ابحث مع الشرطه

الجريمه لا تفيد

-

قمة الهيافه و الفضى الانساني .. ان يتفرغ شخص لكتابه ما بين عشره إلى عشرين تعليق كل يوم في المدونة .. و طبعا لا يخلو تعليقاته الظريفه من سباب بأقبح الألفاظ .. و يبدو ان سيادته يفهم في التدوين لأنه بيدخل بأسماء مختلفه في كل مره .. طبعا أنا مش هزهق من ازاله تعليقاته الوقحه في كل مره هيكتب فيها .. لكن كل ما يضايقني ان يكون زوار المدونه مجبرين على رؤيه مثل هذه الوقاحات

أخيرا .. الأخ صاحب هذا الآي بي ... أشكرك لأنك نجحت في تطفيش الناس من المدونه :)) أرجو أن تكون سعيدا الآن و ابتسامتك البشوشه تملأ يومك و تدويناتك

تـجـــربـتــي

الحقيقه .. حدثت في الفتره الأخيره ظروف متجمعه دفعتني إلى إعادة تقييم تجربتي على الانترنت .. تلك التجربه التي بدأتها للمره الأولى في عام 96 عندما كنت اراقب أبي و هو يتصفح هذه الشبكه .. تعلمت منه الكثير .. و بدأت اجيد استخدامها .. إلا أنني لم اعرف المعنى الحقيقي لوجود تلك الشبكه إلا في العام الماضي .. وتحديدا في فتره الانتخابات الرئاسيه المصريه .. التي كانت تجربه حقيقيه لوعي الشباب المصري و تطلعاته .. دفعتني تلك التجربه الجديده كليا عليّ و على جيلي أن ابدأ في كتابه افكاري على الانترنت .. لم اكن وقتها اعرف طريقه مناسبه للتعبير .. فلم اكن املك تفكيرا مرتبا يعينني على اخراج افكاري التي تزاحمت في رأسي بشده .. وقتها فقط قررت أن استخدم اسما مستعارا .. و هوه من أحد اكثر الاشياء التي امقتها .. وقتها قررت استخدام اسم طنطاوي .. ودشنت موقعي الالكتروني الأول على الانترنت .. بدأت الرسم بقوه .. بحماسه كبيره .. وبرغم تعقيدات الرسم باستخدام الكمبيوتر .. فأن التجربه كانت جدا ممتعه .. أغرتني للاستمرار خصوصا في ظل الاقبال الكبير الذي شهده الموقع وقتها .. كلمات كثيره ألهبت مشاعري و حماستي .. جعلتني استمر بدايه من شهر يوليو و حتى شهر سبتمبر من العام نفسه .. كانت تلك التجربه فريده من نوعها بالنسبه إلي .. لم أكن افكر وقتها في اي نشاط قد يمس الحياه السياسيه .. كان لدي خوف منطقي إلى حد ما من كل ما يمس هيبه الدوله .. لكنني اليوم و بعد كل تلك الفتره .. اقتنعت برأي براء حين قال في احد تدويناته .. يبدو أننا أقل من ان يهتم لنا رجال امن الدوله في مصر .. المهم .. ان تلك الفتره حملت لي الكثير من الرياح التي غيرت اتجاه سفينتي .. احببت فيها شقاوتي .. تدافع الافكار في رأسي .. غزارة انتاجي .. عشقت تعليقات الناس .. و دعواتهم لي .. احببت تنوعي في الرسم و الكتابه .. احببت تداخل الافكار و تكاملها في مخيلتي ... لكن في الوقت نفسه .. تركت لي تلك التجربه معاني تبدو لي سلبيه إلى حد كبير .. كشفت لي سذاجتي و حماقتي في اوقات كثيره .. منها على سبيل المثال اندافعي وراء عاطفه المحيطين بي .. من كراهيه النظام و نقده .. التي جعلتني في بعض الاوقات ارسم بطريقه (هايفه) بعيدا عن النقد المنطقي و الموضوعي .. و للأسف اعجب الناس بتلك الهيافات و شجعوني على الاستمرار فيها .. أنا لا اتبرأ من كل ما رسمت لكنني و الحق اكتشفت انني رسمت بعض الاشياء التي تصنف في خانة الاهانه و الاستهزاء اكثر منها خانة النقد و الرغبه في الاصلاح .. ربما يبرر ذلك حماستي .. حداثة سني .. لكنني لا انكر ان تلك الافكار كانت سببا في توقفي عن اصدار طنطاوي مره اخرى .. كنت احتاج إلى اعاده تفكير .. إلى ترتيب افكاري .. إلى النضج السياسي الذي كنت في أمس الحاجه إليه .. لم أكن ارغب في الاستمرار كدمية .. يحركها المحيطون بي كيف يشاؤون .. كان يجب ان امتلك رؤية سياسيه خاصه بي .. و افكارا نابعه مني .. متأثره بالشارع المصري و ليست مصنوعه منه .. وبعد توقف لمده تزيد عن السبعه اشهر .. فكرت في العوده مره اخرى .. في شكل جديد .. قد اسميه شوقا للرسم و الكتابه .. او شوقا للانترنت .. لكنها في النهايه رغبه اكيده في التواصل مع الناس مره أخرى

بعد انتهاء تجربه طنطاوي .. بدأت الكتابه مره أخرى .. تحت اسم مستعار للمره الثانيه .. وهو زنجولا .. اسم كوميدي إلى حد ما .. يلفت الانتباه .. يحبه اصحابي .. لذا لم أرى مانعا من استخدامه من جديد .. كانت اقسي نقاط تلك التجربه هي استخدامي لاسم مستعار للمره الثانيه .. في محاولات مستمره لتوفير مناخ آمن نوعا ما .. يعطي لأهلي على الأقل بعض الطمأنينه و يمكنني من الكتابه مره أخرى .. ربما كان الخوف في المرحله الاولى يصل لمرحله الرعب .. جعلني اتشبث في اسم طنطاوي .. لكن هذه المره .. كانت رغبه اهلي هي الدافع الوحيد لاستخدام ذلك الاسم المستعار .. ربما لأني لم اعد اجد بدا من استخدام هذه الاسماء .. بل و تولدت لدي رغبه في كتابه اسمي بكل وضوح .. لم أعد أخشى ما يحدث .. ولم تعد عندي تلك الرهبه التي كانت موجوده في المره الاولى .. المهم .. بدأت التدوين و حاولت التغيير من اسلوبي .. كنت احاول دائما ان اثبت لنفسي ان ما قرأته خلال تلك الفتره كان كافيا لايجاد نوع من المجال السياسي الشخصي الذي يمكنني من بناء رؤى سياسيه شخصيه .. و كنت ايضا حريصا على ايجاد التنوع ما بين التدوينات حتى لا افقد روحي التي تهوى الرسم .. الشعر .. الرومانسيه .. كنت اود دائما ان احافظ على تركيبتي الشخصيه و ألا ادفن نفسي في خانة السياسيه .. و السياسه فقط .. وبعد مرور حوالي أربعه اشهر على وجود مدونتي الشابه .. امتلكت مجموعة رائعه من الاصدقاء و الزوار .. الحمدلله .. ربما لم يصل ذلك العدد إلى نفس ما كان في موقع طنطاوي .. لكن الحقيقه انني لا استطيع وصف سعادتي الآن .. فبعد ان كنت اعمل في طنطاوي وحيدا .. بدون أصدقاء .. بدون جو عائلي مثل الذي صرت امتلكه الآن .. صار لي عالم رائع .. مزيج من الاصدقاء و الاخوه .. نفكر معا .. نكتب و نتواصل معا .. نعبر عن آراءنا سوية .. اعتقد ان ذلك هو ما كان ينقصني دائما .. و هو ما وجدته في مدونتي
-
الخطوة التاليه .. لا أعتقد انني اعرفها بعد .. فأنا على بعد خطوات من التخرج إنشاء الله .. اعتقد ان مجالي كطبيب لن يمنحني من الوقت ما يكفي لتحقيق طموحاتي كرسام كاريكاتير أو كاتب ساخر .. كم كنت أتمنى إعاده اسطورة صلاح جاهين مره اخرى .. و لو بصورة مبسطه .. كنت اتمنى اعاده تجسيد دور الشخصية المتكامله .. رسام .. شاعر .. قصصي .. كلها تعمل سويا في اسلوب ساخر .. تنقد بعين فاحصه .. و تعبر بطريقه مرحه عن مشكلاتنا و أزماتنا .. الآن و أنا على اعتاب التخرج .. بدأ ذلك الحلم في التبدد .. فلا الصحافه ظلت في عيني كما هي .. و لا أنا صرت نفس الشخص الطموح .. ولا المجال امامي مفتوح كما كنت اتمناه
صحافتنا المصريه التي كنت أعول عليها كثيرا .. كشفت لي في مراحل متعدده عن عجز مطبق .. فبعد تلاشي أحلامي في جرائد مثل ايامنا الحلوه الصادره عن الاهرام .. و اضحك للدنيا .. و أخيرا مهازل الدستور .. بدأت اتيقن ان تلك الصحف و اجواءها لا تناسبني في أي حال من الأحوال .. و السبب معروف للجميع .... أما افكاري فقد بدأت للأسف تأخد لون اليأس .. صارت دائما تسخر و تسخر بدون توقف .. بدأت أخشى اكون سببا في زياده هموم الناس و آلامها .. و أخيرا .. بدأت ادرك انني مقبل على كوني طبيب .. ان امامي تحديات كثيره في هذا المجال لا بد أن اوفيها .. لا بد من استكمال دراساتي .. لابد من البحث و التعلم .. بعيدا عن الطريقه الهزليه التي كنا نتبعها في ايام الدراسه الجامعيه .. لذا .. فأنا اعتقد ان تقييمي لتجربتي كامله .. ستتوقف خلال اشهر معدوده .. حين تبدأ الحياه في جرفي بعيدا عن كل هواياتي و طموحاتي الفنيه و الادبيه .. لتصب اخيرا في مجال العمل .. و بناء الاسره .. لكني اعلم جيدا .. انني حققت في تلك المرحله الكثير مما كنت اتمناه .. وبرغم السلبيات الكثيره التي سجلتها على نفسي و مازلت امتلك بعضها مما لم ابح به .. الا انني فخور باني شاركت يوما ما في هذا العالم .. و في هذه الطموحات و الآراء الشبابيه جدا

نفسك في إيه

مزاجي مش تمام اوي علشان ارجع اكتب علطول

فقلت ابدأ برسمه كاريكاتير و خلاص اهي حاجه الواحد يحس بيها انه لسه عايش و في نفس الوقت مش محتاجه نفس مجهود الكتابة

الديزل الاسباني .. ينادي

ركبت امبارح الديزل الاسباني من اسكندريه للقاهره .. في تحد سافر للمنطق اللي بيقول .. محدش يركب وسيله مواصلات لسه عامله حادثه امبارح يا زبون .. لكن العند وحش .. اصريت اني اركب نفس وسيلة الموت اللي الناس ركبتها .. و اللي هتعدي على نفس النقطه اللي حصل فيها التصادم .. والحقيقه كانت رحله ممتعه ينقصها الصور .. لأن الدنيا كانت ظلمه جدا لدرجه اني معرفتش اصور اي حاجه

البدايه كانت تأخير في ميعاد القطار لمده 10 دقايق .. سماها عم أحمد اللي قاعد على الرصيف انها روتين عادي .. لكن هتلاحظ اجراءات غير عاديه .. يعني على الرصيف رجاله بملابس مدنيه و لاسكليات ماشيين يدوها الوهات و حول يا جدع .. و بمجرد ركوب القطار بقه الكمسري يبص للكانز اللي ف ايدي و كانه يا عيني من كتر الرعب و الفرجه عالآخبار خايف ليكون فيه قنبله .. المهم اني ركبت القطار الاسباني الفاخر .. بصراحه انا مركبتش قطارات من زمان .. لكن عربة الدرجه التانيه في الاسباني لأول وهلة تبدو نظيفه جدا جدا .. و إن كانت المفروض انها مكيفه لكن الجو كان إلى حد ما معتدل بدون وجود رياح او اتربه .. و الحمدلله .. الممتع في الموضوع .. ان القطار في معظم الرحله كان بيزحف .. اه والله .. على غير عادته .. يعني المفروض الاسباني ده قطار لبلب .. بيطير .. لكن الراجل كان بيهدي قبل كل مزلقان يقابله .. و لك ان تتخيل عدد المزلقانات .. و مش بس كده .. ده قبل ما يدخل رمسيس هدأ سرعته لدرجه خلت ناس كتير نزلت منه بمنتهى السلاسه .. حاجه تشل بصراحه .. الناس دي معندهاش وسط .. يا إما يطيروا .. يا إما يزحفوا .. طقت في دماغي فكره اني اقوم و ادخل كابينه الجرار في القطار و اتكلم مع السواق و اخد صورتين لزوم الحبكه الصحفيه .. و بمجرد ما وصلت للعربه اللي قبل الجرار .. لقيت واحد طالع من تحت الارض يبقولي عندك يا أستاذ .. انت رايح فين .. شرحتله اللي انا عايزه و ده كانه مسكته الكهربا .. و هاتك يا الوهات في الاسلكي اللي معاه لحد لما وصل ناظر القطار و اصر انه يوصلني الكرسي بتاعي بنفسه .. و كأني داخل كابينه طياره البريتش أيرويز .. مش ديزل مصري .. المهم .. فشلت التجربه .. اكملكوا بقه .. طول الرحله قاعد جنبي واحد ماسك جرنان روزاليوسف .. و اعتقد انه الوحيد اللي اشتراه من الست بتاعت الجرايد .. و كان فيه مواضيع خنيقه جدا .. استطعت من على الكرسي بتاعي اني اقرأ معظمها برغم اني لم المس الجريده .. منها موضوع واحد اسمه جمال سليمان قاعد يدادي لجمال مبارك .. بس بصراحه كان في موضوع جامد جدا للغيطاني .. بيتكلم فيه عن الثقافه في مصر .. و بيتهم الاخوان و السادات بانحدار مستوى الثقافه في مصر !! .. المهم .. انا قعدت طول الرحله اسمع جنات .. ومحدش يتريق .. لأن جنات بالنسبه لي هي ام كلثوم بالنسبه لأبويا و جدي .. صوتها بيطربني .. و أغانيها قادره على زحزحه حيطان المشاعر داخل قلبي .. لما بتقول .. آه على اللي انا حساه .. بكون انا نزلت في آخر الكرسي .. و لما بتقول .. لما بقابل حد يتكلم عليه بضحك عشان بخاف عنيه يدمعه .. بتكون عنيه فعلا بدأت في الصياح معلنه ثورة الدموع .. اللي الحمدلله بعرف امسكها قبل ما تنزل و يتقال عليه .. فرفوووور .. المهم .. وصلنا لمحطه قليوب .. في نفس مكان الحادث .. و القطار هدأ جدا جدا .. كأنه بيقول للناس اتعظوا .. و بصراحه الناس كلها كانت متعظة عالآخر .. و أولهم انا .. طفيت الأغاني .. و قعدت ابص من الشباك زي محدث النعمه اللي اول مره يشوف موقع جريمه .. و بعد ما وقفنا في قليوب .. استأنفنا المسيره نحو القاهره .. وصلنا الحمدلله لرمسيس .. و بمجرد ما نزلت .. لقيت صياح عجيب من البنات .. هااا هووو .. وعاملين دايره كبيره اوي .. طبعا حماستي الطبيه اخدتني و عملت فيها عربيه اسعاف من غير سارينه و طلعت اجري اشوف ايه الموقف .. المهم عقبال ما وصلت لقيت صوت الزعيق زايد عالأخر .. و كل اللي واقفين بنات .. فبسأل احد الاخوه اللي واقفين يتفرجوا .. فقالي ده مغني من اياهم موجود هنا .. و البنات واقفه تصوره .. بصراحه .. بدون حقد ولا غيره .. افهم ان البنات تتلم على مغني ( من إياهم ) علشان تتصور معاه .. لكن نفسي افهم .. بيصوتوا ليه .. الله اعلم

للبيع يا مصري

إضغط الصوره للتكبير

-

للبيع .. موطن مصري .. فرصه العمر للمستثمرين .. بمبلغ خيالي .. مواطن مصري مقابل 5000 جنيه فقط .. يعني مالآخر محصلش شكمان عربيه مرسيدس من اللي بيركبها اي زير من وزارة نظيف .. للدرجه دي بقينا رخاص في بلدنا .. و الحكومه شايفه ان روح المواطن المصري اللي ركب القطار علشان يروح شغله الساعه 6 صباحا .. و أكيد كان نايم في كرسيه .. مش مخون حكومته .. و لا عمره فكر ان نهايته تكون بطريقه بشعه زي اللي حصلت في قطار قليوب .. والحكومه هتقولك هنعمل لجنه منبثقه من لجنه منبثقه عن لجنه للكشف عن ظروف الحادث المسخره .. عموما الناس ماتت و بعد تزاحم الاخبارهتيجي الحكومه تصرف لأهله بعد ما يموت 5000 جنيه مصري .. إيه رايك ؟؟ بصراحه .. يا بلاش .. على كده الـ70 مليون مواطن مصري يساووا حوالي 350 مليار جنيه .. يعني حاجه تفرح .. ممكن واحد زي نجيب سويرس يدوس الشعب المصري كله بعربيته و يدفع ديتهم 350 مليار جنيه .. ياااا بلاااااش . عموما .. نصيحه للي ناوي يموت بعد كده .. يركب عباره احسن له .. على الاقل هياخد 20 ألف جنيه .. بدل الـ5000 اللي مش جايبين همهم .. و اهي موته ولا اكتر .. ما هي دي التسعيره الجديده للمصريين .. و لسه بانتظار المزيد من الاخبار اللي تحرق الدم .. يعني كلها كام يوم و ييجي اونكل بوش يقولك ان المخابرات الامريكيه سمعت سواق القطار التاني بيقول في سره لا إله الا الله .. و انه ارهابي ابن ارهابي ... و بكره بابا مبارك ييجي يقولنا : صدقتوا ان القطارات محتاجه تعديلات و ان الزيادات اللي حصلت في التذاكر مش كفايه .. يبقى لازم نخصخص السكه الحديد .. و فلان الفلاني اللي هيسكب في المزاد يا ولاد الكلب و ان كان عاجبكم .. و كله علشانك يا مصر

-

للبيع .. هضبه الجولان .. د/ محمود جامع .. الطبيب صديق السادات .. قال انه سمع السادات بيقول ان الجولان اتباعت في عهد حافظ الاسد .. لصالح الاسرائيليين مقابل انسحاب قواته بدون معارك .. ولأني اعرف د/ جامع .. فأشك انه يكون مختلا .. كما ستبادر مصر إلى الاعلان قريبا لتجنب اي مشاكل مع الاخوه السوريين .. و الله اعلم .. مين تاني باع ايه .. او هيبيع ايه

-

وزارة جديده .. اقترح انشاءها في مصر .. اسمها وزاره الدفن و الجنازات .. والحمدلله ربنا مبتلينا بحوادث زي الرز .. اشي طيارات و عبارات و قطارات و سيارات ومسارح و مستشفيات .. من كله .. و على عينك يا تاجر .. و الحكومه لأول مره في حادث قطار قليوب الحالي .. تعلن رسميا تكفلها بمصاريف الدفن و الجنازات لشهداء الحادث .. بصراحه .. قشطه يا ريس

رؤساء هزاز

اضغط الصوره للتكبير

حصريا .. شوكلاته حزب الله

حصريا .. حصريا .. حصريا .. حصريا .. حصريا .. حصريا .. حصريا .. حصريا .. حصريا .. حصريا .. حصريا .. حصريا .. حصريا .. حصريا ..


- بعتلي اصدقائي في طنطا صور لحركة جميلة جدا.. عملوها امبارح الخميس .. جابوا بنبوني و شوكلاته و حاجات من الحلوه اللي بحبها دي .. و نزلوا وزعوها على الناس في الاشارات الرئيسيه في المدينه .. و لأنها حركة جديده و أول مره تحصل في مصر فبصراحه عجبتني جدا .. ولولا ظروفي كنت رحت و شاركت معاهم .. جمال الحركه دي إنها كانت بدون ما يعملوا تجمع من النوع اللي يسمح بحدوث احتكاكات مباشره مع الامن .. و في نفس الوقت بذكاء تام عملوا اللي همه عايزينوا .. كانوا عايزين الناس تفهم ان حزب الله حقق شئ .. و انه يستحق اننا نحتقل بيه .. و إن طعم الاحتفالات الحقيقيه يختلف عن احتفالات كأس الأمم أو احتفالات ستار اكاديمي .. دي احتفالات كرامه و عزة يمكن يكون جيلنا ده كله محسش بيها ولا مره .. و احلى حاجه رد فعل الناس اللي كانت بتاخد و هيه مبسوطه من غير ما يخافوا كالعاده .. ألف مبروك يا حزب الله .. و عقبالنا .. و إن شاء الله نلاقي الصوره دي في كل اشارات المحروسه .. أترككم مع الصور
-------------------------
اضعط الصور للتكبير
------------------------

