2007/02/27

ما يطلبه المدونون


تحب تقابل مين ؟؟
سؤال غريب مش كده :) .. بس بصراحه هوه جه في بالي وانا بقلب في مدونات .. و لقيت فيها تدوينات عن لقاءات حصلت بين المدونين في ارض الواقع .. بعيد عن شاشات الكمبيوتر و ضربات الكيبورد .. الفكره عجبتني .. و مش هقول ابهرتني لأني اكيد سمعت عن لقاءات سابقه للمدونين ايام المظاهرات و اللبش اللي كان في البلد ده
-
بصراحه ومع احترامي اكيد لكل المدونين .. ما عدا كريم عامر ومن على شاكلته * .. فوجهة نظري في الموضوع كانت مختلفه شويه .. يمكن لأني فكرت فيها من ناحيه شخصيه .. او زي ما تقولوا طموحي مختلف عنهم .. أكيد فكرتهم جميله .. و لقاءهم مع بعض أثرى جوانب لكل واحد فيهم .. و اكيد كلهم كانوا محتاجينها وسعداء بيها ... لكن لما فكرت في الموضوع بالنسبه ليه .. لقيت ان التنوع الهائل في الثقافات بين المدونين ميخلينيش متشوق للقاءات من النوع ده .. بعيدا عن البهائي و المثلي و المتصوف و الاخواني و العلماني و اليساري و الناصري و الساداتي و المباركي و غيره .. اقصد التنوع حتى ما بين افراد الفريق الواحد .. الحزب الواحد .. الدين الواحد .. الاعتقاد الواحد .. تباين افكار لا شتى له .. و الواحد في السن ده احوج ما يكون للتركيز .. و ابعد ما يكون لجلسات تشتيت الافكار و التلاعب بالالفاظ و تراشق الاتهامات بين التيارات المختلفه و إداعاء المسكنه والظلم من جهات اخرى

-

يمكن كمان لأني شخص متمرد .. رافض لأي مبدأ .. فرض علينا .. و رافض لأوضاع كتيره الناس بتتعامل معاها بواقعيه غريبه .. يعني زي مانا رافض تدخين الراجل .. فانا امقت بشده منظر الست اللي ماسكه سيجاره .. و اشمئز بشده من الرجل اللي مستعد يتكلم في موضوع جنسي مثلا اما جمع فيه سيدات .. بحجه انه موضوع علمي و اجتماعي .. طبعا انا لا أقصد اجتماع المدونين اللي حصل قريب .. لكن انا تخيلت في بالي ايه اللي ممكن يحصل لو اجتمع كل المدونين المصريين مثلا في لقاءات شهريه .. تخيلت انا ممكن اعمل ايه .. او يكون رد فعلي إزاي

-

عشان كده يوم ما قريت عن لقاءات المدونين ايام التظاهرات .. مالك وعلاء و منال وشرقاوي ... و برضه يوم ما قريت عن اجتماع ياسمين و في حاجه و شقير و غيرهم اللي تم من ايام .. للأسف .. محستش بأي فضول لحضور الاجتماعات دي .. مش لعيب في الاشخاص اللي اكيد معظمهم على عيني و راسي .. لكن لتركيبه معينه في دماغي .. تخليني مش عايز اتواجد في مكان إلا لو كان ليه دور فيه .. يعني لو فرضت اني متواجد مع علاء و مالك و شرقاوي مثلا .. فلا أنا سياسي ولا مفكر و لا هتفلسف و اقول مصر سوت و عملت .. اكاد اجزم بأني مقرأتش كتاب سياسي او اجتماعي او فلسفي واحد على بعضه مثلا .. عشان كده .. لا أملك التواجد معهم .. و اني اتكلم مثلا عن الوطنيه و المزايده و الفلسفه و الفكر الاشتراكي او اليساري .. لا املك اني اتكلم عن المظاهرات و تخوين الاخوان او تصنيف اعضاء كفايه او حتى استخدام لغه الحوار الدارجه من سب و لعن .. يمكن في يوم من الايام اقرأ بما فيه الكفايه و اعي بما فيه الكفايه احداث كثيره عشان امتلك ثقافه تمكني من التواجد مع ناس زيهم .... يمكن كمان معنديش ثقافه ولا خبره عمريه ولا اعرف حتى خبايا البلد دي عشان تخليني اتواجد مع شقير و ياسمين و سليمان .. محبش اقعد اتكلم في احوال البلد و مصيرنا المشئوم و صراع الاجيال و الهدف من التدوين .. موضوعات مجعلصه لا تهمني و لن تغير مني شيء .. تماما مثل قراءه جرنان الدستور اللي كنت بحبها جدا حتى وقت قريب اكتشفت معه ان قراءتي للدستور وغيره من الجرائد المستقله هو مجرد ( لبانه ) .. بسمع شويه كلام و اروح اردده في اي جلسه مع اصدقائي مثلا .. بدون ما افهم الكلام ده حصل ليه او ازاي .. بدون ما اتحقق من المعلومات دي و أتأكد من صحتها .. و يمكن اكبر مثال على كلامي اشتغاله الحوار الصحفي مع الملا عمر في تورا بورا :) و شيلاه يا سيدي الغريب .. عشان كده .. قررت اني اتحرى في معلوماتي و مصدقش اي كلمه اقراها في جرنان او اسمعها في برنامج او اشوفها في مدونه و بالتالي .. الاولى اني اتحرى اي كلمه ممكن اسمعها في جلسه نقاش مع مدونين خصوصا ان حرفتنا الاساسيه كمدونين هي قدرتنا على اخراج ما بداخلنا .. شيء اعتدنا عليه و احترفناه .. بينما يكاد يكون معظم الناس غير قادرين على ذلك .. يختزنون افكارهم في داخلهم لأنهم لا يستطيعون التعبير عنها .. ف لك ان تتخيل الكلام اللي هيتقال في جلسه مدونين هيبقى شكله ايه و متفرع ازاي

-

اكيد هتسألوا .. نفسي أقعد مع مين .. و اكيد انا فكرت في السؤال ده ولقيت اجابه .. نفسي اقعد مع ناس بسيطه جدا .. نقيه جدا .. واضحه المعالم .. بشريه الى حد كبير .. يعني نفسي اتكلم مع توته .. و اسمع حكاوي منال .. و اتعقد انجليزي من ابيتاف و اديها شويه نقاشات علميه و حلقات بنزين مع مريم .. و اتفلسف على سوسه لحد ما اجننها .. نفسي تبقه عندي الفرصه اقعد مع ايجيزيانا .. و بي بي و شهيده .. يمكن ذكرت التلاته دول تحديدا مع بعض لأنهم كلهم بره مصر :) و مش عارف الواحد ممكن يعيش لما يقابلهم ولا ايه ههههه

اما من فصيل الرجال الاهم طبعا :) ... ف نفسي اقعد مع مخلوف و هشام رحمه رسامي الدستور .. طبعا بأهوائي الشخبطيه الفنيه هيبقى ميلي لمخلوف .. لكن ارستوقراطيه هشام تخليني برضه اميل له شويه حلوين .. زي ما نفسي برضه اقعد مع عبدالله في مكتبه .. ارد على التليفونات و اقول خدمه العملاء افندم .. و هاتك يا رغي في التليفون و نكت لحد لما العميل ينسى نفسه و الدنيا و ينسى هوه اتصل ليه اصلا ** ربنا ينولهاني ههههه

-

يمكن دي اقصى طموحاتي للقاء تدويني .. مش انتقاص من الآخرين .. لكن زي ما تقولوا ... بشتري دماغي .. و بحط نفسي في مكانها الطبيعي بدون تنطيط و لا فهلوه .. لا انا سياسي ولا مفكر .. ولا انا متفتح او بوهيمي ... مش مستعد اتقبل اشياء ضد معتقداتي او مبادئي .. حتى و ان اختلفت مع اخرين اعزاء عليه جدا و احترمهم للغايه .. لكن هعمل ايه .. انا كده .. قسمتي كده .. شكلي كده ههههه
ها .. إيه رأيكم ؟؟ .. نختار مكان غالي .. كوستا كافيه والحلو في سينابون .. و الحساب على الاكبر سنا مش كده ههههه
يا ترى لو كل واحد فيكم فكر يقابل مدونين .. هيحب يقابل مين ؟؟ نتلقى اجاباتكم على 09000900 متتأخروش .. عشان كل ما هتقول مدونين اكتر هتكسب اكتر
______________________________________

=ملاحظة 1 : قال الله تعالى ( وَقَدْ نَزَّلَ عَلَيْكُمْ فِي الْكِتَابِ أَنْ إِذَا سَمِعْتُـمْ آيَاتِ اللّهِ يُكَفَرُ بِهَا وَيُسْتَهْزَأُ بِهَا فَلاَ تَقْعُدُواْ مَعَهُمْ حَتَّى يَخُوضُواْ فِــي حَدِيثٍ غَيْرِهِ إِنَّكُمْ إِذاً مِّثْلُهُمْ إِنَّ اللّهَ جَامِعُ الْمُنَافِقِينَ وَالْكَافِرِينَ فِي جَهَنَّمَ جَمِيعاً ) صدق الله العظيم
ملاحظة 2 : آسف لو كنت نسيت حد

36 comments:

mariam said...

انا هقص الشريط تانى

لقائات علميه و حلقات بنزين
ليه كده بس
انا هلاقيها منك و لا من الكليه

الحقيقه انا عجبتنى فكرة لقاء المدونين
لأن اكيد مهما كان فى ناس مختلفين
فبنظرتى لأغلب المدونين
طابعهم يغلب عليه الأحترام و تقبل الفكر الآخر
فبالتالى هيكون النقاش مثمر فى اى حاجه

المهم انا اتصلت على 09000900
زى ما انت قلت
و انا بحذرك لازم اكسب
و الا مش هيحصل كويس
بس انت مقلتش الجايزه


تحياتى

Amr Ahmed said...

وجهة نظر تحترم طبعا

لكن انا عاوز اقولك ان الاجتماع اللي فات ده
اللي كان في البورصة
وكان ليا شرف حضوره

كان قمة في التحضر واحترام الاخر

الاناس كلها عندها استعداد للمناقشة وتقبل الراي

وحتي لو فيه اختلاف في الراي
بيبقي بلباقة وشياكة

مظنش ان حد هاينزل يروح اجتماع ويتناقش مثلا بقلة ذوق

تحياتي

Dr. Tantawy said...

MANO

اهلا بيكي في المحل :)) انا عايز اتكلم معاكي في العلم هتقولي لا ههههه

الفكره حلوه يا جماعه و الا مكنتش اتكلمت عنها

كل اللي بقوله انا ليه نوع معين من الناس بعرف انسجم معاه هيه دي الفكره

الجايزه هتعجبك اوي .. تابعينا و هتعرفيها قريب هههههه

Dr. Tantawy said...

amr ahmed

اولا اهلا بيك

ثانيا انا مقلتش اجتماعكم كان وحش بالعكس انا اخدته سبب لأني اكتب تدوينتي و شكرت في الفكره و لو في مجال كنت شكرت ياسمين صاحبه الفكره كمان

كل اللي بقوله :) انتو ناس كويسه على عيني و راسي .. لكن مش كل المدونين دماغهم تمشي زي دماغي .. زي ما قلتلك .. لو واحده شربت سجاره قدامي انا هكون متنرفز مع ان دي حاجه مبقتش تضايق اي حد تاني .. فاهم قصدي

التدوين عالم يشبه اي مدينه فيها ناس من كل الانواع .. لكن انا فيه عيب اني مش بقدر اتقبل كل الانواع دي .. بحب اتواجد مع الانواع اللي بنسجم معاها :)هيه دي الفكره

اخيرا عشان محدش يفهمني غلط .. انا لا اعيب في لقاءكم بالعكس .. زي ما قلت .. انتم ناس محترمين حتى و لو معرفتكوش كلكوا .. لكن احسبكم كذلك انشاء الله .. ف المهم يعني .. حسيت انكم نوعا ما اكبر من سني و اعمق من افكاري

على بلاطه و باختصار .... انا محبش اتواجد في مكان و اكون اقل من مستوى النقاش فيه .. ياريت تكون فهمتني

واهلا بيك مره تانيه

الوردة السوداء said...

كلامك كويس
ونا تقريبا موافقاك الرأى

انا عمرى ماهقابل مدون الا لما اكون حسة ان اتجهاتة زى اتجهاتى

اشكرك

albida said...

ايه ده؟ انا اسمى مكتوب تانى
لا ده أنا كده اتشهرت بقى
هههههههههه

وايه حكاية حكاوى منال دى؟!! هو أنا شهرزاد؟
:) :)

فعلا تجربة اللقاء دى كان شىء بجد أكتر من ممتع... متتخيلش قد ايه كان جميل- اعتقد أنك قاريت الموضوع عند ماعلينا
والجميل فى الموضوع اننا اتقبلنا تانى وبقينا أصحاب بجد.. وخروجتنا دى هتتكرر كتير أن شاء الله

والله فى لقاءنا احنا مانقشناش موضوعات مهمة أوى دينية أو سياسية.. مجرد اتكلمنا مع بعض زى ما كل الأصحاب بتعمل وضحكنا وكلنا.. ويتهيألى حتى لو كنا اتكلمنا فى حاجة من دى مكناش هنختلف برضه

مستنياك تجاوب على السؤال اللى فى البوست الأخير عندى.. متحاولش تهرب
هههههههه

manal

علي الالفي said...

صباحو قشطة يا ساديكي
مووافق معااااااااااااااك 100%بس في وجهة تظرك في حاجات كتير و ناس كتير
بس بردو لسة عندي الفضول الرهيب لحضور واحد من لقاءات المدونين لسبب واحد
انا قاعد في بورسعيد و عمري ما شفتهم الا لما حضروا الحفلة بتاعتي في الشاقية كانت عايزاك يا سديكي المهم
انت عارف قبل ما ادخل عالم التدوين و اسمع كلمة المدونين كان بييجي في دماغي صورة ناس عجيبة ناكشين شعرهم و بيتكلموا كلام مجعلص و بيتفزلكوا ع الفاضي
بس قشطة ع التدوين طول ما فيه ناس طبيعية زيك يا برنس
اسف ع التطويل بس يمكن عشان الكلام عجبني جدا

واحـــد مـــــن الـنـــاس said...

أنا شخصيا عايز اقابل ناس كتير

انتا مثلا

والمهندس العبقري محمد الهامي

وده اكتر من عبقري
وبحبه لله في لله
رغم اني عمري ما شفته ولا كلمته

لكن كتااباته بتدل عليه
ربنا يحميه يارب



والاخ انا جعان

ومحمد حبيب

والواد عربي احمد عزت

وميت اللي هوا محمد عادل

والمهاجر المصري

بجد الناس دول عقلياتهم جميلة
ونفسي اقابلهم بجد
او ختى اكلمهم على الايميل
ولو حد صادف البوست ده وشاف تعليقي منهم
ياريت يكلمني على ايميلي
bloza4bloza@hotmail.com

ايدك عالجايزة بقا :)

Anonymous said...

looooooooooooooooool

عايز تقابلني عشان تتعقد من انجليزي

ههههههههههههههههههههه

ابقي هات معاك قاموس اكسفورد و لا حاجة عشان ينفعنا بقي ههههههههه

يا ريت مقابلة زي ديه تبقي حقيقية
وقد ايه ح تكون نقية و جميلة بوجود الناس دي كلها
و بوجودك اللي ح يخلي القعدة كلها خفة ظل و ضحكات و علم و طب و مشرط و عمليات ههههههه

تحياتي يا عم الدكاترة

Anonymous said...

