2006/12/30

حجاج موديل 2007

العيد فرحه يا بني آدمين
كل سنه و انتو طيبين
---------------------
الحاج أحمد الصباحي
اول الحجاج اللي هكتب عنهم النهاره ..بصراحه مقدرتش امسك نفسي من الضحك وانا بقرأ حواره في المصري اليوم .. يمكن عشان كشفلي حاجات كتير و فسرلي تصرفات ياما ... مثلا اكتشفت اني مدين باعتذار قوي لوزير الداخليه و ضباطها و عساكرها نفر نفر على اتهامي لهم بالوقوف وراء احداث التحرش في الصحفيات في الثلاثاء الاسود .. قالوا ان العساكر همه اللي تحرشوا بيهم و خلعوا عنهم ملابسهم .. زي ما قالوا ان الامن سكت ايام تحرشات عيد الفطر
طلع السبب الحقيقي ان دي اوامر عليا .. الريس يا جماعه بيحب التغيير .. و طلع ان ده .. بيبسطوا .. يحب الناس تقلع و تلبس ..بمزاجه خالص .. و لو مش مصدق اقرأ الحوار اللي في الصور
طلع برضه ان المرشح الحقيقي لخلافه الريس ..بعد عمر طويل .. مش جمال مبارك ..لأ لأ .. طلعتوا فاهمين غلط ..طلع المرشح الحقيقي هو وزير الخارجيه ابو الغيط .. مش مصدقني .. مفاجأه صح ؟؟ .. بس الحاج صباحي قال كده . قال انه عايز الريس مبارك يمسك الحكم مدى الحياه لأنه بيسافر كتير .. فمين يا ترى هيسافر اكتر من وزير خارجيتنا المحترم
طلع برضه ..

-----------------------

الحاج سليمان
-
زجل .. زجله و دونه .. طنطاوي
-
عم سليمان
مصري أصيل .. زي التاريخ ما قال زمان
عايش حياته .. يوم ب يوم
ولا عمره طقــّم في الهدوم
مش قلتلك .. مصري اصيل
يعني بيرضى بالقليل
راضي و حاسس بالامان
عم سليمان
عنده البنات زي البنين
يجوع .. و همه شبعانين
عمره ما قال .. آن الاوان
اسرق و اعيش زي الحيتان
مش قلتلك .. مصري اصيل
عايش يا دوبك بالقليل
عم سليمان
م الساعه خمسه يفوق قوام
ماهو ده الآدان
يقوم يصلي ويدعى ربه
ويجري يطلع ع الميدان
ما هو اصل كشكه هناك تمام
بيبيع سجاير فرط
شوكلاته و لبان
عم سليمان واقف في يوم
ماسك في ايده سندوتش
قرديحي طبعا ..متحاولش
الفول غلي
حتى البيضايه تخاف تحطها تستوي
لحسن تبوش و تختفي
فجأه طلعله هيلمان
ضابط و عسكر دادابان
قالو .. يالا يا عمنا
اقفل و غور عن وشنا
موكب سيادته معدي حالا من هنا
قاله .. يا باشا .. انا سليمان
في الحته ديه من زمان
ولاعمري مره قفلت كشكي مهما كان
بإشاره واحده الكشك كان ملوش وجود
و عمنا أخدوه بعيد عند الحدود
حتى السجاير و اللبان
بقت بتجري بين السنان
نهشوها .. و اخلو المكان
عم سليمان
غاب غيبه عنا .. طولت
و ولاده بدري .. اتيتمت
و الناس عليه .. اتكلمت
قالوا الغلط .. عليه كبير
طول عمره ساكت
همه كله .. كان في بير
رغم انه كان فقير
جاي دلوقتي يفوق
بعد الآوان
جـّـي يعمل فيها راجل
بعد شيبته و شعره الابيض لما بان
عم سليمان
رجع في يوم مكسور حزين
قفاه طول
مش زي ما كان
عليه آثار .. ايد السجان
نده علينا .. و قال بردان
قام عم جرجس .. جابله عبايه
و الست زينب .. جابت الشاي
عم سليمان
كان كل همه يعيش لولاده
ولا عمره قال كلمه تعبان
كافي خيره شره
و ان حد ضره
بطباعه هوه يكون كسبان
و بدون خناقه
و زعيق و غاغه
عمرك ما كنت تشوفه جبان
و ده كان زمان
حرموه يعيش بني آدم تاني
استكتروا انه يكون انسان
-----------------
الحاج الخواجه
-
في احد محاضرات الجراحه اللذيذه حكلنا دكتور جراحه تجميل عن صديق فرنساوي جه يزور مصر .. و لما اخده و نزل بيه الحتت الشعبيه .. الراجل كان مستغرب جدا .. و قاله ملاحظتين يفطسوا من الضحك .. بيقولو .. هوه ليه الناس في مصر بتحط العيش بعد ما تجيبه من الفرن على الارض .. مع انهم حاطين الجزم .. في فاترينات ازاز
و قاله .. مش غريبه ان الرجاله عندكو يسيبوا الستات و يبوسو بعض كل لما واحد يقابل واحد صحابه في الشارع او كده
شفتوا احنا متخلفين ازاي هههههه
--------------------
الحاج مفيد شهاب
-
النهارده الوقفه .. و المفروض اني بذاكر .. لكن الساعه 3 العصر كده حسيت بزهق فظيع ف قلت اقلب في التلفزيون .. المفروض الناس دلوقتي يا إما مشغوله ب روبي و رولا و هيفا .. و رجب اللي حارق دم شباب البلد ... و يا إما مشغولين بمتابعه قناه الجزيره و اخبار اعدام صدام و الخلافات الصوماليه .. و يا إما بقه جايبين مالآخر و فاتحين على اي قناه جايبه بث حي من عرفات و قاعدين يتفرجوا على الحجيج زيي و يتحسروا و يقولو .. يارتنا كنا معاهم
انا قلت اطلع من كل ده و ادخل على قناه اقرأ .. يمكن الاقي فيها حد من الناس اللي بحبهم .. قوم ايه يا عم الحج .. الاقيلك الحاج مفيد شهاب .. قصدي معالي الوزير مفيد شهاب .. كان قاعد .. على نفسي .. في قناه إقرأ .. لابس ابيض في ابيض و وشه منور ماشاء الله .. و في حوار ساخن مع مذيع سعودي .. بصراحه الراجل السعودي سلخه .. تحس انه بيطلع فيه غل 70 مليون مواطن مصري .. و الاحلى بقه انه كان بيديله كل سؤال و سؤال من تحت لتحت .. و عمك مفيد مصر يتكلم باللغه العربيه زيه .. و عمال يقول كلام كبير عن الأمه الاسلاميه و العربيه .. و النعمه انا افتكرته بقه مرشد الاخوان المسلمين هههههه
اجزاء من كلام الدكتور مفيد شهاب في هذا الحوار .. و الله العظيم هوه قال كده
ـ من رآى منكم منكرا فليغيره .. فلا يجب ان نسكت على فساد هنا أو هناك حتى تنصلح الامه الاسلاميه جميعا
ـ كما تكونوا يولى عليكم .. فإذا قالوا ان هناك خطأ .. فالسبب ان هذا المحكوم لم يقوم حاكمه
-

--------------------------

كل عام و انتم بخير

Image Hosted by ImageShack.us

2006/12/21

بوابات .. فيها تخريفات

تحديث
تم إضافه كاريكاتيرات جديده
في آخر التدوينه
-
--
بوابات .. كل بوابه فيها تخريفه .. و اذا خرف طنطاوي .. اعرف انه لسه بيمتحن .. و اعرف انك ممكن تمشي مضايق .. بس اهم حاجه .. انك مش هتقدر .. تدعى عليه .. لانه غلبان و النعمه و مش ناقص
_____________________________
-
باب اجتماعيات
ليه سهل علينا ننقد الناس اللي الكل اتفق على نقدهم .. بينما بيكون صعب جدا تنقد حد اتفق الجميع على انه كويس و بن حلال .. مش فاهم .. طيب افهمك .. لو كنت واقف في محطه اتوبيس و الاتوبيس اتأخر .. و فكرت للحظة انك تشتم المسؤول عن الواقعه دي هتقول .. يخرب بيت الريس و سنينه .. مش هيتردد الراجل اللي شايل الجرنان جنبك انه يقفله و يبصلك و يقول ملعون دنيا و اخره اللهي يرميه في جهنم ميرجع منها تاني .. و لن تتردد الحاجه اللي واقفه وراك انها تقول .. منه لله كيلو البصل بقه بخمسه جنيه اللهي ما يوعى يطفحه .... شفت الموضوع سهل ازاي .. و شتيمه الريس مفيش اسهل منها .. انما لو قلتلك انقد حد تاني .. ممكن تفكر .. و احتمال .. تخااااف انك تتكلم او تنقده حتى لو كان غلطان من ساسه لراسه
خد عندك .. في السياسه .. مين يقدر يتكلم على عمرو موسى .. جورج اسحاق .. ابراهيم عيسى .. جريده الدستور .. هيكل .. منال و علاء .. مالك .. .. الفتيات الوطنيات .. كما وصفهن انا جعان .. و غيرهم و غيرهم .. كل دول ناس ليهم وزنهم في مجالهم .. و كل واحد فيهم ليه انجازات كتير محدش يجرأ يشكك فيها او يقلل منها .. لكنهم في النهايه بشر .. و بيغلطوا .. انما بيبقى صعب اوي انك تفكر تنتقدهم وسط الناس .. يعني كبيره اوي و آخرك يعني انك تقول في نفسك .. كخ عليهم .. و دمتم .. حتى لو عمرو موسى خضع للسلطه و فضل البقاء في منصب سياسي ( الجامعه العربيه الاستهلاكيه ) على حساب افكاره و مبادئه .. وحتى لو جورج اسحاق قلب كفايه الى ( الحركه المصريه الاسحاقيه من اجل التغيير ) .. و حتى لو هيكل .. مازال مصرا على الرقص على السلم .. شويه للنظام و شويه عليه .. و حتى لو مالك و كذا منال و علاء صاحبي المجمع التدويني الشهير اصروا على استخدام الفاظ خارجه في تدويناتهم بحجه انها الفاظ تنطق ف الشارع .. و كأننا بغباغانات مطلوب مننا ترديد كل لفظ السيء و الجيد منها .. وحتى لو اصرت مجموعه بنات على البيات اعتصاما في الطريق تحت مسمى الوطنيه .. بصراحه اول من لفت نظري لهذا الموضوع هو ( انا جعان ) في تدوينه تخص الموضوع ده .. يعني مش لاقي لحد هذه اللحظة مبرر يخلي بنت تبات في الشارع على الرصيف تحت اي مسمى .. خصوصا لو اعتبرت ان البنت دي اختي او امي او مراتي .. معتقدش ان الدين او الشرع او اي تقليد عرفي حتى يقول كده .. و انا حر في رأي قبل ما حد يشتم
بلاش سياسه .. خلينا نهيس شويه .. و نقول سينما و رياضه .. حد يجرؤ يتكلم على عادل امام .. او الاسطوره احمد زكي .. حد يمتلك من الجرأه انه يقول الاهلي غلط .. او حازم امام غلطان .. مع ان كلهم بشر و بيغلطوا .. لكن نخاف ننطق .. يعني عادل امام نجم الكوميديا و انا موافق على كده .. بيضحكني جدا و انا موافق .. لكنه مش اسطوره يتعملها اعلانات بملايين في كل ميدان .. ولا هوه شخصيه مثاليه لانه يجيد التقبيل في افلامه .. يبقى بلاش ننفخه زياده عن اللزوم و نقعد نغنيله و نسقفله في كل مناسبه بطريقه هاله سرحان المستفزه ..هاهاهاهاها ... و الاهلي مهواش فوق الجميع و لا الزمالك قلعه العظماء علشان لما يغلطوا او لعيب فيهم يقل ادبه نداري عليه و نقول معلش ده لعيب .. والامثله كتيره لكن لو حد حاول يتكلم عليهم تلاقي الكل اتقلب عليه
سيبك من ده كله .. و خش عالدين .. مين يقدر ينتقد عمرو خالد .. الشيخ خالد الجندي .. المفتي و مش هقول شيخ الازهر لانه واخد نصيبه بصراحه من النقد و زياده هههههه .. الناس دي كلها علماء و مشايخ على عيني و راسي .. لكن احساس كل واحد فينا انهم ربما يكونوا اكثر منه علما بيخليه يخاف يتكلم لو حس انهم بيغلطوا في حاجه .. و احيانان بتتضارب معلومه بيقولوها مع مبدء ديني معروف للجميع لكن برضه بنخاف نتكلم .. لاننا عارفين اننا ساعتها هنواجه العالم كله .. و مين يقدر على العالم كله يا بشر
-
-------------------------------
باب الطب صنعه

Free Image Hosting at www.ImageShack.us

اولا : متلازمه مباركيوزيز
التعريف : هي حاله مرضيه .. تصيب الجسم عامه .. تشمل اعراض نفسيه و جسديه قد تفضى الى الموت
الاسباب : ميكروب مباركيوزيز .. طفيلي يعيش على اسياده حتى يصل الى اماكنهم .. ينتقل بالطيران .. و يهبط في اقرب مكان مناسب للتطفل .. يعيش بجوار الضحيه و يمص دمها .. حتى يتمكن منها في النهايه .. و ينهي حياتها بطلقات في الراس و يجري يستخبى علشان يقعد مكانها في اقرب مناسبه بعد كده
دوره حياه الميكروب : حسب الكتب هي مده لا تزيد عن 4 سنوات و بحد اقصى مدتين .. لكن التطور في جينات الميكروب جعلته يعيش 24 سنه و ربما اكتر .. لكن العلماء يحاولون تدوين هذه الطفره على امل ان تنتهى قبل ان يموتوا همه
الاعراض : نفسيا .. حاله من الاحباط و اليأس الشديدين .. يصاحبها فقدان للشهيه و تقزز من الماء الملوث و الطعام المشع و الفراخ المتأنفلوزه .... أما جسديا .. تبدأ الاعراض بتسارع في ضربات القلب و احمرار العين .. و تستمر لتشمل احمرار و ترهل عضلات القفا و سجحات على الصدر و الاكتاف .. و نهايه قد تصل الى تقرحات في الاعضاء التناسليه و فتحه الشرج .. و اسألوا عماد
العلاج : لا يصرف العلاج من التأمين الصحي و لا وزاره الصحه .. لذا قامت منظمات المجتمع المدني مثل كفايه و المدونات بمحاولات مستمره لتوفير علاج مناسب من خلال ابحاث علميه قامت بها هذه المؤسسات .. و هي محاوله استخدام سلاح الاخبار و نقل الاحداث مباشره لعمل صدمه كهربيه تفيق جسد الضحايا و تنبه جهازهم المناعي لرفض هذا الميكروب .. لكن جميع هذه المحاولات لا تزال تحت التجربه و ربنا يسهل
-
ثانيا : القسطره
القسطره هيه انبوبه بلاستك ملهاش اي لازمه غير انها تعالج حاله احتباس البول .. ربنا ما يوريكو وجعوا .. المهم ان القسطره دي بيعملها اي دكتور نص لبه .. حتى الحكيمات يعرفوا يعملوها .. لكن الجميل في الموضوع اني سألت صديق بيشتغل نايب مسالك عن سعر عمليه القسطره دي .. على فكره .. لغير الاطباء يعني .. القسطره هيه انبوبه بتدخل باستخدام جيل معين في فتحه البول علشان لو في حاجه سداها و البول مش بينزل .. و القصه دي كلها بتتعمل من غير تخدير و في خمس دقايق و اول لما البول ينزل العيان بيقوم يروح .. يعني مش قضيه .. المهم اني سألته عن سعر القسطره .. ف قالي ان القسطره في عياده دكتور عادي ممكن تبدأ من 50 جنيه .. و انها في عيادات الدكاتره الحيتان بتكون احيانا ب200 جنيه و مش الدكتور الكبير اللي بيعملها انما مساعده الصغير .. يعني ادخل عياده عندي احتباس بول و الم رهيب ييجي الدكتور يجيب انبوبه يدخلها و ينزل البول في 5 دقايق و ياخد مني 200 جنيه .. يا بلاش بصراحه انا كنت مستغرب لاقصى درجه و انا بسمع الاسعار دي و المفروض ان ده كاري ههههه .. و بصراحه مش عارف الناس العاديه بقه هتقول ايه .. حسبي الله و نعم الوكيل
-
-----------------------------------
Image Hosted by ImageShack.us
باب البهائيه
و لو انها متستاهلش ان يبقى ليها باب .. و مع حسرتي على كل ما أقرأ من مؤازره لحقوق البهائيين .. واضح و الله اعلم ان بقه في حاله من الصمم عن اي شيء مادام صادر عن الحكومه .. يعني بقت الحكومه شيطان زنديق .. كل فعله و قوله خطأ .. و لأني آخر واحد ممكن يكون في صف الحكومه او مدافع عنها .. لكن الحق يقال .. من امتى بقه يجي واحد يقول انا عايز اكتب بهائي في البطاقه .. و تنظم مظاهرات من مسلمين .. والله مسلمين .. وقفوا تضامنا مع البهائيين .. بالذمه مش حاجه تحرق الدم .. البهائي بحكم الدين .. مرتد .. عارفين يعني ايه مرتد ولا محتاجين حد يعلمهالكو .. يعني الدين و النبي عليه افضل السلام علمنا التعايش مع اهل الديانات السماويه .. عايشين مع الاقباط و حتى اليهود .. و ليس الصهاينه .. في سلام .. لكن انها توصل للبهائيين .. تبقى مسخره و كبرت .. و يبقى على رأي شربيني محرر المصري اليوم .. هييجي يوم الشواذ يقولو عايزين نكتب في خانه الجنس .. سيكوسيكو
ملاحظة : اللى عايز يقرأ فتوى ردة البهائيين من الشيوخ مش من بيتنا يعني .. يقراها هنا
--------------------------------

Image Hosted by ImageShack.us

باب الحب و النحنحه
الحب .. هو امل .. امل ان تقابل فتاه احلامك .. امل ان تراها مره اخرى بمجرد ان تراها للمره الاولى .. امل ان تظل في حياتك .. امل ان توافق على وجودك في حياتها .. امل ان تتقبل ظروفك .. امل ان تقدر حبك لها .. امل ان تقدر خوفك عليها .. امل ان تتفهم غيرتك عليها .. امل ان تسمع صوتها كل لحظة .. لا تكاد تغلق الهاتف الا و تأمل ان تكون هي مكالمتك التاليه .. امل ان تبني حياتك معها .. و لها .. امل ان تكون هي ام اطفالك الذين تمنيتهم .. امل ان لا تكون كل تلك اوهامك الشخصيه .. امل الا تاتي في لحظة وتهدم حياتك .. بكلمه .. لا
-
مهما ببعد قلبي انا وياك
حبيبي عليك .. يطمني
م اللي فيه عنيه بقت شيفاك
و حاسس بيك .. بتلمسني
و هعمل ايه بتوحشني
حبيبي خلاص .. حياتي معاك
وهانت بكره انا راجع
و اه دلوقتي لو سامع
بحبك نفسي اقولهاك و انا ايدي ف ايديك
حبيبي بقولك اطمن
كلامك ليه بيهون
سنين عدت هعيدهالك و انا قدام عنيك
ياللي عشت في حضنك احلى سنين
نسيت انا مين .. ولا بنساك
كل كلمه حب ما بين اتنين
هتوصف ايه .. في لحظة معاك
-
رامي صبري - بحبك
-----------------------------
-

باب مخصوص لابوتريكه و بس
ابوتريكه لعيب .. مفيش عليها خلاف .. أهلاوي .. للأسف .. محترم .. جدا جدا .. لكن و الاهم من ده كله كان لقاء مع منى الشاذلي في برنامج العاشره مساءا .. لقاء قصير لكن ممتع و فيه رساله جميله اوي اوي للي لاحظها
مني الشاذلي في نهايه اللقاء سألت النجم الخلوق و الخجول .. قالتله لما كنت لسه صغير و قبل النجوميه كان نفسك تقابل مين .. ف رد النجم و قال : صالح سليم .. لانه شخصيه متميزه و ليها كاريزما جميله .. ف اردفت منى الشاذلي .. و قالت .. طيب انتو كنجوم بتقابلوا نجوم و مشاهير و رؤساء .. كان مين اكتر شخصيه نفسك تقابلها و مبسوط انك قابلتها .. وطبعا على عكس المصري الاصيل اللي الجهاز العصبي الامركزي عنده كان هيسيب كل السؤال و يمسك في كلمه ( رؤساء ) و يروح قايل اني شرفت بمقابله الاب و القائد و الوالد و الوالده السيد الرئيس محمد حسني مبارك اطال الله عمره .. لا لا .. ابوتريكه مقالش كده .. ده قال .. و بالحرف .. اني كنت سعيد جدا بمقابله الاستاذ عمرو خالد .. و كرر اسمه مرتين .. بالعند فيكوا يا مطأطئ الرأس .. و لما منى الشاذلي حبت تستدرك و عادت السؤال بصيغه اخرى .. على امل انه يقول اسم الريس ولا حاجه .. راح النجم قايل و بكل صدق انه كان يتمنى يقابل الشيخ الشعراوي الله يرحمه .. بالذمه يا ناس .. مش يستاهل يكون .. النجم
-
ملاحظة رياضيه : بوصفي زملكاوي صميم .. فانا مقهور على حال نادي الزمالك .. و في غنى حاليا عن مناقشه حال الزمالك لان اعصابي مش ناقصه .. لكن عندي سؤال صغير .. اذا كان لاعبي الزمالك بيشتكوا من الامور الماليه و عدم حصولهم على مستحقاتهم .. ف ياترى لعيبه الزمالك تعرف ان فريق الكره الطائره .. اللي مخدش ولا مليم من فلوسه .. و بيروحوا البطولات باتوبيس متأجر على حسابهم .. اللعيبه دي .. كسبت النجم الساحلي و بقت بطله أفريقيا للكره الطائره و هتمثل مصر في كأس العالم لأنديه الكره الطائره .. و بدون فلوووووس .. وبدون اضواء اعلاميه .. وبدون مطاردات الصحافه و التلفزيون و المعجبين .. وبدون مدرب اجنبي .. طب اشمعنى يا رجاله فريق الكوره الاعزاء .. اللهم لا اعتراض
-----------------------------------------
-
Image Hosted by ImageShack.us
-
إيه رأيكوا في اللوجو الجديد هههههه
-
______________________________

-
تحديث : كاريكاتيرات من واحد محروق دمه على اللي بيحصل

______________________________
-



Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

الصوره الأخيره بدون تعليق .. كفايه ما قلته سابقا عن .. البهائيييين

2006/12/07

صبح صبح يا عم الحج

تحديث .. تم إضافه شويه كاريكاتورات
-
القوات المسلحه .. للأمااااام معتدل مارش
أعوذ بالله أن اكون بزدري القوات المسلحه او بقلل من هيبتها ( ربنا يفك ضيقتك يا طلعت ) ولا اجرئ انا المواطن المصري المفعوص ان انتقد اي اجراء تتخده قوات بلادي المتسلحه .. على واحده ونص .. لان همه دول الرجاله اللي بيحمونا و يرفعوا راسنا وسط الاعادي .. لكن ليه عليهم عتاب بسيط يقترب من عتاب الاحبه مش اكتر واللللله .. يعني بالصدفه كده كنت بقلب في جرنان خيبان اسمه الاهرام و لقيت في ملحق السيارات ان طائرات هليكوبتر عسكريه .. آه والله عسكريه .. حضرت في عرض افتتاح سيارات نيسان الجديده .. و ان الطيارات دخلت قاعه الاحتفال و نزلت منها السيارات في حركه اوريجينال عجبت كل الحضور .. وانا مفيش بيني و بين نيسان اي عداوه و الله ولا اعرفهم اصلا .. و لا عندي توكيل شاهين ولا نيله .. لكن نفسي افهم حاجه .. ليه الطيارات دي مبتكونش موجوده لما بتحصل حادثه و بتكون الوضعيه خطيره .. ليه ماكنتش موجوده ايام حادثه العباره و القطر .. ليه مش موجوده لما عشره ولا عشرين بيموتوا في حوادث الطريق السريع .. و لما تسأل ليه مصر مفيهاش هليكوبتر طوارئ زي الافلام الامريكاني يقولك نقص امكانيات .. ماهي الطيارات موجوده اهه .. و بتطلع رحلات ملاكي لحساب الشركات المخصوص اللي بتدفع فلوس .. يعني اقدر اقول .. ان القوات المسلحه على وشك التخصيص ولا إيه
-

-
-----------------------------------------
-
حسني يا حسني
كالعاده .. انتهت قضيه فاروق حسني ب يبقى الحال على ما هو عليه .. و كلنا خطائين .. و خير الخطائين الوزراء .. و مفيش مشكله و احنا مغلطناش في البخاري و سلسله التبريرات السخيفه اياها دي .. لكن بصراحه مقدرتش امسك نفسي من الضحك لما شفت الصوره دي منشوره في المصري اليوم .. السيد الاستاذ احمد عمر هاشم رئيس اللجنه الدينيه في مجلس الشعب كان موجود في مؤتمر الصلح بتاع السيد فاروقه و بيقولو انه منطقش ولا كلمه من ساعه ما دخل .. و الصوره بصراحه جايبه من الآخر
انا ليه ملاحظه بسيطه جدا .. يا ترى هوه شعوره ايه دلوقتي .. لما الدين بقه تحت مظله الحزب الوطني .. موقف غبي جدا ولا يحسد عليه .. راجل علامه اسلامي بارز و مشهود له بالكفاءه في كل مكان .. يلاقي نفسه فجأه مضطر يقعد جنب واحد مش عاجبه بسلامته الحجاب .. ومش بس كده .. ده مش قادر ينطق كمان بأوامر عليا .. حسبي الله و نعم الوكيل فيكي يا بلد

-
-----------------------------------------
-
من تلاجه طنطاوي و طرشيه
بمناسبه فقر الافكار الشديد اللي اعاني منه اليومين دول .. و بمناسبه موضه التجديد اللي نازلين فيها من اول مروه و اغنيه اما نعيمه .. والمسلسلات والافلام اللي طلعوها من برطمانات الطرشي علشان يدوها وش عسل و يرجعوا يعرضوها تاني .. قلت انا كمان مليش نفس ولا إيه .. ف فكرت اعرض شويه الاغاني اللي الواحد كان بيكتبها زماااان ايام موقع طنطاوي الله يرحمه يمكن يكون في حد لسه مشفهاش ولا حاجه .. اهه ينوبني فيه ثواب ههههه
-
-
-
------------------------------------------
-
حبه فرفشه
-

Image Hosted by ImageShack.us
بكره هيطلع و يقول كده .. ده مهما كان سواق غلبان .. هيعمل ايه قدامهم


Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us



2006/12/03

اني اتنفس تحت الماء

إني أتنفس تحت الماء
إني أغرق أغرق أغرق
دي مش امتحانات .. دي جريمه تعذيب في حق كل طلبه طب .. يجب محاكمه اساتذه هذه الكليه في معتقلات لا تقل قسوه عن سجون ابوغريب و جوانتانامو .. و هذا نداء مني بذلك
_____________________
-
اللهي ما يوقعكوا في ضيقه
و يبعد عنكوا التحرشات و الالفاظ البذيئه
ويبعد عنكم الايد الجريئه
و يكتر حوليكم الناس البريئه
وحياة الغالي يا شيخ
ادعووولي
____________________
-
ملاحظه : لاحظت اليوم في بحث على النت ان قصيده ( للكوسه في بلادي شؤون ) اللي سبق و نشرتها على مدونه نهى و اخواتها من عدة اشهر .. لقيتها موجوده على النت بمسميات كتيره و باسماء اشخاص متعددين منهم احمد فؤاد نجم شخصيا .. و للأمانه التامه القصيده دي انا نشرتها يومها عن زميل ليه و كنت مستأذنه اني هنشرها .. لكن واضح ان ناس كتير معندهاش ضمير كتبت اساميها على القصيده و نشرتها باسماءها .. لذا وجب التنويه ان القصيده دي كاتبها هو صديق عزيز و شاعر رائع اسمه سالم و ليس اي اسم آخر من الاسماء المنشوره .. و قريبا جدا هيكون له مدونه جميله تتمتعوا فيها باشعاره و افكاره

2006/11/21

ادلي بدلوي

بسم الله الرحمن الرحيم .. الاجابه ( أ ) .. هكذا هو المواطن المصري .. يقف في وسط الفطاحل .. في خضم المواضيع الساخنه .. ليجيب بكل ثقه و يدلي بدلوه .. حتى لو لم يكن على علاقه بهذا الموضوع .. و ربما لا يعلم ما هو موضوع النقاش .. لكنه دائما يمتلك اجابه السؤال .. لأنه فطر على ان يدلي بدلوه دائما .. و لذا .. فهذه التدوينه .. هي محاوله مني للأدلاء بدلوي .. في وقت تشتد فيه حده المذاكره .. الجراحه فعلا ليست هينه بقدر ما تخيلت .. وفي خضم انشغالي .. وعدم متابعتي للأخبار .. و يقيني من ان الجميع الان يعتقدون انني في بيات شتوي .. و انني ربما توقفت عن التدوين مؤقتا او نهائيا كما يتمنى البعض .. لكني برغم ذلك .. اكتب و ادون .. عبارات قد تكون متضاربه .. و رسومات في مجملها هبله .. تذكرني بسراويل .. اقصد سرياليات الفنان فاروق حسني .. لكنني اردت ان اكتب .. و اردت ان ارسم .. فكتبت .. و رسمت .. و ادليت بدلوي .. حاسبو الميه تيجي عليكوووووو
________________________
-
يا فنان
تحشيشه كده على الماشي .. محدش يدقق على الوزن و القافيه و القصص الحمضانه دي هههه
سبت الرسوم و الفن .. و الشخبطه في كتاب
وكبرت .. بقى ليك حس .. بتقول بلاها حجاب
الغلطه مش غلطتك .. ولا غلطه الكـتــّـاب
اللي وراك هللوا .. م الدين خلاص اتساب
واتلموا عالم حوش .. بيقولو لا يا حجاب
يا بلدي قولي كفايه .. دول ناس وراهم حكايه
عايزنا نبقى ولايا .. قرنيـّـه .. نلبس ملايه
وندور نسرّح بناتنا .. والآخره كبسه آداب
-
ليه برسم ؟؟ لقيت اجابه
حاولت افكر كتير انا ليه بحب ارسم .. و بستسهل رسم الكاريكاتور .. و لقيت الحل أخيرا .. لأنه محدش في بلدنا دي بيسمع .. السياسه عندنا .. كلام بدون نهايه .. و بدون غايه .. الكلام لمجرد الكلام .. من اكبر راس سياسي ف البلد لأصغر شاب متسيس .. كله بيتكلم و محدش عايز يسمع .. و الحل إيه .. إني افرض وجهة نظري عليهم بالعافيه و في نفس الوقت احافظ على صحتي .. لأني بكره النقاش العقيم و الكلام الكتير اللي بدون فايده .. يبقى بدل ما اقعد اتناقش مع واحد ساعه ولا ساعتين و فالآخر كل واحده فينا يمشي على رأيه هوه .. أديني بحط رأي في رسمه و بقه كل الاطراف مجبره تشوف الرسمه دي .. و تبقى فكرتي وصلت برضه .. سواء اقتنعوا بيها .. أو لأ
-
--------------------------------------

كاريكاتورااااااااات اي كلام في السريع كده

اضغط الصوره للتكبير إذا لزم الامر













كالعاده .. اعتذرعن رداءه المواد المعروضه .. كتابه و رسما .. بس لو كنتوا بتذاكروا دلوقتي في المعده و البنكرياس و طرق وقف النزيف البريتوني .. كنتو عذرتوني في الجو المنتن اللي الواحد عايش فيه ده

Romantic Attack !!

دي تدوينات بتطلع كده لوحدها بدون سبب .. الاعراض بتكون ارتفاع في ضغط الدم في المناخير و تورم في جفون العين مع اختلال مفاجئ في القنوات الدمعيه يمين و شمال
لو حابب تقرا التدوينه دي .. هيه مفيهاش جديد .. مجرد مقاطع من اغاني مختلفه لناس مختلفه في ظروف مختلفه و احاسيس مختلفه هتخلقلك حاله مختلفه عن الحاله اللي انته فيها دلوقتي .. يعني تجربه جديده .. ليه لأ .. هههههه
-
بعد أما ارتاحت روحي ليك .. وعرفت طعم الدنيا بيك
مشيت خلاص و مقلتليش .. انا هعمل ايه
أنا قلبي كنت بخاف عليه .. شفتك معرفش جرالي ايه
حبيت وخلاص محسبتهاش و لا قلت ليه
-
انا ليه .. بفكر فيها كده ليه ؟؟ و تاعب نفسي على ايه .. ده حب و راح
يا قلبي إزاي .. يبعنا و لسه شاريينه .. ناسينا و برضه فاكرينه .. مكنش غرام
-
كل نظره من عيوني .. فيها كلمه قلتهالك .. لو مختيش انتي بالك
يعني مش حاسه اللي بيه .. ولا بداري عليه .. ولا مش لاقيه جواب .. للسؤال اللي في عنيه
يعني ايه ورده شايلها جاي قلبي بيهديهالك .. يعني ايه رعشه ايديه .. عمر ما يخطر ف بالك
-
بين ايديك انا بنسى روحي .. صعب اعيش في الدنيا ديه .. إلا بيك
كل يوم بيفوت عليه .. حبي ليك بيزيد شويه
محتجالك جنب مني .. اوعى ليله تغبها عني
معاك رجعتلي تاني .. حياتي و دنيتي
معاك بعيش حبيبي .. في الدنيا جنتي
وياك شفت بعيوني .. طريقي و سكتي
-
بحبك يا حبيبي اكمني بهواك و بحس انك مني
سامعني دانا بصوتي بغني .. دانا بحكي لكل الدنيا عليك
بحب الحب اللي جمعنا .. بحب الشوق اللي وجعنا
وعمري بجد ملوش معنى .. ولا تحلى الدنيا في يوم غير بيك
-
فات ييجي اكترمن سنه و منستش ليه .. وبقول يا ريت ايامنا تاني يرجعوا
واما بقابل حد يتكلم عليه .. بضحك عشان .. بخاف عنيه يدمعوا
يا قلبي هيه هيه .. لو بعيد او بين ايديه .. نقطه الضعف اللي فيه
اني لسه .. بحن ليه
-
حبيته بيني و بين نفسى .. و مقلتلوش عللى في نفسي .. معرفش ايه بيحصلي لما بشوف عنيه
مبقتش عارفه اقوله ايه .. معرفش ليه خبيت عليه
بضعف اوي و انا جنبه .. و بسلم عليه
-
صوتك .. وجهك .. عطرك .. شعرك .... لمسه ايدك عم تندهلي
شايف فيكي ام ولادي .. شامم ريحه ارضي و اهلي
عارف خلف البحر الازرق .. لما الشمس تموت بتخلق
عارف انك عمري الجايي .. لما الماضي ببحرك يغرق
-
عنيه بتحبك .. و قلبي بيحبك .. حضني بيضمك .. ده يبقى ايه
معايا وواحشني .. بعيد بتوحشني .. حبيبي طب قولي .. ده يبقى ايه
يعني ايه لما كلامي .. كله يبقى في سيرتك
يعني ايه .. لما ابقى عايش مش شايف غير صورتك
لأ و صوتي .. يا حبيبي .. مينطقش الا اسمك
-
حبيتك .. و بحبك انا علطول .. لو مهما حبيبي تقول .. لو مهما الزعل يطول
حاول تفهمني بحياتك .. مره .. فهمني وحياتك
وارفض ترسمني بخيالك .. و باوهامك .. وتقلي كوني
حاول تقبلني على حالي .. يمكن .. تتعرف ع جمالي
شو مخبي بقلبي و افكاري .. ما بيكفيني .. تحب عيوني
-
وحيات قلبي اللي عمري .. ما حلفت لحد بيه
انا عندي النظره منك .. بالعالم و اللي فيه
محتاجلك صدقيني .. و بحبك صدقيني .. و بتبقى لسه جنبي .. يا حبيبتي و بتوحشيني
معرفش اما تسيبيني .. انا ممكن اعمل ايه

2006/11/18

لو بطلت ادون .. اطق .. و اموت

السيد وزير الثقافه الغير محترم
تحيه مطينه بطين .. أما بعد
-
أما و قد قرأت رأي سيادتكم في مسأله الحجاب .. قال يعني هيه مستنيه رأيك .. فاسمحولي أن ارد على ما ورد فيها .. سيدي .. إذا كانت وزارتكم و فنكم قد أعطياكم شعورا زائفا بالسمو و الرقي .. فاسمح لي أن انتقد كلامك يا وزير بتنجان .. أقصد فنان
أولا .. الحجاب لم و لن يكن ابدا عوده للوراء .. بصراحه .. بعد رأي مدام سعاد صالح .. ومش هقول دكتوره او حاجه .. لانها و مع كل اسف استاذه فقه استحلت لنفسها ان تطلق على النقاب عباره الاشمئزاز .. فمش هكون ابدا مستغرب من كلام حضرتك .. يا فنان .. وكان المفروض نركن كلامك على اقرب رف و ننساه .. لكن من سن سنه سيئه فله وزرها و وزر من عمل بها .. و ده اللي انت هببته .. و من سن سنه حسنه فله اجرها و اجر من عمل بها .. و ده اللي بنحاول احنا نعمله دلوقتي .. سيادتك .. اخدت البنات المحجبات اللي واقفين على الكباري ومع الشباب حجه لنقد فرض من فروض الله .. اذا اسمحلي بقه اني اكلمك بنفس لغتك لاني لو كلمتك بالمنطق اشك ان تفهمه .. ف إذا كان رسمك .. الاهبل .. اللي محدش فهمه ولا هيفهمه اطلقت عليه رسم سريالي .. و اضطر الناس يقولو عليه يايي و فظيع لأنك للأسف .. وزير .. ف ده مش معناه ان الفن السريالي عامه هو فن اهبل .. العيب في الفنان و ليس في الفن ذاته .. و قياسا ف العيب في البنات دي مش في الحجاب نفسه .. يا تعبان .. المشكله الاكبر .. ان البنت اللي لابسه حجاب و بتغلط دي و مش عاجباك .. ممكن في يوم من الايام تتوب الى الله توبه بقدر توبه البشر جميعا .. انما المصيبه في اللي غافل و مش مقتنع بالجرم اللي ارتكبه .. و اللبيب بالاشاره يفهم يا روقه
ثانيا .. نقطه الزمان .. و ان الست زمان كانت بشعرها .. فللأسف سيادتك عايز تخلي .. مامتك .. تشريع نسير عليه و مثل نحتذي به .. ناسي ان ستات زمان كان في منهم العظيم .. زي سميره موسى عامله الفيزياء .. اللي مش محجبه .. زي ما في منهم راقصات و عاهرات .. لأن الحكم يا استاذ عمره ما كان حجاب و مش حجاب .. الله اعلم بخائنه الاعين و ما تخفي الصدور .. فلنفرض ان الست والدتك كانت محترمه بدون حجاب .. ده مش معناه ان كل الستات كانت محترمه .. بدون الحجاب برضه .. و بلاش نفتح سيره زمان .. علشان متجيش في بالنا سيره الرجاله اللي مطوله شعرها و لابسه سلسله و بنطلون شارلستون ضيق .. و لا دول كمان تخلفوا و لبسوا البنطلونات القماش دلوقتي ؟؟ الله اعلم يا شيخنا
ثالثا .. كل الناس بما فيهم شيوخ في الازهر انتقدوا بعض الاصوات المؤديه للاذان .. لكن محدش فيهم جرء يقول عليهم .. انكر الاصوات .. يا باشا .. لأن اي واحد فيهم مقامه عند الله اكبر منك مليون مره .. كفايه انه بيجمع الناس على الخير .. حتى برداءه صوته
رابعا .. للأسف اجتمع معاك ناس .. كنت احترمها مع الاسف .. لكن اظهروا وجوه الطبل و الزمر بمجرد ما قلت رأيك .. و حبيت اعرف الناس مين همه الساده اللي هللولك و سقفولك علشان يبقوا معروفين .. وبدون لقت استاذ .. يوسف القعيد .. اسامه انور عكاشه .. فتحيه العسال .. فريده الشوباشي .. و شووووووبش
-
يا وزاره مصر .. اللي ملهاش حكم على وزارائها .. يا شعب .. ا ذا كنتم انتفضتم و قلتلم .. اقيلو حبيب العادلي .. لأنه اهان عشرات او مئات المعتقلين .. ولو فرضنا ان العادلي اهان الشعب المصري كله .. يعني 70 مليون مواطن .. فالسيد الفنان الاهبل فاروق حسني اهان مليار و نص مسلم و اهان رساله سماويه .. و نصوص قرآنيه و احاديث نبويه .. يعني اعتقد ان اقل رد عليه هو المطالبه بإقالته من منصبه .. للأبد و كفايه علينا عشرين سنه كابس على نفسنا و نفس الفن في مصر
--------------------------------
-------------------------------
عندي ثقه فيك
-
بعيدا عن اجواء النرفزه اللي سببهالي الفنان الاهبل .. دخلت على مدونه ابيتاف و قرأت تدوينه جميله عن اغنيه فيروز عندي ثقه فيك .. و للحق الاغنيه دي قلبت جوايه كلام كتير اوي كنت عايز اتكلم فيه معاكم
الثقه .. كلمه صغيره اوي .. منسيه الى حد ما .. ثقيله النطق للغايه .. حرف الثاء ربما يكون السبب .. القاف و الهاء .. لكنها تظل كلمه كبيره في معناها .. المسؤوليه هي اصل معناها .. المشكله الحقيقيه ان الكلمه دي .. ممكن فجأه ترفعك للسما .. و ممكن تنزل بيك للأرض .. فكرت فيها قبل كده .. تحاول معايا
ناس كتير كانت الثقه هي الباب اللي وراه النار .. فتحوه .. و رموا نفسهم فيه بإرادتهم .. بس لأنهم كانوا واثقين في شخص ما .. او حلم .. البنت اللي بتتجوز عرفي علشان بتحب و بتثق .. و الولد اللي بيبيع اهله و حياته علشان واحده في النهايه هيه متستاهلش .. و الست اللي بتدمر بيت جوزها و حياة اولادها بخيانه .. و الراجل اللي بيستغنى عن اسرته و احلامه علشان نزوه .. كل دي ناس كانت في اديها ثقه .. لكن ببساطه استغنوا عنها و رموها
لكن الثقه في مجملها حلم .. جميل .. رقيق اوي .. حسه .. هتقدره .. كفايه ان الحب .. ثقه .. الحب نفسه ممكن يروح .. ممكن يضعف .. الجمال بيروح .. بنكبر و الزمن مش بيسبنا بدون كرمشه او انحناءه .. لكن الثقه .. لو كانت موجوده .. و حافظنا عليها .. بتفضل .. عمرها ما بتضعف و لا بتموت .. عمرها ما بتشيخ و لا تنحني للزمن .. ثقتك في نفسك .. بتبنيك و تعليك .. بتخليك عارف هدفك و مصمم عليه .. للاسف احيانا بتعدي اوي .. بتسرح .. تتغر .. تنكسر .. لكن بترجع تاني مكان ما كنت واقف .. و تبدأ من جديد .. لأنك في الاصل واثق من نفسك
ثقتك في الله .. تخليك عبد ليه .. تخليك عايز تطيعه .. و خايف تغضبه .. تخليك تنجح بدون ما تحس .. تتعب .. وتلاقي .. دايما بتدعي .. دايما قلقان من ربنا .. لكن في اخر اليوم نايم مرتاح .. عنيك مقفوله بجد و بالك رايق .. لانك واثق فيه و مرتاحله
ثقتك في حبيبك .. طعمها غير .. الحب حلو .. و المشاعر الرقيقه زي الورد .. لكن الثقه حلاوتها غير .. و طعمها حاجه تانيه .. هتلاقي نفسك بتحبها و دايما معاها .. جنبها .. ثقتك فيها بتخليها هيه دليلك .. بدون خوف .. لدرجه التوحد .. تبقوا كيان واحد .. هدفكم كبير .. بعيد .. لكن هتوصلوله .. لأنكم مع بعض .. جنب بعض
عندي ثقه فيك .. شو بدك يا عمري اكتر .. فعلا .. لو لقيت البنت اللي بثق فيك .. لو لقيتي الولد اللي تثقي فيه و يثق فيكي .. معتقدش هتعوز اكتر من كده .. اكيد

-------------------------------
-------------------------------

لحظات .. أنت تسميها
-

ـ ساجد انت .. تبكي .. لا تقوى على الاعتدال من سجودك .. تحس بضعف شديد .. و خشوع .. لكنه احيانا خوف .. خوف من العقاب .. خوف من المواجهه .. خوف من الاعمال المتراكمه .. خوف .. من الدنيا .. فماذا تكون تلك اللحظه لك

ـ تقضم اظافرك .. يزيد الايقاع الان .. تبدأ في تحريك رجلك بقوه .. تشعر فجأه بضيق في صدرك .. قد تبكي .. قد تتيبس الدموع في عينك .. كل ما تعرفه ان الصوره امامك مخالفه للواقع .. انك في مكان مختلف .. بقلبك فقط .. وحيد و ضعيف

ـ بدأت في إزاله البخار المتكاثف على المرآه .. تنظر لنفسك .. مازلت تنظر لها .. تتأمل .. تفكر .. وفي النهايه تعود لتبكي من جديد .. فما الوجه وجهك ولا الروح روحك .. هناك من يغيرك .. للأسوء .. يقودك .. إلى حيث يريد و لكن .. لا تعرف من .. و لماذا

ـ لحظة قلت لها أحبك .. قلت لها كم هي رقيقه .. قلت لها كم ان عيونها تلك لا تفارق مخيلتك .. ان صوتها لا يكاد ينقطع عن اذنك .. وان رائحه العطر الذي تضعه صار محور اهتمامك طوول اليوم .. لكنها سكتت .. لم تجب .. وربما قالت انكما اصدقاء .. اخوه .. او ربما قالت انك لست حلمها .. ولم تكن ابدا فارسها

ـ تشبعتي من نظراته .. كلماته .. تلك الافكار التي لا تصدر الا عنه .. لكم لفت انتباهك و انتباه كل من في الجلسه .. لكنك دونهم تحبينه .. بل تعشقينه .. تشعرين بشوق شديد .. يكاد يخرجك عن شعورك .. عن صمتك ذاك .. قد تقولينها الان .. احبك .. الا تفهم .. احبك .. لكنك اليوم تحديدا .. و بعد طول انتظار .. لم تستطيعي نطقها .. ربما تحشرجت الكلمات في صدرك .. لكن السبب الاقوى يبدو متجسدا امامك .. فهو الان مع فتاه اخرى .. تشابكت ايديهما .. و انطلقا يتحدثان .. بروح العشاق

-------------------------------
-------------------------------

كان عندي افكار كاريكاتورات كتيره لكن للأسف مش لاقي وقت اعملهم .. و هحاول انزلهم في اقرب وقت انشاء الله



2006/11/16

ميكس بوست

شريف
هو مذيع .. بس بصراحه انا بعتبره كائن من فصيله الرخويات الفريده من نوعها .. غير محدده النوع .. بتتكلم في الطبيخ .. و عليها .. قصدي عليه حته ( ألو .. إزيك .. تجنني ) بجد تجنن .. و الالذ من كده ان كل المكالمات اللي بتجيله من ستات .. بصراحه انا من ساعة ما شفت الشيء ده من حوالي سنتين كده و انا عندي ذهول و كنت متصور انه خلاص انقرض طول الفتره دي لكن فوجئت امبارح انه لسه موجود على قناه النيل للاسره و الطفل .. نداء للمسؤولين .. خلصونا من هذا الـشريف اثابكم الله






الاوركيد
اغمض عينيه .. ورأها امامه .. تماما كما رآها اول مره .. تماما كما تدفق الدم الى قلبه في غزاره استعداد لهذه المعركه العاطفيه الشديده .. فهذا الوجه الملائكي و تلك الربطه الناعمه لغطاء راسها جعلتها امراه رقيقه من تلك اللاتي يراهن في مسلمات اوروبا .. لها نفس الرحيق و نفس الملامح .. كان دائما ما يراها زوجته و حبيبته و ام ابناءه .. هي أم لاقصى درجات الامومه الحانيه .. فطرتها تشع من عينيها .. خلقت لتحب و ليحبها .. يفتح الان عينيه .. على امل ان يراها .. بل حتى على امل ان يكون يوم جديد يجعله قادرا على رؤيه هذا الحلم .. ان كان حلما .. مره اخرى ... لكن الحقيقه كانت اصعب .. فالنور لم يصل عينيه .. وتلك الخلفيه السوداء القاتمه مازالت هناك .. لا لم يمت بعد .. فهو لا زال يسمع .. لا زال يشعر بوقع الاقدام من حوله .. لكنه تذكر الان .. الان فقط .. انه فقد عينيه للابد .. و انه فقد معها هذا الوجه الملائكي .. الذي فارقه يوم ان فارق النور عيونه



خاطره
ماذا اقول لهم عن العذريه .. لا يعلمون حقيقه .. الا القليل
فلتأذني .. أن اكشف الاحجيه
واقول عنكي .. قصه مرويه
لست فتاه صعبه التأويل
عذرا لكم .. ما الجسد أصل الغيه
ما اللمس وحده يقطع .. ظلمه العذريه
بل صوت همس .. او حديث عابر
او طرف عين .. ملهوفه وشقيه
ف اميرتي .. كالورده البريه
قد اشعلت من حولها البشريه
لكن يدا لم تقارب متنها .. حتى العيون تخالها مخفيه
تاج الحياء و حمره .. في وجنها
في غمره الاطماع .. خير هويه
لم تلبس الاغلال .. لا .. لم تختفي
ف لها و عمري .. مطلق الحريه
لكن نفسا في صفاء حبيبتي
لا اخشى يوما ان تكون رديه




مصر في الجلابيه المقلمه
مش عارف ليه فجأه افتكرت احمد حلمي في فيلم زكي شان .. لما كان بينزل كل يوم بليل و يقابل بلطجيه و ياخدوا هدومه و يرجعوه البيت بجلابيه مقلمه و مقطعه .. افتكرتها لما افتكرت بلدنا .. عظم الله اجرها .. طول عمرنا .. بنزل الشارع بليل .. في الظلمه .. نقابل البلطجيه .. على مستويات مختلفه .. و نقعد نزعق و نقول المره دي لأ .. و شويه شويه .. نقول البنطلون لأ .. البنطلون لأ .. لكن ف الأخر بنرجع لابسين الجلابيه المقلمه و قفانا يقمر عيش .. مش مصدق .. طب افتكر معايا كده .. خناقه حرب الخليج .. خناقة الخليج يا جدع .. لما نزلنا الشارع وفردنا عضلاتنا قدام امريكا و قلنا نحلها ودي و فالاخر دخلنا بالجيش بتاعنا في قوات التحالف علشان رجالتنا تموت تحت الدبابات الامريكيه في حرب الخليج .. بلاش دي .. حرب العراق .. الأخرانيه دي .. قبل ما امريكا تدخل و بعد التهديدات المستمره لصدام .. نزلنا الحاره و فردنا دراعتنا للمره التانيه و قلنا حرب لأ .. و كفايه افغانستان و سيبونا نكلم صدام .. و كانت النتيجه .. رجعنا لابسين الطرحه و العراق اتفرتكت ميت حته .. وبرضه لبسنا الجلابيه المقلمه ... ها.. لسه مش مصدق .. خد عندك حرب لبنان .. قلنا سيبولنا اسرائيل و احنا بكام تليفون من سنترال ام دعبس هنخلص الليله و كالعاده .. خدنا على قفانا و لبنان اتشخرمت ضرب .. قوم قلنا نتفق مع السعوديه و الاردن و نقف ضد حزب الله يمكن المره دي تعدي .. برضه مفيش فايده .. و الشعب العربي كله المره دي وقف لنا و لبسنا الجلابيه اياها .. يارب تكون اقتنعت .. ايه ده .. لسه .. طب خلاص بقه .. اقولك موقف ابن يومين لسه ..فاكر لما عنتر .. اقصد جمال .. قال ان مصر هتديها نووي .. قمنا هللنا و سقفنا و قولنا بيس يا مان .. اهه كده الرجاله .. وغنينا .. وقف الخلق ينظرون جميعا كيف ابني قواعد الصواريخ وحدي .. لكن يا فرحه ما تمت .. اهي الضبعه هتتباع ارض سياحيه و النووي بقه في البلح .. ورجعنا للجلابيه المقلمه .. و طلع كل الجيران يتريقوا علينا و يحدفونا بالطوب .. وهندخل بيوتنا نطاطي و نشغل الراديو و نسمع .. هنا القاهره .. تتتتتتششش



الشعر المنسوق .. في وصف امتحان الجراحه الخازوق
ليه يا ربي الامتحان .. يبقى فتح من الفتوح
ده ياربي ضربه قاضيه .. تملى قلب الناس جروح
الشباب عجز و بدري .. محتاجين فوق روحنا روح
الدكاتره ناويه نيه .. نيه سوده مستويه
ناس دماغها ميه ميه .. عالخابور نشن و روح
ولا هيه الدفعه ديه .. اللي جايبلنا الرزيه
مستعد انقل و اروح .. استخبي في السطوح
شيء يجنن
لما جت في ايدي ورقه الامتحان
كنت هبكي
قلت لأ .. انشف يا راجل
البنات راح هيه تبكي
قوم الاقي كل واحده .. تسمك الورقه و تنوي
والقلم في ايديها مبري .. عالسطور عمال بيجري
والشباب يا عيني لايص .. اللي ساكت و اللي مهري
والدكاتره تعدي بينا .. ترمي كلمه اوام و تجري
قال يقولك فيه graft
تبقى راجل لو عرفت .. حتى اسمه
حتى لو حوليك سألت .. و التفت
حتى لو غشيت يا خويا
حتى لو نزلت تحت .. و رحت جوه القسم تسأل
ادي دقني لو فلحت
والسؤال التاني بعده
ليه يا جرح النقح صابك
مش كفايه اللي جرالك
عيش و جمّع ف السؤال
راح تألف م الخيال .. المهم انك هتكتب
اي كلمه .. و اي درجه ليك حلال
ايه يا دكتور .. لسه فاضل منك ايه
في اللي جاي هتقول عليه
لو هتسأل في الجراحه .. قول ومتخبيش يا بيه
المصيبه بجد انه .. السؤال الصعب جالنا
قوم تجاوب لينا انته .. يبقى ليه
جاي تطلع عين ابونا
و النكد عللى جابونا
يعني مش خالصين يا دكتور
م العذاب اللي احنا فيه
فات سنين و السبعه جايه
واحنا في الدوامه ديه
والوشوش حوالينا واحده
كل مره .. هيه هيه
اللي قدي خلاص مخلف .. ده العيال عزوه و حميه
نسيتونا ان احنا برضه
محسوبين عالانسانيه
خليتونا .. حمضانين زي اللمونه
عشنا بس عشان بناخد .. امتى ندي
امتى بس يا ناس نعدي
امتى نبقى .. زي كل الخلق ديه
وترحمونا من الاذيه
طبعا طلبه الدفعه همه اكتر ناس فاهمين الموضوع ده .. و حسبي الله و نعم الوكيل هههه

-



لو لم تكن اهلاويا لوددت ان تكون زملكاويا
يا ابو تريكه .. يا فنااااااااان

----------------------

نداء عاجل إلى توته .. إنتي فين يا بنتي .. استفقدتك والله هههه .. يارب يكون اللي مانعك عنا خير يعني

2006/11/12

احـــــذر


-

احذر من الشخصيه الكتومه .. فأنا كتوم و أنا اعرف اكثر .. لا تحاول التقرب اليها كثيرا .. لا تحاول الانصات او الاستماع اليها اكثر مما يجب .. إحذر .. فإذا عرفت حياتي السياسيه لن تعرف شخصيتي .. و إن كنت زميل دراسه .. فلن تعرف ما هو أكثر من ذلك .. وإذا تدفقت إلى حياتي العاطفيه .. و تداخلت في أحلامي .. فلن تعرف عني ما دون ذلك .. ربما حتى لن تعرف اسمي وقتها .. لو عرفت أني أكتب شعرا .. ف لن تعرف لمن أكتبه .. و لو عرفت اني أمتلك اصدقاءا كثيرين فلن تعرف أسماءهم .. ولو عرفت اني مصاب بمرض ما .. فهيهات أن تعرف مرضي .. ها قد حذرتك ... احذر من الشخص الكتوم .. لأن حياته قد تحتوي من المفـاجآت أكثر مما قد تتحمل

-

احذر من الروتين .. بيدك ان تغير بعضا من روتين حياتك .. لتتجنب نهايات مأساويه قد تكون سببا كبيرا في مشاكل اكبر مما يجب .. الطالب في اول يوم في الكليه بيدخل كله نشاط و حيويه و بمجرد مرور سنه و التانيه بيزهق و يمل من الروتين و يتحول هدفه من التفوق و تحقيق حلم إلى النجاح و خلاص .. و الراجل في بدايه جوازه .. بيكون متحمس و عاطفته ملتهبه .. لكن شويه شويه .. بيبدأ يمل و يزهق من الروتين .. يصحى و يفطر و يروح الشغل و يرجع ياكل و يناهد في العيال و يتعشى و يشوف فيلم السهره و يدخل ينام .. حتى المدونيين .. في بدايه الموضوع بتكون نشيط و عايز تحقق حاجه .. تبدأ تكتب تدوينه كل يوم .. وبتفكر فيها كل ثانيه .. لكن شويه شويه .. بتنسى .. و تتشغل و تبدأ تخلي كتاباتك مجرد ملي خانه .. بلاش كل دول .. ضباط الشرطه .. عمال الاسعاف و المطافي .. الناس اللي مسؤوله في كل لحظة عن انقاذ روح او ضبط جريمه .. حتى دول الروتين طالهم .. و للاسف المصايب بقت كبيره .. ضابط الشرطه من زهقه من محاضر الضبط و التغيب في النباطشيه .. بدأ يسلي نفسه بنزواته .. اللي عنده شويه ساديه بدأ يعذب في المتهمين .. و اللي عنده نزوات جنسيه بيبدأ يتحرش بالمتهمين رجاله و ستات .. لأنه للأسف ملقاش حاجه تشغله طول يوم العمل .. ولا بتوع الاسعاف و الاطباء المرافقين .. اللي شفت بعيني طريقه تعاملهم .. عامل الاسعاف او طبيب الامتياز الجديد .. بيكون في بدايه عمله .. اول سنه .. في قمه النشاط .. قمه الحيويه .. عايز يعمل كل حاجه .. و ينقذ الارواح زي الافلام و المسلسلات .. لو حصلت حادثه تلاقيه طالع جري .. و ركب الاسعاف وانطلق وبمجرد ما يوصل يبدأ يطبق الطب الصح .. علشان ينقذ المصاب ده .. لكن بعد كام سنه .. تلاقيه وصلتله الاخباريه .. يقوم يفطر و يشرب شاي و ينزل على مهله .. ولما يوصل .. بنوع من الروتينيه و الزهق من الحوادث دي .. تلاقيه غالبا بيكون سبب في موت الشخص ده بتصرفاته الغلط و المتسرعه و حاله اللامبالاه اللي عنده

مش عايز اكون سلبي .. خلينا نحط حلول ممكن تنفع .. بالنتسبه للطلبه .. محتاجين امكانيات تخلي الدراسه ممتعه .. داحنا يا جماعه يوم ما بندخل معمل ولا نستخدم اجهزه بنكون في قمه السعاده والمتعه .. يعني لو وفرنا امكانيات مناسبه كل الناس هتكون فيها حيويه و نشاط علشان تحقق هدف او تتفوق .. بالنسبه للجواز .. نفسي كل واحد بيتجوز يكون الجواز بالنسبه له هدف مش مجرد غايه .. يعني مش مجرد ما تخلص دراسه تقول انا عايز عروسه .. شوفولي عروسه اصلي عايز اتجوزها .. انما العكس بقه .. لما تلاقي واحده تستاهل و تحبها .. تبدأ تشوف طريقه توصلها بحق ربنا .. وبدون لعب عيال .. علشان تحقق هدف اسمه الجواز و الاستقرار .. ساعتها صعب اوي تكون في روتينيه او ملل و حتى لو فيه .. يبقى عالاقل في تفاهم ... اما الناس بتوع الشرطه و الاسعاف و المطافي .. محتاجين دورات تدريبيه حقيقيه .. و تعليم لأساليب التحقيق و الانقاذ و التعامل مع البشر بطريقه مختلفه عن التعامل مع الحيوانات .. اعتقد ان وجود برامج زي دي .. في وجود الامكانيات المطلوبه .. ممكن تقلل الروتين .. و تخلي الحياه تمشي بطريقه اسهل و افضل

2006/11/11

الجراحه راحه

الحقيقه .. و الحق يقال انه يوم مفترج .. امتحان جراحه غريب لم تشهده اي كليه طب فيكي يا جمهوريه مصر العربيه .. لكن عموما اهه عدى على خير .. وبصراحه الواحد راجع بشوق ولهفه .. حلوه لهفه دي .. لناس كان اتعود عليهم و حس انه تقريبا بقه واحد منهم .. و تخيلت اني لو في فتره من الفترات جيت لاي حد فيكم البيت هيدخلني علطول على اوضه الجلوس و يكون البساط احمدي زي ما بيقولو .. لكن دلوقتي .. و في ظروف الامتحان و البعد حاسس اني رجعت بقيت غريب عن الناس و اني لو جيت لاي حد فيكم يا اما هيكرشني من على الباب و يقولي معلش اصلي مش موجود .. او احتمال لو دخلني .. يدخلني على اوضه الضيوف و يضايفني بكوبايه بيبس بدون صودا و يقولي يا بخت من زار و خفف
بالمناسبه .. البوستات الطويله ستكون قدر كل من يدخل المدونه الفتره القادمه .. و لحد يوم 16 يناير تحديدا .. اللي هوه اخر يوم في امتحاناتي انشاء الله .. فياريت محدش يقول زهقت و مش عارف ايه .. اقرأ كل يوم حته صغيره و كأني بكتب تدوينه جديده كل يوم .. و بعدين انا بعمل موضوعات منفصله علشان اسهل عليك المتابعه .. ماشي يا قوم
-
حرب الجينات
بصراحه يا بشر .. من خلال ملاحظتي للحركه في الطرقات .. لاحظت .. بنظره طبيه و علميه بحته .. ان البنات بقو كلهم رجلين و بس .. يعني ماشاء الله الجيل الجديد من البنات .. او الآنسات .. بقت رجليهم اكتر من تلات ارباع طولهم .. و باقي الجسم على بعضه هو جسم طفله صغيره .. اما الشباب .. فحدث و لا حرج ... حاله قصر عامه مسيطره على كل الجيل الجديد .. و شعور ناحله بطريقه غريبه .. الواحد بقه خايف لتكون ملاحظاتي الغير احصائيه البتنجانيه دي مغلوطه او على عينه غير دقيقه .. لكن اعتقد ان كليات طب و صيدله و اسنان و علوم و حقوق وهندسه هي عينه كويسه .. ولا إيه ؟؟ عموما .. في شويه لخبطه و تعديلات في الخرائط الجينيه البشريه .. و ربنا يستر من الجيل القادم .. اللي هتكون اكبر مشاكل تواجهه .. هي كيف يأنجج الولد الأزعه خطيبته البنت ام رجلين طويله
-
أنا رجعي للوراء .. خد بالك
ايوه انا رجعي .. و رجعي جدا .. خصوصا في موضوع البوديهات ده .. مش عارف ليه مش قادر استوعبها .. معظم المحجبات دلوقتي بيلبسوا نفس لبس الغير محجبات .. الفرق الوحيييييييييد هو الطرحه على دماغها والبودي اللي ملبوس تحت الهدوم .. او تقدر تقول تحت الجلد .. يعني الاخوه الشيوخ الافاضل اللي ماسكين موضوع غسل الصابع الكبير في الوضوء الاول ولا باقي الصوابع ... ولا موضوع الهرش في الراس بالسبابه ولا الابهام .. يحاولو يركزوا انظار الناس على موضوع اللبس ده .. لانه تقريبا بقه عادي جدا و كل الناس مسلمه بيه كأمر واقع
فكروني بأغنيه الفنان الكبير اوي طبعا .. سعد الزغير لما قال
البودي البودي البودي
أحمر .. أصفر .. أخضر .. ابيض
ابيض و زي الزبده .. و اطعم ياناس مالقشطه
صغير و شكله خطير .. وعيونهم عليه سواطير
ده ضيق يا ناس و محزق .. و كتافها عليه بتلزق
-
صباحه عقد و كلاكيع
الشباب اليومين دول جامدين اوي .. تلاقي البت .. قصدي الواد من دول .. لابس سلسله .. و متسيغ على سنجه عشره .. و مطول شعره و لابس بودي احمر و احيانا شفاف .. و عامل مايك آب كامل و شعره موزمبليط عند الكوافير و كله في البيس يا مان .. يعني بصراحه .. كله رجوله .. من اول شعره المدعوك جل .. و حواجبه المنتفه و ضحكته و لا مشيته .. ياي ياي .. راجل من ظهر راجل يعني
يقوم ايه بقه .. ييجي على العربيه الغلبانه اللي راكبها .. و يشيل المساحات الاماميه .. و يركب بدل الاتنين مساحه واحده في النص .. و يسيبها في وضع النص .. يعني مش في مكانها تحت .. لأ .. يخليها في نص الازاز بالضبط .. التوضيح في الصوره ههههه .. ولما تسأله ليه ده .. يقولك .. ده رمز للرجوله .. ههههههه .. يا عيني على جمالك يا مصر

-
تبرعوا
طبعا مش محتاج اقول فايده الصدقات و التبرعات .. لكن بصراحه .. حتى عمل الخير بقه يجيب الهم و يضحك في نفس الوقت .. عقبال املتكم كنت بقرأ في جريده الاهرام الغراء من كام يوم ولقيت فيها جزء عن تبرعات القراء .. قوم الاقي مكتوب .. تبرع بمبلغ الف جنيه السيد اللواء فاعل خير .. بصراحه .. مقدرتش امسك نفسي من الضحك .. لفتره من الفترات كنت بقول الموضوع ده لصحابي على انه نكته .. يعني لما واحد ريس او وزير يتبرع كنت بتخيل معاهم هيتبرع ازاي .. لحد لما لقيت الكلمه دي قدامي مقدرتش امسك نفسي و كان منى عيني ابعت للجرنان اقوله .. عظمه على عظمه يا ست .. المفروض كلمه فاعل خير الغرض منها اخفاء شخصيه المتصدق طمعا في الاجر و الثواب عند الله و بعدا عن الرياء ... الريااااااااء و النفاااااااااااق .. يبقى منين بقه .. يا سياده اللواء

-
لا يصح الا الصحيح
ليه نطلب من واحد نازل الشارع في العيد انه ميقولش كلمه خارجه لبنت .. او ميمدش ايده عليها .. هتقولي عيب و ميصحش .. و الدين مقلش كده .. هقولك هوه انته ليه تفتكر الدين في اللي يمشي معاك و تنساه في اللي ميمشيش معاك ... يعني لما دينا وقفت ترقص ف وسط البلد .. محدش قالها تلت التلاته كام .. و لما البنات نزلت في المولات لابسين من غير هدوم محدش قالهم الدين بيقول .. اشمعنى بقه المتحرش .. هتقولي انه اعتدى على غيره .. و مين قالك ان اللي رقصت و اللي قلعت متعدوش على حدود الغير و منتهكوش خصوصياتهم .. و لا هوه التحرش لازم يكون جسدي و جنسي .. التحرش معناه اي تصرف او فعل يؤذي الطرف الآخر نفسيا او جسديا .. فكر فيها و اعقلها .. يا بشر لا يصح الا الصحيح .. المطلوب ان الناس تحب الدين .. مش انه يتفرض عليها .. مش عايزين نكرر تجربه السعوديه .. شباب بيجبروه على الدين لحد لما يتحول لقنبله موقوته و طاقات مكبوته .. لازم احنا نحب الدين .. لازم نحبه علشان نفسنا وإلا .. عليه العوض فيك يا ابو رياض
-
تاني .. تاني .. تاني
نقيب الفنانين .. احال الفنانه الفيلسوفه دينا للتحقيق .. لأنها هزت وسطها في وسط البلد .. امام الاف الشباب اللي كان جاي و كل مناه يشوف فيلم .. مناظر فقط .. اسمه .. عليه الطرب بالتلاته .. فاذا المناظر بقت واقع .. و احلام اليقظه اللي قضاها كل منهم قبل ما ييجي الفيلم يتخيل الافيش و الترايلر بتاع الفيلم و يا ترى المشاهد سخنه قد ايه .. تتحول كلها لحقيقه .. و يصاب الجميع بهياج .. زي ما سموه يعني .. لان كل واحد بدء في رسم سيناريو احلامه الخاصه به .. ومش عارفين ان كل الحكايه ان الست دينا كانت على الفيبراشن موووود و نسيت تغيره