الصور مرسله من صديقي د. محمود

أسرار الولاد

مش عارف ليه تخيـّـلت ايناس الدغيدي و هيه بتقدم فيلم اسرار البنات .. انها هتعمل فرقعه جامده .. مع ان الفيلم مفيهوش لا أسرار و لا نيله .. انما حكايه هايفه زي اللي بنات ضايعه كتير بتعملها كل يوم .. وفكرت في اكتر من مناسبه اكلم الست ايناس و اقولها تعمل فيلم اسمه اسرار الولاد .. وانا مستعد اكتب لها السيتاريو و الحوار .. على اساس ان الواحد بعد ست سنين في الكليه قدر يكون وجهة نظر لا بأس بيها في اسرار الولاد .. واول سلسله من افلام اسرار الولاد هتكون اسرار ولاد دفعة سنه سادسه طب .. دفعتي المبجله اللي افضالها مغطيه عليه و على ولادي .. و ولاد ولادي .. المهم .. اكبر و اهم اسرار الولاد في دفعتي .. هيه التراياد .. و التراياد للناس اللي علامها على قدها .. يعني الثلاثيه .. و الثلاثيات في الطب اكتر من ثلاثيات نجيب محفوظ و الخيام .. ده لو كان ليهم ثلاثيات .. نعود مره اخرى للثلاثيه .. فثلاثيه طلبة طب الاعزاء هي انهم .. مبيذاكروش .. بكروش .. مبيعرفوش .. حد فاهم حاجه .. أفهمكم بما أني احد مخترعي هذا التراياد

النقطه الاولى .. مبيذاكروش .. هتستغربوا .. و تقولوا طلبه طب دحاحين و صميمه و مواس مذاكره .. لكن كله كلام فاضي والله .. وإسألوني أنا .. الدفعه متقسمه تلات اجزاء .. جزء عارف اهدافه و فاهم الطب صح .. دول اللي بيجيبوا مذكرات و كتب علميه كبيره علشان يذاكروا منها و يكونوا دكاتره بواقعيه ... بينما النص التاني و هوه اللي متعلق بين بينين .. زيي كده .. بيذاكر على قد الحال علشان يجيب تقدير كويس و خلاص .. يعني جيدجدا و دمتم .. اما النص التالت و الاخير .. فهو اللي بايع القضيه و مقضي اليوم انه بيروح ياخد غيابه الصبح في الكليه وبعديها يطلع يقضي اليوم على القهوه و يروح بليل ينام .. ليله فل يعني

النقطه الثانيه .. بكروش .. ودي بقت فعلا مصيبه.. شباب الدفعه .. تخين و رفيع .. بقوا كلهم ليهم كروش .. كروش من نوع ( حامل في الشهر التامن ) مش اي كرش يعني .. متفهمش بقه ده سببه الاكل ولا قلة الحركه ولا ايه بالضبط .. المهم في الآخر ان الشباب كله بقه ليه كرش محترم يشرفه .. و يمشي قدامه .. يفيده انه يركن عليه أو يسند عليه وقت الزنقه .. واهه كله يستفيد
النقطه التالته .. و هي تبدو في خارجها .. قبيحه .. لكنها أكثر براءه مما تتصوروا .. فكلمه مبيعرفوش معناها .. انهم معظمهم عزاب .. لسه نداء النداهه لم يأتي .. لسه كل واحد في حاله .. برغم ان زملاءنا في باقي الكليات .. اللي خلصوا .. بقوا كلهم اباء لأبناء .. مش لسه شباب كتكوت بياخدوا مصروفهم من أهاليهم .. حاجه تفرح مش كده .. لكن الحمد لله .. الشباب قرر أخيرا أنه يعدي المرحله دي .. بمعنى آخر .. اتسرعوا .. وكل واحد بقه عايز يلحق ـ بالنص كده ـ يلاقي واحده يتجوزها .. كله شغال فرز وتنقيه علشان يلاقي بنت الحلال .. وانا من مكاني بحاول احذرهم و انبهم .. لكن تقول لمين .. شرحتلهم كتير المشاكل اللي هتحصل .. و قلتلهم الخلاصه انك هتلاقي الخطوبة - بما انه لسه محدش فيهم اتجوز - عامله زي اكله المانجه .. في الاول بتكون مستعجل و مستلذ بالعمليه .. و تقعد تحضر الفرشه حوليك و تجيب العده و تشغل اغنيه لسعد الصغير و تقول يا هادي .. لكن بمرور الوقت و اللغوصه في طبق المانجه .. بتكتشف فجأه ان عندك مغص فتاك .. و إنك متغرق من فوقك لتحتك بالمنجه .. و انك حاليا ملزق و كأنك لسه طالع من برطمان عسل ابيض .. ترجع ساعتها و تقول يا رتني ما كلتها .. يا رتني ما اطافست .. بس بعد ايه بقه .. ماهو اللي حصل حصل

نهايه .. انتظروا فيلم أسرار الولاد في جميع قاعات العرض و دور السينما .. ينصح بمشاهده الفيلم لمن هم دون الـ30 سنه و ينصح كذلك بتناول فيشار بالشوكلاته مع الفيلم .. انتظرونا .. اسرار الولاد .. مش هتقدر تغمض عنيييييك

بريل الجديد .. نظافة ولا الاحلام

اضغط الصوره للتكبير

-

سيادة فخامه رئيس وزراء مصر المعظم .. الدكتور / أحمد نظيف

وطي شويه علشان تعرف تسمعني

بمناسبه زياده اسعار الجاز و البنزين

و صعوبه الانتحار باستخدام الكيروسين

ووجود قوات الانقاذ النهري مستعدين

و غرق العباره اللي كنا عليها معتمدين

في موته كريمه بعيده عن الكلاب المسعورين

فإني اطالبكم بعدم رفع الدعم عن زيت التموين

حتى تصيبنا الجلطه و نلاقي ربا كريم

-

زنجـــــــــــــــــــــــــــــــــــــــــولا

-

Tag !!

مؤتمر صحفي لرئيس الوزراء د. زنجولا و وزير الدفاع م. نوران

-------------------------------------------------------------------

-

وزير الدفاع : هل انت راض عن مدونتك شكلا وموضوعا
رئيس الوزراء : رضاي عن مدونتي معناه انها حققت الهدف منها .. و انا من اول يوم كتبت فيه المدونه كان هدفي هو ترتيب افكاري اللي بتكون دايما عامله زحمه في دماغي مش عارف ازاي اخرجها و مش عارف ازاي اوظفها صح .. بحب الرسم و كتابه الشعر و كتابه التعليقات السياسيه .. و كل ده مكنش ممكن يظهر في شكل منسق إلا من خلال مدونة أو موقع .. و ده اللي حصل دلوقتي .. وطالما بقيت قادر اني اكتب و ارتب افكاري و احول الطاقه اللي في دماغي الى مواضيع و تدوينات .. يبقى مدونتي حققت الهدف اللي كنت عايزه منها

