قالها و صدقـــّـــته

تحديث

-

بمناسبه ما يحدث في فلسطين الآن .. أردت أن استعيد معكم تدوينه كنت قد كتبتها في مايو الماضي .. لظروف متشابهه

فلسطين أفيقي

-

_______________

-

-

لم تخطط لحياتك منذ البدايه .. تركت نفسك للامواج و ستخذلك .. قالها .. و صدقته

انتسبت لمهنه الطب .. ولم تعمل لها .. فلن تعطيك .. قالها .. و صدقته

لا يعتبرونك رساما محترفا .. حتى و إن كانت لك الموهبه .. لن تصبح رساما من وراء حجاب .. قالها .. و صدقته

لم تقدم لها الواقع .. ولن يكفيها الخيال .. انت ضيعتها من يديك .. قالها .. و صدقته

اللعبه ليست رسمه جرئيه .. او كلمه تثير القارئين .. السياسه ليست لعبتك .. قالها .. وصدقته

انت تقف الآن ما بين تقاطع العوالم المختلفه .. و لن تطأ أيا منها ما دمت حائرا .. قالها .. و صدقته

خذ إجازه من نفسك .. و فكر مع نفسك .. من أين تبدأ .. و كيف ستبدأ .. قالها .. و صدقته

نظرياتك صارت متحجره .. و آراءك لا تقبل التطويع .. في عالم صار يحوي كل المتناقضات .. قالها .. و صدقته

-

-

-

-

______________________

تاج متمرر من العزيزه مااااااااااانو

ومقدرش اقولها لأ

-

-

-

اية اللي حيحصل لايميلك لما تموت؟

هيفضل كده من غير ما يتفتح لحد لما الشركه تقفله و ترش ميه

اديت الباس وورد لحد قبل كده؟

عمري ما عملتها ولا بفكر اعملها

لو اه كانت طبيعة علاقتك بيه اية؟

والله ما هعملها هههههه

اسمك؟

طنطاوي :) شفت النصاحه

اسم الدلع المشهور وسط اصحابك؟

مليش .. ومحبش يكون ليه اسم دلع .. لاعتبارات شخصيه هههه

عمرك؟

24 سنه

برجك؟

العقرب

مجال دراستك؟

الطب البشري

شخصيتك نوعها ايه؟

مستفز .. سئيل .. طيب إلى حد ما .. صبور إلى حد كبير .. مقنع في الحوار حتى بدون خلفيات سابقه عن الموضوع .. براااوي و ممكن يفوت سنه مسألش فيها عن اصحابي برغم اني بحبهم جدا

المود بتاعك؟

تايه .. متشكك .. قلقان

وقت فراغك بتعمل فيه ايه؟

اولا و ثانيا و ثالثا .. الكمبيوتر .. انترنت و كلام مع صحابي

رابعا .. ممكن الخروج .. و الفرجه على الافلام الاجنبي .. و متابعه مباريات الكوره وخصوصا الزمالك

الاكلة المفضلة؟

كتير ههههه .. المكرونه .. الممبار .. محشي ورق العنب .. و حبيبي هارديييز

الصفات اللي خدتها من بابا؟

دماغ ناشفه اقرب ما تكون الى الحجر الصوان .. و في نفس الوقت الهدوء وقت المشاكل و التعامل بعقل

الصفات اللي خدتها من ماما؟

الفن .. بكل اشكاله .. الرسم و الفنون اليدويه و الموسيقى .. و الطيبه

اكتر 6 حاجات بتكرهها؟

ـ الناس الزنانه و عديمه الذوق

ـ اي نوع من كتم الحريه خصوصا في الرسم

ـ علاقه الحب من طرف واحد

ـ التعدي على الدين من كل من هب و دب

ـ وصول الاشخاص عديمي الكفاءه الى قمه النجاح و الشهره ( تقدر تسميه حقد ) ههههه

ـ ان الانترنت يكون مقطووووع مع أني دافع الاشتراك

اكتر 6 حاجات بتحبها؟

ـ ابويا و امي .. ثم اخويا

ـ مراتي مستقبلا انشاء الله .. لو اتجوزت ههههه

ـ هواياتي : الرسم و المزيكا

ـ ادخل على الماسنجر و ألاقي ناس عايز اكلمهم

ـ سكودا اوكتافيا .. دي عربيه على فكره هههه

ـ مانو .. اللي مررتلي التاج ده .. عشان منساهاش برضه

الشغل بالنسة لك؟

لسه مجربتش الشغل بدوام كامل .. لكن كنت احيانا بشتغل على خفيف كده .. و بصراحه .. بكره الالتزام .. خصوصا لو الشغل المطلوب حاجه فنيه .. سواء رسم يدوي او كمبيوتر .. بكره ان حد يربطني بوقت معين لأداء عمل .. و بكره اكتر تدخله في التفاصيل .. و موتي و سمي لما يقولي عدل حاجه في الرسمه .. ببقى هاين عليه احط القلم في عينه

ايه الكمبيوتر والانترنت بالنسبة لك؟

اهم حاجه في حياتي .. بعد البني آدمين

الخمس حاجات اللي ماحدش يعرفها عني هي ؟

ـ شخصيتي .. يعني اسمي و شكلي و كده

ـ احلام حياتي .. دي ف دماغي انا بس

ـ اني شخص غير طموووح

ـ كائن قادر على التعايش بدون بشر نهائيا

ـ عمري ما درست الكاريكاتير .. و لا نشرت في مجله او جرنان .. برغم ان ايميلات كتير بتوصلني من ناس معتقده اني رسام كاريكاتير كبير و عمري فوق الاربعين هههههه

خمس أشخاص تمررلهم التاج ده ؟

ـ أحلى توته

ـ لحظة صدق

ـ الاهلاويه رضوى .. شفتوا الروح الرياضيه

ـ ابيتااااف.. ربنا يرجعها بالسلامه ههههه

ـ سووووسه .. اللي باعتنا من زمان

ByeBye Party

-

إحساس جميل انك تخلص امتحانات .. و إحساس بشع إنك بانتظار النتيجه

لأول مره .. يخرج علينا بنات الدفعه بفكره حلوه .. حفله نتجمع فيها قبل اعلان النتيجه .. و قبل بدء الامتياز و قبل حتى حفل التخرج الرسمي اللي هيكون بعد سنه من الآن إنشاءالله .. المهم فكرنا فيها و لقيناها فكره حلوه و تستحق اننا نتعب عشانها .. وخرجت حفله على اروع ما يكون .. برغم ان كل فتره الاعداد كانت 48 ساعه فقط

-

طبعا كل الناس كانت فاكره ان دي حفله دكاتره .. يعني تحنيط و جبس على شويه تشنجات .. لكن كسرنا كل القواعد و عملنا حفله على اروش مستوى ههههه .. البدايه كانت سحب على اسئله و كاريكوكي .. وطبعا ما ادراك ما الكاريوكي و اصوات الدفعه البشعه اللي غردت في القاعه .. لكنها مع كده كانت جميله و ممتعه اوي .. و بعد كده عملنا مسابقه على غرار من سيربح المليون .. نفس طريقه المذيع و الموسيقى و الاسئلة .. و الناس الحمدلله استجابت جدا جدا .. و بعديها عملنا فقره اسمها ( شخصيات ) .. عملنا فيها تحليل لشخصيات الدفعه بطريقه الكاريكاتير .. يعني رسمنا كل شخصيه و حطينا عليها الموسيقى اللي تنفع .. مثلا .. الطالب الدحيح .. عليه رسم .. و معاه اغنيه مبتفرحشي .. بتاعت شيرين .. الطالب الحنين اللي لازق للبنات ليل و نهار .. و معاه اغنيه القلب الطيب .. و هكذا .. و بجد كانت روشه اوي و جميله اوي

بعد كده عملنا فقره عن تعرف الصور .. جبنا صور للناس و هيه صغيره و حطينا على كل صوره جمله استرشاديه :)) يعني اللي ابوه ضابط شرطه بقت الجمله اللي مع الصوره ( الشرطه في خدمه الشعب ) .. و اللي بقى اقرع لما كبر .. حطينا معاه ( كله من الهرمونات ) .. و بجد الناس بقت بتعرف الصور و كان احساس لذيذ انك تحط صاحب الصوره جنب صورته و هوه صغير .. و هاتك يا ضحك .... بعد كده قدمنا قصيده معموله مخصوص لحفله التخرج .. اسمها سحلول .. و متتخيلوش الناس قد ايه انبسطت منها .. هحطلكوا هنا جزء منها فقط .. علشان الملكيه الفكريه يعني هههه

