يا مصري ليه ؟

من روائع الشاعر / سيد حجاب

يا مصري ليه .. دنياك لخابيط و الغلب محيط
والعنكبوت .. عشش ع الحيط و سرح ع الغيط
يا مصري قوم هش الوطاويط .. كفاياك تبليط
صعبة الحياه و الحل بسيط .. حبة تخطيط
فتحت باب استيرادك و صرفت فوق ضعف ايرادك
حلي للخواجه استكرادك .. سابك بتقرا ف أورادك
و ده قشطك و نزل تشفيط .. يا مصري ليه ؟؟
ومهولاتي تحب تزيط .. ساعة الفرح زغاريط تنطيط
و في المياتم هات يا صويت .. و ف المظاهرات سخن تشيط
و في الانتخاب تنسى التصويت .. يا مصري ليه ؟؟
وليه بترشي و تتساهل و تبيع حقوقك بالساهل
تستاهل النار تستاهل .. يا غويط و يحسبك الجاهل
ساهل و ساهي و غبي و عبيط .. يا مصري ليه ؟؟
يا مصري ياللي الغلى عاصرك .. و النهب في عصرك حاصرك
قوم للحياه .. و اسبق عصرك .. ولا حاجه هترجع مصرك
إلا ان تكون شغال و نشيط .. يا مصري .. ليه ؟؟