-
وزير الدفاع : هل تعلم اسرتك الصغيرة بأمر مدونتك
رئيس الوزراء : عارفين .. و بيتفرجوا عليها من وقت لأخر .. لكن الحقيقه مش واخده اهتمام منهم .. او مش موضوع حوار يومي يعني .. هيه مجرد ان ابنهم بيكتب حاجات تودي في داهيه عالنت و خلاص .. وطبعا الامر لا يخلو من نصيحه بترك الليله دي كل فتره

-
وزير الدفاع : هل تجد حرجا ف ان تخبر صديقا عن مدونتك
رئيس الوزراء : انا مش بكتب تدوينات شخصيه كمعظم المدونين علشان اتكسف .. انا موضوعاتي غالبا موضوعات عامه .. و علشان كده مش عندي اي مشكله ان حد ياخد الموقع لكن الفكره انه اصدقائي من خارج وسط الانترنت هم اطباء للغايه .. لا يشغلهم النت و سنينه .. و لا تشكل السياسه اي جزء من حياتهم

-
وزير الدفاع : هل تعتبرها امرا خاصا

رئيس الوزراء : سبق و رديت على هذا السؤال

-
وزير الدفاع : هل تسبب المدونات بتغير ايجابي لافكارك؟اعطني مثال ف حالة نعم
رئيس الوزراء : حدث ذلك في مرات عديده .. يعني من وجهة النظر السياسيه المدونات غيرت وجهة نظري في حركات مثل كفايه و الاخوان و غيرهم .. لما كنت بتابع التحركات اللي بتحصل اول بأول من خلال مواقع زي الوعي المصري و نورا يونس .. المدونات غيرت وجهة نظري الفنيه .. لما لقيت ان كل ما ارسمه و اقدمه .. و اللي كان يعتبر في وسط المحيطين بي معجزات .. هو لاشيء من افكار شباب كتير شفت اعمالهم على الانترنت .. ناس فعلا موهوبه .. ناس تخليكي عايزه تغيري .. تتطوري .. وتجددي من نفسك .. المدونات غيرت وجهة نظري اجتماعيا في تعاملاتي مع الناس .. في اني كنت دايما بتدلق على اي شخص و اطلب صداقته .. في حيث ان ناس كتير متستاهلش انك تطلبي منهم ده .. بالعكس في لحظة ممكن تكتشفي انهم كانوا بيحاولوا يأذوكي بدون ما تشعري

-

وزير الدفاع : هل تكتفي بفتح صفحات من يعقبوك بردود ف مدونتك ام تسع لاكتشاف المزيد
رئيس الوزراء : لأ طبعا .. و الدليل اني فتحت مواقع رائعه زي سوسه المفروسه .. ابيتاف .. هاشم .. و غيرها من غير سابق معرفه بالاشخاص دول .. و يمكن ان وجودي في مدوانتهم هوه اللي خلاهم في يوم من الايام ضيوف عليه في مدونتي

-
وزير الدفاع : ماذا يعني الك عدد الزوار ...هل تهتم بوضعه

رئيس الوزراء : مش هكدب عليكي في أول يوم من المدونه .. كنت بدور بهستيريا على عداد للموقع .. كنت مهتم جدا اعرف كام واحد بيدخل كل يوم .. و كام واحد منهم بيسيب تعليقات و غيره .. لكن شويه شويه .. رجعت للهدف الاساسي من الموقع زي ما قلت قبل كده .. انا بكتب لنفسي .. لا يهمني عدد الزوار بقدر ما يهمني ان كل ما اكتبه يكون هوه انا .. شخصيتي بدون رتوش .. بدون حساب لأحد .. أو خوف من سلطه او قوة اخرى

-

وزير الدفاع : هل حاولت تخيل شكل اصدقائك المدونين
رئيس الوزراء : ههههههههه .. سؤال تحفه جدا .. لأني فعلا حاولت كتير اتخيل ناس من اللي بكلمهم .. بس مش هضحك عليكي .. اصبح لدي قناعه غريبه .. بأن اي مدون او مدونه من العباقره .. او من المؤثرين .. لن انتظر ان اجد امامي عمر الشريف او سعاد حسني .. بقى عندي شبه تأكيد على ان المبدع غالبا .. شخص قبيح .. منظره مفشكل .. يعني .. بقيت اربط دايما بين التميز الخارق للعاده و بين ضعف في الصفات الجسديه و الشكليه .. مقارنه ساذجه انا عارف .. لكن الموضوع بقه عندي كده .. على سبيل المثال .. تخيلت ان مجموعه كلابيز من اجل التغيير .. هم كلهم من الشباب الكلبوز .. اللي بيعرق بسبب و بدون سبب .. اللي ميقدرش يقعد على النت من غير مج في ايده .. و كيس شبسي .. او شوكلاته سايحه عمال يلحس فيها ليل و نهار

-

وزير الدفاع : هل ترى فائدة حقيقية للتدوين
رئيس الوزراء : بالنسبه ليه انا شخصيا .. زي ما قلت ... حققتلي الفائده المرجوه منه .. أما بالنسبه للتدوين عامه .. فهو عالم مستقل بذاته .. له كثير من المميزات و العيوب

-
وزير الدفاع : هل تشعر ان مجتمع المدونين مجتمع منفصل عن العالم المحيط بك ام متفاعل مع احداثه
رئيس الوزراء : هوه صوره مصغره منه .. نفس التجربه المصريه .. ناس متفاعله .. لكن جواهم الشخصيه المصريه اللي بتشوفيها في اي مكان .. نفس المشكلات و الاستفزازات

-
وزير الدفاع : هل يزعجك وجود نقد ف مدونتك ام تعتبره ظاهرة صحية
رئيس الوزراء : انا اعشق النقد .. و اكره الجدال .. ده باختصار شعوري اتجاه الكومنتات الموجوده

-

وزير الدفاع : هل تخاف من بعض المدونات السياسية وتتحاشها؟ هل صدمك اعتقال بعض المدونين؟
رئيس الوزراء : هههههههههههههه .. لا تعليق .. ابتسم .. أنت مع زنجولا

-
وزير الدفاع : هل فكرت بمصير مدونتك حال وفاتك

رئيس الوزراء : ههههههههههه .. محدش يعرف الباسوورد .. لكن في شات بوكس .. يعني اكيد واحد بن حلال من صحابي هيعدي و يكتب الخبر .. و الفاتحه هتبقى منكم بقه

-

وزير الدفاع : تحب تسمع أغنية إيه- بلاش صيغة آمال فهمى دى - ما الاغنية التى تحب وضع اللينك الخاص بها فى مدونتك
رئيس الوزراء : بعيدا عن السياسه و القلق .. احب اسمع اغنيه جنات .. بحبك .. ههههه

-
وزير الدفاع : اكتب اسماء خمسة تمرر ليهم الدور
ـ1ـ اسرتي التدوينيه : نهى - عبدالله - ناصح

ـ2ـ وزراء كلابيز من اجل التغيير : معروفين

ـ3ـ من خارج مصر : بي بي - ايجزيانا

ـ4ـ من داخل مصر : بنت مصريه - ابيتاف

ـ5ـ واحد صاحبي متعرفيهوش

ملف صوتي .. من العباره السلام 98

وصلني اليوم بالبريد الالكتروني رساله من أحد الأصدقاء تحتوي ملف صوتي يقال انه لتسجيل من الصندوق الأسود للعباره السلام التي غرقت في البحر الأحمر منذ عدة أشهر .. حاولت في البدايه التأكد من محتوى الملف حتى أخبرني أخي انه تم عرض هذا الملف على قناة دريم في برنامج العاشرة مساءا ... و فيه تسمع صوت الكابتن يعطي تعليماته لأفراد الطاقم .. وفي نهايه التسجيل أصوات الركاب تتصاعد من خارج المقصوره تدعو الله .. بينما يردد أحد افراد الطاقم في هستيريا .. المركب بتغرق يا قبطان .. بعد كل هذا مطلوب منا ان ننسى القصه لأن النائب العام انهى التحقيق و كل عام وأنتم بخير

لي ملاحظة بسيطه على طريقه الحوار في التسجيل .. فإذا كانت هذه الطريقه في التفكير هي التي تدار بها مركب في أزمه وتتعرض للغرق .. سواءا طريقه الاوامر من القبطان او التعليقات من مساعديه .. فهي بالتأكيد انعكاس للطريقه التي تتعامل بها البلاد مع كل ازماتها و مشاكلها

-

.: اسمع الملف الآن :.

عيون الأفاعي

إذا شعرت بالحيـّـه تقترب منك .. فاعلم ان الوقت حان للابتعاد .. لاتحاول البحث عن قصص البطوله .. و روايات الاساطير .. لا تحاول الاستلقاء خلف مقود عاطفتك .. لا تعبأ بنظراتها .. بصوتها .. بآهاتها .. انطلق الآن .. لا تعبأ بما تسمعه منها .. أو ما تشعر به تجاهها .. لا تعبأ بكل الهراء الذي درسته سابقا عن كون السكون في مثل هذا الموقف هو الحل الأسلم .. فالسلبيه هي آخر ما تحتاجه اليوم .. صدقني .. لن تقوى على الانتظار .. لن تقوى على رؤية عيناها .. لن تملك من القوه ما يمكنك من الركض في الوقت المناسب .. أنت لا تصدقني .. و تعاند .. تصر على البقاء .. إذن .. أنت اخترت و عليك ان تتحمل تبعات اختيارك .. لكنني لن اكون شخصا متخاذلا .. فانت مني .. ولن تكون بعد الآن مثلي .. لن اتركك تسقط في نفس الفخ .. سأحذرك .. عسى ان تسمعني .. ستأتيك .. في هدوء .. رقيقه هي الافاعي .. هادئه .. تزحف اليك في ثقه .. ليونه .. تمتك من العضلات و المفاصل ما يجعلها في لحظة واحده .. قريبه من عينك .. فمك .. و قلبك .. لا تقل انك لم تشعر بها تتوغل الى داخل صدرك .. لا تقل لي انك لم تشعر بتلك الرعشه التي ولدتها في داخلك .. هي الآن قريبه جدا .. ستظل بنفس الرقه و اللين الذي عهدتها عليه .. بل قد تزيد .. و تزيد .. وتزيد .. انت الآن في قبضتها .. و صدقني لن تمهلك الوقت لتشعر باللذة .. لن تعطيك من الدقائق ما قد ينسيك الآتي .. ستضرب بقوه .. بعنف .. قلبك الهدف الأول .. و كبرياؤك الضحيه التاليه .. أنت الآن تصدقني .. رغم فوات الأوان .. كم حذرتك لكنك لم تصدقني .. الأفاعي يا هذا .. الأفاعي لا ترحم .. الأفاعي لا تعشق .. الأفاعي تتركك خلفها .. جثه هامده .. وتنطلق في نفس الهدوء .. و الرقه .. والنعومه .. بحثا عن الضحيه التاليه

التـجربة المصرية

التجارب المصريه .. دائما غنيه .. لها الف معنى .. و ألف طريقه .. و ألف مجرب .. و ملايين المجرب عليهم .. و النتيجه سلسله حتميه من النتايج المخزيه .. المزيد من الاخفاقات .. التراجع .. السقوط الحقيقي

__________________________________

-

1

-

اضغط الرسمه للتكبير

__________________________________

-
2
-

التجربة المصرية في مجال الاعمال الخاصه و المشاريع الفرديه او المحدوده .. تجربه فريده من نوعها .. التجربه المصريه دائما تجربه احباط .. احقاد .. صراعات .. نزاعات داخليه .. مكائد .. مشاكل .. كلها في النهايه تصب في مصلحه الفشل .. و نصره البطاله .. تخليك في عز حماستك و نشاطك بتحارب في اكتر من جبهه .. بتحارب ناس شايفهم .. و ناس تانيه مش قادر تميزهم .. الكل هدفه واحد .. ضربك في مقتل .. ابعادك عن تحقيق نجاح قد تكون على خطوات منه .. والمشكله الاكبر في تلك التجربه المصريه المميزه .. هي قدره هذه القوى مجتمعه على تشتيت انتباهك و تدميرك .. حتى لو كنت من اصحاب الخبرات العريضه .. و حتى لو كنت تتوقع مثل هذه الحروب .. و حتى لو كنت من اعتى القاده في التنميه البشريه .. و الرقي بالسلوك الانساني .. و الكلام الملخبط اياه .. هتلاقي نفسك فريسه سهله للكم البشع اللي بيحصل حواليك من المكائد و الضربات اللي هتقضي عليك و على نجاحك إن آجلا او عاجلا
التجربه المصريه .. فعلا تجربه مميزه .. في البدايه الكل في صفك .. الكل يشجعك .. لكن بمرور الوقت هتبان لبـّـتك على رأي محمود عبدالعزيز .. يا إما هتكون شخص هايف أو مثال حيّ على الانسان الروتيني المكتبي .. و ساعتها الكل هيفضل حبيبك و قريبك و نيني عينك من جوه .. أو .. إنك تثبت نفسك كشخص ناجح .. موهوب .. خلاق .. و ساعتها .. كل الايدين اللي كانت بتتمد الصبح علشان تسلم عليك .. هتتمد علشان تطعنك في ظهرك .. تطردك من مكانك .. تزاحمك في نجاحك .. تهدم كل اللي وصلتله و اللي كنت على وشك تحقيقه
التجربه المصريه .. تجربه تدمير شامل .. افتك من الاسلحه النوويه .. لأنها اسلحه بشريه جدا .. ودودة للغايه في مظهرها .. لكنها مدمره في باطنها .. التجربه المصريه في هدم النجاح تستحق فعلا انها تدرس في كل العالم .. كمثال حي على الذكاء البشري في احداث التدمير و القضاء على النجاحات .. التجربه المصريه .. سلاح مصر القادم في مواجهه اي محاولة للرقي .. للنجاح .. للتطور .. للتغيييير

__________________________________

-
3

-

التجربه الوزاريه الجديده التي وجدنا انفسنا فيها .. نحن اعضاء كلابيز من أجل التغيير .. هي فرصه حقيقيه لإيجاد مناخ ديمقراطي بين مدونيين من طبقات و انماط فكريه مختلفه .. الموضوع فعلا جاد جدا يا جماعه .. واحد دكتور و واحد مهندس وواحد صحفي .. و غيره و غيره .. كل الناس دي هتتجمع و تحاول تفكر بطريقه واحده و اسلوب واحد .. هيجتمعوا على هدف و يحاول كل واحد بطريقته يعبر عنه .. حتى لو كان الموضوع في البدايه مجرد نكته .. او فكره لذيذه .. لكن النهايه انا متأكد انها هتكون يا إما تكرار للتجربه المصريه اياها .. او هتكون تجربه دنماركيه .. اقصد تجربه كلبوزيه جديده .. تؤكدلنا ان لسه في امل في التغيير اللي احنا عايزينه .. والايام بيننا .. يا ترى هيبقى في مشاكل و خلافات .. و لا هنقدر نتفاهم

بوصفي رئيس للوزراء .. فكان لازم اتفقد وزرائي الاعزاء .. و الحقيقه الوزير الوحيد اللي بدء تنفيذ مشروعات جديده هو وزير الاعلام و الدش .. سوسه المفروسه ... اللي ربنا يستر من فرستها دي و منرحش كلنا في داهيه .. فعلا هيه وزيره نشيطه جدا .. و افكارها جامده .. خصوصا استخدامها للصور .. يعني في امل كبير انها تترقى في القريب العاجل في حال قررت التقاعد و الحصول على تسويه معاش .. محدش ضامن الظروف .. أما الرئيس الحالي .. الست كلبوزة .. فهي مش معانا في الجو .. بتغيب .. و بترجع .. و نحن كحومة نطالبها بالتواجد اكتر و اكتر .. لأن الدولة لسه في أولها.. باقي الوزراء واضح انهم في مارينا .. ههههه .. ربنا يرجعهم بالسلامه ان شاء الله

كلابيز .. بدأت التنفيذ

الهيكل الوزاري لحركة كلابيز من أجل التغيير

----------------------------

شعارنا للمرحله القادمه : الكلابيز .. دولة لإصلاح الدولة

-

ـ الريس = كلبوزة

ـ رئيس الوزراء = زنجولا

ـ وزير الداخليه = عبدالله مفتاح

ـ وزير الخارجيه = المســافر

ـ وزير الاعلان و الدش = سوسه المفروسه

ـ وزير الصحه و الامراض = د. شيريهان

ـ وزير الدفاع = م. نوران شمعه

ـ وزيرالنقل والمواصلات = م. نهى

ـ وزير الأمر بالمعروف = ناصح امين

ـ وزير التجاره و البقاله = مروة

ـ وزير النفسيه و الترويحيه = ريهام عبدالغفور

ـ وزير القوى العامله و الكادحه = الغريب

-

هذا الهيكل تم بمعرفه رئيس الوزراء و منسق الحركه .. د.زنجولا .. و سيتعبر ساريا ما لم تصل اعتراضات من الهيئة المشكله في خلال اسبوع واحد من ساعته و تاريخه

-

___________________________________

-

-

حملة تفوووو على اسرائيل

--------------------------

ناس كتير سألت على حملة تفووو .. و الحقيقه انا فكرت في كافة الاقتراحات و الافكار اللي في دماغي و قعدت ارتب فيها يمين و شمال .. وانا بذاكر المسالك .. كنت بقرأ موضوع احتباس البول .. و فجأة طقت في دماغي فكرة فردية لموضوع التفافه ده .. و بعديها بشويه كنت بذاكر موضوع سلس البول الليلي و ساعتها طبت على دماغي فكرة جماعيه لموضوع التفافه برضه .. المهم نخش في الموضوع

-

ـ تفوو على اسرائيل .. طريقة فردية فعاله :ـ

الفكره بسيطه جدا .. كل ما حد يقول كلمه اسرائيل .. يروح تافف على شماله مرة .. بدون ما ينزل حاجه يا مقرفين .. عارف اللي في دماغكم .. انا قصدي يطلع صوت تفووووو و بس .. تخيل لو كل مواطن في كل ارض عربيه بيقول اسم اسرائيل تفوو .. اعتقد معناها واضح جدا .. و كافيه انها تبدد اي حلم يراود اليهود بوجود تأييد ليهم في قلوب البعض .. ساعتها هتكون اسرائيل جربه حقيقيه .. حثاله الحثاله .. والأحلى من كده ان لغة التف لغه عالميه .. هتقترن باسم اسرائيل .. يعني لو واحد من جزر الكوكوواوا .. سمع اسم اسرائيل تفووو .. هيسأل ايه اللي وصل الموضوع لكده .. هيعرف .. هيفهم .. عارفين يا جماعه .. زي بالضبط لما نقول كلمه اليهود .. لازم وراها ربنا يحرقهم .. او تقول شارون .. و وراها الاهي يجحمه مترح ما راح .. و هكذا

-

ـ تفوو على اسرائيل .. طريقة جماعيه معبره :ـ

الفكره محتاجه تجمع .. في شكل تظاهره .. المكان مثلا ميدان التحرير .. هنرسم علم اسرائيل .. خطين زرق و كام نجمه كده على طول دوران الميدان .. داير ما يدور .. و نقف كلنا على الرصيف بانتظار ساعه الصفر و كله يبدأ يتف .. المره دي تفافه بجد .. عايزين نغرق الشارع .. و احلى حاجه الناس من عربياتها و هيه معديه تتف معانا .. على الارض طبعا مش علينا اللي يكرمكوا .. المهم .. الكاميرات تصور .. وبدل مشهد حرق العلم اياه .. اللي كل الناس و العالم حفظوه .. تلاقي السي ان ان يا ولاد .. جايبه علم اسرائيل و الشعب المصري بيتف عليه .. بركاتك يا كلابيزوووو

-
ـ اقتراحات اخرى :ـ
وصلتني اقتراحات اخرى مثل تجميع التفافه في اكياس و ارسالها إلى اسرائيل .. أو اننا نتف كلنا في وقت واحد من البلاكونات .. بس يعني كلها افكار جميله لكن مش هتجمعنا على هدف واحد .. و مش سهله التنفيذ .. علشان كده انا قدمت الاقتراحين الاوليين .. و بانتظار ارائكم

-
___________________________________

حمـّـلة .. كـلـّـم لبنان
-----------------------

من حوالي سنتين .. كانت الحرب على العراق في اولها .. و ساعتها خرجت مبادرات كتير علشان نساعد الشعب العراقي .. و كان من أجملها و اسهلها طريقه الاتصال بأرقام عشوائيه في العراق بغرض مسانده الناس هناك .. واللي كان طرحها عمروخالد .. و دلوقتي .. و لأن نفس الظروف بتتكرر في لبنان .. ففكرت نعمل نفس الفكره تاني .. الموضوع ببساطه انك هتتصل برقم الكود الدولي للبنان 00961 و بعد كده هتطلب اي سبع ارقام عشوائيه .. اللي هيرد عليك هتعرفه بنفسك .. و تقوله انك من مصر و أنك معاه .. أسأله عن أحواله و احوال البلد .. اعرف منه مشاكلهم ايه و اسأله على طريقه مناسبه للمساعده .. متهيألي لبنان عدد سكانها بسيط جدا بالنسبه لينا .. يعنى ممكن يكون لكل لبناني صديق مصري في كام يوم .. طبعا هتقولوا المكالمه غاليه و القصص اياها دي .. علشان كده ممكن تبعت رساله من الموبايل .. على الارقام 009613 أو 0096170 و بعديها اكتب اي ست ارقام عشوائيه و ابعتلهم كلام من قلبك في الرساله دي .. خليهم يحسوا ان الناس بره معاهم و حاسه بيهم و بتحاول توصلهم بأي طريقه

-

ملاحظة : شكر خاص وواجب إلى مدونة بي بي العزيزه لمساعدتها ليه في تحضير هذه الحمله

أنا جيت

انا جيت .. معلش يا جماعه كان عندي امتحانات ..عظام و مسالك و حاجه خنقه يعني .. ده غير ان النت واقع و لسه لغايه دلوقتي و الواحد داخل من النت بتاع التليفون و حاجه تخنق يعني .. المهم .. النهارده انشاء الله في تدوينات جديده خاصه بحركة كلابيزووو و تأسيس مجلس الاداره .. تابعونا ... بالمناسبه ياريت يا جماعه لو حد يعرف الريس الفنزويلي شافيز يسألي كده لو ليه بنت صغيره عايزه تتجوز .. يعني .. سؤال بريء كده

-

ملاحظات هامه :ـ

بعد لما سبت المدونة لمدة اسبوع .. بس .. اكتشفت حدوث حاجات غريبه .. يعني مثلا حركة كلابيز من أجل التغيير وصلت لموقع ولاد البلد .. و ده خبر كويس جدا .. و حاجه ايجابيه في حقنا و في حق الكلبوزة السمباتيك خاصه اللي اتوقع تبقى زعيمه قوميه قادمه للكلابيز .. و تطلع في التليفزيون في برنامج خلف الاسوار و حاجات كده بقه - اقرأ الخبر

-

أما الخبر التاني .. المزعج .. فكان كلمة نهى بأن في معركة في موضوع عمروسليم .. و بمجرد ما رجعت للخبر .. القديم أوي .. لقيت فعلا مهزلة في الكلام و حوالي 250 تعليق .. وكله للأسف كلام هايف و اتهامات ملهاش اي لازمه و مش هتحل اي مشكله .. و كأن مصر كلها .. بقت موظفين في الدستور .. و برغم كل شيء .. فأنا خارج هذا الموضوع تماما .. ومكتبتش رأيي فيه لأني شايف ان في مصايب اهم كتير في الدنيا من خناقات الدستور .. كفايه عليه لبنان .. اللي كان نفسي اكون فيها دلوقتي مع مجموعات الاطباء اللي سافرت هناك لكن منها لله التأشيره و الامتحانات .. و شايف ان مشاكل مصر اكبر من مشكله الدستور .. و كفايه عليه اوي اوي ان الدستور بتجيلي و بقراها .. و لسه حاسس انها جرنان يستحق القراءه .. برغم كل شيء .. المهم ان الموضوع كبر اوي ووصل لموقع علاء و منال .. مع اني كان نفسي يكون وجود مصرنا على موقع زي علاء و منال في حاجه اهم من كده .. ميكونش الخبر نوع من انواع الفضايح للموقع اكتر من كونه مدح في مكوناته .. لكن يكفيني ان علاء طلعني براءه من القضيه .. و أقر بأن المدونه كانت هادئه وبسيطه من رسام بيعشق فن عمرو سليم و يتمنى ان يمتلك موهبته و افكاره .. و بجد كفايه عليه المسالك و اللي حصل في امتحانها .. حسبي الله و نعم الوكيل - اقرأ الخبر

في أرض الجنوب .. زجل زنجولاوي

لبنان

في سهول البقاع

و ارض الجنوب

تذوب الشفاه .. تذوب

في رشفة ماء

بقلب الاناء

تفيض على جنبات الدروب

تزيل عن الرمل اثر المسير

لطفل صغير

وتخلط بالماء اثر الدماء

تصير هباء

تزيل عن الدهر لون الحروب
في ارض الجنوب

عيون تقاتل .. عهد تجدد

تذود بروحها .. لا تتردد

تبايع ربـًا .. بجهد دؤوب

على قسماتها ضحكة امل

و روح تناجي .. بصدق و عمل

تباهي سواها .. بأثر الندوب

ونحن هنا .. صرنا قيد التمنى

نمّـني النفوس .. ونبقى نغني

وننسى سوانا

و اطفال قانا

ونحني رؤوسنا .. يئسا .. هوانا

أنبقى نعيش في طور الهروب

وننسى رفاتا بأرض الجنوب

جوليا .. لبنان

غالبتني دموعي اليوم مرتين .. و برغم احساس الألم و اليأس الذي ملأني في كلتاهما .. لكن هذا الألم اختلف باختلاف الموقف .. في المرة الأولى .. كانت كلمات الخنزير الاسرائيلي اولمرت امام خريجي مدرسه عسكريه اسرائيلية .. و هو يتباهي بموقف العربي الايجابي هذه المرة من العدوان الاسرائيلي على لبنان .. فاستشهد الخنزير الاسرائيلي بموقف الخنازير العربيه المشابهه .. و التي ادانت حزب الله .. بعد ان دابت طوال السنوات الماضيه على ادانة اسرائيل نفسها ... لكن من يدمن طعم الشجب و الادانه .. يصل إلى مرحله من الانكسار و الغباء تجعله لا يميز بين الحق و الباطل .. فعينه ترى ضوءا وحيدا .. هو ضوء المصلحه .. حتى و إن كانت على حساب كرامته .. وطنيته .. قوميته

الموقف الثاني كان أكثر ألما .. كاد يعصف بقلبي .. اذ كانت متابعتي لنشرات الاخبار المتتاليه للاطلاع على اخبار لبنان .. و اذ أرى العصفور اللبناني المغرد .. جوليا بطرس .. تخرج على قناة نيو تي في .. تتحدث بكلمات مؤلمة عن لبنان .. عن قانا .. عن الايدي العربيه التي شاركت في المذبحة هذه المره .. بصمتها .. بوقوفها في صف اسرائيل .. تحدثت جوليا بحس الفنان .. و الم الانسان .. ولوعة المواطن اللبناني الملتاع على ارضه .. كانت كلماتها حقا مؤلمه .. هي لبنانيه .. ظلت في وطنها تقاوم .. و الست هيفا وهبي رمز لبنان .. هربت في اول فرصه لاحياء حفلاتها في المدن العربيه .. لبنان هو روح حزب الله .. لبنان هو عزيمة جوليا بطرس .. لبنان هو طهاره روح شهداء قانا .. لبنان لم يكن .. و لن يكون ابدا .. هزة وسط هيفاء وهبي

-

تغنت جوليا بصوتها العذب فقالت

قاوم فيداك الإعصار

لا تخضع فالذل دمار

وتمسك بالحق فإن الحق سلاحك مهما جار

قاوم فيداك الأعصار

وتقدم فالنصر قرار

ان حياتك وقفة عز تتغير فيها الأقدار