2006/07/13

الـفـرفـره .. هيه الحل

سمعت عن كلمة فرفره .. تعرف يعني ايه فرفر الرجل فرفره .. اكيد ملقتهاش في المعجم اللذيذ .. و متحاولش تقوم تدور عليها دلوقتي .. مش هتلاقيها .. مش علشان هيه كلمه مش كلمه .. لكن علشان الناس بتوع المعجم و القاموس مكانوش يعرفوا معنى الفرفره .. اكيد .. واحد قضى حياته بين الكلمات .. يدور على الكلمه و تصريفاتها و معانيها .. إزاي هتمر عليه كلمه فرفره أو هيفهم معناها ؟؟ .. ولا إزاي هيحس في لحظة انه عايز يفرفر .. إذا كان لاقي حاجه تشغله ويضيع عمره فيها ... أشك طبعا ان ده يحصل .. الفرفره دي اتعملت علشانا احنا .. علشان الشباب اللي اتولد لقى نفسه يعيش ( أزهى عصور الديمقراطيه و الرخاء ) .. اللي بيصحى الصبح ياكل العيش بمساميره .. و ينزل يقف ملطوع في الشمس مستني وسيله مواصلات شبه آدميه تاخده توصله لشغله او دراسته .. و هناك يكون مضطر يشتغل في ظروف لا تساعده على الانتاج او العمل نهائيا .. ينتهي به المطاف بضربه قفا من مخبر او شلوت من ضابط شرطه .. في طريقه عاديه جدا للاستجواب او حتى التحقق من شخصيته على اي ناصيه شارعهم .. تعود في النهايه لبيتك وتفاجأ انه مفيش كهربا .. و ان الميه قطعت بقالها جمعه .. و ان الجو زي ماحنا شايفينه حر .. ملزق .. رطب .. مقرف .. كل الدبان اللي في الشارع ساب الطريق باللي فيه و بقه يحلاله دلوقتي الدوران حوليك .. ولا كأنك ميدان طلعت حرب .. كله بيلف بسرعه و ثقه و بنغمه واحده كفيله بأنها تخليك متوتر .. مش يعني كفايه العرق و الريحه اللي تخنق .. لأ و كمان الدبان بيكملها .. هتلاقي نفسك في النهايه بتحلم بالفرفره .. بتقول يا مين ينولني شازلونج على شط البحر عدل .. ارمي نفسي عليه .. من غير ما حد ييجي يقولي فرسكااااااا .. و لا واحد ماسك في إيده شويه هلاهيل و عايز يلبسهوملي بالعافيه .. ساعتها بس .. هتكون فهمت يعني ايه فرفره .. و الناس تبص عليك و تقول شوفوا مفرفر ازاي

ـ يقال / فرفر الرجل ف هو مفرفر .. و ليس فرفور .. لأن الفرفور من تصريف فرّ .. بينما الفرفره من تصريف مفرفر .. لذا وجب التنويه
المصدر : المختصر اللذيذ .. في شرح المعاني والبهاريز

7 comments:

Nohaz said...

ana ga3na :(

Nohaz said...

مسمهاش فرفرة اسمها انتخة

انت ساقط عربي؟

Dr. Tantawy said...

لأ لأ .. الانتخه حاجه و الفرفرة حاجه .. كله مكتوب في المختصر اللذيذ

انتخ : من ماده نتخ .. انتخ يأنتخ فهو أنتيخ .. أي متكاسل عن العمل متكالب على الراحه

أما

فرفر : من ماده مفرفر .. فرفر يفرفر فهو مفرفر .. أي متراخي العضلات متثاقل الفلنكات مريـّـح

المصدر/ المختصر اللذيذ في شرح المعاني و البهاريز

Anonymous said...

جميل الموضوع ده ضحكنا شويه عن الموضوع اللي كان قبله .. أنا أي نعم حابه أفرفر أنا كمان .. بس يعني ايه شازلونج :) .. و شكرآ على الموضوع :)

Dr. Tantawy said...

الشازلونج في المختصر اللذيذ

الشازلونج : مـِـقـعَـدة طويله البروز .. مريحه للجلوس .. تريح اعصاب المتوتر و النرفوز

و في كتاب معاني العاميه للناس المعديه
الشازلونج .. بتاع طويل كده .. شبه الكرسي و السرير في نفس الوقت .. موجود على شواطئ المصايف الهاي كلاس و الكحيتي كمان .. و يعتبر احد السمات المشتركه بين مصيف جمصه و مصيف مارينا

Anonymous said...

أممممممممم .. برده أول مره أعرف معنى حاجه ..عرفته الوصف ده تقريبآ شفته في مسلسل ولا حاجه انما رؤية العين لا ..جميل المختصر ال>ي> ده .. و شكرآ :)على الرد

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول