2007/02/27

ما يطلبه المدونون


تحب تقابل مين ؟؟
سؤال غريب مش كده :) .. بس بصراحه هوه جه في بالي وانا بقلب في مدونات .. و لقيت فيها تدوينات عن لقاءات حصلت بين المدونين في ارض الواقع .. بعيد عن شاشات الكمبيوتر و ضربات الكيبورد .. الفكره عجبتني .. و مش هقول ابهرتني لأني اكيد سمعت عن لقاءات سابقه للمدونين ايام المظاهرات و اللبش اللي كان في البلد ده
-
بصراحه ومع احترامي اكيد لكل المدونين .. ما عدا كريم عامر ومن على شاكلته * .. فوجهة نظري في الموضوع كانت مختلفه شويه .. يمكن لأني فكرت فيها من ناحيه شخصيه .. او زي ما تقولوا طموحي مختلف عنهم .. أكيد فكرتهم جميله .. و لقاءهم مع بعض أثرى جوانب لكل واحد فيهم .. و اكيد كلهم كانوا محتاجينها وسعداء بيها ... لكن لما فكرت في الموضوع بالنسبه ليه .. لقيت ان التنوع الهائل في الثقافات بين المدونين ميخلينيش متشوق للقاءات من النوع ده .. بعيدا عن البهائي و المثلي و المتصوف و الاخواني و العلماني و اليساري و الناصري و الساداتي و المباركي و غيره .. اقصد التنوع حتى ما بين افراد الفريق الواحد .. الحزب الواحد .. الدين الواحد .. الاعتقاد الواحد .. تباين افكار لا شتى له .. و الواحد في السن ده احوج ما يكون للتركيز .. و ابعد ما يكون لجلسات تشتيت الافكار و التلاعب بالالفاظ و تراشق الاتهامات بين التيارات المختلفه و إداعاء المسكنه والظلم من جهات اخرى

-

يمكن كمان لأني شخص متمرد .. رافض لأي مبدأ .. فرض علينا .. و رافض لأوضاع كتيره الناس بتتعامل معاها بواقعيه غريبه .. يعني زي مانا رافض تدخين الراجل .. فانا امقت بشده منظر الست اللي ماسكه سيجاره .. و اشمئز بشده من الرجل اللي مستعد يتكلم في موضوع جنسي مثلا اما جمع فيه سيدات .. بحجه انه موضوع علمي و اجتماعي .. طبعا انا لا أقصد اجتماع المدونين اللي حصل قريب .. لكن انا تخيلت في بالي ايه اللي ممكن يحصل لو اجتمع كل المدونين المصريين مثلا في لقاءات شهريه .. تخيلت انا ممكن اعمل ايه .. او يكون رد فعلي إزاي

-

عشان كده يوم ما قريت عن لقاءات المدونين ايام التظاهرات .. مالك وعلاء و منال وشرقاوي ... و برضه يوم ما قريت عن اجتماع ياسمين و في حاجه و شقير و غيرهم اللي تم من ايام .. للأسف .. محستش بأي فضول لحضور الاجتماعات دي .. مش لعيب في الاشخاص اللي اكيد معظمهم على عيني و راسي .. لكن لتركيبه معينه في دماغي .. تخليني مش عايز اتواجد في مكان إلا لو كان ليه دور فيه .. يعني لو فرضت اني متواجد مع علاء و مالك و شرقاوي مثلا .. فلا أنا سياسي ولا مفكر و لا هتفلسف و اقول مصر سوت و عملت .. اكاد اجزم بأني مقرأتش كتاب سياسي او اجتماعي او فلسفي واحد على بعضه مثلا .. عشان كده .. لا أملك التواجد معهم .. و اني اتكلم مثلا عن الوطنيه و المزايده و الفلسفه و الفكر الاشتراكي او اليساري .. لا املك اني اتكلم عن المظاهرات و تخوين الاخوان او تصنيف اعضاء كفايه او حتى استخدام لغه الحوار الدارجه من سب و لعن .. يمكن في يوم من الايام اقرأ بما فيه الكفايه و اعي بما فيه الكفايه احداث كثيره عشان امتلك ثقافه تمكني من التواجد مع ناس زيهم .... يمكن كمان معنديش ثقافه ولا خبره عمريه ولا اعرف حتى خبايا البلد دي عشان تخليني اتواجد مع شقير و ياسمين و سليمان .. محبش اقعد اتكلم في احوال البلد و مصيرنا المشئوم و صراع الاجيال و الهدف من التدوين .. موضوعات مجعلصه لا تهمني و لن تغير مني شيء .. تماما مثل قراءه جرنان الدستور اللي كنت بحبها جدا حتى وقت قريب اكتشفت معه ان قراءتي للدستور وغيره من الجرائد المستقله هو مجرد ( لبانه ) .. بسمع شويه كلام و اروح اردده في اي جلسه مع اصدقائي مثلا .. بدون ما افهم الكلام ده حصل ليه او ازاي .. بدون ما اتحقق من المعلومات دي و أتأكد من صحتها .. و يمكن اكبر مثال على كلامي اشتغاله الحوار الصحفي مع الملا عمر في تورا بورا :) و شيلاه يا سيدي الغريب .. عشان كده .. قررت اني اتحرى في معلوماتي و مصدقش اي كلمه اقراها في جرنان او اسمعها في برنامج او اشوفها في مدونه و بالتالي .. الاولى اني اتحرى اي كلمه ممكن اسمعها في جلسه نقاش مع مدونين خصوصا ان حرفتنا الاساسيه كمدونين هي قدرتنا على اخراج ما بداخلنا .. شيء اعتدنا عليه و احترفناه .. بينما يكاد يكون معظم الناس غير قادرين على ذلك .. يختزنون افكارهم في داخلهم لأنهم لا يستطيعون التعبير عنها .. ف لك ان تتخيل الكلام اللي هيتقال في جلسه مدونين هيبقى شكله ايه و متفرع ازاي

-

اكيد هتسألوا .. نفسي أقعد مع مين .. و اكيد انا فكرت في السؤال ده ولقيت اجابه .. نفسي اقعد مع ناس بسيطه جدا .. نقيه جدا .. واضحه المعالم .. بشريه الى حد كبير .. يعني نفسي اتكلم مع توته .. و اسمع حكاوي منال .. و اتعقد انجليزي من ابيتاف و اديها شويه نقاشات علميه و حلقات بنزين مع مريم .. و اتفلسف على سوسه لحد ما اجننها .. نفسي تبقه عندي الفرصه اقعد مع ايجيزيانا .. و بي بي و شهيده .. يمكن ذكرت التلاته دول تحديدا مع بعض لأنهم كلهم بره مصر :) و مش عارف الواحد ممكن يعيش لما يقابلهم ولا ايه ههههه

اما من فصيل الرجال الاهم طبعا :) ... ف نفسي اقعد مع مخلوف و هشام رحمه رسامي الدستور .. طبعا بأهوائي الشخبطيه الفنيه هيبقى ميلي لمخلوف .. لكن ارستوقراطيه هشام تخليني برضه اميل له شويه حلوين .. زي ما نفسي برضه اقعد مع عبدالله في مكتبه .. ارد على التليفونات و اقول خدمه العملاء افندم .. و هاتك يا رغي في التليفون و نكت لحد لما العميل ينسى نفسه و الدنيا و ينسى هوه اتصل ليه اصلا ** ربنا ينولهاني ههههه

-

يمكن دي اقصى طموحاتي للقاء تدويني .. مش انتقاص من الآخرين .. لكن زي ما تقولوا ... بشتري دماغي .. و بحط نفسي في مكانها الطبيعي بدون تنطيط و لا فهلوه .. لا انا سياسي ولا مفكر .. ولا انا متفتح او بوهيمي ... مش مستعد اتقبل اشياء ضد معتقداتي او مبادئي .. حتى و ان اختلفت مع اخرين اعزاء عليه جدا و احترمهم للغايه .. لكن هعمل ايه .. انا كده .. قسمتي كده .. شكلي كده ههههه
ها .. إيه رأيكم ؟؟ .. نختار مكان غالي .. كوستا كافيه والحلو في سينابون .. و الحساب على الاكبر سنا مش كده ههههه
يا ترى لو كل واحد فيكم فكر يقابل مدونين .. هيحب يقابل مين ؟؟ نتلقى اجاباتكم على 09000900 متتأخروش .. عشان كل ما هتقول مدونين اكتر هتكسب اكتر
______________________________________

=ملاحظة 1 : قال الله تعالى ( وَقَدْ نَزَّلَ عَلَيْكُمْ فِي الْكِتَابِ أَنْ إِذَا سَمِعْتُـمْ آيَاتِ اللّهِ يُكَفَرُ بِهَا وَيُسْتَهْزَأُ بِهَا فَلاَ تَقْعُدُواْ مَعَهُمْ حَتَّى يَخُوضُواْ فِــي حَدِيثٍ غَيْرِهِ إِنَّكُمْ إِذاً مِّثْلُهُمْ إِنَّ اللّهَ جَامِعُ الْمُنَافِقِينَ وَالْكَافِرِينَ فِي جَهَنَّمَ جَمِيعاً ) صدق الله العظيم
ملاحظة 2 : آسف لو كنت نسيت حد

2007/02/23

بيان هام .. من مدون غلبان

البيان الأول : تدوينه الجواز
واضح ان تدوينه الجواز طلعت تهم ناس تانيه غيري .. و واضح ان في شباب مكلكع غيري في البلد دي ههههه .. التدوينه هتفضل موجوده و اللي عايز يدي رأيه فأنا هكون ممتن ليه و هفضل استقبل الاراء و ارد عليها انشاء الله .. فلا تبخلوا بنصيحتكم


فكرة الرسم منقوله عن مدونة / منال و علاء

البيان التاني : سبحان الله
المدون عبدالكريم عامر ( بلاش كريم دي عشان بتنرفزني ) .. اتحكم عليه بـ4 سنين سجن .. و طبعا بما اني غير متعاطف معه بالمره .. فانا لست بصدد الكلام عن الحكم الظالم و الشاب المقهور والحريه المسلوبه في مصر .. لأني لو عايز اتكلم عن كده في نماذج كتير اتظلمت .. بجد .. و اتقهرت .. بجد .. مش هاجي على واحد .. ولا بلاش .. اللي يهمني في الحكم ده حاجه واحده بس .. الاخ ده .. اتعرض لشخص رسول الله (ص) .. و للدين الاسلامي ككل .. و النتيجه 3 سنين سجن ؟؟ ازاي انا مش فاهم .. محدش قالكوا اهدروا دمه لان احنا بلد فجرت خلاص و كبرت على انها تمشي على شرع الله .. حتى لو كان اهله قالوا عليه نسناس و لازم يستتاب وبعدين يتقتل .. بلاااااش .. قلتلكم احنا بلد كفره وولاد كلب و مش هنمشي على شرع الله و كفايه اوي ان خد 3 سنين .. ما علينا .. هيه جت على ده يعني .. ما كلو بقه بيتكلم على الدين و يخبط براحته و العمليه زاطت اوي .. وبعدين مهما كان اهه مننا و علينا .. اذا كان الامريكان و الدنمارك شتموا و قلنا سماح النوبه دي .. هنيجي على المصري .. يالا خلينا وطنيين و بنشجع منتجات بلدنا .. حتى لو كانت واطيه و قليلة الاصل
اللي يضحك .. ان نفس القاضي ( النبيه ) اللي شاف ان سب الدين و الرسول .. يستاهلو حسب القانون اللي بسلامته درسه في الكتب .. تلات سنين .. هوه نفسه اللي حكم ان التريقه على الرئيس .. تستاهل سنه سجن .. يا سبحان الله .. يعني شتيمه الريس تساوي تلت شتيمه الدين .. يا حلاوه يا ولاد .. و الله مصر لسه بخير .. و شعبها ده يستاهل كل خير برضه .. فعلا .. بلدنا دي مش بس بتاكل ولادها .. هههه .. دي بتمضغهم و تتفهم للكلاب تنهش فيهم


Use this banner in ur blog , if you are Tota`s Fan


البيان التالت : توته

من كام شهر
و على كل مدونه مصريه
ظهرت واحده جميله شقيه
بتكتب لنا كلمات مضبوطه

عمرك يوم ما تحس بضيق
او تتنرفز م التعليق
ما هي اصلها فاهمه و ذكيه
ومن فتره .. بدأت تدوين
كلامها كبير .. يملا دواوين
اكيد دلوقتي عرفتوا مين

توته حبيبتنا .. وعايزه تسيبنا
زهقت يمكن من عمايلنا
ومحدش عارف يقنعها
انها واحده علينا و منا
خليكي معانا .. يا توته
راح نبقى لآخر الحدوته


ادخل على مدونه توته و اكتبلها رأيك فيها بصراحه .. لأني متأكد ان كلامك لو كان من القلب هيغني عن ميت دعوه لها بالبقاء معنا مدونة ذكيه .. جميلة .. مثقفه .. و الاهم انها حنينه جدا :) يالا .. إلى مدونه توته .. للأمام سر ..
إضغط هنا للوصول للمدونة

بالمناسبه .. مدونه صديقه و عزيزه جدا هي لحظة صدق .. اختارت برضه موضوع الاحتجاب ده في هدوء و بدون ما حد يعرف .. لكن اسبابها كانت منطقيه عشان كده مقدرتش اقولها حاجه .. لكن منال و توته و قبل كده شيريهان مقالوش اسباب منطقيه بالنسبه ليه على الاقل .. عشان كده مسبتهمش في حالهم :) و اهي شيريهان رجعت و منال وعدت انها ترجع تكتب تاني .. فاضل توته .. خلينا نشووووفك



2007/02/18

تدوينه .. لا تهمك

-
مش عارف ليه اخترت الموضوع ده دلوقتي .. لكن اللي متأكد منه انه غالبا الموضوع ده لا يهمك .. و مش هتحب تقراه ولا تقول رأيك فيه .. إلا الناس اللي تفكيرها عميق .. الناس اللي بتبص لقدام .. قدام أوي .. مش معنى كده اني من الشريحه دي .. لكن لما اكتب في البلوج لمده سنه و نص :) و اجي في مره اكتب موضوع عميق يبقى كويس هههه
-
يا ترى لو قررت اني اعيش بدون جواز .. لو الموضوع تملكني بدرجه كبيره .. بعيد بقه عن اسلوب التريقه بتاع هوه الناس لاقيه تتجوز و السخريه من الاوضاع الماديه و خلافه .. يا ترى لو فعلا الواحد اتخذ قرار جريء بالرهبنه .. هل الحياه هتستمر بسهوله .. و بدون كلاكيع و عقد .. ؟؟ .. شفت امثله كتيره و مش مشجعه .. حقق بعضها نجاح شخصي كبير لكن ترسب جواه عقد لا حصر لها .. و كلاكيع ظهرت مع الزمن .. وخصوصا في فتره الشيخوخه .. والوحده الاجباريه .. يا ترى بيقدر يتغلب على غرائزه ؟؟ .. بيقدر يتغلب على مشاعر الابوه .. الاسره .. النهايه الطبيعيه لليوم في حضن الزوجه و دفء المنزل .. مشاكل الاطفال و طلباتهم اللي مبتخلصش
-
الجواز تكامل ما بين سطوة الرجل .. و دلال المرأه .. و غرض كل منهم في فرض السيطره على الآخر .. و املاء شروطه الموضوعيه والغير موضوعيه .. بغرض قياده سفينه الاسره للأمان .. كما يعتقد كل منهم .. هي سنه الحياه و حقيقه واقعيه لابد من وجودها .. بل هي امر الهي صريح و دعوه رائعه للتزاوج و التكافل بين المجتمعات والاسر .. لكن .. يظل السؤال يطرح نفسه .. هل في العزوبيه او العنوسه كما يسميها البعض مصدرا للأمراض النفسيه و الاجتماعيه .. الا يمكن ان يكون الفرد منا عازبا و في الوقت نفسه صحيحا .. عاقلا
-
فكرت في اللي عملوا كده .. قلت يا ترى هوه الواحد ممكن ينشغل بالحياه لدرجه انه ميفكرش في الحب و الجواز و الاسره و الاطفال .. و وصلت ان الموضوع ممكن و إلا ازاي قدر الواحد انه يعيش من يوم بلوغه و حتى قراره الزواج بدون مشاكل معقده عن طريق تهذيب تلك الرغبه و السيطره عليها .. يعني الواحد يقدر يعيش عمره بدون جواز .. و بدون التفكير مجرد التفكير فيه .. او في طرف آخر لحياته .. و بدون ما يكون مريض نفسي او معقد من الجنس الآخر .. لكن تناقض كلامي مع كلام آخر داخلي .. قلت هوه الواحد اللي بيشتغل و ينشغل ده .. بيقدر يعيش بدون غريزه الاكل مثلا ؟؟ .. او غريزه حب المال .. او حب الوجاهه و السلطه ؟؟ .. اكيد لأ .. يبقى المنطق انه ميقدرش برضه يتحكم في غريزه الحياه بدون زواج و اسره .. و إلا هيكبت نفسه .. و يدمر شخصيته
-
ارجوا الافاده :) الموضوع يهمني .. و قد يكون احد اختياراتي في المرحله القادمه ههههه .. هل من رأي

2007/02/12

الناجح يرفع إيده


الناجح يرفع إيده
-

انا نجحت يا رجاله .. جبت 80% .. يعني جيد جدا .. حاجه حلوه والله .. و فرحان بجد .. مع إن الجراحه بصراحه كانت وحشه اوي و حاسس اني اتظلمت فيها لكن اكيد الحمدلله على كل شيء .. طبعا مش محتاجه اقول ان اللي عايز يديني الحلاوه ممكن يبعتلي الشيك على الايميل .. بس بسرعه علشان الحق اجيب حته جديده اخرج بيها و اتعايق بقه .. مانا بقيت الدكتووور ههههه
-

دي أغنيه و ماله اللي كنت قلتلكم عليها .. هديه النجاح للناس الحلوين
تحميل : و ماله

-
_________________
-

الاخ المذيع الشاب خفيف الظل .. معتز الدمرداش .. يا جماعه .. لو سمحتم .. حد يشيله من قدامي .. انا بجد ضغطي بيعلى و عنيه بتحول و مش بقدر اكمل التلفزيون قدامه .. ناس هتقول متحول القناه و تريح نفسك .. هقولهم .. مش بقدر .. بعد لما بشوفه مش بقدر اكمل فرجه على اي حاجه تانيه .. بيجيلي قرف وبطفي التلفزيون و اكتئب

كائن لا يفقه شيء في أي شيء .. و على مسؤليتي الشخصيه .. احسن مكان ليه كان سائق اتوبيس او صراف على شباك تذاكر في ملاهي شعبيه .. لا أكثر و لا أقل ... انا نفسي اعرف سبب واحد يخليه مذيع .. شكلا .. بلاش نتريأ على خلق الله .. مخارج الفاظ .. بلاش نجيب في سيره الناس .. اديكم شفتوه و عارفينه و سامعينه ... طب خلينا في اخلاقه .. مذيع جلف .. معندوش ذوق و لا أدب ولا حتى اتيكيت او دبلوماسيه .. بيدخل في ضيوفه شمال .. و بيتكلم بأسلوب فظ يدوبك يليق على بياع بليله او ممبار .. لا يحترم صغير ولا كبير ما دام اختلف معه في الرأي .. من اول حلقه في برنامج 90 دقيقه و هوه بيشتم في ضيوفه .. و مازال .. مش عارف فاضل ايه .. حتى دمه تقيل .. و هزاره سمج .. تفوق حتى على سماجه تامر أمين بتاع البيت بيتك .. فاضل ايه بس .. كلامه مع مي الشربيني زميلته في البرنامج .. اللي هيه اصلا أسأل منه و بصراحه يادوب لايقين على بعض .. كلامها يشل .. و كلامه معاها ينقط .. جوز غربان

بصراحه انا زهقت من سيرته .. و اتمنى تكون اول و اخر مره اتكلم عن الشيء ده

-

______________

-

ألبيدا عايزه تشطب المدونه و تسيب الجمل بما حمل

هع هع هع
انتتي فاكره دخول الحمام زي خروجه ولا إيه ؟؟
لو مرجعتيش .. هحط السيخ المحمي في صرصور ودنك يا مناااااال
ده اخر تحذير .. الدواء فيه سم قاتل
خلي بالك .. انا مبقولش الكلمه دي مرتين .. ارجع يا عدوي .. مصر محتاجالك
ملاحظة : انا مش هقول اكتر من كده لأني من خلال خبره سنه و شويه في المدونات لقيت ان كل واحد كان بيمر بلحظة بيقول انا خلاص بطلت . بطلت خلاص .. لكنه كان و الحمدلله بيرجع تاني لأنه مبيقدرش يقاوم سحر التدوين .. و لا طبعا بيقدر يستغنى عن شوفتي ههههه بس هيه اللحظة بتاعتك اتأخرت شويه .. لكن متقليش .. دي اعراض صحيه .. هيبدأ التيرم التاني .. بدون النوفل و الكلشر .. ف هتقولي انا عندي وقت كتير عايزه اضيعه و هتبدئي تضيعيه في اي حاجه تانيه .. و إذ فجأه هتقولي .. إيه ده ؟؟ هيه توتا و طنطاوي و مانو و شيري و لميا و الناس فين .. تروحي جايه واخده لوك سريع .. هتقولي الله يخرب بيتكم ايه الهجص اللي بتكتبوه ده ..و تروحي مدياها تدوينه عجب بعنوان ماذا لو .. منال رجعت تاني وشوفي بقه الكومنتات اللي هتتكتب عالتدوينه دي .. هههه .. و يوميها هتعملي حفل افتتاح جديد للمدونه و هتعزميني اقص الشريط بمطوه و نقول البث رجع من تاني يا بني آدمين .. بسم الله .. الله اكبر
-

_____________________

-

إضغط الصوره للتكبير