2006/09/14

كفـاية .. بصبصه


أيها الساده الرجال .. ايها الساده السيدات برضه .. برجاء .. كفايه بصبصه .. الواحد خلاص زهق .. مش عارف اخره الموضوع ده ايه ؟؟ في كل شارع و مول و سوق .. تلاقي الشباب .. ولاد و بنات .. واقفين متنحين .. و كل الرؤوس بتتحرك في تناغم رائع مش بيحصل في اي حاجه تانيه في مصر ولا حتى اجدع فرقه موسيقيه .. كله بيبص في نفس واحد على واحده ماشيه تتغندر و لابسه هدوم من غير هدوم .. متناسيين كلام العلامه الجهبذ سعد الصغير .. اللي برغم سنه طلع اكبر منهم لما قال : مش كل واحده لابسه كت تبقى مزه .. ياعيني عليك يا سعد
-
يا شباب .. انا نفسي افهم .. بتستفيدوا ايه من البصه دي .. اللي عايز يتفرج ما التليفزيون مليان .. روح استخبى و داري على خيبتك واتفرج براحتك .. إذا بليتم فاستتروا .. مش شغال زي السكانر قدام الناس .. فرجه بكل بجاحه .. المصيبه بقه .. انك بتدي فرصه للناس .. من فصيله الكروموسوم اكس اكس .. ذوي العيون المتفحصه .. انهم يقولو علينا حيوانات .. و اننا عبيد شهواتنا .. اننا ذئاب تسير على قدمين .. كل ده علشان سيادتك ماشي تبصبص لخلق الله في الشارع ... أما البنت الفاضله .. اللي ماشيه تبصبص هيه كمان للبنات في الشارع .. بدعوه غالبا انها منبهره بالستايل ده .. او انها مستغربه .. فهيه برضه بتشجع الاخت .. المزه .. اللي ماشيه من غير هدوم انها تفضل كده .. طالما حاسه انها حاجه .. غريبه .. و لافته انتباه الناس حتى البنات .. ليه لأ ... حقها تعمل ما بدالها
-
ملاحظة غريبه جدا بصراحه .. لما نزلت مع صحابي من فتره و اتمشينا في سيتي ستارز .. كان طبعا كل واحد بيبدي رأيه في الاخوات الفاضلات اللي بيتمشوا هناك .. ولما حاولت انتقل من مرحله اني مبصش لمرحله اني كمان معلقش على تعليقاتهم .. كان رد فعلهم كلهم اني اكيد تعبان .. او التعليق الاغرب بصراحه .. اني اكيد بحب واحده ووعدتها اني مبصش لحد .. او اني مرتبط من وراهم و مش عايز اقول ههههه .. بقه هوه ده السبب الوحيد اللي يخلي واحد ميبصش لواحده .. تخيلوا ؟؟؟ بصراحه مش عارف العيب في مين .. لكن عندي امل اني افضل انشاء الله على عهدي .. وان كل الناس تكون كده .. خلي الاخوات الفاضلات اللي من غير هدوم يتكسفوا على دمهم لما يلاقوا محدش معبرهم خالص .. وكل من عليها فاااااااااان

25 comments:

AHMAD said...

! بقي انت رحت سيتي ستارز يا فاسق

دلوقتي قدامك حل واحد عشان تكفر عن الخطيئه دي

اتفرج علي قناه السودان الشقيق لمده اسبوعين

تحياتي يا طنطاوي

bluestone said...

المشكلة مش في البصبصة ,, او المعاكسات لكن فيما يعرف في مجتمعنا بثقافة البحلقة !!د
ودي لا يتميز بها سوى شعبنا الجميل .. لاننا تعودنا على البحلقة في كل شيء .. اي شخص ماشي في الشارع لابس كويس لابس ملخبط تلاقي الناس بتبصله ,, اي بنت جميلة أو لابسة لبس معين ولا حتى لابسة اسدال ..
لو جارك جاب حاجة جديدة في بيته برضه تلاقي الناس بتبحلق ,,
والبحلقة درجات وأنواع يعني فيه بحلقة العين أو النظر إلى كل شيء رغم ان ده يعتبر قلة ذوق وسخافة في الغرب ,,
وهناك البحلقة الشخصية .. وهو ان يبحلق الشخص في وجهك ويستدرجك لمحاولة معرفة اسرارك او تفاصيل حياتك.
والثقافة العقيمة دي أحد اسباب تدهور شوارعنا وسلوكياتنا لان الناس ببساطة مابقيتش بتسيب حد في حالة ,,

Dr. Tantawy said...

** ahmad
حلوه يا احمد ههههههه
بجد جامده اوي ههههههه



** bluestone
منوره المدونه
بصراحه انا مقتنع معاكي بثقافه البحلقه دي
لكن انا حبيت اتكلم عن نقطه معينه بمناسبه حمله كلنا ليلي وكلنا ام ابراهيم اللي شغاله دي و اللي احنا نعتبر احد اسبابها كذكور لأننا ادينا فرصه لكل بنت تقول على الراجل شهواني و بتاع متعه و بس .. بسبب البصبصه و البحلقه اللي ربنا يجيرنا منها انشاءالله

farida said...

المشكله ان حتى الواحده المحترمه مبتسلمش
و بعدين مش بنعرف نمشي خالص في اي مكان

و كأن جمال الواحده ذنب لازم تكفر عنه بالرزاله دي

حتى الرجاله المتجوزه بتبصبص

بس و الله جوزي بيصعب عليا إذا كنت ان يا ست من مناظر بعض البنات ببص عليهم جامد
هو يعمل ايه

اصل بصراحه في بنات....... و لا بلاش

ربنا يكون في عون الشباب
بس انا برضه ضد البصبصه
و بحييك يا طنطاوي
و ربنا يثبتك على كده

sherehan84 said...

مصر ستين مليون ..
فيه كام واحد مش بيجري ورا شهواته ؟؟
وكام واحده مش بتجري ورا شهواتها مع إختلاف أنواع الشهوات؟؟
العدد قليل ومحتاجين مراجعه للنفس ..كلنا محتاجين نراجع نفسنا

sherehan84 said...

بالمناسبه انت من طنطاولا طنطاوي ده اسم؟؟؟

tota said...

العزيز زنجولا
طبعا جزء من المسئوليه على ليلى الملفتة للنظر بطريقة اللبس المستفزة والجزء الاخر على ادم لانه اتعود على كده بدون ادنى اهتمام او شعور بتأثير هذا على ليلى
البصبصةاحيانا مش بتكون كلام بسيط بل تعليقات تصل لحد البذائة تدل على سوء اخلاق صاحبها

مشكلة البصبصة والبحلقة اللى هى اسوء كما وصفت بلو ستون محتاجة حملة توعية ولو وصلت لعقاب زى ما كان بيتعمل زمان يبقى يطبق وجيل السبعينات يعرف كويس قوى لما واحد يعاكس واحدة فى الشارع كان بيتعمل فيه ايه

اثبتنا بكل جدارة اننا شعب لا يصلح معه التوعية بل العقاب الرادع
وده اللى فعلا مؤلم
ليه مش من نفسنا نوقف الغلط ليه لازم حد يجبرنا
محتاجين وقت كتير قوى علشان نوصل لاحترام الذات
شكرا لانك بتفكر ادم وليلى بنقاط هامة فى حياتنا
تحياتى

عبدالله مفتاح said...

ماله النقاب؟

Dr. Tantawy said...

** farida
اهي دي المشكله يا فريده :) انك شايفه جوزك صعبان عليكي من المناظر .. مع ان احنا اللي ادينا المناظر دي اهميتها .. زمان كان الواحد لما يشوف بنت لابسه وحش كان بيقول اعوذ بالله من دي مناظر و بيدور وشه الناحيه التانيه .. دلوقتي احنا بقينا معتبرين ده عادي و حريه شخصيه .. فبقه كله بيبص و يبحلق براحته .. ولا عزاء للدين ولا الاخلاق ولا أي حاجه تانيه



** sherehan
حمدالله عالسلامه .. خلصتي امتحانات ولا ايه ؟؟ مبرووووك مقدما وعقبال الامتياز
احنا محتاجين نراجع نفسنا اكيد .. المهم كل واحد يكون عارف كده

طنطاوي لقب اعتز بيه جدا .. ايه رأيك فيه ههههه



** tota
كلامك منطقي و جميل يا توته
والله نفسي نرجع زي زمان و نحلق قرعه للي يبصبص لواحده في الشارع
بس محتاجين برضه عقاب للبنت اللي تبقى اوفر في اللبس .. ولا همه البنات تعمل ما بدالها والولاد يتحلق لهم قرعه هههه



** عبدالله
يا عم عبدالله النقاب على عيني و راسي .. بس مينفعش نفضل مستنيين النقاب وخلاص .. في بنات كتير منقبين و بيعملوا بلاوي في البلد دي .. المطلوب اننا نغير نفسنا الاول قبل ما نقول نقاب .. ولا إيه

د/ دسوقي said...

اوعي تكون بتبصبص ياحاج انت كمان
(بهزر معاك) مقال جميلول تكلمت عن غض البصر كان اكمل
لو حد ممكن يعرفني ازاي احط صورفي الموضوع يبقي جزاه الله خيرا

د/ دسوقي said...

موضوع جميل لو تكلمت عن غض البصر كان اكمل

Moog Alb7ar said...

ده شىء بقى عادى بس المشكلة الاكبر انك ممكن تلاقى البنت اللى ماشية ولا قاعدة دى جبيها مامتها ولابسة كت برده او قاعدة بتشرب شيشة جنب بنتها وبشوفها كتير لما الام بتعمل كده مع بنتها يبقى المفروض ندور على حد ينصح الام وبعدين البنت المشكلة فى الغالب بتكون فى التربية والجو الى الواحد عاش فيه من الصغر مع احترامى لباقى الامهات اللى متعرفش بنتها بتعمل ايه!!!!

sherehan84 said...

نقاب ؟؟!!
للدرجه دي إحنا حيوانات ومش عارفين نسيطر على شهواتنا لدرجة إننا عايزين نخلي الشهوات تختفي من قدامنا ؟؟!!
على فكره أنا مش معترضه على النقاب في حد ذاته بس ميبقاش ده شماعتنا اللي نغلق عليها انفلات أخلاقنا

dawyomeldonya said...

عبدالله مفتاح said ماله النقاب؟ : he is jokin!! Let me tell u that I was putting on a niqab while walking in streets out of frustration from pple (even though I'm only muhagaba)....I was sufferin not only from basbasa and ba7la2a but sometimes...and many times ..touching and other vulgar actions..baya3 el garayed elli bashteri menno mostawa nazaro mesh el wesh la2....awta shwayya...!

anyways dr Tantawy, I'm takin ur permission to add the logo
"kefaya basbasa" on my blog?
Thanks

dawyomeldonya said...

I was askin all my frnds and now I'm askin all of u girls, 3ashan "tegarrasoo" ay 7ad yebasbas aw ye3akes...pls, if u girls make a scandle in the street or in the mall to the guy elli beybasbas ...he won't do it again(probably). What do u think of this campain?

Dr. Tantawy said...

** دسوقي
شكرا يا باشا .. انا اعتبر اتكلمت عن غض البصر لكن محبتش اكتب باسلوب الوعظ المعروف لانه بقه ممل والناس كلها زهقت منه .. يعني عارف بكتب باسلوب الحدق يفهم و اللي على راسه بطحه ههههه
بالنسبه للصوره .. هتلاقي كل التفاصيل على مدونه .. الف به تدوين .. موجوده على مدونه بنت مصريه



** موج البحر
هههه انت اخدت الكلمه من على لساني :) ده كان موضوع التدوينه الجايه انت كده حرقتهالي ههههه



** شيريهان
هوه اكيد مش قصده كده يا شيريهان .. هوه قصده لما البنت تلتزم باللبس الشرعي اللي هوه مش نقاب لكن لبس محترم .. ده ممكن يقلل من المشكله دي و ان كانت طبعا مش هوه ده بس الحل في عوامل تانيه كتير لازم تتغير
بلاش يا بنتي الهجوم العنيف ده .. خليكو هاديين شويه .. منها لله ليلي اللي عملت فيكو كده


** dawy
hehehe , i agree with ya .. and u can find more about these methods on Manalaa.com .. they had brilliant ideas concerning these insults .. Thanks for ur comment

عبدالله مفتاح said...

احييكي يا شريهان
بس الموضوع ملوش دعوة بالحيونات لان النقاب كانت بترتديه زوجات النبي صلى الله عليه وسلم والايه نزلت تؤيد كلام سيدنا عمر ان يحجبن
(واذا سالتموهن متاعا فسالوهن من وراء حجاب ذلك اطهر لقلوبكم وقلوبهن ) الكلام للصحابة وامهات والمؤمنين فما بالك بينا
يعني لما واحد فينا يتمنى ان الستات تنتقب ميبقاش حيوان ولا حاجه ده بيبقى بيتمنالهم الخير وعايزهم يبقوا زي امهات المؤمنين وعايزهم يعينوه على غض البصر
انا بعذرك يا شريهان لازم نستمد ثقافتنا من المكان الصح عشان منقلش كلام غلط
بس انا بردو مش حيوان

Dr. Tantawy said...

يا عم عبدالله هيه اكيد مش قصدها كده :) انت عارفها اكتر مني .. هيه بتتكلم عامه يعني و التعبير خانها
اذا كان التعبير خان بابا الفاتيكان مش عايزها هيه تقول حاجه متقصدهاش

وبعدين دي مهما كان وزيره الصحه بتاعتنا لازم تقول اللي هيه عايزاه

sherehan84 said...

أنا مقصدتش أشتمك .. دا مش اسلوبي وكمان انت عارف أد ايه علاقتنا على قدر كبير من الإحترام مقدرش معاه إني أشتمك .. أنا كنت بتكلم على المنطق نفسه ..منطق إننا عايزين الشهوات تختفي بدل ما نقاوم نفسنا وأظن إن الكائنات اللي بتتبع شهواتها هي الحيوانات فأنا مقصدتش تماما إني أهينك ولو إنت إعتبرت كلامي شتيمه ليك أحب أعتذرلك

BeeBee said...

Girls suffer from that everywhere in the Arab world! Some of them, I'm sure, dress in a way to get noticed.. While others also get the "basbasa" for no reason!

Dr. Tantawy said...

totally accepted :))
but those who wear NOTICED cloths are really TOO MUCH !!

mano said...

فى البداية كل سنة وانت طيب
انا بقى عايزة اقول ان حكاية البصبصة دى بسبب خلل فى المجتمع لأن فى ناس محترمين جدا بيتعرضوالها وكمان زمان كان التدين والحجاب مش منتشرين قوى زى دلوقت بس مكانش فى معاكسات بالشكل دة

Dr. Tantawy said...

انا معاكي
بس خلل المجتمع ده سببه الولد و البنت
المجمتع كله مسوس بصراحه و عايز الحرق :)) ربنا يعينا و نحاول احنا نصلح فيه

سهرانه said...

ماشاء الله مبدع ياطنطاوي الله يوفقك ويحرسك ..من كل سوء ..انا وصلت لمدوناتك الرائعه قدرا من قوقل ..واضفتها عندي بالمفضله ..فهي تستحق المتابعه ..

عندي ملاحظه بسيطه لو تكرمت ..ان شاء الله ..تكتب هكذا وليس (انشاء )لأن الاخيرة بمعنى الايجاد

ولك كل التقدير والاحترام

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول