2007/06/20

شباب نايكي .. و أطباء المصلحه

اتظاهر امبارح مجموعه من الاطباء على رأسهم قيادات النقابه في مصر مطالبين بحقوقهم في فلوس الحكومه من التكـيّـه اللي ملهاش صاحب .. ولأول مره يجتمع حمدي السيد مع عصام العريان متفقين على قضيه واحده .. برغم انتماء الاول للحكومه و التاني للأخوان .. و كانت اهم مطالب الاطراف المجتمعه هي بدء مرتبات الاطباء من 500 جنيه .. و توفير بدل اداره لمديري المستشفيات يبدء من 2500 و حتى 5000 جنيه ... يا بلاش

اعتقد اني بصفتي طبيب .. كان المفروض اكون فرحان بالكلام ده .. والتجمع ده .. لكن للأسف حسيت بحرقه دم و قرف ما لهم مثيل .. يعني الاخوه قيادات النقابه الممثله للاطباء .. و المفروض انهم اطباء لخدمه المرضى مش لخدمه نفسهم و بس .. خرجوا .. و اتجمعوا عشان لقوا الحكومه بتوزع فلوس على المدرسين .. قالوا ينوبنا من الحب جانب .. مع ان نفس الساده الافاضل دول .. و تلامذتهم اللي احنا اتعلمنا على ايديهم علمونا ان الامر الواقع في اساسيات كتير لا يمكن تغييره .. يعني مثلا .. عمري ما سمعت عن اساتذه النسا والولاده بيتظاهروا علشان مفيش عدد كفايه من الحضانات للاطفال اللي بيتولدوا ناقصين نمو .. و النتيجه .. موت حوالي طفلين الى تلاته اطفال يوميا في كل مستشفى جامعي على مستوى مصر .. و العدد اكتر من كده كمان .. بلاش .. مسمعتش عن اساتذة الباطنه بيعترضوا على عدم توفر ادويه السكر و الكبد برغم ان حياه مريضهم متوقفه عليها .. الافكس من كده .. مسمعتش عن دكاتره وقفت يوم تشتكي من نقص الامكانيات المهول في كل قسم داخل مستشفيات الحكومه بطريقه مستفزه .. بالعكس .. اكتفى الساده الاطباء بمصمصه الشفايف و الدعوه على اللي كان السبب و كأننا ولايا في مقام سيدنا الحسين

ايها الساده الاطباء المحترمون .. زي ما علمتونا اننا نحترم المريض .. و نخاف على مصلحته .. و نخليها دايما قبل اي حاجه تانيه .. ياريت برضه تعلمونا ازاي نحترم نفسنا .. و منهينش كرامتنا علشان خاطر قرش زياده .. اعتقد لو كل راعي اهتم بمصلحة رعيته .. البلد دي ممكن تتغير للأحسن ... وبرضه بقول .. ممكن .. مش أكيد


-

-----------------------------------------

-

-

من اكتر الحاجات اللي بتضحكني .. و يمكن بدرجه كبيره اوي .. منظر الشباب اللي ماشي بجنب مثلا لأن ماركه التي شيرت موجوده على جنب .. فبيحاول يظهرها .. او اللي مطلع جزء من البوكسر ( ملابسه الداخليه ) علشان يوريك انها ماركه باتا مثلا .. ويا سلام لو الكلام ده في واحده بنت .. هتلبس بودي شفاف او يادوبك مغطي فوق السره بكام شبر عشان توريك انها لابسه تحتيه ماركه مفتخره من ام خمسه و سبعين جنيه .. ليه كل ده .. عشان شبابنا المحترم بقه بيدور على الماركه قبل ما يدور على اللي لابسها .. طالما الشاب بقى اديداس او نايكي .. ف ده يغنيه عن انه يكون صاحب شهاده او اخلاق .. بمنتهى البساطه .. بقى لازم تصنف نفسك بين طبقات شباب الماركات عشان تعرف تكون وسطهم .. و تعيش رافع راسك .. و معري جزمتك .. و مطلع بوكسرك بره البنطلون .. ماهي الماركه اللي لابسها دي هتقوي قلبك .. و تخليك تتكلم بربنط .. حتى لو مش بتفهم اي حاجه في اي حاجه
-

-
وبالمناسبه دي .. في سؤال بيلح عليه .. يا ترى تحب تلبس قميص ماركه محترمه .. و لا تجيب مكانه 5 قمصان من ماركه نص كم ؟؟ قد كده تفرق معاك الماركه و التيكيت اللي بيضرب سعرها السما ؟؟ ... بصراحه .. حاولت اوازن كتير ما بين النقط دي و اكتشفت اني من النوع التاني .. يعني ممكن اجيب مثلا تي شيرت ماركه جامده لمجرد امتلاكه و خلاص .. بس في المقابل بكون حريص على اقتناء 5 تي شيرتات من انواع عاديه لمجرد التغيير .. اللي انا شايفه اهم من اقتناء حاجه ليها ماركه جامده او علامه تجاريه تقيله .. و يمكن قناعه بأن الهدوم دي مجرد غطا بنتحرك بيه وسط الناس .. بيسيب انطباعات كويسه احيانا .. لكن في النهايه .. انت اللي بتفرق حتى لو لابس هدوم مقطعه .. او من ماركه ( رصيف الستر يا ام احمد ) .. اظن كفايه كده كلام عن الماركات .. و اسيبكم تنزلوا تشتروا كام كوتشي اديداس على كام بدله فيرساتشي و كام نظاره ريبان و متنسوش ساعتين فوسيل في السكه .. و صلحه

12 comments:

Epitaph said...

صباح الفل

انا ح احب اسجل رأيي في موضوع الماركات ده عشان فعلا بتبدي من الكاب العادي بمية معرفش كام جنيه عشان ماركته الا الشراب حضرتك هههههههه
والولاد بالذات بيحبوا ده اوي ان حاجتهم ماركات بتظهر فيهم اكتر يعني من البنت
والتوازن فعلا مطلوب ايه يعني لو انت مقتدر هاتك يا عم حاجة اصلية تعيش و للهلك و الفرك و التنطيط و المشاوير حاجات بقي نص مضروبة

و يجعله عامر

:))

Sampateek said...

عندك حق
عمرنا ما شفنا مظاهرة علشان رد حق لاصحابه الغلابة

الشباب محتاج يتربى

ربنا بهدي الكل
تحياتي

يساري مصري said...

و الله ما جصَّرت
زي ما الخلايجه بيقولوا

و كولوا كوووم و البوكسر اللي بينور في الضلمه كوووم

انا بتكلم جد

انا كمان اعرف واحد بينزل يعمل "شوبنج" بوكسرات عندوا جاليري بوكسرات
و كل مايجيب واحد جديد بيصورو و يحط صورته على النت

غير التنافس بينه و بين صحابه على اجمد و البوكسر اللي آخر موضه

و آخر ما توصل له فن البوكسرات هو البوكسر اللي بينور بتأثير الاشاعه الفوق بنفسجبيه "النور البنفسجي " عشان الديسكوس

و رنا يعفينا جميعاً

Dr. Tantawy said...

epithaph

صباح الورد

انا معاكي :) اوي اوي
و من بكره ناوي ابدء حمله ضد الماركات و التوكيلات .. حاجه تقرف والله :))) هوه احنا لاقيين الفلوس دي ههههه

Dr. Tantawy said...

sampateeek

عاش من شافك :) منووووره

الشباب عايز الحرق و حياتك :) هههه

Dr. Tantawy said...

يساري مصري


الله بالخير :) زي مالخلايجه بيقولو

انا عايز اشوف موضوع البوكسر اللي بينور ف الظلمه ده .. الموضوع شكله كبر اوي يا باشا هههههه

No Fear said...

السلام عليكم
نفسي أرجع للتدوين تاني بس بشرط أكتب زيك
متعرفش إزاي

Bedouin said...

طيب بصفتي من أطباء المستقبل السعيد، أحب أدلي بدلوي أنا كمان بقى... بما إنه الناس كلها بقت بتتكلم، و فضيحتنا بقت بجلاجل

يا طنطاوي باشا، يعني بعد سبع سنين استهلاك غير آدمي، و تعليم من مذكرات عاملة شبه سبارس السجاير، و ماسورة فلوس ضاربة، لما خلينا أهالينا تبيع الحديدة كمان و تفضل واقفة، نطلع نقعد ع القهاوي؟ كده ببساطة؟

شوفت حكاية إلغاء التكليف دي و النبي؟؟ طب بذمتك، انتا مش دكتور و عارف انه الواحد مننا لو قعد ما يمارسش سنه بيفقد كل مهاراته؟ دول بقى هيقعدوك لأجل غير مسمى... و ابقى سلملي على جوزه

جميل أوي إنه الواحد يكون عنده كرامة و نبل و أخلاق الطبيب الحقيقي، و أنا طبعا بأيدك إنه الطبيب المفروض يترفع عن حاجات زي دي، يعني أنا شخصيا نازل أفريقيا و مش راجع تاني غالباً، من غير فلوس ولا حاجة... لكن أنا و انتا أفراد، زمايلنا التانيين ذنبهم إيه يتعاملوا كلهم على إنهم أبطال لازم يعيشوا أقصى درجات التقشف و الحرمان؟ مش من حقهم يتجوزوا و يعيشوا زي خريجين تجارة مثلا؟

بالنسبة بقى لحكاية انه الأطباء يخرجوا في مظاهرات لصالح مرضاهم، دي مش هاتحصل أبدا بنظام التعليم الطبي القائم ده، و أكيد انتا فاهم قصدي إيه... قصدي الطالب اللي بيعرف يصم في الثانوية العامة فيدخل طب سفلقة علشان عرف يصم... الطالب اللي بيسمي المريض حالة، و الطالب اللي أهم حاجة عنده يجيب مذكرات مش عارف مين، علشان يجيب درجات إيه، و اولاد الدكاترة اللي بيرتبوا من سنة أولى، و المحاضرات اللي مالهاش دعوة بالطب الحقيقي، و المصادر اللي من سنة تسعة و سبعين، و و و

لما نعاملهم على إنهم دكاترة من الأول.. نبقى نطالبهم يكونوا دكاترة بعدين... انما دلوقتي هما موظفين، من حقهم كأي موظف يعتصم، و يعمل حركة للتغيير مالهاش لازمة ... و ياخد في الآخر خمستاشر جنيه علاوة دورية

طظ

محجوب عبد الدايم
القاهرة 1930

Bedouin said...

آه بالمناسبة، أنا ما بلبسش ماركات، لأني فقير جداً... حاقد جداً.... و اشتراكي حبتين

Dr.TANTAWY said...

NO FEAR


ارجع و اكتب و انت هتكتب احسن من اي حد تاني :) المهم تكون عايز تكتب .. فاهمني

Dr.TANTAWY said...

bedouin

اولا اهلا بيك يا زميل المهنه العزيز :) تانيا .. ادلي بدلوك براحتك جدا .. كلنا خلقنا لندلي بدلونا :) اتفضل .. خش برجلك اليمين هههههه

متفق معاك طبعا .. و بما ان المنظمه كلها عايزه عمره و تصليح .. ف كان الاولى ان الاصلاح يبدء من الرووس الكبيره و اصحاب المناصب القياديه .. يعني لما جه حاتم الجبلي استشرت فيه خير لكن طلع اسخم من اللي قبله .. وحمدي باشا السيد و غيره .. كل واحد بيدور على مصلحته و بس .. محدش فكر ازاي يصلح او يطور من مكانه

عموما .. ربنا موجود :) و ليخسأ الخاسئووووون ههههه

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول