2007/02/18

تدوينه .. لا تهمك

-
مش عارف ليه اخترت الموضوع ده دلوقتي .. لكن اللي متأكد منه انه غالبا الموضوع ده لا يهمك .. و مش هتحب تقراه ولا تقول رأيك فيه .. إلا الناس اللي تفكيرها عميق .. الناس اللي بتبص لقدام .. قدام أوي .. مش معنى كده اني من الشريحه دي .. لكن لما اكتب في البلوج لمده سنه و نص :) و اجي في مره اكتب موضوع عميق يبقى كويس هههه
-
يا ترى لو قررت اني اعيش بدون جواز .. لو الموضوع تملكني بدرجه كبيره .. بعيد بقه عن اسلوب التريقه بتاع هوه الناس لاقيه تتجوز و السخريه من الاوضاع الماديه و خلافه .. يا ترى لو فعلا الواحد اتخذ قرار جريء بالرهبنه .. هل الحياه هتستمر بسهوله .. و بدون كلاكيع و عقد .. ؟؟ .. شفت امثله كتيره و مش مشجعه .. حقق بعضها نجاح شخصي كبير لكن ترسب جواه عقد لا حصر لها .. و كلاكيع ظهرت مع الزمن .. وخصوصا في فتره الشيخوخه .. والوحده الاجباريه .. يا ترى بيقدر يتغلب على غرائزه ؟؟ .. بيقدر يتغلب على مشاعر الابوه .. الاسره .. النهايه الطبيعيه لليوم في حضن الزوجه و دفء المنزل .. مشاكل الاطفال و طلباتهم اللي مبتخلصش
-
الجواز تكامل ما بين سطوة الرجل .. و دلال المرأه .. و غرض كل منهم في فرض السيطره على الآخر .. و املاء شروطه الموضوعيه والغير موضوعيه .. بغرض قياده سفينه الاسره للأمان .. كما يعتقد كل منهم .. هي سنه الحياه و حقيقه واقعيه لابد من وجودها .. بل هي امر الهي صريح و دعوه رائعه للتزاوج و التكافل بين المجتمعات والاسر .. لكن .. يظل السؤال يطرح نفسه .. هل في العزوبيه او العنوسه كما يسميها البعض مصدرا للأمراض النفسيه و الاجتماعيه .. الا يمكن ان يكون الفرد منا عازبا و في الوقت نفسه صحيحا .. عاقلا
-
فكرت في اللي عملوا كده .. قلت يا ترى هوه الواحد ممكن ينشغل بالحياه لدرجه انه ميفكرش في الحب و الجواز و الاسره و الاطفال .. و وصلت ان الموضوع ممكن و إلا ازاي قدر الواحد انه يعيش من يوم بلوغه و حتى قراره الزواج بدون مشاكل معقده عن طريق تهذيب تلك الرغبه و السيطره عليها .. يعني الواحد يقدر يعيش عمره بدون جواز .. و بدون التفكير مجرد التفكير فيه .. او في طرف آخر لحياته .. و بدون ما يكون مريض نفسي او معقد من الجنس الآخر .. لكن تناقض كلامي مع كلام آخر داخلي .. قلت هوه الواحد اللي بيشتغل و ينشغل ده .. بيقدر يعيش بدون غريزه الاكل مثلا ؟؟ .. او غريزه حب المال .. او حب الوجاهه و السلطه ؟؟ .. اكيد لأ .. يبقى المنطق انه ميقدرش برضه يتحكم في غريزه الحياه بدون زواج و اسره .. و إلا هيكبت نفسه .. و يدمر شخصيته
-
ارجوا الافاده :) الموضوع يهمني .. و قد يكون احد اختياراتي في المرحله القادمه ههههه .. هل من رأي

46 comments:

mariam said...

انا عايزه اقول حاجه
انت دلوقتى عايش مع بباك و مامتك واخواتك اكيد
ربنا يخليهم لك طبعا
لكن بعد كده
اخواتك هيتجوزوا و يسيبوك
و كمان دلوقتى عندك صحابك و قريبين من بعض لأن لسه الحياه العمليه متعمقتوش فيها
بعد كده هتسألوا على بعض كل اسبوع
او شهر او يمكن تنسوا بعض
بسبب مشاغل الحياه
المشكله ان الوحده شعور صعب قوى
بعد كده

tota said...

زنجولا
فكرة العزوف عن الزواج ليست بغريبة فمعظم الرهبان يترفعون بانفسهم عن فكرة الزواج ولا ينتهى بهم المئال الى خلل نفسى طالما ارتضى بالفكرة واقتنع بها وليس منشئها هروب من نقص امكانيات او سلوك مجتمع او اى سبب اخر
كما يبقى جزء مهم اخر هو رضى المجتمع عن الفكرة فلا تكون محل شك او تساؤل او فضول يدفع اصحاب الفكرة فى بعض الاحيان الى الاكتئاب لكونهم مخالفون للمجتمع وشكلياته
اذا اجتمع الشرطان اظن ان الفكرة ممكنة
والحق انها ليست بغريبة فاعرف الكثيرين على هذا الحال ربما لان التوقيت غير مناسب بعد او لغياب شريك الروح
واعرف ايضا نقائض ذلك فرضت عليهم ظروف المجتمع ان يكونوا فى هذا الوضع وانتهى الحال بخلل نفسى

فعنصر الاختيار والرضا والقناعة هو الذى يلعب الدور المهم فى الموضوع
هذه وجهة نظرى والله اعلم
تحياتى

sherehan84 said...

على فكره الفكر ده منتشر في بتوع طب .. يمكن الدراسه لها يد في الموضوع ؟؟ مش عارفه
المهم يا ابني اعمل اللي انت شايفه ومؤمن بيه أيا كان ..ميهمكش كلام الناس ميهمكش نظراتهم وتساؤلاتهم ..وبعدين هو أصله مش قرآن يعني انت دلوقتي حاسس انك مش عايز تتجوز بلاش تتجوز كمان خمس عشر سنين لقيت نفسك وحيد ومحتاج أنيس اتجوز ..ماهواش عقد في الشهر العقاري يعني
وبعدين آدي اللي خدناه من طب .. انت ايه يبني اللي رماك الرميادي

..........tahayo2at said...

ازيك يا دكترة

شكلها فرطتك فرطة جاز لدرجة انها عقدتك من كل الحريم:-)
عالعموم كلنا هذا المفروط

ان جيت للجد
طبعا الجواز مهم جدا جدا جدا

هتقولي ليه؟

أولا :دينيا
يقول رسول الله صلى الله عليه و سلم في حديث طويل و فيه:
و اني لأتزوج النساء فمن رغب عن سنتي فليس مني
وطبعا مش محتاج اقولك ان ابنك لو كان صالح يدخلك الجنة

ثانيا:جسديا يعني جنسيا
اذا كنت تعرف طريقة تكمل بيها بقيت عمرك من غير ما تلجأ للحرام يا ريت تقولها للشباب
ما تنساش انك لسة ما اتحطتش في فتنة بجد
يعني اخرك دلوقتي موقع نت ولا سي دي
انت في خياتك لما تكبر و تبقى دكتور غني-لانك ما اتجوزتش طبعا-هتكون معرض لفتن كتييييييييييييرة

ثالثا:اجتماعيا
أنا كتيير فكرت في السفر او الهجرة و الطفشان من البلد دي
بس لمل شوفت تفاعل ابويا و امي مع مع بنت اخويا و كدة
حسيت ان هما ما ربوناش عشان يشوفونا عالنت
لأ
دول مستنيين عائلتنا
دا طبعا جنب رأي
mano
اللي انا بأيده جداااااا

بس
خلاص

Amyra said...

والله السؤال صعب
يعني انا لما اعمل اسقاط لحياتي المستقبلية اعرف ان الزواج لا بد منه فالاعوام تمر و نحن نكبر و كفى ان ننظر الى اجدادناكي نفهم صعوبة العيش عند كبر السن بدون مراعة ابنائك و احفادك
ثانيا يا عزيزي فبما أنك رجل فيمكنك العزوف على الفكرة مؤقتا دون ان يسبب لك هذا مشاكل كبيرة مع المجتمع
*تالثا ساعات يكون عدم الزواج قدرا و ليس خيارا مع ان هذه الحالة نجدها اكثر عند الانات الا انها قد تكون موجودة عند بعض الرجال الذين لم يجدوا المرأة التي تناسبهم
* و مع هذا فبرايي الشخصي ليست الفكرة ان تختار او لا العزوف عن الزواج و تقول بعدها مثلا انا قررت العزوف و لكن الفكرة ان تعرف ماهي الاسباب التي تجعلك تأخد قرارا كهذا
* الفكرة ان تصارح نفسك و تحدد اولوياتك
أما فكرة صراع الرجل و المرأة فهي أزلية والمسؤولية صعبة
لا تحاول السير ضد التيار في مسألة كهذه و انما اركب قاربا و تحكم انت في ابحاراته و استراحاته و موانئه
و المسألة قدرية
أرجو ان لا تتخدد من كتاباتي نصائح بل هي مجرد تعبير عن رأي شخصي لا أكثر
تحياتي

الوردة السوداء said...

بسم الله الرحمن الرحيم
الموضوع جميل جدا
وانت طارحه بموضوعية عالية اوى
المهم
انا ناوية اطول شوية
ارجو سعة صدرك
خلينا نرجع بالزمن ورا شوية
الرسول عليه الصلاة والسلام قالنا ان الزواج عفة
الموضوع كله من رأى قدورات
وطبعا البشر بتتفاوت فى قدوراتها
انا واحدة من الناس مقدرش اعيش من غير شريك او على الاقل التفكير فى شريك كويس للمستقبل
فى بنات تانية تقدر
يعنى اول حاجة
اعرف قدوراتك
تانى حاجة
الواحد ياسيدى الفاضل
الم سىء جدا
انا واثقة انك مش هتستحمله
وغير كدة
انت ممكن تعصى ربنا وترتكب زنوب انت مش قدها

اعرف قدرتك
وحدد
وان شاء الله ربنا يهديك للطريق الصح

salwa hegazy said...

بكرة ذكرى وفاة سلوى حجازي
21 فبراير
افتكرها ببوست

FATMA said...

لأ طبعا يهمني ميهمنيش ازاي يعني
بس انت لازم تفكر تاني

واحد من الناس said...

موضوع عميق جدا ليس من السهل الأجابه عليه
وتزداد الحيره كلما حاولت الأجابه وقد ياخذ تفكيرك منحى وجودي
وتتسائل لما انا هنا ماذا افعل ولماذا
وسيظل السؤال بلا جواب لماذا نتزوج؟
طالما هناك شخصيات مختلفه ذات فكر مختلف
وقد تناولت هذا الموضوع من خلال مدونتي بموضوع ياخذ الأسم لماذا نتوزج وقد تناولت فيه الأسباب التي تدفع للزواج
وادعوك لزيارة مدونتي وقرائه هذا الموضوع
http://1minelnas.blogspot.com/

spellz said...

ummm, msh enta lewa7dak eli betfakar l tafkir da, bs ana mn ra2yi sebha lel zeruf matqararsh 7aga, enta lesa soghayar 3muman,
3aref l moshkela enak lama tigi teboz 3l motazaawegin hatla2i o3zamhom namazeg la toshage3 3la l zawag w lamma tebos 3l 3ozaab hatla2ihom brdo fe mshakel

heya l 7yat kda le kol qrar ta7adeyatoh w tanazolatoh, ana mn ra2yi 3ish 7ayatak w nafad leghayet matla2i 7ad yestahel teda7i 3shano, laken ta5od qrar abadi zy da w tefdal motamasek feeh fa da sa3b awi

Alf mabruk 3l ta5arog 3o2bali :D

soosa el-mafroosa said...

يا صباح الإكتئاب العميق

ليه يا عم بس كده ..و بعدين دانت لسه متخرج طازة
و مهما تفكر انك عرفت الدنياو بقيت قادر تتخذ قرارات مصيرية زي دي دلوقت
فده غير صحيح
استنى شوية لما تحتك بالحياة العملية خارج أسوار الجامعة

التعامل مع الناس و خصوصا المرضى
هيغير رأيك في حاجات كتير جدا

ده مش وقت إتخاذ قرارات مصيرية زي دي

عموما أسوأ ما في فكرة عدم الزواج دي هو الوحدة
الدنيا ما بتقفش لحد
و يوم ماتبص حواليك و تلاقي كل شخص كان موجود في حياتك مشغول عنك بحياته
ده إحساس قاتل ..مش ممكن يلغيه الإنشغال في الشغل أو غيره
مش بس جسديا..لكن الزواج مهم نفسيا أكتر

الإحساسا بالونس و العشرة أشياء أساسية في حياتبا و مابنحسش بيها إلا إذا لا قدر الله إنحرمنا منها

إنت عارف لو البت "برايد" قرت الكلام ده
إحتمال تعملك بوست مخصوص تشتكيك للناس
يا عم البنات لاقيين عرسان لما كمان اللي موجودين يضربوا عن الجواز؟

----------------------
خارج الموضوع

فيه ناس بيقولولي انهم مش شايفين المدونة بتاعتي

ماتعرفش ايه هي المشكلة و تتحل إزاي؟

شكرا مقدما يا دوك

مُزمُز said...

مش هاكلمك من ناحية دينية لأني مبحبش ألزق الدين في كلامي وكمان لرأن الزواج في الإسلام مش فريضة على الواحد طالما هيقدر يصون نفسه عن فعلة الزنا المجرمة في الدين الإسلامي

لكن من ناحية تانية
آدي ضرورة الزواج في رأيي

أولا

الجنس ليس مجرد حاجة فسيولوجية للإنسان ولكنه أيضا احتياج نفسي ضروري جدا لا تكتمل إنسانية الإنسان دون ممارسته بانتظام وهذا الانتظام غير متاح لك كمسلم أو متدين عموما إلا بالزواج

ثانيا

بعيدا عن الجنس وحتميته
العلاقة المقربة بين الرجل والمرأة ضرورية جدا جدا حتى يكتسب الإنسان ثقته الكاملة في ذاته وتتحقق إنسانيته تماما ويجد أمام عينيه من يشاركه تفاصيل حياته كاملة دونما تمايز يفكران معا ويحلمان معا ويسيران معا وهذه العلاقة المقربة التي أتكلم عنها لا تتحقق إلا في الزواج بم أنك تحيا في مجتمع تقاليده لا تسمح بالعلاقات الحرة والكاملة بين الرجال والنساء

ثالثا

الإنجاب ضرورة اجتماعية وحق للعالم الذي تحيا فيه وحق للرب الذي أوجدك كما أنه أيضا ضرورة نفسية واحتياج دائم داخل الإنسان أن يكون مسؤولا عن طفل وأن يعيش في دور المرشد العارف لمن هو أجهل وأصغر ولا يخبر عن الحياة شيئا وضروري ايضا بعد بلوغك السن التي تعجز فيها عن مساعدة نفسك لأنك لن تجد من تحمله أحمالك وتورثه اعباءك وتطلب منه مساعدتك دونما خجل سوى من ولدته وربيته وكان لك الفضل في جعله إنسانا

رابعا

يكفيك من نعم الحياة جميعها نعمة أن تسمع كلمة بابا وأن تجد من يقبل يدك كل صباح في محبة خاصة وتوقير كامل
هذه وحدها تجعلني أحب أن أتزوج اليوم قبل الغد

بس خلاص
مكتب معاذ للاستشارات النفسية والقانونية
ههههههه

تحياتي

لا أحد said...

يمكنك العيش بدون زواج

المشاركة لا تعني التقيد

للجنس ابواب أخري كثير

تحياتي

Dr. Tantawy said...

Mano

كلامك مقنع :) و يستحق التفكير

عموما انا مش بتكلم انه قرار مصيري غير قابل للتغيير .. لكنه برضه احتمال جائز الواحد يفكر فيه خصوصا في عدم وجود الصوره المثاليه لفتاه الاحلام .. مش كده :)

Dr. Tantawy said...

TOTA

أنا لسه عارف انك ناويه متدونيش تاني
و مش هسكتلك بجد

المهم .. بالنسبه لردك

انا مش راهب عشان تكون الفكره بسيطه بالنسبه ليه

والله موضوع شريك الحياه و الوقت .. شرطين موجودين .. يبقى الواحد يأجله الى اجل غير مسمى :) اعتقد كلامك يؤيد وجهة نظري الحمدلله هههه

Dr. Tantawy said...

Sherehan

طب بقه منها لله ههههههه

والله الطب ليه دور برضه

انا مخلص عندي 24 سنه
و لسه قدامي سنه امتياز
و سنه او تلاته جيش
و تكليف
و بعدها هقبض 200 جنيه

يعني لازم ادور على طريق تاني

مالآخر مسخره :) اتجوز بإيه و النبي .. مجهودي

الموضوع ظلمه هههههه

Dr. Tantawy said...

Dr.sherbo


مش الحريم والله :) الدنيا بقه هههه

اولا : انا مقتنع بالسبب الديني طبعا .. بس امتى ؟؟ من استطاع الباءه .. و لسه الباءه بعيده اوي هههه


جنسيا و جسديا : زي ما قلتلك احنا مش حيوانات و مهما كان .. الواحد يقدر يتحكم في رغبته .. ده المفروض .. و الا تخيل انك اتجوزت مثلا و زوجتك توفت لا قدر الله .. هتتجوز غيرها بسهوله ؟؟ معتقدش ان العمليه جنسيه في المقام الاول او التاني او التالت حتى

اجتماعيا : اكيد صح

اخيرا : انا مستني افرح بيك الاول هههههه

Dr. Tantawy said...

ناصح امين


هههههه
يخرب بيت النظره المتفاءله دي ههههه

Dr. Tantawy said...

NADA

اولا حمدالله على سلامتك .. انتي فين
مدونتك مش بتتجدد من زمان اوي ؟؟ انتي رحتي فين

ثانيا
السؤال فعلا صعب علشان كده سألت عنه ههههه
انا معاكي جدا
بس انا بقه بقول لا للجواز القدري .. الجواز لمجرد الجواز .. اكره هذه الفكره بشده
انا فعلا بعمل زي ما قلتي و صارحت نفسي ان الجواز ملوش لازمه الا اذا كان فعلا على قناعه تامه مش مجرد جوازه و السلام و الا هيكون مصرها يا اما الفشل التام .. او الملل الزؤام

كتاباتك نصائح و تستحق جدا يا ندا

Dr. Tantawy said...

الورده السوداء

نورتينا

طولي و لا يهمك :) الموضوع مهم و يستحق اني اسمع فيه باستفاضه منكم

قدراتي اني مقدرش اعيش الا مع بني آدمه مقتنع بيها ميه في الميه
مقدرش اعمل زي معظم الناس و اتجوز و اقول بكره تتعدل و الحياه تبقى حلوه و احبها بعد الجواز و كده
لو هيه فعلا مش متناسبه معايا في كل حاجه يبقى مقدرش اوعد نفسي بسعاده و استقرار

دعوااااتك

Dr. Tantawy said...

سلوى حجازي


للأسف انا عندي 24 سنه
يعني معلوماتي عن سلوى حجازي لا تتجاوز انها مذيعه ماتت في حادث طائره بسبب اسرائيل
لكني للأسف لم اشاهد اي من برامجها او اتابعها

عموما ربنا يرحمها و يجازيها خير عن كل ما قدمت انشاء الله و ينتقم من اللي كانو السبب آميييين

Dr. Tantawy said...

توته توته


يهمك :) طب ايه بقه هههههه

Dr. Tantawy said...

واحد من الناس

هقرأ تدوينتك حالا :) و انشاء الله نطلع متفقين في الرأس يا عزيزي

Dr. Tantawy said...

SPELLZ

ana 3arf en el mo3aqaden keter :)
ana saybha aked .. msh msta3gel :) bs zay mat2oly ba2aheb nfsy lel zorof elly mmkkn te7sal

bs fe3lan el qarar masery awy .. w maynfa3sh el wa7ed yeqarar feh ay 7aga bedon mayfakar koways gedan w maysebsh nfso le 3awatfo w mash3ro

allah yebark feky :))) bs da3awatek fel ba2y .. el tare2 lesa tawel

3o2balk :)

Dr. Tantawy said...

soosa el mafrosa

انا مش مكتئب والله ههههه

انا احتكيت من زمان والله يا بنتي و شفت الحياه السوده هههه

انا مش واخده قرار مصيري دي مجرد وجهة نظر جائزه و بفكر فيها .. علشان كده كنت بسمع اراء الناس و بجد استفدت كتير منهم

انا فكرتي كلها اني مش عايز اتجوز لمجرد الونس و العشره و الاجتماعيه
وبرضه مش عايز اتجوز عشان الحب و الورد و الاهات

انا عايز اتجوز علشان في فعلا انسانه انا مقدرش اعيش من غيرها و محتاجها معايا في كل لحظة
يعني عايز وحده لو فكرت فيها في اللحظات الرومانسيه تكون معي الافضل
لو فكرت معها في حياتي المهنيه تكوني ليه الافضل
لو فكرت فيها مع طموحاتي و احلامي .. برضه تكون هيه الافضل

فهماني :)

قولي لـ(برايد) بس متقوليش مين هههههه

Dr. Tantawy said...

مزمز

اولا: موافق عليها

ثانيا : موافق برضه عليها :) لكن الدين و المجتمع يسمح بوجود علاقه متكامله بين الرجل و المرأه مادامت بعيده عن النوايا السيئه و الافكار الخارجه .. يعني الموضوع بإيدنا احنا

ثالثا : الانجاب ضروري طبعا .. بس مش ممكن ناس تتجوز و متنجبش ؟؟ يبقى منقدرش نقول انه ضروره او سبب مهم للجواز و إلا هترمي مراتك في اول محطه لو طلعت انته او هيه مش بتخلفوا ؟؟ صح

رابعا : يا عم كلمه بابا دي حلوه في اول سنتين تلاته .. بعد كده بيكبروا و يدخلوا مدارس و يطلعوا عين اهاليهم هههههه

بس خلاص :) متشكر يا معاذ بجد
ممكن احتجالك هههه
مفيش رقم تليفون طيب للزباين

Dr. Tantawy said...

لا أحد


لا يوجد ابواب اخرى للجنس يا عم

ربنا يغنينا و يكفينا

Amyra said...

اعتقد انه حصل تشابه اسماء انا مدونتي جديدة فلست مختفية
تحياتي

Dr. Tantawy said...

NADA


انا اسف على اللخبطه :)

انا فتحت بروفايلك و بصراحه مشجع جدا :)) اهلا بيكي

مدونة ( هي كما اراها ) جميله و مواضيعا لذيذه .. زي ما تقولي من النوع اللي بيعجبني

انما مدونة ( دنيا ) فللأسف حسستني بالجهل التام :) لأني للأسف مدرستش فرنسي و معرفش عنه اي حاجه

كان نفسي افهم ايه اللي مكتوب فيها :) بس انشا ءالله عندي امل اتعلم فرنسي قريب بما اني خلصت دراسه و بقيت فاضي هههه

تحياتي و آسف مره اخره على اللخبطه اللي حصلت دي

wessam said...

lma ykoon elgawaz hoa eltare2a elmakbola egtma3ian elly btsm7lk enk tkoon mawgood 3la tool m3 7ad bt7bo gdn , hattgwz tab3n ba3'd elnazr 3n ay 7aga tania .

Dr. Tantawy said...

tulipgalaxy


kalamk sa7 aked :) e7na msh mokhtalefen .. bs el mohm enek law mala2etesh el 7ad elly bt7ebeh awy da .. yb2a simply .. manetgawezsh ?? sa7 ... mano3odsh ne2ol la2 .. w ezay .. howa fe 7ad ye3esh mn gher gawaz .. w kol wa7ed leh w malosh fel mwdo3 ye3od yedawar 3shan yegeblk 3ares wala 3arosa :) 7aga tokhno2 ya3ny

ahlan beky :) w thanks akeeed for ur interest

NB: profilk protected :) a3raf esm modawantek mneeeen ??

Anonymous said...

من رأيى الشخصى ان الزواج منظومة اجتماعية مهمة جدا
مش بس للمجتمع
لكن للانسان نفسه
حتى فى وجود مشاكل مصاحبة للحياة الزوجية نفسها
دة بيعطيها طعم آخر
طعم المسئولية
طعم الحياة
دة رأيى لأنى من عشاق المسئولية
بس انا شفت ظاهرة ملفتة للنظر فى اوساط العازفين عن الزواج
وهى عودتهم لنفس نقطة البحث عن شريك لاكمال الحياة معه بعد فترة عزوف
لكن هذه المرة بالعديد من التنازلات والمحاذير علشان ميتقالش انه صبر صبر ونزل على مفيش


مين قاللك ان التدوينة مش مهمة؟
تحياتى

أحمد المصري said...

موضوع عميق فعلا وقوي00
بص ياسيدي رأيي المتواضع إن ده مرتبط بأحوال الحياة و شخصية الفرد00
يعني فعلا رد على سؤالك الأخير 00احيانا
الحياة بتشغل الفرد عن الزواج- وحتى حياته الطبيعية-لدرجة كبيرة خاصة إن كان للفرد هدف كبير بيشتغل عشانه 00يعني معظم أئمة الإسلام زي الشيخ النووي وغيره ماتجوزوش عشان معندهومش وقت ومشغولين بالبحث وبناء العلم على أسس صحيحة والأمثلة كثيرة على ذلك لعلماء وكتابوعلماء معروفين000أما بالنسبة للإختلاف الشخصيات 00ففي انواع من الناس -رغم إنهم قليلين-
بالأساس لا يحبون الزواج -أو بمعنى أدق لايحبون الجنس -خلينانتكلم بصراحة بقى- 00
فأصلا مش بيفكر في الجواز 00وده طبعا مش كلامي ده كلام الشيخ مبروك عطية ربنا يخليه00بالنسبة لرأيي الشخصي 00رغم إن أنا صغير يمكن أعتقد اعتقاد راسخ بإن الحياة من غير جواز جحيم00وبلاش بقى نقرا مقالات أنيس منصور الغريبة عن إن الجواز نهاية الحب والحياة 00ده رأيي الشخصي عموما وانت اختار00
المشكلة في الجواز بس إنه فن 00فن انتقاء 00فن معاملة 00فن تربية 00فن بناء الحياة بشكل عام 00واحنا معدناش نفهم في الفن حاجة 00ولا إيه0؟؟
سلام ياباشا وعايزين المزيد من المواضيع الجميلة دي 0
مع تحياتي00
والسلام عليكم0

Dr. Tantawy said...

شهروزة

كلامك صح
بس انا وجهة نظري على نقطه تانيه هي موضوع الاختيار تحديدا :) انا مقتنع بان الجواز ضروره و لحد ما يكاد يكون امر حتمي
لكن اللي يهمني في الموضوع .. ان الجواز شراكه حياه .. لو الواحد ملقاش شريك حياته المناسب .. يبقى مفيش جواز .. انما نظام الواحد يتجوز علشان لازم يتجوز حتى لو ملقاش الشخص المناسب ليه .. يبقى الله الغني عن ده جواز

شكرا على رأيك :) و مازلت مصر ان التدوينه لا تهم الكثيرين ههههه

Dr. Tantawy said...

أحمد المصري


نورتني يا باشا

بصراحه اول مره اعرف منك ان في شيوخ مكانوش متجوزين لأني اعتقد ان الجواز في الاسلام من الحتميات نوعا ما .. طالما الراجل عنده ما يكفيه للجواز يعني و لقى ( ذات الدين ) .. انما احنا اليومين دول بنحكم بحاجات كتيره تانيه زي الشكل و التصرفات و الدماغ و كده هههه

يالا يا عم عايزين نشوف ولادك و ولاد ولادك ههههه

yara said...

هو بظبط زى ما تكون رايح مشوار و كل الناس عارفة إنت رايح فين و ها توصل على الساعة كام كدة
و فجأه تقرر تقف و تقعد فى نص الشارع إلى مالا نهاية

hebaz said...

التدوينة و الموضوع مهم جدا و يهم ناس كتير
أحييك على طرحة بطريقة صادقة و موضوعية
طبعا الزواج سنة و أعمار للأرض بس فى نفس الوقت فى ناس بتعزف عنة و دة حقهة و هم أحرار طالما يحافظوا على عفتهم و يبتعدوا عن الزنا و المعاصى
بس من خلال رؤيتى لنماذج فى الحياة اه فى ناس العمل و الطموح أو حتى الدراسات و العلم أو حتى البحث عن المال بيلهيها و يجعل فكرة الزواج لهم عائق حتى يصلوا لسن معين و هو الأربعينات و أنت طالع الانسان نفسيتة تتغير تماما بيشعر بشىء من الضعف و الوحدة و الحاجة للأسرة خاصة أنة فى هذا الوقت غالبا ما يكون أخوتة و أصدقائة تزوجوا من زمن و عندهم أسرة و اولاد و ألتزامات و محدش فاضى لحد فيتضاغف شعورة بالوحدة و بالتأخير عن مسار الحياة
الوحدة جدا قاتلة و خاصة فى الكبر
تحياتى و عذرا للإطالة

واحد من الناس said...

ايه يا باشا مردتش عليا يعني
انت زرت المدونهوقريت لابوست الي قلتلك عليه ولا لأ
ولو زرتها ايه رايك

LAMIA MAHMOUD said...

طيب ما تسيبها للنصيب

اية رايك؟

ana ga3an said...

