2006/08/21

للبيع يا مصري

إضغط الصوره للتكبير
-
للبيع .. موطن مصري .. فرصه العمر للمستثمرين .. بمبلغ خيالي .. مواطن مصري مقابل 5000 جنيه فقط .. يعني مالآخر محصلش شكمان عربيه مرسيدس من اللي بيركبها اي زير من وزارة نظيف .. للدرجه دي بقينا رخاص في بلدنا .. و الحكومه شايفه ان روح المواطن المصري اللي ركب القطار علشان يروح شغله الساعه 6 صباحا .. و أكيد كان نايم في كرسيه .. مش مخون حكومته .. و لا عمره فكر ان نهايته تكون بطريقه بشعه زي اللي حصلت في قطار قليوب .. والحكومه هتقولك هنعمل لجنه منبثقه من لجنه منبثقه عن لجنه للكشف عن ظروف الحادث المسخره .. عموما الناس ماتت و بعد تزاحم الاخبارهتيجي الحكومه تصرف لأهله بعد ما يموت 5000 جنيه مصري .. إيه رايك ؟؟ بصراحه .. يا بلاش .. على كده الـ70 مليون مواطن مصري يساووا حوالي 350 مليار جنيه .. يعني حاجه تفرح .. ممكن واحد زي نجيب سويرس يدوس الشعب المصري كله بعربيته و يدفع ديتهم 350 مليار جنيه .. ياااا بلاااااش . عموما .. نصيحه للي ناوي يموت بعد كده .. يركب عباره احسن له .. على الاقل هياخد 20 ألف جنيه .. بدل الـ5000 اللي مش جايبين همهم .. و اهي موته ولا اكتر .. ما هي دي التسعيره الجديده للمصريين .. و لسه بانتظار المزيد من الاخبار اللي تحرق الدم .. يعني كلها كام يوم و ييجي اونكل بوش يقولك ان المخابرات الامريكيه سمعت سواق القطار التاني بيقول في سره لا إله الا الله .. و انه ارهابي ابن ارهابي ... و بكره بابا مبارك ييجي يقولنا : صدقتوا ان القطارات محتاجه تعديلات و ان الزيادات اللي حصلت في التذاكر مش كفايه .. يبقى لازم نخصخص السكه الحديد .. و فلان الفلاني اللي هيسكب في المزاد يا ولاد الكلب و ان كان عاجبكم .. و كله علشانك يا مصر
-
للبيع .. هضبه الجولان .. د/ محمود جامع .. الطبيب صديق السادات .. قال انه سمع السادات بيقول ان الجولان اتباعت في عهد حافظ الاسد .. لصالح الاسرائيليين مقابل انسحاب قواته بدون معارك .. ولأني اعرف د/ جامع .. فأشك انه يكون مختلا .. كما ستبادر مصر إلى الاعلان قريبا لتجنب اي مشاكل مع الاخوه السوريين .. و الله اعلم .. مين تاني باع ايه .. او هيبيع ايه
-
وزارة جديده .. اقترح انشاءها في مصر .. اسمها وزاره الدفن و الجنازات .. والحمدلله ربنا مبتلينا بحوادث زي الرز .. اشي طيارات و عبارات و قطارات و سيارات ومسارح و مستشفيات .. من كله .. و على عينك يا تاجر .. و الحكومه لأول مره في حادث قطار قليوب الحالي .. تعلن رسميا تكفلها بمصاريف الدفن و الجنازات لشهداء الحادث .. بصراحه .. قشطه يا ريس

11 comments:

sahar said...

احنا ارخص مما تتخيل بس انا مش حارقني إلا ان بلادنا معاها فلوس بس منهوبةوالدليل علي كدة السته مليون جنيه عشان ينقلوا رمسيس طب بزمتك مش الاحياء ابقي من الميت وبمعني اصح الصنم ولا المية اللي بقالها اسببوعين مازارتناش في بيتنا ومستنيين معونه عشان يجيبوهلنا هاقول ايه ولا ايه حسبنا الله ونعم الوكيل وكفايه بقي احسن هاغلط واروح في داهية

sahar said...

نسيت اشكرك علي عرضك الاستشارة الطبية وهاقولك المساله بالظبط لاني الصراحة محتارة اعمل لعمر عملية الفتاق ولا لا دكتور قاللي لازم تتعمل حالاًقبل مايكبر وتذيد والتاني قاللي حرام تدخلي الولد اوضة العمليات دلوقت وهاسال دكتور جراح تالت عشان اطمن

Sampateek said...

البوست ده لسه طازة و بنار الحدث
الميت بخمس الاف و المصاب بالف
يا بلاش
لا بلاش احسن
العزيزة سهر
العملية بسيطة و يستحسن ان تتم الان قبل ان تظهر مضاعفات
و لا تقلقي خير ان شاء الله
اشوف وشكم بخير

مـحـمـد مـفـيـد said...

اعتقد ان كل حاجه عندنا في مصر للبيع حتي الانسان فلا تتعجب

Dr. Tantawy said...

6 مليون لنقل تمثال رمسيس

و 17 مليار تمن رخصه شركة الموبايل

و فالآخر .. البلد بتشحت


سهر .. الفتاق لازم يتعمل .. و يستحسن بدري علشان متظهرش مصاعفات و بعدين لما يبقى صغير احسن علشان الجرح يقفل قبل ما يبتدي يتحرك ويعمل قلق :)) عموما عندك جراحين كتير جدا جدا ممكن تروحيلهم و خصوصا دكاتره القصر العيني
بالتوفيق داااااااائما

أحمد said...

[ مختارات من عالم المدونات ]

http://www.rewayatnet.net/forum/sho
wthread.php?p=425578#post425578

tota said...

يا زنجولا العزيز
كتر خير الحكومة هتدفنهم على حسابها المفروض نفرح بالخطوة الايجابية دى ونطمن اننا لما هنموت موتة سودة كدة هنلاقى حد يدفنا مش احسن ما نترمى فى الطل لكلاب السكك
دلوقتى اقدر اموت وانا مطمنة
احمدك يا رب واشكر فضلك وميرسى لكل من شارك فى هذا القرار الجرئ
قرار قتل وغسل ودفن المواطن المصرى

تحياتى وشكرا على التفاعل مع الاحداث على الاقل لسه فى ناس مش ميتة

Anonymous said...

الحقيقة مؤلمة والمناظر تقطع القلب زي ما تقطعت الجثث في قطار الموت بس هنقول ايه غير حسبنا الله ونعم الوكيل رغم ان مليش حد في قطار الموت ولا عبارة السلام الا اني مصري بحزن على ضياع هيبتنا وكرامتنا بس هقول ايه بلد كامله بكل خيراتها بتتسرق من اكثر من 7000 سنة ولسه المواطن لاقي ياكل والله عمار يا مصر
بالمناسبة انا حوشت في غربتي حوالي 15000 جنيه ممكن تشوفولي 3 اقتلهم

The Egyptian Falcon said...

هي المسخرة وقلة القيمة في الحادثة دي وبس؟ والا حتى حوادث الإهمال الجسيم وبس؟ اللي عايز يشوف المسخرة اللي على أصولها؟ يخش على الرابط ده. http://misrdigital.blogspirit.com/ ومنه للرابط ده http://www.zippyvideos.com/6877949705857386/police_brutality_haram. الرابط ده عليه الفيديو اللي بيصور ضباط القسم وهما بيضربوا مواطن مصري زيي وزيك. تفتكر إيه اللي ممكن نستناه بعد كده؟

Dr. Tantawy said...

* tota
كتر خيرها على رأيك .. هيه الحكومه هتلاقيها منين و لا منين هههه مش كفايه اللي عايشين .. كمان هتشيل هم اللي ميتين

* anonymous
15000 جنيه
يا بلاش .. تعاله دوسلك تلاته و ادفع الفلوس و كل سنه وانت طيب

* egy falcon
يا عم الحاج ماحنا كلنا بننضرب خدنا ايه يعني
الضرب مقدور عليه .. في ناس مستعده تنضرب كل يوم علقه زي دي بس المهم تعيش و السلام .. نفسهم بس يعيشووووا

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول