2006/10/30

حمدالله عالسلامه يا ضنايا

تحديث : تم إضافة كاريكاتيرات .. هياج وسط البلد .. في آخر التدوينه .. بجد .. حاجه تكسف
-

حمدالله عالسلامه .. ده انا بقول لنفسي يعني .. اصلي بقالي كتير اوي غايب و بصراحه النت وحشني جدا.. و بجد كان نفسي ارجع اكتب حاجات كتير لكن اجازتي هتكون يوم واحد بس .. اللي هوه النهارده و هرجع اكمل تاني مذاكرتي لأن الامتحان الجاي كمان عشر ايام .. ربنا يسهل .. المهم بقه ندخل في الموضوع .. كان نفسي اكتب حاجات كتير لكن واضح ان الناس مش طايقه تقرألي كتير وعايزه تختصر ف قلت اقضيها حاجات كده عالماشي من وحي رمضان و العيد اللي قضتهم في العيد بذاكر نسا وولاده .. شفتوا حد يذاكر نسا وولاده .. في رمضان .. حسبي الله ونعم الوكيل .. و كل سنه و انتو طيبين
-

قرأت في الصحف : ان تونس منعت الحجاب او على وشك المنع .. و مسمعتش لا مظاهره في الازهر ولا احتجاج في المريخ .. مع ان فرنسا .. اللي مش مسلمه .. لما عملتها .. الدنيا اتقلبت و مقعدتش لحد دلوقتي .. حد فاهم حاجه
لبنان : بلد جميل .. موضه و فن و ذوق .. لكن اللي فاقع مرارتي .. اننا مصرين نخلي لبنان كابريه مفتوح .. لو واحده لبست عريان او مشيت من غير هدوم تقلك شوف لبنان .. مع اني برضه بشوف لبنان .. و شايف فيها ناس زي الفل .. و شيعه و لبسهم محترمه .. حجاب زي ما ربنا بيقول .. و مشاهد ملائكيه للغايه .. و مع كده .. لبنان .. هتفضل بالنسبه لنا .. هيفاء وهبي و نانسي عجرم .. عجبت لك يا زمن
الحياه اكاديمي : الدنيا دي فعلا .. ستار اكاديمي كبيره .. و لله المثل الاعلى طبعا .. احنا عايشين فيها مسابقه .. تحت المتابعه 24 ساعه .. لعين الذي لا يغفل ولا ينام .. ومع كده .. مطنشين عالآخر .. كل واحد بيبرطع في الدنيا براحته .. و بيغلط بمزاجه .. تخيل لو انت في برنامج بجد .. كان زمانك منتهى الجنتله و الذوق و الشياكه .. انما هنا .. في الدنيا .. مفيش دم .. و كل واحد ماشي على حل شعره و مديها طناش .. عموما .. البرنامج مسيره هينتهي في يوم من الايام .. و النومينيييز هيبقى كتير اوي ... ربنا يستر
السلام عليكم : السلام بالايد .. قالوا حرام .. قالوا زنا .. قالوا حلال .. قالوا الشهوه .. قالوا ما قالوه .. المهم ان الموضوع ده غريب اوي .. اقصد ان توزيعتنا السكانيه في السلام بالايد تضحك .. اديك مثال .. الناس الفلاحين .. او الموظفين اللي على قد الحال .. في اي مصلحه حكوميه مثلا .. بتلاقي الرجاله بتسلم على الستات بالإيد .. و يقعدوا يحكوا مع بعض في ادق تفاصيل الحياه .. لدرجه تخلي واحد قاعد يتناقش مع واحده في طريقه تقوير الكوسه بدون خرمها .. اما لو انتقلت للطبقه العليا جدا .. الهاااااي .. في اي نادي او كافيه شيك .. هتلاقي سلام الولد للبنت عادي جدا .. و مش بعيد يقترن ببعض المزّات .. زي الطرقعه .. البوس .. الاحضان .. و كفك يا مان .. و تبقى الطبقه المتوسطه اللي زي حالاتنا .. اللي السلام فيها على البنت ممنوع .. و من المستحيلات القليله النادره .. مش عارف الموضوع ده عيبه في مين .. لكنه على اي حال .. ملفت للانتباه
الافراح و الزفه : بصراحه .. هتفضل الافراح ماده خضبه للكتابه .. يعني بدايه من البنات و اللي بيعملوه .. ونهايه بالعربيات و اللي بيحصل فيها .. طبعا مش محتاجه تسأل اي واحد عن المكان المفضل ليه .. وانسى انه يقولك النادي او الديسكو .. دلوقتي الافراح بقت المكان المفضل .. يعني لو رحت ديسكو و حد شافك هتبقى ليله .. انما لو رحت فرح و حد قال لأهلك .. مفيهاش اي حااجه .. كنت بتجامل صاحبك .. اصل مرات اخو جوز بنت عمت مرات ابوه .. بتتجوز
المهم .. البنت بقه .. تروح الفرح من دول تحت شعار واحد .. الرقص و الطبل و الصاجات تطربني .. و اللبس في القاعات مقصور على الرجل .. ف قوم تلاقي البنت اللي كانت بره محجبه و شمعه منوره .. جايه الفرحه بدون هدوم .. احتمال تكون لافه ستاره قديمه او مفرش سفره حوليها و تقولك ده فستان سينييه ( يعني ممضي ) هههههه .. و انته طبعا تصدق و تقووول وااااو .. ايه الشياكه دي .. و طبعا الست بقه بمجرد ما تشتغل الاغاني و الليالي تبقى مصهلله .. و تنطلق اغنيه .. العنب العنب العنب .. تلاقي كله اتحول بقدره قادر الى ماكينات هز متحركه .. كله بيهز من شيء و لا شيء .. لدرجه تخليك ممكن تقيس شده الهزه بـ10 ريختر .. كده خلص الفرح .. وجبرت .. و المفروض انك تروح .. لكن انت نسيت الزفه .. و العربيات اللي هتعمل موكب .. خد عندك .. العربيه بيطلعوا عينها في التخميس و الرجرجه .. و العروسه بتكون على وشك انها تستفرغ في العربيه على رجل جوزها .. اما العريس يا ولداه .. فيكون طبيا قطع الخلف .. و اشك انه يقدر بعد الرجرجه و الهز ده انه يقوم بمتطلبات الحياه الزوجيه .. وهيفضحنا كالعاده .. اما اهل العريس و العروسه في العربيات اللي ورا .. فمعظمهم جالوا اغماء من سرعه الفرامل او الرجرجه فوق كبري اكتوبر .. ناهيك عن المرور اللي اتعطل والدعوات اللي بيخدوها من الناس .. الله يخرب بيوتكم .. الله يوقف حالكم زي ما وقفتوا حالنا .. و المظلوم في ده كله يا عيني العريس .. هتبقى العزوبيه و نانسي عجرم و هيفا عليه من ناحيه .. و رجرجه العربيه و دعوات الناس عليه من ناحيه تانيه .. حاجه تجنن .. و اسلوب غريب ان الناس تفرح بيه .. والمهم ان ده نوع من الاحتفال بالعريس و العروسه اللي اشك فعلا انهم يكونوا بيستمتعوا بالمووضوع ده
عموما .. لو حد عنده فرح او زفه يقول .. وانا هعمله احلى شغل .. بيب بيب بيب بيب .. ههههههههه
التحرش الجنسي : قرأت في مدونات كتير و في جريده المصري اليوم .. استغراب شعبي من حاله التحرش اللي حصلت في وسط البلد في العيد وكأن الناس دي مشفتش عيد قبل كده .. يا جماعه الموضوع ده طول عمره بيحصل .. مش جديده .. لدرجه اني مش بسمع كل عيد غير كلمتين .. يا حيوان .. يا قوه الله ... هتقولي ايه علاقتهم ببعض ؟؟ هقولك الولد لما يشوف بنت و تبقى فريسه يقول يا قوة الله .. و ده نداء التجمع اللي تلاقي وراه الشباب كله اتجمع في مظاهره حب وتأييد ورا البنت .. اما كلمه يا حيوان .. فهي رد الفعل الفوري التلقائي من اي بنت تتعرض لتحرش جسدي في الشارع .. عموما .. انا بقول للناس اللي كتبت في المدونات او الجرايد عن الموضوع ده .. اسألوا البنات .. همه ادرى باللي بيحصل لهم من ساعه ما عرفوا يعني ايه عيد
الكوره : طبعا مش هتكلم كتير .. مبروك للاهلاويه .. وهمه فاهمين ههههههه
ختاما : ليس لأنه الأقل .. و لكن لأنه الاهم .. تحيه خاصه إلى الشاب الرقيق المهذب .. مصطفى حسني .. مذيع قناة إقرأ المتميز .. ومقدم برنامج أحلى حياه .. اللي كان البرنامج الوحيد اللي كنت حريص على متابعته في رمضان .. استفدت منه كثيرا .. و تحمست لمتابعته ربما اكثر من برنامج باسمك نحيا .. وطبعا الشكر الاكبر لصديقه عزيزه كانت صاحبه الفضل الاول لأنها كانت اول من ارشدني الى موقع مصطفى الالكتروني و بدأت بمتابعته عن كثب .. ربنا يجعله في ميزان حسناته
-
---------------------------------
الكاتب .. اللي هوه انا .. غير مسؤول عن محتوى هذه التدوينه .. لأنه تحت تأثير عدم النوم من اول امبارح .. و تأثير امتحان النساء والولاده .. انا لله وانا اليه راجعون
---------------------------------
-
ملحق / كاريكاتيرات .. هياج وسط البلد
-


----------


----------



----------



----------



----------



----------



بمناسبه موضوع التحرش ده : يحكي ان رجل صالح اسمه ابوبكر المسكي .. يقال ان امرأه رأته يسير في الطريق و كان جميل الوجه .. فاطلت من باب دارها .. و صرخت .. لص بالدار .. لص بالدار .. فأخذت ابوبكر الشهامه و دخل دارها .. و ما إن اصبح داخله حتى اغلقت الباب و قالت إما ان تعاشرني أو اصرخ و اتهمك بالتهجم علي في داري .. صمت الرجل ليفكر قليلا .. طبعا كنت هتقول يارب سامحني انا مضطر و تقولها شوفيلنا شريط كاسيت لحكيم و كاسين خروب حمضانين .. نظر لها و قال دعيني اذا ادخل الخلوه .. الحمام يعني .. لاستعد .. فدلته على مكانه وانطلقت تتزين .. تخيلوا هيعمل ايه .. لأ .. متستعجلوش .. حاولوا تفكروا الاول .. اخذ المسكي فضلات السيده من على الأرض .. الكخ للي مش فاهم .. و لطخ بها جسده .. و خرج لها .. فما ان رأته حتى استاءت منه و قالت له اخرج من داري .. فخرج الرجل فرحا الى داره و اغتسل .. قالوا .. فما رأيناه بعد ذلك إلا و رائحه المسك تفوح من جنباته .... سبحان الله .. و إحنا رجالتنا شافوا ستات ماشيه في ليله العيد .. قالوا يقضوها تفعيص .. حسبي الله ونعم الوكيل في دي بلد .. و دول ناس

15 comments:

soosa el-mafroosa said...

حمدالله ع السلامه يا دكتور

والله ليك وحشة

مبروك مقدما ع النجاح..طبعا هو حد يذاكر نسا وولادة في رمضان و يسقط؟؟ماينفعش
:))

انا كمان لسه راجعه من الغيبة الإختيارية بتاعتي

يالا ارجع بأه للإنتاج الغزير بتاعك- اللهم لا حسد-

كل سنة وانت طيب

emz said...

كل سنة و انت طيب يا طنطاوى ..

بالنسبة لتونس فعلى حد علمى هما منعوا الحجاب خلاص و بقوا يصادروا كمان عرايس فله المحجبة!!


نفسى الناس تبقى لبنان بالنسبة لها حزب الله بدل ما هى نانسى ..


الصراحة انا اول مرة اعرف بموضوع التحرش ده السنة دة .. مع انى بنت يعنى بس يمكن عشان مبنزلش وسط البلد فى العيد ..

ROMIL said...

كل سنه وأنت طيب
ايه يا عم الغيبه الكبيره دي

على العموم بوست بيكشف عورات ليست بالقليله لمجتمعنا المتخلف
لا حول ولا قوة الا بالله

dawyomeldonya said...

Awalan welcome back,
I like what u wrote about
الافراح و الزفه ..bas it will be better ba2a if u add a caricature about this ,....lol

And about the sexula harrassement , NOT ONLY fel 3id..it's anytime and everywhere...!!

Hafsa said...

حلوووووو او يالبوست ده
فعلا حلو
تحياتي

دعاء غريب said...

حمد لله علي سلامتك يا ضنايا
:)

عبدالله مفتاح said...

كل سنه وانت طيب يا قلبي
انت هتخلص امتحانات امته

Dr. Tantawy said...

soosa:

انتو وحشني اكتر والله .. موضوع المذاكره ده جاي عليه بخساره والله ههههه



بنت عاديه :
اهلا وسهلا بيكي ضيفه عزيزه و انشاءالله زيارتك تتكرر دايما
تونس دي ربنا عليها انشاءالله


Romil :
اشكرك يا زعيم


dawy:
i said that its not only in the EID , but maybe it was too clear this time ..
i add some cartoons , hope you like them .. !!


hafsa :
شكرا جزيلا .. واهلا بيكي


دعاء غريب:
شكرا يا ضنايا هههههه


عبدالله :
هانت يا عزيزي .. كلها شهرين و اخلص انشاء الله هههههه ادعيلي

Nohaz said...

كل سنة و انت طيب

Egiziana in US said...

