2006/07/13

لو بطلنا نحلم .. أحسن

سألت نفسي كتير أوي .. ليه كل الناس بتقول مفيش مستحيل .. و اللي يتعب يلاقي و الكلام إياه ده .. مع ان الواحد بيقابل كل يوم كذا مستحيل جديد .. بياخدهم و يستفهم جنب اخواتهم في الدولاب .. و يخش ينام .. ويصحى تاني يوم على امل انه يحقق أي حاجه .. و ميزودش المستحيلات في دولابه لأنه فعلا إتملى جدا .. إدى فرصه للحشرات انها تتكاثر في دولابك و اوضتك في جو الكمكمه و تكاثرالمستحيلات في الدولاب .. و ادى فرصه لأهلك انهم يسمعوك كلمتين كل يوم عن النجاح والفشل و تحقيق الذات إلخ .. و إدى فرصه لصاحبك الاهبل إنه يتريق عليك لأنك لا منك اشتريت دماغك زيه و كبّـرت عن كل حاجه واستمتعت بحياتك الفاشله بدون انجازات .. و لا منك بتنجز حاجه .. كأنك بالضبط متعلق بين الاتنين .. لا طايل سما ولا أرض
هتقولي اكيد انت انجزت اي حاجه في حياتك .. هقولك آه .. لكن الداخل مش زي الخارج .. الطاقه المبذولة علشان الواحد يحقق حاجه صغيره جدا .. بتساوي الطاقه اللي بيبذلها غيرك في اي مكان في العالم علشان يصنـّع قنبله نووية .. يعني هوه هناك بيسهر و مش بينام ليل ويا نهار علشان يوصل لمعادله .. و انت هنا بتسهر ليل ويا نهار و مش بتنام علشان تدفع فاتورة التليفون .. و فالآخر كل واحد فيكم بيقف وهوه سعيد بانجازه .. هوه ماسك في ايده المعادله اللي وصلها و انت ماسك في ايدك فاتوره التليفون اللي دفعتها .. يبقى محدش يقولي احمد ربنا ان انته انجزت اي حاجه في حياتك و إلا ده يبقى اسمه تجني على الواقع .. و لعب في الابخات .. واقع من كآبته ممكن يخليني اسمع كلام صاحبي الأهبل إياه .. واكبر دماغي .. و انزل الف في الشوارع ليل و يا نهار .. اتسكع زي ما بيقولو .. و اخرج و الف و اتفسح و اعيش الدنيا .. طالما انا حارم نفسي من كل حاجه و في النهايه .. مفيش انجاز .. كله في الهوا
متستعجلش و تقولي يا انهزامي يا متحجر .. لأني لسه مخلصتش كلامي .. انا بحكيلك التطور الطبيعي للتفكير الانساني المحبط .. فالاول بتكون مش مقتنع بفكرتك .. و تبدأ تسمع من اللي حواليك .. و يبدؤا يأثروا فيك .. لكن في النهايه و الحمدلله بتوصل للي انت عايزه .. هتقولي ازاي .. هقولك .. الصوره اللي فوق دي
لقيت اخيرا تفسير يكاد يكون منطقي للي بيحصل .. الواحد مش عارف يحقق حلم من احلامه المستحيله .. زي ما في ناس عملت .. لأنه ببساطه مش عايز يعمل حاجه معملهاش قبل كده في سبيل انه يحصل على حاجه موصلهاش قبل كده ... القصه مش ألغاز .. لكن انت و انا و غيرنا .. عايزين نحقق المستحيل والاحلام اللي متكومه في الدواليب و المكاتب .. كل ده و احنا قاعدين في مكانا .. او واقفين في الطوابير مستنيين الفرج .. لو كل واحد فينا حاول انه يتعب بطريقه ايجابيه .. هيحقق المستحيل .. يعني .. مثلا .. بدل ما تروح تدفع فاتوره التليفون الساعه 11 ولا 12 .. و تقف تستنى في الطابور لحد الساعه 5 أو 6 .. و تقول انا تعبت و اتفرهدت .. اصحى بدري الساعه 7 او8 .. و انزل ادفعها بدري بدري ... المثال ده حاجه عبيطه علشان مديش مثال معقد في الاداره مثلا او تحقيق الاهداف .. الفكره اللي عايز اوصلها ان الواحد لو تعب نفسه زياده عن اللزوم في حاجه سلبيه .. عمره ما هيوصل .. لكن لو تعب نفسه بطريقه غير تقليديه .. و مختلفه عن كل الناس .. أكيد ساعتها هيوصل .. وهيحقق الحلم اللي نفسه فيه .. ومثال بسيط كمان .. و لسه حاصل معايا من فتره .. ان واحد صاحبي متخرج جديد و قاعد خالي شغل .. كلمني و قعد يعيط و يقول مفيش فايده و الحياه مقرفه و الديباجه اياها .. سألته حاولت تعمل ايه ؟ قالي انه فكر يعمل سايبر ( انترنت كافيه ) لكن الموضوع مكلف .. و دور على حاجه تانيه فعمل موقع الكتروني بغرض الكسب عن طريق التجاره .. حاجه ملعبكه وميفمهش فيها اصلا .. لكن التخبط بيخلي الواحد يعمل اكتر من كده .. المهم قعدنا فكرنا بعقل شويه .. و تعبنا .. لكن في الناحيه الايجابيه في الموضوع .. يعني بدل ما تفكر بسلبيه و تقعد تفكر ازاي تهديه و تخفف عنه و تقولو كلمتين حلوين :) .. فكر بايجابيه .. فكرنا في المجال اللي ممكن يتعلمه بصعوبه شويه لكن يحققله اهدافه .. ووصلنا لأنه يتعلم برنامج تصميم ( ثلاثي الابعاد) واللي محتاج مجهود جبار في تعلمه .. لكن النتيجه بعد ما يخلص انه شغله كتير جدا .. و مربح جدا .. و فعلا صاحبنا اتعلمه و بقى مصمم على مستوى عالي جدا دلوقتي .. الفكره .. ان الروتين اللي حواليه كان مديله تفكير محدود .. زي مالناس عملت اعمل .. يا إما تعمل سيبر أو موقع نت .. أو تقعد و تحط ايدك على خدك .. ولأن محدش قبله فكر يتعلم برنامج و يشتغل بيه .. يبقى الفكره دي بالنسبه له فاشله إلى ان يثبت العكس .. و اهه هوه بنفسه اثبت العكس .. و حقق حلم مستحيل بالنسبه له .. و هيتجوز قريب ان شاء الله .. و على الاقل .. شال واحده مستحيلات من الدولاب عنده .. و خفف العبئ اللي عليه شويه .. علشان كده بقول اننا لازم نبطل نحلم شويه .. و نحاول نفكر بعقلنا و نوصل .. و إلا .. الاحباط هياكلنا و هيقضى علينا واحد ورا التاني

9 comments:

DoOoOoOdY said...

البوست جامد جدا وعاجبنى اوى لانه بيعبر عن واقع.بس فيه حاجه غايزانى اوى فى البلوج بتاعك علم الزمالك اللى انت حطه اصلى اهلاووووووووووووويه جدا وبعدين الانتماء لنادى زى الزمالك مبقتش حاجه مشرفه

karakib said...

شكرا علي البوست ده أولا
ثانيا الكسل في شعبنا شيء متوارث و أعتقد ان السبب في طريقة التعليم السلبية التي تعلمنا كيف أحفظ المعلومة التي أمامي حتى موعد الامتحان لأحقق هدف معين بدلا من كيف أتعب و أبحث عن المعلومة التي أحتاج لها... و جدتي كانت تقول لي (النوم يجيب نوم)و صدقت في قولها تعلمنا الكسل في أفكارنا و عملنا و حياتنا كلها
و لكن الإنسان معذور لأن في الخارج هناك شيء يسمى أحترام المواطن ، احترام أدميته يوفره له مواصلات مريحة و علاج و مسكن و هناك شيء مهم جدا نادر في شعبنا شيء اسمه التقدير من يتعب يجد و من يذاكر ينجح كل شيء هناك له ثمن
عكس ما يحدث هنا !! هنا الكوسه و البطاطس و كل الخضار!! هنا الرشاوي و الوسائط يرسموا على وجهك الإحباط
فلا تلومنا كثيرا

antika

DoOoOoOdY said...

بصراحه احرجتنى عندك حق بس ده ما يمنعش انى بحب الاهلى برده.اعمل ايه بقى

DoOoOoOdY said...

والله انا اول مره اعرف موضوع تيم الزمالك العالمى ده بس برده الاهلى هو الاهلى فى اى مكان وفى اى زمان

Dr. Tantawy said...

* كراكيب
انا مش بلومك انت بس انا بلومنا كلنا :) برغم كل القرف اللي حولينا احنا مش اسؤا حالا من ديكتاتوريه الصين و مع كده اطورا لأنهم عايزين يتطورا .. انما احنا مش عايزين غير الاكل و النوم والفرجه على الافلام .. و دمتم

* dody

الزمالك هيفضل مدرسه :) و لو كره الحاقدون
اما الاهلي ده فله يوم اكيد يعني .. اصل ربنا ميرضاش بالظلم ابدا
المفروض انك في ثانويه عامه مش كده ؟ يعني مستنيه نتيجه .. الحقي اقلبي زملكاويه علشان ربنا يوفقك انشاء الله هههههه

DoOoOoOdY said...

انا عمرى ما اكون زملكاويه ابدا. واه انا مستنيه النتيجه ادعيلى لحسن انا مرعوبه

Anonymous said...

والله يعني اللي قبلنا عملوا ايه يعني مثلآ موضوع الشغل .. شوف انت كام واحد فتح محل ولا سايبر و لا أجهزه جوالات و ما مشيش الحال .. لما الواحد حش انه عمره ما في حاجه نافعه ولا ماشيه و لا حتى الوظايف راضيه تيجي الا طبعآ للناس اللي فوق ..لما الواحد والله حتى الأحلام بطلها ماعادش ليها لازمه .. بالظبط زي قناة أصول اللي الواحد لو عايز يتفرس يفتح عليها .. أحلام برده مستحيله من اللي هتتركن في الدولاب .. من الآخر .. فعلآ لو بطلنا نحلم أحسن .. و شكرآ على الموضوع جدآ ..:)

Dr. Tantawy said...

* dody

سيبيها على الله . انت مش امتحنتي وعملتي اللي عليكي . .خلاص الارزاق على الله ههههه


* anonymous

انا مقلتش نبطل نحلم .. وبس .. انا قلت نبطل نحلم يعني كفايه علينا احلام عملين نزودها كل يوم عن التاني .. ونبدأ نحقق الاحلام دي .. و زي ما قلتلك .. كل حاجه ممكن تتحقق بس المهم تعرف توصلها منين .. اديك انت قلت اللي فتح سيبر و موبايلات فشل .. لأنه ماشي على الموجه بيشوف الناس فتحت ايه و يعمل زيها .. في حاجه اسمها ارزاق .. و في حاجه اسمها اجتهاد .. ممكن يكو ن اجتهد بس ربنا مكتبلوش رزق .. و ممكن يكون متعبش نفسه و عمل زي كل الناس .. فطبيعي مياخدش وميكسبش زي ما هوه متوقع .. عايز تكسب و تنجح .. لازم تتميز عن الباقي

وشكلرا على مشاركتك

Anonymous said...

صحيح والله نرتب أحلامنا و نحاول نحققها واحد ورا التاني .. اللي يتحقق يبقى رضا من الله .. و اللي ما أتحققش يبقى مالوش نصيب وننقل على اللي بعده .. المهم نحاول و نجتهد و ننف> مش نحلم أحلام ورا أحلام و بس .. أتمنى أكون فهمت ووصلتني المعلومه صح .. و شكرآ على الرد :)