2007/08/16

إمسك حرامى

الاسلام دين عشوائي .. دموي .. قاتل للابرياء .. و منتهك للانسانيه .. يعني ايه واحد تتقطع ايده عشان سرق .. ما البلد كلها بتسرق .. يعني على كده اكتر من نص البلد دي المفروض ايديها تتقطع و تمشي مكسحه في الشوارع تقول عشانا عليك يارب .... الاسلام دين بربري .. بأي حق يقطع ايد واحد غلبان عشان سرق لقمه عيش يتقوت بيها ... الاسلام دين همجي .. ليه يقطع ايد واحد سرق حاجه بسيطه من واحد مش محتاجها .. فعلا دين غريب

المشكله .. ان محدش فاهم حاجه .. تقعد في وسط اي قعده شباب تلاقي ماشاء الله افتاء على ودنه .. ماهو اذا كان المفتى ذات نفسه بيفتى على روحه .. و كأنه بيفت في آته محلوله .. عايز الشباب يعمل ايه .. براحته بقه .. اديله حريته و اطلق يداه على الدين و الشرع و الاحكام الالهيه .. لانه ببساطه .. بغبغان ..مردد .. عمره ما فكر يقرا .. عمره ما فكر يدور .. عمره ما فكر يفهم ..عايز يتكلم و يتنطط و خلاص .. الكلمتين دول عشان بس لو حد لسه عايش في عصر .. الاسلام البربري .. الدموي .. و الكلمتين اياهم دول .. يفوق .. و يفهم .. يمكن يعرف يحس و يكون بني آدم

حد السرقه في الاسلام .. هو قطع اليد .. أيوه .. اليد ..و تحديدا اليد اليمنى من مفصل الكوع .. طب و ليه .. ما اللي سرق سرق و يتسجن شويه وخلاص .. هقولك ان كتب الشرع مليانه تفسيرات اجتماعيه و انسانيه و اقتصاديه .. ميهمنيش منها غير خاجه واحده .. ان ربنا قال .. والسارق والسارقه فاقطعوا ايديهما .. علشان كده ده حد .. ينفذ .. و مفيش حد من حقه يتساهل فيه .. لا اللي اتسرق ولا حتى الحاكم .. لأنه امر الهي مباشر

طيب .. موضوع الراجل الغلبان اللي سرق عشان مش لاقي ياكل .. و اللي سرق سريقه صغيره .. و خلافه .. الاسلام اكيد مش دين عشوائي عشان ينفذ حكم قاسي بالسهوله دي .. كل حاجه ليها ضوابط و احكام .. يعني مبدئيا كده .. الدولة الاسلاميه دولة متكامله .. يعني مفيش حاجه اسمها نطبق حد السرقه و نتنازل عن تنفيذ الحد على حاكم بيسرق ومحدش بيكلمه .. و مفيش حاجه اسمها نطبق حد السرقه وننسى تطبيق تشريع الهي من بنيان الاسلام اسمه توزيع اموال الزكاه .. لو الدوله مشيت متكامله .. مش هيكون في مبرر او عذر لأي حد .. خد عندك .. لو الريس بتاع البلد شخصيه مستقيمه .. بيراعي ربنا .. معتقدش ان البلد هتكون سايبه .. تكيه .. مسروقه من فوق لتحت .. في نفس الوقت .. هيتم تطبيق الحد بسهوله لأن الناس عارفه ان اللي هيطبقه راجل بيراعي ربنا .. مش حرامي .... طب بلاش .. لو الريس بيوزع اموال الزكاه .. و احسب اموال الزكاه من فلوس كبارات بلدنا تطلع كام .. الفلوس دي لو اتجمعت و اتوزعت بحق ربنا .. عمر ما هيبقى في حد مش لاقي ياكل .. عشان يبرر سرقه .. و كل حاجه هتمشي زي ماكانت ماشيه زمان .. لكن تقول لمين .. لحاكم بيسرق .. ولا محكوم حرامي مش عايز يدفع زكاه ربنا في ماله

عشان الكلام ميكونش عشوائي و بدون أدله .. دي أحكام إقامة الحد في السارق .. ياريت تقراها كويس .. عشان تفهم دينك صح

أولا : شروط السارق
ـ التكليف : بالغ عاقل .. و دي معروفه .. و لو السارق صغير .. هيؤدب بدون قطع ايده
ـ الاختيار : يعني يكون سارق باختياريه الشخصى مش مكره عليه من حد .. و اعتقد دي برضه معروفه
ـ الشبهه : و دي مهمه .. مينفعش يكون في شبهه احقيه للسارق في المسروق .. يعني مثلا مينفعش تقطع ايد أب لأنه سرق فلوس ابنه .. ولا الابن اللي سرق اهله .. و حتى الاقارب من الدرجه الاولى .. لأن الحد هيؤدي الى قطع الرحم و ده اهم من الحد والسرقه في الاسلام .. بلاش .. الاعظم من كده انه ميقامش الحد على الخادم لو سرق سيده و هوه كان بيخدمه بنفسه .. تخيل .. شوفتوا الاسلام يا عالم يا ... ولا بلاش
ـ الحق : لا يقام الحد على من سرق من المدين المماطل في السداد .. لانه ده من حقوقه اللي بيطالب بيها .. و في الحاله دي يعزر كأن يسجن مثلا .. لكن لا يقام عليه الحد
ـ الحاجه : يعني اذا كانت البلد في ازمه مثلا و مفيش ميه .. زي دلوقتي .. و واحد هيموت من العطش و اضطر يسرق من جاره ميه .. لايقام عليه الحد .. لكنه يعزر برضه

ثانيا : شروط المال المسروق
ـ حلال : ان يكون مالا حلال .. يعني لا يقام الحد في اللي يسرق لحم خنزير او خمور .. لانها محرمه شرعا
ـ النصاب : يعني مش هنقطع ايد كل واحد سرق .. لازم السريقه دي تكون بلغت نصاب معين .. و اللي هوه مختلف عليه .. لكنهم قدروه في الشرع بالمال اللي يكفي المقتصد في يوم كامل .. و كان قديما تلاته دراهم .. يعني يكون المسروق تمنه يكفيك تعيش بيه يوم كامل .. لدرجه ان الحنفيه قالوا مش اقل من 10 دراهم كمان .. يعني المذاهب بتخفف مش بتشدد

المصدر / كتاب فقه السنه .. السيد سابق .. الجزء الثاني
المصدر / فتاوى موقع .. إسلام أونلاين .. 2007

14 comments:

يساري مصري said...

يسلم فمك يا دوك
والله جبت من الاخلر علشان الواحد ات... من الخراء الافتائي اللي وصلناله

known said...

لو سمحتلي اقول رأيي...اصلا الناس في مصر ما يعرفوش تعاليم دينهم كويس,دا حتي ما يعرفوش الفرق بين الصدقه والزكاه ولا حتي يعرفوا قيميتها كام ولا بتندفع امتي ولا انواعهاوشروطها,ولو كل واحد عرف دينه كويس وعرف ان الزكاه دي ركن من اركان الاسلام الخمسهيعني من غيرها اسلامك يبقي مهزوز, ماكنش حال البلد بقي كده ولا كانت نسبه الفقر في مصر زادت,بس كل واحد همه في البلد دي انه يكوش علي اكبر كميه من الفلوس وباقي الناس يروحوا في داهيه ,اهم حاجه نفسه لكن انه يراعي حق ربنا في الناس الفقراء ويديهم حق ربنا,ده من رابع المستحيلات....
وبعدين انت عارف احنا كام مليون؟
الريس هيعدي علي كل بيت ويقولوا انت مادفعتش الزكاه ليه؟لو كل انسان حاسب نفسه قبل ماينام,ونفذ تعاليم ربنا وشرعه وعرف اللي ليه واللي عليه كانت الدنيا حالها بقي غير كده..
وبعدين البلد دي مابتنفزشي اي حد من حدود الله سبحانه وتعالي,الناس شغاله سرقه ونهب ورشوه وقتل ولا حد بيحاسبهم بعدل الله,ده حتي وصلت للالحاد والكفر ويقولولك ده حق كل مواطن انوا يختار الدين اللي هوا عاوزه احنا في بلد ديموقراطيه بلد الحريه والمواطنه السليمه...بقي بالذمه دا يرضي ربنا...بقي الدستور الفرنسي اللي بيعتمدوا عليه في احكامهم احسن من القران الكريم والسنه النبويه!!!!
وبعدين احنا جايين دلوقتي نحاسب الشباب اللي عمال يفتي!!!!طب حاسبو الناس اللي عامله نفسها شيوخ وعاملين يفتو في الفاضيه والمليانه علي القنوات الفضائيه,ولا الاب والام اللي سايبين الدنيا تلطش في ولادهم ولاحتي يعلموهم من هما صغيرين تعاليم دينهم الصحيحه او يحفظوهم قران او يعرفوهم علي سنه الرسول,كل اللي يهمهم انهم يأكلوا ويشربوا ولادهم ويعلموهم في مدارس الحكومه اللي مناهجها زباله حتي كتاب الدين محدش بيهتم بيه ولا بينفتح من اصله الا في الامتحانات عشان الواد من دول يحفظ الايه ويحدفها في الورقه وبعد كده يلغيها من دماغه تماما اهو تقضيه واجب والسلام...وبعدين نقول هما شبابنا ضايعين ليه وبيسرقوا ليه وبينصبو ليه .. .......
butterfly

Anonymous said...

مزاج الشعب المصرى

الفتة

يووووووة قصدى الفتوى

منحوا عقولهم أجازة مفتوحة غير محدودة الأجل
واصبحوا مقننين لاستقبال الفتاوى التيك أواى الجاهزة

محدش عاوز يتعب نفسه ولا يشغل مخه ولا يحكّم عقله ولا قلبه فى اى حاجة

بس

دة كل الموضوع

jinja said...

تسلم ايدك علي الموضوع الجامد دي

Crazy Nemo said...

موضوع جيد فعلا احنا لو طبقنا القانون ده دلوقتى مصر كلها هتتقطع ايدها لكن لما يكون فيه قوانين صارمهاكيد هنلتزم بيها وبالتالى القانون هيطبق على ناس قليله
المشكله ان احنا المعلومات الدينيه عندنا قليله جدا ومحدش عارف حاجه انا بجد معرفش ايه السبب اللى خلانا طلعنا كده

mariam said...

كلام سليم
لكن تقول لمين
كل واحد شايف نفسه مفتى
و بيفهم احسن من الشيوخ

ليك تاج عندى تعالى خده

Dr.TANTAWY said...

يساري مصري

ربنا يكرمك يا باشا .. مانا برضه جبت اخري و ربنا يسهل و الواحد يعرف يرد على كل انوع الخراء ده عشان الموضوع بصراحه لحوس اوي ههههه

Dr.TANTAWY said...

butterfly

مانا نفسى الواحد يحاول يشجع الناس انها تعرف .. لو كل فتره واحد كتب بوست في معلومه دينيه خفيفه هنقدر نعمل وعي ديني مناسب لجيلنا

البلد مش هتنفز الشرع الا لو كانت كل الناس مقتنعه بالشرع .. مش تلاقي نص البلد بتقولك تعاليم الدين قديمه و معدتش تنفع .. حاجه تقرف

Dr.TANTAWY said...

شهروزة


ان شاء الله نقدر نعمل اي تغغير في الفته دي ... البوستات دي محاوله افاقه يمكن تجيب نتيجه .. ياااارب

Dr.TANTAWY said...

jinja

الشكر ليك على تعليقك برضه

منور المدونه

Dr.TANTAWY said...

nefertiti

حمدالله عالسلامه :)

معلوماتنا الدينيه قليله عشان عندنا اهتمامات تانيه كتيره .. التلفزيون و النت و الخروج و الماتشات و الحفلات و السينما
مع اننا ممكن ننظم كل ده و نحاول نستغل كل حاجه عشان نعرف المعلومات الدينيه دي
ربنا يقدرنا كلنا على فعل الخير انشاء الله ..آمين

Dr.TANTAWY said...

mariam

التاج وصل ياباشا و جاري طبخه و اعداده للتقديم

متشكر على تااااااجك :) و كل تاج و انتى طيبه

منوووره

واحـــد مـــــن الـنـــاس said...

ياريت بس يا دكتور
زي منتا بتهاجم الناس اللي بتفتي وشغالة
ودي صفة سائدة في الشباب المصري

برضه تهاجم الناس اليل ملهاش شغلانة غير التريقة على العلماء والدعاة
لان العلماء لهم مكانتهم وهيبتهم
صحيح مفيش حد منهم معصوم

لكن برضه ده ميديش الحق لحد فينا انه يسخر منهم او يهينهم
صح ولا ايه يا دكتور ؟

عبدالله مفتاح said...

انت بتقرا لسيد سابق؟؟؟؟
انت اكيد اخوان:))