2007/08/26

تـأملات مصـــْـرِّيــة

تأمـُلات مِـــصــرِّيـــة
---------------------------------------------
-
البقاء لله
لأنها كانت الاكثر تواجدا الى جواري خلال السنوات الماضيه .. لأنني رأيتها في مرضها و ضعفها .. لأنني قصرت تجاهها .. لأنني تجاهلت ألمها .. لأنني كنت أحبها .. فلا أجد الآن بدا سوى أن اطلب إليكم الدعاء لها ... جدتي العزيزه .. افتقدك
-
ثقافه العنب العنب
لم أكن اعلم عن الثقافه المصريه المعاصره .. سوى مقتطفات من أفلام اللمبي الشهيره .. أو بعض الأغنيات مثل العنب العنب .. و البلح البلح ... لكني اكتشفت فجأه ان مصر بها ثقافه من بتاعت بلاد بره ... و الدليل على ذلك .. القبض على مسؤول كبير بوزاره الثقافه ... اسمه ايمن عبدالمنعم .. بتهمه تلقى رشاوي بملايين من داخل وزاره الثقافه .. يعنى مصر فيها ثقافه .. و فيها وزاره .. و فيها ملايين .. و فيها رشاوي
-
الهجرة يا فرعون
اصرار الشباب المصري .. حتى هذه اللحظة .. على استخدام زوارق مطاطيه و قوارب متهالكه في الهروب من السواحل الشماليه إلى قبرص وايطاليا و اليونان .. رغم علمهم بخطوره التجربه بل و ضعف احتمالات النجاه فيها وليس مجرد الترحيل .. يؤكد على حالة اليأس الشديد التي يعانيها شباب مصر ... و يؤكد على اننا صرنا نعيش عهد .. البحر من أمامهم .. و فرعون من خلفهم
-
الغريزه يا فرعون
قال الله تعالى : فاستخف قومه فأطاعوه , إنهم كانوا قوما فاسقين (سورة الزخرف) ... معنى الآيه .. ان قوم فرعون لما تساهلوا معه و تركوه في ظلمه و طغيانه فازداد طغيانا و ظلما .. و كانوا مشاركين معه في جريمته .. ونحن اليوم نشارك في نفس المشهد .. فإذا كنا نعيش عصر خالي من الغرائز التي تعتبر ابسط حقوق البشر بل و أكثرها أهميه على الاطلاق .. فنحن لا نجد ماءا نقيا نشربه .. ولا خدمات صحيه مناسبه ترعانا .. ولا سبل الزواج ميسره في ظل الغلاء .. حتى الانترنت أبسط حقوق البشر من أمثالي صار حجرا علينا و أحدث سبل النصب العلني على المواطنين .. ومع كل هذا .. لم ينطق أحد .. حسبي الله و نعم الوكيل
-
ايه الهبل ده
كنت اشاهد فيلم (كان يوم حبك) من بطوله خالد سليم و داليا البحيري .. و شاهدت كمّ المشاهد الكوميديه التي يدعون انها رومانسيه .. حوارات ساذجه و عبارات متكرره بكثره .. لأكتشف بعدها بفتره .. أن ما كنت اكتبه على مدونتي الثانيه ما هو إلا صوره متكرره من الرومانسيه الساذجه التي رأيتها في الفيلم ... فعذرا لقراء مدونتي
-
ربنا يطول في عمرك يا باشا
لا اعتقد كما تعتقد الكثير من وسائل الاعلام ان الرئيس حسني مبارك على وشك الوفاه .. او انه قد توفيّ فعلا .. فأنا لا اؤيد هذه النظريه .. بل اكاد اجزم والله اعلم ان الرئيس مبارك مازال امامه على الاقل شهرين او اكثر قبل ان يتوفاه الله .. فنحن الان في شهر شعبان .. و هو شهر مفترج .. و من بعده رمضان .. شهر التقوى و الصلاح .. شهر مبارك على مر العصور .. فكيف بالله عليكم يعطيه الله هذه النعمه ويتوفاه في رمضان او شعبان ... ربنا اسمه العدل .. و عرفوه بالعقل
-
هيّ فوضى
لأول مره اعتقد ان إعلان ترويجي لفيلم .. قادر على جذب المشاهد لدخول فيلم من المره الأولى وبدون انتظار سماع آراء الناس .. هذا ما رأيته في اعلان فيلم ( هيّ فوضى ) ... فلماذا لا ينجح هذا الفيلم في جذب المشاهد ؟؟؟ فإذا كان الفيلم يحمل اسم يوسف شاهين .. صاحب الجوائز والمتناقضات و الهبل الفني المتألق .. وبطل الفيلم هو الفنان الجميل خالد صالح .. مش بس كده .. كمان في دور ضابط شرطه فاسد .. والأجمل انه صاحب جمله ( انا بابا ) الشهيره .. وحين أراد ان يستنجد بالقوه النسائيه .. لجأ الى اللحم الابيض المصري الاصيل .. منه شلبي .. ليكون بهذا فيلم متكامل يرضى كافه طموحاتك كمتفرج ... ولا إنت رأيك إيه
-
ألبيدا
منال .. مدونه شابه .. جميله .. أفكارها متجدده .. انقطعت فجأه عن التدوين .. و لأني لا أعلم لها أي وسيله اتصالات او اصدقاء يمكن الرجوع إليهم .. فلم أجد سوى المدونه و نشر إعلان .. كما حدث سابقا في شهر فبراير ... لذا على من يملك اي معلومات عن منال سرعه إخبارنا بها .. و لكم جزيل الشكر
-
مصر و الكويت
ستضحك كثيرا .. عندما تسمع الدبلوماسيين المصريين في الكويت يقولون بأن حق المواطنين المصريين الذين تعرضا للضرب على يد الشرطه الكويتيه سيتم استرداده .. و انهما سينالان كافه حقوقهما المدنيه و سيعودان إلى ارض الوطن في اسرع وقت ... ستضحك اكثر .. عندما تسمع السيد وزير الخارجيه ابوالغيط يقول بان مصر تهتم برعاياها وتفعل ما في استطاعتها لحل الازمه
اما ما سيضحكك اكثر و اكثر .. ان الساده الدبلوماسيين انفسهم لم يستطعيوا حمايه انفسهم حين تم ضرب الملحق التجاري المصري في الكويت نفسها منذ حوالي عده اسابيع .. و لم تحصل مصر وقتها سوى على كلمه ( شجب ) من المسؤوليين الكويتين بعدها بعده اسابيع من المحايله المصريه و النحنحات الدبلوماسيه الخارجيه
-
عنصريه البنك التجاري الدولي
العنصريه اللي قرأتها في رساله البنك التجاري المصري كانت مستفزه لدرجه اني كان لازم انشرها .. البنك المحترم .. اللى ليه شنه و رنه .. باعت رساله يطالب فيها بتحديث البيانات من الاعضاء .. و بقرآه الرساله تلاقي فيها طلب غريب جدا .. ياريت تقراه بنفسك ف الصوره .. و تاخد بالك من حته (ضابط) دي بغض النظر عن أي حاجه تانيه .. إقراها وقولي إيه رأيك ؟؟؟ دي عنصريه .. و لا دونيه .. و لا استخفاف بعقولنا
-
-
-
مصر بتحب اسرائيل
قالوا مصر بتصدر الغاز لاسرائيل .. ومصر قالت لأ ... قالوا مصر بتستورد القمح من اسرائيل .. و مصر قالت لأ .. قالوا مصر بتستورد الصحي و السيراميك من اسرائيل .. و مصر قالت لأ .. قالوا مصر بتروح اسرائيل تغسل رجلها و تيجي .. مصر قالت لأ .. كل حاجه لأ لأ لأ ... طيب و الحل ... لقيت المصري اليوم النهارده طالعه بخبر جامد أوي .. بصراحه مقدرتش اعلق عليه .. قال إيه : مسؤولي الصناعات المصريه لما بيسافروا اسرائيل زي ما همه متعودين .. بيضايقوهم ف الجمارك .... يعني مالآخر كده .. همه ( متعوده دايما ) يسافروا هناك .. و اللي بيسافروا مسؤولي التجاره والصناعه المصريين .. مش مسافريين يخللوا بنتجان ولا يتعالجوا من الروماتيزم .. يبقى الله يرحمك يا رجوله .. و الله يرحمك يا تاريخ
-

19 comments:

Hadota ... حدوتة said...

جدتك .. الله يرحمها ويغفر لها ويسكنها فسيح جناته
البقاء لله

تندر روز .. مش من حقك تقول عليها هبل بأى شكل من الاشكال .. المدونة دى انا شخصيا بحبها جدا ويمكن تعتير من المدونات القليلة جدا اللى بتابعها وربطانى بالتدوين لغاية دلوقتى
مش هبقى ببالغ لو قولت انها بتعلمنا الحب .. وانى بتخنق جدا جدا لو دخلت ملقتش بوست جديد
واتخنقت اكتر من كلامك عنها كده
مين عارف يمكن كلمة انت تكتبها فيها حد يقراها تهون عليه عذابات كتير بيمر بيها
وعموما هيا لو هبل .. يبقى استمر فى الهبل دا عشان الناس الهبلة اللى بتحب تقرا اللى هيا انا

Hadota ... حدوتة said...

انا مقصدش طبعا مش من حقك هيا مدونتك وتقو لاللى انت عاوزه

Mongey said...

اولا:البقاء لله في جدتك

ثانيا: انا مش عارف موضوع الرشوة ده
مش واخد حقه في الكلام في كل الجرائد عامة

ثالثا:موضوع الهجرة ده غريب انا ابويا
بيحكيلي عن قرية في المنصورة كل عيلة لازم يبقي فيها حد مسافر بالطريقة دي
الي مات والي عاش والي رجع معاه ملايين

رابعا:حسني مبارك هيموت وقت ما يموت اصلي شايف ان موته لا يعنيني في شي ولا يعني اي تغيير في وضع البلد دي و هو شكله هيعيش
كتير اصله محافظ علي صحته الاعمار بيد الله عموما

خامسا : عندك حق في موضوع الفيلم ده انا كنت لسه مع ناس اصحابي وكلهم كاانوا عايزين يخشوا الفيلم بس مكنش نزل لسه
و كلهم لنفس الاسباب الي انت قولتها

سادسا: كذا حاجة مع بعض عشان اخلص
بانسبة لكويت فانا بصراحة نفسي في مرة ناخد حقنا صح الي هوه اعتذار رسمي ده حل دبلوماسي و تعويضات كويسة
و يا ريت نعمل شوية ضوابط عشان الناس متتبهدلش
وموضوع البنك ده يضحك اوي اول مرة اشوف كدة
كفاية كدة انا اتكلمت كتير اوي
سلام

mariam said...

البقيه فى حياتك يا طنطاوى و ربنا يجعل مثواها الجنه يا رب
معلش جت متأخره بس مش بدخل من فتره


شفت المفجأه طلعت عندنا وزارة ثقافه
و ده سبب وجيه للحاله المزريه اللى الثقافه المصريه فيها
لو لغوا الوزاره دى ممكن الحاله تتحسن


بالنسبه للشباب المسكين اللى بيحاول يخرج من البلد
المضطر يركب الصعب يا طنطاوى
يمكن يكون فى امل 1 % انهم يحسنوا وضعهم و 99% انهم يموتوا فبيختاروا ال1% للأسف



انا فعلا مش عارفه الشعب المصرى هيتحرك امتى المفروض ان مش باقى له حاجه
حتى الفتات مش هيلاقيه
و العيال اللى عايز يربيهم مش هيلحق يعمل لهم حاجه و بعدين التربيه اللى بنضحى بكل حاجه علشانها مش جايبه اى نتيجه الصراحه و اى واحد ينزل الشارع هيشوف بنفسه


مناااال يااااااه
هى فين كل ده
يا ريت ترجع كانت مدونتها حلوه جدا


كل سنه وانت طيب

أحمد المصري said...

أولا:البقاء لله وربنا يرحمها0
ثانيا :معلش بقالي كتير مبجيش هنا..ظروف كده بعيد عنك0
ثالثا:أنا فعلا مش عارف ايه حكاية البيدا دي ..الموضوع ابتدا يبقى مستفز بالنسبة ليا..كده من غير احم ولا دستور تسيب المدونة؟00ربنا يستر0
مع تحياتي00
والسلام عليكم0

Crazy Nemo said...

اول حاجه البقاء لله واتمنى ان يوسع الله لها قبرها ويدخلها الفردوس الاعلى ان شاء الله
شىء مستفز جدا اللى عمله بنك ال السى اى بى البيانات دى فعلا جاتلنا وبابا ملاها بس يعنى هما هيستفادوا ايه لما يعرفوها فعلا الموضوع فى عنصريه
سلام

Hend.feps said...

البقاء لله و أعظم الله أجرك ....ربنا يرحم جدتك يا رب و يسكنها فسيح جناته .... اللهم اجعل قبرها روضة من رياض الجنة و لا تجعله حفرة من حفر النار .... اللهم نور قبرها و مده لها مد بصرها .... اللهم اكرم نزلها و وسع مدخلها يا رب العالمين ....

أما بالنسبة للريس متق.. قصدى الريس مبارك .... فالاعمار بيد لله ... ميين عارف يمكن يموت فى شعبان أو رمضان و ربنا عادل برضه .... ما أشرف المرسلين سيدنا محمد صلى الله عليه و سلم مامتش فى شهر رمضان .... الله أعلم .... واذا كان الموت فى رمضان ليه فضل مش يمكن يكون ربنا بيخلصلوا الحسنات اللى عملها و يكافؤه عليها فى الدنيا و فى الاخرة يجى الحساب ....

يقول النبي صلى الله عليه وسلم "ما من رجل يلي أمر من أمور المسلمين ثم لم يجهد لهم ويتعب إلا لم يكن معهم في الجنة"

"من تولى أمراً من أمور المسلمين فولى وفي المسلمين من هو أصلح منه فقد خان الله ورسوله"

الله أعلم ... ربنا يغفر لنا أجمعين و يرزقنا حسن الخاتمة

known said...

elbaka2 lelah ya doc,rabena yer7amha ,we yeda*7lha al gana ensha2 allah and GOD with u ...sorry maba3rafsh a2ool kalam 3aza keteer

(butterfly)

Nouran said...

اولا:
البقاء لله ف جدتك

ثانيا :
انا قولتلهم كده مش ممكن يموت ف ايام مفترجة زي ديه

ثالثا:
كان يوم حبك ده فيلم ممل ممل جدا جدابس معرفش اي موضوع الكلام اللي انت بتقول انه اهبل وبتكتبه ف مدونتك التانية ده

رابعا:
البيدا اختفت مش عارفه ليه تاني ؟

خامسا:
مش عارفه ايه هي فوضى ديه بس واضح انها فوضى بجد

سادسا ولا مش عارفه كام :
بوست حلو يا دكتور

mirage said...

بمناسبة تلك التاملات ... فعلاً نفتخر اننا مصريين
بخصوص مصر والكويت ...الي حصل ده يعتبر ولا حاجة ... الكويت مرحبة جداً بدخول الشباب المصري العامل هناك - لانه رطرط- في الجيش الكويتي
والشباب المصري مرحب وان كان بلا اجر فقط لمقابل الاقامة!!
:) شئ مبشر
بوست جميل ...
تحياتي

Dr.TANTAWY said...

Hadota

والله المدونه حاسس انها ساذجه بس للأسف مش بعرف ابطل كتابه فيها :) عشان كده هيه مستمره غصب عني انا شخصيا

Dr.TANTAWY said...

Mongey

فعلا مش المنصوره بس .. و كفر الشيخ و قليوب
في قرى كتير عايشه على الهجره دي بس


منووور يا باشا
اهلا بيك

Dr.TANTAWY said...

mariam

المضطر يركب الصعب :) مش ينتحر
الموضوع باينه جاب اخره مع الناس دي
ربنا يتولاها برحمته بقه


:) منوووره يا مريوم .. متقطعيش الجوابااااات

Dr.TANTAWY said...

احمد المصري


حمدالله عالسلامه يا باشا

لو عرفت اي حاجه عنها ياريت تقولي :) لأنها فعلا كان ليها وجود مميز و جميل اوي

Dr.TANTAWY said...

nefertiti

والله على رأيك موضوع مستفز
المشكله انهم مش فارقه معاهم و كاتبينها عادي كده ببجاحه

بس يالا .. ماهي مصر ام المعجزات

Dr.TANTAWY said...

hend

انا اكيد مش بقاطع في حاجه زي دي .. كله في علم الغيب

وعلى رأيك .. يمكن ربنا يكتبهاله عشان يخفف عنه الحساب يوم الحساب

ربنا يحسن خاتمتنا جميعا

Dr.TANTAWY said...

Butterfly

u dont have to :)
its enought that u leave a comment ..

Dr.TANTAWY said...

nouran

ياستي .. يموت ولا يعيش .. كله عند العرب فجل ههههه

المدونه التانيه اللى هيه
tender-rose.blogspot.com
ابقى شوفيها و قوليلي رأيك

هيه فوضى ده فيلم يوسف شاهين الجديد

هيبقى شكله تحفه ان شاء الله

Dr.TANTAWY said...

mirage

لو كان العماله المصريه لاقيه اللى يدافع عنها و يديها مقامها قدام الناس .. مكناش بقينا كده

العماله الهنديه في الخيلج ( مش بتوع سريلانكا و بنجلاديش ) اقصد الهنووود .. ليهم احترام فوق ما تتصور .. انما المصري بقه حمار و بيتركب

حسبي الله و نعم الوكيل