2008/04/05

ربنا إكشف عنا العذاب إنا مضربون

يضربون ولسان حالهم يقول ... ربنا إكشف عنا العذاب إنا مضربون , يبدو لي أننا جميعا نسينا واقعا نعيشه .. وتخفينا خلف ستار الوطنيه الجديده التي فرضتها علينا حركات المعارضه المفككه فى مصر .. فقول الله تعالى : إن الله لايغير ما بقوم حتى يغيروا ما بأنفسهم .. لم يكن يوما مقصود به الاضرابات .. خاصة تلك التي ننفذها فى مصر .. إضرابات فرديه او حتى على هيئة مجموعات صغيره قد تعطى الحق لأصحاب هذه الفئه حقا منتقصا لكنهم يعتبرونه انتصارا لمجرد انهم نجحوا فى ان ينالو جزءا من حقوقهم .. تماما كما فرح الصحفيون مثلا بان الحكومه سمحت لجرائد المعارضه بالحديث ببعض الحريه .. وكأنها هبات انعمت علينا بها حكومتنا الرشيده وليست حقا أصيلا لكل مواطن على أرض هذا الوطن المغتصب .. فنفس المواطنين الذين خافوا المشاركه فى انتخابات الرئاسه و مجالس الشعب والشوري و حتى المحليات ... هم نفس المواطنين الذين يقولون اليوم انهم سيضربون عن العمل ... الشخص الذي خاف ان يشارك الالاف فى التوجه الى صناديق الاقتراع متحملا على اقصى تقدير خطر ان يلاقى بكلمات جارحه من الموظفين او اهانه من عسكري امن مركزي .. يعتقد نفس الشخص انه يمكنه اليوم ان يضرب عن عمله ويجلس في بيته متحملا عقاب فردي يقع عليه من مرؤوسيه خاصه فى ظل حاله الاستنفار الحكومي ضد هذا الاضراب
-
الاضراب .. طريق الضعفاء من وجهة نظري الخاصه .. و الطريقه الشرعيه الوحيده التي يمكن ان تسمى بها السلبيه وطنيه .. خاصة إن كانت تنفذ فى مصر .. وبالطريقه "المصريه" الخاصه ... فالاضرابات فى ارض مصرنا الحبيبه صارت تنقسم الى جزئين .. القسم الاول منها هم انصار الاحزاب المعارضه والحركات المتمرده على الواقع .. والتي تضرب على حساب توجهاتها الحزبيه او الحركيه اكثر من كونها تمردا على الواقع الذي يعيشه كل فرد منها .. اما القسم الثاني فهو الشباب المتحمس الذي تروقه فكره التمرد والعصيان لمجرد التمرد والعصيان .. او لمجرد كونه نوع من التغيير .. قصه هي ربما يحب كل واحد منهم ان يحكيها لزملاءه او اهله .. بغض النظر عن هدف الاضراب او اسلوبه
-
الاضراب .. فى مصر .. تحول الى هاجس اصاب الجميع بالنشوه .. لكننى اخشى ان يعرف اي منهم قيمته او هدفه الحقيقي .. فما قيمة ان يضرب موظف وسط 100 موظف اخرين يعملون فى مكان واحد .. وما قيمة ان يتوقف اتوبيس واحد عن العمل وسط مئات الاتوبيسات التي تعمل بنشاط .. فالاضراب .. حركه شعبيه خالصه .. لن تشعر بها مادام الشعب لا يؤيدها ولا يشعر بها ايضا ... تلك مشكلتنا التي لن نستطيع حلها مادامت الرغبه فى التغيير لا تداعب سوى بعض الاشخاص فقط .. بينما يستعذب الاخرون اوضاعهم .. فلماذا يضرب الطبيب الذي يحصل على 100 جنيه مادام يستطيع ان يحصل على 200 او 300 من العمل الخاص الذي ينهكهه و يقضى على ما بقى من صحته .. ولماذا يضرب موظف الحكومه الذي يحصل على 100 جنيه من حكومته مادام يحصل من عمله الليلي كسائق تاكسي على 300 او 500 جنيه اخرين يساعدونه فى حياته ... لن يحقق الاضراب هدفه مادمنا نتعامل مع واقعنا بهذا الرضا المبالغ فيه .. ولن يحقق الاضراب هدفه مادام نابعا عن توجهات حزبيه او حركيه .. او مادام فرقعه يطاردها الشباب بحماسه لا ترقى لمستوى الايمان او الوعي
-
آسف .. فلن أضرب معكم .. وأخشى ان يصبح أمثالى من غير المضربين .. هدفا لكل الكلامنجيه ليطلقوا علينا ألقاب من فئه الجواسيس والعملاء :) .. من يدري .. ربما تخيب وجهة نظري .. وأرى غدا من حولي آلآف المضربين .. تلك المشاهد التى رأيتها فى محطات مترو باريس .. او مصانع هولندا .. او حتى طرق انجلترا .. ربما أشعر وقتها بأن تقديري للوعي المصري الشعبي كان خاطئا .. ربما أشعر وقتها أن الرضا الذي أشعر به فى عيون المصريين المنهكهه هى رؤية كاذبه سرعان ما ستتبخر مع اول اضراب حقيقي يعلن عنه ... ربما و ربما ... لكنني فى النهايه أشعر وبواقعيه شديده .. أن الاضراب فى الوقت الحالي .. لن يحقق اهدافه .. ولن يخرج بالصوره المشرفه التي اتخيلها .. خاصه بعد ان قامت حكومتنا الرشيده بخفض ثمن كيلو الأرز والمكرونه والخضار ... منذ حوالي يومين .. ليأكل الشعب .. تمتلئ البطون .. فتنسى جوع السنين و تكتفى بطبق الرز بالملوخيه و نبقى نحن فى زمن الملوخيه
-
-
-
آخرون يفكرون مثلي
ـ بنت مصريه : إضراب عام
ـ أنا ونفسى : إضراب عام لشعب مصر
-
متابعة آخر أخبار الاضراب
ـ مدونه 6 إبريل : إضراب 6 أبريل 2008
ـ مدونة مابدالي : شارك فى تغطية الاضراب
-

10 comments:

Enas Anany said...

فعلا هو ده الكلام الصح..اخيرا لقيت حد معايا في رائي..انا اول ماقولت كده كل زمايلي قالوا عليا سلبية..لدرجة اني صدقت اني غلط..بس بعد ما عرفت رايك تاكدت اني صح
وواضح ان لسه مافيش حد شاف الموضوع لانهم مضربين
ههههههه
ربنا يعينهم
في انتظار كل ماهو جديد لديك

محدود الدخل said...

كلامك جميل وعين العقل
ويمكن امبارح ثبت صحة كلامك وخابت امالي وأحلامي وثقتي في شعبنا
بس يا نااااااااااااااااااس
كلنا كده بالصلاة على النبي الي لاقيين وقت نضيعه في المدونات
ولقينى فلوس نجيب كمبيوترات
أكيد لاقيين ناكل
طيب والي كل دخلهم أول عن أخر 200 جنيه أو 500 جنيه وعندهم عيل وأتنين وتلاته
بياكلو منين ؟؟
بيدفعو أيجار منين ؟؟
بيلبسو منين ؟؟
بيدفعو نور وميه وغاز وتليفون منين ؟؟
بيكشفو عند الدكتور منين ؟؟
بيشترو الدوا منين ؟؟

منين يا عالم
بلاش اضراب
بلاش مظاهرات
بلاش أعتصامات
بلاش أي حاجة أتقالت أو أتعملت قبل كده
بس قولو الناس تعمل أيه
متقعدوش تقول متعملوش متعملوش متعملوش وتسكتو
كملو كلامكو وقولو متعملوش ....وأعملو

...

مهندس مصري بيحب مصر said...

طيب ايه رأيك يا دكتور دلوقتي في الإضراب في مدن زي القاهرة و اسكندرية كانت شبه فاضية يوم الإضراب مع ملاحظة ان الإتنين دول تعدادهم تقريباَ = 1/3 الشعب المصري

؟
:)

Unknown said...

طول عمرك دماغك عاليه
!!!!!!!!!!!!!

مواطن مصرى نايم said...

ايه يا دكترة
واحشنى جدا جدا
انا بقالى مده مدخلتش
بس كله بسببك
لانك بتتأخر
على فكرة انا
eslam
اللى كنت بعلق عندك الاول بالاسم ده
بس عملت نيو لوك
للاسم و للمدونة و غيرت نشاطى
يا ريت لما تدخل
تروح تلقى نظرة على البلوج بتاعى
لو تقدر و لو متقدرش ميهمكش
انا عارف انك بتكون مشغول اغلب الوقت
سلامى ليك يا باشا

Dr. Tantawy said...

enas anany

اشكرك يا ايناس و بالتوفيق دايما

ربنا يكرمهم الاضراب الجاي بقه وعليكي خير ان شاء الله :)

Dr. Tantawy said...

محدود الدخل

يا عم الحج انا مش معترض على كلامك .. ولا معترض ان احنا المفروض نتكلم .. لكن كل الفكره ان الكلام يكون بحساب مش اي هرتله والسلام ؟؟ يعني انا زمان لما بدأت ارسم كل اللى عملته انى ارسم الريس و اتريق عليه .. نفس اللى المضربين دلوقتي بيعملوه .. سلبيه لا تقدم ولا تأخر .. ومع كده كل الناس كانت بتهللي و تسقفلي و تسخنى اكتر و اكتر .. تمام زي ماالناس دلوقتي هللت و صقفت للمضربين ... كله هجص فى هجص

كل المطلوب ان الواحد لما يفكر فى حل .. يفكر فى حل منطقي يعمل نتيجه مش يعمل فيها وطني و بيحب مصر و يقعد يهرتل اى حاجه والسلام

ياريت يكون كلامي وصلك و قدرت تفهم سبب اعتراضي على الاضراب و اشكرك على رأيك

بالمناسبه , الصوره اللى انت حاططها بروفايل جامده اوي هههههههه

Dr. Tantawy said...

مهندس مصري


آسف يا بشمهندس , لكن معلوماتك غير دقيقه حتى من مواقع الاضراب نفسها اللى قالت ان الاقبال مكانش بالشكل ده و انا سألت اصحابى فى كذا مكان قالولي ان الحركه كانت شبه عاديه مش لدرجه ( البلد فاضيه ) يعني

تحياتي يا بشمهندس

Dr. Tantawy said...

أنا انسان


و إنت كمان هههههه

Dr. Tantawy said...

مواطن مصري نايم


اهلا بيك يا باشا :) منوووورني

انا دخلت مدونمتك و بصراحه كبرت اوي اوي و بقت مليانه ... فى تقدم هايل يا نجم .. ربنا يوفقك ان شاء الله :) تحياتي