وغلاوتك يا مصر .. انتي امي من زمان
نيلك ملا دمي .. و شال همي .. ومهما كان
وبرغم حبي و عشقي ليكي يا امينه
جالنا اليوم .. نسيبك فيه .. يا ضي الشمس حوالينه
بـ حُـبــِـك جينا و نادينا .. ولا سمعوا .. غناوينه
ما ناسي خلاص نسوا اصلي .. وعايزنها بلد خواجات
عنين خضره .. نسوا عنينه
سمعت .. او شفت أغنيه .. بلدنا .. أو تعالوا ايديكو في ايدينا .. يا ترى عجبك التصوير و الاخراج .. عجبك الكلام .. طيب خد بالك معايا
تعالوا ايديكو في ايدينا .. نشيل زوارنا في عنينيا .. نلم الكل حوالينا
وكأن المصريين مستنين سعادتك تعلمهم الاصول والكرم اللي متعملنهوش في المدارس ولا في الكتب .. اللي كل واحد فينا متربي عليه .. و عمره ما نسيه .. حتى لو كانت الف جازمه دايسه عليه .. و ميت مصيبه كل يوم بتهري فيه .. برضه بيفضل المصري مصري
نعامل ضيفنا بسماحه .. نساعده يعيش هنا في راحة .. نشرف مصر قدامهم .. نخلي بلدهم تحلالهم .. كأن بلدنا دي بلدهم
مش عارف ضيفنا عايز ايه اكتر من انه بقى اغلى عندنا من نفسنا .. الضيف الاجنبي جاي مصر يتمتع بالحضاره في بلد اسهل ما عليها تحقير "حضاره" أي مواطن عادي في قسم شرطه او معتقل .. ضيفنا الاجنبي جاي مصر يتفسح .. في وقت الشعب كله بيتفسح على ايدين عساكر الامن المركزي و المخبرين الشجعان .. المواطن العربي جاي مصر " يعيش في راحه " في كابريهات شارع الهرم .. و سراير الـفايف ستارز .. بينما نص الشعب المصري .. مش لاقي فرشه ينام عليها .. المواطن العربي جاي مصر علشان " بلدنا دي بلدهم " بينما مصر نفسها بتتبرى من ولادها دول .. و بتنتهز اول فرصه علشان تخلص منهم بالخضار المسرطن .. و اللقاحات المضروبه .. و الفراخ الموكوسه .. والمية اللي مشبعه بالمجاري !! .... المواطن العربي جاي مصر علشان " نشرف مصر قدامه " .. بـ50 دولار بيكون معاه احلى بنت ف مصر .. اللي بتشرف مصر قدامه على حق .. و تخليه يرجع لنا تاني .. في حين انه اكتر من نص الشباب المصري مش عارف حتى يخطب او يلم حق جهاز او جواز
بلدنا و رزقنا فيها .. نصون النعمه نحميها .. بلدنا الخير يزيد فيها
فعلا يا جماعه الراجل عنده حق .. ما هي مصر بقت تكيـّـه .. و التجاره شطاره .. اذا قدرت تكون هليب و فهلوي .. هتكسب و تعيش .. وتكون غني و مريّـش .. لكن اذا كنت امين و مهاود .. فصاحب " العزبة " هيكرشك منها .. لأنك مش عارف تصون النعمه و تحميها .. !!! .. و كأن الرابط القومي بينا و بين المدعوة "مصر" هو وجود الرزق فيها .. ولو الرزق خلص .. كل واحد يشوف مصلحته في بلد تانيه .. بلا وكسه
السياحه .. خير لينا كلنا
يا صلاة النبي أحسن .. شفنا ايه من السياحه .. فلوس بالملايين بتتحول لكروش الساده اصحاب القرى السياحيه و المشروعات الترفيهيه إياها .. بينما الالآف من الشباب يعيش مقهورا محصورا .. من الدولارات اللي بتتصرف قدامه يوميا في بار أو ديسكو .. و الفتيات الكاسيات العاريات اللي مضطر يقابلهم يوميا بحكم عمله في " مشروع سياحي " من اياهم .. مش بقولكم .. السياحه خير لينا كلنا ... اه والله .. بس احنا اللي ولاد *** مش بنعرف نقدر النعمه اللي في ايدينا .. و بنرفصها
وأخيرا .. لماذا لا تكون الأغنيه
تعالوا .. ايديكو في ايدينا .. لإمتى .. الظلم حولينا .. لإمتى .. الظلمه تعمينا
ندور علّى باعوا قوتنا .. و زادوا الجرح في قلوبنا
نكون قوة توقفهم .. دي خير بلدي بقى خيرهم .. كأن بلدنا دي بلدهم
بلدنا .. وقلبنا عليها .. كفايه السوس نخر فيها .. بلدنا يا ناس باعونا فيها
No comments:
Post a Comment