2007/02/23

بيان هام .. من مدون غلبان

البيان الأول : تدوينه الجواز
واضح ان تدوينه الجواز طلعت تهم ناس تانيه غيري .. و واضح ان في شباب مكلكع غيري في البلد دي ههههه .. التدوينه هتفضل موجوده و اللي عايز يدي رأيه فأنا هكون ممتن ليه و هفضل استقبل الاراء و ارد عليها انشاء الله .. فلا تبخلوا بنصيحتكم


فكرة الرسم منقوله عن مدونة / منال و علاء

البيان التاني : سبحان الله
المدون عبدالكريم عامر ( بلاش كريم دي عشان بتنرفزني ) .. اتحكم عليه بـ4 سنين سجن .. و طبعا بما اني غير متعاطف معه بالمره .. فانا لست بصدد الكلام عن الحكم الظالم و الشاب المقهور والحريه المسلوبه في مصر .. لأني لو عايز اتكلم عن كده في نماذج كتير اتظلمت .. بجد .. و اتقهرت .. بجد .. مش هاجي على واحد .. ولا بلاش .. اللي يهمني في الحكم ده حاجه واحده بس .. الاخ ده .. اتعرض لشخص رسول الله (ص) .. و للدين الاسلامي ككل .. و النتيجه 3 سنين سجن ؟؟ ازاي انا مش فاهم .. محدش قالكوا اهدروا دمه لان احنا بلد فجرت خلاص و كبرت على انها تمشي على شرع الله .. حتى لو كان اهله قالوا عليه نسناس و لازم يستتاب وبعدين يتقتل .. بلاااااش .. قلتلكم احنا بلد كفره وولاد كلب و مش هنمشي على شرع الله و كفايه اوي ان خد 3 سنين .. ما علينا .. هيه جت على ده يعني .. ما كلو بقه بيتكلم على الدين و يخبط براحته و العمليه زاطت اوي .. وبعدين مهما كان اهه مننا و علينا .. اذا كان الامريكان و الدنمارك شتموا و قلنا سماح النوبه دي .. هنيجي على المصري .. يالا خلينا وطنيين و بنشجع منتجات بلدنا .. حتى لو كانت واطيه و قليلة الاصل
اللي يضحك .. ان نفس القاضي ( النبيه ) اللي شاف ان سب الدين و الرسول .. يستاهلو حسب القانون اللي بسلامته درسه في الكتب .. تلات سنين .. هوه نفسه اللي حكم ان التريقه على الرئيس .. تستاهل سنه سجن .. يا سبحان الله .. يعني شتيمه الريس تساوي تلت شتيمه الدين .. يا حلاوه يا ولاد .. و الله مصر لسه بخير .. و شعبها ده يستاهل كل خير برضه .. فعلا .. بلدنا دي مش بس بتاكل ولادها .. هههه .. دي بتمضغهم و تتفهم للكلاب تنهش فيهم


Use this banner in ur blog , if you are Tota`s Fan


البيان التالت : توته

من كام شهر
و على كل مدونه مصريه
ظهرت واحده جميله شقيه
بتكتب لنا كلمات مضبوطه

عمرك يوم ما تحس بضيق
او تتنرفز م التعليق
ما هي اصلها فاهمه و ذكيه
ومن فتره .. بدأت تدوين
كلامها كبير .. يملا دواوين
اكيد دلوقتي عرفتوا مين

توته حبيبتنا .. وعايزه تسيبنا
زهقت يمكن من عمايلنا
ومحدش عارف يقنعها
انها واحده علينا و منا
خليكي معانا .. يا توته
راح نبقى لآخر الحدوته


ادخل على مدونه توته و اكتبلها رأيك فيها بصراحه .. لأني متأكد ان كلامك لو كان من القلب هيغني عن ميت دعوه لها بالبقاء معنا مدونة ذكيه .. جميلة .. مثقفه .. و الاهم انها حنينه جدا :) يالا .. إلى مدونه توته .. للأمام سر ..
إضغط هنا للوصول للمدونة

بالمناسبه .. مدونه صديقه و عزيزه جدا هي لحظة صدق .. اختارت برضه موضوع الاحتجاب ده في هدوء و بدون ما حد يعرف .. لكن اسبابها كانت منطقيه عشان كده مقدرتش اقولها حاجه .. لكن منال و توته و قبل كده شيريهان مقالوش اسباب منطقيه بالنسبه ليه على الاقل .. عشان كده مسبتهمش في حالهم :) و اهي شيريهان رجعت و منال وعدت انها ترجع تكتب تاني .. فاضل توته .. خلينا نشووووفك



21 comments:

mariam said...

اول تعلق
انا اللى هقص الشريط

بالنسبه لكريم فأنا عمرى ما اتعاطفت مع اللى عمله
و ازدراء الأديان مش حرية تعبير
انا كاتبه فى الموضوع ده
بس فى نقطه تهمنى
هى اهانة الرئيس
كريم يتحاكم بتهمة اهانة الأديان آه
لكن بتهمة اهانة الرئيس لأ لأ
لأن الباب ده لو اتفتح مش هيتقفل


بالنسبه لموضوع توته فأنا جالى اكتئاب
الناس مالها بتسيب التدوين ليه
بجد انا اتضايقت جدا
بس هى للأسف وضحت فى ردها عليا و على التعليقات انها مش ناويه ترجع
يا ريت نقدر نرجعها زى منال

تحياتى يا طنطاوى

عبدالله مفتاح said...

يا طنطاوي
انت ايه اخبارك مش تتصل تطمني\ عليك

Amira said...

اولا
مبروك عليك النجاح و لو انها متأخره قوي

انا بقالي فتره مش بقرا لك
للأسف الشديد

المهم
تدوينة الجواز

الجواز شر لابد منه
مش حتقدر تعيش من غيره

و الجواز و العيال مسئوليه مش حتعيش مرتاح بيها

بس لازم يا دكتور

انا بشكرك لبيانك عن توته

انا بقالي كتيييييييييير
ماقريتش ليها

مش عارفه ليه لما جيت عندك المره دي حسيت اني مش عايشه في الدنيا او جايز انشغالي خلى ناس كتير تسقط مني سهوا

و خصوصا لما راحت اللينكات من ال
favorites
اما الكمبيوتر باظ

المهم يعني
تحياتي ليك
و خلاص

tota said...

زنجولا

البند الاول
البلد كلها كلاكيع
والحق ان الموضوع كان اختيار فى فترة من الفترات الان اصبح فرض يا عزيزى لا احد يختار ان لا يتزوج ده رسمى مفيش فرصة الا ما ندر

البند التانى
كريم واغلب ظنى برغم عدم تعاطفى معه انه يسعى بفكرته المحمومة الى الحصول على جنسية دولة اجنبية والخروج من البلد تحت مسمى اضطهاد دينى كما فعلها مئات من قبله بس حظه انه ياخد الاربع سنين الاول وبعدين التأشيرة محدش بياخدها بالساهل يا سيدى

البند التالت
لم اتخيل ابدا ان اجد هذا البند بجد فعلا ذهلت هل احدهم يفطن لوجود مدونة اسمها توتا وبيحب كلامها
كام واحد يهمه ترجع
انا لا اعانى من فقدان الثقة فى نفسى بقدر ما اعانى من فقدان الثقة فى العالم التدوينى

لكن كلماتك يا طنطاوى اخجلتنى بشدة واخجلنى كل تعليق فى المدونة
ربما لم تقنعك كلماتى لكن فعلا دى رغبة عن صدق اما ان اكتب كلمات تستحق الكتابة واقتنع انها وصلت كما اريدها او لا اكتب وكفى المؤمنون شر القتال
والله لم يكن هذا البوست اختبار لمعرفة قدر نفسى انا فقط لانى احترم كل معلق يزور المدونة ولا يجد شىء فمن التهذب ان اقول لن تجد شىء بعد اليوم وكان شكرى لكل من قرأت لهم واحببتهم
انا لن اذهب بعيدا سوف اعلق كما كنت ربما ليس بنفس التواجد لكن لن انسحب لان العالم التدوينى به اشياء اخرى جميلة واشخاص احبهم واعتز بوجودهم

ولتانى مرة اكرر لا اعرف لماذا يعنى لى اشخاص بعينهمشيئا ما واعتز بهم واحبهم واسعى الى كتابتهم وتعليقاتهم
لا يوجد سبب محدد لذلك غير تواصل روحى
سبق واشرت انك واحد من هؤلاء الذين لولا وجودهم فى العالم التدوينى لرحلت حتى عن التعليق

خلاص يا سيدى هتشوفنى معلقة كما كنت وهخنقك زى ما كنت بعمل
طنطاوى انا متشكرة جدا على انك اختصتنى بهذا البند وبصراحة وانا بعلق كنت ببكى على غير عادتى طبعا لكن كنت متأثرة بشدة ويعلم الله صدق كل كلمة كتبتها

ميرسى تانى وتالت
تحياتى

Dr. Tantawy said...

Mao

اهلا بيكي .. الشريط مش مصدق نفسه والله ههههه

انا قريت موضوعك عن كريم و عجبني جدا و كتبتلك تعليق زي الفل كمان هههه

توته .. مفيش معاها حل غير الضغط الشعبي
لا تتنحى .. لا تتنحى


منوره يا مريوووم

Dr. Tantawy said...

عبدالله

انا هنا :) جاي في السريع

Dr. Tantawy said...

farida


حمدالله عالسلامه :) انا مكنتش لاقي مدونتك من يوم كلنا ليلى :) منها لله بقه

شر لا بد منه .. طيب :)) شايلينك لعوزه ههههه


انا حطيت مدونتك عندي في البلوج عشان منساهاش تاني :) و على فكره المدونه الجديده جامده :) بس صوره البنت اللي فيها عايزه شويه ستر عوره هههههه

تحياتي و منوره

مممم

ليكي وحشه والله :) حمدالله عالسلامه

Dr. Tantawy said...

totaaaa

واضح ان الكلام مش جايب نتيجه و هتبدأ الحمله الشعبيه الاولى للضغط على مدون عايز يريح دماغك مننا :) مش هيحصل .. على جثتي ههههه



البند الأول
بلاش تشاؤم .. خليها على الله


البند التاني
وجهة نظر حلوه ومنطقيه .. مجتش على بالي


البند التالت
خليكي زيي
انا اول يوم كتبت فيه قلت اني هكتب لنفسي مش عشان حد تاني
و ناس كتير كده و عايشين
ادخلي على مدونات لناس بجد عبقريه و شوفي عداد الزيارات هتلاقي قليل جدا بالنسبه لمدونات تانيه هايفه
و مع كده الناس دي لسه بتكتب و بتكتب حاجات مؤثره و عبقريه جدا

اكتبي عشان نفسك ..عشان في يوم ترجعي تقري الكلام ده و تقولي ياااااااااه :) بقه انا كتبت الكلام الكبير ده

انا لسه لحد دلوقتي بقلب في الارشيف بتاع مدونتي و اقعد اضحك على الحاجات اللي كاتبها :) صدقيني ليها متعه جميله

اسمعي كلام اخوكي الصغير حلاوه ..و زميل المهنه القادم .. و المدون الغلس .. و المصري السئيل .. اللي بيقولك ارجع يا بدرااااان و إلا ... مممم .. لوجوهات حملة الضغط نزلت و هتبقى مجزره
انا مش عايزك مجرد معلقه .. و ان كان تعليقك بستناه يعني :)) مش بس عايزك كمان مدونه .. لان تدوينك اقل ما يقال عنها انها فعلا .. تقيله .. كلام مش هايف و مش مكتوب في خمس دقايق زي مالناس بتعمل :) و انا منهم يعني .. الوحد بيحتاج كل فتره يقرا مدونه محترمه .. زي مدونتك او مدونة العزيزي .. زي ما برضه بنحتاج احيانا لمدونات تضحك و تشيل الهم .. فاهماني

يارب كلامي يجيب فايده و متضطرنيش ابدء حملة الضغط الشعبي هههههه

تحياتي يا احلى توته

وبلاش دموع تاني :) عشان مفيش حد يستاهل دموعك يا دوك

اوكي

koukawy said...

هو انت متأكد انه سب في الدين و لا دي تلفيقه لأن انا الصراحه مدخلتش مدونته ???????????????????
اصل بصراحه الواحد مبقاش عارف الحقيقه فين

Memo said...

اولا : انت بتكلم جد و لا ده فيلم جواز ايه با ابني و انت لسه وراك هم ما يتلم
دانتا لسه بتقول يا هادي

ثانيا : كريم ده ضحيه افكاره الي مش نضبفه و اهمال اهله اللي نسيو يوجهوه و لما افتكرو ان ليهم ابن اتبرو منو

ثالثا: الناس دول حبايبنا هما بس متديقين شويه و هتبص تلاقي رجعت ريما لعادتها القديمه
تحياتشييييي

واحد من الناس said...

عبدالكريم عامر ده حيوان
من امتى سب الرسول وسب الدين حريه
كان في حمله اسمها
free kareem
انا بقترح حمله جديده اسمها
don't free kareem
او
fuck kareem

Amyra said...

عزيزي الدكتور

انا احاول اعلق من امبارح و مش عارفة انت ليه مانعني من التعليق
مش عارفة ها
كنت عايزة اقولك سيبك من الطب وروح اشتغل كاريكاتور ماشاء الله انت موهوب ومش كدة بس عندك حاجة مميزة فيه
ربنا يزيد
بالنسبة لتوته اهو الشعب التدويني كلو عندهافي المدونة وانشاء الله تغير رأيها

ملاحظة
و ارجو ان فريدة متزعلش مني بس اناكمان اشوف ان الصورة لا توافق مضمون مدونتها و انت عارف انا بتاع حقوق المرأة يعني عصر الجواري ده ملياش فيه
قريت ان في كثير بيشكرو في مدونتها بس والله انا الصورة بتزعجني فمعرفش ادخل

تحياتي يا طنطاوي وبلاش تقول انك مش عاوز تتجوز احسن والله حقول لبرايد و حتشوف حتقولك ايه
اه كمان عندك حق مش المهم الكم المهم انك تكتب و لو قجرت تضيف حاجة جديدة او اسلوب جديد فهو حيعلق حيعلق
لا يصح الا الصحيح

تحياتي

Dr. Tantawy said...

Koukawy

متأكد :) أني قرأتها بنفسي في مدونته
ممكن تدخلي عليها و تشوفي بنفسك

اهلا بيكي :) بس عملتيلي جو ارهابي بصراحه :)) س و ج :)) ههههه

http://karam903.blogspot.com/

Dr. Tantawy said...

Memo


اولا : انا بتكلم عن مبدأ .. مش بتكلم عني انا شخصيا :) انا بقول على امثله شايفها حواليه لناس بتتجوز لمجرد انها كبرت و لازم تتجوز .. كأنه تطعيم لازم يتاخد هههه


ثانيا : كلامك صح


ثالثا : مش باين .. ربنا يستر

تحياتشييييييييي

Dr. Tantawy said...

واحد من الناس


بلاش شتيمه يا ولد :) خلينا احنا احسن منه ههههه

موضوع
free kareem
كان تعاطف مع مدون من ناس دماغها منقوعه في كلمه حريه و بس .. بعيد عن اي حاجه تانيه

لكن بعد الحكم .. بقينا احنا نفسنا عايزين نقول حاجه تانيه
زي ان الريس بني آدم مش إله .. و من حق أي كان انه ينقده

تحياتي يا باشا

Dr. Tantawy said...

Nada


انا مش مانع حد والله :) انتي عارفه هيه يمكن كانت تحقيقات المباحث لأنك بتعرفي فرنساوي ف قلنا يمكن تكوني جاسوسه و عملنا شويه تحريات ههههه
مانع مين يا بنتي :) دانا غلبان هههه

بالنسبه للكاريكاتير شكرا لرأيك :) و بالنسبه لتوته مش مهم كتر التعليقات .. المهم ان التعليقات دي ترد على الاسباب اللي هيه كاتبتها .. يعني مش كفايه نقول راجعي يا توته .. عايزينك يا توته .. دي مشاعر جميله لكن للأسف مش مؤثره


بالنسبه لفريده قوليلها رأيك عادي .. هيه مبتزعلش و على ضمانتي انا شخصيا :)) و بالنسبه لبرايد ف هيه على فيني و راسي بس لو كلمتني انا هعقدها شخصيا من الجواز ههههههه

..........tahayo2at said...

ازيك يا باشا

معلش انا متأخر المرة دي في الرد بس الواحد اليومين دول مطحون ورق و تقديم اشي وزارة الصخة
اشي موقف من الجيش
على اخلاء طرف من الامتياز
عالعموم امانة عليك تدعيلي

بالنسبة لكريم
للاسف بلدك ما بتطبقش الشريعة
هاتعمل اية؟؟؟
بس المشكلة ان اللي صوتهم عالي هما العالملنيين اللي عايزين يوصلوا للناس برة ان احنا كلنا كدة
عايزين دولة مدنية عالمانية

في حين ان تسعين في المية من الشعب اللي هو ولاد البلد زيك و زيي و زي الناس اللي علقت قبلي
كلنا بنخلم بدولة محافظة عالدين اكتر من كدة

بس اللي انا متأكد منه
ان تهمة سب الدين ها تتلغي قبل تهمة سب الرئيس من القانون

و سلامي لتوتة اللي لازم نحترم حريتها الشخصية
بس يو ما تفكر ترجع
تكون متأكدة ان ليها جمهور مستنيها

..........tahayo2at said...

اه نسيت

بالنسبة للأخت اللي بتغني

يا ريت تقولها هي تجيب سبب واحد ان البني ادم يقعد في مصر

علشان ابقى دكتور و اخد 200 جنيه في حين ان الجزمة-لا مؤاخذة- ب 150جنية في احسن الظروف

شكرا يا مصر

واحـــد مـــــن الـنـــاس said...

سيبك من كريم
بلا قرف

سيبك سيبك

الكاريكاتير اللي في الاخر ده هااااااااايل
موتني من الضحك

Dr. Tantawy said...

DR.SHERBO

ارفع رأسك يا اخي قد مضى عهد الاستعباد ههههه

احنا زي الفل و بناخد 200 جنيه

انا متفاااااااااااءل ههههههه

Dr. Tantawy said...

واحد من الناس



انا سايبني منه خالص :) ولا يلزمني بنكله

هههههه

منور انته يا عم :) و سيبك منه خاااااالص