2006/06/30

ZanGooLaTooNz

انتظروا مفـاجأة بلوج مصرنا
كاريكاتيرات مصريه يوميه
ZanGooLaTooN
بداية من الاسبوع الجااااااااي
يمكنكم مشاهدة الكاريكاتيرات .. اللي مش أوووفر .. على بلوج نهى و أخواتها

2006/06/29

قــَسـَم رئيس جمهورية زنجولاريا

بسم الله .. و بسم اللي باقي من الوطن .. و بسم اللي يلزمني من الشعب

أقسم بالله العظيم .. ان لا أصون تراب الوطن .. والا احافظ على وحدة اراضيه .. و ان ابيع كل شبر منه للّي يدفع أكتر

أقسم بالله العظيم .. ان امتهن كرامة هذا الشعب .. و ابعزق من كبريائه .. و اكسر شوكته .. وافتت عظامه .. حتى لا تقوم له قائمه أبدا

أقسم بالله العظيم .. أن لا أحافظ على الحريات .. و املأ السجون والمعتقلات .. بالشباب و الشابات .. فوق السن و تحت السن و حتى المعاشات .. ولن يخرجوا منها ابدا ما دمت حيا

أقسم بالله العظيم .. أن أسّــوح كل من تسول له نفسه التدخل فيما لا يعنيه .. و التحدث عن امور الحكم و الوزراء و الهيئات الدستوريه العليا .. و أن اضعه في مكان مناسب خلف الشمس .. حتى لا يثير القلاقل ويعمل قلق ملوش لازمه

اقسم بالله العظيم .. ان تكون مصالح الشعب و المواطنين .. تحت الجزمه .. و الا اوليها اي اهتمام او تقدير حتى اتفرغ لرعايه مصالح البلاد .. و الارصده الخاصه في سويسرا و امريكا

اقسم بالله العظيم .. ان اسمع كلام ماما امريكا .. و ألا أغضبها أبدا أبدا .. وان اكون دلدولا لسيادتها ..و برغوتا في فانيلتها .. و كلبا من كلابها المطيعه الوفيـّه جنبا إلى جنب مع اللولو الاسرائيلي

أقسم بالله العظيم .. ان اساعد برامج تنظيم الاسره .. بالمبيدات المسرطنه .. و المياه الملوثه .. و العيش ابو مسامير .. واللحمه بتاعت الحمى القلاعيه .. و الفراغ ام انفلونزا الطيور .. و السمك المسمم

أقسم بالله العظيم .. أن ادعم ثقافه الشعب .. بقنوات الكليبات الهادفه .. و افلام العرّي و التنطيط .. و الشبابالروش العبيط .. و امسح من ذاكرتهم كافة الذكريات الوّحشه المرتبطة بـ إبراهيم عيسى .. وائل الابراشي ..عمرو خالد .. و غيرهم من المرتزقه و الكلامنجيه

أقسم بالله العظيم .. أن افتح كافة المواقع الجنسيه و الترفيهيه على شبكه الانترنت .. و امنع كافة منتديات و مواقع المعارضه و الحوار قليل الذوق .. حتى لا تتأثر فطره الشباب بمثل هذه المهاترات .. و يعودوالرعاية غرائزهم وشهواتهم الطبيعيه .. أفيد من السياسه و التخريف ده

أقسم بالله العظيم .. ان ارفع من امكانيات النادي الاهلي .. وادعم منشآته ولاعبيه .. و اتصور صوره شخصيه مع ابوتريكه .. و ان امنعه من الاحتراف .. و ان اطربق نادي الزمالك عللّي فيه .. واخليه يمسح الرصيفو يغني لله يا محسنين

