2006/07/02

إعلان وفــــــاة

في الصفحه الأخيره
بالبنط العريض
منشور الخبر
لله البقاء
وفي الموت العبر
بقيتوا خلاص يتامى
والمولى أمر
هتأدن جوامع
و تدّق الكنايس
تتعلق صور
راح تبكي الولايا
و تصوّت صبايا
من حكم القدر
ودموعهم يا عيني
راح تبقى مطر
راحت الليالي
ولا نورها يلالي
في الظلمه قمر
في الصفحه الأخيره
منشور الخبر
مصر.. تعيشوا انتو
اصحوا يا بشر
في الصفحه الاخيره
وبصوره كبيره
مكتوب البيان
من حاكم بلادكم
إلى شعبه الجبان
من خيرها غرفنا
و بنينا وصرفنا
و اهه عدى و كان
والليله بلدكم
قامت من الوجع
في عنيها فزع
طلعت بره تجري
بتخبط بيبان
و تقول الحقوني
مخنوقه .. سيبوني
ولا حدش يا عيني
باب بيته فتح
سبتوها وحيده
تترجى الحيطان
تشكي للزمان
من قسوه ضناها
من ذل و هوان
و في الصفحه الاخيره
ينزل الخبر
مصر تعيشوا انتو
مبروك يا بشر

1 comment:

Anonymous said...

مبروك يا زنجولا باشا على البلوج الحلو دا

وأنا دايما بنشر ما في البلوج لكل أصدقائي حول العالم

و
كمل طريقك واحنا وراك

501