2007/06/22

للزملكاويه .. فقط

-
هذه التدوينه هي تعبير عن خالص اعتزازي بكوني زملكاوي جدا .. و أبا عن جد كمان .. و فيها شويه تخاريف طنطاويه كده كنت كتبتها حبا في الزمالك و اللي جابو الزمالك .. و لا عزاء للأهلي و مشجعي الأهلي
-
-
زملكاوي
----------
من غير ما تكون .. بالكورة موهوم .. هتكون بالفطره زملكاوي
لو ابن يومين .. او فوق ستين .. هتقول و تنادي زملكاوي
وده حب كبير .. مش لحظة تطير .. بيخليك تحلم بالنادي
الاول في الكاس و الدوري .. في افريقيا و بإسم بلادي
هنعيش ونموت .. وبأعلي صوت .. الكل هيبقى زملكاوي

الاصل حقيقي في امجاده .. ميت سنه وعايشهم بولاده
بطولات وكؤوسها في دواليبه .. ابطال بتحققله تاريخه
وعلشان كده قلبي زملكاوي

لعيبه حريفه و بتعلـّم .. الكوره ازاي يوم تتكلم
عايشين يرفعوا اسم ناديهم .. في العالي و يحموه باديهم
وعلشان كده قلبي زملكاوي

يا زمالك اسمك في بلادي .. راية مرفوعه ومش عادي
مدرسة للفن وللكوره .. لعيبتك دايما في الصوره
وعشان كده قلبي زملكاوي

يا زمالك "بصري" و "شحاته" .. و "إمام" لعيبه فوق العاده
و" حليم " و "جمال" دوله ولادك .. و" وحيد" حامي شبكة بطولاتك
وعشان كده قلبي زملكاوي
-
-
-
لو كنت نسيت
--------------
لو كنت نسيت .. أفكرك يا أهلي
لو كنت حديد .. هسيحك يا أهلي
لو كنت نسيت !!
سيدك أنا .. ف الحرفنه .. أقدر أجيب جون ف ثواني
غيرنا مفيش .. فرقة تعيش .. فرقتنا راجعه من تاني
ولو كنت نسيت ...
حاول تجيب .. لعيب شديد .. يمكن يفيدك قدامي
فرقتنا نار .. ومفيش هزار .. شيلاه يا أهلي يا ياباني
ولو كنت نسيت ..
عفوا يا اهلي .. الكاس ندهلي .. روح يالا شوفلك كاس فاضي
زمنك نسيك .. والدور عليك .. مش راح اسيب حد قصادي
-
-
-
مش هقول عاللى حصل
-----------------------
مش هقول عللي حصل بيني و بينك .. يا حبيبي
يا زمالك .. احنا وراك .. فالعين شايلينك
انا قلبي معاك .. آه آه آه

عيني عالخطين .. يا سلام يا سلام .. على عالبال و العين .. غيرك في مين ؟
دوله اللي فضله يا هوى .. من ذكرى الاهلي من سنين
لما كسبناه .. يا سلام يا سلام .. وقوام دسناه .. بجوان تمام
جايين يقوللنا السته يا ناس .. ناسيين يا زمالك همه مين ؟؟
دانتا لو تفوق كدا .. راح يكون .. الكاس لنا
واللي جايّ بكره إيه ؟؟ .. ده كله ليك ..
دوري كاس .. كله نلاقيه
قلبي مال و اهو انكوى .. يا زمالك .. بالهوى
-
-
-
فرقتنا
------
فرقتنا .. جاية تكتب الأساطير
الكوره فيها .. ليها شكل خطير
وإذا خايف إوعى داحنا ليلنا طويل
اووووووه

يا زمالك .. إنت جوه قلبي كبير
بغلاوة الهرم و النيل
ورينا .. ويالا متّـع الجماهير
اووووووه

زمالكنا .. الماتش ده مش عادي
هيوريكوا أجمل كوره
هنجيب إجوان
بجمال و إمام
هنّـدس يا حليم الصوره

فالجون .. يالا شوت ف الجون
هنكون أقوى تيم ف الكون
يا زمالك كلـّه بيدعيلك
فوزك هنا مضموون
-
-
-
علي صوتك
------------
علي صوتك .. علي صوتك .. بالغنا ..
الكاس والدوري .. حقنا .. حقنا ..

ولا همنا .. مين ضدنا ..
الفوز لناااااا .. لو حتى الاهلي ضدنا .. الفوز لنااااا

على صوتك .. على صوتك .. بالغنا ..
ابطال افريقيا من هنا .. من هنا ..

احنا هنا .. وكلنا ..
بنقول سوا .. يا زمالك انت ف قلبنا .. ف قلبنا ..

على صوتك .. على صوتك .. بالغنا ..
يا زمالك .. يالا الفوز لنا .. من حقنا ..
-
-
سو يا سو
-----------
سو .. يا سو .. الأهلي هنغلبووووه
سو .. يا سو .. الأهلي هنطحنوووه

الأهلي كسبني سته .. وانا بكره أديله دسته
مش بس ف جونه هياخد .. بكره جونه يشمعوووه

سو .. يا سو .. الأهلي هنركبووووه
سو .. يا سو .. الأهلي هنمسحوووه

الأهلي في لعيبه .. غاليه وياريتها مفيده
نصها صيّع بتحشش .. و بكره الباقي هيركنووووه
-
-

ـ رسم الكاريكاتير للاعب الزمالك في بدايه البوست للفنان الجميل / هشام رحمه

43 comments:

يساري مصري said...

ههههههههههههههههههههههههه

يا خيالك الواسع
مين ده اللي اول الكاس و الدوري كمان و مشعارف ايه في افريقيا

انت اكيييد بتتكلم عن الاهلي و كتبت الزمالك كغلطه مطبعيه

ههههههه

انا من ساعت موعيت على الدنيا و الزمالك في كبوه و يجي على آخر الموسم بعد ميكون الاهلي تمكن من كل شئ و يفوق حبه
و على الموسم الجديد يكون نام

الزملكويه بياعين الكلام
هههههههه

Viva Ahly
Hasta La Victoria Siempre

Dr. Tantawy said...

يسارى مصري

يا عم دي الامجاد اللي جايه .. استني بس و انت تشوف ههههههه

الزمالك طول عمره معلم .. بس هوه الزمن الاغبر اللي عمل فيه كده .. عموما كلها موسم ولا اتنين و لعيبه الاهلي بطارياتهم تخلص و تلفوا تدورا على لعيبه متلاقوووش

عاش الزمالك للابد
Viva ZAMALK
ich liebe zamalek !!

Gemyhood said...

اهلا بيك يا طنطاوى فى حزب الزملكاوية المدونيين

اللى انا الريس بتاعه عافية

يا ريت تكلمنى علشان عايزين نستفاد منك بقة وش مش تبقى زملكاوى اونطه

ضيفنى على الماسنجر و هافهمك عايزك فى ايه

Gemyhood said...

لو مافهمتش كلامى قوى :d

تابع اللينكات دى هاتفهم انا قصدى على ايه و عايزك فى ايه

http://gemyhood.com/?p=148

http://gemyhood.com/?p=153

Nouran said...

طب انا مقرتش علشان انا اهلاوية
وواضح كمان انكوا هتعملوا حزب زملكاوية يا بني كلنا مصريين والمهم نوصل لكاس العالم هههههه

عمرو غريب said...

يا سلام علي الكلام الجميل وانا والله بحترم الواحد الي بيشجع فريقة رغم المعناة الذي يعاني منها وانشاء الله الزمالك يرجع لمستواة المعتاد من تاني تحياتي و اتمني لك التوفيق عمرو غريب مدونة بيت الرياضة

يساري مصري said...

انت مش بس زملكاوي لأ و منجم كمان
بتقا الطالع حضرتك

ههههههههههه

و آدي كمان جمي هود بيستقطبك واضح ان تنجيمك عجبه

أحمد المصري said...

رغم إني غير كروي على الإطلاق 00إلا إن كلامك جمييل كالعادة00ننتظر المزيد

mariam said...

يااه يا طنطاوى انت لسه زملكاوى
انا افتكرت ان الدنيا اتغيرت
انا بشجع الزمالك لما يكون ضد الأهلى غير كده ماليش دعوه
تحياتى ليك وشكرا على سؤالك

No Fear said...

السلام عليكم
زمالك يا هندسة لعب و فن و مدرسة
طنطاوي يا دكترة طب و فن و هندسة

DoOoOoOdY said...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

هاموت من الضحك يا طنطاوى يا زملكاوى
انت يا بنى ربنا مش هيتوب عليك بقى وتبقى اهلاوى
زمالك ايه ده بس وبطولات ايه بس انت كنت بتحلم ولا ايه

وان شاء الله الكأس بتاعنا واحنا وحوش افريقيا وابطال العالم

واووووووووووووووه اهلاوى

Hend.feps said...

بالرغم من انى اهلوية حتى النخاع و بالرغم من ان البوست اسمة للزملكاوية فقط.. الا انى كان لازم احيى الابداع الزملكاوى البحت و لو انه بيربى فالقلب عداوة او بيشعللها على اعتبار انها موجودة و متأصلة منذ حين انا معرفوش ... بس اغانى حلوة اوى ... بس الاستحالة استحالة يعنى ان الاهلى يطول فى كبوته زى الزمالك ... بيريح شوية بس و يفوق على طول ...

Hend.feps said...

صحيح لما انت زملكاوى و مش طايق الاهلى .... كاتب ليه أهلى و ان ضنوا على كرام ....تماحيك

Z.@.k.! said...

I am an Ex-Zamalkawy...so I am not following what's going on..but still I like teasing any Ahlawy friends for the sake of being one...

cheers

Dr.TANTAWY said...

mr.gemyhoood

انا فهمت يا باشا :) و انا زائر قديم جدا في موقع زمالك تي في :) المهم

لو عايزين اي حاجه ياريت تبعت تقولي و انا مش هتأخر .. لكن لظروف الشغل الحاليه فهيكون صعب اتواجد معاكو .. لكن ان شاء الله احاول اشارك ب اللي اقدر عليه

viva zamaaaaaaaaalek :)

Dr.TANTAWY said...

nouran

دي المشكله :) لما الناس تتكلم عن الاهلي يقعدوا يغنوا و يتنططوا :) ولما نتكلم عن الزمالك يقولك بطلوا تخلف و خلونا نشجع منتخب مصر ههههههه

عجبي

Dr.TANTAWY said...

عمرو غريب

اهلا بيك يا باشا

الزمالك راجع راجع و بكره ان شاء الله تتكلم عنه ف المدونه بتاعتك :) و تقول الزمالك الوحش اهه

Dr.TANTAWY said...

احمد المصري


تشجيكم مشكووور كالعاده :)
شكرا على مساندتك لفريق متأزم في مرحله استعاده الانفاس :) معندش نفس بقه لزوم شد الحيل ده ههههه

Dr.TANTAWY said...

MANOOOOO


حمدالله على السلامه يا بنتي .. عودا احمد

انا زملكاوي .. كنت و مازلت و سأظل للأبد هههههه

يالا مستنيين تدويناتك الجامده من تاني .. تحيا مصر

Dr.TANTAWY said...

no fear


الزمالك .. ملك

Dr.TANTAWY said...

DODY

يااااااااااه
انتي لسه عايشه :) انا افتكرت اعلام خلت ربنا يهديكي و ترجعي لرشدك :) يا بنتي الحقي نفسك و توبي الى الله .. لو فضلتي على الغي الاهلاوي ده هتبقى مشكله .. طريق الهدايه مفتوح .. و نادي الزمالك فاتح دراعاته للكل هههههه

Dr.TANTAWY said...

hend


ربنا يتوب على نخاعك من اهلاويته دي ههههه
عموما .. بكره ربنا يهديكوا جميعا و تبقوا زملكاويه و تدوقوا حلاوه الايمان على حق
انا اريد .. و انت تريد و الله يفعل ما يريد :)

متشكر على الكلمتين الحلوين دول .. بس برضه .. الزمالك هيفضل زمالك .. و الكبير كبيير ههههه

Dr.TANTAWY said...

z@k

you have to come back :) living with out zamalek is really not worthy ;) ... think about it man !! we are waiting for ya ..

soosa el-mafroosa said...

طب استنى بعد الماتش يا طنطاوي

أما نشوف بس الثقة المتناهية دي نتيجتها إيه

ربنا يستر بس و ماتبقاش
6/1
:)

عمومااحنا فرحنا كتير يا رب تفرحوا مرة


بس مش المرة دي
:)

و بعدين مافيش كل سنة و انتي طيبة يا سوسة؟؟؟..و الله زعلانة

اه يا دماغى said...

يااااااااااااا
كل دا تعصب للكورة
والزمالك
يا بخت الاتنين
-
-
ادعوك زيارة مدونتى
تحياتى

smraa alnil said...

هههههههههههههههههههه
يا راجل دة انا داخلة وانا منشكحة اووووووي
وعمالة احضر قصيدة مطولة عشان اشكرك علي الصورة التحفة اللي عملتهالي انا وطارق
اجي الاقيك عاملي بوست عن الزمالك

بيب بيب اهلي
بيب بيييب اهلي
اهلىىىى اهلي اوه اوه


هههههههههههههههه

انا افتكرت ان في ثقافة واعية عندك يا دكتور

بجد شكرا اوي علي الصورة

Dr.TANTAWY said...

sooosa elmafrooosa

ازيك يا سووووس :) اولا انا قلتلك كل سنه و انتي طيبه بس انتي اللي مقريتيش :) العتب على النظر بقه ههههه


تانيا .. الزمالك مش محتاج عطفكم و شفقتكم .. سواءا كسبنا او خسرنا ف أحنا برضه زملكاويه :)) يعني مالآخر .. شوفو حاجه تانيه اعملوها و بطلوا كوره .. سيبوها للي يقدروها ههههه

Dr.TANTAWY said...

آه يا دماغي


التعصب للزمالك حلال :)) اسألني انا ههههه

ان شاء الله ازور مدونتك .. حالا

Dr.TANTAWY said...

سمراء النيل


اولا .. بالنسبه للصوره .. لا شكر على واجب :) لأن دي اقل حاجه ممكن حد يقدمها

ثانيا .. انا زملكاوي للأبد :) و بما انك اهلاويه يبقى بقينا اعداء هههههه


ثالثا .. قمه الوعي والنضج القومي هو تشجيع الزمالك .. دي الفطره السويه ههههه

تحياتي :) و اهلا بيكي

Hend.feps said...

مبروووووووووووووك للأهلى اللى رافع راسنا وحافظ كرامتنا ... سنظل اهلوية حتى النخاع و هيفضل الكبير كبير... ربنا يهدى الزمالكوية اجمعين و يتوب عليهم من النفخة الكدابة و رحم الله أمرء عرف قدر نفسه ....

بس للحق كان ماتش جامد و الزمالك لعبت حلو اوى بس هتطلعوا هتنزلوا مغلوبون يا ولدى مغلوب...

Nouran said...

انت اتخطفت لما الكاس اتخطف من ايديكوا بين ثانيه والتانيه
هيهيهيهيه
ياااااااااه سلاااااام شفت مبروك ع الكاس لينا :)
وهارد لك ليك يا زنجولا

..........tahayo2at said...

بصراحة يا طنطاوي
أول مرة أعرف ان ليك في الخيال العلمي
زمالك ايه بس يا راجل

صحيح الزمالك لعب حلو

بس الأهلي لعب أحلى و أجمل و أروع و أفشخ

و عالعموم أنا كدة مبسوط ان انت منتهى أملك انك تخسر من الأهلي بس بشرف

و على فكرة لو الزمالك كسب و الأهلي لعب حلو ما بيهمكوش و بتقلبوا الدنيا
يعني بلاش ستات و أربعات و تلتات

خلينا في فرق الجول الواحد

و بموووووووووووووووووووووت فيك يا ترييييكة

ربنا يخليك لينا

طبعا قضدي تريكة
مش انت يا طنطاوي

DoOoOoOdY said...

هههههههههههههههههه
بردو لسه زملكاوى
شفت الاهلى عمل فيكوا ايه؟هههههههههه
حتى وانتوا فى اعلى فورمه بردو مغلوبين
هو ده الزمالك التانى على طووووووووول

ومبرووووووووووك للاهلى
واووووووووووووووووه اهلاوى
وتسلم رجليك يا متعب انت وتريكه واسامه

شفت متعب اللى مش عجبك قطع شباك اوسه بتاعكم
مبرووووووووك يا اهلاويه

Anonymous said...

هو والله انا عامل العضويه دى مخصوص عشان ارد على الراجل اللى كاتب الكلام اللى بعض بيقول عليه جميل وكده ..

يامان انت بتتكلم عن ايه بالظبط ؟؟

بص

عشان كلامك يبقى حلو وكويس لازم يكون واقعى وحقيقه لكن انت بتتكلم فى خيال علمى او بتالف افلام رعب

دى اهانه للاهلى يامان وبعدين انت عمال تقول مردسه وفن وهندسه وبتاع وعامله اكنه خلاص خد دورى ابطال المجره

بلاش بقى والنبى كلام عن امجاد الماضى وخليك فى الحاضر اتكلم مثلا واكتب عن مرتضى منصور عن ابراهيم سعيد عن الانجازات اللى حققوها واطرب وقول شعر فى الانجازات اللى حققوها

وياريت متعدش تقول الاهلى الاهلى لان الاهلى يعنى مينزلش بمستواه للزمالك انت بتتكلم عن الاهلى ده نادى عريق لكن الزمالك ميتحطش راسه براس الاهلى ... لان الزمالك يدوبك ينافس ايه سى بنى سويف اوى سكه حديد سوهاج اف سى :)

والمشكله يقولك قطب تانى

ههههههههههههههههههههههههههههههههههه

المصريين بقى


فى الاخر يامان موضوعك بصراحه مستفز لاى اهلاوى :)

Dr. Tantawy said...

hend

طبعا مقدرش اقول غير ربنا يهديكوا و يتوب عليكوا من اللي انتوا فيه ده ههههه

الماتش كان جامد صحيح بس برضه انتوا فرقه اي كلام و الدليل ان الزمالك قدر يجيب فيكم 3 اجوان مع انكم كنتوا بتلعبوا بالقوه الكاسحه بتاعتكم .. و ده معناه ان فرقه نص كم طلعت من كل البطولات قدرت تنشف ريقكم .. عموما الموسم الجاي هيبين كل حاجه :) اوكى

Dr. Tantawy said...

Nouran


مبروك عليكو الكاس .. بس زي ما قلت لهند .. لما الزمالك يعمل فيكم كده يبقى لازم تفكروا ميت مره .. لأن الزمالك اللي لعب قدامكم ده اضغف خطوط فريق الزمالك .. الحارس التاني .. ليبرو عمره ما لعب ليبرو .. خط وسط مصاب .. مدافعين موقوفين .. مهاجمين على الدكه .. و مع كده وصلوكو لمرحله انكوا قاعدين على اعصابكم زي ما شفت .. يبقى لازم تاخدوا بالكو .. الموضوع قرب اوي خلاص :P

Dr. Tantawy said...

dr.sherbo


يا عم خيال ايه و علمي ايه :) انتوا ماصدقتوا كسبتوا و خلاص .. و نسيتوا منظروكم طووول الماتش و انتوا بتعيطوا لما تتعادلو معانا هههههه

اقرا الكلام اللي كتبته لهند و لنوران يمكن تحس باللي انتوا فيه هههههه

Dr. Tantawy said...

DODY


ربنا يهديكم يا بنتي :)

اعلى فورمه ايه ؟؟ انتي شفتي الماتش ههههه
انتي عارفه مين لعيبه الزمالك اللي لعبت ؟؟ دول الخط التاني بتاعنا ؟؟ مش ابوتريكه و بركات ومتعب وفلافيو .. دانتوا لما لعبتوا امير ( الحارس التاني ) قعدتوا تعيطوا و تقولوا هوه السبب .. ما بالك بفرقه كلها بتلعب بالخط التاني بتاعها

روحي يا بنتي اتفرجى ع الماتش تاني :) لحسن تكوني اتفرجتي على ماتش تاني ههههه

Dr. Tantawy said...

Mostapha


كويس اني استفزيتك لدرجه انك تعمل عضويه عشان ترد عليه ههههه اموت انا ف استفزاز الاهلاويه ههههه

اولا انا اتكلم عن الماضى و الحاضر و المستقبل :) براحتي .. انت شريكي يا عم الحج ؟؟ و بعدين لو عايز تتكلم عن مرتضى و ابراهيم .. ما تتكلم عن متعب و عطيه .. و عن طاهر ابوزيد .. و عن مشاكل شوبير .. و عن القيعي الحرامي .. و عن و عن و عن ... يعني بلاش والنبي سكه خضره الشريفه اللي الاهلي شغال فيها دي .. انت عارف .. لو يسري فوده بتاع سري للغايه يعمل وثائقي محترم عن الاهلي .. هيطلع بلاوي سوده والنعمه :) انما الزمالك الحمدلله بلاويه كلها مفضوحه و العالم كله شايفها :) شفافيه يا اهلاوي ههههههه

مجهول said...

هههههههههههههه
انته قلت اللي كان نفسي اقوله يا طنطاوي
عن نفسي حفضل زملكاوي
مش حعرف اشجع حد تاني
ملاحظ ان فيه ناس كتير هنا ماشاء الله زملكاوية
ماتعملوا كلكوا مدونة واحدة كرابطه للمغلوبين علي امرهم الزملكاوية وانا انشاء الله معاكوا
علي غرار مدونات كتير اهلاوية موجوده
.......
عموما مايهمكش
الزمالك مدرسة
يمكن ان يمرض لكنه لا يموت

Dr. Tantawy said...

مجهول


يا باشا ازاي تقول على نفسك مجهول و انت زملكاوي .. ده كلام برضه ؟؟؟

ثانيا فكره مدونة زملكاويه دي جامده جدا و هبدأ فيها من بكره .. اللى عايز ينضم اهلا بيه طبعا .. قشطه

اخيرا .. الزمالك يمرض كثيرا .. لن لما يقوم .. بيبقى اسد .. و اللي ما يشترى هيتفرج ههههه

لو لم اكن زملكاويا لوودت ان اكون زملكاوي أوي أوي

mariam said...

ايه يا طنطاوى
انت فين

زعلان علشان 4/3 و لا ايه

Dr. Tantawy said...

mariam

انا هنااااا
و مفيش حاجه تهزنا
لا 4/3 ولا 6/1 ولا اي حاجه

احنا حديد ههههه

منورررره