والله على ما اقول شهيد

حق ولادنا

هـمـّه تلاته من الرجاله
ماتوا بنار الغدر يا هوه
على اراضينا اضربوا و ماتوا
حتى الشجب كمان نسيتوه
ولا تعزّيه ولا مداوّيه
فقلب الليل والعتمه جابوه
وجوه الرمله قوام دفنوه
ليه رجالتك هانوا عليكي
ليه يابلدنا الحق باعوه
ليه يا بلدنا ولادك رخصوا
حتى الجاني قوام سبتوه
رغم الدم مغرق ايده
ليه خايفين يا بلد من سيده
دم ولادنا عليكوا شيلوه
ليوم الدين والحق هيسأل
ليه التار يا "رجال" خنتوه
حرّقـة دم بتزعق فيه
تار الشهده ده حق عليه
طول ما بلادي فالحق وليّـه
تقفل عينها عن الحراميه
وتدلعهم بالحنـّـيـه
امتى يا ناس هنبطل نحزن
ونغني في الليل ظلموه
امتى هنرفع اسم بلدنا
وما نركع غير للّـي خلقنا
ولا ننسى تاركم يا ولادنا
حتى ولو في بلادنا باعوه
جيش صهيون .. بيبيدوا في غزه

علشان جندي ملوش ولا لازمه
خطفوه .. وجوه الارض خفوه
وكل الجيش عايزين يلاقوه
ومفيش حد يقول اهو جندي
راح في الاسر و عزوا ابوه
واحنا يا بلدي لسه مكانا
وبنستنى
كلمة اسف من اعداءنا
تار شهداءنا
عاشت مصروعايش برضه
في بالنا ولادنا
تارهم بايت جوا حياتنا
و اوعي يا مصر تقولي انسوه
و دم الشهدا اللي على ترابك
يجي مستثمر من اعدائك
يدفع كام مليون لحسابك
تبقى الارض دي ملك ابوه
ودم الناس على الارض دوسوه

2006/06/24

يا مشكلتي الأزلـيـّـــه

يا مشكلة
لاتسأليني في الهوى ما موقفي
فانا احبك رغم كل تخوفي
هذي احاسيسي لديك ماثلة
انا تكوني لي حياتي المقبلة
او تكوني انت الطف قاتلة
انزعيني من حياتي الموحلة
ذاك قدري
ذاك كان مخططي
مزقيه و قودي انت القافلة

اراني قلت من قبلك
بان الحب ناداني
واني كنت فارسه
وكان سواك ميداني
كذبت لكل اشعاري
ولا ادري من الجاني
فانتي حبي الاوحد
وانت مليك وجداني
واقسم انني عنك
سما بالصدق ديواني
وهذا رغم ايماني
بقلبك ليس يهواني

كم أحبك حين دمعك قد يسيل
حين.. ألا ابتغيكي .. مستحيل
وقتها انت معي
فتقوقعي ..
في فؤادي ..
في فراغ شاسع
قد اعد لكل مخلوق جميل

يا حياتي
في حياتي انت مفتاح الخريطه
لاتشكي في وجودك فوق احلامي البسيطه
لاتشكي في ولائي
يا من لقلبي مليكه
كم احبك عن هوايا راغبه
كم احبك يا حياتي غاضبة
كي ابرهن ان حبي راسخ
لاينافس .. ليس يبحث عن هبه
ليس يخبو رغم كونك متعبه

منذ ان احسست حبك
لست اشهدني انا
كل امالي تلاشت
فيك لخصت المنى
فاقتليني ان هويتي
ولتقولي
مات من دوني .. فنى

2006/06/22

في بلادي .. ديوان زنجولاويات


في بلادي

لكل حاجه في سبب

حتى لو فيه العجب

قد يكون قلة أدب

تشعل القلب بغضب

بس دي هيه بلدنا

من عاشوره لحد يوم طلعة رجب

في بلادي ..

اوعى يوم تسأل لماذا ؟

الديون حاجه و عازا

واللي ماشي بالازازا

بالبنات في جرين بلازا

اهو دوه باشا .. و ابن باشا

في بلادي ..

كل شارع فيه طابور

فرن عيش او بار خمور

كله مستني في دور

هيه دي بلد الحضاره و العصور

جوه بلدي في جسور

كل جسر وليه حكايه

واوعى تسأل عالمرور

داحنا في بلد العبور

في بلادي ..

كل شاب و ليه مكان

جوه قهوه او ليمان

المهم يكون مكان فيه الامان

نفسه يوم يسكن في شقه

حتى لو من غير بيبان

حلم عايش من زمان

ما كل جيل و له آوان

في بلادي ..

لو معاك واحد معدي

كل حاجه ليك تعدي

اصله واصل يا بن والدي

دوس يا عم ليه تهدي

هيه دي عيشتك يا بلدي

كله كوسه صباحه وردي

في بلادي ..

الغناوي بدون هدوم

او هدوم من غير لزوم

كله هلس و بوس و عوم

او سرير و حكاوي نوم

والحكايه حبيبي انت لن تدوم

او حكاية حب فيها عتاب و لوم

في بلادي ..

كل حاجه وليها دور

الا شعب ملوش ظهور

دوره انه يكون حضور


ويبقى الشعر .. للشعراء


نزلت من البيت مكسور
معييش في جيوبي الا قروش
وفطاري كان فول مجروش
وشوية بقدونس طازه
على وش القدره مرشوش
وانا نازل على سلم بيتنا
والهم ركبنا و حاوطنا
وانا بدعي افضل مستور
في دماغي مليون منشور
في مرور مقفول بالترباس
و الناس مالزحمة بتنداس
والواد والبت على الكوبري
بيحبوا في بعض بإحساس
والكل مطنش ولا همـّـه
مالناس مبقتش من الناس
ويقولك حريه و نور
من امتى و العيشه ساطور
وعلينا هيلف الدور
من بعد الشارع في ميدان
وشباب مترصص بردان
بينادي وف كل مكان
ويقول حريه يا سجّـان
دي بلادي باعوها يا جدعان
واتلم عليهم ميت عسكر
جايين من يجي الف معسكر
ومعاهم عصيان و بلاستر
بيكمم بق اللي ينادي
ويقول عايزينك يا بلادي
ترجعي من تاني لولادي
منظر هيغمك و يأثر
ويخلي خدودك دي تكشر
لكن في الآخر هتقصر
وتحاول تنسى اللي اتعكر
واهو يوم هيعدي وهيغور
في البوسطه انا قاعد قرفان
ما معاشي مستني الامضه
من واحد ملهوش عنوان
والطلب اللي بإيدي كتبته
بقه عنده في الدرج رهان
كالعاده نزلت على القهوه
و عم احمد جابلي الفنجان
قهوته بتعمر فدان
من صنف دماغي التعبان
و اليوم بيعدي يا جدعان
والختم في الدرج اتعان
والطلب اللي هيخلص بدري
قدامه في الدرج بيبان
مقفوله و الختم أمان
محتاج 100 اهيه .. بلا قفيه
و القفل قوام يبقى ما كان
وتقولي العجله ليه نايمه
وعايزنها ترجع و تدور
ورجعت البيت باللي عليه
ولا حتى في ايدي عسليـّـه
و مهيّـه بتجر مهـيّـه
والجيب مالفقر شمت فيـّـه
وتقولو فين الحريه
مش لما نلاقي التغذيه
ونبطل نشرب تقليـّه
من غير ما ندوق الملوخيه
ما هي روخره بقت غاليه عليـّه
وانضمت للقايمه اياها
محظوره تتاكل يا ولـيـّـه
ملعونه سنينك يا بهيـّه
من ساعت حكم الحراميه
وفلوسك بره معبيـّـه
ويقولو بلدنا مهـّـويه
والوزرا صبحوا آلاتيه
بيغنوا علينا يا وطنيه
ده كابوس محتاج اللي يثور
ويبطل يشهد بالزور
ويكمـّـل بالهبل الدور
وكفايا حقوقنا بيدوها
بالكيلو .. و محتاجه طابور

من ديوان : زنجولاويات

2006/06/21

قصاقيص زنجولاتيه

عمارة .. يعقوبيان
فيلم سينمائي ضخم .. لا يخلو من النزعات السياسية و الاجتماعيه و القلة أدبيه المعروفه عن الافلام المصرية في الفتره الاخيره .. يتوقع له النقاد في مصر ان يحوز على اعجاب الجمهور و الرضى السامي في مصر .. إلا أن كافة الممثلين .. و المؤلف و المخرج و المنتج العملاق ( أوي ) عماد الدين أديب .. لن يكفوا هذا الفيلم لينجح في حصد ( الملايين ) كما يتمنى المنتج الذي كلف الفيلم .. كتير أوي .. لأنه ببساطه .. لم يعرف لغة الملايين اللي بتيجي من الهوى .. و نسي أن عماره يعقوبيان لم تبنى باستخدام حديد .. عز الدخيله
----------------------------------------------------
كأس العالم
برغم كل السوء الذي تمر به مصر .. الا ان هذا الشعب .. الغلبان .. لم ينسى ان يسجل اعتراضه على تشفير مباريات كأس العالم .. و شرعت كل اسره مصريه في اعداد العده لشهر المونديال .. بدايه من استخدام وصلة الدش المسروقة .. إلى تركيب مستقبلات الاقمار الصناعيه الاوربيه ذات السبع فوائد .. و حتى نقل مقر اقامه الطلبة في امتحاناتهم الى المقاهي و النوادي لمشاهده المباريات .. و المذاكره برضه .. الأمر ميمنعشلكن هذا الشعب .. اللذيذ .. الذي استطاع التحايل على تشفير مباريات كأس العالم .. لم يستطع التحايل على تشفير كرسي رئاسه الجمهورية .. لكن ليس لمصلحه الشيخ صالح هذه المرة .. لكن لمصلحه الشيخ الطاهر رفع الله أجره و غفر ذنبه .. محدش يستغرب يا جماعه ربنا قادر على كل شيء .. المهم ان تشفيره كرسي الرئاسه ليس لها وصلة مضروبة .. و لا كرسي اوربي بديل .. فليخرج علينا جهابذة الالكترونيات بحل بديل لهذا الكرسي المشفر و انا معكم هاهنا منتظر .. الفرج يا عم فرج
----------------------------------------------------
انا مدمن انترنت
بمجرد امتناعي عن الانترنت لفترة وصلت للشهر .. احسست فيها باعراض انسحابيه فظيعه .. بدأت في شكل تآكل في صوابع الرجلين .. و زغلله في العنين .. و تقل في الدماغ .. لكن بمجرد مرور الاسبوعين الاوليين .. بدأت اتكيف مع الوضع .. و احسن اني ممكن فعلا اعيش بدون انترنت .. صحيح افتقدت الناس اللي كنت بتكلم معاها .. افتقدت التدوين .. تصفح المواقع اللي بحبها .. لكن ده ميمنعش ان البعد عن النت اداني فرصه اقرب فيها من صحابي اللي كنت فعلا نسيتهم .. ارجع فيها للشارع اللي كنت تقريبا نسيت احساس ارضيته و الرطوبة الملزقة في نسمته .. وبعد ان كنت اعتدت على الوضع من غير انترنت .. رجعت الدنيا اتقلبت مره تانيه .. و الكمبيوتر اتصلح .. و لقيت نفسي راجع مرة تانيه للإدمان .. لكن بجد اتعلمت درس .. حياتك فيها حاجات كتير حلوه .. متقتلهاش بالنت
----------------------------------------------------
بوس الواوا
هات المنديل .. و امسح البربور .. يالا يا واد يا عاشور
بربوري ملزق .. اجري و هات الساطور .. الليله للبربور
محدش يقرف و يقول ياي و جاي و الحركات دي .. الناس دلوقتي بتغني لكل حاجه .. واغنيه البربور انا براهن عليها للصيف الجاي .. الجو بقه ملزق و حر .. و الرطوبه في العالي .. و مفيش كرسي في مواصله ولا أكرة باب الا و عليها بعض اثار بربور زبون سابق آثر ان يترك لك ذكرى من ريحته .. و لأن الناس بتحب الاغاني اللي بتعبر على مشاكلها و حياتها .. فانا اتوقع نجاح ساحق ماحق لأغنيه البربور .. و لكن المشكله الحقيقية اني لسه مستني ظهور نطاطة حيط من اياهم علشان تغني الاغنيه بتاعتي .. و تكسر بيها الدنيا .. و تنزل بيها دموع الساده المشاهدين الما و حزنا على حالهم لما يشوفوا فتاة الاغنيه و هيه ماشيه تتنطط و بتجري من البربور .. و اتأكدوا ان نظرتي المبعديه لتصوير الاغنيه .. هيكون فيه تعبير بالصورة و الصوت عن البربور .. مش زي اغنيه بوس الواوا .. أح

