كله ضرب ضرب .. مفيش فراخ

بيان من الادارة العامه لتفريق التجمعات

قسم التحرش بالمتظاهرين و المتظاهرات

الحملة الوطنيه القومية لازاله الحركات الانسانيه المصرية

تحت شعار

يد الامن في اي مكان .. رجاله و نسوان

باسم الامه .. باسم الشعب .. باسم رغيف العيش .. باسم الشرف اللي أحلى منه مفيش .. وحياة الغالية لتروحو بقشيش

إنه نداء إلى المواطن المتمرد .. المواطن مصري .. احذر يا مواطن .. الدواء فيه سم قاتل .. يا تشربه وترتاح .. يا تقرا البيان ده و برضه هتنزاح .. يعني هتنزاح .. إلى مزبلة التاريخ يا غالي

أما بعد أيها المواطنون

بيان من الادارة العامه لتفريق التجمعات .. قسم التحرش بالمتظاهرين و المتظاهرات .. أحياءا كانو أو اموات .. يللي عاديتوا الحكومه .. و عملتوا معانا حركات .. ونسيتوا اللي فات .. الضرب و الآهات .. ابوكو السقا مات

تعلن الاداره عن توقفها عن الاساليب القمعية القديمة التي كانت تتبناها في تفريق المتظاهرين المغرضين المعارضين لأمن الوطن .. من ضرب و سحل و تحرش جنسي وهتك عرض و عصي كهربائيه .. وذلك حرصا على الراحة النفسيه و الجسديه لأفراد قواتنا ... ذلك لما تسببه من اجهاد لعناصرنا من افراد الامن المركزي المساكين جراء الركض خلف المتظاهرين .. في الحواري و الميادين .. لاصطياد هؤلاء الملاعين .. و لما تسببه ايضا من تأثير على حالتهم النفسيه و المعنويه .. و التي تمثل جراحا معنوية .. لا يقدر الزمن عليها .. بل و تؤثر عليهم و تقلقهم عند نومهم .. ولذا فقد قررنا استخدام اسلوب ( الفراخ الشقية ) .. بتاعت الحجه فتحيه .. اللي في الجانبية .. حيث قمنا بتجهيز عدد كبير من الدواجن المصابة بانفلونزا الطيور .. من الفرخة و حتى العصفور .. و سنقوم باطلاقها في اماكن التجمعات و التظاهرات .. و اللي خايف على نفسه يلم الدور من أولها و يقعد في بيتهم ويا دار ما دخلك شر .. وبلاش نشمت الفراخ فينا يا بني آدمين .. و قد أعزر من زنزر ... أما اللي مستبيّـع .. وعامل فيها وطني و شجــيّـع .. و ليه في الهتاف و التصييح .. و مش خايف على عمره .. يبقى يعمل دكر .. و ييجي المظاهرات .. و يقف مع الفراخ .. و يكاكي معاها .. يكاكي زي ما هوه عايز .. و يقول اللي في نفسه لكن يستحمل بقه .. النفخ و التنظيف .. و تنتيف الريش .. و سلخ الجلد .. و نقار الديوك ... الكلام ده موجه للفراخ طبعا .. بلاش دماغكم تروح لبعيد .. النتيجه انه هيجيلكم انفلونزا الطيور يا بُعـَـده .. وبالتالي .. فاننا سنضطر اسفين إلى استكمال الاجراءات الوقائيه التي تنص عليها منظمه الصحه العالميه .. فرع البدرشين .. وبناءا على توجيهات السيد الأستاذ العميد الدكتور رئيس وحدة مكافحه الامراض الوطنيه و السياسية في مديرية الشؤون الصحيه بمركز سفندا العِـرَس .. والتي توجب عزل المرضى المصابين بانفلوزا الطيور .. من حركة كفاية و قرّاء الدستور .. عزلا طبيا كاملا .. و لذا فستقوم افراد وحدة الغاز في الشرطه برّش المتظاهرين بالغاز .. رشا مباشرا لا هزار فيه .. لتستمر المطهرات و تتوغل و تنتشر بين المتظاهرين العلوج اللي مبيفهموش .. وذلك حتى لا تنتشر منهم العدوى .. كما سنقوم بنقلهم إلى مكان لا يعرفه الدبان الازرق .. حتى لا يصاب هو الآخر .. ونحن اذ نقوم بكل هذه المجهودات الجبارة فاننا نضع اما اعيننا ان كل ما نقوم به هو من أجل مصر .. و علشان عيونك يا مصر .. .. ومصر يا امه يا سفينه .. و ياعيني على جمالك يا مصر .. وادعولنا ف صلاة العصر .... حتى نحمي مصر من انفلونزا الطيور .. و كل العقول .. التي تحاول أن تقضي على ما بقي في مصر من حياة سياسية وردية متفتحه .

والله الموفق .. والله أكبر فوق كيد المعتدي

أدام الله مصر .. واحة لرجال الأمن .. و الأمان .. مش ليكو يا شعب يخاف ميختشيش

مدير الادراه المركزيه العليا لاداره الشؤون اللامركزيه الواطيه

لواء / ابو شوشو كابس انفاسك