2006/11/12

احـــــذر


-

احذر من الشخصيه الكتومه .. فأنا كتوم و أنا اعرف اكثر .. لا تحاول التقرب اليها كثيرا .. لا تحاول الانصات او الاستماع اليها اكثر مما يجب .. إحذر .. فإذا عرفت حياتي السياسيه لن تعرف شخصيتي .. و إن كنت زميل دراسه .. فلن تعرف ما هو أكثر من ذلك .. وإذا تدفقت إلى حياتي العاطفيه .. و تداخلت في أحلامي .. فلن تعرف عني ما دون ذلك .. ربما حتى لن تعرف اسمي وقتها .. لو عرفت أني أكتب شعرا .. ف لن تعرف لمن أكتبه .. و لو عرفت اني أمتلك اصدقاءا كثيرين فلن تعرف أسماءهم .. ولو عرفت اني مصاب بمرض ما .. فهيهات أن تعرف مرضي .. ها قد حذرتك ... احذر من الشخص الكتوم .. لأن حياته قد تحتوي من المفـاجآت أكثر مما قد تتحمل

-

احذر من الروتين .. بيدك ان تغير بعضا من روتين حياتك .. لتتجنب نهايات مأساويه قد تكون سببا كبيرا في مشاكل اكبر مما يجب .. الطالب في اول يوم في الكليه بيدخل كله نشاط و حيويه و بمجرد مرور سنه و التانيه بيزهق و يمل من الروتين و يتحول هدفه من التفوق و تحقيق حلم إلى النجاح و خلاص .. و الراجل في بدايه جوازه .. بيكون متحمس و عاطفته ملتهبه .. لكن شويه شويه .. بيبدأ يمل و يزهق من الروتين .. يصحى و يفطر و يروح الشغل و يرجع ياكل و يناهد في العيال و يتعشى و يشوف فيلم السهره و يدخل ينام .. حتى المدونيين .. في بدايه الموضوع بتكون نشيط و عايز تحقق حاجه .. تبدأ تكتب تدوينه كل يوم .. وبتفكر فيها كل ثانيه .. لكن شويه شويه .. بتنسى .. و تتشغل و تبدأ تخلي كتاباتك مجرد ملي خانه .. بلاش كل دول .. ضباط الشرطه .. عمال الاسعاف و المطافي .. الناس اللي مسؤوله في كل لحظة عن انقاذ روح او ضبط جريمه .. حتى دول الروتين طالهم .. و للاسف المصايب بقت كبيره .. ضابط الشرطه من زهقه من محاضر الضبط و التغيب في النباطشيه .. بدأ يسلي نفسه بنزواته .. اللي عنده شويه ساديه بدأ يعذب في المتهمين .. و اللي عنده نزوات جنسيه بيبدأ يتحرش بالمتهمين رجاله و ستات .. لأنه للأسف ملقاش حاجه تشغله طول يوم العمل .. ولا بتوع الاسعاف و الاطباء المرافقين .. اللي شفت بعيني طريقه تعاملهم .. عامل الاسعاف او طبيب الامتياز الجديد .. بيكون في بدايه عمله .. اول سنه .. في قمه النشاط .. قمه الحيويه .. عايز يعمل كل حاجه .. و ينقذ الارواح زي الافلام و المسلسلات .. لو حصلت حادثه تلاقيه طالع جري .. و ركب الاسعاف وانطلق وبمجرد ما يوصل يبدأ يطبق الطب الصح .. علشان ينقذ المصاب ده .. لكن بعد كام سنه .. تلاقيه وصلتله الاخباريه .. يقوم يفطر و يشرب شاي و ينزل على مهله .. ولما يوصل .. بنوع من الروتينيه و الزهق من الحوادث دي .. تلاقيه غالبا بيكون سبب في موت الشخص ده بتصرفاته الغلط و المتسرعه و حاله اللامبالاه اللي عنده

مش عايز اكون سلبي .. خلينا نحط حلول ممكن تنفع .. بالنتسبه للطلبه .. محتاجين امكانيات تخلي الدراسه ممتعه .. داحنا يا جماعه يوم ما بندخل معمل ولا نستخدم اجهزه بنكون في قمه السعاده والمتعه .. يعني لو وفرنا امكانيات مناسبه كل الناس هتكون فيها حيويه و نشاط علشان تحقق هدف او تتفوق .. بالنسبه للجواز .. نفسي كل واحد بيتجوز يكون الجواز بالنسبه له هدف مش مجرد غايه .. يعني مش مجرد ما تخلص دراسه تقول انا عايز عروسه .. شوفولي عروسه اصلي عايز اتجوزها .. انما العكس بقه .. لما تلاقي واحده تستاهل و تحبها .. تبدأ تشوف طريقه توصلها بحق ربنا .. وبدون لعب عيال .. علشان تحقق هدف اسمه الجواز و الاستقرار .. ساعتها صعب اوي تكون في روتينيه او ملل و حتى لو فيه .. يبقى عالاقل في تفاهم ... اما الناس بتوع الشرطه و الاسعاف و المطافي .. محتاجين دورات تدريبيه حقيقيه .. و تعليم لأساليب التحقيق و الانقاذ و التعامل مع البشر بطريقه مختلفه عن التعامل مع الحيوانات .. اعتقد ان وجود برامج زي دي .. في وجود الامكانيات المطلوبه .. ممكن تقلل الروتين .. و تخلي الحياه تمشي بطريقه اسهل و افضل

9 comments:

Mongey said...

انت مبدع موضوع جامد اوي انت مبدع صح
خليك في امتحانات علي طول لو الامتحانات
بتخليك تبدع

sherehan84 said...

بالعكس أنا بحب الشخصيه الكتومه بتحس بفرح وانتصار كل ما تقدر تطلع منهم كلمتين عن نفسهم ..

ROMIL said...

أحذر
GOOD PLAY
يا طنطاوي
ROMIL

أحمد المصري said...

على كده أنا لازم أحذر من نفسي بقى 00ههههه000
غيبتك طولت بس موضوعاتك كالعادة 00رائعة 0

Egiziana in US said...

Yes! Excellent as usual ya Doctor! To avoid routine, you need two things:
1. to love what you do (in the case of work) or who you're with (in the case of marriage). Passion is an extremely important driver for people. I dont mean wild passion that is known in arabic as (el-hawa) but real mature passion (7amas)!
2. If you don't have passion for what you do, then at least you should have taqwa Allah. Knowing that Allah is watching you and will judge you on every little action that you do in every aspect of your life should make anyone think twice before harming others.

I like your ideas. Keep them coming!

..........tahayo2at said...

نسيت حاجة مهمة جدا يا طنطاوي

احذر من الأهلي
احذر من أبو تريكة

و دا جزاء اللي يتمنى الفوز للتوانسة علينا يا أخي
و اذا كنت ناسي ارجع للبوست بتاعك

عموما
عملوها الوخوش و اسعدوا 50 مليون مصري و هم الأهلاوية
و عكننوا على العشرين اللي فاضلين و معاهم حبة توانسة عالماشي

برشة برشة
أبو تريكة رجله طرشة

لحظة صدق said...

مممممممم
صح
الروتين ده بهدلنا على ماخلصنا الكلية
و لسة ياما هانشوف
و ياخسارة لو كنت كتبتها من كام سنة فاتو كنت احترست نفسى
بس خلاص بقى ياللا!
بس فعلا الواحد لازم يحذر الناس الكتومة دى
بس انا عن نفسى باشجع الدردحة
لما تلاقى حد مقفل مش بمزاجه يعنى خليك وراه
احنا برضه كلنا اخوة و فى حاجة بعض....ده مبدأ

Dr. Tantawy said...

@ mongey
ربنا يخليك يا باشا .. بس بلاش دعوة الامتحانات علطول دي هههههه



@ sherehan
وجهة نظر حلوه يا دكتوووره .. التعليقات النهارده معظمها دكاتره هههههه



@ romil
thanks man



@ ahmad el masry
ربنا يخليك يا جميل .. انا هحذر منك انا كمان ههههه




@ egiziana
you are totaly right ..
and the most important thing is that you r here again :)) thats really great enough for me !



@ dr.sherbo
ماشي يا عم الاهلاوي .. احنا مش بنشمت في حد .. مبروووك يا عم الجون الكفته و هنعديلكم التلات تسللات الفشنك و الجون اللي اتلغى هدر .. اللي على راسه بطحه ههههه



@ la7zet sedq
فلتحيا الدردحه يا دوك ههههههه

tota said...

زنجولة

حبيت اعلق على البوست ده
لانه كان حديث النهاردة
السلبية ام الملل ام التعود
كنا بنشوف احداث فلسطين فى التلفزيون ونتألم ونبكى ومع تكرار نفس المشاهد اصبح الامر عادى هذا هو ابشع مثال عندما يصبح القتل شىء عادى يومى

كل ما تقارنه بعد ذلك بهذا الحدث يعتبر اقل

بالنسبة للعمل هو ليس فقط روتين وملل لكن الاهم دائما ان نتذكر اننا نعمل لارضاء ضمائرنا بغية ارضاء الله
لو وضعنا فى كل خطواتنا فكرة ان الله رقيب علينا ربما يفلح هذا فى استمرار العمل بضمير هذا فقط لاصحاب القلوب العامرة بحب الله

تحياتى