اتصل بي واحد من صحابي .. بيسألني عن سبب القرف اللي انا فيه .. و في وسط المكالمه قالي يبني كبر دماغك .. الناس كلها قرفانه و تعبانه .. انا شخصيا طهقان من نفسي و من كل حاجه .. هوه إنت فاكر أن انا و انت بس اللي كده .. لأ .. داحنا كتير أوي .. فورا .. لقيت نفسي بقوله اشوفك بعدين .. و قفلت السماعه .. وانا كلي قلق و حيره منه و من كلامه .. لوهله مكنتش عارف ليه .. لكن شويه شويه .. الطاسه سخنت .. و دماغي اشتغلت و افتكرت انا سامع الكلام ده فين قبل كده
--------------------------------------------------
انت فاكر ان انا و انت بس اللي كده .. لأ .. داحنا كتير أوي .. بهذه الجمله المعبره جدا .. بدأ خالد الصاوي - بطل دور الشاذ في فيلم عماره يعقوبيان في ترايل الفيلم اللي عرض لفتره طويله قبل عرضه في السينما - حديثه للضحيه التي اختارها .. أراد ان يوضح له ان الشواذ في مصر كتير .. و انه ميعرفش حاجه عنهم .. لكن همه كتير .. و اكتر مما تتصور
الفكره في حد ذاتها مخيفه .. و بسرعه هتلاقي نفسك بتتخيل اشخاص كتير بيقولوها .. لأن تخيل العدد الانهائي في عباره ( احنا كتير ) .. و ما سبقه من نبرة جمله ( انت فاكر ) الشهيره .. و التي توحي بجهل تام بالحقيقه التي تكاد تكون واضحه .. تخليك متأكد ان السيناريو ده متكرر يوميا في مصر .. و إن في حاجات كتير ( إحنا فاكرينها ) حاجه .. و هيه حاجه تانيه خالص .. و إن الحاجه اللي احنا فاكرينها و هيه مش كده .. في منها كتير .. اعتقد انك تهت .. لكن بشوية امثلة الموضوع هيكون أوضح .. يعني أي وزير جديد بيجي الوزاره .. وبتبتدي ايده تاخد على الشغل و يلاقي حسابه في البنك عمال يكبر و يبقلظ .. إشي اكراميات و اشي عمولات و اشي هدايا و كادوهات .. طبيعي فالاول يقلق .. وطبيعي يجري على الراس الكبيره .. اللي هيطمنه وهيقوله .. انت فاكر ان انا و انت بس اللي كده .. لأ .. داحنا كتير أوي
بلاش الوزير .. وخلينا في ضابط لسه متعين .. و مسك في الامن المركزي .. كله طموحات ورديه بتحقيق العداله و المساواه .. لكن بمجرد انه ينزل مع القوة في اول عمل حقيقي في مواجهة الشارع .. يفاجأ انه في وش شباب .. واقفين ينادوا بالحريه و الديمقراطيه .. لكن من الناحيه التانيه واقف القائد بتاعه يقوله اضرب في المليان .. و يبدأ الضابط الشاب يضرب و الكل يقول آه .. و بمجرد ما تنتهي اول مهمه و يرجع الوحده بضمير يؤنبه .. يستدعيه القائد في مكتبه و يقوله ان ده شغله و واجبه في الوطن .. و بسرعه هيقوله ان ده هو نظام الشرطه في مصر .. و انت فاكر ان انا و انت بس اللي كده .. لأ .. داحنا كتير أوي
بلاش .. لما تدخل لجنه امتحان و تلاقي طالب داخل بثقه على الممتحن وبيقوله انا ابن فلان .. و بيسلم عليك و بيقولك اديني الدرجه النهائيه .. يقوم الممتحن بسرعه يتنرفز و يقوله انت فاكرني ايه .. انا معنديش الكلام الفاضي ده .. وهنا يتدخل رئيس القسم بسرعه و ينادي على الممتحن و ياخده على جنب .. ويقوله انه لازم يمشي الدور و يلم العمليه بدل ما يلاقي نفسه مرمي بره القسم و بيبيع سجاير فرط على الناصيه .. الممتحن يتعجب من الاسلوب و يقوله ازاي اساوي الطالب الفاشل ده بواحد مذاكر .. يرد عليه رئيس القسم بسرعه .. انت مش عارف ابوه مين .. و ممكن يعمل فينا ايه .. متفتكرش ان انا اول واحد يساعده انه ينجح .. انت فاكر ان انا و انت بس اللي كده .. لأ .. داحنا كتير أوي
وفي مهنه الطب .. تلاقي نفسك متعين في وحده ريفيه معفنه لا تحتوي حتى على أقل الامكانيات الطبيه اللي ممكن تنقذ حياه مريض .. و بمجرد ما تقابلك حاله صعبه و محتاجه علاج فوري تفاجأ برئيس الوحده .. الاكبر سنا و الاكثر علما .. بيقولك مفيش .. و معندناش حاجه نعملهاله .. الحق امضيله على خروجه و خليه يغور من هنا احنا مش ناقصين بلاوي .. تحاول تقنعه يمين شمال ان الراجل ده محتاج امبول يتحقنله .. او انبوبه اكسجين و هيعدي و يبقى كويس .. لكن كأنك بتدن في مالطه .. ولا هيسعمك .. و بعد ساعات يكون المريض ده مات .. و انت في اوضتك منهار و مش مصدق .. لكن الدكتور الخبره هيدخل و يقولك ان ده قدر ربنا و انت عملت اللي عليك .. و لو امتعضت او ابديت استياءك من تصرفاته .. هيقولك ده مش اهمال ولا تقصير مننا .. انت فاكر ان انا و انت بس اللي كده .. لأ .. داحنا كتير أوي
حقيقي لو فكرت الكلمه دي بتتقال كام مره في كام مكان فيكي يا مصر .. مش هتقدر تعد .. لأن الفساد في مصر متعدد .. جنسي و اجتماعي واخلاقي .. و تكاد تكون هذه العباره هي سمه يوميه مصريه .. لن تتعجب مره اخرى .. لو سمعتها في اي مكان .. و من اي شخص .. حتى وان كان من اقرب الناس إليك .. لأن الجمله اياها .. بقت مبرر لكافه انواع العك في مصر .. و العك .. هوه الريحه الوحشه لطبخات الفساد
____________________________________________________
اكتشفت وانا بدور على صوره للموضوع .. أن العلم اللي في الصوره ده هو العلم الرسمي للشواذ .. يعني بعد كده ياريت لو شفت قوس قزح طالع قدامك تحتفظ برأيك لنفسك .. وبلاش بقه البؤين بتوع .. واو .. يجنن .. يهوس .. لحسن الناس تفهمك غلط
3 comments:
Awesome as usual.
I think when people say that, it becomes a self-fulflling prophecy. Everyone says "Everyone's doing it" when in fact it may be a few, but by continuing to say it, increases their number.
But I think that just as the negative things are contagious, doing positive things is also contagious.
Mish kedda wala eh?
i totally agree with ya sir,
but u do not have to talk about positive contagious stuff, or at least its not the main target to spot on the Good things .. i thought its better to focus on bad things .. which is the ready answers for any mistake by the famous word ( why not .. they all do it ) ... i started to hate it as much hating israel itself :)
good luck , thanks !
فعلآ والله كلمه عدنا بنستخدمها كتير جدآ .. يعني بالظبط زي كبر دماغك و كلنا في الهوا سوا .. شماعه بنعلق عليها غلطنا علشان ما نحسسش بعض بالندم و الغلط ا>ا ارتكبناه ..( انت فاكر ان أنا وأنت بس )..نقدر نعتبر الكلمه دي مسكن للآلام علشان مايبقاش حد أحسن من حد ..ولكن أملنا في الله كبير .. ( ان الله لا يغير ما بقوم حتى يغيروا ما بأنفسهم ) ..شكرآ على الموضوع يا استا> زنجولا :)
Post a Comment