على فكره .. سحلول ده جناوي
ولا عمره كلم بنوته
ولا شاف .. و لا يعرف .. ولا ناوي
مسكين .. و السكشن كان زحمه
الطلبه فيه .. اكوام لحمه
وبضهره في واحده راح خابط
إدير .. هيقول كاك خابط
اتسمر .. تنح في ذهول
من ايده وجع المحلول
ماهي طلعت واحده من دول
ويا عيني الراجل محوول
ضحكتله .. حبها علطول
و ريالته نزلت دلدول
اديتله منديل باديها
سحلول من شحتفته عليها
بإديها مسح الدلدول
وسنتها طبعا ياخوانا
سحلول قام شارب مقبول

وفي ثانيه و ثالثه مقبول

سحلول ده اصله كان عفوي
كان يدخل في لجان الشفوي
لابس بابيونه و جلابيه
و متكلين بكلونيا جويه
ويقول دي شفوي .. دي سهله
دي عندي كدخول السينما
لكنه من اول وهله
كان يلمح في اللجنه الاينيما
يديّـر .. ما هو عارف نفسه
وبجد .. بجد .. بجد
مكانش بيخجل من حد
مالدفعه كلها سحاليل
والنص اتعود عالانيميا
و الباجي مركب محاليل
ماعادا ولاد ... الحلال

درجاتهم .. تكمل في الحال

ملاحظة : الانيميا = الحقنه الشرجيه

-

بس بقه .. خلصت القصيده من هنا .. و بدأنا الفقره التانيه .. اغنيه متألفه مخصوص للمناسبه .. اسمها ( و ماله ) .. طبعا من الاسم الناس هتقول الللله ده عمر دياب و الليله رومانسيه .. لكن الواقع حاجه تانيه هههه .. الاغنيه دي متألفه على قهوه .. و الشباب اللي مألفها ( حوالي 5 ) كانوا لسه مخلصين امتحانات طب .. فتخيل هيكتبوا ايه .. عموما انا هسيبكوا مع جزء من الأغنيه برضه تقرؤها براحتكم .. طبعا جزء ليه .. علشان الملكيه الفكريه هههههه

وماله لو خت يوم تكليف .. في حته مفيهاش ناس

او لو سبت اهلك ورحت بعيد .. و عشت كده محتاس

ماهو ياما حقك انت انداس .. خلوك بدون احساس

-

يا دوك ركز شويه عشان .. تضبط التضابيط

متفكرش ابدا في سوسو عشان .. ده سوسو حتى عبيط

بابا ضبطله شفوي و شيت .. وجابه جنب البيت

ملاحظة : شيت = امتحانات العملي في الكليات العلميه

-

بعد لما الناس سمعت الاغنيه دي حبوا يتعرفوا على المغني .. و اتخضوا لما اكتشفوا انه زميل ليهم في الدفعه ... يمكن عشان دفعتنا مفيهاش الناس اللي بتمسك جيتار و تقف على باب المدرج والحركات الواقعه دي .. لكن الناس طلبت تعرف المغني .. و عرفوه .. و غنى معاهم اغاني لتامر و حماقي .. و كانت فعلا روشه طحن ... بعد نهايه الاغنيه .. جه معاد احلى فقره في الحفله .. فيلم تسجيلي وثائقي عن كليتنا .. اتصور فيه رحله طالب طب من اول يوم بعد نتيجه التانويه لحد لما بيدخل قسم قسم .. و الكاميرا معاه .. و موسيقى تصويريه مختلفه باختلاف الموقف .. بجد كانت تحفه فنيه تدرس لطلبه سينما .. بالرغم ان كل المشاركين في الفيلم ده طلبه طب .. نفذوه في 24 ساعه والله .. لكنه فعلا كان رائع .. بنهايه الفيلم .. قدمنا تورته الحفله .. و العشا الخفيف :)) .. و بعدين اعلنا نتيجه استفتاء عمله الطلبه عن دكاتره و اقسام الكليه و التخصصات اللي الطلبه بتفكر فيها بعد التخرج .. و الغريب انه نتيجه الاستفتاء بالنسبه لتخصص المستقبل كان الأطفال باكتساح .. واضح ان العيال هيكتروا اوي اوي اوي هههههه

-

كان معكم مراسل المدونات .. طنطاوي

حفل تخرج دفعه 2000 - 2007

مره واحده

كثيرا ما نبكي .. كثيرا ما نضحك.. كثيرا ما نصاب بالضيق و الاحباط .. لكنك لم تسأل نفسك يوما .. ماذا لو كانت مشاعرنا للاستخدام مره واحده فقط.. ماذا لو كانت دموعك لا تذرف سوى مره واحده .. و لو كانت ضحكه من قلبك لاتخرج الا مره واحده .. ماذا لو كانت احاسيس الضيق و الاحباط لا تاتي سوى دفعه واحده .. أكنت تفكر بنفس الطريقهأصدقك القول .. انها فكره مجنونه للغايه .. لكنها تستحق التفكير.. وقتها ستقرر .. من تلك التي تستحق دموعك .. و من ذلك الذي قد يضحكك من القلب .. ستوفر تلك الدمعات .. و تلك البسمات .. لأنك تعلم انها لن تاتي سوى مره واحده و ستعلم وقتها .. ما اذا كانت كل لحظات الضيق التي مرت بك .. تستحق ان تشعر بها.. و ما إذا كانت كل لحظات السعاده التي مرت بك .. تستحق ان تعيش لها
سبقتك و فكرت .. ووجدت انني امضيت الكثير من لحظات الوحده و الاكتئاب .. لأجل اشخاص و مواقف لا تستحق .. و كذا قضيت اوقات سعاده كثيره في ظروف لا تستحق .. ضحكات اطلقتها لمجرد الضحك .. لمجرد الاحساس بالسعاده التي يتحدثون عنها كثيرا .. حتى و ان لم اجدها
هلا فكرت مره أخرى .. ربما اعدت تصنيف لحظات فرحك و حزنك .. لربما قضيت اوقات احلى في ايجاد السعاده الحقيقيه .. و تجنبت لحظات الضيق و البكاء و العزله في غرفه مظلمه

_______________

_______________

-

حملة قلوب طيبه

الكويت .. اللي تعداد سكانها لايزيد عن 3 مليون بما فيهم المقيمين من غير الكويتيين .. عملت حمله بإسم قلوب طيبه .. الغرض منها تشجيع الناس على التبرع بالدم .. الحمله بقالها فتره .. بإعلانات تلفزيونيه .. و في الصحف .. واعلانات كبيره على الطرق السريعه .. كل ده علشان يشجعوا الناس يتبرعوا و بدون حتى ما يكون عندهم سبب لنفور الناس .. مجرد تشجيع .. ما بالك .. بدوله تعداد سكانها 70 مليون .. فيها مصيبه تخص موضوع اكياس الدم .. التحقيقات فيها لسه مخلصتش .. و الشك عند الناس عمره ما هينتهي بسهوله .. و مع كده .. كل اللي ربنا قدرهم عليه ان سياده الوزير يطلع في الجرايد و هوه قاعد على كرسي التبرعات و بيدي دمه للشعب .. طبعا الموضوع مش محتاج تعليق كتير .. لكن كفايه اوي اللي اتقال .. و حسبي الله و نعم الوكيل

يا جماعه .. الدم فعلا مش لعبه .. و اللي محتاجينه كتير .. و حياتهم واقفه على كيس الدم ده .. و احنا ربنا مدينا دم كتير و نقدر نقدم منه نص لتر كل 6 شهور بدون اي مضاعفات .. يبقى ليه نبخل بدمنا على اللي محتاجه .. و نصيحه اخيره من طبيب للي قلقان .. لو لقيت كيس الدم اللي هيتاخد فيه العينه من صنع شركه هايدلينا ارميه في وش الفني و روح بيتكم .. لكن لو مش كده .. يبقى فكر في الشخص اللي الكيس ده هيوصله .. و ساعتها هتتمنى تتبرع بأكتر من كيس

ملاحظه : ده نموذج اعلاني للحمله .. ياريت تنزله و تشوفه .. تحميل

خالي من الكولستيرول

البوست النهارده .. رايق اوي .. و هادي اوي .. و رومانسي أوي أوي

_______________________

-

فكرت الأول في تصميم مدونه جديده .. اجمع فيها كل تخاريفي الرومانسيه السابقه و القادمه إنشاء الله و سميتها

TENDER ROSE

_______________________

-

ثانيا .. فكرت في تقديم بوست من مدونه طبيبه و صديقه عزيزه هي لحظة صدق .. و اخترت احد القصص على ذوقي

