-كانوا دايما يقولوا .. التاريخ هيتكلم .. التاريخ بكره يحكي و يقول .. لكن يا ترى بعد ميت سنه .. و لا حتى ألف .. التاريخ هيقول علينا ايه .. انا شخصيا عندي اعتقاد قوي انه احتمال يعدد علينا .. و يلطم علي خيبتنا .. و احتمال اكبر انه يداري خيبتنا دي عن ولادنا و احفادنا .. و يلغي الفتره السوده دي من حساباته و كأنها لم تكن .. فتره الايام اللي مش سايبانا في حالنا .. بتاخدنا غدر على خوانه .. قسوه و ظلم و ذل .. و بتضرب في الكل .. و اللي يخاف و ميخافش حته بينداس
-
اقولك .. اجدادنا الغاليين اوي .. سابولنا ايه .. بصراحه مخلوش .. اثار فرعونيه ملهاش تمن .. تحنيط و بناء على اعلى مستوى .. فنون و طب و ثقافه و حرب و سياسه مفيش بعد كده ... جم اللي بعدهم .. عملوا ثورات هيتحكي عنها سنين .. حفروا القناه في الصخر .. بنوا السد العالي .. عمروا ارض مصر .. طلعوا نجيب محفوظ و صلاح جاهين و الابنودي .. لما حبوا يغنوا سابولنا عبدالحليم و ام كلثوم و سيد درويش و الشيخ امام .. لما حبوا يضحكونا سابولنا اسماعيل يس و الشاويش عطيه و القصري .. لما حبوا يكتبوا جرايد و مجلات .. سابولنا اهرام هيكل و اخبار آل أمين .. و روزاليوسف و صباح الخير برسوم جاهين ... حتى لما حبوا يهزوا وسطهم سابولنا سهير زكي .. في أيه اكتر من كده
-
احنا بقه سايبين لولادنا ايه .. لأ .. مش هظلم الجيل ده .. واقول اني هساويه باللي قبله .. الجيل اللي بقت كل حاجه متوفراله .. تقنيات بدون حدود .. و انفتاح يزيد عن مقدره اي لاعب جمباز .. و حريه تكاد تكون برغم محدوديتها اكثر مما حصل عليه الكثيرون ممن سبقونا .. و مع كده .. هنقول اننا ناس متخلفه و معرفتش تستغل كل ده .. خلينا زيهم يا عم مش هنزود .. هاااا .. عملنا ايه ؟؟ اقولك .. لما حبينا نسيب اثار .. سيبنا صوره عماد الكبير و الخابور .. سيبنا تمثال رمسيس اللي ماشي واقف يا ولداه من الميدان لحد المتحف في الصحراوي .. سيبنا متظاهرين بياخدوا بالجزمه .. و مليونيرات سارقين البلد .. و فراخ معدناش قادرين عليها .. بجد حاجه تفرح .. طيب بلاش .. ماحنا لما حبينا برضه نبقى مثقفين .. سبنالهم كرم جبر و ممتاز القط و اسامه سرايا و كريم عامر .. لأ لأ ... يا سلام علينا في الغنا بقه .. سبنالهم بوسي سمير و ماريا و روبي ... بس مقولكش على الفن بقه .. ييجي ايه اللي عملوه جنب خفه دم طلعت زكريا و قفشات ريكو و لا تراجيديا العملاق الكبير مدحت العدل .. بلاش .. قلنا نهلس زيهم .. جبنالهم احسن رقاصات مصر .. فيفي عبده ... بجد .. احنا سايبين ورانا خير .. ما بعده خير .. و تراث لو اتوزع على كتب التاريخ في العالم ده .. لحرقها جميعا و نحسها ليوم الدين
-
الحياه سوده في عينك .. و هتعيط .. لأ لأ .. إنشف شويه .. خلي عندك امل .. اصل ابني و ابنك بعد كام سنه .. هيقعد القعده دي مع ولاده .. و يحاول يشرحلهم مصر كان فيها ايه .. و ليه .. و يمكن يا ولداه يدخل معاهم على الانترنت .. اللي هيكون ساعتها بيتفتح من المخده اللي على السرير و يفتحلهم محرك بحث زي جوجل اللي هيبقى اسمه حنجل ساعتها .. و يدور في المواقع الاثريه زي بلوج سبوت .. و يطلع كام تدوينه عتيقه من بتوعك و يقعد يقول لولاده .. شوفوا شباب مصر .. أجدادكم الشرفاء .. كانوا بيعملوا ايه و بيقولوا ايه ... يا ترى مؤمن بكده .. و متخيل ان ممكن اللي بتكتبه دلوقتي ده يكون في يوم من الايام حكايه يحكيها واحد لولاده .. او تاريخ يدور فيه واحد من سلالتك دي .. يعرف بيه حقيقه ممكن كتب و دواوين متحكيهاش ... و متقولهاش
-
-
30 comments:
ايه ده أنا أول مرة أقص الشريط عندك!! عايزة جايزة بقى
:)
ههههههههههه
أنت عارف لما بنيجى ندرس أزمنة معينة بنسميها عصر فرعونىو عصر مملوكى, عصر ما قبل الثورةو عصر ما بعد الثورة وهكذا... الفترة اللى احنا عايشيين فيها دى بقى هتتسمى عصر غطينى وصوتى عليا
هههههههه
بس ازاى تنسى لفيف من أعلام الفن بتوعنا زى المجرم تامر حسنى والظريف عادل امام والراقصة اللولبية دينا والمطرب الشعبى الجامد جدا عماد بعرور.. عيب برضه!! دى ناس ليها وزنها
مالك أنت ومال لاظوغلى بقى؟!! ده بيتى هناك.. جنب الحبايب كلهم
:) :)
manal
التاريخ
أفكارك جميله بس أنا شايف أنك تجنيت على تاريخنا ورفعت من قيمة تاريخ من سبقونا
ROMIL
ولادنا اية وبتاع اية
وتاريخ اية
وشعب اية
ومصر اية
هو احنا اية
وهنا لية
فكك بقى من الحورات دى
وريح الدماغ
ملعون ابوكى يابلد
ساقيانا كاسات المر
نقولك مدى الخطاوى
تقوليلنا للخلف در
يااااااااا عم
احنا لقينا حاجة لنفسنا اما نفكر في ولادنا
و بعدين اكيد هما كمان هيعيشوا نفس الظروف اللي احنا بنعيشها
بس احب اطمنك ان رئيس لجنة السيايات بالحزب الحاكم هيثم جمال مبارك لا يفكر اطلاقا في ترشيح نفسه خلفا لوالده الذي قال في نيويورك:
مصر ليست سوريا
كأبتنى يا شيخ لول!
ده يابنى الى بيتسمى فى التاريخ عصور اضمحلال
عارف لما كانوا بيدرسولنا ان بعد كل فترة غعظيمة
بتيجى فترة التاريخ بيوئعها و يقولك ده كان عصر اضممحلال و اجتاحت فيه الامراض و استشرى فيه الفساد و حكم فيه الحاكم بالضبة و المفتاح
بالظبط كده
ياللا كل عصر و ليه نهايته!!
ايه ده فى حد غيرى قص الشريط
انا ادين واشجب و اعترض
اعتقد ان التاريخ هيستخسر يلطم علينا
اظن الحقبه اللى احنا فيها دى
هتذهب بأكملها لمزبلة التاريخ
و بعدين لما ييجى حد يخلى ولاده يشوفه تدويناتنا الأثريه
هيقول لهم شايفين جدودكم يا ولاد
ياما كتبوا يا ولاد
و ياما اتكلموا يا ولاد
هو ده آخرهم يا ولاد
و مازال الوضع على ما هو عليه يا ولاد
دوركم بقى يا ولاد
يلا يمكن هما يغيروا حاجه
albida
مبروك عليكي الشريط ههههه
غيطيني و صوتي انتي هههههه
على فكره .. انا فعلا مش عارف ازاي نسيت عماد بعرور و سعد الصغير هههههه
ممممم
انتي من لاظوغلي :) اوعي تكوني من اياهم ههههه
ROMIL
وجهة نظر برضه يا زعيم :) بس انا بصراحه مش شايف ان ممكن ييجي انيل من اللي احنا فيه
زي ما قال رسول الله (ص) : توشك تداعى عليكم الامم كما تداعى عليكم الامم .. قالوا امن قله نحن يا رسول الله .. قال بل غثاء كغثاء السيل .. إلى اخر الحديث
يعني انا حاسس اننا بقينا كده .. و الرسول نفسه وصف الوضع ده و كانه فعلا مصيبه
هوه احنا مش في مصيبه ولا ايه :))
مش فاهم حاجه
هريحها حاضر :)) لو مكنتش تحلف بس ههههه
DR.SHERBO
رؤيتك للمستقبل منوره و زي الفل :) بجد انا كان معايا كل حاجه بس ناقصني جرعه التفاؤل دي .. اشكرك ههههههه
Spellz
ياه يا دكتوووره
حمدالله عالسلامه ههههه
خلاص اوعدك مفيش كآبه تاني .. هنقلبها هلس
الى مزبله التاريخ يا احلى تاريخ
MANO
ابقى تعالي بدري و انتي تلحقي هههه
خلي عندك ثقه في اللي بتكتبيه .. اذا قدر يغير و لو في شخص واحد دلوقتي يبقى انشاء الله بعد عمر طويل لما الدنيا تبقى مسخره اكتر مما هيه دلوقتي اكيد الناس هتقدر الكلام ده ههههه
اقولك كده اريحلهم مش هيبقى عندهم تاريخ يتذاكر :(
بس حرام عليك يا شيخ يعني انا سايبه المذاكرة وقلت اخش افرفش اخش اتنكد اهئ اهئ بس اقولك لو دخلو ع الارشيف هيلاقو حجات كتيرة اوي يعني احنا حاولنا نبقى كلابيز من اجل التغيرر وكده يعني
بس نتكلم جد بقى شوية صحيح هنسبلهم حاجة يعتزوا بيها حاجة احنا عملناها بجد سؤال يستحق التفكير فيه و الاجابة عنه علشان ميبقاش شكلنا وحش قدام احفادنا بعد كده :)
جامد قوي الكاريكلتير
زنجولا
تحفة فعلا البردية الاخيرة دى مناسبة تماما للاجيال اللى جاية اللى هيتعمل فيهم اسوء من كده ولما هيشوف البردية هيقولوا ياااه ايه السذاجة المصرية دى امام تقنيات التعذيب الحديثة
فعلا توفرت امكانيات كثيرة ولكن النتيجة صفر شبه صفر المونديال بالضبط
حاجة تكسف اننا مكملناش السكة اللى بدئها اجدادنا ومعملناش غير لف وارجع تانى بتاعة عاشور (علاء ولى الدين) علشان نبتدى من تحت الصفر يعنى قدمنا كتير علشان نوصل للصفر يا دكتور
تحياتى
nouran
معلش نكدت عليكي يا بنتي :)) بس الواحد كان نفسه فعلا يسيب حاجه حلوه الناس تتكلم عنها بعد كده :) بس الظاهر مفيش نصيب بقه ههههه
innominatex
تسلم يا باشا
TOTA
تسلمي :) رأيك دايما في الاول قبل اي حد
على فكره انا مش فاهم تدوينتك الاخرانيه :) انا تفاءلت و قلت هترجع تكتب بس قريتها كذا مره و مقدرتش اوصل لحاجه
طمنييييني
طنطاوى باشا تسمحلى اخد صوره من الصور الجامده ديه فى البلوج بتاعى عشان التاريخ برضه يا معلم وجميع حقوق الطبع محفوظه للمؤلف
زنجولا الجميل قوى جدا خالص
اشكرك على كلامك اللى انا مش قده يا عم
البوست الاخير كان شكر لكل اللى كتبلى ولا يجوز المزايدة على الشكر بتلقى شكر على الشكر
لذلك اغلقت التعليق فاحب الكلمات الى نفسى انا اكون ممتنة لاشخاص وابلغهم ذلك ولا احب ان اسمع بعد امتنانى لهم شىء اخر
مش عارفة اطمنك لانى اساسا مش مطمنة
:) تحياتى
هههههههههههههههههه
بردية العسس
ههههههههههههههه
و الله يا دوك انت دماغ
من كتر مانت دماغ و الله بدأت أخاف عليك
انت موظف قد الدنيا دلوقت
خاف على مرتبك المهول لو سمحت
yasser
اتفضل البلوج كله لو عايز :) انا بصراحه زهقت منه هههه
منوررر
TOTA
مردتيش على سؤالي برضه :) هتكملي معانا انشاء الله صح ؟؟
قوليلي اه عشان نبدأ الافراح و الليالي الملاح :) هعملك حفله متعملتش على البلوج هنا بس انتي انوي هههه
Sooosa
منوره بيتك التاني يا ست الكل هههه
ايه يا بنتي .. كل ما حد يشوفني يقولي خايف عليك .. ما نا بطلت شقاوه و بقيت موظف درجه سابعه .. اعمل ايه تاني بس :(( خلاص هعتزل و اقعد افصل باترونات جلاليب و كوافيل .. حلو كده هههههه
هههههههههه
الصور جميلة أوي
بجد انت مبدع
اما عن التاريخ هيحطنا فين او هيعمل فينا ايه ؟؟؟
توته توته
يا ستي الله يكرمك :) ولا مبدع ولا حاجه ده كله في الكلتش ههههه
السلام وعليكم.. ادخلوا وشوفوا الراجل ده .. انا اصلي وانا اقرا في قصته والله كنت بعيط.. شوفو شوفو htpp://h0e.blogspot.com/
السلام وعليكم.. ادخلوا وشوفوا الراجل ده .. انا اصلي وانا اقرا في قصته والله كنت بعيط.. شوفو شوفو htpp://h0e.blogspot.com/
عذرا لاولادنا واحفادنا لان هذا هو التطور الطبيعى للحاجة الساقعة
Post a Comment