2006/09/07

زهـقـــت

زهقت من الهيافه
ليه نبقى مجبرين كل اسبوع نقرأ في الدستور موضوع كتباه واحده اسمها اميره حسن .. الحريه مسؤوليه يا بشر .. و مش كل واحد هيمسك قلم يبقى صحفي والمفروض يسمحله يكتب في مجله او جرنان .. اديني عقلك .. واحده مش فاضيه تكتب غير في ان البنت حره تلبس ما بدالها انشاءالله تنزل سلبوته .. يعني مالآخر بتقول للدين و التقاليد و الحياء و الذوق طز .. و تيجي في عدد الاسبوع ده تكتب عن الاندروير .. و كأننا يا ولداه معدش في حياتنا حاجه تعمل مشاكل غير الاندروير .. للي لسه مقراش موضوع الاسبوع ده بتاع السنيوره اميره .. هقوله باختصار .. الموضوع ينادي بالمساواه بين اندروير الرجل و المرأه .. غطوني و صوتواااا
-
زهقت من الحوادث
كل يوم حادثه قطار جديده .. و اتوبيسات .. و عبارات غرقت و اخرى على وشك الغرق .. انا اعتقد انه احسن حل نغير اسم مصر من جمهوريه مصر العربيه .. إلى مشرحه مصر الدمويه .. الحمدلله الخير كتير و الجثث عندنا للركب
-
زهقت من الدين التايك آواي
زهقي المره دي موجه ايضا إلى حواء .. نفسي افهم المبدأ اللي يخلي واحده محجبه تيجي ليله الفرح .. و قدام مئات المدعوين .. و تحت نظر كاميرات الفيديو و التصوير الفوتغرافي .. و تقلع الحجاب .. اديني عقلك انته ؟؟ يعني هيه فضلت ساتره نفسها و محترمه انسانيتها و دينها .. و تيجي ليلة الفرح تقلع الحجات و تديها رقص تحت مسمى ليله العمر .. ياخي تولع دي ليله اللي تخلي البني آدم يرمي دينه و مبادئه تحت رجليه و يرقص على واحده و نص .... ده غير طبعا ثقافه المصيف .. والمره دي الزهق مشاركه بين الولد و البنت .. يعني البنت الستوته الاموره المحترمه .. تيجي في المصيف و تلبس شورت و بودي .. لكن اللي بيعجبني انها بتحافظ على الحجاب فبتلبس كاب تغطي بيه شعرها و الله خير ما عملت .. وتقولك معلش يا عم الحج .. اهه مصيف بقه .. بحبحها متعرضهاش .. اما شبابنا اللي زي الفل .. تلاقي الواحد منهم غاضض بصره و ماشي على الصراط المستقيم لحد ما يجي المصيف .. الحال يبقى غير الحال و البصبصه على ودنه .. و يقولك معلش .. اهه مصيف .. خليك روش
-
زهقت من محاوله فهم حواء
ليه البنت اللي تحب .. تكون فعلا ملاك رقيق .. مليئة انوثه و رقه .. و لما تكره او تقلب عليك .. تبقى ولا الحانوتي اللي محروم من الشغل بقاله سنه و بيقول بسم الله و توكلنا على الله .. تسن سنانها و تبقى اكثر شراسه من سجاني ابو غريب .. يا ترى الموضوع ده مرتبط بالجينات ولا إيه بالضبط
-
زهقت من الافلام السكه
أصلي اعتبرت نفسي بني آدم و من حقي ارفه عن نفسي و ادخل سينما .. مجموعه افلام ما انزل الله بها من سلطان .. تبعث على القيء و الغثيان بشده .. و احتمال هبوط حاد في الدوره الدمويه يفضي الى موت .. وش اجرام .. فيلم بارد و ساذج إلى اقصى درجه .. كتكوت .. فعلا الكتكوت ابن البيضه .. ظاظا .. محاوله ساذجه لايجاد موضوع يلفت الانتباه .. جعلتني مجرما .. احمد حلمي بيحاول يشيل فيلم من الالف الى الياء .. أخيرا .. بعد دخول الافلام دي .. للأسف وجدت ان فيلم ظاظا .. برغم سآله هاني رمزي و تقل دمه .. يكاد يكون افضل فيلم فيهم .. لكن عامة .. افلام ترفع الضغط و تشرخ القلب الحزين

7 comments:

AHMAD said...

ايه يا عم طنطاوي

هدي اعصابك يا دوك

المدونه ممتازه يا باشا وربنا يوفقك في

امتحاناتك

عبدالله مفتاح said...

احييك يا زنجولا البوست رائع بداية بنقدك لاميرة حسن اللي انا كتبت بوست كامل في انها مسكينه صحفيه شابه مشتته الذهن معندهاش انتماء لاي حاجه
وبعدين جيت على الجرح يا زنجولا واتكلمت على الافراح اللي انا مش عايز اتكلم عليها من زمان
آآآآآآآآآآآآآآآآآه من الافراح
والله حاجه تزعل حين تنسى كل القيم والمبادئ ويكون الوسط هو سيد الموقف
ربنا يهدي

أحمد المصري said...

عندك حق في كل اللي قلته خاصة نقدك لحواء

أحمد المصري said...

عندك حق 0000000ربنا يهدي 00000بوست أجمل منالجمال ياباشا

Dr. Tantawy said...

متشكرين يا احمد باشا .. ده من ذوقك

shaimaa said...

ليه الهجوم الحاد ده و التجريح في صحفية شابة اعتقد اني قريت لها موضوعات جادة و كتابات تلمس القلب زي مثلا خليك في عمق الكادر الحياتي و اعتقد حتى موضوعها اللي قريته اللي انت خليته البنت تلبس اللي هي عايزاه مكنش قصدها فيه كده و حسب ما فهمت منه كقارئة انها عايزة توصل فكرة ان المظهر مش كل حاجة ..و بلاش دايما نحكم على البنت بانها لابسة قصير إذن هي منحرفة في حين انها ممكن تكون حد كويس ..مش شرط اشوف بنت لابسة اسدال فاقول عليها ملاك..الفكرة مش محاربة التدين و لا لاء للحجاب او اه للبس القصير ..الفكرة في قولبة الادراك اللي عند الناس..و اعتقد ان ده المفهوم اللي هي كانت عايزة توصله ..الي جانب ان حتى موضوع الأندر وير اللي حضرتك اتكلمت عنه و كأنه الموضوع الوحيد لها بيناقش فكرة برضة و هي لازم توصلها بطريقة مبسطة في إطار يناسب الصفحة اللي بتكتب فيها ..و اعتقد ان الفكرة ببساطة هي ان"الاندر وير " ده في الاخر مجرد لبس زيه زي اي قطعة اخرى من اللبس ..المشكلة فينا احنا ..و اللي بيجي في دماغنا اول ما بنشوف حاجة زي ديه او بنسمع اسمها ..طب ها اقولك حاجة تانية حد يقدر يقول مثلا ان "الجنس" عيب او حرام كده في المطلق ..لاء طبعا ..هو عيب او حرام في ظروف معينة ..يعني الفكرة اننا منحكمش على الاشياء كده في المطلق..و اعتقد برضة اني قريتلها موضوع عن عشق البيوت القديمة و حب منير و من ساعتها و انا غاوية البيوت القديمة لأنها اتكلمت عنها بأحساس ..و ف الاخر برضة اقولك ان ده رأيك و انا احترمة في حين أنك متديش لنفسك حق التجريح في حد أداك حرية الأختيار انك تقرا له أو لاء..اما بالنسبة للبنات اللي بتقلع الحجاب ساعة الفرح فربنا يوعدك ان شاء الله بواحدة متعملش كده..و الأفلام طبعا عندك حق تماما ..تجيب تخلف اساسا ..عشان كده بنصحك تدخل اجنبي احسن ..سوري اني طولت عليك .

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول