2006/08/09

أنا جيت

انا جيت .. معلش يا جماعه كان عندي امتحانات ..عظام و مسالك و حاجه خنقه يعني .. ده غير ان النت واقع و لسه لغايه دلوقتي و الواحد داخل من النت بتاع التليفون و حاجه تخنق يعني .. المهم .. النهارده انشاء الله في تدوينات جديده خاصه بحركة كلابيزووو و تأسيس مجلس الاداره .. تابعونا ... بالمناسبه ياريت يا جماعه لو حد يعرف الريس الفنزويلي شافيز يسألي كده لو ليه بنت صغيره عايزه تتجوز .. يعني .. سؤال بريء كده
-
ملاحظات هامه :ـ
بعد لما سبت المدونة لمدة اسبوع .. بس .. اكتشفت حدوث حاجات غريبه .. يعني مثلا حركة كلابيز من أجل التغيير وصلت لموقع ولاد البلد .. و ده خبر كويس جدا .. و حاجه ايجابيه في حقنا و في حق الكلبوزة السمباتيك خاصه اللي اتوقع تبقى زعيمه قوميه قادمه للكلابيز .. و تطلع في التليفزيون في برنامج خلف الاسوار و حاجات كده بقه - اقرأ الخبر
-
أما الخبر التاني .. المزعج .. فكان كلمة نهى بأن في معركة في موضوع عمروسليم .. و بمجرد ما رجعت للخبر .. القديم أوي .. لقيت فعلا مهزلة في الكلام و حوالي 250 تعليق .. وكله للأسف كلام هايف و اتهامات ملهاش اي لازمه و مش هتحل اي مشكله .. و كأن مصر كلها .. بقت موظفين في الدستور .. و برغم كل شيء .. فأنا خارج هذا الموضوع تماما .. ومكتبتش رأيي فيه لأني شايف ان في مصايب اهم كتير في الدنيا من خناقات الدستور .. كفايه عليه لبنان .. اللي كان نفسي اكون فيها دلوقتي مع مجموعات الاطباء اللي سافرت هناك لكن منها لله التأشيره و الامتحانات .. و شايف ان مشاكل مصر اكبر من مشكله الدستور .. و كفايه عليه اوي اوي ان الدستور بتجيلي و بقراها .. و لسه حاسس انها جرنان يستحق القراءه .. برغم كل شيء .. المهم ان الموضوع كبر اوي ووصل لموقع علاء و منال .. مع اني كان نفسي يكون وجود مصرنا على موقع زي علاء و منال في حاجه اهم من كده .. ميكونش الخبر نوع من انواع الفضايح للموقع اكتر من كونه مدح في مكوناته .. لكن يكفيني ان علاء طلعني براءه من القضيه .. و أقر بأن المدونه كانت هادئه وبسيطه من رسام بيعشق فن عمرو سليم و يتمنى ان يمتلك موهبته و افكاره .. و بجد كفايه عليه المسالك و اللي حصل في امتحانها .. حسبي الله و نعم الوكيل - اقرأ الخبر

10 comments:

Nohaz said...

انا عيانة جدا مخفتش اصلا
انت مش دكتور شوف لي حل

كمان في خناقة في موضوع عمرو سليم
و شتايم و قرف
شفت بقي وراك رجالة

sherehan84 said...

ضحكني أوي موضوع الكلابيز ده وخلاني أنسى إمتحانات الباطنه اللي غرقانه فيها .. أنا عايزه أنضم معاك لحزب الكلابيز أنا عندي مؤهلات تؤهلني للإنضمام إليه وبجداره :)))
أما بالنسبه لإمتحاناتك ربنا معاك و كلنا لها..

Dr. Tantawy said...

باطنه :) انتي معانا في الكار :) عموما الباطنه سهله جدا والله .. لسه لما تشوفي الجراحه و بلاويها هتقولي آمنت بالله
مش عارف اي اللي بيدخل بنات طب .. مش كفايه اللي احنا فيه :)))) ربنا يعينك

بالنسبه لحركه الكلابيز .. اهلا و سهلا بيكي و بأي كلبوووز عايز ينضم لنا

رشيد said...

البلوغرز المصريون يكشفون زيف دعاوى الديموقراطية الرقمية
http://www.daralhayat.com/science_tech/

Sampateek said...

نورت البيت يا دكتورنا
اسكت الموضوع كبر و الناس باعتة تسال اية التوصيات و بتجيلي ايميلات تطالب بموعد للتسجيل في الحركة
و في طلبات تغيير اسم الحركة من كلابيز من اجل التغيير الي كلابيز بلا حدود
و اختك عاملة رجيم و شكلي كده حنزل المحطة الجاية
امتحان المفاصل امتي؟ اصلي عايزة جوزين كوارع علي زوقك اعمل فتة عليهم لزوم الدايت
ابقي تعالي شاركني الحلم
خالص تحياتي

Nouran said...

ايه يا دكتور حمدلله ع السلامة المهم تكون عملت كويس ف الامتحانات كل ما افتح البلوج اشوف ارض زنجل الزنجلاوي دي انا قلت هتاخد الاجازة اللي كنت قلت عليها زمان دي بس عودا حميدا
تصدق انا شوفت التعليقات دي والغريبة ان معظمها اني وان ساي حاجة غريبة سيبك من الناس دي مورهاش حاجة يلا منتظرين جديد الكلابيز :)

أبوعمر said...

حمد الله ع السلامة يا عم زنجولا
أخبار المسالك إيه؟

Anonymous said...

زنجولا
اولا انا مش بكتب عشان اشترك فى حركه كلابيز ..انا بكتب اولا علشان اشكرك على مدونتك الهايله دى اللى فضحت كل اللى بيحصل فى جريده الدستور..ومهما اعترضوا الزملاء عليها انا رايى ان المدونه كانت اشبه بهايد بارك اتفضح فيه ادعياء الديقراطيه كلهم والدكتاتور الصغير ابراهيم عيسى..وبصراحه انا شايف ان دى اهم فايده من فوائد المدونات وهى انها تكون متنفس طبيعى لكل مظلوم ..وبصراحه بس اوعى تتغر يا زنجولا..انا شايف ان احلى مدونه كانت فى البلوج ده هى مدونه الدستور ..لانها عبرت باختصار شديد عن مصر بعبلها كله..سلام

عمرو سليم said...

الاستاذ زنجولا..
تحيه طيبه وبعد
اشكرك للمره الالف ..وربما اكثر..على اعجابك بى كرسام كاريكاتير..واشكرك جدا على كل ما تفعله من اجلى..ورغم اننا لم نتقابل من قبل الا انه ثمه احساس داخلى ينبئنى باننا سنصبح اصدقاء..اشكرك مره اخرى..وتحياتى لبلو ستون على حدسها الرائع
عمرو سليم

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول