2006/09/21

كلها ليلى .. و هتعدي

-
رمضان دايما فرصه لمحاسبه النفس .. و التجديد في العهد مع الله تعالى .. من هنا اقول .. ان الحياه يا ليلي لايمكن ان تكال بمكيالين .. مناسبه الكلام ده .. مش عارف .. هيه حاجه خطرت على بالي وحبيت اكتبها يمكن حد يفهمها .. و يفهمني .. اول لما صحيت و انا بقرأ الجرنان و بشرب شاي ايرل جراي .. اللي بيعدل الدماغ .. لقيت عنصر مهم جدا احنا ناسيينه
الساده الليلاويات الافاضل .. ماشيين يقولو الراجل كخه .. و الست مظلومه .. بما ان الموضوع فيه ظلم .. يبقى في مبدأ .. على اساسه وجدوا انهم يا عيني مظلومين .. نرجع للقانون .. اللي اسمه القرآن .. الشرع .. متهيألي هوه ده الدستور الأقوم و الاعدل على مستوى العالم .. يبقى نرجعله .. الاخوات الفاضلات .. عايزين الراجل يبقى نموذج اسلامي مشرف .. ميعاكسش في الشارع .. ميتعداش على حق الست في الاماكن العامه .. و بعد الجواز .. مطلوب انه يعاملها كويس و بالتي هي أحسن .. و المفروض انه ميخنقش عليها و ميقولهاش رايحه منين و جايه منين لأن في ثقه .. و المفروض انه لما يخلف يسيب بنته على حريتها و تتأخر بره زي ما هيه عايزه .. لأنها .. بنت .. و تعرف تحافظ على نفسها كويس .. كلام جميل .. وحقهم يقولو ما بدالهم
على الجهه المقابله الست ليلى .. مش عارف ليلى مين بصراحه .. مكلفتش نفسها انها تطرح نفس مبادئ الحريه دي على البنات .. مفكرتش تقول للبنت انها هيه كمان لازم تكون نموذج اسلامي .. يعني مفيش حاجه اسمها البس بودي و برمودا لأن دي حريه شخصيه و الراجل المفروض يلتزم .. مفيش حاجه اسمها اعمل ما بدالي لأن دي حريه شخصيه و الرجاله ملهومش دعوه .. مفيش حاجه اسمها ملبسش حجاب و الراجل يغض بصره .. مفيش حاجه اسمها انزل وقت مانا عايزه و ارجع وقت مانا عايزه لأني اعرف احافظ على نفسي .. مفيش حاجه اسمها اصاحب و اروح داي يوز مع الشله علشان انا بحب الفرفشه و انا محترمه و اهلي ربوني .. يعني .. لو الست عايزه الراجل يكون ماشي على الألف .. لازم هيه تمشي على الهمزه .. يعني .. مفيش حاجه اسمها الراجل يكون نموذج سوي .. و هيه تمشي على مزاجها .. يا إما المجتمع يكون صورة نموذجيه و سوي .. كل الناس فيه ماشيين حسب قانون واحد و دستور واحد .. يا إما كل واحد يعمل ما بداله .. و يمشي بالقانون اللي يريحه
انا مش بدافع عن السلوكيات الرجاليه الخاطئة .. لكن .. شويه عقل و منطق و مساواه .. ليه دايما شايفين الراجل غلطان و مقصر و رمرام و ذئب بشري و .... و محدش شايف البنات اليومين دول كاسيات عاريات .. ليه خطىء البنت حريه شخصيه .. بينما الراجل دايما في تصرفاته جلف .. عديم المسؤوليه و الاحساس .. العدل يا قوم .. مش طالب اكتر من كده
-
الخـلاصـــــــــــه
راجل محترم .. في مجتمع غير محترم .. نموذج لا يمكن يحصل .. و معادله غير قابله للتطبيق .. لأنها لما حصلت كان
هذا الرجل هو سيدنا محمد صلى الله عليه و سلم في وسط مكه بكفارها و منكراتها .. حتى الصحابه عاشوا في مجتمعات اسلاميه .. ومن جاء من بعدهم .. ده مش معناه انه مفيش رجاله ملتزمين .. لأ .. موجودين الحمدلله و ربنا يثبتهم كمان و كمان لأنهم بيحاولو على قد ما يقدروا يكونوا متلزمين .. و إن كنت اعيب على بعضهم الغلو في الالتزام و البعض الآخر يدعي الالتزام .. المهم ... اننا لما نعيش في عصر اصبحنا فيه اقرب الى مكه الجاهليه .. يعني جهر بالمعصيه .. يعني ديسكو تيك .. يعني مارينا و ما ادراك ما مارينا .. يعني محلات الخمور في كل مكان .. يعني رجال الامن بيحموا الفساد و الدعاره و المخدرات والسلاح .. يبقى معلش .. سيبوا الراجل في حاله .. و ابدؤوا بنفسكو .. لأن لو في امل الراجل يسمع من ليلى .. يبقى الامل اكبر ان ليلى الحرانه بتاعت البودي الاستوماك .. تسمع منكم اكتر
______________________________________
-
تحديث هام : زميله عزيزه .. و وزيره الصحه الفاضله في حركة كلابيز .. و المدونه الشقيه صاحبه الافكار المفرقعه جدا جدا .. قررت فجأه اعتزال التدوين .. أنا لا احب التدخل في قرارات الآخرين .. لكن ما دامت هي ذكرت أسبابها .. فمن حقي و حقكم ان تناقشوها في هذه الاسباب .. لذا فاني اطلب منكم ان تزوروا مدونتها و تقنعوها بالعدول عن هذه الفكره .. إنها زميلتنا شيريهان في مدونه أنا واللي حواليه

14 comments:

أحمد المصري said...

عندك حق 00لازم يبدأو بنفسهم واحنا نساعدهم على كده برضه أما عن من يتحدث عن الديمقراطية أو الحرية في أوروبا وأمريكا فهي كلمة واحدة قالها الإمام الشافعي رحمه الله:
إذا نطق السفيه فلا تجبه فخير من إجابته السكوت
فإن كلمته فرجت عنه وإن خليته كمدا يموت

Dr. Tantawy said...

ههههههه

تعليق جايب من الآخر

على فكره : انا حذفت فقره امريكا و اوربا لأني حسيت الموضوع بقى طويل .. و عموما اعتقد ان المعنى بتاعها مفهوم

شكرا يا باشا

R@niayusuf said...

زنجولا عندك حق فى كل اللى انت قلته
باستثناء ان احنا لما طالبنا الراجل
يلتزم بالشرع و الدين دى كانت خطوة أولى ( من وجهة نظرى) على طريق تقويم المجتمع و لو احنا اختلفنا
نبدأ بتقويم مين الأول الراجل و
الالمرأة يبقى عمر المجتمع رجالته و نسائه ما حيتعدل

المهم ان احنا نبدأ نعرف الصح و أكيد اللى طالبت الراجل انه يغض بصره مثلا مش هى المرأة أو الفتاة اللى بتلس لبس خليع لأنى أعتقد ان الفتاة اللى لابسة بادى مش حتفرق معاها كتير موضوع غض البصر دة خصوصا انها لابسة كدة علشان تجذب بصره !!!

ولى اقتراح ايه رأيك لو انت و مجموعة شباب من المدونين عملته يوم برضه من كل شهر تطالبه فيه ليلى الالتزام بما شرعه الله

يبقى بكدة ممكن نلاقى مجتمع بيساعد بعضه على الصحوة الدينية و الالتزام

و علشان تعرف بس ان احنا مش بنعادى الرجالة أنا حختم كلامى بنصيحة قالها الأستاذ عمرو خالد فى إحدى حلقات برنامجه " على خطى الحبيب " :كونى له خديجة ، يكون لك محمد

و صلى الله عليك يا سيدى يا رسول الله

عبدالله مفتاح said...

فنان يا زنجولا وكانك تتحدث بلساني

labido said...

فاصل ونواصل ....
كل سنة وانت طيب ياراجل ياطيب
ان شاء الله بعد رمضان اذا احيانا الله يكون هناك تعليق لكن دلوقتي.
اللهم تقبل منا ومنكم الطاعات
اللهم جنبنا فعل المنكرات
اللهم اجعلنا من عتقائك من النار ومن الفائزين بالجنات
اللهم آآآآميييين
اخوك عبدو

أحمد المصري said...

العفو 00لكن لاأعتقد أنه من الضروري حذف هذه الفقرة لأنها مهمة والموضوع ليس بالطويل لكن المعنى مفهوم0

sarah la tulipe rose said...

ما طبعا لازم تقولوا كدة لازم البنت دايما هي اللي تتصرف و تاخد حقعا بنفسها
يا جماعة بجد في فعلا كيلبمكيالين و ليه نحدد الحرية عليانها حرية اللبس و الاحترام باللبس بس؟ طبعا انا مابنكرش انه دة امر من ربنا و لازم البنات تمشي محترمة عشان الولاد يحترموهم لكن من غير خداع للنفس بنبأة لابسين حجاب و اخر احترام و برضةلازم نسمع كلام يسم البدن الموضوع مش موضوع لبس موضوع اخلاق موجودة او لا سواء كانت اللي قدامي بشورت و لا خمار الانسان بتعمامل مع العالم بشخصية واحدة هي شخصيته مش علي حسب اللي قدامه

Dr. Tantawy said...

** رانيه

كلامك حلو .. بس زي ما قلتي .. كوني خديجه يكن محمد .. المصيبه ان الستات مش عارفه انها هيه اساس كل حاجه حلوه او وحشه .. يعني الراجل لما يكون كويس .. معناه ان امه كانت كويسه قبل ما يكون ابوه كويس
الست هيه اللي بتربي بجد و بتعلم بجد يبقى الاولى الكلام يتوجه من ليلى المحروق دمها الى ليله ام دم بارد اللي مش هاممها حد
و اتحدى مجتمع تكون فيه الست حالها منصلح و يكون حواليها راجل فاسد .. لان الراجل ساعتها هيلاقي امه و اخته و زميلته و مراته و جارته محترمين .. مش هيجرؤا يعمل حاجه وحشه
الكلام لازم يوجه للاتنين .. راجل و ست .. وكفايه بقه نبره الراجل وحش و الراجل عايز الحرق

تحياتي :))) و رمضان كريم

-------------
** عبدالله مفتاح

قشطه يا باشا .. كلنا عبااااس هههه

-------------
** labido

انت محسسني اني فاتح كباريه ههههه
ربنا يتقبل منا جميعا انشاء الله

-------------
** احمد المصري

عموما لو حد حاول يكتب تعليق بخصوصها هرجع اضيفها تاني :) احنا مبيهمناش :)) بس انشاء الله الناس هنا عاقله ومحدش هيتطرق للنقاش في النقطه دي

-------------

tota said...

زنجولا العزيز

متفقة معاك فى الكثير مما وصفت

وتانى زى ما فى رجال ملتزمون كمان فى نساء ملتزمات
وخلينا نقول لما كل طرف من الاطراف عليه واجب يؤديه ولما بينقص الواجب بتاع اى منهم بيسود الفساد المجتمع
يعنى خروج البنات باللبس المعيب ده مش عيب ليلى بس ده عيب ادم والد ليلى اللى شافها خارجة كده ومعلمهاش ايه الصح وايه الغلط ده عيب مجتمع كامل بيتكون من ليلى وادم دورهم تربوى وتوجيهى بس محدش بيستخدمه لان كل واحد مشغول بالدنيا واللى فيها
ليلى لما طلبت يكون ليها كيان مكنش طلب غير عادل ومكنش طلب يخالف الشريعة والدين .ده بالاصح الاسلام هو اللى ادى كيان للمرأة اكتر من اى ديانة اخرى

ليلى طلبت مساعدة واحترام ادم طالما احنا فى مجتمع باتت فيه المشاركة المادية والمعنوية الزام على الطرفين
يعنى تسلط ادم وعنجهيته واستبداده برأيه وعدم مشاركته وتجاهله لاراء ليلى ما ينفعش وده مش وسيلة تعايش
ولكن وسيلة انتقام من المجتمع فى صورة ليلى

نعم المجتمع يسقط فى هوية سحيقة لا راجع عنها الا بالالتزام ومساعدة الطرفين وليس كل طرف على حدى

شكرا على هذا البوست الجميل كالمعتاد
تحياتى

Dr. Tantawy said...

يا ساره افهميني

انا برضه مش ببرر .. لكن بديكي مثال ..لما واحد مثلا في البيت بيتفرج على نانسي بعجر .. و بليل روبي .. وينزل يقابل واحده لابسه بودي و ميني جيب .. متوقعه انه يعمل ايه بعد كده :)) اقل حاجه انه عينه تزوغ على واحده عندها 100 سنه بعد كده :) مش بنت صغيره لابسه حجاب

انا كلامي واضح .. مينفعش المجتمع يكون نص نص .. لازم كل عناصره تكون كويسه يا ساره .. البنات تمشي على الشرع .. و الولاد كذلك .. ساعتها مفيش اي مبرر لأي حد انه يغلط .. فاهماني

انا لما اتكلمت على اللبس كنت بدي مثال .. مانا اتكلمت على الخروج لوقت متأخر و على التصرفات و الحاجات دي كلها .. انا بتكلم برضه على الاخلاق

ولأن اول طريق اصلاح الاخلاق هي عناصر المجتمهع .. يعني الراجل و الست .. يبقى الاولى ان كلام ( كلنا ليلى ) كان يبقى للبنات .. و بعد كده يبقوا يوجهوا كلامهم للرجال .. او على الاقل يتكلموا للاتنين بنفس الوقت .. ميبقاش بقه كل الهجووووم على الرجاله و بس

اتمنى يكون كلامي وصل

شكرا لتعليقك

Dr. Tantawy said...

** tota

ليلى الملتزمه موجوده و محدش انكر ده
انا كلامي محدد والله

المجتمع الصح .. هو مجتمع ادم و ليلى .. الاتنين .. يبقى الاولى بقه للناس اللي عملت ( كلنا ليلي ) ان كلامها يكون موججه لليلى اللي محتاجه توجيه .. قبل ما يبقى هجوم شرس على شخص الرجل .. و بعد لما ينجحوا مع ليلى اللي هيه من جنسهم .. يبقوا يحولو على الرجاله .. ويحاولوا معاهم .. فهمتيني ؟؟

بالنسبه للبس البنت .. انتي بنت و اكيد عارفه ان الاقرب للبنت دائما هي امها مش ابوها .. طبعا هوه برضه ليه دور في الموضوع ده .. بس للحق .. امها المسؤوله قبل ابوها .. المهم يعني .. الاتنين غلط .. و انا كل لما اتخيل ان واحده من بتوع الميني جيب دول هتبقى ام .. او واحد من بتوع الحظاظات و السبايكي.. هيبقى اب .. اعرف احنا هنشوف ايام عامله ازاي انشاء الله في المستقبل

ربنا يتوب علينا جميعا

وشكرا لتواجدك المستمر يا تووووووته
ومش هيأس اني افتح يوم الاقي عندك بلوج :) ماشي

We2am said...

momken tkon 7amlet kolona layla mesh monazama awe w feha mwaten da3f aw naqs..enma fekret ha sa7..l2nna fe3lan bye7sal m3ana 7agat kter gedan..ahlna mo3tabren enha asas el tarbya wel a7'ren mo3tabren enha 7a2ohom el tabe3e

Dr. Tantawy said...

ana mesh mo3tared

ANA kol e3trady en el 7amla ded el ragel 3ala toool elkhat :) w mafakaroosh yeshofo el banat ely 3yza 2at3 ra2abeha fel shaware3 :) ya rab yekon el ma3na wade7

thanks for your visti

Dr. Tantawy said...

الله اكبر .. ليلى المعارضه ظهرت يا مييينز
تحياتي يا دعاء .. لو حصل هجوم عليكي ولا حاجه بلغيني و انا هوصل الموضوع لأعلى المستويات ههههه

ربنا معاكي :) و صوم مقبول انشاءالله