2007/01/27

ByeBye Party

-
إحساس جميل انك تخلص امتحانات .. و إحساس بشع إنك بانتظار النتيجه
لأول مره .. يخرج علينا بنات الدفعه بفكره حلوه .. حفله نتجمع فيها قبل اعلان النتيجه .. و قبل بدء الامتياز و قبل حتى حفل التخرج الرسمي اللي هيكون بعد سنه من الآن إنشاءالله .. المهم فكرنا فيها و لقيناها فكره حلوه و تستحق اننا نتعب عشانها .. وخرجت حفله على اروع ما يكون .. برغم ان كل فتره الاعداد كانت 48 ساعه فقط
-
طبعا كل الناس كانت فاكره ان دي حفله دكاتره .. يعني تحنيط و جبس على شويه تشنجات .. لكن كسرنا كل القواعد و عملنا حفله على اروش مستوى ههههه .. البدايه كانت سحب على اسئله و كاريكوكي .. وطبعا ما ادراك ما الكاريوكي و اصوات الدفعه البشعه اللي غردت في القاعه .. لكنها مع كده كانت جميله و ممتعه اوي .. و بعد كده عملنا مسابقه على غرار من سيربح المليون .. نفس طريقه المذيع و الموسيقى و الاسئلة .. و الناس الحمدلله استجابت جدا جدا .. و بعديها عملنا فقره اسمها ( شخصيات ) .. عملنا فيها تحليل لشخصيات الدفعه بطريقه الكاريكاتير .. يعني رسمنا كل شخصيه و حطينا عليها الموسيقى اللي تنفع .. مثلا .. الطالب الدحيح .. عليه رسم .. و معاه اغنيه مبتفرحشي .. بتاعت شيرين .. الطالب الحنين اللي لازق للبنات ليل و نهار .. و معاه اغنيه القلب الطيب .. و هكذا .. و بجد كانت روشه اوي و جميله اوي
بعد كده عملنا فقره عن تعرف الصور .. جبنا صور للناس و هيه صغيره و حطينا على كل صوره جمله استرشاديه :)) يعني اللي ابوه ضابط شرطه بقت الجمله اللي مع الصوره ( الشرطه في خدمه الشعب ) .. و اللي بقى اقرع لما كبر .. حطينا معاه ( كله من الهرمونات ) .. و بجد الناس بقت بتعرف الصور و كان احساس لذيذ انك تحط صاحب الصوره جنب صورته و هوه صغير .. و هاتك يا ضحك .... بعد كده قدمنا قصيده معموله مخصوص لحفله التخرج .. اسمها سحلول .. و متتخيلوش الناس قد ايه انبسطت منها .. هحطلكوا هنا جزء منها فقط .. علشان الملكيه الفكريه يعني هههه
على فكره .. سحلول ده جناوي
ولا عمره كلم بنوته
ولا شاف .. و لا يعرف .. ولا ناوي
مسكين .. و السكشن كان زحمه
الطلبه فيه .. اكوام لحمه
وبضهره في واحده راح خابط
إدير .. هيقول كاك خابط
اتسمر .. تنح في ذهول
من ايده وجع المحلول
ماهي طلعت واحده من دول
ويا عيني الراجل محوول
ضحكتله .. حبها علطول
و ريالته نزلت دلدول
اديتله منديل باديها
سحلول من شحتفته عليها
بإديها مسح الدلدول
وسنتها طبعا ياخوانا
سحلول قام شارب مقبول
وفي ثانيه و ثالثه مقبول
سحلول ده اصله كان عفوي
كان يدخل في لجان الشفوي
لابس بابيونه و جلابيه
و متكلين بكلونيا جويه
ويقول دي شفوي .. دي سهله
دي عندي كدخول السينما
لكنه من اول وهله
كان يلمح في اللجنه الاينيما
يديّـر .. ما هو عارف نفسه
وبجد .. بجد .. بجد
مكانش بيخجل من حد
مالدفعه كلها سحاليل
والنص اتعود عالانيميا
و الباجي مركب محاليل
ماعادا ولاد ... الحلال
درجاتهم .. تكمل في الحال
ملاحظة : الانيميا = الحقنه الشرجيه
-
بس بقه .. خلصت القصيده من هنا .. و بدأنا الفقره التانيه .. اغنيه متألفه مخصوص للمناسبه .. اسمها ( و ماله ) .. طبعا من الاسم الناس هتقول الللله ده عمر دياب و الليله رومانسيه .. لكن الواقع حاجه تانيه هههه .. الاغنيه دي متألفه على قهوه .. و الشباب اللي مألفها ( حوالي 5 ) كانوا لسه مخلصين امتحانات طب .. فتخيل هيكتبوا ايه .. عموما انا هسيبكوا مع جزء من الأغنيه برضه تقرؤها براحتكم .. طبعا جزء ليه .. علشان الملكيه الفكريه هههههه
وماله لو خت يوم تكليف .. في حته مفيهاش ناس
او لو سبت اهلك ورحت بعيد .. و عشت كده محتاس
ماهو ياما حقك انت انداس .. خلوك بدون احساس
-
يا دوك ركز شويه عشان .. تضبط التضابيط
متفكرش ابدا في سوسو عشان .. ده سوسو حتى عبيط
بابا ضبطله شفوي و شيت .. وجابه جنب البيت
ملاحظة : شيت = امتحانات العملي في الكليات العلميه
-
بعد لما الناس سمعت الاغنيه دي حبوا يتعرفوا على المغني .. و اتخضوا لما اكتشفوا انه زميل ليهم في الدفعه ... يمكن عشان دفعتنا مفيهاش الناس اللي بتمسك جيتار و تقف على باب المدرج والحركات الواقعه دي .. لكن الناس طلبت تعرف المغني .. و عرفوه .. و غنى معاهم اغاني لتامر و حماقي .. و كانت فعلا روشه طحن ... بعد نهايه الاغنيه .. جه معاد احلى فقره في الحفله .. فيلم تسجيلي وثائقي عن كليتنا .. اتصور فيه رحله طالب طب من اول يوم بعد نتيجه التانويه لحد لما بيدخل قسم قسم .. و الكاميرا معاه .. و موسيقى تصويريه مختلفه باختلاف الموقف .. بجد كانت تحفه فنيه تدرس لطلبه سينما .. بالرغم ان كل المشاركين في الفيلم ده طلبه طب .. نفذوه في 24 ساعه والله .. لكنه فعلا كان رائع .. بنهايه الفيلم .. قدمنا تورته الحفله .. و العشا الخفيف :)) .. و بعدين اعلنا نتيجه استفتاء عمله الطلبه عن دكاتره و اقسام الكليه و التخصصات اللي الطلبه بتفكر فيها بعد التخرج .. و الغريب انه نتيجه الاستفتاء بالنسبه لتخصص المستقبل كان الأطفال باكتساح .. واضح ان العيال هيكتروا اوي اوي اوي هههههه
-
كان معكم مراسل المدونات .. طنطاوي
حفل تخرج دفعه 2000 - 2007

26 comments:

عبدالله مفتاح said...

زنجولا
يا قلبي ردك موصلش
ايميلك مش بيبعت ولا ايه
مفيش رد وصلني

Nouran said...

ايه يا عم كل ده
مبروووووووووك يا باشا وعقبال ما اقولهالك بعد النتيجة يا رب وعقبال حفلة الدكتوراه

HARVARD said...

يااااه إنت دخلت كلية اللب ـ بالفتحة أو بالكسرة،مش فارقة ـ في نفس السنة اللي إتخرجت أنا فيها. يا ريتني كنت أعرفك ساعتها علشان أحذرك من شرها وإن كان إنت لسه مشفتش حاجة، لكن نصحيتي لك دلوقت، سواء حتكون من بتوع التكليف المفشوخين أو النواب المطحونين ـ سواء ب بوست أو بدون ـ والله كل ده لعب عيال لأنك لا حتتعلم ولا حتعمل فلوس و لا حتعمل مستقبل وحتتمرط نايت شفت ب 10 جنيه وحتتبهدل في مستوسخات ـ قصدي مستوصفات ـ زبالة حتبيع فيها ضميرك وتركب محاليل علشان تاخد فلوس زيادة، وتخيط جرح طفلة بريئة بنفس الإبرة اللي إنت لسه مطلعها من جتة بلطجي ،وقال إيه مأنت عقمتها بشوية أيودين مضروبين بمية، وحاجات تانيه كتير من أرف النواب ومعاملة الأساتذة ورزالة العيانين. المهم نسيت أقولك النصيحة وهى بسيطة ومن 4 حروف USMLE ،أكيد عارف معناهم،صدقني متضيعش وقت وإنسى أي حاجة تانية
Please contact me if you need any help.

dandana said...

ايوا يعنى انت بتغيظ فينا مثلا ولا ايه....
ولا بتقولنا انك كنت فى حفلة واحنا لا ....
مابلاش كدا...
يعنى راعو مشاعرنا يا جماعة....احنا برضو نفسنا نعمل حفلات ونروش وكل حاجة....
اللهم لا اعتراض ياربى...

اوكى يا سيدى....
كويس انكوا انبسطوا...
كانى كنت معاكو بالظبط...

حلوة اغنيو وماله....

albida said...

هههههههههه
والله برافو عليكم.. جميل أوى الجو اللى أنتم عملتوه ده

مش كنت تحجزلنا حتيتين جاتوه معاك كده
هههههههه

ربنا يكمل فرحتكم وتنجحوا بتفوق أن شاء الله
:)

manal

واحـــد مـــــن الـنـــاس said...

يا سلااااااام
الراجل ما صدق انه فك من الكلية دي

على فكرة
انتا دفعة ابن عمتي
اكيد تعرفه
هوا اسمه محمد جلال

لو تعرفه سلملي عليه

Dr. Tantawy said...

عبدالله

انا بعتلك والله و قلتلك عايز تفاصيل الليله الاول

ربنا يوفقك

Dr. Tantawy said...

nouran

الله يبارك فيكي
انتي فين يا بنتي
هيه هندسه بتعمل في الناس كده
شدي حيلك

Dr. Tantawy said...

harvard

انا دخلت واللي كان كان
واضح انك بره المعموره مش كده
طب ما تشوفلنا عقد عمل لو عايزين ممرضين ولا حاجه .. احنا في الخدمه هههه

Dr. Tantawy said...

dandana

ايه الكلاكيع دي

هوه انا هغيظ فيكو ليه بس :)) كل واحد مسيره للتخرج و بعدين احنا بقالنا 6.5 سنين بندرس .. حقنا نفرح شويه ولا إيه هههه

Dr. Tantawy said...

albida

الجاتوه متحنط و موجود

عدي علينا خديه في اي وقت ههههه

Dr. Tantawy said...

واحد من الناس


منور يا باشا

معندناش واحد اسمه محمد جلال في الدفعه :)) لو فيه هجيبه و اقرره لحد مااعرف مكانك و اجي امسي عليك :)) تؤمرني يا نجم

tota said...

زنجولا
سعيدة حقا بالفكرة وكانت الحمد لله ناجحة فى توقيت ضيق جدا لكن دائما يبرع الشعب المصرى تحت الضغط بنجاح منقطع النظير
كلمات الشعر والاغانى جميلة واتمنى ان شاء الله نتيجة موفقة واهلا بعدها بالمعارك يا عزيزى

تحياتى

DoOoOoOdY said...

ايه الجمال ده يا دكتور
نقل جميل اوى للحفله انا حسيت انى حضرتها
امممممممممممممم انت كده هتنافسنا فى مجالنا بقى
ههههههههههههه

بس بجد فكره حلوه اوى وعقبال حفله التخرج يا دكتور

Dr. Tantawy said...

tota

ربنا يخليكي يا توووته

عدي علينا خدي الجاتوه بتاعك :) شايلهولك

Dr. Tantawy said...

dody

منورررره يا رضوى
انا قلت اعمل مراسل زيك :) من نفسي مره بقه
خلاص معدش عندنا حفلات تاني .. شطبنا

المره الجايه لما تجيبوا جنات صوريها عشاني هههه

علا من غزة said...



ألف مبروك يا دكتور بجد حاجة هايلة انو عملتو حاجة زي دي ,,

وانها تتحضر في يومين ,, انجاز رهيب

يا خسارة انا دفعتي السنة اللي فاتت كانت 20 فرد وللأسف محدش فينا كان فاضي يفكر يعمل حاجة زي كدة

على كل حال آخر امتحان ده له طعم تاااني خااالص وصدقني بعده النتيجة ما بتفرقش معاك كتير :p

تحياتي

www.blogs4arab.com said...

نرجو تشريفنا
www.blogs4arab.com

عبدالله مفتاح said...

زنجولا العزيز بعتلك ايميل تاني
يارب ايميلك يبعت
تحياتي :)

مصر هى أمى said...

دكتور طبعا الف مبروك الاول وحلو جدا انك بتعرفوا تفرحوا كده قبل ما تتخرجوا وتقبض 200 جنيه وتسافر فى التكليف وتروح الوحدة فى قرية المواصلات الوحيدة فيها الحمارة

Dr. Tantawy said...

3ola

منوررررره والله

اولا تحياتي لكي و لكل الغزاويه :) و يارررررب تظل فلسطين بخير .. و يجمع اولادها على الحق بدون تعصب و لا نزاعات
ثانيا .. انا بقيت منظم حفلات :) جمعي دفعتك و اعملكو حفله مخصوص على شط النيل .. بس مش هاخد في العمليه دي اقل من 20 جنيييييه

Dr. Tantawy said...

عبدالله

يا باشا انا رديت عليك و على نهى والله

اتأكدوا ان ايميلاتي بتوصل لأن انا ببعت ردووود والله

Dr. Tantawy said...

مصر هي امي


متشكر على رفعك لروحي المعنويه بالشكل ده ههههه

Nohaz said...
This comment has been removed by a blog administrator.
yara said...

mesh 3arfa leeh et3'aztttt

شهيدة said...

مبروك يا طنطاوي وان شاء الله تتخرج بامتياز
وعقبالي في البيولوجي السنة الجاية ان شاء الله