2006/06/20

حلم صغنون

كم أتمنى أن أعود إلى الركض .. للأمام بغير توقف .. لا تجهدني أحزاني البائسه .. و أوصالي المتعبة .. ولا ينهكني قلبي الذي شارف على الاستلقاء بدون انتفاضه .. ولا تعكر صفوي قطرات العرق المتراكمه على وجهي .. كم أتمنى ان انطلق .. بدون هدف .. لا يوقفني عطشي .. ولا تعبي .. ولا أمر نسيت القيام به .. ولا شخص مضطر إلى مقابلته .. فقط أركض ... بدون توقف .. كم أتمنى أن أعود إلى الماضي .. طفلا يلعب .. لا يؤرقه أمر في الدنيا أكثر من عربته البلاستيكيه التي فقدت أحدى اطاراتها .. أو كرته التي مزقتها احدى تلك التسديدات القويه على سور الحديقة المجاورة
كم أتمنى أن اعود بقلبي صافيا .. لا يحمل في جوفه معنى الخبث .. الكذب ..الرياء .. كم أتمنى أن اعود به إلى حيث كان يجب أن يكون .. بلا حدود .. إلى حيث كانت موهبتي في الرسم و الكتابه .. محركا لطموحاتي .. و نهرا لا ينقطع لأحلامي .. كم أتمنى أن اعود إلى حيث كانت أمي هي المرأه الوحيده التي أعشقها في حياتي .. لم تعذبني كما فعلت فتاة قط .. ولم تقهر قلبي كما قهرني الحب في ريعان شبابي قط
كم أتمنى أن اعود إلى حيث كان الفعل يساوي الفعل .. وكان التصرف لا يحمل في طياته سوى معناه المباشر .. وكانت ايماءاتي و ضحكاتي لا تهدف إلى ما هو أبعد من مجرد إيماءة رضا .. او ضحكه سرور ... كم أتمنى أن اعود صافيا .. الى حيث لا يعود يشغلني من الكون سوى بسماته .. اشراقاته و تطلعاته .. إلى حيث كنت أرضى بلعبة .. و أنام قرير العين لمجرد أنني أديت واجباتي المدرسيه ... و اعددت ملابسي و حقيبتي ليوم دراسي جديد
كم أتمنى أن اعود خاليا من الهموم .. بعيدا عن الالام .. عن التجارب القاسيه و الوجود المُـتـعَـبة ... والأيادي المرتعشه .. كم أتمنى أن اعود بدون قلب .. بدوني أنا

2006/06/02

صـيّـح يا عم .. محدش واخد منها حاجه


عزيزي الشاب .. عزيزتي الشابه .. احترسوا من الهتافات في الشوارع .. فالشوارع الآن في حالة غليان .. تجعل الرصيف يرتعد خوفا ويقفز ليصرخ يا سعادة الباشا الضابط بيه .. الواد ده بيقول تحيا مصر .. اهه يا باشا .. اهه الواد اللي بيجري هناك ده .. فالكل متأهب حاليا لاصطيادك و ايداعك في احد السجون المتوفرة في ارجاء الجمهورية والحمدلله .. أو في أحد مستشفيات الأمراض النفسيه و العصبيه .. و في كل خير إن شاء الله ... وإذا هتفت .. فاعلم ان طريقك مسدود .. مسدود .. يا ولدي

فإذا قلت ( بحب مصر ) .. ستجد أيدي مخبري الأداب تحاصر قفاك في قسوه ليس لها مثيل .. وستجد نفسك معروضا على البيه ( مدير مكافحه الأداب ) بتهمه هتك عرض مصر العفيفه الشريفه .. و التصـيـيح بحبها في وسط الشارع والخلق والجماهير .. و حللـّي لما يبانلك صاحب .. او يجيبوا ابوها يشهد ان علاقتك بيها شرعيّه و سليمه .. أو لو عرفوا بقه يجيبوا المأذون اللي ربطك بيها رباط تاريخي لا تسجله عقود أو مواثيق .. ساعتها هتلاقي نفسك في سجن الرجال مع حسن تساليك .. و سيد مـُـكنه .. و ميشو برايز .. و هم أفضل عناصر ( القواديين ) الموجودين حاليا في عنابر الآداب بليمان طره .. أو هتلاقي نفسـِـك يا شابه مع ناديه بسرعه .. أو شوشو طرقعه .. أو سنـيه اللولبيه .. وطبعا دول غنيين عن التعريف .. لأنهم أفضل من يستخدم السراير في مصر .. كما ينبغي

أما إذا هتفت و قلت ( عايز حقي ) .. فهذا يعني أنك اشتراكي .. و أن التي شيرت الأحمر الذي صادف انك ترتديه وقت الهتاف .. هو خير دليل مادي على اشتراكيتك التي طفحت على هدومك .. و غرقتك .. وساعتها لن ينفعك الانكار .. لدرجه أن صلة النسب بينك و بين جيفارا ستبرز من خلال بطاقتك الشخصيه التي ستجدها تحمل اسم صلاح مصطفى جيفاره .. بدلا من صلاح مصطفى عماره .. وستجد نفسك بين أيدي ضباط امن الدوله في محاوله لتطهيرك من الاشتراكيه الأثمه التي تسيطر عليك .. وسيقومون باستخدام الخازوق لتطهيرك من اي اثار اشتراكيه قد تكون عالقه بك .. فاحذر منهم

والويل كل الويل لمن يهتف ( الله اكبر ) .. لأنك وقتها اكيد من الاخوان المسلمين .. لأنك لو مش منهم مكنتش افتكرت ربنا في ساعه مفترجه زي دي ومكنتش هتقول الله اكبر .. و ابقى قابلني لو اثبت العكس .. ساعتها سيتم نتف كل شعرة في جسمك بدايه من ذقنك و حتى .. شعر ودنك .. حتى لا تكون هناك أثر لذقن تخرج بها وسط الناس .. وربما يكونو ساعتها قد اهانوك كما يعتقدون .. ولا تنسى انك وقتها صرت اخوانجيا .. فلا بد من ان تذوق ويلات التعذيب .. يعني لا مانع من حجر على صدرك .. و تلاقي ضابط ابن *** واقف يقولك .. احد احد .. ويضحك .. وقتها ستتعجب .. وربما لن تفهم ابدا .. ماذا يريد او على ماذا يضحك .. و هو بلغ من الصفاقة ان يزدري بالدين .. لكن الاكيد انه هيسوق فيها و هيجيب سيف ( من بتاع البلطجيه ) و ينزل فيك تقطيع .. و يقول للعساكر في فخر وبلهجه عـنتريه شديده .. ادولووو سلااااااح

في ناس بتحب تهتف و تقول ( يسقط حسني مبارك ) .. وساعتها انت جاسوس اجنبي .. وجاي تقلب نظام الحكم .. و عربيات الموساد المصري .. اقصد المخابرات المصريه .. لن ترحمك .. ربما تدهسك قبل ان تعتقلك .. اصل دول ناس معندهاش رحمه ولا احساس .. لكن لو كان قلب السواق رهيف و غلبان .. فهيفضل انه ياخدك معاه في العربيه الى مبنى الموساد .. حيث ستعترف و بكل فخر بان الذي وزك على هذه العمله المطينه هو أبولهب .. و ان هتلر و موسيليني هما اللذان اعدا هذا الشعار البغيض الذي هتفت به .. و ربما تشهد في وسط هذه التحقيقات بمسؤوليتك المباشره عن أحداث 11 سبتمبر .. و تفجير مفاعل تشيرنوبل .. والاعداد لعملية اغتيال مارلين مونورو .. اما نصيحتي لك في مثل هذا الموقف .. فهو ان تعلن عن شخصيتك الحقيقية .. وتقول انك أمريكي ابن امريكي ... وأنك ابن اخت جورج بوش لزم ولكن من اخت غير شقيقه انجبها ابوه بوش الكبير من مغامره عاطفيه في حواري مانهاتن .. لأنك وقتها ستودع في سجن الاجانب .. الكائن في هيلتون رمسيس .. و سيتم الاعتناء بك خير عنايه .. حتى يصل السفير الامريكي لتسلمك .. وترحيلك إلى الوليـّـات المتحده .. و وقتها ابقى اعمل اللي انته عايزه .. المهم انك نفدت منهم

عزيزي الشاب .. عزيزتي الشابه .. هل ما زال عندكم نفس الاصرار للهتاف .. اذن نصيحه .. انا لا اعرفكم ولا تعرفوني

هيـّـه ناقصاك انت كمان ؟؟


الواحد كان ما صدق اننا خلصنا من قرف الدنمارك و الرسوم المقرفة اللي نشروها على الرسول (ًص) .. لكن يظهر ان القرف مكتوب علينا في كل حاجه .. لدرجه تخلي جريدة الأهرام القومية الوطنيه المحترمه من عهد نافع و حتى سرايا .. تتكرم و تتعطف علينا بإضافه رسومات الفنان الأهبل بهجوري إلى قائمه رسامي الكاريكاتير العاملين بها .. و ليتحـفـنا الفنان اياه برسمه ليس لها أي معنى او مدلول سوى ( قلة الأدب ) على صفحات جريده الأهرام في عدد 5 / أبريل / 2006 م .... الرسمه تمثل عبدالحليم حافظ بيغني الشعر الحرير على الخدود يهفهف ... بينما كل المستمعين من المحجبات الغاضبات .. غضب لا يحمل سوى معنى من اثنين .. يا إما غضبانين من كلامه لأنهم اتحجبوا .. و معناه ان الفنان الاهبل مش عاجبه المحجبات ... أو ان الغضب سببه انهم عايزين شعرهم يهفهف زي عبدالحليم ما بيقول .. و يبقى برضه فنان أهبل وعايز ضرب الجـ... ولا بلاش .. خلينا محترمين معاه للآخر
أنا شخصيا أرسلت رد ( ساخن جدا ) إلى جريدة الأهرام .. و تحديدا إلى بريد الاهرام حيث يمكن ان تجد شخص يرد عليك أو ينشر ردك .. و اتمنى ان يرسل غيري هذه الرسائل .. يمكن يلموا المدعوق على عينه بهجوري و يتاووه في اي داهيه .. و إلا هندخل في سكة مقاطعه الاهرام اللي هيه متقاطعه خلقه من الأول .. الواحد مش عارف والله يلاقيها منين ولا منين .. حاجه تقرف
لمراسلة جريدة الأهرام

2006/06/01

نـَـوّرت مـَــصْـر


اعزائي الركاب .. معكم قائد الطائرة الكابتن عزب خلف سبع الليل .. برجاء ربط أحزمة المقعد لأن الطائرة على وشك الهبوط في مطار القاهرة الدولي .. و شكرا
تن تم تن تم .. أيها الساده الركاب .. هذا اعلان مدفوع التكاليف من وزارة السياحه المصرية ... موسيقى هادئه .. ثم موسيقى راب .. ثم موسيقى هادئه .. ثم موسيقى أكشن .. ثم موسيقى رأفت الهجان .. ثم تظهر يسرا على الشاشه
يسرا : ياللي جاي تسيح على أرضنا .. و بتعشق رملنا .. وفلوسك دي لنا .. نورت احلى حتى ف العالم .. نورت مصرنا
موسيقي رأفت الهجان مرة أخرى .. ثم يظهر الشاب ابو ضحكه جنان .. الفنان .. حسين فهمي
حسين : على ارض مصر كلنا .. الفرحه تلمنا .. و فلوسكم همّـنا .. نورت مصرنا
وتعود الموسيقى مرة أخرى .. لتظهر مذيعه مزة من إياهم
المذيعة : أعزائي السواح .. عزيزاتي السائحات .. أهلا بيكم على أرض مصر .. و نرحب بكم في فعاليات مهرجان نورت مصر لعام 2006م .. فبرغم حالة السواد التي تعيشها مصر في الفتره الحاليه .. و برغم كل المعوقات التي قد تعيد لمصر نورها من جديد .. إلا أن أملنا كبير في أن تعيد لنا أموالكم و زيارتكم .. نور مصر من جديد
أعزائي السواح .. اننا الان على اعتاب مدينه القاهره .. نأسف لوجود عتمه منتشره في الاجواء .. ألا اننا نؤكد لكم انها سحابه صيف و هتعدي قوام .. انها بعد آثار عمليات البلطجه التي حدثت مؤخرا في العاصمه المصريه .. والتي ادت الى ضرب و سحل و تعذيب .. بعض المواطنين .. لكنها والحمدلله جت سليمه .. كما كان لوجود عدد كبير .. مهووول .. من عربات الامن المركزي باستمرار في مدينه القاهره اثره على وجود هذه السحابه المظلمه التي نتمنى ان تزول قريبا جدا جدا
تعليماتنا الاخيره لسيادتكم .. خلال تواجدكم داخل القاهره .. ممنوع منعا باتا حمل اي نوع من الكاميرات .. لوجود حساسيه منها لدى رجال الامن .. كما يمنع على اي شخص التجول في مجموعة تضم اكثر من 5 اشخاص و لذى فقد تقرر ان يكون الفوج السياحي على دفعات من 3 أشخاص فقط بينما سيبقى باقي الفوج في الاتوبيس لمشاهدة فيلم الكرنك حسب تعليمات الامن .. يمنع كذلك الاستفسار من اي ضابط على سبب ضربه لك بالقفا .. او تحرشه بالست اللي معاك .. لأن تلك اجراءات امن تابعه لقانون الطوارئ .. و الساده الضباط أدرى بها .. و هي تأتي من خلال خطة الدولة لفرفشة الضباط .. و اعلموا اعزائي الركاب انا ضرب القفا شفا .. و هنيالك يا فاعل الخير والثواب

تن تم تن تم .. أيها الساده الركاب .. برجاء التزام مقاعدكم .. ها نحن الان على وشك الهبوط على ارض المطار .. برجاء الاستعداد للتفتيش الوقائي الذي سيتم على متن الطائره .. على الساده الرجال .. خلع ملابسهم كامله ليقوم فريق التفتيش من الامن المركزي بإجراء تفتيش ذاتي من اللي متعودين عليه و الذي يشمل خدمات إضافيه مثل فحص فتحه الشرج و إجراء تدليك مجاني لكل الساده الركاب من الرجال .. كما نرجو من الساده الركاب من السيدات عدم خلع ملابسهم بأنفسهم لأن هذه وظيفه رجال التفتيش من الضباط شخصيا .. فلا تفقدوهم هذه المتعه
السادة الركاب .. أهلا بكم على أرض مصر .. و نورتوا مصر .. نورتوها صحيح يعني

Sharqawy Banner


من أغنيه ادهم الشرقاوي - عبدالحليم حافظ



Free to be used by any Blogger