2008/08/06

ليه زعلانين

-
الحكاية كلها من القدر
حد يقدر يعترض يوم ع القدر
القدر ... هوّه خلاصة الكلام
يبقى ريّـح نفسك إنت
م المحاكم .. م القواضى
وكفاياك تعيش ياعم ف الاحلام
فيها إيه .. لو ألف واحد يغرقوا
او ع القروش .. يتفرقوا
أهو ع الأقل ... الناس ده هي ماتت قوام
بكره نقول يابختهم
ماتو محسوش بالآلآم
مش فى طابور العيش
واتوبيس نقل عام
مش جوه قطر بيتحرق
أو مت وإنت بتتسرق
او جوه قسم بيضربك ضابط همام
ليه زعلانين ؟؟ .. ماهو برضه همه الغلطانين
إزاي ينامو .. مرتاحين
والمَركِـبة .. زي الكمين
لا فيها عوامه .. ولا حتى .. قبطان أمين
ويقولو ماتو مظلومين
إزاي ينامو .. مغمضين
ومِـسلِمين .. و ناسيين
إننا ف مصر العظيمة
اللى فيها كل شيء ماشي تمام
والزبون غلطان على طول الدوام
ليه زعلانين ؟؟ .. وكلهم عتاب و لوم
بقه حد يركب .. مركبه
وهوه مش عارف يعوم
ولاحتى عارف فى المراكب والسفن
علشان يصلح البدن
واكله الصدى .. مليان خروم
طب فين بقه يا عم .. العلام
مركب حديد .. مركب شديد
ايه يعني حملها كان زياده
اكيد زياده فى الهدوم
او ألف راكب كان زياده
مش مشكله .. دوّر و قوم
أهي برضه قفزة للأمــام
ليه زعلانين منك يا ممدوح اسماعيل
قالوا عليك هربان .. و مجابوش الدليل
وإنت يا شيخ غلبان
عايش هناك تعبان .. وراضى بالقليل
عربية مرسيدس و قصر و جواز الحمام
ومن حبك فى مصر .. واخلاصك كمان
تصحى تقول انا مصري .. و ف ثانية تنام
ليه زعلانين ؟؟ .. دي فرصة نادره ف السنين
ماتو و همه غرقانين
فى الجنه .. يرتاحو يومين
مش أي موته والسلام
شهدا يا ناس
دى موته فى أعلى مقام
-
-

10 comments:

bastokka طهقانة said...

هايل جدا
العذاب الحقيقي انه فضل عايش علشان يشوف
و ياما حيشوف


اوروفوار
سمباتيك = طهقانة

mahmoud elhosary said...

قول ياعم الشيخ أمين
كل دا ذنب مـــــــين؟

تحياتي

ROMIL

Ana said...

تحياتى لك ولمدونتك رفيعة المستوى التى تقطر صدقا وتشرفنى زيارتك لمدونتى دخل الشتا

Unknown said...

Good good good......

ميرام said...

حيرتني بجد..
أقول حسبنا الله ونعم الوكيل ..
ولا أقولك برافو .. أبدعت بجد ..
أسلوبك سلس .. بسيط بس قوي ..
تقبل مروري..
وبانتظار جديدك

تحيـــــــــــاتي

Doaa Ebrahim Aaql said...

هى فصول متكرره
لمحاولات إبادة جماعية
للشعب المصرى
عقاباً له

.

تقديرى واحترامي
لما كتبت

.

مودتي

ميرام said...

وبتقولي اخر بوست ليكي بقاله شهر
(:

ليك تاج عندي .. ياريت تتفضل تستلمه ..
كل تقديري ..
(:
وكل سنه وانت طيب

مهندس مصري بيحب مصر said...

و آدي كارثة الدويقة حصلت علشان تكمل سلسلة المصايب

عبدالله مفتاح said...

صديقي زنجولا وحشتني جدا

يا ريت تطمني على اخبارك وتصلح المسنجر بتاعك :)

فارس بلا جواد said...

السلام عليكم
سعيد بالزيارة الاولي لمدونتك
انا بقالي كام يوم بالف علي المدونات كل شوية ادخل مدونة واخرج منها تاني حسيت ان البحث عن مدونة لشخص موهوب زي البحث عن ابرة في كوم قش
بس بصراحة من البوست ده واضح موهبتك جدا الكلمات والاوزان والمعني كله متنفذ بطريقة ممتازة
اتمني يبقي فيه تواصل بينا في القادم باذن الله
بالمناسبة من البوست اللي فات عرفت انك بقيت نايب عظام
الف مبروك
وكنت عايز اعرف انت جامعه عين شمس ولا القاهرة لان انا امتياز في عين شمس وان شاء الله السنه الجايه ليا نيابه
وكل سنه وانت طيب
تحياتي