس الوقت يتفاعل معاهم في الكلام اللي هوه كاتبه .. لكن المهم .. انه ميكونش التعليقات دي نهايه العالم .. يعني لو الواحد ملقاش تعليقات ف راح قافل المدونه :) كان زماني قعدت في بيتنا من زمان ههههه .. تحياتي

soosa el-mafroosa said...

هيييييييييييه

يا را فع معنويلتي يا زنجولا ..و بعدين حاسس بيا تصدق عندي نقص شديد في مشابك الغسيل .ألا لو بعت المشبك الذهبي ده يجيب كام واحد خشب

و بعدين ماسمعتش حد يعني قال مبروك ..يا جماعه دانا أول مرة اطلع الأولى في حاجه اللهم الا مرة طلعت الأولى ع الجمهورية في مسابقة كيكة ع العالي

و انا من منطلق هذه المناسبة السعيده أحب أشكر بلدي و حبايبي و المجتمع و الناس ..و بابا حسني و ماما سوزان ..لأن المواضيع اللي بكتبها عنهم بتجيبلي تعليقات كتير

شوية جد بأه ..بص هي التعليقات لا تعبر" بالضرورة" عن جودة المضمون ..فيه مدونات رائعه و لكنها غير مشهورة ..و ساعات تقرا تدوينه جميلة جدا و تحس ان صاحبها قال كل حاجه فتكسل تكتب تعليق عشان بس تقول له برافو..

بس انا مانكرش ان موضوع التعليقات دي عندي شئ مقدس ...أنا باجي جري من شغلي أدخل ع البلوج عشان أشوف آخر التعليقات..و كتير ناس وضحتلي جانب جديد ماكنتش شايفاه و كتير ناس قالولي حاجات ماكنتش فاهماها و استفدت منهم كتير...التعليقات من أهم العوامل اللي بتشجع الواحد يكتب و يكتب ..مش بس عددها لكن اسلوبها و قيمتها

ماهو احنا لو كنا عايزين نكتب لنفسنا فقط كنا كتبنا مذكرات في ورق و كشاكيل..لكن بنكتب ع النت عشان نوصل للناس و نتفاعل معاهم
ونعرف أراءهم في اللي احنا كاتبينه ايه؟

ياللا يا عم ..تعليق يتفك باربعه ..أوكازيون بأه ..و بعدين عشان ماتسبقنيش

Nouran said...

ايه ده هو انا من المدونات المشهورة يا سلام الحمد لله
انا كنت بتفسح مكنتش ف البيت ده انا بقالي كتير مجتش عندك ناسف بس حجات جامدة اللي انت كاتبها والله حلوووووة ف الجون كفاية كده
اه والنبي نا عايزة رد ع السؤال بتاع عدد التعليقات ده ماشي

Dr. Tantawy said...

** sossa

متشكرين عالتعليق الكبير ده .. ايه يا عم ماحنا بنعرف نكتب و حلوين اهه .. عايزين من ده علطول ههههه


** nouran

الكبير كبير بكلامه مش بسنه :)) سيادتك من الكبار اوي دلوقتي .. الف مبروك .. بس فاضلك شويه على جايزه المشبك الذهبي انشاء الله .. شدي حيلك

عمرو عزت said...

المركز الرابع مش وحش برضه


مش كنت تعمل الموضوع ده أيام مقال
البهائية
يا راجل

Dr. Tantawy said...

مبروك المركز الرابع :)) هيه جت كده والله بالصدفه يعني

عموما .. الكبير كبير برضه

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول