2006/07/18

لف و إرجع تاني

بيعدي علينا كتير من الاوقات .. بنحس فيها اننا قدمنا تنازلات كتيره .. و اضطرينا في معظم الاحيان اننا نساوم على حقوقنا .. برغم اننا عارفين انها حقوقنا احنا .. لكننا كنا بنتحمل .. والاحساس ده .. بالضعف .. وبضياع حقوقنا بيخلينا في ظروف كتير مبنعرفش نحدد الوقت المناسب للتراجع .. كلنا للأسف عندنا اصرار عجيب على تمسكنا بكل موقف أو فكره بنقولها .. وهو ده رد الفعل على احساسنا اللي قلنا عليه .. لدرجه تخليك مستعد تموت علشان فكره .. بس لمجرد انك تحس بالقوة و انك قادر على المحافظة على حقوقك
لو عايز تصدق كلامي .. حاول تفتكر تجربه مريت بيها .. وخصوصا لو تجربه تعلقك بشيء أو بشخص لا يمكن الحصول عليه أو الارتباط بيه .. و أحيانا بيظهر العناد ده في مواقف اقل اهميه .. يعني تخيل انك رايح محل تتفرج على هدوم ولقيت قميص عاجبك جدا .. لكن في واحد واقف وماسكه .. و بيتفرج عليه .. فالعاده هوه هيتفرج و يمشي .. لكن اول لما يلمح وقفتك .. و يعرف انك عاير القميص ده .. هيفضل واقف ساعه .. لمجرد انك انت عايز تشوفه انت كمان .. بيحاول يشبع احساسه بانه القوي و المسيطر على الموقف .. ونفس الموقف بيحصل في النقاشات العقيمه و الحوارات الطويله الممله بين الاطراف مختلفه الاتجاهات .. و النتيجه هتكون انسحاب اي من الاطراف تحت مبرر انعدام لغة الحوار
اعتقد ان السر الاساسي هنا .. هو تحديد الوقت المناسب للانسحاب .. ازاي تتراجع عن موقف انت مشارك فيه بطريقه مناسبه و تحافظ لك على مكانتك و في نفس الوقت متعملش اي حزازيات مع الاطراف الاخرى .. و الطريق ببساطه هي انك اولا .. اعمل اللي انته بتحبه و اتكلم باسلوبك .. وعن اهدافك .. بدون اي محاولات لمجاراة الطرف الاخر في ثقافته او افكاره .. لأنك لو حاولت تكتسب منه ( ثقافة موقف) .. هتفقدها بنفس سهولة اكتسابها .. وهتكون عرضه للضغط النفسي المستمر .. للقلق .. للتوتر .. والنتيجه هتكون مأسأة في شخصيتك و حياتك
مهم جدا انك تحدد طبيعه كل شخص بتتعامل معاه .. و متحاولش انك تتكلم في موضوع انت عارف انه بيعمله مشاكل او بيثيره .. لأنك ساعتها هتكون دخلت اللعبه و مفيش مجال بعد كده للتراجع .. وهتكون مضطر انك تناقش لآخر نفس .. و مع واحد مليان غضب او استفزاز من الموضوع ده .. قبل ما يكون مليان عقلانيه او منطقيه .. و ساعتها احتمال كبير انك تخسره أو انك تخسر صحتك
الحقيقه ان اكبر مشكله بتخليك دايما في صراعات .. هو انك متخيل نفسك هتصلح الكون .. وهتغير كل الخطايا .. و ان كل البشر اللي حواليك بيغلطوا وبما انك عارف ده .. فبتتصور انك تقدر تصلح الأخطاء دي .. لكن الموضوع ببساطه ان طريقه التدخل المستمر في حياة الآخر بيتخليه يوصل لمرحله عداء نفسي بينك و بينه .. بتخليه مترقب وجودك .. بيحاسبك على كل كلمه .. يتصيدلك أي هفوات .. و في المقابل انت بتكون تايه .. متحفز بكلام ممكن تكون مش مركز فيه .. كل هدفك انك تتغلب عليه .. و تزنقه في مقتل .. وتحاصره بأفكارك اللي هيه اصلا مش مرتبه .. علشان تتنصر عليه .. و تبدأ تتخيل ان كل كلمه بيقولها المقصود منها اهانتك والتقليل منك .. والنتيجه مشكله اكبر من اللي كنت جاي تحلها او تناقشها فيه
الخلاصه .. عايز ترتاح من وجع القلب و المشاكل .. ابعد عن الناس .. واعرف امتى تنسحب من اي نقاش .. بهدوء و في الوقت المناسب

4 comments:

DoOoOoOdY said...
This comment has been removed by a blog administrator.
DoOoOoOdY said...
This comment has been removed by a blog administrator.
Anonymous said...

ايه يا بنتى اللى رماكى على الناس الزباله دى
هيه دى اشكال تتعرفى عليها

ده شخص ملوش لازمه فى الحياه

Egiziana in US said...

As long as you follow the guidance of the Quran and Sunnah in dealing with people and have ekhlas in the neya of why you are doing what you are doing (that you are doing it to please Allah), then insha'Allah you will make a difference. A lot of people say "Oh, you want to fix the world"..well, why not? As the emerging generation that will one day (insha'Allah) be tomorrow's leaders we should always strive to be vocal, constructively critical and a positive force for change.