2007/03/26

كيف تواجه التعديلات الدستوريه الحتميه


عزيزي المواطن الغلبان في كافه بقاع المحروسه .. هل سألت نفسك كيف ستواجه موجة التعديلات الدستوريه الحتميه القادمه .. طبعا السؤال لا يحتاج الى تفكير .. فالطرق القديمه لن تجدي نفعا .. المشمع على حبل الغسيل .. و تنشير الملابس الداخليه على الكراسي و الطاولات لن تصلح لهذه المره .. فالمسأله اكبر من ذلك .. و الرياح التغييريه قادمه لا محاله .. فإما ان تستعد كما يجب .. او تترك نفسك و اولادك و الطوفان ثالثكما
-
خدعوك فقالوا .. ان الليله ليلتك .. و ضرب النار للصبح .. و ان العريس للعروسه .. و التعديل للشعب .. و الاستفساء مسؤوليه المفسيين .. اقصد الناس المساكين .. وانا و انت .. و دقي يا مزيكا .. الليله خلصت يا عمده .. و الطبخه اتسبكت .. و الناس اتعشت و اتمزكت .. احتمال كبير يخلوك تمسح الطباق .. او تحف اللي باقي من بواقي اللي كلوا .. انما اكتر من كده انسى يا عمرو .. اجري جري الوحوش و غير رزقك لن تحوش .. حكومتك مضبطالك كل حاجه وواخده بالها من السقطه و اللقطه .. يبقى مفيش قلق .. و لا دموع بعد اليوم
-
الواقع بيقول .. انك لازم تضبط نفسك .. و تبدأ تتعامل مع الحياه بصدر رحب .. لان مفيش رحابه غير في صدرك .. خطواتك من حولك هتكون محسوبه عليك .. والدنيا زحمه يا دنيا زحمه .. زحمه مخبرين و عساكر .. زحمه ولا عدش رحمه .. مولد و صاحبه لابد .. يبقى نبدأ بالتعليمات .. خروج من البيت مفيش .. لان كل خطوه وراك مخبر .. و في اي لحظة ممكن تلاقي كف عسكري على قفاك او ايد ضابط في بنطلونك او شلوته على ظهرك .. واذا اضطريت تنزل .. فياريت متتكلمش في اسعار الخضار و اللحمه و الغلاء و التموين .. لانك كده بتخبط في الحلل و بتعك في الذات الرئاسيه العليا .. اللي هيه رئيس هيئه التموين و حاشيته .. طبعا مش محتاجه نباهه ان كل ما هو اعلى من ذلك ده من التابوهات يا حدق .. يعني حسك عينك تفكر ولو في سرك تجيب سيره وزير التموين ولا رئيس هيئه مراجيح السيده زينب .. اوعى يا مان .. البلد ملهاش امان .. وياريت يا حبيبي تبعد عن الحمير و سيره الحمير .. و اللي بيغنوا للحمير و اللي بيتريؤوا عاللي بيغنوا للحمير .. واخدلي بالك يا باشا
-
عزيزي المواطن .. انسى مبدأ كله بثوابه .. لان الحياه تغيرت .. و الحياه بقت .. كله بحسابه .. الكلمه و النفس و الحركه و الهمسه و اللمسه .. كله بحساب .. حتى النيه يا نور عيني بقت بحساب .. تليفوناتك هتكون شركه مساهمه مصريه ... و متعلقاتك الشخصيه هتبقى ورث عام للعالم الواصله المفتريه .. معدش فيه حرمات و لا محرمات .. كله هيكون قابل للدوس .. و انتي يا عيني عايش محبوس .. مختوم بالنسر و مفروس .. واحب اطمنك .. ان الحكومه بميت راجل .. و عمرها ما هترضى ان الشعب ده يتركب في يوم من الايام .. من اي كان .. عشان كده لبستنا الحزام .. و قفلت علينا القفل كمان .. و كل من عليها فان

2007/03/20

بحبك يا أمي

بحبك يا أمى
ولكنى قبل ما أقولك بحبك
حقولك مدين لك بألف اعتذار
حقولها لأنى تعبتك صحيح
لأنى ف حياتى مكنتش مريح
وصابره عليا وياما صبرتى
وشفتى وشايفه معايا المرار
وأنا لسه بحبى
حريصه عليه
تدفينى جامد
بشالك ف حضنك وكام بطانيه
وأعيط تقومى .. تجسى هدومى
واذا شفتى إنى عملت المصيبه
بتجرى وتانى تجيبى غيار
ومبتزهقيش
وأنا برضه عمرى معاكى مبزهق
ودايما تقومى تجيبى غيار
وبكبر شويه .. ولسانى تعبك
ودايما معاكى وراكى ف كعبك
ودايما بتكويلى لبسى يا ماما
ودايما ف لحظه بخليه ملعبك
ودايما أجيلك مقطع شرابى
مقطع قميصى وكام 100 زرار
وارخم عليكى واقولك هزار
وبكبر وبفهم .. ولسانى أرفك
مسمحانى عرفك
ولكن سبينى أقول اعتذارى بكل المعانى
لأنى بذنبى تجاهك بعانى
لإمتى تضحى وأفضل أنانى
دا ذنبى مبينى وبينك جدار
وكنت أما أغلط .. تحوشى أبويا
إذا جه عليا وزعق وثار
ودايما مساويه مبينى واخويا
ولا حد منا من التانى غار
وكنت أما أطلب مبسمعش كلمة يا ابني مفيش
ومن كتر تعبك معايا يا ماما ما بتتعبيش
وكنت اما اجوع .. تجيبى اللى احبه
تجيبيلى محشى ومانجه وخيار
عارفانى ماما بحب الخضار
ويوم عيد ملادك .. تجيبى هديه
تجيبيها إنتى .. وتديها ليه
وكنت اما أزعل .. تنسينى همى
وبعد اما انام .. تنامى يا أمى
وكنت اما أتعب .. تخليكى قربى
بطول الليالى وطول النهار
وكنت اما اسافر ف فسحه واغيب
حنينها إلى يشعلل لهيب
وقلقانه دايما وعايشه ف نار
ويوم امتحانى .. كأنه امتحانها
بتسهر معايا .. وتصحى معايا
ولما أصلى .. تجيب الفطار
وعارفين ف ماما بيعجبنى
إيه بيعجبنى فيها بساطة حياتها .. بساطة كلامها
بيعجبنى فيها حضارة خديجه
و"مريم" و"أسيا" .. طهارة مقامها
بتعجبنى فيها زهور الوقار
بيعجبنى كونها مطاوعه لأبويا
وكونها تساعده ف صنع القرار
أنا باختصار
بحبك يا أمى
-
-
special thanks for $$$

2007/03/15

كركركريكاتير

كفايه كتابه و كلام و رغي
نديها حبه رسم .. حبه فرفشه .. حبه استظراف و تقل دم
اللي عاجبه يضحك .. و اللي مش عاجبه يضحك برضه
احنا مش عايزين نزعل حد مننا
قانون الارهاب .. روح شاكيد .. الريس .. موريتانيا .. الشرطه .. الدستور .. الشعب .. منال .. شركة الاتصالات .. و أنا و انت .. و رقصني يا جدع
-
-














-
-
دمي تقيل .. طب وحيات اغلى حاجه عندك ما تقولها في وشي :) انا موافق تقولها من ورايا .. نـّم فيه براحتك بس .. استنى لما امشي .. متقولهاليش في وشي .. مش عارف لو تقولها ..هعمل ايه بعدها هههههه

2007/03/09

المنحوس منحوس

المنحوس منحوس .. و لو حطوا على راسه فانوس هههه .. كنت دايما اسمع المثل ده و مفهموش لحد لما دخلت طب .. و سنه ب سنه بدؤا رؤساء الاقسام يتغيروا للأسوء .. و الامتحانات تتغير للأصعب و الحياه تتغير للأغلى و الازحم .. و اخيرا فهمت معنى المثل ده .. لكن تخيلت لوهله انه بمجرد انتهاء الكليه ممكن اخد رست شويه من المنحوس ده و ارجع اكمل تاني مشوار النحس الابدي ههههه .. لكن واضح انه مفيش فايده .. ههههه
-


-
الاعلان ده وقع في ايدي بالصدفه البحته .. اه والله .. كان على بعد 30 ثانيه من انه يكون في صفيحه الزباله لولا انه لفت انتباهي و مسكته اشوف مكتوب فيه ايه و لقيت الاتي
-
تنظم صحيفه المصري اليوم مسابقه في فن الكاريكاتير و تدعو المواهب الفنيه الشابه للمشاركه بأعمالهم
-
شروط المسابقه :ـ
ـ تقديم 3 أعمال أصليه غير منشوره على النحو التالي
رسم عن حدث عالمي او عربي - رسم عن حدث محلي - رسم عن فكره او شخصيه مبتكره
ـ الا يزيد سن المتقدم عن 40 سنه
ـ الا يكون من رسامي الكاريكاتير المحترفين بالصحف
ـ اخر موعد لتقديم الاعمال 15 مارس 2007
-
جوائز المسابقه :ـ
الاول : 5000 جنيه
الثاني : 3000 جنيه
الثالث : 2000 جنيه
من الرابع و حتى العاشر : اشتراك سنه في المصري اليوم
-
ملاحظة :ـ
تخضع الاعمال المقدمه لتقييم من لجنه فنيه مشكله من كبار فناني الكاريكاتير في مصر و تنشر في حوارات مع اصحابها في الجريده
-
ارسال الاعمال :ـ
ترسل الى مقر الجريده في 11 ش جمال الدين ابو المحاسن - جاردن سيتي - القاهره
-
إلى هنا خلص الاعلان .. و بصراحه متتصوروش انا كنت عامل ازاي و انا بشوفه .. شويه اضحك و شويه اتنح ههههه .. سألتوني ليه .. هقولكوا .. اصل بصراحه .. الاعلان منشور من حوالي اسبوعين تلاته .. و لسه شايفه النهارده .. شفتوا الهنا .. المشكله التانيه بقه .. انهم كاتبين عمل محلي و دولي و مبتكر .. و محدش فاهم يعني ايه مبتكر .. و مفيش حد كبير اسأله هههه .. يعني تحس انهم حاطين العمل التالت ده للتصفيات النهائيه لكاس العالم للكاريكاتيريين هههه .. بلاش دي خد عندك المشكله التالته .. المفروض اجهز 3 اعمال في خلال يومين .. طب تيجي ازاي دي و انا كل يوم بليل عندي نباطشيه من بليل لحد تاني يوم الصبح .. بلاش .. خد عندك الافكس بقه ..المفروض اسجل بياناتي على الرسومات .. طب اكتب ايه .. اكتب طنطاوي خالد الذكر هههه بدون اي بيانات اخرى .. و ساعتها هيقلبوا الظرف بتاعي عند اقرب باسكت زباله ؟؟ ولا اكتب اسمي الحقيقي و اياكش تولع
مش بقولكوا المنحوس منحوس هههه .. عموما .. خيرها ف غيرها .. في ناس كبيره اوي اوي في البلد وعدتني بعقد عمل في موريتانيا كمان 5 سنين و يومين .. ف انشاء الله يوفوا بوعدهم و يسفروني بره .. اللهي ما توعى تطفح اللقمه ياللي في بالي
-
-
-
ملاحظة هامه :ـ
عـيّـل تايه يا ولاد الحلال .. مدونه شابه في سن المراهقه .. خرجت الى كليتها الصبح و قفلت باب المدونه .. و لحد دلوقتي محدش يعرف عنها حاجه .. لا رجعت ولا فتحت الباب .. و سايبه القفل موجود مكانه .. ياريت اللي يعرف يتقدم الى اقرب قسم شرطه او محل كشري و يدلي بأوصاف الفتاه يمكن نقدر نستدل على عنوانها
المخطوفه متوسطه الطول .. بيضاء اللون .. خفيفه الدم .. لاسعه الدماغ .. تحمل في يدها كلشر و نوفل .. وتحب اكل البيتزا بدون ما تعزم على حد .. و لا تحمل اي علامات مميزه سوى كيس مناديل فاضي في شنطتها .. اسمها منال ... برجاء الاتصال على طنطاوي في حال العثور عليها .. و شكرا

2007/03/03

بكره التاريخ .. يـلـطم علينا

-
كانوا دايما يقولوا .. التاريخ هيتكلم .. التاريخ بكره يحكي و يقول .. لكن يا ترى بعد ميت سنه .. و لا حتى ألف .. التاريخ هيقول علينا ايه .. انا شخصيا عندي اعتقاد قوي انه احتمال يعدد علينا .. و يلطم علي خيبتنا .. و احتمال اكبر انه يداري خيبتنا دي عن ولادنا و احفادنا .. و يلغي الفتره السوده دي من حساباته و كأنها لم تكن .. فتره الايام اللي مش سايبانا في حالنا .. بتاخدنا غدر على خوانه .. قسوه و ظلم و ذل .. و بتضرب في الكل .. و اللي يخاف و ميخافش حته بينداس
-
اقولك .. اجدادنا الغاليين اوي .. سابولنا ايه .. بصراحه مخلوش .. اثار فرعونيه ملهاش تمن .. تحنيط و بناء على اعلى مستوى .. فنون و طب و ثقافه و حرب و سياسه مفيش بعد كده ... جم اللي بعدهم .. عملوا ثورات هيتحكي عنها سنين .. حفروا القناه في الصخر .. بنوا السد العالي .. عمروا ارض مصر .. طلعوا نجيب محفوظ و صلاح جاهين و الابنودي .. لما حبوا يغنوا سابولنا عبدالحليم و ام كلثوم و سيد درويش و الشيخ امام .. لما حبوا يضحكونا سابولنا اسماعيل يس و الشاويش عطيه و القصري .. لما حبوا يكتبوا جرايد و مجلات .. سابولنا اهرام هيكل و اخبار آل أمين .. و روزاليوسف و صباح الخير برسوم جاهين ... حتى لما حبوا يهزوا وسطهم سابولنا سهير زكي .. في أيه اكتر من كده
-
احنا بقه سايبين لولادنا ايه .. لأ .. مش هظلم الجيل ده .. واقول اني هساويه باللي قبله .. الجيل اللي بقت كل حاجه متوفراله .. تقنيات بدون حدود .. و انفتاح يزيد عن مقدره اي لاعب جمباز .. و حريه تكاد تكون برغم محدوديتها اكثر مما حصل عليه الكثيرون ممن سبقونا .. و مع كده .. هنقول اننا ناس متخلفه و معرفتش تستغل كل ده .. خلينا زيهم يا عم مش هنزود .. هاااا .. عملنا ايه ؟؟ اقولك .. لما حبينا نسيب اثار .. سيبنا صوره عماد الكبير و الخابور .. سيبنا تمثال رمسيس اللي ماشي واقف يا ولداه من الميدان لحد المتحف في الصحراوي .. سيبنا متظاهرين بياخدوا بالجزمه .. و مليونيرات سارقين البلد .. و فراخ معدناش قادرين عليها .. بجد حاجه تفرح .. طيب بلاش .. ماحنا لما حبينا برضه نبقى مثقفين .. سبنالهم كرم جبر و ممتاز القط و اسامه سرايا و كريم عامر .. لأ لأ ... يا سلام علينا في الغنا بقه .. سبنالهم بوسي سمير و ماريا و روبي ... بس مقولكش على الفن بقه .. ييجي ايه اللي عملوه جنب خفه دم طلعت زكريا و قفشات ريكو و لا تراجيديا العملاق الكبير مدحت العدل .. بلاش .. قلنا نهلس زيهم .. جبنالهم احسن رقاصات مصر .. فيفي عبده ... بجد .. احنا سايبين ورانا خير .. ما بعده خير .. و تراث لو اتوزع على كتب التاريخ في العالم ده .. لحرقها جميعا و نحسها ليوم الدين
-
الحياه سوده في عينك .. و هتعيط .. لأ لأ .. إنشف شويه .. خلي عندك امل .. اصل ابني و ابنك بعد كام سنه .. هيقعد القعده دي مع ولاده .. و يحاول يشرحلهم مصر كان فيها ايه .. و ليه .. و يمكن يا ولداه يدخل معاهم على الانترنت .. اللي هيكون ساعتها بيتفتح من المخده اللي على السرير و يفتحلهم محرك بحث زي جوجل اللي هيبقى اسمه حنجل ساعتها .. و يدور في المواقع الاثريه زي بلوج سبوت .. و يطلع كام تدوينه عتيقه من بتوعك و يقعد يقول لولاده .. شوفوا شباب مصر .. أجدادكم الشرفاء .. كانوا بيعملوا ايه و بيقولوا ايه ... يا ترى مؤمن بكده .. و متخيل ان ممكن اللي بتكتبه دلوقتي ده يكون في يوم من الايام حكايه يحكيها واحد لولاده .. او تاريخ يدور فيه واحد من سلالتك دي .. يعرف بيه حقيقه ممكن كتب و دواوين متحكيهاش ... و متقولهاش
-
-