صحيح
مش عارف ليه فكرتني
بالبوست التخيلي بتاع رمضان
لو لسه فاكره
:))

شهيدة said...

سلام يا د. طنطاوي
ازيك؟
انا فرحت أوي لما قريت انك نفسك تقابلني لو اتسألت نفسك تقابل مين

أنا بجد بتمنى اني لو رحت مصر نتعارف ونتقابل
وعلى فكرة وجهة نظرك بالنسبة لتشتت الأفكار بين المدونين والحاجات دي كلها أنا موافقة معاك فيها تماما
يعني لو الواحد حتختلط عليه الأمور بدل ما تتوضح يبقى بلاش اللقاءات دي من الأول
بس هي جمالها في انها ممكن تعمل علافات اجتماعية قوية

موفق دائما
على فكرة أنا دخلت المدونة وكتبت موضوع جديد... يللا معليش بس بزاكر بردو

تحياتي

tota said...

زنجولا
طبعا انا اول واحدة نفسى اقابلك وان شاء الله هتتحقق امنيتى
بس عندى اعتراض على كلامك لو تسمحلى
انت وقعت فى خطأ قولبة المدون انه طالما اتكلم فى السياسة يبقى هو حياته سياسة او ادب او فن او علم
هو الفكرة كلها ان ده اختياره وميوله فى الكتابة والجزء المحبب لنفسه لكن لو رجعنا لكيانه كشخص هو بالطبع مختلف
انا قلت كده لانى عرفت مع لقائى مع ناس كتير ان الصورة المرسومة عن المدون من اسلوبه ومواضيعه بتظلمه
يعنى انا مش ابلة الناظرة لانى بحب اكتب التعليقات كده او لان مدونتى واخدة الشكل ده
انا عادية وممكن اتكلم فى اى حاجة باى اسلوب بتكلم عن نفسى علشان انا عارفاها مش هتكلم عن حد معرفهوش
لكن دايما مقابلة الشخص بتغير الفكرة الذهنية مش بتلغيها لكن بتحسنها علشان كده مش عدل الحكم على الاشخاص من تدويناتهم بس
وفى فرق بين اسلوب الكتابة واسلوب الحياه لكن مفيش فرق بين سلوك المدون وسلوكه الشخصى
هتقابلنا امتى بقى
تحياتى

أحمد المصري said...

حقعد مع مين؟
حقعد معاك طبعا 00مش هزار ولا مجاملة00
نفسي أقعد معاك بجد00اقابلك انت ومنال وسوسةوابيتاف برضه00وحائر في دنيا الله وعبد الله00 ويامن وبيجاسوس المصري 00كلكم ناس محترمين والله الواحد نفسه يقعد معاهم في يوم من الأيام00

ROMIL said...

مش عارف
ومش عارف أرسم صوره أو أنطباع ثابت عن أي مدون متابعه
بس اللى أنا عارفه أن المدونين ناس مختلفه " نسبيا وياريت نتقابل لو كان عند البعض الرغبه في ذلك أكيد حنكسب من الحكايه دي صداقات مميزه

ROMIL

Dr. Tantawy said...

الورده السوده


كويس اننا متفقين :) ربنا يبيض ايامك يا رب ههههه

Dr. Tantawy said...

albida


طبعا مكتوب و منور اهه ههههه

هوه ده اللي انا بقول عليه .. نتكلم زي الاصحاب .. كفايه حرقه الدم اللي الواحد فيها من الجرايد و الاخبار و المدونات ... كده انتوا زي الفل .. بس مش هنسى اني مكلتش بيتزا معاكوا ههههه

هرد على السؤال بس حاضر .. من عنيه

Dr. Tantawy said...

على الالفي


سعيد بوجودك في المدونه و تعليقك

عندك حق .. في فضول اكيد ان الواحد يقابل كل الناس الحلوه دي :) بس يمكن على مدى بعيد شويه :)) زي ما قلت الواحد مش ناقص لخبطه و شوشره .. كفايه اللي احنا فيه .. الواحد محتاج اصدقاء بجد .. يتكلموا كبشر وبس :) و طبعا لو الموضوع فيه مزيكا و غنى يبقى يا اهلا بالمعارك ههههه

انشاءالله نتقابل في يوم :) بس بشرط .. تعزمني على سمك في بورسعيييييييد


تحياتي

Dr. Tantawy said...

واحد من الناس


اكيد الناس دي كلها برضه نفسها تشوفك يا باشا

حلو ان كل واحد فينا عنده فضول يقابل ناس تانيه .. و اكيد لو حطيت الموضوع في دماغك زي ما غيرك عمله هيتحقق و هتعرف تتجمع ب كل الناس دي :) و طبعا انا معزووووم ولا إيه ؟؟ هههههه

Dr. Tantawy said...

epitaph


رمضان جانا ههههههه

ماشي يا ستي .. طالما متحمسه كده يبقى يالا شدي حيلك و رتبيها انتي .. بس بشرط .. تجيبي هبه معاكي :) و ممكن تخليها هيه تيجي و متجيش انتي ههههه

Dr. Tantawy said...

epitaph


رمضان جانا ههههههه

ماشي يا ستي .. طالما متحمسه كده يبقى يالا شدي حيلك و رتبيها انتي .. بس بشرط .. تجيبي هبه معاكي :) و ممكن تخليها هيه تيجي و متجيش انتي ههههه

Dr. Tantawy said...

شهيده


شدي حيلك في الامتحانات و ربنا معاكي انشاء الله

و متنسيش الزعتر بقه ههههه

لو جيتي مصر اكيد تنوريها :) بس انتي انوي و قولي يا رب ههههه

Dr. Tantawy said...

A7la Tota


والله انا كمان نفسي اشوفك :) المهم بقه
انا موقعتش في خطأ ولا حاجه :) بس انا تخيلت شكل اللقاء و عشان كده قلت اللي قلته ده :) هديكي مثال

لو انا قابلت واحد صاحبي .. هنقعد نتكلم في الحياه في اليومين اللي فاتوا مثلا و بعد لما نخلص .. بنقعد نجتر اي حاجه من الحاجات اللي قديمه اللي حصلت

انما لو قابلت مدون اول مره اقابله .. تخيلي معايا .. اول حاجه هنتعرف شويه و كده .. و بعدين .. هتيجي سيره المدونه و بالتالي كل واحد هيبدأ يتكلم عن مدونته و هتيجي سيره الموضوعات و الحديث ( اجباريا ) هيتحول للمواضيع بتاعت المدونه .. ده اللي قصدته و ده اللي مش عايزه حاليا :) الواحد محتاج لأصدقاء جدد .. لا اكثر ولا أقل .. كفايه بقه اخبار سياسيه .. و موضوعات تحرق الدم .. الواحد هيلاقيها منين ولا منين ههههه

يالا .. مستنيكي تقولي هنعمل لقاء :) و انا اول واحد هاجي .. بس الحساب عليكي هههه

Dr. Tantawy said...

احمد المصري



اكيد كل الناس دي عايزه تقابلك برضه :) بس زي ما تقول كله مكسل و بخلان

لو انته ترتبها و تبقى العزومه عليك .. كله هيجي .. و اولهم انا ههههه

Dr. Tantawy said...

ROMIL


يا جنرال :) انته اللي تخطط للمقابلات مش اي عسكري تاني :) قصدي مش اي مدون تاني

المشكله انه كل لما العدد بيزيد الترتيب بيكون اصعب .. بس الواحد فعلا نفسه في تجمع كبير اوي اوي اوي

عبدالله مفتاح said...

ولد يا زنجولا يا طكنطاوي
انا متغاظ منك جدا
يبني لبي النداء:))

albida said...

هههههههههههه
أنت لسه فاكر البيتزا؟!! هههه
ولا يهمك المرة اللى جاية هنطلبلك محل البيتزا كله لحد عندك

وعلى فكرة اعلان
cinnabon
اللى انت حاطه ده جوعنى أوى.. أصلى بمووووووت فيه


manal

-_- said...

انا اتصلت و محدش بيرد يا طنطاوي

هي الخدمة خاج نطاق الخدمة ولا ايه ؟؟

عايزك ترزعلنا وزارة الاتصالات كام كاريكاتير كده في الصميم

و على فكرة حضورك للاجتماعات شرف للمجتمعين قبل ما يكون شرف ليك

لانك انسان زي العسل

Dr. Tantawy said...

عبدالله


يا باشا انا بعتلك ايميل طويل اوي

ياريت تقراه وترد عليه

Dr. Tantawy said...

albida


طبعا فاكر البيتزا

الخيانه العظمه متتنسيش يا بنتي ههههه

عموما تتعوض

العزومه عليكي .. الغذا في بيتزا هت و الحلو بعد كده في سينابون

مفهووووم

Dr. Tantawy said...

sharm


وزاره الاتصالات دي روحي روحي روحي ههههه

مش كفايه هيزودوا نمره على الرقم :) قال يعني هوه كان اشتكى

من عنيه استنى عليه شويه و انا هتوصى بيهم هههه

و متشكر على المجامله الحلوه دي :) يا عم هو احنا اللي نطول نشوفكم برضه

تحياتي يا باشا

الحمقاء المضلله innominate x said...

لنل بردو عندي نفس وجهه النظر في لقاء المدونين

إبـراهيم ... said...

عزيزي طنطاوي ، الذي لا يعرف يقول عدس .... لا أقول ذلك لدعوتـك لحضور لقاء مــــا ، ولكن إنتا نفسك طلع فيه ناس عاوز تقابلهم أهه !!!........

جميل إنك تقابل حد عرفته
لكن الأجمل تخلي القدر يجمعـك بناس كـده .............

عن تجربتي الشخصيـة براهن إن المصريين أهمه ، لما بيتقابلوا بيحبوا بعض ......مهما كانت الاختلاافات !


لسه محدش اتخانق ، واللي بيتخنق ممكن ينسحب بهدوء

فكرة بقى السجاير و الحاجات دي ف دي وجهة نظرك
أنا الدنيا علمتني أتقبل الناس بشتى صنوفها



حتى اسأل علي :)


ربنا يصبرنا

Dr. Tantawy said...

مزمز


متلاقيش يا حاج :) انا معرفوش يا بيه ههههه

Dr. Tantawy said...

innomenix


متفقين يا باشا .. قلهم بقه هههه

Dr. Tantawy said...

ابراهيم معايا


يا عم لا عدس ولا بصل :)) مين قالك اني معرفش بس هههه

يا عم انا مقلتش اني مش عايز اقابل حد .. و زي ما انته قلت انا نفسي اقابل ناس
انا كل اللي قلته اني عايز اقابل ناس معينه .. من نوع معين
مش معناه تقليل من الاخرين بالعكس .. هو تقليل من نفسي و شخصي بالمقارنه بيهم

ده كل اللي انا قلته :))

كلبوزة لكن سمباتيك said...

السلام عليكم
ازيك
انا مش فاهمة ليه مستشهد بالاية دي بالذات هو في حد تطاول على كتاب الله في اللقاء؟
--
بتحب يكون ليك قيمة و فعال في المكان اللي انت فيه
كويس نعمل ميتنج تكشف فيه على المدونيين و ديديلهم حنقة بنج هدية
--
احب اقابل مين؟
محبش اقابل حد احيانا الوهم بيبقى احلى من الحقيقة


تحياتي