2006/08/14

Tag !!

مؤتمر صحفي لرئيس الوزراء د. زنجولا و وزير الدفاع م. نوران
-------------------------------------------------------------------
-
وزير الدفاع : هل انت راض عن مدونتك شكلا وموضوعا
رئيس الوزراء : رضاي عن مدونتي معناه انها حققت الهدف منها .. و انا من اول يوم كتبت فيه المدونه كان هدفي هو ترتيب افكاري اللي بتكون دايما عامله زحمه في دماغي مش عارف ازاي اخرجها و مش عارف ازاي اوظفها صح .. بحب الرسم و كتابه الشعر و كتابه التعليقات السياسيه .. و كل ده مكنش ممكن يظهر في شكل منسق إلا من خلال مدونة أو موقع .. و ده اللي حصل دلوقتي .. وطالما بقيت قادر اني اكتب و ارتب افكاري و احول الطاقه اللي في دماغي الى مواضيع و تدوينات .. يبقى مدونتي حققت الهدف اللي كنت عايزه منها
-
وزير الدفاع : هل تعلم اسرتك الصغيرة بأمر مدونتك
رئيس الوزراء : عارفين .. و بيتفرجوا عليها من وقت لأخر .. لكن الحقيقه مش واخده اهتمام منهم .. او مش موضوع حوار يومي يعني .. هيه مجرد ان ابنهم بيكتب حاجات تودي في داهيه عالنت و خلاص .. وطبعا الامر لا يخلو من نصيحه بترك الليله دي كل فتره
-
وزير الدفاع : هل تجد حرجا ف ان تخبر صديقا عن مدونتك
رئيس الوزراء : انا مش بكتب تدوينات شخصيه كمعظم المدونين علشان اتكسف .. انا موضوعاتي غالبا موضوعات عامه .. و علشان كده مش عندي اي مشكله ان حد ياخد الموقع لكن الفكره انه اصدقائي من خارج وسط الانترنت هم اطباء للغايه .. لا يشغلهم النت و سنينه .. و لا تشكل السياسه اي جزء من حياتهم
-
وزير الدفاع : هل تعتبرها امرا خاصا
رئيس الوزراء : سبق و رديت على هذا السؤال
-
وزير الدفاع : هل تسبب المدونات بتغير ايجابي لافكارك؟اعطني مثال ف حالة نعم
رئيس الوزراء : حدث ذلك في مرات عديده .. يعني من وجهة النظر السياسيه المدونات غيرت وجهة نظري في حركات مثل كفايه و الاخوان و غيرهم .. لما كنت بتابع التحركات اللي بتحصل اول بأول من خلال مواقع زي الوعي المصري و نورا يونس .. المدونات غيرت وجهة نظري الفنيه .. لما لقيت ان كل ما ارسمه و اقدمه .. و اللي كان يعتبر في وسط المحيطين بي معجزات .. هو لاشيء من افكار شباب كتير شفت اعمالهم على الانترنت .. ناس فعلا موهوبه .. ناس تخليكي عايزه تغيري .. تتطوري .. وتجددي من نفسك .. المدونات غيرت وجهة نظري اجتماعيا في تعاملاتي مع الناس .. في اني كنت دايما بتدلق على اي شخص و اطلب صداقته .. في حيث ان ناس كتير متستاهلش انك تطلبي منهم ده .. بالعكس في لحظة ممكن تكتشفي انهم كانوا بيحاولوا يأذوكي بدون ما تشعري
-
وزير الدفاع : هل تكتفي بفتح صفحات من يعقبوك بردود ف مدونتك ام تسع لاكتشاف المزيد
رئيس الوزراء : لأ طبعا .. و الدليل اني فتحت مواقع رائعه زي سوسه المفروسه .. ابيتاف .. هاشم .. و غيرها من غير سابق معرفه بالاشخاص دول .. و يمكن ان وجودي في مدوانتهم هوه اللي خلاهم في يوم من الايام ضيوف عليه في مدونتي
-
وزير الدفاع : ماذا يعني الك عدد الزوار ...هل تهتم بوضعه
