2007/03/26

كيف تواجه التعديلات الدستوريه الحتميه


عزيزي المواطن الغلبان في كافه بقاع المحروسه .. هل سألت نفسك كيف ستواجه موجة التعديلات الدستوريه الحتميه القادمه .. طبعا السؤال لا يحتاج الى تفكير .. فالطرق القديمه لن تجدي نفعا .. المشمع على حبل الغسيل .. و تنشير الملابس الداخليه على الكراسي و الطاولات لن تصلح لهذه المره .. فالمسأله اكبر من ذلك .. و الرياح التغييريه قادمه لا محاله .. فإما ان تستعد كما يجب .. او تترك نفسك و اولادك و الطوفان ثالثكما
-
خدعوك فقالوا .. ان الليله ليلتك .. و ضرب النار للصبح .. و ان العريس للعروسه .. و التعديل للشعب .. و الاستفساء مسؤوليه المفسيين .. اقصد الناس المساكين .. وانا و انت .. و دقي يا مزيكا .. الليله خلصت يا عمده .. و الطبخه اتسبكت .. و الناس اتعشت و اتمزكت .. احتمال كبير يخلوك تمسح الطباق .. او تحف اللي باقي من بواقي اللي كلوا .. انما اكتر من كده انسى يا عمرو .. اجري جري الوحوش و غير رزقك لن تحوش .. حكومتك مضبطالك كل حاجه وواخده بالها من السقطه و اللقطه .. يبقى مفيش قلق .. و لا دموع بعد اليوم
-
الواقع بيقول .. انك لازم تضبط نفسك .. و تبدأ تتعامل مع الحياه بصدر رحب .. لان مفيش رحابه غير في صدرك .. خطواتك من حولك هتكون محسوبه عليك .. والدنيا زحمه يا دنيا زحمه .. زحمه مخبرين و عساكر .. زحمه ولا عدش رحمه .. مولد و صاحبه لابد .. يبقى نبدأ بالتعليمات .. خروج من البيت مفيش .. لان كل خطوه وراك مخبر .. و في اي لحظة ممكن تلاقي كف عسكري على قفاك او ايد ضابط في بنطلونك او شلوته على ظهرك .. واذا اضطريت تنزل .. فياريت متتكلمش في اسعار الخضار و اللحمه و الغلاء و التموين .. لانك كده بتخبط في الحلل و بتعك في الذات الرئاسيه العليا .. اللي هيه رئيس هيئه التموين و حاشيته .. طبعا مش محتاجه نباهه ان كل ما هو اعلى من ذلك ده من التابوهات يا حدق .. يعني حسك عينك تفكر ولو في سرك تجيب سيره وزير التموين ولا رئيس هيئه مراجيح السيده زينب .. اوعى يا مان .. البلد ملهاش امان .. وياريت يا حبيبي تبعد عن الحمير و سيره الحمير .. و اللي بيغنوا للحمير و اللي بيتريؤوا عاللي بيغنوا للحمير .. واخدلي بالك يا باشا
-
عزيزي المواطن .. انسى مبدأ كله بثوابه .. لان الحياه تغيرت .. و الحياه بقت .. كله بحسابه .. الكلمه و النفس و الحركه و الهمسه و اللمسه .. كله بحساب .. حتى النيه يا نور عيني بقت بحساب .. تليفوناتك هتكون شركه مساهمه مصريه ... و متعلقاتك الشخصيه هتبقى ورث عام للعالم الواصله المفتريه .. معدش فيه حرمات و لا محرمات .. كله هيكون قابل للدوس .. و انتي يا عيني عايش محبوس .. مختوم بالنسر و مفروس .. واحب اطمنك .. ان الحكومه بميت راجل .. و عمرها ما هترضى ان الشعب ده يتركب في يوم من الايام .. من اي كان .. عشان كده لبستنا الحزام .. و قفلت علينا القفل كمان .. و كل من عليها فان

21 comments:

قنديل said...

السماء أدركها التعب
والسحب تلونت كاللهب
كيف لا والحال قد انقلب
عل أمطارها هي دموع من انغلب
لتغسل بها هموم المنسلب
آآه يا خوفي من مستقبل مضطرب
يغلفه ظلمة والنور محتجب
واللص يعيث في سلب وفي نهب
والكريم زاهد من المعركة قد هرب
والجياع زادوا في كل مكان ودرب
وأضحينا ونمسى في عظيم كرب
أين الشرفاء.. أين نخوة العرب
مصرنا تضيع.. تنتهك.. تغتصب
أين الخيول والسيوف.. أين الحرب
حي علي الكفاح.. فالنضال قد وجب
بئس الحياة إذ ضاعت في لهو وفي لعب
وأهلا بالموت.. ف لله وحده المنقلب
يارب يسر لي طريقا قد صعب
أبغي حقا وعدلا ونورا في القلب
لأعيش حرا وليس ذليلا كالكلب
وأموت في عزة وشرف منتصب

tota said...

زنجولا
اوعى يكون الكلام اللى بتقوله ده حقيقى
لا لالا الدستور جميل جمال ملوش مثال
والدنيا جميلة وحلوة وانت معايا
التلفزيون والراديو اللى بحجارة كبيرة الصغيرة لا قال الدستور فى مصلحة الشعب ومدام الريس قال كده يبقى هو كده
انت هتعرف اكتر من الحكومة ولا ايه
كل القنوات الارضية والاذاعات المحلية قالت كده وقالت كمان الشعب كله موافق
كله كله يا عم محدش قال ان فى اعتراض الغريب بقى القنوات الفضائية قالت لا محدش موافق

طيب امتنعنا اتزورت النتيجة وان قلنا لا بردة اتزورت النتيجة اصلها طالعة فى الكونترول من كام يوم يعنى مكنش له لازمة خالص التكاليف دى
وافق بالذوق يا زنجولا والا هنحط السيخ المحمى فى صرصور ودنك
انت اعقل من انك تضحى بالصرصور علشان الحمار يعيش

تحية من واحدة ضحية

ΦD said...

Balad watia homa fakrena 3obt

No Fear said...

السلام عليكم
أنتم محسسيني أن ده مكنش بيحصل قبل كده مش عارف أنتم متضايقين ليه أية الجديد مش قادر أفهم

..........tahayo2at said...

بص يا طنطاوي

أنا المرة دي بجد

محبط
محبط
محبط

و جايب جاز
و ماليش نفس أقول أي حاجة

خلاص البلد دي
ما عدش فيها أمل


جتكوا القرف
جتكوا القرف
جتكوا القرف

Memo said...

هاعلق على ايه
كتنا خيبه فخيبت اللي دستارونا
انا بس الي حازز فنفسيتي ومبينيمنيش الليل اني رحت وشاركت وصباعي لسه فيه حبر المؤامره الي اتعملت قينا
والمصيبه اني مروحه طايره من الفرحه ومستنيه النتيجه قال يعني عندي امل ولو تشوف منظري وانا فاتحه التليفزيون وقاعده قدامه مستنيه الفرز
هههههههههههه
بلا خيبه خاليني ساكته

Dr. Tantawy said...

قنديل في البحر

يا عيني على الكلام الكبير
شبه اسلوب فاروق جويده بس عايز شويه تضبيط يعني

تحياتي يا باشا

Dr. Tantawy said...

tota


انا موافق على الدستور
واحب احيي كل من طبخوه و تبلوه و حشوه و شووه و حمروه و ضبطوه
والعاقبه عندكم في المسرات

وحشتينا .. و وحشنا تدويناتك :(

Dr. Tantawy said...

QT


:))) eh om el sara7a de hehehe

wellcome man :)

Dr. Tantawy said...

no fear


هوه طول عمره بيحصل .. لكن لازم كل فتره تنفس عن اللي جواك

زي الزمالك .. كل شويه يخسر .. لكن مينفعش تسكت و تقول ده العادي .. لازم كل فتره تشتم ف النادي و اللعيبه و هكذا ههههه

Dr. Tantawy said...

Dr.sherbooo


ايه يا عم .. مالك داخل حامي كده ليه ؟؟ خير .. مين زعلك بس هههه

و بعدين ايه جتكوا القرف دي .. انت قد الكلمه دي يا كابتن ههههه

منور .. و ربنا يفك ضيقتك يا دكتره :)

Dr. Tantawy said...

Memo


انتي شاركتي ف المسرحيه

و انا بقول .. الاقبال كان كبير ليه .. اتاري الناس كانت رايحه تنتخب عشان تشوفك .. ماشي يا عم مين قدك :)

Fo2sh said...

ya ret
http://engafm.blogspot.com/

ibn nasser - ابن ناصر said...

ههههههههه أنا مش لاقي حل لمواجهة التعديلات وقانون الارهاب غير ان
الكلاشينكوف هو الحل
ههههه وتحياتي لك ولمدونتك الرائعه والموضوع الرائع ايضا

mariam said...

و الله يا طنطاوى اللى خايف ما يتكلمش
طبعا دى الكلمه البديعه اللى قالها وزير الداخليه قبل قانون الأرهاب
يبقى فرقت ايه

تعرف اخويا كان بيسألنى هو قانون الطوارىء بينص ان كام واحد يبقى تجمع قلت له خمسه
قال لى طيب و قانون الأرهاب هيكون ازاى
قلت له لو واحد ماشى لوحده يبقى تجمع
هههههههههه
انا الأحباط جاب آخره معايا

تحياتى

حلم الحرية said...

كان معكم مراسلكم
طنطاوي ابو العافية من فوق اطلال الحرية المسلوبة


البوست جامد مووووووووت
بجد من احلي ما قرات بخصوص التعديلات

بس تعرفوا انا متفائلة ..
اصلهم بالتعديلات دي دقوا اخر مسامير النعش بتاعتهم

واحـــد مـــــن الـنـــاس said...

دستور يا اسيااااادنا دستووووووور


يا عم كبر ونفض بقا

طنش تعش تنتعش

كله بالفكاكة يحلى

بقولك ايه يا معلم

انا فتحت مدونة كاريكاتير

اسمها كاريكاشنجي

ياريت تشوفها وتقولي رأيك فيها

Dr. Tantawy said...

ibn nasser


اشكرك و معاك في الحل بتاعك
بس عندك حته زياده ؟؟ ههههه

Dr. Tantawy said...

Mano

حاسبي على نفسك انتي اليومين دول بتمشي لوحدك كتير و ده خطر عليكي :) حاولي تمشي نصك بعيد عن نصك التاني لزوم التمويه هههههه

منوره البلوج يا مريوووم

Dr. Tantawy said...

واحده من الاخوان


اهلا بيكي في المدونه ده اولا

و ثانيا انا بحب نشاط الاخوانيات لان عندهم جرأه غير عاديه بغض النظر عن اختلاقي مع بعض افكار الاخوان

و ثالثا .. انا نفسي المسمار الاخراني ده يندق بسرعه عشان بقالهم كذا سنه بيدقوه و مش عايز يدخل و يخلصنا :) ههههه

تحياتي

Dr. Tantawy said...

واحد من الناس


اهلا بالنجم :) انا مكبر والله يا باشا على قد ما اقدر .. ربنا يصبرنا

هزور مدونتك اكيد و اقولك رأي .. من غير ما تطلب يعني .. انت ابننا برضه ههههه

تحياتي يا باشا