Hey ya Doctor, Welcome back and Kol sana wenta tayeb and all that. I just wanted to add something about the pigs attacking girls in the street in Cairo:

It's great that boggers are reporting this and making people aware. But then, so what happens? People are getting even more depressed and hopeless. We have to offer solutions and ideas, not just raise hell and watch it burn.
First of all: A call should be made to all parents to control their boys. If a father or mother sees that there son is starting to show signs of behaving inappropraitely, they have to lock him up. I'm not kidding. Parents have always protected their daughters and let their sons run around wild! Parents need to take responsibility here.
Second: Every single comment here and everywhere is disgusted by this type of behaviour. Disgust is not enough people. Take action! If you see someone harrassing a girl, kick the hell out of him. People cannot be passive and just stand by and be disgusted and upset.
We have to take matters into our own hands. That's the immediate solution. We all know what the long-term solution is.

المواطن المصري العبيط said...

رسومات الكاريكاتير يا طنطاوي تحفة بجد، بس أنا عندي استفسار عن موضوع أبوبكر المسكي، قريتها فين ؟ في كتاب الأغاني للأصفهاني ولا فين ؟ أنا بجد عايز أعرف

طبعا موضوع غزوة وسط البلد ده أنا استفضت من القراءة عنه لحد ما اضريت أكتب عنه أخيرا تحليل متواضع وبسيط، ربنا يعفينا ويورينا اخرتها ايه

تحياتي يا دكتور، ومنتظرك قريبا على مدونتي

ΦD said...

welcome back ya doctor, rabena m3ak

tota said...

زنجولا المواطن المصرى

اتمنى تكون خلصت امتحانات لسبب واحد بس علشان ترحمنا من البوست الطويل قوى اللى بتعوض بيه غيابك

لما قلت تونس منعت الحجاب وجعت قلبى فعلا ومش عارفة ليه مكنش فى رد فعل مناسب لحجم الحدث يمكن حرصا على العلاقات القومية العربية البنفسجية الوردية

لبنان: بصراحة تنكر ان كل حاجة حلوة مستوردة من هناك واللى تروح لبنان ومترجعش بنيو لوك تبقى راحت ليبيا وده ما يمنعش انهم فيهم الحجاب الجميل برده والاسلام الجميل


السلام باليداو بغيره فى اى طبقة
انت ونيتك بقى


الافراح: تصور بعد قراءة البوست ده من يومين شوفت المشهد ده بالوصف الدقيق وكمان زيادة معرفش ليه بيفتحوا باب العربيات يعنى مش مكفيهم الرجرجة مش خايفين يتكبوا من العربيات

يا سلام عليك بقى لما تحبكها ما تسيب الناس ترقص فى الافراح امال يعنى اذا مش هيكون فى فرح هيرقصوا فى جنازة
وكما لبس الافراح مش عاجبك هى الواحدة بتلبس كده كام مرة فى العمر مش يجيى بتاع 50 فرح فى عمرها يا ساتر عليك

موضوع وسط البلد متفقة على حدوث تحرش لكن مش بالتهويل والوصف اللى حصل
مفيش بنت متعرضتش لتحرش لفظى فى الشارع لكن الوصف ده مسمعتوش ومشوفتوش مع اى بنت فى اى مجلس ابدا واحنا البنات اهو اللى بنتكلم

تحياتى يا مواطن وحلوة الكريكاتير واقتبسه منك الوعى المصرى كمان

تحياتى

will said...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品

A片,A片,A片下載,做愛,成人電影,.18成人,日本A片,情色小說,情色電影,成人影城,自拍,情色論壇,成人論壇,情色貼圖,情色,免費A片,成人,成人網站,成人圖片,AV女優,成人光碟,色情,色情影片,免費A片下載,SEX,AV,色情網站,本土自拍,性愛,成人影片,情色文學,成人文章,成人圖片區,成人貼圖

情色,AV女優,UT聊天室,聊天室,A片,視訊聊天室

一夜情聊天室,一夜情,情色聊天室,情色,美女交友,交友,AIO交友愛情館,AIO,成人交友,愛情公寓,做愛影片,做愛,性愛,微風成人區,微風成人,嘟嘟成人網,成人影片,成人,成人貼圖,18成人,成人圖片區,成人圖片,成人影城,成人小說,成人文章,成人網站,成人論壇,情色貼圖,色情貼圖,色情A片,A片,色情小說,情色小說,情色文學,寄情築園小遊戲, 情色A片,色情影片,AV女優,AV,A漫,免費A片,A片下載

arab girlscool said...

This is such a nice addition thanks!!!
عرب كول
شات صوتي
شات مغربي
دردشه صوتيه
إنحراف كام
شات عرب كول
صوتي
دردشه صوتيه
سعودي كول