رئيس الوزراء : مش هكدب عليكي في أول يوم من المدونه .. كنت بدور بهستيريا على عداد للموقع .. كنت مهتم جدا اعرف كام واحد بيدخل كل يوم .. و كام واحد منهم بيسيب تعليقات و غيره .. لكن شويه شويه .. رجعت للهدف الاساسي من الموقع زي ما قلت قبل كده .. انا بكتب لنفسي .. لا يهمني عدد الزوار بقدر ما يهمني ان كل ما اكتبه يكون هوه انا .. شخصيتي بدون رتوش .. بدون حساب لأحد .. أو خوف من سلطه او قوة اخرى
-
وزير الدفاع : هل حاولت تخيل شكل اصدقائك المدونين
رئيس الوزراء : ههههههههه .. سؤال تحفه جدا .. لأني فعلا حاولت كتير اتخيل ناس من اللي بكلمهم .. بس مش هضحك عليكي .. اصبح لدي قناعه غريبه .. بأن اي مدون او مدونه من العباقره .. او من المؤثرين .. لن انتظر ان اجد امامي عمر الشريف او سعاد حسني .. بقى عندي شبه تأكيد على ان المبدع غالبا .. شخص قبيح .. منظره مفشكل .. يعني .. بقيت اربط دايما بين التميز الخارق للعاده و بين ضعف في الصفات الجسديه و الشكليه .. مقارنه ساذجه انا عارف .. لكن الموضوع بقه عندي كده ..
على سبيل المثال .. تخيلت ان مجموعه كلابيز من اجل التغيير .. هم كلهم من الشباب الكلبوز .. اللي بيعرق بسبب و بدون سبب .. اللي ميقدرش يقعد على النت من غير مج في ايده .. و كيس شبسي .. او شوكلاته سايحه عمال يلحس فيها ليل و نهار
-
وزير الدفاع : هل ترى فائدة حقيقية للتدوين
رئيس الوزراء : بالنسبه ليه انا شخصيا .. زي ما قلت ... حققتلي الفائده المرجوه منه .. أما بالنسبه للتدوين عامه .. فهو عالم مستقل بذاته .. له كثير من المميزات و العيوب
-
وزير الدفاع : هل تشعر ان مجتمع المدونين مجتمع منفصل عن العالم المحيط بك ام متفاعل مع احداثه
رئيس الوزراء : هوه صوره مصغره منه .. نفس التجربه المصريه .. ناس متفاعله .. لكن جواهم الشخصيه المصريه اللي بتشوفيها في اي مكان .. نفس المشكلات و الاستفزازات
-
وزير الدفاع : هل يزعجك وجود نقد ف مدونتك ام تعتبره ظاهرة صحية
رئيس الوزراء : انا اعشق النقد .. و اكره الجدال .. ده باختصار شعوري اتجاه الكومنتات الموجوده
-
وزير الدفاع : هل تخاف من بعض المدونات السياسية وتتحاشها؟ هل صدمك اعتقال بعض المدونين؟
رئيس الوزراء : هههههههههههههه .. لا تعليق .. ابتسم .. أنت مع زنجولا
-
وزير الدفاع : هل فكرت بمصير مدونتك حال وفاتك
رئيس الوزراء : ههههههههههه .. محدش يعرف الباسوورد .. لكن في شات بوكس .. يعني اكيد واحد بن حلال من صحابي هيعدي و يكتب الخبر .. و الفاتحه هتبقى منكم بقه
-
وزير الدفاع : تحب تسمع أغنية إيه- بلاش صيغة آمال فهمى دى - ما الاغنية التى تحب وضع اللينك الخاص بها فى مدونتك
رئيس الوزراء : بعيدا عن السياسه و القلق .. احب اسمع اغنيه جنات .. بحبك .. ههههه
-
وزير الدفاع : اكتب اسماء خمسة تمرر ليهم الدور
ـ1ـ اسرتي التدوينيه : نهى - عبدالله - ناصح
ـ2ـ وزراء كلابيز من اجل التغيير : معروفين
ـ3ـ من خارج مصر : بي بي - ايجزيانا
ـ4ـ من داخل مصر : بنت مصريه - ابيتاف
ـ5ـ واحد صاحبي متعرفيهوش

7 comments:

Sampateek said...

و هكذا سيداتي انساتي سادتي
كان هذا اللقاء المنتظر من رئيس الوزراء السيد زنجولا
و الذي اشجي به مسامعنا
و العاقبة عندكم في المسرات
بس ملكش حق يا ريس
انا مش بمسك شوكولاتة سايحة و باكو شيبسي و انا علي البي سي
كل ما في الامر
طبق عنب و جوافة و اللذي منه
ابقي سلملي علي صحبك اللي معرفوش
خالص تحياتي

Anonymous said...

السلام عليكم و رحمة الله و بركاته,
أنا قررت أن أبعت لك هذا الكومنت بعد احساس غريب وصلي أثناء قرأة أخر سؤالين بالذات (و يا رب يكون غلط)
أن يا د.زنجولا ناوي على نية معينة.
لذلك أرجوك أن تستمر في حياتك بالشكل الذي تراه مناسبا لك و ليس للأخرين...
أنا بجد من أحد المعجبين بيك و بطريقتك العفوية المصرية..
keep on keep on keep on


DR.KRONBA

Nouran said...

هما كل الاهالي كده محسسني ان كلامنا هو اللي هيخوف الحكومة ويودونا ورا الشمس -فين ورا الشمس ده-
هما كل ده خمسة ولا علشان انت رئيس الوزرا يعني ههههه
لا بس ردود فخمتك ردود جامدة تليق برئيس وزراء جامد ونظيف - طبعا مش احمد نظيف-

ناصح أمين said...

حوار جميل جدا"
بس مشكلتنا فعلا" ان احنا بناخد كل حاجه بتهريج
عايزين فعلا" نطبق الوزاره فعلا" وكل واحد يحط خطة عمل لكل وزاره
يمكن حد من المسؤولين يقرا كلامنا وينفذه ونكون صلحنا بلادنا بطريق غير مباشر
وعايز أعرف ازاي هنعرض خطة العمل مع بعض

عبدالله مفتاح said...

حوار جامد جدا يا زنجولا
ممكن اطلب طلب
عايز اعمل حوار معاك
ممكن؟

Dr. Tantawy said...

** كلبوزة

خلي الفاكهه تنفعك ههههه يا بنتي لازم تتعلمي طالما كده كده هتتخني .. اتخني بحاجه تستمتعي بيها :)) شوكلاته و حاجات حلوه مش تقوليلي فاكهه و جوافه

** anonymous

انا اسير بالشكل الذي يناسبني في جميع الحالات انشاءالله


** Nouran

دايما يا بنتي الاهالي مش حاسين بالواحد كده ههههه نعمل ايه بس .. بكره لما نبقى وزرا بجد يرجعوا يهيصوا بينا .. مين عاارف


** ناصح

انا فعلا مش بهرج و بحاول اتعامل بجد .. لكن في حاجات اسمها حكم التاج :) يعني طالما الاسئله في بطانها كوميديه لازم برضه تجاري الجو احيانا .. لكن المضمون موجود في قلب الاجابات :) و الحدق يفهم


* عبدالله

يا عم انا تحت امرك .. لو في اي حاجه الايميل موجود ابعتلي اي حاجه و انا هرد علطول .. المشكله عندي في المسنجرات لسه موجوده لكن الايميل موجود وبدخل عليه يوميا
نورتنا

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول