2006/11/16

ميكس بوست

شريف
هو مذيع .. بس بصراحه انا بعتبره كائن من فصيله الرخويات الفريده من نوعها .. غير محدده النوع .. بتتكلم في الطبيخ .. و عليها .. قصدي عليه حته ( ألو .. إزيك .. تجنني ) بجد تجنن .. و الالذ من كده ان كل المكالمات اللي بتجيله من ستات .. بصراحه انا من ساعة ما شفت الشيء ده من حوالي سنتين كده و انا عندي ذهول و كنت متصور انه خلاص انقرض طول الفتره دي لكن فوجئت امبارح انه لسه موجود على قناه النيل للاسره و الطفل .. نداء للمسؤولين .. خلصونا من هذا الـشريف اثابكم الله






الاوركيد
اغمض عينيه .. ورأها امامه .. تماما كما رآها اول مره .. تماما كما تدفق الدم الى قلبه في غزاره استعداد لهذه المعركه العاطفيه الشديده .. فهذا الوجه الملائكي و تلك الربطه الناعمه لغطاء راسها جعلتها امراه رقيقه من تلك اللاتي يراهن في مسلمات اوروبا .. لها نفس الرحيق و نفس الملامح .. كان دائما ما يراها زوجته و حبيبته و ام ابناءه .. هي أم لاقصى درجات الامومه الحانيه .. فطرتها تشع من عينيها .. خلقت لتحب و ليحبها .. يفتح الان عينيه .. على امل ان يراها .. بل حتى على امل ان يكون يوم جديد يجعله قادرا على رؤيه هذا الحلم .. ان كان حلما .. مره اخرى ... لكن الحقيقه كانت اصعب .. فالنور لم يصل عينيه .. وتلك الخلفيه السوداء القاتمه مازالت هناك .. لا لم يمت بعد .. فهو لا زال يسمع .. لا زال يشعر بوقع الاقدام من حوله .. لكنه تذكر الان .. الان فقط .. انه فقد عينيه للابد .. و انه فقد معها هذا الوجه الملائكي .. الذي فارقه يوم ان فارق النور عيونه



خاطره
ماذا اقول لهم عن العذريه .. لا يعلمون حقيقه .. الا القليل
فلتأذني .. أن اكشف الاحجيه
واقول عنكي .. قصه مرويه
لست فتاه صعبه التأويل
عذرا لكم .. ما الجسد أصل الغيه
ما اللمس وحده يقطع .. ظلمه العذريه
بل صوت همس .. او حديث عابر
او طرف عين .. ملهوفه وشقيه
ف اميرتي .. كالورده البريه
قد اشعلت من حولها البشريه
لكن يدا لم تقارب متنها .. حتى العيون تخالها مخفيه
تاج الحياء و حمره .. في وجنها
في غمره الاطماع .. خير هويه
لم تلبس الاغلال .. لا .. لم تختفي
ف لها و عمري .. مطلق الحريه
لكن نفسا في صفاء حبيبتي
لا اخشى يوما ان تكون رديه




مصر في الجلابيه المقلمه
مش عارف ليه فجأه افتكرت احمد حلمي في فيلم زكي شان .. لما كان بينزل كل يوم بليل و يقابل بلطجيه و ياخدوا هدومه و يرجعوه البيت بجلابيه مقلمه و مقطعه .. افتكرتها لما افتكرت بلدنا .. عظم الله اجرها .. طول عمرنا .. بنزل الشارع بليل .. في الظلمه .. نقابل البلطجيه .. على مستويات مختلفه .. و نقعد نزعق و نقول المره دي لأ .. و شويه شويه .. نقول البنطلون لأ .. البنطلون لأ .. لكن ف الأخر بنرجع لابسين الجلابيه المقلمه و قفانا يقمر عيش .. مش مصدق .. طب افتكر معايا كده .. خناقه حرب الخليج .. خناقة الخليج يا جدع .. لما نزلنا الشارع وفردنا عضلاتنا قدام امريكا و قلنا نحلها ودي و فالاخر دخلنا بالجيش بتاعنا في قوات التحالف علشان رجالتنا تموت تحت الدبابات الامريكيه في حرب الخليج .. بلاش دي .. حرب العراق .. الأخرانيه دي .. قبل ما امريكا تدخل و بعد التهديدات المستمره لصدام .. نزلنا الحاره و فردنا دراعتنا للمره التانيه و قلنا حرب لأ .. و كفايه افغانستان و سيبونا نكلم صدام .. و كانت النتيجه .. رجعنا لابسين الطرحه و العراق اتفرتكت ميت حته .. وبرضه لبسنا الجلابيه المقلمه ... ها.. لسه مش مصدق .. خد عندك حرب لبنان .. قلنا سيبولنا اسرائيل و احنا بكام تليفون من سنترال ام دعبس هنخلص الليله و كالعاده .. خدنا على قفانا و لبنان اتشخرمت ضرب .. قوم قلنا نتفق مع السعوديه و الاردن و نقف ضد حزب الله يمكن المره دي تعدي .. برضه مفيش فايده .. و الشعب العربي كله المره دي وقف لنا و لبسنا الجلابيه اياها .. يارب تكون اقتنعت .. ايه ده .. لسه .. طب خلاص بقه .. اقولك موقف ابن يومين لسه ..فاكر لما عنتر .. اقصد جمال .. قال ان مصر هتديها نووي .. قمنا هللنا و سقفنا و قولنا بيس يا مان .. اهه كده الرجاله .. وغنينا .. وقف الخلق ينظرون جميعا كيف ابني قواعد الصواريخ وحدي .. لكن يا فرحه ما تمت .. اهي الضبعه هتتباع ارض سياحيه و النووي بقه في البلح .. ورجعنا للجلابيه المقلمه .. و طلع كل الجيران يتريقوا علينا و يحدفونا بالطوب .. وهندخل بيوتنا نطاطي و نشغل الراديو و نسمع .. هنا القاهره .. تتتتتتششش



الشعر المنسوق .. في وصف امتحان الجراحه الخازوق
ليه يا ربي الامتحان .. يبقى فتح من الفتوح
ده ياربي ضربه قاضيه .. تملى قلب الناس جروح
الشباب عجز و بدري .. محتاجين فوق روحنا روح
الدكاتره ناويه نيه .. نيه سوده مستويه
ناس دماغها ميه ميه .. عالخابور نشن و روح
ولا هيه الدفعه ديه .. اللي جايبلنا الرزيه
مستعد انقل و اروح .. استخبي في السطوح
شيء يجنن
لما جت في ايدي ورقه الامتحان
كنت هبكي
قلت لأ .. انشف يا راجل
البنات راح هيه تبكي
قوم الاقي كل واحده .. تسمك الورقه و تنوي
والقلم في ايديها مبري .. عالسطور عمال بيجري
والشباب يا عيني لايص .. اللي ساكت و اللي مهري
والدكاتره تعدي بينا .. ترمي كلمه اوام و تجري
قال يقولك فيه graft
تبقى راجل لو عرفت .. حتى اسمه
حتى لو حوليك سألت .. و التفت
حتى لو غشيت يا خويا
حتى لو نزلت تحت .. و رحت جوه القسم تسأل
ادي دقني لو فلحت
والسؤال التاني بعده
ليه يا جرح النقح صابك
مش كفايه اللي جرالك
عيش و جمّع ف السؤال
راح تألف م الخيال .. المهم انك هتكتب
اي كلمه .. و اي درجه ليك حلال
ايه يا دكتور .. لسه فاضل منك ايه
في اللي جاي هتقول عليه
لو هتسأل في الجراحه .. قول ومتخبيش يا بيه
المصيبه بجد انه .. السؤال الصعب جالنا
قوم تجاوب لينا انته .. يبقى ليه
جاي تطلع عين ابونا
و النكد عللى جابونا
يعني مش خالصين يا دكتور
م العذاب اللي احنا فيه
فات سنين و السبعه جايه
واحنا في الدوامه ديه
والوشوش حوالينا واحده
كل مره .. هيه هيه
اللي قدي خلاص مخلف .. ده العيال عزوه و حميه
نسيتونا ان احنا برضه
محسوبين عالانسانيه
خليتونا .. حمضانين زي اللمونه
عشنا بس عشان بناخد .. امتى ندي
امتى بس يا ناس نعدي
امتى نبقى .. زي كل الخلق ديه
وترحمونا من الاذيه
طبعا طلبه الدفعه همه اكتر ناس فاهمين الموضوع ده .. و حسبي الله و نعم الوكيل هههه

-



لو لم تكن اهلاويا لوددت ان تكون زملكاويا
يا ابو تريكه .. يا فنااااااااان

----------------------

نداء عاجل إلى توته .. إنتي فين يا بنتي .. استفقدتك والله هههه .. يارب يكون اللي مانعك عنا خير يعني

8 comments:

أُكتب بالرصاص said...

بالنسبة للشريف

يووووه

في في الفضائية المصرية شاريفات كتيرة
الواحد بيتكسف لهم والله



بالنسبة للجلبية المقلمة


والله عندك حق

كل جلابية وجلابية

الدولاب اتملى

ونسيت على الجانب الافريقي كمان

بقى ولا لينا لازمة خالص
وده بسبب ...

عصر الرخاء اللي احنا فيه



بصراحة
اشكرك على الموضوع الرائع والتحليل الاروع

هو التحليل بكام !والنتيجة امتى ؟

sherehan84 said...

أنا متهيألي الدكاتره دول قبل ما بيحطوا امتحانات بيبقى لهم هم نفسهم امتحان يختبروا فيه السلامه النفسيه لهم واذا طلع سليم ميحطش امتحانات واذا طلع معقد ومكلكع يدوس .. يدوس الطلبه طبعا :))

ROMIL said...

يا نيكساتك يا مكساوي
ربنا يعنيك على امتحاناتك اللى مبتخلص
أما بخصوص الجلابيه ممكن أضيف أننا بعد ما أنضربنا من البطجية وصعبنا عليهم وأدونا الجلابيه قابلنا بلطجية تانيين خدوا مننا الجلابيه وفضحيتنا بقت بجلاجل
ربنا يعينك

DR.SHERBO said...

اهلا تاني

بالنسبة لشريف
انا شايف ان دي مشكلتك الشخصية لأن القنوات المصرية على مسؤلية من تسول له نفسه مشاهدتها


بالنسبة للجراحة
انا هابعتلك امتحان الباطنة بتاعنا(طب المنصورة) علشان تعملوا قصيدة لأنه للاسف لسة ما اتعملوش رغم انه يستاهل معلقة

بالنسبة للجلبية المقلمة
ممكن نستبدلها بفانلة بيضة مقلمة بخطين حمر؟

بالنسبة لابو تريكة
معشوق الجماهير و حبيب قلبي و ربنا يوفقه لأنه يستاهل كل خير

tota said...

زنجووولة

والله جيت لوحدى بس فى الاخر لاقيت فى نداء
اصل انا كمان يا زنجولة فى هم الدراسة مشغولة
مملولة ومخنوقة من رسالة طويلة ملهاش نهاية دى سادس سنة وانا وراها والزمن طويل هانت فاضل صفحات قليلة بس هى الخلاصة
يا اخى كرهت الدراسة انا اصلى Clinical patholoy
المهم استنعنا على الشقا بالله
تعالى على اليمين شوية

الحقيقة الحمد لله معرفش شريف ده خالص بس لو من الرخويات فى مبيد هايل هقولك عليه علشان الكائنات اللى من النوع ده تتبخ وتريحنا


بعد ما استرسلت فى الاوريكد قد ايه كانت ناعمة وفجأة طعنى الحزن و قلت اد
ايه نور عيننيا غالى علينا

العذرية كلمة منسية فى عالم غزته الحرية فقضت على كل عذرية واصبحت مجرد كلمة تذكارية زيها زى الانوثة المطوية


الجلابية المقلمة مفيش غيرها فى الدولاب من كل الالوان يظهر انها الزى الرسمى المصرى


امتحان الجراحة بقى فكرنى بالجثة اللى فى الحجرة المجاورة اللى هى اختى وعندها امتحانات دكتوراه بعد بكره يعنى يوم الاحد
وصل ضغطها امبارح وهو يقفز مسرعا من 160/110
ثم الى
190/130
بس الحمد لله كان انزار كاذب لان الجهاز ديجيتال ولم ينجح مع ضربات القلب المرتفعة فى اصدار ارقام سليمة

بالله عليكم يا دكاترة كلية الطب ارحمو ا الجيل الجديد وافهموا ان الحياة لن تدوم لكم دى سنة الحياة ان الجديد يحل محل القديم الحياه مش حكر على حد
اعدلوا فى الارض حتى تنالوا عدل السماء

واخيرا مبروك لابو تريكة وللاهلى ولمصر

وتحياتى

عبدالله مفتاح said...

طنطاوي ازيك يا قلبي وحشني والله
انا عايز اشوفك بجد
مينفعش كده كتاباتك بحبها اوي

Dr. Tantawy said...

@ اكتب بالرصاص

التحليل غالي يا جميل
بس علشانك في تخفيضات هاااائله هههه





@ sherehan
قولي منهم لله .. كفايه اوي هههه


@ ROMIL
حلوه و ملعوبه .. بقينا بلابيييص


@ dr.sherbo
يا أهلا يا دكتور
مستني اشوف امتحانكم يا باشا :)) متوقع كل خير .. المنصوره معروفه يعني هههه

بالنسبه للجلابيه البيضا .. بايخه هههه



@ TOOOOOTAAAAAAAAA

منوره بحد
و انشاء الله ربنا معاكي
اول مره اعرف انك باثولوجي بس دي بسيطه يعني كلها شويه صبغات و اديله سلايد ههههه
بالنسبه لاختك ربنا معاها انشا ءالله
واضح ان العيله كلها دكاتره و زمل

اتمنى يكون نداءك وصل لمن يهمه الامر هههه

مستنيكي دايما



@ عبده
والله انت واحشني اكتر يا باشا
بس متابع مدونتك و خناقاتها علطول .. خصوصا السوسته هههههه

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول