2006/11/11

الجراحه راحه

الحقيقه .. و الحق يقال انه يوم مفترج .. امتحان جراحه غريب لم تشهده اي كليه طب فيكي يا جمهوريه مصر العربيه .. لكن عموما اهه عدى على خير .. وبصراحه الواحد راجع بشوق ولهفه .. حلوه لهفه دي .. لناس كان اتعود عليهم و حس انه تقريبا بقه واحد منهم .. و تخيلت اني لو في فتره من الفترات جيت لاي حد فيكم البيت هيدخلني علطول على اوضه الجلوس و يكون البساط احمدي زي ما بيقولو .. لكن دلوقتي .. و في ظروف الامتحان و البعد حاسس اني رجعت بقيت غريب عن الناس و اني لو جيت لاي حد فيكم يا اما هيكرشني من على الباب و يقولي معلش اصلي مش موجود .. او احتمال لو دخلني .. يدخلني على اوضه الضيوف و يضايفني بكوبايه بيبس بدون صودا و يقولي يا بخت من زار و خفف
بالمناسبه .. البوستات الطويله ستكون قدر كل من يدخل المدونه الفتره القادمه .. و لحد يوم 16 يناير تحديدا .. اللي هوه اخر يوم في امتحاناتي انشاء الله .. فياريت محدش يقول زهقت و مش عارف ايه .. اقرأ كل يوم حته صغيره و كأني بكتب تدوينه جديده كل يوم .. و بعدين انا بعمل موضوعات منفصله علشان اسهل عليك المتابعه .. ماشي يا قوم
-
حرب الجينات
بصراحه يا بشر .. من خلال ملاحظتي للحركه في الطرقات .. لاحظت .. بنظره طبيه و علميه بحته .. ان البنات بقو كلهم رجلين و بس .. يعني ماشاء الله الجيل الجديد من البنات .. او الآنسات .. بقت رجليهم اكتر من تلات ارباع طولهم .. و باقي الجسم على بعضه هو جسم طفله صغيره .. اما الشباب .. فحدث و لا حرج ... حاله قصر عامه مسيطره على كل الجيل الجديد .. و شعور ناحله بطريقه غريبه .. الواحد بقه خايف لتكون ملاحظاتي الغير احصائيه البتنجانيه دي مغلوطه او على عينه غير دقيقه .. لكن اعتقد ان كليات طب و صيدله و اسنان و علوم و حقوق وهندسه هي عينه كويسه .. ولا إيه ؟؟ عموما .. في شويه لخبطه و تعديلات في الخرائط الجينيه البشريه .. و ربنا يستر من الجيل القادم .. اللي هتكون اكبر مشاكل تواجهه .. هي كيف يأنجج الولد الأزعه خطيبته البنت ام رجلين طويله
-
أنا رجعي للوراء .. خد بالك
ايوه انا رجعي .. و رجعي جدا .. خصوصا في موضوع البوديهات ده .. مش عارف ليه مش قادر استوعبها .. معظم المحجبات دلوقتي بيلبسوا نفس لبس الغير محجبات .. الفرق الوحيييييييييد هو الطرحه على دماغها والبودي اللي ملبوس تحت الهدوم .. او تقدر تقول تحت الجلد .. يعني الاخوه الشيوخ الافاضل اللي ماسكين موضوع غسل الصابع الكبير في الوضوء الاول ولا باقي الصوابع ... ولا موضوع الهرش في الراس بالسبابه ولا الابهام .. يحاولو يركزوا انظار الناس على موضوع اللبس ده .. لانه تقريبا بقه عادي جدا و كل الناس مسلمه بيه كأمر واقع
فكروني بأغنيه الفنان الكبير اوي طبعا .. سعد الزغير لما قال
البودي البودي البودي
أحمر .. أصفر .. أخضر .. ابيض
ابيض و زي الزبده .. و اطعم ياناس مالقشطه
صغير و شكله خطير .. وعيونهم عليه سواطير
ده ضيق يا ناس و محزق .. و كتافها عليه بتلزق
-
صباحه عقد و كلاكيع
الشباب اليومين دول جامدين اوي .. تلاقي البت .. قصدي الواد من دول .. لابس سلسله .. و متسيغ على سنجه عشره .. و مطول شعره و لابس بودي احمر و احيانا شفاف .. و عامل مايك آب كامل و شعره موزمبليط عند الكوافير و كله في البيس يا مان .. يعني بصراحه .. كله رجوله .. من اول شعره المدعوك جل .. و حواجبه المنتفه و ضحكته و لا مشيته .. ياي ياي .. راجل من ظهر راجل يعني
يقوم ايه بقه .. ييجي على العربيه الغلبانه اللي راكبها .. و يشيل المساحات الاماميه .. و يركب بدل الاتنين مساحه واحده في النص .. و يسيبها في وضع النص .. يعني مش في مكانها تحت .. لأ .. يخليها في نص الازاز بالضبط .. التوضيح في الصوره ههههه .. ولما تسأله ليه ده .. يقولك .. ده رمز للرجوله .. ههههههه .. يا عيني على جمالك يا مصر

-
تبرعوا
طبعا مش محتاج اقول فايده الصدقات و التبرعات .. لكن بصراحه .. حتى عمل الخير بقه يجيب الهم و يضحك في نفس الوقت .. عقبال املتكم كنت بقرأ في جريده الاهرام الغراء من كام يوم ولقيت فيها جزء عن تبرعات القراء .. قوم الاقي مكتوب .. تبرع بمبلغ الف جنيه السيد اللواء فاعل خير .. بصراحه .. مقدرتش امسك نفسي من الضحك .. لفتره من الفترات كنت بقول الموضوع ده لصحابي على انه نكته .. يعني لما واحد ريس او وزير يتبرع كنت بتخيل معاهم هيتبرع ازاي .. لحد لما لقيت الكلمه دي قدامي مقدرتش امسك نفسي و كان منى عيني ابعت للجرنان اقوله .. عظمه على عظمه يا ست .. المفروض كلمه فاعل خير الغرض منها اخفاء شخصيه المتصدق طمعا في الاجر و الثواب عند الله و بعدا عن الرياء ... الريااااااااء و النفاااااااااااق .. يبقى منين بقه .. يا سياده اللواء

-
لا يصح الا الصحيح
ليه نطلب من واحد نازل الشارع في العيد انه ميقولش كلمه خارجه لبنت .. او ميمدش ايده عليها .. هتقولي عيب و ميصحش .. و الدين مقلش كده .. هقولك هوه انته ليه تفتكر الدين في اللي يمشي معاك و تنساه في اللي ميمشيش معاك ... يعني لما دينا وقفت ترقص ف وسط البلد .. محدش قالها تلت التلاته كام .. و لما البنات نزلت في المولات لابسين من غير هدوم محدش قالهم الدين بيقول .. اشمعنى بقه المتحرش .. هتقولي انه اعتدى على غيره .. و مين قالك ان اللي رقصت و اللي قلعت متعدوش على حدود الغير و منتهكوش خصوصياتهم .. و لا هوه التحرش لازم يكون جسدي و جنسي .. التحرش معناه اي تصرف او فعل يؤذي الطرف الآخر نفسيا او جسديا .. فكر فيها و اعقلها .. يا بشر لا يصح الا الصحيح .. المطلوب ان الناس تحب الدين .. مش انه يتفرض عليها .. مش عايزين نكرر تجربه السعوديه .. شباب بيجبروه على الدين لحد لما يتحول لقنبله موقوته و طاقات مكبوته .. لازم احنا نحب الدين .. لازم نحبه علشان نفسنا وإلا .. عليه العوض فيك يا ابو رياض
-
تاني .. تاني .. تاني
نقيب الفنانين .. احال الفنانه الفيلسوفه دينا للتحقيق .. لأنها هزت وسطها في وسط البلد .. امام الاف الشباب اللي كان جاي و كل مناه يشوف فيلم .. مناظر فقط .. اسمه .. عليه الطرب بالتلاته .. فاذا المناظر بقت واقع .. و احلام اليقظه اللي قضاها كل منهم قبل ما ييجي الفيلم يتخيل الافيش و الترايلر بتاع الفيلم و يا ترى المشاهد سخنه قد ايه .. تتحول كلها لحقيقه .. و يصاب الجميع بهياج .. زي ما سموه يعني .. لان كل واحد بدء في رسم سيناريو احلامه الخاصه به .. ومش عارفين ان كل الحكايه ان الست دينا كانت على الفيبراشن موووود و نسيت تغيره


9 comments:

Epitaph said...

وحشتنا يا عم طنطاوي بتدويناتك الطوييييييييلة

هههههههه

ايه ده؟
بتقدملي بيبسي من غير صودا
و بتقول لي يا بخت من زار و خفف
؟؟

ما كنش العشم

:D


المهم..موضوع لبس المحجبات قتلنا بحثا
واموت اعرف الاختراع ده ايه بالظبط
و الله يهدي الجميع
ح نقول ايه بس

دينا و موود الفيبراشن؟ مش كانت عملاه SILENT??

اما بقي الجديد و اللي مش فهماه موضوع العربية و المساحة دي
و لا فهمت الصورة
ايه النظرية يا دكتور؟؟

و السلام ختام

امضاء
epi :))))

sherehan84 said...

حمدلله على السلامه
أنا بعتلك ايميل على الميل المكتوب هنا في الصفحه .. ياريت تكون بتفتحه وياريت تقوللي ردك عليه
شكرا

Dr. Tantawy said...

حمدالله عالسلامه يا شعب .. انا جيت .. هههههه
---------------------------------

اولا : ردود التدوينه السابقه


@ Egiziana :
Thanks alot dear frined , it was too cute to hear from you again .. your words are totally TRUE and wish it all happened .. lets we all think about more practical ways to achieve these ideas !


@ المواطن المصري العبيط
قرأت تدوينتك و بصراحه جميله و ليه تعليق صغير عليها كتبته عندك
اما موضوع ابو بكر المسكي .. فانا لم اقرأه .. وانما سمعته في برنامج احلى حياه .. في قناه اقرأ .. يا ترى فيه حاجه غلط ولا ايه


@ OD
thanks alot , nice to have you here for the first time !


@ TOTA

عروسه التعليقات
ليكي وحشه والله ههههههه

اولا لسه بدري قدامي لحد 16 يناير .. ف مش حرحمك من التدوينات الطويله .. مش بس كده .. انتي بالذات مطلوب منك تقرأيها كلها هههههه

موضوع الافراح ده مصيبه محتاجه مدونه مخصوص مش تدوينه بس هههههه

موضوع وسط البلد .. موافق معاكي تماما انه حصل تهويل .. بس بصراحه صوره الناس و هيه بتتحرك جماعات دي مرعبه

اخيرا ..انا مبعتش للوعي المصري ومش بنشر فيه يعني . المدون اخد الرسومات من عندي و اشار للمصدر و ده حقه .. دي كل القصه





---------------------------------
ثانيا : ردود التدوينه الحاليه


@ epitaph

يا بنتي انا بقول انتو اللي هتقدمولي مش انا .. انا كريم مووووت .. هعزمك على عرقسوس هههههه

موضوع العربيه مفيهوش توضيح اكتر من كده :)) انسي الموضوع احسن ههههههه



@ shrehan

الله يسلمك يا دكتوره
انا قرأت رسالتك و انشاء الله اوعدك التدوينه تكون جاهزه قريبا جدا .. بس انتي لسه بدري عليكي .. مش لسه في سنه خامسه ؟؟ انا فاضلي كام يوم و اواجه مصير الضياع ده ههههه ادعيلي

عبدالله مفتاح said...

لالالا يا طنطاوي انا بيني وبينك توافق روحي رهييييب
ياباشا مستنيك تخلص امتحانات عشان نقطع الدنيا
ربنا يوفقك

Mongey said...

ايه عم ده بس
ما انت فايق و كويس
امال ايه الامتحانات؟
و البتاع
مانت مبدع اهوا
و بالنسبة لحتة المساحات دي اول مرة
اسمع عنها
بس شديدة
حتة البودي
ديه
الامتحانات جايبة مفعولها معاك كويس اوي

bEscUitA said...

كلام جميل
بس انا هاشبط فى حتة نحب الدين
انت عارف عشان تحب حد لازم تعرفه
و الناس دى اصلا مشكلتها انها ما تعرفش دينها ليه بقى
عشان مجتمعنا مش بيعطى فرضة دلوقت غير للى بيدور بجد عن الدين انه يفهم دينه
يعنى مش هاتلاقى هوم ديليفرى اسلام
بس هاتلاقى هوم ديليفرى
دينا و سعد و كل دول و اكتر من دول
احنا طول ما الاعلام فى بلدنا مش مركز غير على الفن اللى انت عارفه بالطريقةدى و الدين شئ مهمش دلوقت رغم البرامج الدينية اللى على القنوات الدينية بس دى عايزة حد بيدور عليها مخصوص
يعنى مثقف
يعنى بيفهم قوى
يعنى مش حتى نص المجتمع بتاعنا اللى
ممكن يكون مش بيحاول يدور على اللى ينفعه بجد
و بما ان فى ناس مستفيدة خلاص
يبقى كل واحد على مسؤليته

bEscUitA said...

و بجد الجراحة راحة

Dr. Tantawy said...

@ عبدالله
راجعلك قريب اوي يا جميل


@ mongey
تشكر ياجميل .. كل مساحه و انت بخير هههه



@ لحظة صدق
معاكي في كلامك ابسولوتلي توتالي

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول