بوابات .. فيها تخريفات

تحديث

تم إضافه كاريكاتيرات جديده

في آخر التدوينه

-

--

بوابات .. كل بوابه فيها تخريفه .. و اذا خرف طنطاوي .. اعرف انه لسه بيمتحن .. و اعرف انك ممكن تمشي مضايق .. بس اهم حاجه .. انك مش هتقدر .. تدعى عليه .. لانه غلبان و النعمه و مش ناقص

_____________________________

-

باب اجتماعيات

ليه سهل علينا ننقد الناس اللي الكل اتفق على نقدهم .. بينما بيكون صعب جدا تنقد حد اتفق الجميع على انه كويس و بن حلال .. مش فاهم .. طيب افهمك .. لو كنت واقف في محطه اتوبيس و الاتوبيس اتأخر .. و فكرت للحظة انك تشتم المسؤول عن الواقعه دي هتقول .. يخرب بيت الريس و سنينه .. مش هيتردد الراجل اللي شايل الجرنان جنبك انه يقفله و يبصلك و يقول ملعون دنيا و اخره اللهي يرميه في جهنم ميرجع منها تاني .. و لن تتردد الحاجه اللي واقفه وراك انها تقول .. منه لله كيلو البصل بقه بخمسه جنيه اللهي ما يوعى يطفحه .... شفت الموضوع سهل ازاي .. و شتيمه الريس مفيش اسهل منها .. انما لو قلتلك انقد حد تاني .. ممكن تفكر .. و احتمال .. تخااااف انك تتكلم او تنقده حتى لو كان غلطان من ساسه لراسه

خد عندك .. في السياسه .. مين يقدر يتكلم على عمرو موسى .. جورج اسحاق .. ابراهيم عيسى .. جريده الدستور .. هيكل .. منال و علاء .. مالك .. .. الفتيات الوطنيات .. كما وصفهن انا جعان .. و غيرهم و غيرهم .. كل دول ناس ليهم وزنهم في مجالهم .. و كل واحد فيهم ليه انجازات كتير محدش يجرأ يشكك فيها او يقلل منها .. لكنهم في النهايه بشر .. و بيغلطوا .. انما بيبقى صعب اوي انك تفكر تنتقدهم وسط الناس .. يعني كبيره اوي و آخرك يعني انك تقول في نفسك .. كخ عليهم .. و دمتم .. حتى لو عمرو موسى خضع للسلطه و فضل البقاء في منصب سياسي ( الجامعه العربيه الاستهلاكيه ) على حساب افكاره و مبادئه .. وحتى لو جورج اسحاق قلب كفايه الى ( الحركه المصريه الاسحاقيه من اجل التغيير ) .. و حتى لو هيكل .. مازال مصرا على الرقص على السلم .. شويه للنظام و شويه عليه .. و حتى لو مالك و كذا منال و علاء صاحبي المجمع التدويني الشهير اصروا على استخدام الفاظ خارجه في تدويناتهم بحجه انها الفاظ تنطق ف الشارع .. و كأننا بغباغانات مطلوب مننا ترديد كل لفظ السيء و الجيد منها .. وحتى لو اصرت مجموعه بنات على البيات اعتصاما في الطريق تحت مسمى الوطنيه .. بصراحه اول من لفت نظري لهذا الموضوع هو ( انا جعان ) في تدوينه تخص الموضوع ده .. يعني مش لاقي لحد هذه اللحظة مبرر يخلي بنت تبات في الشارع على الرصيف تحت اي مسمى .. خصوصا لو اعتبرت ان البنت دي اختي او امي او مراتي .. معتقدش ان الدين او الشرع او اي تقليد عرفي حتى يقول كده .. و انا حر في رأي قبل ما حد يشتم

بلاش سياسه .. خلينا نهيس شويه .. و نقول سينما و رياضه .. حد يجرؤ يتكلم على عادل امام .. او الاسطوره احمد زكي .. حد يمتلك من الجرأه انه يقول الاهلي غلط .. او حازم امام غلطان .. مع ان كلهم بشر و بيغلطوا .. لكن نخاف ننطق .. يعني عادل امام نجم الكوميديا و انا موافق على كده .. بيضحكني جدا و انا موافق .. لكنه مش اسطوره يتعملها اعلانات بملايين في كل ميدان .. ولا هوه شخصيه مثاليه لانه يجيد التقبيل في افلامه .. يبقى بلاش ننفخه زياده عن اللزوم و نقعد نغنيله و نسقفله في كل مناسبه بطريقه هاله سرحان المستفزه ..هاهاهاهاها ... و الاهلي مهواش فوق الجميع و لا الزمالك قلعه العظماء علشان لما يغلطوا او لعيب فيهم يقل ادبه نداري عليه و نقول معلش ده لعيب .. والامثله كتيره لكن لو حد حاول يتكلم عليهم تلاقي الكل اتقلب عليه

سيبك من ده كله .. و خش عالدين .. مين يقدر ينتقد عمرو خالد .. الشيخ خالد الجندي .. المفتي و مش هقول شيخ الازهر لانه واخد نصيبه بصراحه من النقد و زياده هههههه .. الناس دي كلها علماء و مشايخ على عيني و راسي .. لكن احساس كل واحد فينا انهم ربما يكونوا اكثر منه علما بيخليه يخاف يتكلم لو حس انهم بيغلطوا في حاجه .. و احيانان بتتضارب معلومه بيقولوها مع مبدء ديني معروف للجميع لكن برضه بنخاف نتكلم .. لاننا عارفين اننا ساعتها هنواجه العالم كله .. و مين يقدر على العالم كله يا بشر

-

-------------------------------

باب الطب صنعه

اولا : متلازمه مباركيوزيز

التعريف : هي حاله مرضيه .. تصيب الجسم عامه .. تشمل اعراض نفسيه و جسديه قد تفضى الى الموت

الاسباب : ميكروب مباركيوزيز .. طفيلي يعيش على اسياده حتى يصل الى اماكنهم .. ينتقل بالطيران .. و يهبط في اقرب مكان مناسب للتطفل .. يعيش بجوار الضحيه و يمص دمها .. حتى يتمكن منها في النهايه .. و ينهي حياتها بطلقات في الراس و يجري يستخبى علشان يقعد مكانها في اقرب مناسبه بعد كده

دوره حياه الميكروب : حسب الكتب هي مده لا تزيد عن 4 سنوات و بحد اقصى مدتين .. لكن التطور في جينات الميكروب جعلته يعيش 24 سنه و ربما اكتر .. لكن العلماء يحاولون تدوين هذه الطفره على امل ان تنتهى قبل ان يموتوا همه

الاعراض : نفسيا .. حاله من الاحباط و اليأس الشديدين .. يصاحبها فقدان للشهيه و تقزز من الماء الملوث و الطعام المشع و الفراخ المتأنفلوزه .... أما جسديا .. تبدأ الاعراض بتسارع في ضربات القلب و احمرار العين .. و تستمر لتشمل احمرار و ترهل عضلات القفا و سجحات على الصدر و الاكتاف .. و نهايه قد تصل الى تقرحات في الاعضاء التناسليه و فتحه الشرج .. و اسألوا عماد

العلاج : لا يصرف العلاج من التأمين الصحي و لا وزاره الصحه .. لذا قامت منظمات المجتمع المدني مثل كفايه و المدونات بمحاولات مستمره لتوفير علاج مناسب من خلال ابحاث علميه قامت بها هذه المؤسسات .. و هي محاوله استخدام سلاح الاخبار و نقل الاحداث مباشره لعمل صدمه كهربيه تفيق جسد الضحايا و تنبه جهازهم المناعي لرفض هذا الميكروب .. لكن جميع هذه المحاولات لا تزال تحت التجربه و ربنا يسهل

-

ثانيا : القسطره

القسطره هيه انبوبه بلاستك ملهاش اي لازمه غير انها تعالج حاله احتباس البول .. ربنا ما يوريكو وجعوا .. المهم ان القسطره دي بيعملها اي دكتور نص لبه .. حتى الحكيمات يعرفوا يعملوها .. لكن الجميل في الموضوع اني سألت صديق بيشتغل نايب مسالك عن سعر عمليه القسطره دي .. على فكره .. لغير الاطباء يعني .. القسطره هيه انبوبه بتدخل باستخدام جيل معين في فتحه البول علشان لو في حاجه سداها و البول مش بينزل .. و القصه دي كلها بتتعمل من غير تخدير و في خمس دقايق و اول لما البول ينزل العيان بيقوم يروح .. يعني مش قضيه .. المهم اني سألته عن سعر القسطره .. ف قالي ان القسطره في عياده دكتور عادي ممكن تبدأ من 50 جنيه .. و انها في عيادات الدكاتره الحيتان بتكون احيانا ب200 جنيه و مش الدكتور الكبير اللي بيعملها انما مساعده الصغير .. يعني ادخل عياده عندي احتباس بول و الم رهيب ييجي الدكتور يجيب انبوبه يدخلها و ينزل البول في 5 دقايق و ياخد مني 200 جنيه .. يا بلاش بصراحه انا كنت مستغرب لاقصى درجه و انا بسمع الاسعار دي و المفروض ان ده كاري ههههه .. و بصراحه مش عارف الناس العاديه بقه هتقول ايه .. حسبي الله و نعم الوكيل

-

-----------------------------------

باب البهائيه

و لو انها متستاهلش ان يبقى ليها باب .. و مع حسرتي على كل ما أقرأ من مؤازره لحقوق البهائيين .. واضح و الله اعلم ان بقه في حاله من الصمم عن اي شيء مادام صادر عن الحكومه .. يعني بقت الحكومه شيطان زنديق .. كل فعله و قوله خطأ .. و لأني آخر واحد ممكن يكون في صف الحكومه او مدافع عنها .. لكن الحق يقال .. من امتى بقه يجي واحد يقول انا عايز اكتب بهائي في البطاقه .. و تنظم مظاهرات من مسلمين .. والله مسلمين .. وقفوا تضامنا مع البهائيين .. بالذمه مش حاجه تحرق الدم .. البهائي بحكم الدين .. مرتد .. عارفين يعني ايه مرتد ولا محتاجين حد يعلمهالكو .. يعني الدين و النبي عليه افضل السلام علمنا التعايش مع اهل الديانات السماويه .. عايشين مع الاقباط و حتى اليهود .. و ليس الصهاينه .. في سلام .. لكن انها توصل للبهائيين .. تبقى مسخره و كبرت .. و يبقى على رأي شربيني محرر المصري اليوم .. هييجي يوم الشواذ يقولو عايزين نكتب في خانه الجنس .. سيكوسيكو

ملاحظة : اللى عايز يقرأ فتوى ردة البهائيين من الشيوخ مش من بيتنا يعني .. يقراها هنا

--------------------------------

باب الحب و النحنحه

الحب .. هو امل .. امل ان تقابل فتاه احلامك .. امل ان تراها مره اخرى بمجرد ان تراها للمره الاولى .. امل ان تظل في حياتك .. امل ان توافق على وجودك في حياتها .. امل ان تتقبل ظروفك .. امل ان تقدر حبك لها .. امل ان تقدر خوفك عليها .. امل ان تتفهم غيرتك عليها .. امل ان تسمع صوتها كل لحظة .. لا تكاد تغلق الهاتف الا و تأمل ان تكون هي مكالمتك التاليه .. امل ان تبني حياتك معها .. و لها .. امل ان تكون هي ام اطفالك الذين تمنيتهم .. امل ان لا تكون كل تلك اوهامك الشخصيه .. امل الا تاتي في لحظة وتهدم حياتك .. بكلمه .. لا

-

مهما ببعد قلبي انا وياك

حبيبي عليك .. يطمني

م اللي فيه عنيه بقت شيفاك

و حاسس بيك .. بتلمسني

و هعمل ايه بتوحشني

حبيبي خلاص .. حياتي معاك

وهانت بكره انا راجع

و اه دلوقتي لو سامع

بحبك نفسي اقولهاك و انا ايدي ف ايديك

حبيبي بقولك اطمن

كلامك ليه بيهون

سنين عدت هعيدهالك و انا قدام عنيك

ياللي عشت في حضنك احلى سنين

نسيت انا مين .. ولا بنساك

كل كلمه حب ما بين اتنين

هتوصف ايه .. في لحظة معاك

-

رامي صبري - بحبك

-----------------------------

-

باب مخصوص لابوتريكه و بس

ابوتريكه لعيب .. مفيش عليها خلاف .. أهلاوي .. للأسف .. محترم .. جدا جدا .. لكن و الاهم من ده كله كان لقاء مع منى الشاذلي في برنامج العاشره مساءا .. لقاء قصير لكن ممتع و فيه رساله جميله اوي اوي للي لاحظها

مني الشاذلي في نهايه اللقاء سألت النجم الخلوق و الخجول .. قالتله لما كنت لسه صغير و قبل النجوميه كان نفسك تقابل مين .. ف رد النجم و قال : صالح سليم .. لانه شخصيه متميزه و ليها كاريزما جميله .. ف اردفت منى الشاذلي .. و قالت .. طيب انتو كنجوم بتقابلوا نجوم و مشاهير و رؤساء .. كان مين اكتر شخصيه نفسك تقابلها و مبسوط انك قابلتها .. وطبعا على عكس المصري الاصيل اللي الجهاز العصبي الامركزي عنده كان هيسيب كل السؤال و يمسك في كلمه ( رؤساء ) و يروح قايل اني شرفت بمقابله الاب و القائد و الوالد و الوالده السيد الرئيس محمد حسني مبارك اطال الله عمره .. لا لا .. ابوتريكه مقالش كده .. ده قال .. و بالحرف .. اني كنت سعيد جدا بمقابله الاستاذ عمرو خالد .. و كرر اسمه مرتين .. بالعند فيكوا يا مطأطئ الرأس .. و لما منى الشاذلي حبت تستدرك و عادت السؤال بصيغه اخرى .. على امل انه يقول اسم الريس ولا حاجه .. راح النجم قايل و بكل صدق انه كان يتمنى يقابل الشيخ الشعراوي الله يرحمه .. بالذمه يا ناس .. مش يستاهل يكون .. النجم

-

ملاحظة رياضيه : بوصفي زملكاوي صميم .. فانا مقهور على حال نادي الزمالك .. و في غنى حاليا عن مناقشه حال الزمالك لان اعصابي مش ناقصه .. لكن عندي سؤال صغير .. اذا كان لاعبي الزمالك بيشتكوا من الامور الماليه و عدم حصولهم على مستحقاتهم .. ف ياترى لعيبه الزمالك تعرف ان فريق الكره الطائره .. اللي مخدش ولا مليم من فلوسه .. و بيروحوا البطولات باتوبيس متأجر على حسابهم .. اللعيبه دي .. كسبت النجم الساحلي و بقت بطله أفريقيا للكره الطائره و هتمثل مصر في كأس العالم لأنديه الكره الطائره .. و بدون فلوووووس .. وبدون اضواء اعلاميه .. وبدون مطاردات الصحافه و التلفزيون و المعجبين .. وبدون مدرب اجنبي .. طب اشمعنى يا رجاله فريق الكوره الاعزاء .. اللهم لا اعتراض

-----------------------------------------

-

-
إيه رأيكوا في اللوجو الجديد هههههه
-
______________________________

-
تحديث : كاريكاتيرات من واحد محروق دمه على اللي بيحصل

______________________________
-

الصوره الأخيره بدون تعليق .. كفايه ما قلته سابقا عن .. البهائيييين