الجواز اصلاح وتأديب و تهذيب
اتجوز لعلك تتعظ

Dr. Tantawy said...

Yara


حلو اوي التشبيه ده :) و حمدالله عالسلامه

Dr. Tantawy said...

hebaz


وجهة نظرك جميله يا هبه و شكرا على كلامك

بالنسبه لكلامك عن الوحده ف دي منطقيه ولا خلاف فيها .. و اكيد طبعا موضوع البعد عن المعاصي .. لكن النقطه اللي مختلف فيها معاكي .. ان الحاجات دي مش حتميه .. و انما متبابينه من واحد لواحد
عشان كده برضه .. الجواز مينفعش يكون حتميه .. يعني مش لازم الواحد لما يكبر يتجوز عشان ميزنيش مثلا .. او عشان الوحده .. في حلول اخرى .. يعني قربك من ربنا بالقرآن و الصلاه والصوم هيبعدك عن الافكار دي .. و الا مكانش الرسول عليه الصلاه والسلام قال .. من لم يستطهع فعليه بالصوم فانه له وجاء .. يعني اكيد في ناس متقدرش تتجوز

دي اهم نقطه انا عايز الناس تطلع بيها .. الجواز مش مقرر ولازم طالما الواحد ملقاش شريك حياته اللي يناسبه :)

شكرا لأراءك :) و جميل اني الاقي مهندسه متقاءله كده ههههه

Dr. Tantawy said...

واحد من الناس



انا رديت يا باشا و آسف على التأخير :) انا قريت التدوينه المره اللي فاتت بس قمت من غير ما كتب التعليق :) آسف جدا

-------------------------

تعليقي :ـ

أنا اسف اني اتأخرت في الرد
و أسف اني مقرأتش موضوعك قبل ما اكتب تدوينتي :) لأنك عاملها باسلوب جميل و بادئها بسؤال جميل .. لليه بنتجوز ؟؟


بصراحه اسبابك جميله و منطقيه :) و اللي عاجبني اكتر . انها متدرجه .. يعني و احنا صغيرين بنبدأ بالحب و المشاعر .. بعد كده تيجي الرغبه الجنسيه و اخيرا لما بنكبر و نعقل بيكون الاستقرار

بالنسبه ليه انا .. بعيد عن الاستقرار و الرغبه الجنسيه و الحب .. ف أهم حاجه عندي هيه خليط من دول كلهم .. اللي بيتخلي قابليه حدوث كل ده منطقيه .. و هيه الكميا .. او اللي احنا بنسميها تفاهم

يعني لو انته حصل ( كيميا ) بينك انت و بينها .. هيحصل ايه ؟؟ هيبقى في تفاهم بينكم دايما .. و بالتالي حيكون حب مستمر مش حب بتاع شكل و لبس و حركات
و لو في كيميا برضه .. هتكون الرغبه دي ليها احساس اخر يمنع حدوث ملل من تكرار العلاقه دي بين الازواج
و لو في كيميا .. هيكون البيت مستقر .. مش كل يوم خناقه و كل ساعه اختلاق في وجهات النظر

اسف اني طولت اكتر من التدوينه كمان هههه بس حبيت اقول رأي باستفاضه لان الموضوع زي ما انت عارف مهم


تحياتي :)

Dr. Tantawy said...

Lamia


انا معاكي جدا

النصيب .. يعني الواحد ميتجوزش الا لو لقى الانسانه اللي محتاجها .. مش يتجوز لأنه كبر و لازم يتجوز :) صح الكلام

منوره المدونه :) فينك من زمان

Dr. Tantawy said...

أنا جعاااان


اهلا بأمير الجعانين و ملك البطون المصوصوه

ايه يا عم النصيحه السوده دي .. انت اتقرصت قبل كده ولا إيه هههههه

ربنا ما يورينا الاصلاح و التهذيب ده .. آميييين

Amyra said...

طنطاوي
سعيدةان المدونة أعجبتك ولا تتاسف ولا حاجة
في انتظار أن تتعلم الفرنسية حديك نبذة على مضمون دنيا أنا بكتب فيها اللي حساه يومياتي حاجة شفتها عجبتني مثل معرض البندقية و الشرق بتكلم عن مارسيل اللي انا بعشقو كلو باسلوب مختصر و احاول احط روابط و القارىء يبحث بنفسو
تحياتي