2008/02/13

ليه انت نكره

-
الحقيقه استغربت ان اكتر من ايميل جم في نفس الوقت وكلهم بيتكلمو عن نفس الموضوع
ليه إنت نكره
ليه المدونه بتاعتي ملهاش شهره اعلاميه زي مدونات ناس كتير
يعني ليه مطلعتش في الدستور
ليه معملتهاش كتيب زي بتوع دار الشروق او ملامح او ميريت
ليه مظهرتش في اذاعة حريتنا
ليه مطلعتش في اي برنامج تلفزيوني
-
وطبعا مع اختلاف الاسئله .. كل واحد حسب المجال اللى متابعه .. فاجابتي كانت متكرره في جميع الحالات ولكل اللي سأل , وهي اني شخص (مجهول الهويه) لا يمثل كيان يمكن التعرف عليه او التحدث معه .. أضف إلى ذلك إن مدونتى ملهاش خط (ثابت) تقدر تتعامل معاه او تفهم منه حقيقه الشخص اللى هتتكلم عنه , معنديش تيار سياسي واضح .. مليش خطوط عريضه بتكلم عنها في المدونه .. مليش جمهور ثابت بيتابع مدونتى و بيبدي رأيه فيها .. أعتقد ان كلها عوامل تخلي المدونه تفضل في مكانها الحالي .. مجرد صفحه بتحطها في الفيفوريتز بتاعتك عشان تبقى تزورها كل ما تفتكر .. او يمكن على امل انك لما تحصل مصيبه في البلد تلاقي فيها رسمه او كاريكاتير يهون عليك المصيبه .. فأحيانا بتلاقي .. وغالبا زيارتك بتيجي على فشوش
-
اكاد ادعى ان شوقى الى اصدار مطبوعه .. او حتى الرسم او الكتابه لجرنان كبير او مجله .. زاد جدا الفتره اللى فاتت .. لكن بتفضل قدامي عوائق كتير جدا .. منها واعتقد انه اهمها اني شخص مووودي جدا .. ممكن في يوم ارسم عشرين او تلاتين رسمه و في يوم مرسمش ولا حتى خط واحد .. وبالتالي طبيعتى دي لاتناسب العمل لدى جرنان او مجله او حتى موقع الكتروني هيطالبني في الاساس بالانتظام .. اما حرفيه اصدار كتاب او مطبوعه .. وحتى من باب تجميع ما سبق نشره .. فاعتقد انها محتاجه واحد نشيط .. و انا ابعد ما اكون عن النشاط .. واكثر قربا الى الراحه والخمول .. خصوصا مع مهنة المتاعب .. مقصدش الرقص .. أقصد الطب
-
اتمنى اكون رديت على كل الاستفسارات وبوضوح وصراحه .. عشان محدش يكون شايل منى او زعلان انى مردتش عليه شخصيا .. لكن فعلا كتر الكلام في الموضوع ده اصابني بالملل .. فقلت اجمع الاسئله كلها و ارد عليها هنا مره واحده :) كده اسهل
-

24 comments:

شهيدة said...

السلام عليكم

ازيك يا د.طنطاوي

انا عارفة اني بغيب غيبات طويلة
لكن بصراحة انا بينطبق علي الوصف اللي قلتو على نفسك في آخر البوست انك انسان مش نشيط وبتحب الخمول
اعتقد اني انا كمان كدة

على العموم انا ارفض ان مدونتك او انت تعتبرو نكرة
عشان رغم الغموض اللي موجود في مدونتك الا انها تبعث علي بشعور غريب من الراحة لا أدري سببه الحقيقي

وصدقني في اشياء في الحياة ان عرفت بوضوح تام غاب بريقها وسرها الجميل

وانا ايضا رغم الأسى الذي نمر به هنا في لبنان أود ان أهنئ مصر بالفوز الرائع

وعلى الاقل هو شيء يبعث على السعادة بين كل المآسي التي يعيشها الشعب المصري الحبيب

تحياتي وبالتوفيق دوما

مواطن مصرى نايم said...

اسمع منى كلام والسلام
مش كل من (كان) ركب الحصان ....ايه خيال
مش لازم تركب عشان تبقى خيال
المهم انك تركب عشان انت خيال
وممكن اللى ركب وهو مش خيال يقع وينداس علية بالنعال
كفاك فخرا انك لا تكتب وترسم وتشتهم وتقطع فى اللى بالى بالك من اجل الشهرة زى ناس و ناس وناس وناس
انت عارف ان الناس دى بتبنى شهرتها على عرق الغير ولكن انت غيرهم
وانا يا ابو الدكاتير من جمهورك وزوارك
الدائمين على غير عادتى
غالبا ما اهتم بتغيير شكل مدونتى التى لا يزورها غيرى انا ولا اعلم راى احد فى تدويناتى غير افراد اسرتى ال4 بما فيهم انا طبعا ولكنك ماشاء الله تتمتع بحظ وافر من الزيارات اللهم لا حسد


ومش لازم تاخد جايزة ال سى ان ان
ولا الاف اخص
ولا يتهمك احد بانك عميل زى هه انت واخد بالك
ولا حد بيصرف على تدويناتك

ولو على التليفزيون

دى اتفه حاجة لانى غالبا ومثل معظم الانترنتويه نسبة إلى النترنت بتفرج على الوش اللى بعد الارسال
او على اللمبى و(اللى بالى بالك)

وكفانى انا فخرا انك اول شخص بعد خالد الصاوى ارى مدونتة وتشجعنى على التدوين




بص بقى انا داخل انام عشان تعبت
عمال لوكلوك من الصبح انت اصلا يا مبهدلهم
اجمد مدون شفتة

تصبح على خير

زائرك الدائم اسلام

No Fear said...

السلام عليكم
أنا متابع جدا لمدونتك و سعيد جدا بمعرفتها
و أنت مشهور جدا متقلقش
:)
ربنا يوفقك

Coca said...

والله يا طنطاوي انا عن نفسي متبعاك مش نكره بالنسبه ليا مثلا
ةبتعجبني بوستاتك جدا

تحياتي

واحد مصرى said...

كلام زي الفل...بسيط و صريح و بيحصل لكثير من المدونين...لا يا عم ما انتاش نكرة و لا حاجة...خالص مودتى

Hadota ... حدوتة said...

كلامك فعلا مقنع جدا ودى نفس الاسباب اللى مش مخليانى افكر مجرد التفكير انى اكتب او انشر فى اى حتة .. انى مودية جدا ومش بواظب .. مع انه كان حلم من وانا صغيرة انى ابقى كاتبة مشهورة .. عموما يا دكتور انت مش نكرة ولا حاجة .. مدونتك ناس كتير متابعاها .. وبتحبها جدا


نيجى للمهم بقة
وسع كده عشان هتخانق
محدش يحوشني
ليه يا طنطاوى قفلت تندر روز .. خسارة والله .. انا شخصيا كنت متابعاها واتمنى ان يكون قفلها دا حادث مؤقت لحين القيام ببعض الاصلاحات فيها

اما لو كان حد دايقك فيها فدا مش مبرر تقفلها .. حط صباعك فى عين اللى يدايقك وقوله ملكش دعوة مدونتى وانا حر .. وحتى لو انت مش عاوز تكتب تانى فبامكانك تسيبها للناس تقراها مش تقفلها خالص .. هيا صحيح مدونتك بس هيا بقت مدونتنا احنا كمان معاك .. لينا فيها زى منت ليك فيها ومش من حقك تقفلها مع نفسك كده

وطبعا انت فاكر ومش هفكرك بكلامك للناس اللى كانت بتقفل مدونتها

ارجو ان المدونة تتفتح فتح فورى وسريع ومش مقبول اى اعذار من اى نوع


اخيرا .. كان فيه موضوع عاجبنى جدا فى المدونة .. وكنت بتمنى انى انشره فى مدونتى باسمك علشان كل الناس تشوفه وتعرف قد ايه انت كاتب متميز جدا .. ارجو الرد السريع لان الموضوع دا يهمنى جدا .. ومتخفش لو جت اى ارباح بالنص مش هضحك عليك

تحياتى يا دكتور

CALM CAT said...

دكتورنا العزيز

بجد مش قادره اوصفلك شعورى امبارح فى الحفله كانت رووووووووعه

شغلك على الكمبيوتر كان ملهوش حل ابدا صدق اللى قالى عليك فنان متعدد المواهب

ممكن اعرف ليه قفلت مدونه تندر روز ؟؟؟؟؟؟؟

MerMaid said...

والله انت بجد رائع جدا
وانا كمان متابعاك كل ما بدخل

بجد والله بحب كل بوستاتك
و كلها جميلة جدا
سواء كان اختياراتك الشعرية او كتاباتك الشخصية

بجد رائع جدا
وكفاية كدة علشان متتغرش

تحياتي

saso said...

:)
التدوين الورقي
بعد معرض الكتاب بابا قالي تعليق معناه انتوا كترتوا كده ليه
تليفزيون ورانا كتب ورانا
اقعدوا ف حته

ممكن أفهم ان قاص او شاعر أو رسام يصدر مطبوعة، لكن اللي مفهمتوش ان مجموعة بوستات عادية تتجمع زي مقالات كبار الكتاب كده

ما علينا
الأهم
لعبة الاستمرار في الكتابة والالتزام، كونك مزاجي معناه انك فنان مش موظف

Dr. Tantawy said...

شهيدة

أهلا بيكى فى نادي الخمول :) بصراحه طولت الغيبه المره دي لكن انا بعذرك عشان الامتحانات والدراسة .. ربنا يعينك

شكرا على كلماتك .. وتحياتي للبنان .. اللى بجد بتنمنى ترجع تانى زى ما كانت .. أحلى وأرق مكان فى عالمنا العربي الكئيب

تحياتي

Dr. Tantawy said...

eslam


مش عارف اقولك ايه :) بس فعلا الكلام ده كتير عليه اوي .. متشكر عليه اكيد و يشرفنى انك زائر دائم للمدونه يا باشا .. و أهلا بيك دايما

Dr. Tantawy said...

No fear

طبعا يا باشا انت من اهم الزباين عندى فى المخل :)))) زملكاوي للابد هههههه

تحياتي

Dr. Tantawy said...

coca


أشكرك :) ويشرفني كونك من زواري الدائمين يا كوكاااااا

Dr. Tantawy said...

واحد مصري


انت اللى زي الفل والله ههههههه
منووور يا باشا

Dr. Tantawy said...

حدوته


اولا .. شكرا على كلماتك

ثانيا .. تندر روز رجعت تاني و ربنا يستر بقه :)

ثالثا .. من حقك تنشرى اى حاجه ما دمتى هتذكري المصدر .. دى حق كل الناس ومقدرش امنع حد منه .. بس انا معنديش حاجه تستاهل انك تنقليها اساسا :)))

تحيااااتى

Dr. Tantawy said...

Calm Cat


كويس ان الحفلة عجبتك لانى كنت خايف انها متعجبش الناس :) لكن الحمدلله عدت على خير

تحياتى يا دكتوره

Dr. Tantawy said...

Mermaid

ايه الحلفان و الكلام الكبير ده كله :) انا اكيد اتغريت خلاص بعد الكومنت ده هههههههه

Dr. Tantawy said...

Saso


حمدالله عالسلامه :) انتى لسه عايشه يا بنتي هههههه

شكرا على كلماتك اكيد .. وبعدين لا فنان ولا حاجه :) دى اسمها (أنتخه) مش فن ههههههه

Saker said...

ربنا يأنتخ حياتك أكتر واكتر , انت مش ملاحظ ان البهاليل كتروا فى مصر ؟؟؟ ,.. ياعم اتكل على الله و جرب ... انت موهوب فعلا فى الكتابة ^^ ..
http://a-saker.blogspot.vom

ROMIL said...

كل دا علشان الالف واللام
خليها علينا المرة دي

ومين في حياتنا مش محتاج الالف واللام
تحياتي

ROMIL

Unknown said...

طب ايه الغيبه دي كلها
انت موودي حتى في التدوين
؟؟؟!!!!

Enas Anany said...

ايه يا دكترة انت فين؟؟ وحشتنا ..وحشنا كلامك الجميل..يا ريت ما تتاخرش علينا اكتر من كده .. احنا في انتظارك.. اكيد تاخيرك ده وراه مفجاه كبييييييييرة..فدائما تغيب وترجع بما هو مميز ومفيد.. مش هطول في كلامي باه
تقبل مني جزيل الشكر والاحترام
احب اكون صديقة جديدة وخفيفة

مواطن مصرى نايم said...

انا ESLAM
(eslam said...)ده
بس عملت تشانج للاسم
وحشتنى يا دكتور
فى التدوينات السخنة

Dr. Tantawy said...

أحمد صقر
romil
أنا انسان
enas anany
مواطن مصري نايم


آسف على التأخير لكنها ظروف استلام التكليف وخوازيق وزارة الصحة اللى كل يوم فيها جديد فى الشكل والمضمون :))
تحياتي للجميع و اتمنى ارجع اتواصل معاكم كلكم تاني ان شاء الله
بالتوفيق للجميع وتحيا مصر ههههه