2007/03/09

المنحوس منحوس

المنحوس منحوس .. و لو حطوا على راسه فانوس هههه .. كنت دايما اسمع المثل ده و مفهموش لحد لما دخلت طب .. و سنه ب سنه بدؤا رؤساء الاقسام يتغيروا للأسوء .. و الامتحانات تتغير للأصعب و الحياه تتغير للأغلى و الازحم .. و اخيرا فهمت معنى المثل ده .. لكن تخيلت لوهله انه بمجرد انتهاء الكليه ممكن اخد رست شويه من المنحوس ده و ارجع اكمل تاني مشوار النحس الابدي ههههه .. لكن واضح انه مفيش فايده .. ههههه
-


-
الاعلان ده وقع في ايدي بالصدفه البحته .. اه والله .. كان على بعد 30 ثانيه من انه يكون في صفيحه الزباله لولا انه لفت انتباهي و مسكته اشوف مكتوب فيه ايه و لقيت الاتي
-
تنظم صحيفه المصري اليوم مسابقه في فن الكاريكاتير و تدعو المواهب الفنيه الشابه للمشاركه بأعمالهم
-
شروط المسابقه :ـ
ـ تقديم 3 أعمال أصليه غير منشوره على النحو التالي
رسم عن حدث عالمي او عربي - رسم عن حدث محلي - رسم عن فكره او شخصيه مبتكره
ـ الا يزيد سن المتقدم عن 40 سنه
ـ الا يكون من رسامي الكاريكاتير المحترفين بالصحف
ـ اخر موعد لتقديم الاعمال 15 مارس 2007
-
جوائز المسابقه :ـ
الاول : 5000 جنيه
الثاني : 3000 جنيه
الثالث : 2000 جنيه
من الرابع و حتى العاشر : اشتراك سنه في المصري اليوم
-
ملاحظة :ـ
تخضع الاعمال المقدمه لتقييم من لجنه فنيه مشكله من كبار فناني الكاريكاتير في مصر و تنشر في حوارات مع اصحابها في الجريده
-
ارسال الاعمال :ـ
ترسل الى مقر الجريده في 11 ش جمال الدين ابو المحاسن - جاردن سيتي - القاهره
-
إلى هنا خلص الاعلان .. و بصراحه متتصوروش انا كنت عامل ازاي و انا بشوفه .. شويه اضحك و شويه اتنح ههههه .. سألتوني ليه .. هقولكوا .. اصل بصراحه .. الاعلان منشور من حوالي اسبوعين تلاته .. و لسه شايفه النهارده .. شفتوا الهنا .. المشكله التانيه بقه .. انهم كاتبين عمل محلي و دولي و مبتكر .. و محدش فاهم يعني ايه مبتكر .. و مفيش حد كبير اسأله هههه .. يعني تحس انهم حاطين العمل التالت ده للتصفيات النهائيه لكاس العالم للكاريكاتيريين هههه .. بلاش دي خد عندك المشكله التالته .. المفروض اجهز 3 اعمال في خلال يومين .. طب تيجي ازاي دي و انا كل يوم بليل عندي نباطشيه من بليل لحد تاني يوم الصبح .. بلاش .. خد عندك الافكس بقه ..المفروض اسجل بياناتي على الرسومات .. طب اكتب ايه .. اكتب طنطاوي خالد الذكر هههه بدون اي بيانات اخرى .. و ساعتها هيقلبوا الظرف بتاعي عند اقرب باسكت زباله ؟؟ ولا اكتب اسمي الحقيقي و اياكش تولع
مش بقولكوا المنحوس منحوس هههه .. عموما .. خيرها ف غيرها .. في ناس كبيره اوي اوي في البلد وعدتني بعقد عمل في موريتانيا كمان 5 سنين و يومين .. ف انشاء الله يوفوا بوعدهم و يسفروني بره .. اللهي ما توعى تطفح اللقمه ياللي في بالي
-
-
-
ملاحظة هامه :ـ
عـيّـل تايه يا ولاد الحلال .. مدونه شابه في سن المراهقه .. خرجت الى كليتها الصبح و قفلت باب المدونه .. و لحد دلوقتي محدش يعرف عنها حاجه .. لا رجعت ولا فتحت الباب .. و سايبه القفل موجود مكانه .. ياريت اللي يعرف يتقدم الى اقرب قسم شرطه او محل كشري و يدلي بأوصاف الفتاه يمكن نقدر نستدل على عنوانها
المخطوفه متوسطه الطول .. بيضاء اللون .. خفيفه الدم .. لاسعه الدماغ .. تحمل في يدها كلشر و نوفل .. وتحب اكل البيتزا بدون ما تعزم على حد .. و لا تحمل اي علامات مميزه سوى كيس مناديل فاضي في شنطتها .. اسمها منال ... برجاء الاتصال على طنطاوي في حال العثور عليها .. و شكرا

43 comments:

soosa el-mafroosa said...

طنطاوي

يا منادي المدونين

و النبي ربنا يكرمك ..نشرة كمان عن البت أووسة لحسن مدونتها فاضية من يجي شهر و مش بترد على حد

ربنا يخليك للولايا اللي زينا

البنت مالهاش حد غير البلوجرية صحابها

دورلنا عليها ينوبك ثواب

أما عن النحس ..مش عايزة أقولك مافيش فايدة عشان ماكئبكش

انا مثلا اتعرض ل 3-4 مواقف ناس كبيرة من صحف كبيرة يبعتولي كلام عن المدونة الفظيعة الساحقة الماحقة اللي انا فاتحاها

و بعدين لما أقولهم طب أوصل ازاي لأي جريدة أكتب او حتى أتدرب

يقولولي لاااااااااااااااااا..الحاجات دي عايزة وسايط ..كل مجال و ليه ناسه

كبر كبر ..بكره تفرج ولا يهمك

Nada said...

ليه التشاؤم ده يا طنطاوي؟

هي حتفرج حتفرج ان شاء الله

بس انت قول يا رب

و انت موهوب و اللي عايز يصدق يصدق اللي مش عايز عنو ما صدق المهم انت تصدق
خليك دايما مؤمن بنفسك

تحياتي

mano said...

طنطاوى واضح ان ريادة قص الشريط ضاعت منى
متزعلش على المسابقه انت موهوب بجد
و ليك مستقبل ان شاء الله
و موريتانيا مش هتلاقى احسن منك

بالنسبه لمنال انا اتصدمت
مش معقول تسيبنا بالبساطه دى

تحياتى

DR.SHERBO said...

هاي يا دكترة

صحيح انا لسة مستني التكليف هيجي فين؟؟؟

بس انا مع التفاؤل جدا جدا جدا

كان لازم تحاول و تجيب اخرك

في جملة في فيلم اجنبي جامدة جدا بتقول

The difference between winners and losers that winners never give up.

عشان كدة كان لازم تحاول
بس عموما ربنا يوفقك

الا بالحق
النباطشيات دي شكلها حتة كدة برايفت
private
يا ريت تشوفلنا معاك شغل
:-)

عـلا - من غـزة said...



معلش يا دوك متزعلش مني ,, بس انت الحق عليك

يعني مين قلك ما تتابع الاعلانات والمسابقات في الجرايد ؟

وبعدين انا مش مقتنعة بقصة النحس هادي !! او على الاقل ما بحبش ارمي عليها السبب في اي عثرة او صعوبة بنواجهها

ولا ايه !!!!

خيرها في غيرها يا عم

farida said...

و الله لو حتقدم كاريكاتير من نوع اللي بنشوفه في المدونه
يبقى كفايه عليك طنطاوي
أحسن نتحرم من خفة دمك في المدونه قبل الصحف و انت فاهم

متقهرش نفسك يا خويا و لا يهمك
جرايد ايه و زفت ايه

بس قولي يا طنطاوي في بوست مايطلبه المدونون مكتبتش ليه انك عاوز تشوفني
مش عاجباك يا دكتور آخر زمن انت

انا بقى حاجي أدور عليك في النبطشيه بتاعتك
و استنى عليا لما اشوفك

albida said...

ههههههههههههههه
ههههههههههههههههه
ههههههههههههههههه

بجد أنا جاتلى حالة هيستيريا من كتر الضحك لما قريت اللى أنت كاتبه ده!! فكرتنى بالاعلانات بتاعت المفقودين وابحث مع الشرطة

ايه يا بنى ده؟!!! والله أنا موجودة بس الدنيا مكركبة معايا شوية اليومين دول
كمان أنا بعمل نيولوك للبلوج بتاعى, عايزنى اسيبه مفتوح وبعدين تتدخلوه وتتلغوصوا فى البوية مع العمال, عيب برضه
هههههههههه

بس ايه المواصفات العجب دى؟!!! هههههههههههه
أولا انا فارعة الطول مش متوسطة الطول
:) :)
أنت لسه فاكر موضوع الكلتشر والنوفل ده؟
هههههههههه

بجد هموت بسببك من كتر الضحك
:)

عجبنى أوى المثل اللى أنت حاطه ده!! يا عم كبر... محدش عارف الخير فين... ربنا ليه حكمة فى كل حاجة, مش يمكن كنت اشتركت وبعدين يطلع كمين ولا حاجة
ههههههههه


manal

tota said...

زنجولا
بس استنى
هما قصدهم ما اتنشرتش فى جرائد وانت عندك مواضيع كتيرة فى البلوج ممكن تتقدم بيها
لسه فى وقت ممكن تتطلع كام رسمة وابعتها من فضلك
انا لانى مش من حقى اطبع صورك واسلمها وكمان مش عارفة اسمك وعنوانك كنت عملت كده
طلع الصور ومحدش عارف ايه ممكن يحصل علشان فى لحظة ما تندمش ان كان فى فرصة وانت حتى اترددت شوية
حالا قوم اطبع مجموعة من صورك اللى فيها افكار عن مواضيع معينة ولو فى حاجة ناقصة ممكن ترسم واحدة بس مش كله وامضى باسمك وشهرتك
من فضلك هيكون خبر رائع ان يكون فى حد موهوب فى حاجة واخد حقه
بخصوص منال انا معرفهاش لكن يقال انها شوهدت فى بيتزا هات فى شارع مصدق والغريبة ان فى نفس ذات الوقت شهودت فى ليتل سيزر فى جامعة الدول واجمع نفس ذات الشهود على رؤيتها عند عم محمد برعى بيعمل بيتزا مضروبة برده
معرفش هما كام منال بصراحة لغاية دلقوتى بس هى زمانها جاية
ما تقلقش علينا كده عامل زى بابا يا ساتر خلى البنات تتنفس بقى
تحياتى

الوردة السوداء said...

ايه نبرة التشاؤم دى
يابنى ده انت دكتور

حد طايل

ده انا ابويا كان حلم حياته انى ابقى دكتورة
ههههههههه

معلش
محدش بياخدها بالساهل

Nada said...

شوف طنطاوي ده اهداء
طبعا دي مش مقولتي بس بحبها جدا

الشيء الوحيد الذي نحن متأكدون من خسارته هو الشيء الذي لم نحاول الحصول عليه"


تحياتي

Dr. Tantawy said...

soosa el mafrooda


هنادي عليها حاضر :) بس الاول هسأل عنها بعض المقربين عشان اتأكد انها متغيبه بمزاجها مش بفعل فاعل ههههه

بالنسبه للجرايد :) خلاص .. في داهيه .. وحياتك انتي ما في زي المدونات و الناس الحلوه دي هههه

Dr. Tantawy said...

NADA

تعليقين مره واحده :) والله مش عارف اقولك ايه بجد .. ربنا يخليكي

لا موهوب ولا حاجه :) احنا غلابه هههه

المقوله دي جميله بجد :) وفعلا انا عملت كده و مش ندمان على الفرصه لأن الواحد عايش بين شخصيتين و لازم قبل ما يبدأ خطوه كبيره زي دي انه على الاقل يحدد نفسه .. و عموما مين عارف .. يمكن كمان كام يوم احدد نفسي و تبقى فضيحه ههههه

منوره المدونه و اهلا بيكي بجد مبسوط بزيارتك مع اننا لسه متعرفين قريب لكن وجودك زي الناس اللي بتيجي من زمان و اكتر كمان :)

Dr. Tantawy said...

MANO

بعد كده هديكي ميسد كووول اول لما انزل البوست ههههه

بالنسبه لمنال جت سليمه الحمدلله هههه

اما موضوع الكاريكاتير :) ف سيبك منهم .. هيه موريتانيا ربنا يخليهالي

تحبي اشوفلك عقد عمل هناك ههههه

Dr. Tantawy said...

dr.sherbo

فعلا عندك حق يا دكتور هههه

بالنسبه للنباطشيات تعالى يا عم .. مليانه و الله .. بس هتاخد 10 جنيه :) ليك فيه هههههه

Dr. Tantawy said...

3ola


اهلا بيكي:) حمدالله عالسلامه ههه

انا مش هزعل منك اكيد :) قولي اللي انتي عايزاه

انا مش بقول انه نحس 100% :) بس صدقيني في شويه حاجات غريبه بتحصل ملهاش تفسير غير النحس ههههه

طمنيني عليكي دايما

Dr. Tantawy said...

farida


ازيك يا ملكه :)) شوفي يا ستي

موضوع الكاريكاتير .. انا نفسي يوم لما ارسم في مكان ما .. يكون ب اسمي الحقيقي مش اسم شهره .. لأن الواحد نفسه يحس انه بيعمل حاجه لأهله :) و اقل واجب الناس تعرف (( لو نجحتي يعني )) انتي مين و اهلك مين ؟؟ ولا ايه

بالنسبه للقاء المدونين .. ف انا قلت في الاخر ان في ناس ممكن انساهم :) و انتي منهم .. مش نفاق والله .. بس فعلا انتي من الناس اللي عايز اشوفهم و لسبب واحد .. اعرف سموكي فريده ليه :) بتخيل من الاسم انك هتبقى شبه ستات الافلام القديمه هههههه

لو منال فكرت تعزمنا بجد في بيتزا .. هتكوني موجوده وعد :)) اوكي

و بعدين انتي تنوري النباطشيه و المستشفى كلها .. بس متكونيش مريضه اكيد انشاءالله :)) منووووره

Dr. Tantawy said...

مناااااال


حمدالله عالسلامه يا بنتي
خضيتيني عليكي والله
ايه القلق ده كله

عايزه تعملي نيولوك اوكي .. بس زمري .. اعملي اي منظر :) مش تختفي مره واحده كده .. مش كلام يعني .. ولا ايه

انا عايز اقعد مع العمال اتابع الشغل :)) اعمل ايه بقه هههه

اوعي تختفي تاني كده بلاش شغل العيال ده
و بعدين العزومه امتى ؟؟

على فكره معرفلكيش ايميل :) اللي عايزك بيجيبك منين ؟؟

حددي معاد العزومه و ابعتيلي اوكي هههه الايميل موجود قدامك

بس مش عايزين تأخير .. انا هجوع نفسي لحد ميعاد العزومه هههههه

Dr. Tantawy said...

Tota

منوره يا احلى توته في الدنيا :)
شوفي يا ستي .. انا عندي مشكله صغيره .. اني محبش اشترك في حاجه الا لو ضامن اني هعمل حاجه :) مش غرور لكن زي ما تقولي انا بكره الفشل بكل انواعه و صفاته
لو اشتركت دلوقتي بالطريقه اللي قلتي عليها دي .. يبقى ظلمت نفسي .. لأني حطيت وقت صغير و اضطريت اختار اعمال قديمه لمجرد اني الحق الميعاد مع ان اكيد في ناس بتجهز من زمان اوي و براحتها و عمله شغل عالي يعني

انا ضد فكره التمثيل المشرف دائما :) يا اما الواحد يدخل الحاجه عشان يسيب بصمه فعلا يا اما الله الغني :)) صح ولا ايه

وبعدين موضوع الاسم ده هيعمل مشكله كبيره .. و معتقدش انهم هيقبلوا برسومات معليهاش اي بيانات للاتصال .. يعني افرضي كسبت :) اخد الفلوس ازاي هههههههههههههههه

انا سايبها على الله :(

على فكره .. انا بعتلك ايميل طويل اوي بس مرديتيش عليه :) هوه مش انا كده يبقى افحتمك و هتكملي معانا انشاء الله :)) ههههه

Dr. Tantawy said...

الورده السوده



والله ضحكتيني هههههه

يا بنتي الدكاتره دول ازبل خلق الله ههههه كلها مناظر يعني بلا نيله

ربنا عتقك انك نفذتي من الطب ههههه

albida said...

متقلقش خالص... انا لسه عاملة للعمال شاى وسيباهم يخلصوا شغلهم
ولو شغلهم معجبنيش هجيبك تخوفهم
هههههههههه

لسه حاطط عينيك على العزومة؟!!!! صدقنى أخرى معاك هيبقى سندويتشين فول من جاد
هههههههههه

أنا الايميل بتاعى موجود فى البروفايل.. اول يمين على ايديك الشمال وبعد كده على طووول
ههههههه


manal

Dr. Tantawy said...

منااال


خلي بالك :) العمال اليومين دول بقوا نصابين و ممكن يبيعولك الهوا هههه

انا مش عايز جاد .. انا عايز بيتزا بيبروني كبيره .. خلاص :)) يا ريت تجهزلي من دلوقتي هههه

انا لقيت الايميل :) بس مش عارف اضيفه فين هههههه

amira said...

د/ طنطاوي
...
يعني إيه إعلان في الجورنال ؟؟
.....
ده خبر منشور سيتبعه ان شاء الله خبر تاني باسماء الفائزين المعروفة أسمائهم مسبقاً
فماتضايقش انك مش هتلحق تبتكر وماتزعلش علشان مانتش فاهم يعني ايه مبتكر
بدل ما تلحق وتفهم وتبعت وبعدها تشوف الرسومات الفايزة ماتجيش بنكلة جمب اللي انت قدمته
تخيّل ممكن يحصلّك ايه
...
اعتبر انك شوفت الخبر ده يوم 16 مارس
....
تحياتي

Dr. Tantawy said...

amira


يا عيني عليكي جايبه مالأخر والله
وجهة نظر محبطه لكن تستحق الاحترام :) و عموما اطمنك اني هاخد بنصيحتك

شكرا على الاهتمام :) و دعواتك معانا

واحـــد مـــــن الـنـــاس said...

انا يا سيدي عارف المسابقة دي من اسبوعين
ورسمت العمل المبتكر فعلا

وهوا شخصية سوبر هريدي

ابقى تعالالي وانا اوريهالك ان شاء الله

بس العمل المحلي والعالمي

فانا نفضت عشان ظروف حصلتلي كده
وبعدين يا سيدي سيبك من المسابقات والبتاع

فكك فكك

elbahr said...

بسم الله
وعسى ان تكرهوا شيئا وهو خير لكم
ادعوك لقراءة موضوع عن المصري اليوم في مدونتي
وبعدها هتقول لو جابولي ال5000 جنيه بدون كاريكاتير مش هاخدهم
تحياتي
البحر
www.ana-elbahr.blogspot.com

Nohaz said...

بعت لك أكتر من أيميل
و انت تجاهلته

اتمني بس تديني اكسس للمدونة بتاعتي
و تحطني ادمين فيها

كنت طلبت منك ده قبل كده و انت طنشت
و طلبت منك تعمل تعديلات و انت طنشت

يا ريت المرة دي تنفذ طلبي
شكرا

شهيدة said...

طنطاوي
ازيك؟ فينك ما بتطلش على مدونتي ليه
مش كفاية انا ما بديهاش اهتمام كافي؟

بالنسبة لموضوعك يعني معلش زي ما قلت خيرها بغيرها مع اني كنت أعتقد انك كان ممكن تخلص الكاريكاتور بيومين

أنا أؤمن بقدراتك ههههه
يللا بقى على الأقل انت بترسم مش زيي سبت الرسم من يوم ما دخلت الجامعة تقريبا ومن يومها مابرسمش غير ضفادع
ههه
بس من فترة قصيرة رسمت السيد حسن نصرالله
أو على الأقل حد شبهو ههه
المرة الجاية ابقى خللي بالك من الاعلانات ماشي
سلام

tantawyartz said...

واحد من الناس


سوبر هريدي ههههه

انا عايز اشوف هريدي ده ههه

ماشي ياعم..كويس ان في حد في مصر فهم يعني ايه شخصيه مبتكره هههه

ربنا يوفقك .. شد حيلك

tantawyartz said...

elbahr


اهلا بيك يا زميل المهنه :)) انا قرأت الموضوع عندك و تذكرت اكيد مناسبه كتابته و متفق معاك فيه كمان .. لكن ده لا يمنع ان المصري اليوم ككل شيء سيء .. هيه ليها مزاياها وعيوبها .. و لا تقنعني اني لو حبيت اقرا جرايد اروح اجيب الاهرام او الاخبار لأني بجد حسيت انهم بيضربونا على قفانا جامد اوي

تحياتي يا دكتور

Dr. Tantawy said...

nohaz


يا بنتي اتجاهل مين بس حرام عليكي
ايميلاتك مش بتوصل .. احلفلك ب إيه اني رديت على كل الايميلات اللي وصلت منك

اسألي عبدالله لأني لسه رادد عليه قريب .. الموضوع مش اضطهاد يعني

بالنسبه لمدونه مش مهم فانا اسمي موجود عليها لكن انا لغيب الاكاونت بتاع زنجولا . .يعني انا نفسي مش بعرف ادخل عليها

بس عبدالله لسه موجود يعني يقدر يعمل لوج فيها انشاء الله

بلاش تاخدي كل حاجه بعدائيه كده احنا صحاب مش اعداء يا بنتي :) اوكي

عملتوا ايه في موضوه الجراج سيل لأن فكرته عجبتني بس مستني تعملوا حاجه .. ربنا معاكو

Dr. Tantawy said...

شهيده


اما مش متأخر عنك والله :) بالعكس انا دخلت و كتبتلك تعليق على النيولوك الجميل :) لكن البلوج بتاعك مش كان عايز يقبل الكومنت مع اني حاولت كذا مره

سيبك من الكاريكاتير :) انا بفكر اقلب ضفادع انا كمان ههههه

هتحطي امتى صوره السيد نصر الله .. عايز اشوفها ضروري هههه

ربنا معاكي في الامتحانات انشاء الله ..تحياتي

Nohaz said...

شكرا
انا طلبت منك مش من عبد الله لان انا كنت بثق فيك فأديتك اكسس كادمينستريتور
عموما كده خلاص انتهت
و شكرا يا فندم

Nouran said...

يالا يا عم خيرها ف غيرها وقدر الله ما شاء فعل وبعدين هيجيلك عقد ان شاء الله ف كوالالامبور هههههه
ربنا يكرمك يا دكتور

Memo said...

gatna nila fe 7zna elhbab

enta malha ml7'bta m3ak kdab lih

y3ny elmosb2a tb2a metfsla 3la m2sk we tetl3 out

بس احب اقلك انك كسبت اعجاب مع كل واحد بيخش اي مدونه و يلاقي كاريكاتير ليك

يعني انا مكنتش مصدقه ان الي راسم رسومات مدونه
misirdigital

مدون كمان كنت فاكره وائل جبهم من جريده و لا حاجه

تحياتشي

smraa alnil said...

ههههههههههههههههههه
ااااااااااااااااااااااااااامين

بس موضوع الفانوس دة عادي
طول عمري بسمع عنه
بس انا بقي مؤمنة بيه من زماااااااااااان
بقولك ايه خدني جنبك كدة طالما احنا طلعنا مناحيس

Ma-3lina said...

ها وديت ابداعتك للمسابقة و لا لسه ؟؟
اما عن منال فالحمد لله هيا فتحت المدونة اخيرا و كتبت موضوع جديد كمان

Dr. Tantawy said...

NOHAZ


والله ما اعرف انكوا هتحتاجوه تاني يا نهى .. اعمل ايه بس

عموما لو في حاجه ممكن اعملها قوليلي لأني والله ما عارف انتي ليه مضايقه مني علطول

ربنا يوفق الحال انشاء الله

Dr. Tantawy said...

NOURAN


حمدالله عالسلامه :)
انتي فين يا بنتي .. خلاص المذاكره واخدها حدها معاكي

انا بحاول اكتبلك تعليق في المدونه مش بيرضى .. هيه دي مشكله من عندي ولا من عندك .. ساعديني يا بنتي !! انتي مش مهندسه برضه

Dr. Tantawy said...

MEMO


كتر خيرك ياختشي هههههه
انا فقدت الامل فيها و ف غيرها هههه كلهم كلاب و محدش فاهم حاجه ههههه

العزاء في عمر مكرم ..و لا عزاء للنسوان

Dr. Tantawy said...

سمراء النيل


ياااااه
اهلا و سهلا :) منورررره

حطي خيبتك على خيبتي
يبقوا خيبتين ههههه

يا مرحب :)

Dr. Tantawy said...

Ma3alina

والله ما بعت حاجه :) الشباب كله طلعها متضبطه و خلصانه و انا بصراحه كنت بتلكك ههههه

منور المدونه :)

Sampateek said...

مش يمكن خيرها في غيرها؟؟
بص بقى انت جهز افكار و شيلها في الدرج للظروف اللي زي دي
و يمكن لو كنت دورت في كراكيبك كنت لاقيت حاجات تنفع المسابقة دي

منال فين صحيح؟
ايه حكاية المدونيين بيختفوا كتير ليه

بجد حاجة تزعل انا كمان بدور على اوسا و زعلانة انها اختفت

تحياتي

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول