2006/12/21

بوابات .. فيها تخريفات

تحديث
تم إضافه كاريكاتيرات جديده
في آخر التدوينه
-
--
بوابات .. كل بوابه فيها تخريفه .. و اذا خرف طنطاوي .. اعرف انه لسه بيمتحن .. و اعرف انك ممكن تمشي مضايق .. بس اهم حاجه .. انك مش هتقدر .. تدعى عليه .. لانه غلبان و النعمه و مش ناقص
_____________________________
-
باب اجتماعيات
ليه سهل علينا ننقد الناس اللي الكل اتفق على نقدهم .. بينما بيكون صعب جدا تنقد حد اتفق الجميع على انه كويس و بن حلال .. مش فاهم .. طيب افهمك .. لو كنت واقف في محطه اتوبيس و الاتوبيس اتأخر .. و فكرت للحظة انك تشتم المسؤول عن الواقعه دي هتقول .. يخرب بيت الريس و سنينه .. مش هيتردد الراجل اللي شايل الجرنان جنبك انه يقفله و يبصلك و يقول ملعون دنيا و اخره اللهي يرميه في جهنم ميرجع منها تاني .. و لن تتردد الحاجه اللي واقفه وراك انها تقول .. منه لله كيلو البصل بقه بخمسه جنيه اللهي ما يوعى يطفحه .... شفت الموضوع سهل ازاي .. و شتيمه الريس مفيش اسهل منها .. انما لو قلتلك انقد حد تاني .. ممكن تفكر .. و احتمال .. تخااااف انك تتكلم او تنقده حتى لو كان غلطان من ساسه لراسه
خد عندك .. في السياسه .. مين يقدر يتكلم على عمرو موسى .. جورج اسحاق .. ابراهيم عيسى .. جريده الدستور .. هيكل .. منال و علاء .. مالك .. .. الفتيات الوطنيات .. كما وصفهن انا جعان .. و غيرهم و غيرهم .. كل دول ناس ليهم وزنهم في مجالهم .. و كل واحد فيهم ليه انجازات كتير محدش يجرأ يشكك فيها او يقلل منها .. لكنهم في النهايه بشر .. و بيغلطوا .. انما بيبقى صعب اوي انك تفكر تنتقدهم وسط الناس .. يعني كبيره اوي و آخرك يعني انك تقول في نفسك .. كخ عليهم .. و دمتم .. حتى لو عمرو موسى خضع للسلطه و فضل البقاء في منصب سياسي ( الجامعه العربيه الاستهلاكيه ) على حساب افكاره و مبادئه .. وحتى لو جورج اسحاق قلب كفايه الى ( الحركه المصريه الاسحاقيه من اجل التغيير ) .. و حتى لو هيكل .. مازال مصرا على الرقص على السلم .. شويه للنظام و شويه عليه .. و حتى لو مالك و كذا منال و علاء صاحبي المجمع التدويني الشهير اصروا على استخدام الفاظ خارجه في تدويناتهم بحجه انها الفاظ تنطق ف الشارع .. و كأننا بغباغانات مطلوب مننا ترديد كل لفظ السيء و الجيد منها .. وحتى لو اصرت مجموعه بنات على البيات اعتصاما في الطريق تحت مسمى الوطنيه .. بصراحه اول من لفت نظري لهذا الموضوع هو ( انا جعان ) في تدوينه تخص الموضوع ده .. يعني مش لاقي لحد هذه اللحظة مبرر يخلي بنت تبات في الشارع على الرصيف تحت اي مسمى .. خصوصا لو اعتبرت ان البنت دي اختي او امي او مراتي .. معتقدش ان الدين او الشرع او اي تقليد عرفي حتى يقول كده .. و انا حر في رأي قبل ما حد يشتم
بلاش سياسه .. خلينا نهيس شويه .. و نقول سينما و رياضه .. حد يجرؤ يتكلم على عادل امام .. او الاسطوره احمد زكي .. حد يمتلك من الجرأه انه يقول الاهلي غلط .. او حازم امام غلطان .. مع ان كلهم بشر و بيغلطوا .. لكن نخاف ننطق .. يعني عادل امام نجم الكوميديا و انا موافق على كده .. بيضحكني جدا و انا موافق .. لكنه مش اسطوره يتعملها اعلانات بملايين في كل ميدان .. ولا هوه شخصيه مثاليه لانه يجيد التقبيل في افلامه .. يبقى بلاش ننفخه زياده عن اللزوم و نقعد نغنيله و نسقفله في كل مناسبه بطريقه هاله سرحان المستفزه ..هاهاهاهاها ... و الاهلي مهواش فوق الجميع و لا الزمالك قلعه العظماء علشان لما يغلطوا او لعيب فيهم يقل ادبه نداري عليه و نقول معلش ده لعيب .. والامثله كتيره لكن لو حد حاول يتكلم عليهم تلاقي الكل اتقلب عليه
سيبك من ده كله .. و خش عالدين .. مين يقدر ينتقد عمرو خالد .. الشيخ خالد الجندي .. المفتي و مش هقول شيخ الازهر لانه واخد نصيبه بصراحه من النقد و زياده هههههه .. الناس دي كلها علماء و مشايخ على عيني و راسي .. لكن احساس كل واحد فينا انهم ربما يكونوا اكثر منه علما بيخليه يخاف يتكلم لو حس انهم بيغلطوا في حاجه .. و احيانان بتتضارب معلومه بيقولوها مع مبدء ديني معروف للجميع لكن برضه بنخاف نتكلم .. لاننا عارفين اننا ساعتها هنواجه العالم كله .. و مين يقدر على العالم كله يا بشر
-
-------------------------------
باب الطب صنعه

Free Image Hosting at www.ImageShack.us

اولا : متلازمه مباركيوزيز
التعريف : هي حاله مرضيه .. تصيب الجسم عامه .. تشمل اعراض نفسيه و جسديه قد تفضى الى الموت
الاسباب : ميكروب مباركيوزيز .. طفيلي يعيش على اسياده حتى يصل الى اماكنهم .. ينتقل بالطيران .. و يهبط في اقرب مكان مناسب للتطفل .. يعيش بجوار الضحيه و يمص دمها .. حتى يتمكن منها في النهايه .. و ينهي حياتها بطلقات في الراس و يجري يستخبى علشان يقعد مكانها في اقرب مناسبه بعد كده
دوره حياه الميكروب : حسب الكتب هي مده لا تزيد عن 4 سنوات و بحد اقصى مدتين .. لكن التطور في جينات الميكروب جعلته يعيش 24 سنه و ربما اكتر .. لكن العلماء يحاولون تدوين هذه الطفره على امل ان تنتهى قبل ان يموتوا همه
الاعراض : نفسيا .. حاله من الاحباط و اليأس الشديدين .. يصاحبها فقدان للشهيه و تقزز من الماء الملوث و الطعام المشع و الفراخ المتأنفلوزه .... أما جسديا .. تبدأ الاعراض بتسارع في ضربات القلب و احمرار العين .. و تستمر لتشمل احمرار و ترهل عضلات القفا و سجحات على الصدر و الاكتاف .. و نهايه قد تصل الى تقرحات في الاعضاء التناسليه و فتحه الشرج .. و اسألوا عماد
العلاج : لا يصرف العلاج من التأمين الصحي و لا وزاره الصحه .. لذا قامت منظمات المجتمع المدني مثل كفايه و المدونات بمحاولات مستمره لتوفير علاج مناسب من خلال ابحاث علميه قامت بها هذه المؤسسات .. و هي محاوله استخدام سلاح الاخبار و نقل الاحداث مباشره لعمل صدمه كهربيه تفيق جسد الضحايا و تنبه جهازهم المناعي لرفض هذا الميكروب .. لكن جميع هذه المحاولات لا تزال تحت التجربه و ربنا يسهل
-
ثانيا : القسطره
القسطره هيه انبوبه بلاستك ملهاش اي لازمه غير انها تعالج حاله احتباس البول .. ربنا ما يوريكو وجعوا .. المهم ان القسطره دي بيعملها اي دكتور نص لبه .. حتى الحكيمات يعرفوا يعملوها .. لكن الجميل في الموضوع اني سألت صديق بيشتغل نايب مسالك عن سعر عمليه القسطره دي .. على فكره .. لغير الاطباء يعني .. القسطره هيه انبوبه بتدخل باستخدام جيل معين في فتحه البول علشان لو في حاجه سداها و البول مش بينزل .. و القصه دي كلها بتتعمل من غير تخدير و في خمس دقايق و اول لما البول ينزل العيان بيقوم يروح .. يعني مش قضيه .. المهم اني سألته عن سعر القسطره .. ف قالي ان القسطره في عياده دكتور عادي ممكن تبدأ من 50 جنيه .. و انها في عيادات الدكاتره الحيتان بتكون احيانا ب200 جنيه و مش الدكتور الكبير اللي بيعملها انما مساعده الصغير .. يعني ادخل عياده عندي احتباس بول و الم رهيب ييجي الدكتور يجيب انبوبه يدخلها و ينزل البول في 5 دقايق و ياخد مني 200 جنيه .. يا بلاش بصراحه انا كنت مستغرب لاقصى درجه و انا بسمع الاسعار دي و المفروض ان ده كاري ههههه .. و بصراحه مش عارف الناس العاديه بقه هتقول ايه .. حسبي الله و نعم الوكيل
-
-----------------------------------
Image Hosted by ImageShack.us
باب البهائيه
و لو انها متستاهلش ان يبقى ليها باب .. و مع حسرتي على كل ما أقرأ من مؤازره لحقوق البهائيين .. واضح و الله اعلم ان بقه في حاله من الصمم عن اي شيء مادام صادر عن الحكومه .. يعني بقت الحكومه شيطان زنديق .. كل فعله و قوله خطأ .. و لأني آخر واحد ممكن يكون في صف الحكومه او مدافع عنها .. لكن الحق يقال .. من امتى بقه يجي واحد يقول انا عايز اكتب بهائي في البطاقه .. و تنظم مظاهرات من مسلمين .. والله مسلمين .. وقفوا تضامنا مع البهائيين .. بالذمه مش حاجه تحرق الدم .. البهائي بحكم الدين .. مرتد .. عارفين يعني ايه مرتد ولا محتاجين حد يعلمهالكو .. يعني الدين و النبي عليه افضل السلام علمنا التعايش مع اهل الديانات السماويه .. عايشين مع الاقباط و حتى اليهود .. و ليس الصهاينه .. في سلام .. لكن انها توصل للبهائيين .. تبقى مسخره و كبرت .. و يبقى على رأي شربيني محرر المصري اليوم .. هييجي يوم الشواذ يقولو عايزين نكتب في خانه الجنس .. سيكوسيكو
ملاحظة : اللى عايز يقرأ فتوى ردة البهائيين من الشيوخ مش من بيتنا يعني .. يقراها هنا
--------------------------------

Image Hosted by ImageShack.us

باب الحب و النحنحه
الحب .. هو امل .. امل ان تقابل فتاه احلامك .. امل ان تراها مره اخرى بمجرد ان تراها للمره الاولى .. امل ان تظل في حياتك .. امل ان توافق على وجودك في حياتها .. امل ان تتقبل ظروفك .. امل ان تقدر حبك لها .. امل ان تقدر خوفك عليها .. امل ان تتفهم غيرتك عليها .. امل ان تسمع صوتها كل لحظة .. لا تكاد تغلق الهاتف الا و تأمل ان تكون هي مكالمتك التاليه .. امل ان تبني حياتك معها .. و لها .. امل ان تكون هي ام اطفالك الذين تمنيتهم .. امل ان لا تكون كل تلك اوهامك الشخصيه .. امل الا تاتي في لحظة وتهدم حياتك .. بكلمه .. لا
-
مهما ببعد قلبي انا وياك
حبيبي عليك .. يطمني
م اللي فيه عنيه بقت شيفاك
و حاسس بيك .. بتلمسني
و هعمل ايه بتوحشني
حبيبي خلاص .. حياتي معاك
وهانت بكره انا راجع
و اه دلوقتي لو سامع
بحبك نفسي اقولهاك و انا ايدي ف ايديك
حبيبي بقولك اطمن
كلامك ليه بيهون
سنين عدت هعيدهالك و انا قدام عنيك
ياللي عشت في حضنك احلى سنين
نسيت انا مين .. ولا بنساك
كل كلمه حب ما بين اتنين
هتوصف ايه .. في لحظة معاك
-
رامي صبري - بحبك
-----------------------------
-

باب مخصوص لابوتريكه و بس
ابوتريكه لعيب .. مفيش عليها خلاف .. أهلاوي .. للأسف .. محترم .. جدا جدا .. لكن و الاهم من ده كله كان لقاء مع منى الشاذلي في برنامج العاشره مساءا .. لقاء قصير لكن ممتع و فيه رساله جميله اوي اوي للي لاحظها
مني الشاذلي في نهايه اللقاء سألت النجم الخلوق و الخجول .. قالتله لما كنت لسه صغير و قبل النجوميه كان نفسك تقابل مين .. ف رد النجم و قال : صالح سليم .. لانه شخصيه متميزه و ليها كاريزما جميله .. ف اردفت منى الشاذلي .. و قالت .. طيب انتو كنجوم بتقابلوا نجوم و مشاهير و رؤساء .. كان مين اكتر شخصيه نفسك تقابلها و مبسوط انك قابلتها .. وطبعا على عكس المصري الاصيل اللي الجهاز العصبي الامركزي عنده كان هيسيب كل السؤال و يمسك في كلمه ( رؤساء ) و يروح قايل اني شرفت بمقابله الاب و القائد و الوالد و الوالده السيد الرئيس محمد حسني مبارك اطال الله عمره .. لا لا .. ابوتريكه مقالش كده .. ده قال .. و بالحرف .. اني كنت سعيد جدا بمقابله الاستاذ عمرو خالد .. و كرر اسمه مرتين .. بالعند فيكوا يا مطأطئ الرأس .. و لما منى الشاذلي حبت تستدرك و عادت السؤال بصيغه اخرى .. على امل انه يقول اسم الريس ولا حاجه .. راح النجم قايل و بكل صدق انه كان يتمنى يقابل الشيخ الشعراوي الله يرحمه .. بالذمه يا ناس .. مش يستاهل يكون .. النجم
-
ملاحظة رياضيه : بوصفي زملكاوي صميم .. فانا مقهور على حال نادي الزمالك .. و في غنى حاليا عن مناقشه حال الزمالك لان اعصابي مش ناقصه .. لكن عندي سؤال صغير .. اذا كان لاعبي الزمالك بيشتكوا من الامور الماليه و عدم حصولهم على مستحقاتهم .. ف ياترى لعيبه الزمالك تعرف ان فريق الكره الطائره .. اللي مخدش ولا مليم من فلوسه .. و بيروحوا البطولات باتوبيس متأجر على حسابهم .. اللعيبه دي .. كسبت النجم الساحلي و بقت بطله أفريقيا للكره الطائره و هتمثل مصر في كأس العالم لأنديه الكره الطائره .. و بدون فلوووووس .. وبدون اضواء اعلاميه .. وبدون مطاردات الصحافه و التلفزيون و المعجبين .. وبدون مدرب اجنبي .. طب اشمعنى يا رجاله فريق الكوره الاعزاء .. اللهم لا اعتراض
-----------------------------------------
-
Image Hosted by ImageShack.us
-
إيه رأيكوا في اللوجو الجديد هههههه
-
______________________________

-
تحديث : كاريكاتيرات من واحد محروق دمه على اللي بيحصل

______________________________
-



Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

الصوره الأخيره بدون تعليق .. كفايه ما قلته سابقا عن .. البهائيييين

15 comments:

ΦD said...

eshta 3aleek ya tantawy kalamak gamed moot belzat متلازمه مباركيوزيز rabena m3ak w m3ana kolena fi el emte7anat

Anonymous said...

7elw el Logo el gedeen..Mubarak 3alik hehehehe lol!

shed 7eilak fi el exams!

bel nesba le mawdoo3 el naqad..well it depends on the way you criticise the other .. in a constructive way , and how the other should "learn" to listens to others and accept criticism in aim to change for the better and self- improvement!
but in fact, we're not used to this.. we connect criticism to attack and we have to defend aggressively, as if it's a war!

:) sorry for the long comment!

good luck insha Allah

albida said...

هههههههه
تصدق بالله أن ضحكت موت من مرض مباركيوزيز ده.... ده عامل زى الايدز كده, ملوش علاج
:)

عندك حق.. مفهوم النقض عندنا مكعبر حبيتين!! فاهمين أن النقد ده شئ سىء, غير كده كمان, لو فيه شخصية محبوبة أوى بنعاملها كأنها اله.. مانقبلش لا كلام وحش ولا حلو يتقال عليها... وهو ده اللى جايبنا لورا!!

أبوتريكة فعلا انسان محترم جدا ومتدين.. فعلا قدوة يحتذى بها

ربنا معاك فالامتحانات.. أنت هتقولى عالتهييس اللى بيسبق الفترة دى؟!! الواحد بيقبى حالته عجب
:)
ربنا معاك
والى الأمام يا بروتس


manal

واحـــد مـــــن الـنـــاس said...

جامدة والله ياباشا
خصوصا متلازمة مباركيزيز دي

mariam said...

اولا احييك على الموضوع الشامل دة
بس احب اعلق على نقطة اننا مبنقبلش ننقد ناس معينه زى السياسيين و الصحفيين المعارضين
و انا سايفة ان دة بسبب اننا واقع علينا ظلم و قهر شديد فبالتالى لما نحس ان حد بيدافع عننا بنبقى زى منكون مصدقنا نلاقيه
و مبنحبش نمسك عليه غلطة مع انه بشر و مش معنى انه اخطأ انه وحش
كل دة بسبب الامراض اللى سببهالنا النظام الكريم
تحياتى

سوووكا said...

طبعا مش محتاجة اقولك اد ايه البلوج بتاعتك رائعة ده موضوع مفروغ منه اساسا وانا صلا بقرالك من زمان
ربنا يوفقك والكاريكاتيير بتاعك رائع اهو الواحد بيشوف كاريكاتيير بجد بدل كاريكاتيير حرقة الدم بتاع الإهرام واللي هو اسهل طريقة لمرض السكر والضغط وكله

انا حعلق بس على باب اجتماعيات انا معاك فعلا ان احنا بننقد اللي اتفقنا على نقدهم فعلا ومعرفش لييه بنخاف ننقد حد تاني بنخاف ننقد أي حد بيتكلم في الدين عشان ما يتقلش علينا مش بتوع دين وبنخاف ننقد أي حد في المعارضة حتى لو عامل كوارث حتى لو بيأذينا بإلفاظ خادشة للحياء حتى لو ماسك فاس وعمال يهدم في ثوابتنا الدينية والإخلاقية وبيهدم في الإخلاق مش حقولك عادات وتقاليد لأ ماسك اصول الإخلاق وبيشرحها طيب انا عاوزة اقول لأ من غيير ما قول لفظ خارج ماينفعش ماهو يا قل ادبي يا إما ابقى تبع الحزب الوطني ومن انصار السلطة
الواقع ان احنا بنخاف ننقدهم عشان قسمنا المجتمع اتنيين نصف متدين ونصف منحل نصف معارض ونص خايف وتبع الحكومة والتقسيمة دييه هي السبب اللي بتخلي كتيير من الناس يلزموا الصمت خوفا ن ان رأيهم يحطهم في احدى الكفتيين

سلام وربنا يوفقك

..........tahayo2at said...

بالنسبة لباب الاجتماعيات
قدي عادتنا في ان اللي بنحبهم نداري عنهم اخطائهم و كأنهم المفروض يكونوا انبياء
و دي بتبدأ من االصغر ما حدش ينتقد لا بابا و لا ماما ولا المدرس-دلوقتي بثى بيضرب- ولا عمو ......الخ
وانت نسيت احمد عمر هاشم رغم انه له بلاوي

باب الطب صنعة
والله ما ان عارف الناس المفروض تعمل ايه
اهم حاجة الدكاترة الجداد-زي حضرتك و حضرتي -يحاولو يغيروا دا حتى
ويل للمطففين

باب البهائيين
دا يمثل بالظبط الناس اللي و قفت مع فاروق حسني في موضوع الحجاب و عايزين يسموا نفسهم مثقفين
ودول رقعوا شعار (علمنة مصر)في الزحمة كدة مع دعاوى الاصلاح قال يعني الاصلاح مش هيجي غير لمل ننسلخ من ديننا
مع ان مافيش علاقة
نحن قوم كتب الله لنا العزة في الاسلام فان ابتغينا العزة في غيره اذلنا الله

باب الحب
بلاش تيجي عالجرح
عموما لو بتحب
ربنا ينولك
و لو عندك يا دوب شوية مشاكل كدة قي الشقة و العفش و الفرح و الفستان-اهم حاجة الفستان- فعادي مسيرهم يزهقو و يجوزوهالك
بس يا رب مش هي اللي ترجع في كلامها

باب ابوتريكة
بحبه و بموووووووووت فيه
ربنا يحميه من عيون الحاقدين و الصفاقصية و الزمالكاويةو اخيرا المكسيكيين
دا شخص فعلا انا ما حبتش حد بالمنظر ده قبل كدة
كفاية اقولك ان دا اكتر شخص انا بدعي له
ربنا يثبته عالتواضع كدة زي ما هو
و يبعد عنه اي تكبر او انحراف
قولو اميييييييييييييييييييييييييييييين

على فكرة انا خدت بالي من حتة الرئيس دي و حتى رحت قولتها لصحابي بعد الحلقة

ملحوظة رياضية:
في عالم الاحتراف
لا مكان للهواة

..........tahayo2at said...

معلش نسيت
شد حيلك في الامتحانات

على فكرة
اذا كان دا تمن القسطرة
امال الحقنة الشرجية بكام؟؟؟؟

شوفت بقى ازاي الدو لة بتوفرها مجانا للمواطنين في اقسام الشرطة؟؟؟

عشان انتو شعب ما بيحمدش ربنا

eZz said...

أنا كنت باتفرج علي الحوار بتاع ابو تريكة طبعا بصفتي نقيب الأهلاوية في نجع مساكن الشيراتون بمصر الجديدة :d وعجبني اوي اوي اوي رده ... وبيني وبينك انا سقفتله وحسيت انه فعلاً راجل محترم مش منافق زي ما كللللللللللللللللل البلد بقت مليانة منافقين ... ابو تريكة ... أرفعلك القبعة يا ولدي

sherehan84 said...

مباركيوزيز سيندروم تحفه تحفه تحفه واللايف سايكل تحفه تحفه تحفه
وأبوتريكه مع اني مليش في الكوره بس واضح انه انسان على مستوى عالي ربنا يكتر من أمثاله


البهائيه
أنا قريت الفتوى اللي انت أشرت اليها .. أنا مش داعيه ولست على كثير من العلم بحيث اني أفتي أو أدعم كلامي بالكثير من الآيات الي بتأكده غير أني مقتنعه ان هناك قاعده ثابته وهي (من شاء فليؤمن ومن شاء فليكفر) انه هنا في حريه في الأخذ بالاسلام أو الكفر بيه والبهائيين من ضمن الناس اللي بيكفروا بيه فهم حرين .. شاؤوا الكفر فليكفروا ومن شاء الإلحاد فليلحد

جاء في الفتوى
فتويين بردة من يعتنق البهائية وصدرت فتاوى دار الإفتاء المصرية في 11 مارس 1936، وفي 25 مارس 1968 وفي 13 أبريل 1950 بأن البهائيين مرتدون عن الإسلام وأجابت أمانة
يمكن دا ينطبق على البهائيين الأوائل اللي سابوا الإسلام واعتنقوا البهائيه أما الحاليين فمعظمهم جه كأولاد للبهائيين الآباء يعني هما مكانوش مسلمين أصلا علشان يرتدوا
وجاء في الفتوى أيضا
وأن الأزهر ليهيب بالمسئولين في جمهورية مصر العربية أن يقفوا بحزم ضد هذه الفئة الباغية على دين الله وعلى النظام العام لهذا المجتمع، وأن ينفذوا حكم الله عليها
مش فاهمه يقفوا بحزم ليه ما يكفروا براحتهم حرية الايمان والكفر مكفوله في ديننا
وجاء كمان
إن هؤلاء الذين أجرموا في حق الإسلام والوطن يجب أن يختفوا من الحياة لا أن يجاهروا بالخروج على الإسلام
ده معناه ايه ده؟؟ نقتلهم يعني؟؟؟
وكمان بيقول
إن هذه الفتنة لم تحظ بالاهتمام المناسب مع أنها جريمة الجرائم ومن الكبائر فلنبادر إلى الدفاع عن حقوق الله التي تنتهك وتستباح،
الكبائر دي للمؤمن بالإسلام وهم مش مؤمنين بالإسلام أصلا يعني مينفعش أروح لواحد مسيحي أقوله اجتنب عقوق الوالين أصله من الكبائر؟!؟!؟!



وبعدين أنا مش شايفه ان كتابة انهم بهائيين هو ده اللي هيهد بنيان المسلمين بالعكس دا اللي ممكن يؤثر بالسلب انهم يتحسبوا علينا يعني واحد منهم يدعي انه مسلم ويشكك في الدين من هذا المنطلق .. وبعدين نظام الدوله بيقول نكتب الديانه في البطاقه (أنا عن نفسي مش مقتنعه بالموضوع ده بس خلينا معاهم للآخر ) الدوله بتقول كده هيضر ايه الاسلام والمسلمين ان دول يكتبوا انهم بهائيين في البطاقه .. هم أحرار يتبعوا ما يتبعوه و المفروض طبقا لنظام الدوله نكتب ديانتهم أيا كانت في البطاقه
طبعا دا رأيي الشخصي جدا جدا أما الحقيقه الكامله فالله وحده اعلم بها

النهر said...

التدوينة كويسة وشاملة لكن طويلة قوى يا بنى

tota said...

زنجولا
تعالى بقى كده علشان كنت هقول منك لله ومش عايزاها تيجى فيك علشان حرام

يا بنى ما بتصدق تشوف الكى بورد وهاتك يا كتابة
وطبعا احنا لازم نشوف بتقول ايه بقى

طبعا الريس مثال للراعى المسئول عن رعيته اى خلل فى البلاد لا لوم على اى حد غير الراعى اللى ولا هو هنا ومش عارفة هيقابل ربنا يقوله الشعب جعان وعريان ومتهان ومسروق وووووو ازاى

اى حد تانى اسفة عادى بقينا معندناش كبير كله بياخد اللى فيه القسمة


متلازمه مباركيوزيز
هى المتلازمة الكبيرة بس فيها منها متلازمة طالعة على صغير حدثت نتيجة طفرة فى مسبب المرض والتغيير الجينى فيه واضح لكن اعراض الاصابة هتبان خلال السنوات القادمة
وهنسميها متلازمة جماليوزيز


انت زعلان على الاسعار
اذا كان الكشف اللى من غير قسطرة بيعدى 200 جنيه ده الاول علشان يقولك عندك ايه
فى تخصص جديد هيكون تسليك بواسير وقسطرة فى الداخلية
بس ده بالحجز

مختلفة معاك فى موضوع البهائية بس هقولك وجهه نظرى

ان يكون تحت نظرك فى البطاقة وتكون عارف كام بهائى افضل ولا انه يكون مكتوب مسلم وانت مش عارف عددهم ولا عارف اى حاجة عنهم
لم تنخدع فيه وتجوزوا اختك وانت مش عارف لان بطاقته مكتوب فيها مسلم ولا يتكتب بهائى ارحم

سيبك من العقاب الدينى للمرتد لان ده موقف تانى واحنا اساسا مش بنطبق الشريعة الاسلامية ولا حدودها علشان نطبقها عليهم


ابو تريكة فارس فى بلد بلا فرسان

الزمالك
جعلنى اكره الكرة واعتزل بعيدا عن العالم الرياضى كله قبل ما تحصلى حاجة

مجموعة كاريكاتيور هايلة فعلا

خلص امتحانات وربنا يكرمك بقى

زنجولا
كل سنة وانت طيب واسرتك واحبائك بخير

ذو النون المصري said...

كل سنه و انت بالف خير
بابعت التهاني لمن اعرف و من لا اعرف
لك مني خالص التحيات

Egiziana in US said...

Kol sanah wenta tayeb ya doc! Hope you have a great Eid in sha' Allah and best wishes for the new year!

spellz said...

حلوة فكرة البوابات دى

حكاية النقد دى تفسيرها ان احنا متربيناش عالنقد... شتيمة حسنى دى قللة حيلة مش نقد ... الواحد مش عارف يعمل ايه فيه فبيشتم... لكن صعب تلاقى نقد... حنى عالمستوى الفردى قليل لما تلاقى حد بيحبك ينتقدك.. دا غير ان احنا شعب يميل الى تأليه اى رمز شيفينه كويس و نفى اى صفة غلط عنده...

مباركيوزيس دى مسخرةI wish they can find a Mobarakocidal Antibiotic to get rid of him and all his species forever
لول دى أولمرة اعرف ان syndrome يعنى متلازمة :]

أما البهائيين فلازم يبقى ليهم بطايق مكتوبين فيها عشان يتعلموا والناس تعرفهم عشان متحصلش غلطة الراجل الى جوز بنته لبهائى... أصلهم فى مصر و اللى حصل حصل و الواحد مايتشرفش انه يجبرهم على الإسلام (و يبقى الإسلام انضملوا منافقين) مش عارفة دا رأيى

أما أبو تريكة فدا فنان و أهلاوى جامد... الكل لاحظ ... انا كنت بين كل لحظة و التانية مستنياه يجيب سيرة حسنى و إحترمته جدآ لما تجاهله...

أما الزمالك... ربنا يشفيهم بقى يا حرام;-)
لأ بجد الواحد حزين على التدهور الى هما فيه

عيد سعيد