2006/08/16

أسرار الولاد

مش عارف ليه تخيـّـلت ايناس الدغيدي و هيه بتقدم فيلم اسرار البنات .. انها هتعمل فرقعه جامده .. مع ان الفيلم مفيهوش لا أسرار و لا نيله .. انما حكايه هايفه زي اللي بنات ضايعه كتير بتعملها كل يوم .. وفكرت في اكتر من مناسبه اكلم الست ايناس و اقولها تعمل فيلم اسمه اسرار الولاد .. وانا مستعد اكتب لها السيتاريو و الحوار .. على اساس ان الواحد بعد ست سنين في الكليه قدر يكون وجهة نظر لا بأس بيها في اسرار الولاد .. واول سلسله من افلام اسرار الولاد هتكون اسرار ولاد دفعة سنه سادسه طب .. دفعتي المبجله اللي افضالها مغطيه عليه و على ولادي .. و ولاد ولادي .. المهم .. اكبر و اهم اسرار الولاد في دفعتي .. هيه التراياد .. و التراياد للناس اللي علامها على قدها .. يعني الثلاثيه .. و الثلاثيات في الطب اكتر من ثلاثيات نجيب محفوظ و الخيام .. ده لو كان ليهم ثلاثيات .. نعود مره اخرى للثلاثيه .. فثلاثيه طلبة طب الاعزاء هي انهم .. مبيذاكروش .. بكروش .. مبيعرفوش .. حد فاهم حاجه .. أفهمكم بما أني احد مخترعي هذا التراياد
النقطه الاولى .. مبيذاكروش .. هتستغربوا .. و تقولوا طلبه طب دحاحين و صميمه و مواس مذاكره .. لكن كله كلام فاضي والله .. وإسألوني أنا .. الدفعه متقسمه تلات اجزاء .. جزء عارف اهدافه و فاهم الطب صح .. دول اللي بيجيبوا مذكرات و كتب علميه كبيره علشان يذاكروا منها و يكونوا دكاتره بواقعيه ... بينما النص التاني و هوه اللي متعلق بين بينين .. زيي كده .. بيذاكر على قد الحال علشان يجيب تقدير كويس و خلاص .. يعني جيدجدا و دمتم .. اما النص التالت و الاخير .. فهو اللي بايع القضيه و مقضي اليوم انه بيروح ياخد غيابه الصبح في الكليه وبعديها يطلع يقضي اليوم على القهوه و يروح بليل ينام .. ليله فل يعني
النقطه الثانيه .. بكروش .. ودي بقت فعلا مصيبه.. شباب الدفعه .. تخين و رفيع .. بقوا كلهم ليهم كروش .. كروش من نوع ( حامل في الشهر التامن ) مش اي كرش يعني .. متفهمش بقه ده سببه الاكل ولا قلة الحركه ولا ايه بالضبط .. المهم في الآخر ان الشباب كله بقه ليه كرش محترم يشرفه .. و يمشي قدامه .. يفيده انه يركن عليه أو يسند عليه وقت الزنقه .. واهه كله يستفيد
النقطه التالته .. و هي تبدو في خارجها .. قبيحه .. لكنها أكثر براءه مما تتصوروا .. فكلمه مبيعرفوش معناها .. انهم معظمهم عزاب .. لسه نداء النداهه لم يأتي .. لسه كل واحد في حاله .. برغم ان زملاءنا في باقي الكليات .. اللي خلصوا .. بقوا كلهم اباء لأبناء .. مش لسه شباب كتكوت بياخدوا مصروفهم من أهاليهم .. حاجه تفرح مش كده .. لكن الحمد لله .. الشباب قرر أخيرا أنه يعدي المرحله دي .. بمعنى آخر .. اتسرعوا .. وكل واحد بقه عايز يلحق ـ بالنص كده ـ يلاقي واحده يتجوزها .. كله شغال فرز وتنقيه علشان يلاقي بنت الحلال .. وانا من مكاني بحاول احذرهم و انبهم .. لكن تقول لمين .. شرحتلهم كتير المشاكل اللي هتحصل .. و قلتلهم الخلاصه انك هتلاقي الخطوبة - بما انه لسه محدش فيهم اتجوز - عامله زي اكله المانجه .. في الاول بتكون مستعجل و مستلذ بالعمليه .. و تقعد تحضر الفرشه حوليك و تجيب العده و تشغل اغنيه لسعد الصغير و تقول يا هادي .. لكن بمرور الوقت و اللغوصه في طبق المانجه .. بتكتشف فجأه ان عندك مغص فتاك .. و إنك متغرق من فوقك لتحتك بالمنجه .. و انك حاليا ملزق و كأنك لسه طالع من برطمان عسل ابيض .. ترجع ساعتها و تقول يا رتني ما كلتها .. يا رتني ما اطافست .. بس بعد ايه بقه .. ماهو اللي حصل حصل
نهايه .. انتظروا فيلم أسرار الولاد في جميع قاعات العرض و دور السينما .. ينصح بمشاهده الفيلم لمن هم دون الـ30 سنه و ينصح كذلك بتناول فيشار بالشوكلاته مع الفيلم .. انتظرونا .. اسرار الولاد .. مش هتقدر تغمض عنيييييك

12 comments:

haisam (jarelkamar) said...

فيلم اسرار البنات بتاع كامل القليوبي على فكره
..

انا في طب بس بعرف

:-)))

Nouran said...

ههههه خلي سوسة تعملهولك ف اول نشاط وزاري ليها انت حسستني ان الموضوع عيب لما لقيت اسرار الولاد قولت حاجة ايه يعني بس طلعت حاجة عادية جدااا بس بجد اكتب السيناريو ممكن طنط ايناس تخده وتحط تحابيش من عندها :)

mai said...

لا بقى فيه اسرار ولاد ولا بنات بقى كله ع المكشوف.. بس دفعتك غريبة اوى مش واخد بالك؟؟؟!!!! يعني لو دول هيبقو دكاترة المستقبل يا هنموت م العيا يا هنبطل نعيا

هههههههههههههههههههههههه

Dr. Tantawy said...

* hisam

يا عم هيثم انت فهمت (بيعرف) غلط خاااالص :)) الموضوع مش زي ما انته فهمت ههههه

* nouran

اهه انتي عملتي زي الناس كلها .. لو حاجه عيب تبقه حلوه .. لو اشتغلتكوا و كتبت موضوع عادي تقولو وحش ههههه
مفيش فايده .. فلتحيا ايناس الدغيدي وحسبي الله ونعم الوكيل فيها برضه ههههه


* mai
لأ متقلقيش يا مي .. كده كده الناس هتتعب بس انا اطمئنك كمان كام سنه دفعات طب هتبقى زي دفعات حقوق .. ومش هتلاقي دكاتره بيفهموا وساعتها هنستورد خبراء طبيين من بره مصر و تبقى العمليه في النمليه

sherehan84 said...

هههههههههههه
دا مش أسرار الولاد
دي أسرار طلبة طب البنات والولاد .. دا زائد إن البنات بيعنسوا

...دنيتي said...

اول مرة ازور مدونتك
جميلة جدا
بس انا مس فاهمة قصدك ب
و قلتلهم الخلاصه انك هتلاقي الخطوبة - بما انه لسه محدش فيهم اتجوز - عامله زي اكله المانجه .. في الاول بتكون مستعجل و مستلذ بالعمليه .. و تقعد تحضر الفرشه حوليك و تجيب العده و تشغل اغنيه لسعد الصغير و تقول يا هادي .. لكن بمرور الوقت و اللغوصه في طبق المانجه .. بتكتشف فجأه ان عندك مغص فتاك .. و إنك متغرق من فوقك لتحتك بالمنجه .. و انك حاليا ملزق و كأنك لسه طالع من برطمان عسل ابيض .. ترجع ساعتها و تقول يا رتني ما كلتها ..

؟؟

وشكرااااا

إ بـ ر ا هـ يـ م said...

لا يا عم انت ظالمنا اوي هو انا في رابعه اهه بس لسه كويس كرش صغنن ابتدي يطلع اهه بس قضيت عليه .. بس متفق معاك في موضوع مبيذكروش اما بقي مبيعرفوش كل واحد و شطارته بقي

Dr. Tantawy said...

* sherehan

العنوسه واقع يا بنتي .. استعدي من دلوقتي و شوفي حاجه تشغلي نفسك بيها طالما اخترتي الطب ههههه
حمدالله عالسلامه .. اخبار امتحاناتك ايه ؟؟ طمنينا عنك

* دنيتي

اهلا وسهلا بيكي في مدونتي
قصدي من الكلام ان الخطوبه في اولها بتكون معنى جميل .. واحد وواحده بيدورا على معاني ناقصه من حياتهم .. عاطفيا و انسانيا .. لكن بعد شويه للأسف بيكتشفوا ان الحياه في الاول حتى بدون هذه المعاني كانت اسهل من الحياه بهذه الممعاني .. لأن في معاني تانيه زي النكد و المسؤوليه و الالتزامات بتعكر الدنيا خالص ههههه

* إبراهيم

برضه يا دكتور عملت زي هيثم و فهمت مبيعرفوش غلط .. يا جماعه انا قصدي انهم مش بيتجوزا و البنات بتعنس .. هذا المقصود تحديدا و ياريت تنسوا مروه و الصراحه راحه شويه ههههه

Lasto-adri *Blue* said...

ومالك بتقول "جيد جيدا" بقرف كدة يا زنجا
راعى ظروف الغلابة فى هندسة -جيرانك- اللى ح يموتوا على جيد

ايييه القصد

فيلم اسرار البنات دة حيقى ولا بيعبر عن اى حاجة
هى الست دى مسكت اقل شريحة فى البنات واتكامت عنها
والا كدة ابقى مش بنات بقى

haisam (jarelkamar) said...

اسف غلطت في اول تعليق .. الفيلم اخراج مجدي احمد علي .. الفيلم انضج بكتير من اننا ننسبه لايناس الدغيدي ..

saso said...

هو الفيلم ساقط ماعلينا بس الحقيقة مكانتش طنط ايناس المرة دي
انا كمان كنت فاكرة صحابي لما دخلوا طب هيبقوا سقاريط وعاقلين ومش هشوفهم بس طلعوا اسوأ مني وبلاقيهم في سيلانترو بيراجعوا حاجات غريبة
ويائسين من بكرة وموضوع انهم معندهمش شريك مزعلهم اوي قال يعني لوكانوا معايا في الكلية كانوا هيلاقوا ماهي هي يا جماعة

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول