2007/06/22

للزملكاويه .. فقط

-
هذه التدوينه هي تعبير عن خالص اعتزازي بكوني زملكاوي جدا .. و أبا عن جد كمان .. و فيها شويه تخاريف طنطاويه كده كنت كتبتها حبا في الزمالك و اللي جابو الزمالك .. و لا عزاء للأهلي و مشجعي الأهلي
-
-
زملكاوي
----------
من غير ما تكون .. بالكورة موهوم .. هتكون بالفطره زملكاوي
لو ابن يومين .. او فوق ستين .. هتقول و تنادي زملكاوي
وده حب كبير .. مش لحظة تطير .. بيخليك تحلم بالنادي
الاول في الكاس و الدوري .. في افريقيا و بإسم بلادي
هنعيش ونموت .. وبأعلي صوت .. الكل هيبقى زملكاوي

الاصل حقيقي في امجاده .. ميت سنه وعايشهم بولاده
بطولات وكؤوسها في دواليبه .. ابطال بتحققله تاريخه
وعلشان كده قلبي زملكاوي

لعيبه حريفه و بتعلـّم .. الكوره ازاي يوم تتكلم
عايشين يرفعوا اسم ناديهم .. في العالي و يحموه باديهم
وعلشان كده قلبي زملكاوي

يا زمالك اسمك في بلادي .. راية مرفوعه ومش عادي
مدرسة للفن وللكوره .. لعيبتك دايما في الصوره
وعشان كده قلبي زملكاوي

يا زمالك "بصري" و "شحاته" .. و "إمام" لعيبه فوق العاده
و" حليم " و "جمال" دوله ولادك .. و" وحيد" حامي شبكة بطولاتك
وعشان كده قلبي زملكاوي
-
-
-
لو كنت نسيت
--------------
لو كنت نسيت .. أفكرك يا أهلي
لو كنت حديد .. هسيحك يا أهلي
لو كنت نسيت !!
سيدك أنا .. ف الحرفنه .. أقدر أجيب جون ف ثواني
غيرنا مفيش .. فرقة تعيش .. فرقتنا راجعه من تاني
ولو كنت نسيت ...
حاول تجيب .. لعيب شديد .. يمكن يفيدك قدامي
فرقتنا نار .. ومفيش هزار .. شيلاه يا أهلي يا ياباني
ولو كنت نسيت ..
عفوا يا اهلي .. الكاس ندهلي .. روح يالا شوفلك كاس فاضي
زمنك نسيك .. والدور عليك .. مش راح اسيب حد قصادي
-
-
-
مش هقول عاللى حصل
-----------------------
مش هقول عللي حصل بيني و بينك .. يا حبيبي
يا زمالك .. احنا وراك .. فالعين شايلينك
انا قلبي معاك .. آه آه آه

عيني عالخطين .. يا سلام يا سلام .. على عالبال و العين .. غيرك في مين ؟
دوله اللي فضله يا هوى .. من ذكرى الاهلي من سنين
لما كسبناه .. يا سلام يا سلام .. وقوام دسناه .. بجوان تمام
جايين يقوللنا السته يا ناس .. ناسيين يا زمالك همه مين ؟؟
دانتا لو تفوق كدا .. راح يكون .. الكاس لنا
واللي جايّ بكره إيه ؟؟ .. ده كله ليك ..
دوري كاس .. كله نلاقيه
قلبي مال و اهو انكوى .. يا زمالك .. بالهوى
-
-
-
فرقتنا
------
فرقتنا .. جاية تكتب الأساطير
الكوره فيها .. ليها شكل خطير
وإذا خايف إوعى داحنا ليلنا طويل
اووووووه

يا زمالك .. إنت جوه قلبي كبير
بغلاوة الهرم و النيل
ورينا .. ويالا متّـع الجماهير
اووووووه

زمالكنا .. الماتش ده مش عادي
هيوريكوا أجمل كوره
هنجيب إجوان
بجمال و إمام
هنّـدس يا حليم الصوره

فالجون .. يالا شوت ف الجون
هنكون أقوى تيم ف الكون
يا زمالك كلـّه بيدعيلك
فوزك هنا مضموون
-
-
-
علي صوتك
------------
علي صوتك .. علي صوتك .. بالغنا ..
الكاس والدوري .. حقنا .. حقنا ..

ولا همنا .. مين ضدنا ..
الفوز لناااااا .. لو حتى الاهلي ضدنا .. الفوز لنااااا

على صوتك .. على صوتك .. بالغنا ..
ابطال افريقيا من هنا .. من هنا ..

احنا هنا .. وكلنا ..
بنقول سوا .. يا زمالك انت ف قلبنا .. ف قلبنا ..

على صوتك .. على صوتك .. بالغنا ..
يا زمالك .. يالا الفوز لنا .. من حقنا ..
-
-
سو يا سو
-----------
سو .. يا سو .. الأهلي هنغلبووووه
سو .. يا سو .. الأهلي هنطحنوووه

الأهلي كسبني سته .. وانا بكره أديله دسته
مش بس ف جونه هياخد .. بكره جونه يشمعوووه

سو .. يا سو .. الأهلي هنركبووووه
سو .. يا سو .. الأهلي هنمسحوووه

الأهلي في لعيبه .. غاليه وياريتها مفيده
نصها صيّع بتحشش .. و بكره الباقي هيركنووووه
-
-

ـ رسم الكاريكاتير للاعب الزمالك في بدايه البوست للفنان الجميل / هشام رحمه

2007/06/20

شباب نايكي .. و أطباء المصلحه

اتظاهر امبارح مجموعه من الاطباء على رأسهم قيادات النقابه في مصر مطالبين بحقوقهم في فلوس الحكومه من التكـيّـه اللي ملهاش صاحب .. ولأول مره يجتمع حمدي السيد مع عصام العريان متفقين على قضيه واحده .. برغم انتماء الاول للحكومه و التاني للأخوان .. و كانت اهم مطالب الاطراف المجتمعه هي بدء مرتبات الاطباء من 500 جنيه .. و توفير بدل اداره لمديري المستشفيات يبدء من 2500 و حتى 5000 جنيه ... يا بلاش

اعتقد اني بصفتي طبيب .. كان المفروض اكون فرحان بالكلام ده .. والتجمع ده .. لكن للأسف حسيت بحرقه دم و قرف ما لهم مثيل .. يعني الاخوه قيادات النقابه الممثله للاطباء .. و المفروض انهم اطباء لخدمه المرضى مش لخدمه نفسهم و بس .. خرجوا .. و اتجمعوا عشان لقوا الحكومه بتوزع فلوس على المدرسين .. قالوا ينوبنا من الحب جانب .. مع ان نفس الساده الافاضل دول .. و تلامذتهم اللي احنا اتعلمنا على ايديهم علمونا ان الامر الواقع في اساسيات كتير لا يمكن تغييره .. يعني مثلا .. عمري ما سمعت عن اساتذه النسا والولاده بيتظاهروا علشان مفيش عدد كفايه من الحضانات للاطفال اللي بيتولدوا ناقصين نمو .. و النتيجه .. موت حوالي طفلين الى تلاته اطفال يوميا في كل مستشفى جامعي على مستوى مصر .. و العدد اكتر من كده كمان .. بلاش .. مسمعتش عن اساتذة الباطنه بيعترضوا على عدم توفر ادويه السكر و الكبد برغم ان حياه مريضهم متوقفه عليها .. الافكس من كده .. مسمعتش عن دكاتره وقفت يوم تشتكي من نقص الامكانيات المهول في كل قسم داخل مستشفيات الحكومه بطريقه مستفزه .. بالعكس .. اكتفى الساده الاطباء بمصمصه الشفايف و الدعوه على اللي كان السبب و كأننا ولايا في مقام سيدنا الحسين

ايها الساده الاطباء المحترمون .. زي ما علمتونا اننا نحترم المريض .. و نخاف على مصلحته .. و نخليها دايما قبل اي حاجه تانيه .. ياريت برضه تعلمونا ازاي نحترم نفسنا .. و منهينش كرامتنا علشان خاطر قرش زياده .. اعتقد لو كل راعي اهتم بمصلحة رعيته .. البلد دي ممكن تتغير للأحسن ... وبرضه بقول .. ممكن .. مش أكيد


-

-----------------------------------------

-

-

من اكتر الحاجات اللي بتضحكني .. و يمكن بدرجه كبيره اوي .. منظر الشباب اللي ماشي بجنب مثلا لأن ماركه التي شيرت موجوده على جنب .. فبيحاول يظهرها .. او اللي مطلع جزء من البوكسر ( ملابسه الداخليه ) علشان يوريك انها ماركه باتا مثلا .. ويا سلام لو الكلام ده في واحده بنت .. هتلبس بودي شفاف او يادوبك مغطي فوق السره بكام شبر عشان توريك انها لابسه تحتيه ماركه مفتخره من ام خمسه و سبعين جنيه .. ليه كل ده .. عشان شبابنا المحترم بقه بيدور على الماركه قبل ما يدور على اللي لابسها .. طالما الشاب بقى اديداس او نايكي .. ف ده يغنيه عن انه يكون صاحب شهاده او اخلاق .. بمنتهى البساطه .. بقى لازم تصنف نفسك بين طبقات شباب الماركات عشان تعرف تكون وسطهم .. و تعيش رافع راسك .. و معري جزمتك .. و مطلع بوكسرك بره البنطلون .. ماهي الماركه اللي لابسها دي هتقوي قلبك .. و تخليك تتكلم بربنط .. حتى لو مش بتفهم اي حاجه في اي حاجه
-

-
وبالمناسبه دي .. في سؤال بيلح عليه .. يا ترى تحب تلبس قميص ماركه محترمه .. و لا تجيب مكانه 5 قمصان من ماركه نص كم ؟؟ قد كده تفرق معاك الماركه و التيكيت اللي بيضرب سعرها السما ؟؟ ... بصراحه .. حاولت اوازن كتير ما بين النقط دي و اكتشفت اني من النوع التاني .. يعني ممكن اجيب مثلا تي شيرت ماركه جامده لمجرد امتلاكه و خلاص .. بس في المقابل بكون حريص على اقتناء 5 تي شيرتات من انواع عاديه لمجرد التغيير .. اللي انا شايفه اهم من اقتناء حاجه ليها ماركه جامده او علامه تجاريه تقيله .. و يمكن قناعه بأن الهدوم دي مجرد غطا بنتحرك بيه وسط الناس .. بيسيب انطباعات كويسه احيانا .. لكن في النهايه .. انت اللي بتفرق حتى لو لابس هدوم مقطعه .. او من ماركه ( رصيف الستر يا ام احمد ) .. اظن كفايه كده كلام عن الماركات .. و اسيبكم تنزلوا تشتروا كام كوتشي اديداس على كام بدله فيرساتشي و كام نظاره ريبان و متنسوش ساعتين فوسيل في السكه .. و صلحه

2007/06/16

من حق الشعب

-
لا تعليق
-
-
-
-
_________________________
-
-
-
-

من حق الشعب يقول يا تاريخ
من حقه يغني للبطيخ
من حقه كمان يضرب صواريخ
و يشـد ف كـُـوله
و يكسر قـُـله
يملى الدنيا نواح و صريخ
-
من حق الشعب يكون جبانات
ما هو كلامه محسوب حسابات
و الكلمه اللي هتيجي ف الجون
على احلى ليمان ياخدوه البشوات
و بقيـّه عمره .. هناك هـيـبـــات
يتشد يوماتي من اي حاجات
يقولوله .. أبوك السقا مات
-
من حق الشعب يكون مكبوت
ويفكر دايما .. امتى يموت
و يقول يا مسهل .. خدنا إليك
جبروت فرعون .. ما بقالوا حدود
و كفايه علينا يا رب قيود
ومعدش بقيلنا في مصر آمان
الداخل فيها خلاص مفقود
والخارج منها .. ما عمره يعود
-

خاطره .. من داخل محطة رمسيس / يونيو 2007 م

2007/06/12

مصر .. تعتصم

-
عمال .. محامين .. قضاة .. مهندسين .. مدرسين .. أطباء
كل دول اعتصموا .. اتكلموا
مين لسه راضي .. و ساكت .. إنت ولا همـّـه
-

2007/06/09

لمستك .. كفايه بقه

لمستك

لمست بإيديا الخازوق
جرحه معلم لا يمكن يروق
و الليله هيه النهايه .. يا ريس كفايه
ده عمري خلاص انتهى -
-
لمست بإيديا الخازوق
جرحه معلم لا يمكن يروق
و الليله ناويها نيه .. مظاهره قويه
ما كل اللي ليه اتنسى
-
ولازم نعيش م النهاره في امان
كفايه علينا سنين الهوان
عشتوا تمصمصوا فينا .. و دايسين علينا
اكلتوا في قوتنا كمان -
-
سرحت بخيالك ل فين
ايوه انت ناوي تورث لمين
والنعمه بعنا القضيه
جمالك رزيه
لا يمكن هيمسك في يوم
_________________________
-
الانتعاشه الاقتصاديه القادمه
-
ايها الاخوه المواطنون .. لقد اجتازت مصر فتره عصيبه من الغلاء و اللسوعه .. ازدادت فيها اسعار السلع الى حد الجنون .. و قلت فيها المرتبات و الحوافز .. و استغل الوضع ثلة من المرتشين و الفاسدين الذين اداروا احوال الوطن كما يريدون .. وعبثوا بإراده الشعب و مرمغوه ف التراب .. لذا فقد قررنا نحن رئيس جمهوريتنا .. أن نعلن لكم عن القرار رقم 403040 التابع لرئاسه الجمهورية و الذي ينص على زياده قدرها 15 % على المرتبات .. لجميع فئات الشعب العامله .. داعين الله العلي القدير .. أن يمد في اعمارنا و يبارك لنا في ثرواتنا حتى نقدر على متابعه هذه العطايا و المنح .. و نكون نعم الراعي لأوسخ رعيه ... و الله الموفق
-
إمضاء / السيد رئيس الجمهورية
-
-
ملاحظات هامه : تعديلات وردت حالا من رئاسه الجمهورية على القرار 403040 لسنه 2007 محلي
أولا : ستكون الزياده على اساسي المرتب فقط .. و الحدق يفهم
ثانيا : سيتم الغاء الحوافز و البدلات .. طالما بقه فيه زياده على الاساسي يا بشر
ثالثا : لن يتم تطبيق قوانين الاحتكار او الغش التجاري بدايه من اليوم حتى نتيج للتجار استغلال الزياده في تحقيق نمو اقتصادي و عمله صعبه للبلاد .. خليها تروق و تحلى بقه