الفاضي يعمل قاضي

-
الصورة دى من كبابجي (ابوعلي) .. فرع مدينة نصر .. فى شارع عباس العقاد .. واللى تصادف إني رحت آكل فيه ربع كيلو كفته بس .. واللى كان شكلهم ميزيدش عن 1/8 كيلو بصراحه .. لكن بغض النظر .. الخروجة كانت حلوة و معكرش دمي غير المنظر ده ... عيل صغير سنه ميزيدش عن 5 او 6 سنوات ماسك مكنسه وقاعد يكنس المطعم بشكل سخيف جدا و يقطع القلب .. لأن الولد شكله محترم جدا و خجول للغاية .. بغض النظر بقه عن السبب .. فاعتقد ان الموضوع ده يخص المجلس القومي للطفولة والامومه بتاع ماما سوزان .. اللى فلقونا برقم 16000 لنجدة الطفل ومشفناش منهم حاجه ... عموما لو رحت المرة الجايه ولقيت الوضع زي ما هوه ... هعملهم فضيحه !!
-
-

بحبك يا مصر

-

بحبك يا مصر

بحبك يا ريس

بحبك يا وطني

بحب الحكومه .. بحب النظام

بحب الحواري

و كتر الحكاوي .. وكتر الكلام

بحب الشوارع .. ولو هيه زحمه

بناكل بدُقه .. و منقولش لحمه

و حتى المواصله .. ما هتلاقى رحمه

ومن طول طريقك بسرعة تنام

بحبك يا مصر

بحب العساكر

بحب المباحث

عنيهم معانا .. ورانا ف قفانا

يحبونا دايما فى قسم البوليس

ماهو الشعب فى القسم احسن ونيس

بياخدونا نلعب عروسه وعريس

معاهم فى جنه ولا الاحلام

بحب الوزارة

بحب الادارة

بحب التعامل مع الازمات

بحب الطناش و الزعيق و الاهات

بحب العياط ع اللى عدى وفات
وبعد ده كله يقولك ادارة و تطور و احسن علام

بحبك يا مصر

-

-

من محطة مترو الدمرداش

20/نوفمبر/2008

-