2007/06/09

لمستك .. كفايه بقه

لمستك

لمست بإيديا الخازوق
جرحه معلم لا يمكن يروق
و الليله هيه النهايه .. يا ريس كفايه
ده عمري خلاص انتهى -
-
لمست بإيديا الخازوق
جرحه معلم لا يمكن يروق
و الليله ناويها نيه .. مظاهره قويه
ما كل اللي ليه اتنسى
-
ولازم نعيش م النهاره في امان
كفايه علينا سنين الهوان
عشتوا تمصمصوا فينا .. و دايسين علينا
اكلتوا في قوتنا كمان -
-
سرحت بخيالك ل فين
ايوه انت ناوي تورث لمين
والنعمه بعنا القضيه
جمالك رزيه
لا يمكن هيمسك في يوم
_________________________
-
الانتعاشه الاقتصاديه القادمه
-
ايها الاخوه المواطنون .. لقد اجتازت مصر فتره عصيبه من الغلاء و اللسوعه .. ازدادت فيها اسعار السلع الى حد الجنون .. و قلت فيها المرتبات و الحوافز .. و استغل الوضع ثلة من المرتشين و الفاسدين الذين اداروا احوال الوطن كما يريدون .. وعبثوا بإراده الشعب و مرمغوه ف التراب .. لذا فقد قررنا نحن رئيس جمهوريتنا .. أن نعلن لكم عن القرار رقم 403040 التابع لرئاسه الجمهورية و الذي ينص على زياده قدرها 15 % على المرتبات .. لجميع فئات الشعب العامله .. داعين الله العلي القدير .. أن يمد في اعمارنا و يبارك لنا في ثرواتنا حتى نقدر على متابعه هذه العطايا و المنح .. و نكون نعم الراعي لأوسخ رعيه ... و الله الموفق
-
إمضاء / السيد رئيس الجمهورية
-
-
ملاحظات هامه : تعديلات وردت حالا من رئاسه الجمهورية على القرار 403040 لسنه 2007 محلي
أولا : ستكون الزياده على اساسي المرتب فقط .. و الحدق يفهم
ثانيا : سيتم الغاء الحوافز و البدلات .. طالما بقه فيه زياده على الاساسي يا بشر
ثالثا : لن يتم تطبيق قوانين الاحتكار او الغش التجاري بدايه من اليوم حتى نتيج للتجار استغلال الزياده في تحقيق نمو اقتصادي و عمله صعبه للبلاد .. خليها تروق و تحلى بقه

7 comments:

..........tahayo2at said...

أخيرااااااااااااااا
أنا اللي هقص الشريط

ألف شكر يا سيادة الريس طنطاوي على الزيادات و ربنا يخليك للحرامية و المحتكرين

و يا ريت بس نعمل كادر للناشالين لأنهم غلابة

و عشان كدة احنا اخترنااااااااااااااااك

يا طنطاوي
أحسن أروح في داهية

محمد عبد الغفار said...

متتعبش نفسك وتحرق دمك

أن غداً لناظره لقريب

Radwa said...

لمستك

لمست بإيديا الخازوق
جرحه معلم لا يمكن يروق
و الليله هيه النهايه .. يا ريس كفايه
ده عمري خلاص انتهى -
-

لمست بإيديا الخازوق
جرحه معلم لا يمكن يروق
و الليله ناويها نيه .. مظاهره قويه
ما كل اللي ليه اتنسى
-
ولازم نعيش م النهاره في امان
كفايه علينا سنين الهوان
عشتوا تمصمصوا فينا .. و دايسين علينا
اكلتوا في قوتنا كمان -
-

سرحت بخيالك ل فين
ايوه انت ناوي تورث لمين
والنعمه بعنا القضيه
جمالك رزيه
لا يمكن هيمسك في يوم


لا بجد بجد تحفه جميله اوى ماشيه مع الاغنيه خالص والله بقالك لازمه يا سى عمرو

أشرف حمدي said...

هههههههههههههه
يخرب عقلك يا داكترة
حلوة مووووووت
لولا الملامة من أمن الدولة أنا كنت غنيتهالك والله
بس اللوجو كمان يحمل معنى ربما ليس مقصودا ولكنه رائع
كفاية غنى يا عمرو يا مصطفى
هههههههههههههه

Dr. Tantawy said...

أشرف حمدي


يا عم غني :) محدش واخد منها حاجه
وحدووووووووووووه

أشرف حمدي said...

لأ واخدين
الخازوق

هههههه بس حلوة لمس بايديا الخازوق دي
داخلة دماااااغي بجد
(الأغنية مش الخازوق)

known said...

هو احنا لائيين شغل الاول لما يزيدوا المرتبات ,الواحد عمال يلف في الشوارع وتجيلو ضربه شمس ودي احنا بنعمل اللي علينا عشان محدش يقول علي جيلنا جيل كسول ومستني الوظيفه تجيلو. ...وبعدين15% دول تلاقي يجيلهم30جنيه ولا حاجه وده مبلغ هيعمل ايه ولا ايه في الاسعار الولعه دي...وعقبال لما الواحد يلاقي شغل كويس ويستني الزياده يكون اتحال علي المعاش ووصل للستين...واحسن حاجه ان الواحد يدور علي شغل بره البلد دي وتكون الفلوس اللي بياخدها بيتساوي جهده ...وربنا معانا ويارب حال البلد يتصلح
butterfly)