ندى .. لكنه جاف : بقلم / لحظة صدق

عندما رأيتك قلت لا ريب أنت هولا بأس سأكتمها فى قلبى و لكن سأظل كل ليلة حين أخلو بنفسى و كتبى أتذكر ذات العينين اللتين تملآن الوجه القوى و الملامح المتدارية الهادئة الصلبة الخجولليتنى أحتويك .. ليتك تحتوينى .... ليتك و ليتنى .كانت هذه الليالى ستمتد طويلا و عبثا سأحاول أن أنسى نظراتك الحانية و روحك الطافية على جبينك المشرق .حبى الذى تمنيتهغداً سألقاك ..... ولكنعذراً لوأننىعاملتك بجفاء لتغضب ، كى لا يلحظ أحد ضعف قلبى ، كى لا يروا الحب فى عينىعلنى أخشى أن أصدق حبك ، أخشى أن أجرح قلبى بوهم أريده لكن لن أقبل المغامرةعلك ظننتنى جافة ، باردة ، لا شىء .... لست إذن من يستحق حبكفلن أكون شجاعة فى حبى لك غير واثقة بأنك ستبادلنى إياه ...و لأننى لن أتحمل حطام قلبى و لا قلبك .." لست أنا.. لست أنت " سأقولها لك ببساطة و أتركك ترحل مشيحا بنظراتك عنى ... حتى الإبتسامة و تحية الصباح لن أنعم بهما مرة أخرىوهكذا ببساطة و بذات الهدوء الذى تقابلنا به أول مرة سأتخلى عنك حتى لو لم تكن لتفعل المثلو لن أدرى أبدا لم أحتفظ بصورتك بين حنايا قلبى المثلج أو المحترق ..لا فارق أى احساس هو لا فارق..ولن أعلم أبداً لم أقص عليك كل ليلة قصة حب داريتها عنك ... علّك تسمع همساتى المحتضرة من آخر العالمعلّك تلحظ نظراتى و لكن سأرجو ألا تلحظها كى لا أكسر نظراتكثم إننى سأجفف قطرات الندى العالقة بوجنتى.. حتما هى ليست دموع ،فما كنت لأبكىو سأفكر قليلا و أنتظر بلا أمل دون أن أنساك..أما بعد غد
و لأنه غير مقدر لى أن أختار...سيختارنى آخر من بين أزهار الحياة ... و سأرضى حينها لأعلم أننى المخطئة ، و لأعلم أن الحب فراق
و لأننى مخلصة سأدعى حبه إلى أن أموت

-

اقرأ باقي قصص لحظة صدق في مدونه : لحظات منسيه

لا دموع بعد اليوم

إعلان هام

-

أنا خلصت امتحانااااات اخيرا

يعني مالآخر

أنا خلصت كليه للأبد

مفيش امتحانات و لا سكاشن و لامحاضرات و لا كورسات

ولا سهر الليالي و القلق و التوتر

وداعا للمذاكره .. و باي باي يا كليه

_________________________________

-

قصه قصيره

لابد أنك لم تلاحظ وجودها .. فهي هناك .. جالسه تحت تلك النبته العملاقه التي تزين ردهه المنزل .. لا تعبأ برنين الهاتف و ازعاج طرقات الباب المتتاليه .. لم تعد تعبأ بالمشاكل التي تراكمت في حياتها .. و الازمات التي تزامنت الواحده تلو الأخرى لتعكر صفو حياتها و تدمر ما بقى من باقات البنفسج التي كانت تعشقها .. و تثيرها

تلك العيون الناعسه .. و الهالات السوداء .. لا تمتلكها الا عيون تسهر .. عيون تفكر .. تعشق و قد تحب بجنون .. تلك الايدي الصغيره .. لايمكن ان تكون الا لملاك رقيق من صنفها .. تلك الذراع التي تتالى عليها الندوب السوداء .. لايمكن ان تكون الا لها ... مازالت جالسته تتأمل و تفكر .. تتذكر ايامها الاولى .. كم كانت اسيرة له .. كم كانت هائمه بحبه .. لا تفكر الا فيه .. و لا تخرج طالبه إلا إياه .. لكنه لم يكن هناك قط حين كانت تحتاجه .. كانت تبحث عنه كثيرا .. تسأل هذا و ذاك .. قد يسوقها البحث إلى احقر الازقه .. و سؤال ابشع الاشخاص .. لكنها لم تكن تبالي .. فهي في سبيل بحثها عنه مستعده للتضحيه .. و لو بحياتها .. فقد وجدت معه اللذه التي لا يمكن ان تنكرها .. و اوجد في حياتها متعه لا تضاهي .. اعاد لها احساسها بالحياه .. بعد ان كانت قد افتقدته .. من هنا احبته .. و من هنا ادمنت هواه

و تشعر الان بتزايد طرقات الباب .. و تعود من عالم الخيال الى الواقع لتسمع اخيرا صوتا اجش يصرخ و يقول : افتحي يا بت.. انا عارف انك جوه يا بنت الشمامه .. و ديني لو ما فتحتي و سلمتي كل البودره اللي عندك لاكون عاملك محضر تلبس و تنطسي فيها اعدام .. ههههه

أيــــظـن

كاريكاتور

المزيد ... قريبا

____________________________

إن بعض الظن .. إثم
-
ـ لما واحد عسكري ولا ضابظ ميسواش تلاته تعريفه يضربك على قفاك .. لا تظن فيه السوء .. لأنه القفا ده ربما يكون وقاك شر عصايه مقشه معووجه او كرسي مقلوب على وشه
ـ لما اولمرت ييجي يزور مصر في عز الضرب اللي شغال في فلسطين تقوم الناس تزعل من مبارك انه استقبله ..لا تظن فيه السوء .. مش يمكن الراجل جاي من بلدهم و جايب للريس عقد عمل في السعوديه
ـ لما ابن عميد الكليه او استاذ فيها ياخد مكانك في التعيين و انت تاخد صابونه و تطلع تصيح و تقول كوسه كوسه .. لا تظن فيه السوء .. مش انت نفسك وافقت قبل كده على ان في نعجه طلعت من النعجه دوللي لما عملوا منها كوبي و باست .. اشمعنى الاستوساخ .. اقصد الاستنساخ بتاع العميد اللي زعلت منه
ـ لما الاهلي المصري يخسر من الاسماعيلي تلاته صفر .. و الاهلي السعودي يخسر من الزمالك المصري واحد صفر .. لا تظن السوء فيهم .. و لاتغير انتماءك الاهلاوي .. لأن الاهلي المصري هيلعب مع الاهلي السعودي على التالت و الرابع في بطوله الموكوسين الدوليه .. و يمكن ياخد التالت تاني .. و تفرحوا بيه ههههه
--

زنزانه خمس نجوم

-

على مسؤوليه السيد مدير امن اسكندريه و كما نشر في المصري اليوم .. اقسام الشرطه في الاسكندريه فيها زنازين لاولاد الناس المحترمين .. اللي ساقهم القدر لدخول القسم و البيات فيه للصباح .. فهنيئا لكم ايها الشعب .. و انا من مكمني هذا بقول لكل واحد عايز يتمرد او يرتكب جريمه من اي نوع .. عليك و على اسكندريه اهه على الاقل تضمن تبات ليله التخشيبه بعيد عن حسن شفه و عجوه الاعور

-

-

مقارنه بسيطه

-

استغرب اوي صديقي السعودي لما لقاني بشتكي من الامن في مصر و من تصرفات الضباط اللي ميختشوش .. قالي اومال لو كان عندكو هيئه كنتو عملتوا ايه .. و الهيئه لمن لا يعرف مجموعه رجال لابسين جلابيات بيضه قصيره .. و ماشيين في الشوارع بسلطات تخولهم ضبط اي تحرش او فعل فاضح في الطريق العام و تحويل صاحبه للشرطه فورا .. زي انك تمشي مع خطيبتك في الشارع او انك تمسك ايد مراتك في وسط الطريق العام .. كله بالقوه و البلطجيه لدرجه انه مفيش مجال انك تتناقش معاهم .. كفايه تطبيقهم لامر النقاب بالقوه الجبريه رغم ان الدين لم يفرض النقاب .. فإزاي همه يفرضوه .. ده غير انهم بيرفضوا قياده المرأه للسياره بالرغم من انه بيسمحوا بتواجدها في السياره منفرده مع السائق

بصراحه .. انا قلتله يعني انتو عندكو كل الليله دي و زعلانين .. طب ما احنا كمان عندنا بدل الهيئه .. ولاد المضايقه .. و ولاد المضايقه همه مجموعه من الافراد لابسين بدل سوده و لابسين حله تيقال على دماغهم و في ايدهم نشابات ماشيين بيها ورا واحد قفا كبير اسمه ضابط .. مترح ما يحب يدوس بصابع رجله يشاور للرجاله ... القوات تتقدم .. تروح متقدمه علطول و تحول المكان لمعركه حربيه .. تحت اسم .. معارك و غزوات قوات الامن المركزي .. همه برضه بينفذوا الشرع .. بس الشرع بتاعهم .. اللي هوه احمر و عليه ورد و بأستك .. يأمرون بما يأمرهم به قائدهم .. و ينهون عن كل ما يغضب حاكمهم

و النتيجه ايه .. الهيئه .. صنعت الكبت .. والكبت في السعوديه اخرج شباب مخنث و شاذ جنسيا .. بشهاده السعوديون انفسهم .. و اخرج بنات معقده و مكبوته و تنتظر الفرصه لاظهار انوثتها في أول مطار عربي او اجنبي .. إلا من رحم ربي طبعا و هم كثر الحمدلله .. لكني بتكلم عن المشاهد السلبيه اللي حصلت نتيجه الكبت ده .. اما ولاد المضايقه .. الامن المركزي سابقا .. فصنعوا الكبت ايضا .. كبت اخرج لنا شباب ديوث و مخنث برضه .. و مستقبل اسود و مهبب علينا و على البلد كلها

-

-

رد على موضوع البهائيه

-

في ناس كتبت في التدوينه السابقه .. ان وجود اسم بهائي في البطاقه بتنفع في حالات الجواز علشان الاهل ميتغشوش في العريس .. طيب يبقى برضه من حق الشاذ جنسيا انه يكتب نوعه .. و من حق البوذي و الكونفوشي و البطيخي يكتب ديانته .. علشان منتغشش فيه برضه .. و نبقى فتحنا الباب لكل صاحب فكره منحرفه انه يسجلها .. تبقى غاغه يعني .. و بعدين انا نفسي افهم .. البهائي لو كان مسلم زي ما بيقوله مكانتش بقت دي مشكله .. انما البهائيين ليهم كتاب خاص غير القرآن الكريم .. بيدفعوا زكاتهم لمركز رئيسي للبهائيه في القدس .. اللي هيه اسرائيل عدم اللي لا مؤاخده .. و بيصلوا بمزاجهم .. صلاه كبيره و صلاه صغيره و صلاه ميجا ميل .. ف يعني لو واحده هتتجوز واحد او اتجوزته فعلا . و مش عارفه كل التفاصيل دي عنه .. امال اتجوزته بأماره ايه انشاء الله .. كانوا بيتكلموا في ايه .. بحبك وحشتيني .. و كان الله بالسر عليم .. ساعتها هيه اللي تستاهل اللي هيجرالها

لو واحد اتجوز واحده و اخفى عنها دينه .. يعني ده داخل بغش و تدليس .. هل الحل بقه انه يكتب بهائي في البطاقه .. و اذا كانت البنت اصلا ممكن متشوفش بطاقه جوزها غير ليله كتب الكتاب .. و بتحصل كتير يعني .. و لنفرض ان اهلها عرفوا ساعتها بعد ما الغشيمه فضلت مخطوبه له كام سنه بدون ما تعرف .. هيكون الحل ايه .. فركشه الجوازه ليله كتب الكتاب .. يا فرحتي .. نفعتكوا اوي البطاقه ساعتها

الحل واضح ..لما النبي عليه الصلاه و السلام قال خطبه ..كان السبب تعرف الزوجين على بعض .. و اذا كنا احنا هنقضي الخطوبه كلام تليفونات في نص الليل و خروجه للسينما و لمسه ايد و بوسه خد .. بدون ما الست تعرف دين جوزها و معتقداته .. يبقى كل سنه و هيه طيبه و حلال عليها .. البهائي ده

-

-

حبيبي و انا جنبك

تعرف بحس ب إيه

و انا بشد في نفّـسك

ببقى عايز اقولك ايه

-

يا محلى الدنيا و انا جنبك

يا كل حياتي .. محتاجلك

حشيشي يا عمري .. متسيبنيش

و حياه أغلى غرزه عندك

وميحرمنيش منك .. و ميقطعنيش عنك

-

حشيشي النهارده لازم تعرف .. إنك عاملي دماغ

انا بحبك .. بحبك .. لو إنت في قرش او انت في ساغ

و آآآه .. ياحبيبي .. و حياة أحلى شمه منك

و ميحرمنيش منك

-

حشيشي البلد دي لازم تنسى

انك عايشها .. صحيح

انا بقولك .. يا قلبي .. عاللي من الآخر .. و مريح

و آآآه .. يا حشيشي .. ما اللي احنا شايفينه في بعدك

و ميحرمنيش منك

--
-

صدام مات

-

لأول مره احس ان ماما امريكا .. غبيه .. كنت دايما بتخيل امريكا .. في الاول .. على انها صوره مشفتهاش قبل كده .. دايما في افلام الكارتون او السينما .. كان البطل الشرير الذكي .. يموت في نهايه الفيلم .. بينما كانت الاداره الامريكيه بالنسبه لي .. هيه البطل الشرير .. اللي مش بيموت في نهايه الفيلم .. بالعكس .. بيكمل و يعمل اكتر من جزء كمان .. لا شفت جيمس بوند عرف يوقفها .. ولا كونان قفـّل عليها و ضربلها كورسي في الكلوب ... محدش قدر عليها .. بالعكس .. كل العالم سلـّم لقضاء امريكا

لكن دلوقتي .. امريكا تنازلت .. بالنسبه ليه على الاقل .. عن دور زعيم المافيا العبقري .. و المخطط الرائع .. و رضيت بدور نص كم .. اللي هوه دور الحرامي الاهطل في الافلام التجاريه او الكوميديه .. يعني .. امريكا اللي كانت ماسكه صدام .. اللي دوخها و دوخ العالم كله .. و اللي وصلتله بطرقها العبقريه برضه .. اللي خلت واحد من اهله ( و باعتراف صدام نفسه) يبلغ عنه و يقبض 25 مليون دولار و مقضي حياته فل الفل في المنطقه الخضراء في بغداد .. و لان الضحيه كانت في ايديها و الادله كلها موجوده .. سواءا كانت الدجيل او الانفال او الغزو على الكويت .. لكنها مع كل ده .. عملتله محاكمه مسخره .. هتفضل في التاريخ للأبد .. و كأنه بريء محتاجه اميريكا انها تلفقله اتهامات بطاله .. و تساويه في مشهد اعدامه .. المؤلم .. مع احمد زكي في فيلم البريء .. مع الموسيقى الرائعه .. و صوت الكناريا .. و مشهد ضرب الرصاص ... اللي كل لما تشوفه .. تدمع .. مع ان كان في ايديهم يبعتوه على محكمه العدل الدوليه و يخلصوا من الليله دي كلها بايد بيضاء ..و كان اقل قاضي ساعتها بتلاته مليم هيحكم عليه بحكم محترم و لو فرضنا حتى انه كان اعدام .. ف كان ساعتها هتكون محاكمه مجرم حرب .. و سفاك دماء .. مش تحوله لبطل .. و تخلي الاخوه المصريين الافاضل يخرجوا في نقابه الصحافيين و المحاميين كاتبين جمله تشعرك بالغثيان .. ان صدام حسين على مسيره عمر المختار و جميله بوحريد

____________________________

صوره و تعليق ... عاش الهـتـيـفه

______________

______________

حين يزقزق زقزوق

خير اللهم اجعله خير بيقولو ان مصر دوله اسلاميه .. ده الدستور اللي بيقول كده .. و بيقولو ان في وزاره اسمها وزاره الاوقاف و الشؤون الاسلاميه .. و بيقولو انهم اختارو وزير كناريا علشان يمسكها اسمه حمدي زقزوق .. المستر زكزوك بقه أبى ( حلوه أبى دي ) إلا ان يكون وزيرا .. و يمارس وزاريته علينا و كانت النتيجه ان سياده الوزير المحترم .. كرش .. يعني طرد .. احدى المشاركات في ندوه يحضرها .. لأنها .. بنت اللذين دي .. اللي اهلها مش عارف جابوها منين .. كانت منقبه .. تخيلوا المصيبه اللي هيه عاملتها .. مش عارف بأي وش جايه تحضر المحاضره و هيه منقبه .. اوم الوزير المحترم يقول انا ارفض النقاب .. تماااااما .. بالذمه ده اسمه ايه .. مش زقزقه غراب .. لما وزير الشؤووون الاسلاميه يطرد واحده منقبه .. عايزين وزير السياحه ولا الإعلام يعمل فيها ايه .. حسبي الله و نعم الوكيل